အခန်း ၁

အခန်း (၁) အစပြုသူအတွက် ကံစမ်းလက်ဆောင်ထုတ် ကိုယ်ခန္ဓာ အသွင်ပြောင်း ကျင့်စဉ်

၁၄၇၃ ခုနှစ်တွင် မဟာတိုက်ပွဲကြီး စတင်ခဲ့သည်။

မန်ပြည်နယ်၊ လင်းအန်းနယ်မြေ၊ လဲ့ချွမ်းမြို့။

ပျက်စီးယိုယွင်းနေသော တောင်စောင့်နတ်ကွန်းတစ်ခုအတွင်း၌ ရှောင်ပီလီသည် တစ်ကိုယ်လုံး အရိုးအဆစ်များ ပြုတ်ထွက်တော့မည့်အလား နာကျင်စွာဖြင့် ထိုင်ချလိုက်သည်။

"ငါ ဘယ်ရောက်နေတာလဲ"

ပတ်ဝန်းကျင်ကို ဝေ့ဝဲကြည့်လိုက်သောအခါ ရှောင်ပီလီမှာ မည်သို့ဖြစ်ပျက်မှန်းမသိဘဲ တွေဝေသွားသည်။

သူသည် ကလပ်၌ ဖောက်သည်အချို့နှင့်အတူ ငွေကြေးအမြောက်အမြားသုံးစွဲကာ တစ်ညလုံး ပျော်ပါးခဲ့ခြင်း မဟုတ်ပါလော။ ဤသို့သောနောက်ပြောင်မှုကို မည်သူကများ လုပ်ရက်လေသနည်း။

"အား"

သူနှင့် မသက်ဆိုင်သော မှတ်ဉာဏ်များက ရုတ်တရက် အုံကြွလာသည်။

"မြန်မြန်ပြေး"

"သူတို့ကို ငါ တားထားမယ်"

"……"

ရုပ်ပုံလွှာများက မျက်စိရှေ့တွင် လျင်မြန်စွာ ဖြတ်သန်းသွားသည်။

"ငါ တကယ်ပဲ ကူးပြောင်းလာတာလား"

ကြာရှည်စွာ စဉ်းစားပြီးနောက်တွင်တော့ သူသည် မိမိစိတ်ထဲရှိ မှတ်ဉာဏ်များကို စနစ်တကျ ပြန်လည်စီစစ်နိုင်ခဲ့သည်။

သူ တကယ်ပင် ကူးပြောင်းလာခဲ့ပြီ။

ဤခန္ဓာကိုယ်၏ ပိုင်ရှင်မှာလည်း ရှောင်ပီလီပင် ဖြစ်သည်။ သူသည် လင်းအန်းနယ်မြေ၊ လဲ့ချွမ်းမြို့မှ ရှောင်မိသားစု၏ တတိယမြောက် သခင်လေးဖြစ်သည်။ သူ၏မိခင်မှာ မွေးဖွားစဉ်ကပင် ကွယ်လွန်ခဲ့ပြီး ဖခင်ဖြစ်သူမှာ ရှောင်မိသားစု၏ ဒုတိယမြောက် သခင်ဖြစ်သည်။ သူ ခြောက်နှစ်သားအရွယ်တွင် လင်းအန်းနယ်မြေမှ လင်းမိသားစု၏ သခင်မလေးအကြီး လင်းချင်းယွမ်နှင့် စေ့စပ်ပေးခြင်း ခံခဲ့ရသည်။

မူလကိုယ်ပိုင်ရှင်နှင့် လင်းချင်းယွမ်တို့မှာ ငယ်စဉ်ကတည်းက အတူကြီးပြင်းလာခဲ့သည့် ရင်းနှီးသူများ ဖြစ်ကြသည်။

သုံးနှစ်ခန့်က လင်းချင်းယွမ်သည် ကိုးဂိုဏ်း နှင့်ခြောက်ဂိုဏ်းစုမှ တစ်ခုဖြစ်သော စန်းယွမ်ဓားဂိုဏ်းသို့ ဝင်ရောက်ခဲ့ပြီး တပည့်ရင်း ဖြစ်လာခဲ့သည်။ လင်းမိသားစုမှာလည်း ချင်းကျိုးနယ်သို့ ပြောင်းရွှေ့သွားခဲ့ရာ သူတို့နှစ်ဦးမှာ အဆက်အသွယ် ပြတ်တောက်သွားခဲ့သည်။

