အခန်း ၁၅၆

အခန်း (၁၅၆) နဂါးလှံရှည် ဂိုဏ်း - ကျောက်ရှင်း

"သောက်ကျိုးနည်း အရိပ် ဘုရင် ဒီလိုမျိုး သေသွားတာလား"

"ယန်ပေထျန်း ကို အနိုင်ယူနိုင်တဲ့သူ ဆိုတော့ တကယ်ကို သာမန် မဟုတ်ဘူးပဲ"

"ဒီလို အရည်အချင်း ရှိတဲ့ လူငယ်လေး တစ်ယောက်ရဲ့ အနာဂတ်က အကန့်အသတ် မရှိဘူး"

"သူနဲ့ မိတ်ဆွေဖွဲ့ပြီး သူ့အပေါ် ရင်းနှီးမြှုပ်နှံနိုင်ရင် ရလာမယ့် အကျိုးအမြတ်တွေက တွက်ဆလို့တောင် မရနိုင်ဘူး"

...

အရိပ် ဘုရင် ပြာကျသွားသည်ကို မြင်လိုက်ရသောအခါ လူအများ အလွန် အံ့အားသင့် သွားကြလေသည်။

ဤသူသည် နတ်ဆိုး လောက အက်ကွဲကြောင်း တွင် နာမည်ဆိုးဖြင့် ကျော်ကြားသော နတ်ဆိုးကြီး တစ်ပါး ဖြစ်သည် မဟုတ်ပါလား။

ဤမျှ အားနည်းလိမ့်မည်ဟု သူတို့ မထင်ထားခဲ့ပေ။ မူလက အနည်းငယ် ပိုကြာအောင် ရုန်းကန်နိုင်မည်ဟု ထင်ထားခဲ့သော်လည်း တိုက်ပွဲသည် လုံးဝ တစ်ဖက်သတ် ဖြစ်နေခဲ့သည်။

မကြာမီ ကြီးမားသော အဖွဲ့အစည်း အချို့မှ လူများက ကျိုးဟန်ကို ဆွဲဆောင်ရန် တိတ်တဆိတ် စဉ်းစားနေကြသည်။

ထိုသို့လုပ်ဆောင်ခြင်းဖြင့် သူတို့၏ နောက်ခံ အဖွဲ့အစည်းများ အကျိုးအမြတ် ရရှိမည်ဖြစ်ပြီး အကြံပြုသူ အနေဖြင့်လည်း ကြီးမားသော ဆုလာဘ်များ ရရှိမည်မှာ သေချာသည်။

"ဟင် တကယ်ပဲ ဝိညာဉ် ဆယ်သိန်း အလံ အပိုင်းအစ လား"

စနစ်၏ သတိပေးသံကို ကြားလိုက်ရသဖြင့် ကျိုးဟန် မျက်ခုံးများ ပင့်သွားပြီး ဝမ်းသာသွားလေသည်။

အရိပ် ဘုရင် သည် အပိုင်းအစများကို အချိန်ကုန်ခံ စုဆောင်းခဲ့သော်လည်း

နောက်ဆုံးတွင် ကျိုးဟန် အတွက် အကျိုးရှိသွားပြီး စုဆောင်းရသည့် ဒုက္ခများ သက်သာသွားစေသည်။

"အရိပ် ဘုရင် က တကယ့် လူကောင်းပဲ"

ကျိုးဟန် က သက်ပြင်းချကာ ပြောလိုက်လေသည်။

ယခု လက်ထဲတွင် အပိုင်းအစ သုံးခု ရှိနေပြီ ဖြစ်ပြီး တစ်ခုသာ လိုတော့သဖြင့် ဝိညာဉ် ဆယ်သိန်း အလံ ကို ပေါင်းစပ်နိုင်တော့မည် ဖြစ်ရာ စိတ်ထဲတွင် အလွန် သာယာနေလေသည်။

နောက်ဆုံး အပိုင်းအစ သည် မည်သည့်နေရာတွင် ရှိနေမည်ကို ယခုလောလောဆယ် သဲလွန်စ မရှိသေးသဖြင့်

ကျိုးဟန် အနေဖြင့် အခြေအနေ အရ သွားရုံသာ ရှိတော့သည်။

"ဒီစွမ်းရည်ရဲ့ အကျိုးသက်ရောက်မှုက ဘယ်လိုလဲ ထပ်ကြည့်ရအောင်"

ကျိုးဟန် က အကဲဖြတ်ခြင်း စွမ်းရည်ကို အသုံးပြုလိုက်ရာ စွမ်းရည်၏ အချက်အလက်များ စနစ် မျက်နှာပြင် ပေါ်တွင် ထွက်ပေါ်လာလေသည်။

