အခန်း ၂၃၁

အခန်း ၂၃၁ ပြန်လည်မွေးဖွားခြင်းဒိုင်းလွှား

ဒေါသတကြီး အော်ဟစ်သံက အဆုံးမဲ့သော လေပြင်းများနှင့်အတူ ထွက်ပေါ်လာလေသည်။

ကျိုးဟန်သည် ကောင်းကင်ယံထက်တွင် ပျံသန်းနေပြီး သူ၏မျက်လုံးများက အလွန်တရာ အေးစက်နေလေသည်။

“ဖောက်…”

“ဖောက်…”

“ဖောက်…”

ဓားအလင်းတန်းက လျှပ်စီးကဲ့သို့ လျင်မြန်စွာဖြင့် ကာလမ်၏ ခန္ဓာကိုယ်ပေါ်သို့ ကျရောက်သွားလေသည်။ သူ၏ ကိုယ်ပေါ်ရှိ ဝတ်စုံနှင့် လက်နက်ကိရိယာများက အဆက်မပြတ် ပေါက်ကွဲထွက်သွားပြီး တစ်ကိုယ်လုံး သွေးသံရဲရဲ ဖြစ်သွားလေသည်။

သို့သော် မျှော်လင့်မထားသည့်အချက်မှာ သူ သေမသွားခြင်းပင် ဖြစ်သည်။

ကျိုးဟန်က တစ်ချက် ဝေ့ကြည့်လိုက်သည်နှင့် တစ်ဖက်လူ၏ အချက်အလက်များကို ချက်ချင်း အကဲဖြတ်စစ်ဆေးပြီးသား ဖြစ်သွားလေသည်။

ကျောက်နက် စစ်သည်တော် ကာလမ်

အဆင့် - ၄၆

သွေးပမာဏ - ၅.၃ သန်း

တိုက်ခိုက်မှု - ၃ သိန်း

ကာကွယ်မှု - ၂.၂ သန်း

ပင်ကိုစွမ်းရည် - ဆယ်ဆ ကာကွယ်မှု (SS အဆင့်)

လက်နက် - ရက်စက်ကြမ်းကြုတ်သော လက်အိတ်

ဝတ်စုံ - ကျောက်နက် ဝတ်စုံ (ပျက်စီးနေသော အခြေအနေ)

အဆင်တန်ဆာ - ဖြူဖျော့သော မှော်ကျောက်တုံး (ပျက်စီးနေသော အခြေအနေ)

မှော်လက်နက် - ပြန်လည်မွေးဖွားခြင်းဒိုင်းလွှား (ကာကွယ်တန်ပြန်ခြင်း)

စွမ်းရည် - ကျောက်ဆောင်ပေါက်ကွဲ လက်သီး၊ ရက်စက်ကြမ်းကြုတ်သော လက်သီးအလင်းတန်း၊ ဆယ်ဆ ခွန်အား၊ သွေးစွမ်းအင် လောင်ကျွမ်းခြင်း၊ သွေးရောင် မုန်တိုင်း

တိုက်ပွဲဝင်စွမ်းရည် - ကြယ် ၂၀ ဘုရင်အဆင့်

'ဒါက ဒီမှော်လက်နက်ရဲ့ အာနိသင်ကိုး...'

ဖတ်ရှုပြီးနောက် ကျိုးဟန် အကြောင်းရင်းကို သိလိုက်သည်။

အစက သူ အကြမ်းဖျင်းသာ ကြည့်လိုက်မိပြီး ပြန်လည်မွေးဖွားခြင်းဒိုင်းလွှား ဆိုသည့် မှော်လက်နက်ကို သတိမထားမိခဲ့ပေ။ သို့မဟုတ် ထိုအချိန်က ကာလမ်သည် ဤမှော်လက်နက်ကို တပ်ဆင်ထားခြင်း မရှိခဲ့တာလည်း ဖြစ်နိုင်သည်။

ပြန်လည်မွေးဖွားခြင်းဒိုင်းလွှား

အရည်အသွေး - ကြယ် ၄ ပွင့် နတ်ဘုရားအဆင့်

အမျိုးအစား - ကာကွယ်ရေး မှော်လက်နက်

ဖော်ပြချက် - ဖီးနစ်ငှက်သွေး အနည်းငယ်စွန်းထင်းနေသော အစွမ်းထက် မှော်လက်နက်ဖြစ်ပြီး ပြန်လည်မွေးဖွားခြင်း နှင့် သေရာမှ ပြန်လည်ရှင်သန်နိုင်စွမ်းရှိကာ အသက်ကယ်နိုင်သော အစွမ်းထက်စွမ်းရည် ပါရှိသည်

အာနိသင် - သေလောက်သော ဒဏ်ရာရရှိပါက တစ်ကြိမ် သေဘေးမှ ကင်းလွတ်နိုင်ပြီး ၂၄ နာရီအတွင်း တိုက်ပွဲဝင်စွမ်းရည်ကို ကြီးမားစွာ မြင့်တက်စေသည်

'ဒါကြောင့် သူ့ရဲ့တိုက်ပွဲဝင်စွမ်းရည်က အရင် ကြယ် ၁၀ ပွင့် ဘုရင်အဆင့်ကနေ ကြယ် ၂၀ ဘုရင်အဆင့် ဖြစ်သွားတာကိုး...'