လွန်ခဲ့သော တစ်ရက်က စန်းယွမ်ဓားဂိုဏ်း၏ ပြင်ပတပည့် လင်းဟိုင်သည် လင်းအန်းမြို့သို့ ရောက်ရှိလာခဲ့သည်... ထို့နောက် သူ၏အကြီးဆုံးဘကြီး ရှောင်ဖူးရှန့်က သူ့ကို ကိုယ်တိုင်ကိုယ်ကျ သတ်ဖြတ်ရန် ကြိုးပမ်းခဲ့သည်။

အကယ်၍ မူလကိုယ်ပိုင်ရှင်၏ ဖခင်နှင့် သစ္စာရှိသော အစေခံအချို့က အသက်စွန့်ကာ သူ့ကို ထွက်ပြေးစေခဲ့ခြင်းမရှိပါက သူ ယခုအချိန်တွင် သေဆုံးနေလောက်ပြီ ဖြစ်သည်။

ထို့ပြင် မူလကိုယ်ပိုင်ရှင်သည်လည်း မိမိဖခင် ရှောင်ဖူးရှန့်၏ဓားချက်အောက်တွင် ကျဆုံးသွားသည်ကို မျက်ဝါးထင်ထင် မြင်ခဲ့ရသည်။ သို့သော်လည်း ဖခင်ဖြစ်သူမှာ အဆင့်(၇)အစောပိုင်းအဆင့် ကျင့်ကြံမှုရှိသူ ဖြစ်သည့်အတွက် နောက်ဆုံးလက်တုံ့ပြန်မှုတွင် ရှောင်ဖူးရှန့်ကို ပြင်းထန်စွာ ဒဏ်ရာရစေခဲ့သည်။

ထိုသို့ဖြစ်သော်လည်း မူလကိုယ်ပိုင်ရှင်မှာ လွတ်မြောက်စဉ်အတွင်း လင်းဟိုင်၏ဓားချက်ကို ထပ်မံခံခဲ့ရသည်။

သူ မတောင့်ခံနိုင်တော့ဘဲ ကွယ်လွန်သွားဟန်တူသည်။ သို့မဟုတ်ပါက သူသည် ဤနေရာသို့ ရောက်လာမည် မဟုတ်ပေ။

ကောင်းကင်အခြေအနေကို ကြည့်ခြင်းအားဖြင့် မူလကိုယ်ပိုင်ရှင် သေဆုံးချိန်နှင့် သူ ကူးပြောင်းလာချိန်မှာ အချိန်သိပ်ခြားနားမည် မဟုတ်ကြောင်း သိသာသည်။

"ငါ့ဖခင်က ရှေးခေတ်သခင်ကြီးရဲ့ ဝိညာဉ်ကွဲချိတ်ကို ကြိုက်လို့ ငါ့ကို ဒီနာမည်ပေးခဲ့တာ၊ ဒီလိုမျိုး တိုက်ဆိုင်လိမ့်မယ်လို့ ဘယ်သူထင်မလဲ"

"ဒါပေမဲ့ ငါ ကူးပြောင်းလာပြီဆိုပေမဲ့ ဒီအစကတော့ တကယ့်ကို ကံဆိုးလွန်းတာပဲ"

ရှောင်ပီလီသည် ရင်ဘတ်မှ နက်ရှိုင်းစွာ စီးကျနေသော သွေးများအား ကြည့်ကာ စိတ်ထဲတွင် အေးစက်သွားသလို ခံစားလိုက်ရသည်။

ယခုလက်ရှိတွင် သူသည် လှုပ်ရှားရန်ပင် ခက်ခဲနေပြီး ဤအတိုင်းသာဆိုလျှင် သေချာပေါက် သေဆုံးရပေလိမ့်မည်။

"စနစ်……"