အရိပ် တိုက်ခိုက်မှု (၁၀ ကြိမ်မြှင့်)

အရည်အသွေး - ဧကရာဇ် အဆင့်

အမျိုးအစား - တိုက်ခိုက်ရေး

ဖော်ပြချက် - ဝိညာဉ် သည် အရိပ် တစ်ခု အဖြစ် ပြောင်းလဲသွားပြီး ရန်သူကို ခုတ်ပိုင်း တိုက်ခိုက်သည်။

အကျိုးသက်ရောက်မှု - မဖြစ်မနေ ထိမှန်စေပြီး အဆ ၂၀ သော ဝိညာဉ် ထိခိုက်မှုကို ဖြစ်စေသည်။

"တကယ် ကောင်းတဲ့ စွမ်းရည်ပဲ ထိခိုက်မှု အဆက သိပ်မမြင့်ပေမယ့်လည်း မနိမ့်ပါဘူး"

"အထူးသဖြင့် ရာခိုင်နှုန်းပြည့် ထိမှန်စေတဲ့ အကျိုးသက်ရောက်မှုက အရမ်း အသုံးဝင်တယ်"

စစ်ဆေးကြည့်ပြီးနောက် ကျိုးဟန် က တိကျသော အားသာချက်များကို ခွဲခြမ်းစိတ်ဖြာ နိုင်ခဲ့သည်။

ဤစွမ်းရည်သည် လျင်မြန်မှု မြင့်မားသော ပစ်မှတ်များ အပေါ်တွင် တန်ပြန် အကျိုးသက်ရောက်မှု ရှိပြီး

အရေးကြီးသော အချိန်တွင် မထင်မှတ်ထားသော အကျိုးသက်ရောက်မှုကို ဖြစ်ပေါ်စေနိုင်သည်။

"စနစ် သတိပေးချက် - မသင်ယူရသေးသော စွမ်းရည်စာအုပ်ကို တွေ့ရှိပါသည် သင်ယူမည်လား"

"သင်ယူမည်" ကျိုးဟန် ရင်ထဲတွင် တီးတိုး ပြောလိုက်လေသည်။

"စနစ် သတိပေးချက် - သင်သည် စွမ်းရည် အရိပ် တိုက်ခိုက်မှု ကို အောင်မြင်စွာ သင်ယူပြီးပါပြီ"

မကြာမီ အရိပ် တိုက်ခိုက်မှု စွမ်းရည်စာအုပ် သည် အလင်းတန်း တစ်ခု အဖြစ် ပြောင်းလဲသွားပြီး ကျိုးဟန်၏ ဝိညာဉ် နှင့် ပေါင်းစပ်သွားလေသည်။

သူ၏ ဝိညာဉ် က ပိုမို အစွမ်းထက်လာသည်ကို သိသာစွာ ခံစားလိုက်ရသည်။

"အတွေ့အကြုံ အမှတ် နည်းနည်းလေး ရရင် အဆင့် ၅၀ ကို ရောက်တော့မယ်"

ကျိုးဟန် က အဆင့် သတ်မှတ်ချက် စနစ် မျက်နှာပြင် ကို တစ်ချက် ကြည့်ကာ သူ့ဘာသာ ရေရွတ်လိုက်လေသည်။

နယ်မြေ ၆၆၆ အဆင့် သတ်မှတ်ချက် စာရင်း

၁။ ကျိုးဟန် - အဆင့် ၄၉ (၉၁.၃၄ ရာခိုင်နှုန်း)

၂။ ဟန်ရှန်းနင် - အဆင့် ၄၁ (၄၄.၁၁ ရာခိုင်နှုန်း)

၃။ ဟန်ချင်ရွှယ် - အဆင့် ၄၁ (၁၅.၅၈ ရာခိုင်နှုန်း)

၄။ အိုးဟွမ် - အဆင့် ၃၆ (၁၉.၆၃ ရာခိုင်နှုန်း)

၅။ မေ့အောက်ရွှယ် - အဆင့် ၃၆ (၁၆.၆၆ ရာခိုင်နှုန်း)

၆။ ကုပ်ထို - အဆင့် ၃၆ (၁၀.၀၂ ရာခိုင်နှုန်း)

၇။ ကျာ့ဖေးချိုး - အဆင့် ၃၅ (၉၉.၁၄ ရာခိုင်နှုန်း)

၈။ လင်းဖန် - အဆင့် ၃၅ (၄၃.၅၃ ရာခိုင်နှုန်း)

၉။ ကျန်းတယ်ရွှိုက် - အဆင့် ၃၅ (၃၉.၁၀ ရာခိုင်နှုန်း)

၁၀။ ဝမ်ရွှိုက် - အဆင့် ၃၅ (၁၀.၃၁ ရာခိုင်နှုန်း)

...