ရှောင်ပီလီသည် တိုးတိုးလေး ခေါ်လိုက်သည်။

ယခင်ဘဝက ဝတ္ထုများစွာ ဖတ်ဖူးသည့်အတိုင်း ကူးပြောင်းလာသူတိုင်းအတွက် စနစ်ဆိုသည်မှာ မရှိမဖြစ်လိုအပ်သောအရာ ဖြစ်သည်။

မည်သည့်တုံ့ပြန်မှုမျှ မရှိသဖြင့် ရှောင်ပီလီမှာ အနည်းငယ် စိုးရိမ်လာသည်။

ကူးပြောင်းလာပြီးပြီးချင်းပဲ ဒီလိုနဲ့ အဆုံးသတ်ရတော့မှာလား။

အခု သေလိုက်ရင်ရော အရင်ဘဝကို ပြန်ရောက်နိုင်ပါ့မလား။

ပြန်ရောက်နိုင်ရင်တော့ ကိစ္စမရှိ၊ မရောက်နိုင်ရင်တော့ အလကားဖြစ်သွားမှာပေါ့။

"စနစ်ဖေဖေကြီး"

【ခလွတ်】

【ရန်သူသတ် ၍ ကျင့်ကြံမှုတိုးတက်ရေးစနစ် တင်နေသည်... တင်ပြီးသွားပါပြီ】

【ချိတ်ဆက်မှု အောင်မြင်သည်။】

【ရန်သူသတ် ၍ ကျင့်ကြံမှုတိုးတက်ရေးစနစ်သည် အရှင်သခင်ကို ဝန်ဆောင်မှုပေးရန် ရည်ရွယ်ထားပြီး အရှင်သခင်အား ကမ္ဘာပေါ်တွင် အ‌တော်ဆုံးသူ ဖြစ်လာစေရန် ပျိုးထောင်ပေးပါမည်】

【အရှင်သခင်သည် ရန်သူများကို သတ်ဖြတ်ခြင်းဖြင့် ကျင့်ကြံမှုအမှတ်များ သို့မဟုတ် ပစ္စည်းဆုလာဘ်များကို ရရှိမည်ဖြစ်သည်။】

【ကျင့်ကြံမှုအမှတ်များသည် သိုင်းပညာကျွမ်းကျင်မှုကို တိုးတက်စေနိုင်သည်။】

တကယ်ပဲ……

ရှောင်ပီလီတစ်ယောက် စိတ်လှုပ်ရှားသွားသည်။

စာရေးဆရာတွေ ပြောတာ မှန်တာပဲ၊ စနစ်ဆိုတာ ကူးပြောင်းလာသူတိုင်းအတွက် မရှိမဖြစ်ပါပဲ။

မူလကိုယ်ပိုင်ရှင်၏ မှတ်ဉာဏ်များအရ ဤကမ္ဘာသည် တစ်ချက်ခုတ်ရုံဖြင့် တောင်တန်းများကို ခွဲနိုင်ကာ တစ်ချက်လှီးရုံဖြင့် မြစ်များကို လမ်းကြောင်းပြောင်းနိုင်သော ပုဂ္ဂိုလ်ကြီးများ ရှိသည့်နေရာ ဖြစ်သည်။

ဤခန္ဓာကိုယ်မှာလည်း သိုင်းပညာကို သင်ယူထားပြီး သွေးသန့်စင်ခြင်းအဆင့်ကို ပြီးဆုံးကာ အတွင်းအားထုတ်လုပ်၍ အဆင့်(၉)သို့ ဝင်ရောက်ရန် အနည်းငယ်သာ လိုအပ်တော့သည်။

သိုင်းလမ်းစဉ်ကို အဆင့်ကိုးဆင့် ခွဲခြားထားပြီး အဆင့်(၉)မှာ အနိမ့်ဆုံးဖြစ်ကာ အဆင့်တစ်မှာ အမြင့်ဆုံးဖြစ်သည်။

အမြင့်ဆုံးအဆင့်ထက် ကျော်လွန်သူများကို မြေပြင်မသေမျိုး ဟု ခေါ်ဆိုကြသည်။

【အရှင်သခင်၏ ဒဏ်ရာမှာ ပြင်းထန်နေသဖြင့် စနစ်မှ အလိုအလျောက် ကုသပေးနေသည်...】

နူးညံ့သော စွမ်းအင်တစ်ခုသည် ရှောင်ပီလီ၏ ခန္ဓာကိုယ်ထဲသို့ စီးဝင်လာပြီး ရေနွေးနွေးထဲတွင် စိမ်ထားရသကဲ့သို့ တစ်ကိုယ်လုံး နွေးထွေးသွားသည်။

အသက်ရှူအနည်းငယ် ကြာပြီးနောက်တွင်။

ထိုခံစားချက်များ ပျောက်ကွယ်သွားသောအခါ ရှောင်ပီလီသည် ခွန်အားများ ပြည့်ဝလာသည်ကို ခံစားလိုက်ရပြီး ရင်ဘတ်မှ ဒဏ်ရာမှာလည်း ပျောက်ကွယ်သွားခဲ့သည်။

【ခလွတ်】

【အရှင်သခင်အတွက် အစပြုသူအတွက် ကံစမ်းလက်ဆောင်ထုတ် အသစ်ရောက်ရှိနေပါသည်၊ ယခုပင် ထုတ်ယူမလား】

"ထုတ်ယူမယ်"

ရှောင်ပီလီသည် ချက်ချင်းပင် ဆုံးဖြတ်လိုက်သည်။

【ခလွတ်】

【ဂုဏ်ယူပါသည် အရှင်သခင်၊ သင်သည် သိုင်းဆရာကြီးအဆင့် သိုင်းကျမ်းများဖြစ်သော 'ကိုယ်ခန္ဓာ အသွင်ပြောင်း ကျင့်စဉ်'၊ 'လေမုန်တိုင်းဓားသိုင်းပညာ' နှင့် 'ဓားကျမ်း' တို့အပြင် ကျင့်ကြံမှုအမှတ် ၁၀၀၀ ကို ရရှိလိုက်ပါပြီ၊ ချက်ချင်း အသုံးပြုမလား】

【ခလွတ်】

【အောင်မြင်စွာ ထုတ်ယူလိုက်ပါပြီ၊ သိုင်းပညာအားလုံး၏ ကနဦး ကျွမ်းကျင်မှုအဆင့်မှာ ၅ ရာခိုင်နှုန်း ဖြစ်သည်၊ ကျေးဇူးပြု၍ စစ်ဆေးပေးပါ】

ကိုယ်ခန္ဓာ အသွင်ပြောင်း ကျင့်စဉ်လား။

ရှောင်ပီလီမှာ ဝမ်းသာလွန်း၍ အော်ဟစ်တော့မလိုပင်။

ရှောင်ပီလီသည် ကျော်ကြားလှသော ကိုယ်ခန္ဓာ အသွင်ပြောင်း ကျင့်စဉ် အကြောင်းကို ကြားဖူးသည်။ ၎င်းမှာ ဗောဓိဓမ္မဆရာတော်ကြီး ဖန်တီးခဲ့သည်ဟု ဆိုကြသော ရှောင်လင်ဂိုဏ်း၏ ထိပ်တန်းသိုင်းပညာဖြစ်သည်။

၎င်းသည် အကြောအခြင်များကို ပြောင်းလဲခြင်း၊ အရိုးအဆစ်များကို သန့်စင်ခြင်း၊ ပါရမီအရည်အသွေးကို ပြောင်းလဲပေးခြင်းနှင့် အတွင်းအားကို လေ့ကျင့်ပေးခြင်းတို့တွင် ထူးခြားသော အစွမ်းရှိသည်ဟု ယုံကြည်ကြသည်။

"အသုံးပြုမယ်"

ချက်ချင်းဆိုသလိုပင် မှတ်ဉာဏ်များက ရှောင်ပီလီ၏ စိတ်ထဲသို့ စီးဝင်လာသည်။ သူ ကိုယ်ခန္ဓာ အသွင်ပြောင်း ကျင့်စဉ်ကို နှစ်ပေါင်းများစွာ လေ့ကျင့်ခဲ့သကဲ့သို့ ခံစားရပြီး သူ၏ခန္ဓာကိုယ်မှာလည်း အကြောအခြင်များ ပြောင်းလဲသန့်စင်သွားကာ အနံ့အသက်ဆိုးများ ထွက်ပေါ်လာသည်။