ယနေ့ ဆက်လက်၍ မွန်းစတား များ သတ်ဖြတ်ရန် မဖြစ်နိုင်တော့သဖြင့် မနက်ဖြန် အထိ စောင့်ရတော့မည် ဖြစ်သည်။

တွေးမိသည်နှင့် ကျိုးဟန် က ဝိညာဉ် ဆယ်သိန်း အလံ အပိုင်းအစ ကို သိုလှောင် ကျောပိုးအိတ် ထဲသို့ သိမ်းဆည်းလိုက်ပြီး

ချန်းလဲ့ မြို့တော် သို့ ပြန်ရန် ပြင်လိုက်လေသည်။

"လူငယ်လေး ခဏနေပါဦး ကျုပ်က နဂါးလှံရှည် ဂိုဏ်း က ကျောက်ရှင်း ပါ နာမည် ဘယ်လို ခေါ်ပါသလဲ"

အနောက်မှ အသံ တစ်သံ ထွက်ပေါ်လာသဖြင့် ကျိုးဟန် ခြေလှမ်း ရပ်တန့်သွားပြီး လှည့်ကြည့်လိုက်လေသည်။

အဖြူရောင် ဝတ်ရုံ ဝတ်ဆင်ထားပြီး ငွေရောင် လှံရှည် တစ်လက်ကို ကိုင်ဆောင်ထားကာ အရှိန်အဝါ သာမန် မဟုတ်ပေ။

"ငါက ကျိုးဟန် ပါ ဘာကိစ္စ ရှိလို့လဲ" ကျိုးဟန် တည်ငြိမ်စွာ မေးလိုက်လေသည်။

"မင်း လက်ထဲက အပိုင်းအစ က ဝိညာဉ် ဆယ်သိန်း အလံ နဲ့ ဆင်တူနေလို့ အတည်ပြုချင်လို့ပါ" ကျောက်ရှင်း က ပြုံးကာ ပြောလိုက်လေသည်။

"ဟုတ်တယ် အဲဒါပဲ မင်းလည်း တွေ့ဖူးလို့လား" ကျိုးဟန် မျက်နှာ အမူအရာ ပြောင်းလဲသွားပြီး တစ်ဖက်လူက အကြောင်းပြချက် မရှိဘဲ ပြောမည် မဟုတ်ရာ လျှို့ဝှက်ချက် အချို့ကို သိနေနိုင်ပေသည်။

"ဒါပေါ့ လွန်ခဲ့တဲ့ ဆယ်ရက် ကပဲ ငါ တွေ့ခဲ့တာ"

ကျောက်ရှင်း က အတည်ပြုလိုက်ပြီး ဆက်ပြောလေသည်။

"ဒီလို အစွမ်းထက်တဲ့ မှော်လက်နက် မျိုးက အပိုင်းအစ ဖြစ်နေရင်တောင် အရမ်း ဆန်းကြယ်လွန်းတယ် ဒါကြောင့် ငါ့ရဲ့ မှတ်ဉာဏ်ထဲမှာ အရမ်း စွဲလန်းနေတာ"

"အို ဘယ်မှာလဲ ငါ့ကို မြန်မြန် ပြောပြပါ" ကျိုးဟန် အနည်းငယ် စိတ်လှုပ်ရှားသွားပြီး အလျင်စလို မေးလိုက်လေသည်။

ဤသည်မှာ နောက်ဆုံး အပိုင်းအစ ဖြစ်နိုင်ပြီး စုဆောင်းမိပါက ဝိညာဉ် ဆယ်သိန်း အလံ သည် ၎င်း၏ စွမ်းအားများကို ပြသနိုင်တော့မည် ဖြစ်သည်။

ထို့ကြောင့် ဤမျှ အလျင်လိုနေခြင်း ဖြစ်သည်။

ကျောက်ရှင်း ၏ မျက်နှာပေါ်ရှိ အပြုံးများ ပိုမို တောက်ပလာပြီး တစ်ချိန်တည်းမှာပင် သက်သာရာ ရသွားလေသည်။