သူ၏ ခန္ဓာကိုယ်မှာ အနက်ရောင် ချေးညှော်လွှာ တစ်ခုဖြင့် ဖုံးအုပ်သွားသည်။

အချိန်တိုလေးအတွင်းမှာပင် သူသည် ကိုယ်ခန္ဓာ အသွင်ပြောင်း ကျင့်စဉ်ကို ကျွမ်းကျင်ပိုင်နိုင်သွားခဲ့ပြီ။ အားနည်းသော အတွင်းအားတစ်ခုသည် ဝိညာဉ်ပင်လယ်မှ ဖြစ်ပေါ်လာပြီး ခန္ဓာကိုယ်တစ်လျှောက် စီးဆင်းကာ ဝိညာဉ်ပင်လယ်ထဲသို့ ပြန်လည်စုစည်းသွားသည်။

"ငါ အဆင့်ဝင်သွားပြီလား"

ရှောင်ပီလီမှာ မယုံနိုင်စရာပင်။

မူလကိုယ်ပိုင်ရှင်မှာ နှစ်ပေါင်းများစွာ လေ့ကျင့်ခဲ့သော်လည်း အဆင့်ကိ(၉)သို့ မရောက်ခဲ့သော်လည်း ယခုမူ ကိုယ်ခန္ဓာ အသွင်ပြောင်း ကျင့်စဉ် ကျွမ်းကျင်မှု ၅ ရာခိုင်နှုန်းဖြင့်ပင် အဆင့်(၉)အထွတ်ထိပ်သို့ ရောက်ရှိသွားခဲ့သည်။

ယခင်ဘဝက ကျော်ကြားသော သိုင်းပညာမှာ မျှော်လင့်ထားသည့်အတိုင်းပင်၊ ၅ ရာခိုင်နှုန်းဖြင့်ပင် ဤမျှစွမ်းအားကြီးနေလျှင် ၁၀၀ ရာခိုင်နှုန်းဆိုပါက မည်မျှ ကြောက်ခမန်းလိမ့်မည်နည်း။

ရှောင်ပီလီသည် သူ၏လက်ထဲရှိ ဓားရှည်ကြီးကို ကြည့်လိုက်သည်။

"ဘုန်း"

ညင်သာစွာ ခုတ်လိုက်သောအခါ ဘေးရှိ ပူဇော်ပွဲစားပွဲမှာ အပိုင်းပိုင်း ပြတ်ထွက်သွားသည်။

"ဒါ အဆင့်ဝင် သိုင်းပညာရှင်တစ်ယောက်ရဲ့ ခွန်အားလား"

ရှောင်ပီလီသည် တိုးတိုးလေး ပြောလိုက်သည်။

【အရှင်သခင် - ရှောင်ပီလီ】

【ကျင့်ကြံမှုအဆင့် - အဆင့်(၉) အထွတ်ထိပ်】

【သိုင်းပညာများ - ကိုယ်ခန္ဓာ အသွင်ပြောင်း ကျင့်စဉ် (၅/၁၀၀)၊ လေမုန်တိုင်းဓားသိုင်းပညာ (၅/၁၀၀)၊ လှိုင်းပြာလက်ဝါးချက် (၁၀/၁၀၀)၊ ကျားနက်လက်သီးသိုင်း (၂၀/၁၀၀)】

【ကျင့်ကြံမှုအမှတ် - ၁၀၀၀】

"အစပြုသူအတွက် ကံစမ်းလက်ဆောင်ထုတ်ကို ကျေးဇူးတင်ရမှာပဲ၊ မဟုတ်ရင် ကျင့်ကြံမှုအမှတ် တစ်မှတ်မှ ရမှာမဟုတ်ဘူး"