သူ ထင်ထားသည့်အတိုင်း ကျိုးဟန် သည် ဤ အပိုင်းအစ အပေါ် အလွန် စိတ်ဝင်စားနေသည်။

ဤသို့ဆိုလျှင် ကျိုးဟန် နှင့် အဆက်အသွယ် ရသွားပြီဟု ဆိုနိုင်ပေသည်။

ဘေးရှိ အခြား အဖွဲ့အစည်း များမှ လူများ၏ မျက်နှာများမှာ အနည်းငယ် ဆိုးရွားသွားကြသည်။

သူတို့သည် ကျိုးဟန် နှင့် စကားပြောရန် အကြံအစည် အမျိုးမျိုး တွေးနေခဲ့ကြသော်လည်း အသုံးဝင်သော အရာ မရှိသဖြင့် မတတ်နိုင်ခဲ့ပေ။

မည်သို့ပင်ဖြစ်စေ ကျိုးဟန် ကဲ့သို့သော အစွမ်းထက်သူများ အတွက် သာမန် ပစ္စည်းများက သူ့ကို ဆွဲဆောင်နိုင်မည် မဟုတ်ပေ။

ထို့ကြောင့် နဂါးလှံရှည် ဂိုဏ်း မှ ကျောက်ရှင်း က အရင်ဦးသွားခြင်း ဖြစ်လေသည်။

"ကျိုးဟန် ညီအစ်ကို ဒီနေရာမှာ လူများလွန်းလို့ ငါ ပြောပြဖို့ အဆင်မပြေဘူး" ကျောက်ရှင်း က ပတ်ဝန်းကျင်ကို တစ်ချက် ကြည့်ကာ အခက်အခဲ ရှိဟန်ဖြင့် ပြောလိုက်လေသည်။

"ဟုတ်သားပဲ ငါ အရမ်း လောသွားတာ" ကျိုးဟန် ရှက်ကိုးရှက်ကန်း ပြုံးလိုက်ပြီး ချက်ချင်း သတိဝင်လာလေသည်။

မည်သို့ပင်ဆိုစေကာမူ ဤသည်မှာ လျှို့ဝှက်ချက် တစ်ခု ဖြစ်ပြီး ယနေ့ ညလည်း မိုးချုပ်နေပြီ ဖြစ်ရာ အခြားသူများ အရင်ဦးသွားပါက အလကား ဖြစ်သွားမည် မဟုတ်ပါလား။

"မနက်ဖြန် ကျိုးဟန် ညီအစ်ကို ငါတို့ နဂါးလှံရှည် ဂိုဏ်း ကို အလည်လာပါ အဲဒီအချိန်ကျရင် လျှို့ဝှက်ချက် တွေကို ထပ်ဆွေးနွေးကြတာပေါ့ ဘယ်လိုလဲ" ကျောက်ရှင်း က အကြံပြုလိုက်လေသည်။

"အင်း ကောင်းပြီလေ" ကျိုးဟန် ခေါင်းညိတ်လိုက်ပြီး နောက်ဆုံး ဝိညာဉ် ဆယ်သိန်း အလံ အပိုင်းအစ အတွက် တစ်ခေါက် သွားရသည်မှာ လုံးဝ တန်ပေသည်။

"ဒီ နဂါးလှံရှည် တံဆိပ် ကို ယူထားပါ ငါတို့ ဂိုဏ်း ရဲ့ အစီအရင် တွေကို လွတ်လပ်စွာ ဝင်ထွက်နိုင်တယ်"

ကျိုးဟန်ကို ဆွဲဆောင်ရန် ကျောက်ရှင်း သည် ရွှေရောင် တံဆိပ် တစ်ခုကို ကမ်းပေးလိုက်ပြီး ဂိုဏ်းချုပ် မှလွဲ၍ အမြင့်ဆုံး အာဏာကို ပေးအပ်လိုက်ခြင်း ဖြစ်သည်။

သူတို့ နှစ်ယောက် အပြန်အလှန် လိုအပ်ချက်များ ရှိနေသဖြင့် ချက်ချင်းပင် သဘောတူညီမှု ရရှိသွားပြီး

စကား အနည်းငယ် ပြောဆိုပြီးနောက် ရင်းနှီးသွားကြလေသည်။

"ဒါဆို ငါ အရင် ပြန်တော့မယ် ပြင်ဆင်စရာလေးတွေ ရှိလို့ မနက်ဖြန် ကျိုးဟန် ညီအစ်ကို ရောက်လာမယ့် အချိန်ကို စောင့်နေပါ့မယ်"

ကျောက်ရှင်း က လက်အုပ်ချီကာ ပြုံး၍ ပြောလိုက်ပြီး ကျိုးဟန် ၏ အဖြေကို ရရှိပြီးနောက် ပျော်ရွှင်စွာ ထွက်ခွာသွားလေသည်။

"ကျွတ်ကျွတ်ကျွတ် ကျိုးဟန် လို အစွမ်းထက်တဲ့ သူကို ဆွဲဆောင်နိုင်ရင် နဂါးလှံရှည် ဂိုဏ်း က ပိုပြီး အစွမ်းထက်လာမှာ သေချာတယ်"

"နှမြောစရာပဲ ငါတို့ အခွင့်အရေး ကို လက်လွတ်လိုက်ရတယ် ဟူး"

"သူတို့ ဝိညာဉ် ဆယ်သိန်း အလံ အကြောင်း ပြောနေတာ မင်းတို့ သတိမထားမိဘူးလား ဒါက အရမ်း အစွမ်းထက်တဲ့ မှော်လက်နက် လေ နာမည်ကြီးတယ်"

"ကျိုးဟန် လက်ထဲမှာ အပိုင်းအစ တစ်ခု ထက်မက ရှိနေလောက်တယ် ပေါင်းစပ်လိုက်ရင် ဘယ်လောက် အစွမ်းထက်မလဲ ဆိုတာ ငါ ပြောစရာ မလိုတော့ပါဘူး"

...

လူအများ စကားများနေကြပြီး အနည်းငယ် နှမြောနေကြကာ ကျောက်ရှင်း ထွက်ခွာသွားသော နောက်ကျောကို ကြည့်ပြီး အားကျသော အကြည့်များဖြင့် ကြည့်နေကြလေသည်။

ကိစ္စများ ပြီးဆုံးသွားပြီ ဖြစ်ရာ ကျိုးဟန် အနေဖြင့် ဆက်လက် နေထိုင်ရန် အကြောင်း မရှိတော့သဖြင့်

နတ်ဆိုး လောက အက်ကွဲကြောင်း ၏ ထွက်ပေါက် ဆီသို့ လျင်မြန်စွာ ထွက်ခွာသွားလေသည်။

လူအများ ထွက်ခွာသွားချိန်တွင် အမှောင်ထဲတွင် ဆိုးသွမ်းသော ပုံရိပ် နှစ်ခု ထွက်ပေါ်လာလေသည်။

"ဝိညာဉ် ဆယ်သိန်း အလံ က နောက်ဆုံးတော့ ပြန်ပေါ်လာပြီပေါ့"

"ကျိုးဟန် နဂါးလှံရှည် ဂိုဏ်း ဝိညာဉ် ဆယ်သိန်း အလံ ဟဲဟဲ"

"ဆရာတော့ သေချာပေါက် အရမ်း စိတ်ဝင်စားမှာပဲ"

ဝေ့ဝူယာ က အနက်ရောင် ဝတ်ရုံဖြင့် ရက်စက်သော မျက်နှာကို ဖုံးကွယ်ထားပြီး

အက်ကွဲနေသော အသံက ငိုသံလိုလို ရယ်သံလိုလို ထွက်ပေါ်လာလေသည်။

"ဟဲဟဲ ဝိညာဉ် ဆယ်သိန်း အလံ လား နောက်ဆုံးတော့ သတင်း ရပြီပေါ့"

"ဒီ မှော်လက်နက် က ငါတို့ သွေးဝိညာဉ် နန်းတော် အတွက် ဖန်တီးထားတာပဲ" အခြား ပုံရိပ် တစ်ခု က အေးစက်စွာ ပြုံး၍ ပြောလိုက်လေသည်။

"ဆရာ့ကို မြန်မြန် သတင်းပို့ပြီး ကြိုတင် ပြင်ဆင်ခိုင်းရမယ်" ဝေ့ဝူယာ က အမိန့်ပေးလိုက်ပြီး ဆက်ပြောလေသည်။

"ပြီးတော့ ဒီသတင်းကို သံလက်သီး ဂိုဏ်း ရဲ့ ယန်ပေထျန်း ဆီကိုလည်း လူလွှတ်ပြီး အကြောင်းကြားလိုက်"

"အစ်ကိုကြီး ဒီအကြံက အရမ်း မိုက်တယ် သူတို့ကို အသေအကြေ တိုက်ခိုင်းပြီး ငါတို့က နောက်ဆုံးမှ အကျိုးအမြတ် ယူကြမယ်"

"ဟွန့် သိရင်ပြီးတာပဲ မြန်မြန် သွားလုပ်စမ်း" ဝေ့ဝူယာ က ဂုဏ်ဆာစွာ ပြောလိုက်လေသည်။

မကြာမီ သူတို့ နှစ်ယောက် အမှောင်ထဲတွင် ပျောက်ကွယ်သွားလေသည်။

...