ရှောင်ပီလီသည် တိုးတိုးလေး ပြောလိုက်သည်။

"စနစ်ပေးတဲ့ သိုင်းပညာနှစ်ခုရဲ့ ကျွမ်းကျင်မှုအဆင့်က နိမ့်လွန်းသေးတယ်၊ အရင်ဆုံး တိုးမြှင့်ရမယ်"

"လှိုင်းပြာလက်ဝါးချက်နဲ့ ကျားနက်လက်သီးသိုင်းက မူလကိုယ်ပိုင်ရှင်ရဲ့ သိုင်းပညာတွေ၊ အခြေခံသိုင်းတွေပဲမို့လို့ တိုးမြှင့်စရာ မလိုဘူး"

"ကျင့်ကြံမှုအမှတ် တစ်ထောင် အတိအကျ ကျန်သေးတယ်"

ရှောင်ပီလီက တွေးတောလိုက်သည် -

"စနစ်ရှိနေတဲ့အတွက် အေးအေးဆေးဆေးပဲ စောင့်ကြည့်ပြီး ခွန်အားကို အရင်ဖြည့်တင်းမယ်၊ ပြီးမှ လက်တုံ့ပြန်မယ်"

သူသည် မူလကိုယ်ပိုင်ရှင်၏ ဖခင်အတွက် ယခုချက်ချင်း လက်တုံ့ပြန်ရန် အစီအစဉ်မရှိသေးပေ။ စန်းယွမ်ဓားဂိုဏ်းမှာ ကမ္ဘာပေါ်ရှိ ကိုးဂိုဏ်း နှင့်ခြောက်ဂိုဏ်းစုမှ တစ်ခုဖြစ်သည့်အပြင် သူ၏အကြီးဆုံးဘကြီးမှာလည်း အဆင့်(၇) သိုင်းပညာရှင် ဖြစ်နေသည့်အတွက် ယခုလက်ရှိ သူနှင့်မမျှနိုင်ပေ။

"ကျွန်တော့်ကို အပြစ်မတင်ပါနဲ့"

"အရင်ဆုံး လူအချို့ကို သတ်ပြီး ခွန်အားတိုးအောင် လုပ်လိုက်ဦးမယ်၊ ပြီးရင်တော့ လက်တုံ့ပြန်ပေးပါ့မယ်"

ရှောင်ပီလီသည် သက်ပြင်းချလိုက်ပြီး စိတ်ထဲမှ တိုးတိုးလေး ရွတ်ဆိုလိုက်သည်။

"ကိုယ်ခန္ဓာ အသွင်ပြောင်း ကျင့်စဉ်ကို အဆင့်မြှင့်တင်ဖို့ ကျင့်ကြံမှုအမှတ် ၁၀၀ သုံးမယ်"

ရှောင်ပီလီသည် ဝိညာဉ်ပင်လယ်ထဲတွင် အပူဓာတ်တစ်ခုကို ခံစားလိုက်ရပြီး အတွင်းအားများမှာ ခန္ဓာကိုယ်တစ်လျှောက် လျင်မြန်စွာ လှည့်ပတ်နေသည်။ သို့သော် အနီးကပ်ကြည့်လိုက်သောအခါ ကိုယ်ခန္ဓာ အသွင်ပြောင်း ကျင့်စဉ်၏ ကျွမ်းကျင်မှုမှာ လုံးဝ တိုးတက်မလာပေ။

"ဒါက……"

"ကိုယ်ခန္ဓာ အသွင်ပြောင်း ကျင့်စဉ်က အတွင်းအားကျင့်စဉ်ဖြစ်ပြီး လေမုန်တိုင်းဓားသိုင်းပညာထက် အများကြီး သာလွန်တယ်"

"လေမုန်တိုင်းဓားသိုင်းပညာကို အရင်မြှင့်ကြည့်မယ်"

"လေမုန်တိုင်းဓားသိုင်းပညာကို အဆင့်မြှင့်ဖို့ ကျင့်ကြံမှုအမှတ် ၅၀၀ သုံးမယ်"

ရှောင်ပီလီ စကားအဆုံးတွင်။

သူ၏လက်များမှာ ပူနွေးလာပြီး လေမုန်တိုင်းဓားသိုင်းပညာကို လေ့ကျင့်ရသည့် အတွေ့အကြုံများစွာက ရှောင်ပီလီ၏ စိတ်ထဲသို့ စီးဝင်လာသည်။ သူ လေမုန်တိုင်းဓားသိုင်းပညာကို ဆယ်စုနှစ်ပေါင်းများစွာ လေ့ကျင့်ခဲ့သကဲ့သို့ပင်။

သူ့ရှေ့မှ စာရင်းမှာလည်း ပြောင်းလဲသွားသည်။

【အရှင်သခင် - ရှောင်ပီလီ】

【ကျင့်ကြံမှုအဆင့် - အဆင့်(၉) အထွတ်ထိပ်】

【သိုင်းပညာများ - ကိုယ်ခန္ဓာ အသွင်ပြောင်း ကျင့်စဉ် (၅/၁၀၀)၊ လေမုန်တိုင်းဓားသိုင်းပညာ (၃၀/၁၀၀)၊ လှိုင်းပြာလက်ဝါးချက် (၁၀/၁၀၀)၊ ကျားနက်လက်သီးသိုင်း (၂၀/၁၀၀)】

【ကျင့်ကြံမှုအမှတ် - ၄၀၀】

"ကျွမ်းကျင်မှုအဆင့် ၂၅ မှတ် တိုးသွားတယ်"

"ကျင့်ကြံမှုအမှတ် ၁၀၀ က ကျွမ်းကျင်မှု ၅ မှတ် တိုးစေတယ်"

"လင်းဟိုင်နဲ့ ရှောင်မိသားစုက ငါ့အလောင်းကို မတွေ့သေးသရွေ့ ငါ့ကို လိုက်ရှာနေဦးမှာပဲ"

"ဆက်ပြီး တိုးမြှင့်ရဦးမယ်"

"လေမုန်တိုင်းဓားသိုင်းပညာကို အဆင့်မြှင့်ဖို့ ကျင့်ကြံမှုအမှတ်အားလုံး သုံးမယ်"

နွေးထွေးသော စွမ်းအင်တစ်ခုသည် ခန္ဓာကိုယ်ထဲသို့ ထပ်မံစီးဝင်လာပြီး လေမုန်တိုင်းဓားသိုင်းပညာကို လေ့ကျင့်သည့် အတွေ့အကြုံများက စိတ်ထဲသို့ ထပ်မံဖြာထွက်လာသည်။

စာရင်းထဲရှိ လေမုန်တိုင်းဓားသိုင်းပညာ၏ ကျွမ်းကျင်မှုအဆင့်မှာလည်း ပြောင်းလဲသွားသည်။

【လေမုန်တိုင်းဓားသိုင်းပညာ (၅၀/၁၀၀)】

"လေမုန်တိုင်းဓားသိုင်းပညာက အဆင့်မြင့်တဲ့ အနေအထားကို ရောက်ပြီလို့ ပြောနိုင်တယ်မလား"

"အခုတော့ ဒီလောက်ဆို လုံလောက်ပါပြီ၊ ကျန်တဲ့ ကျင့်ကြံမှုအမှတ်တွေကို ကိုယ်ခန္ဓာ အသွင်ပြောင်း ကျင့်စဉ်အတွက် သိမ်းထားမယ်"

ထိုအချိန်မှာပင်။

အလျင်စလို ခြေသံများ နီးကပ်လာသည်။

"မြန်မြန်"

"ဒီမှာ သွေးစွန်းနေတယ်"

"ရှောင်ပီလီ ဖြစ်ရမယ်၊ အသက်ရှင်ရှင်၊ သေေသ အမြန်ဆုံးရှာဖို့ အကြီးအကဲက အမိန့်ပေးထားတယ်"

ဓားများကို ကိုင်ဆောင်ထားသော လူအုပ်ကြီးသည် အတွင်းသို့ ဝင်ရောက်လာသည်။

ခေါင်းဆောင်ဖြစ်သူမှာ ရှောင်ပီလီကို မြင်လိုက်ရသည့်အခါတွင်ပင် မျက်နှာမှာ ဝမ်းသာအားရ ဖြစ်သွားလေသည်။