အရာအားလုံး ရှင်းလင်းသွားပြီဖြစ်သည်။

နတ်ဘုရားအဆင့် မှော်လက်နက် ရရှိထားခြင်းမှာ ကျိုးဟန်အတွက် အံ့သြစရာ မဟုတ်ပေ။

ကာလမ်၏ အသွင်အပြင်အရ သူသည် ဒေသတစ်ခု၏ ခေါင်းဆောင်တစ်ယောက် ဖြစ်ပုံရရာ ကံကောင်းမှု အခွင့်အရေးအချို့ ရှိနေခြင်းက အလွန် ပုံမှန်ကိစ္စသာ ဖြစ်သည်။

တကယ်ပင် အစွမ်းထက်သော လေလှိုင်းများက ကာလမ်၏ ပတ်လည်တွင် စုစည်းလာလေသည်။ သွေးရောင် စွမ်းအင်များက တဟုန်းဟုန်း တောက်လောင်နေပြီး အရှိန်အဝါက အဆက်မပြတ် မြင့်တက်လာလေသည်။

ကြယ် ၂၀ ဘုရင်အဆင့်မှ ကြယ် ၂၅ ဘုရင်အဆင့်သို့... ထို့နောက်...

နောက်ဆုံးတွင် ကြယ် ၃၀ ဘုရင်အဆင့်တွင် ရပ်တန့်သွားလေသည်။

"စွမ်းအားတွေ... အရင်က တစ်ခါမှမရဖူးတဲ့ အစွမ်းထက်မှုကို ခံစားနေရတယ်... အသားဝါကောင်လေး... ငါ မင်းကို သေချာပေါက် ကျေးဇူးတင်ရမယ်ကွာ..."

အရှိန်အဝါ ပြင်းထန်လာသော ကာလမ်၏ မျက်နှာပေါ်ရှိ ခုနက ကြောက်ရွံ့နေမှုများ အားလုံး ပျောက်ကွယ်သွားပြီး မကောင်းဆိုးဝါး အကြံပယောဂပါသော အပြုံးတစ်ခုဖြင့် အစားထိုးလာလေသည်။

ကြယ် ၃၀ ဘုရင်အဆင့် တိုက်ပွဲဝင်စွမ်းရည်က သူ့ကို လုံးဝ ဘဝင်မြင့်သွားစေသည်မှာ သိသာထင်ရှားလှသည်။ အစွမ်းထက်သော စွမ်းအားများက ခန္ဓာကိုယ်အတွင်း စီးဆင်းနေပြီး ထိုခံစားချက်က အလွန် ကောင်းမွန်လှသည်။

တကယ်တော့ ဤမှော်လက်နက်ကို သူ ရရှိခဲ့သည်မှာ ရက်အနည်းငယ်သာ ရှိသေးသည်။ အချက်အလက်များကို သူမြင်နိုင်သော်လည်း တိကျသော အာနိသင် မည်သို့ရှိသည်ကို သေချာ မသိခဲ့ပေ။

တစ်ချိန်တည်းမှာပင် သူသည် အသက်အန္တရာယ်နှင့်လည်း မကြုံတွေ့ခဲ့ရပေ။ ပုံမှန်လူတစ်ယောက်ဖြစ်ပါက ဤမှော်လက်နက်၏ အာနိသင်ကို စမ်းသပ်ရန်အတွက် ကိုယ့်သေတွင်း ကိုယ်တူးမည် မဟုတ်ပေ။

ထို့ကြောင့် ကျိုးဟန်၏ ခုနက တိုက်ခိုက်မှုက ပြန်လည်မွေးဖွားခြင်းဒိုင်းလွှား ၏ အာနိသင်ကို ကွက်တိ နှိုးဆွပေးလိုက်ခြင်း ဖြစ်သည်။ ဤမျှ ထူးကဲစွာ အစွမ်းထက်လိမ့်မည်ဟု သူ မထင်ထားခဲ့ပေ။

"ဒါ... ခေါင်းဆောင်က ပိုသန်မာလာတာပဲ..."

"အရှိန်အဝါက အရမ်းပြင်းထန်တာပဲ... လူကို ကြောက်လန့်တုန်လှုပ်သွားစေတယ်ကွာ..."

"မိုက်တယ်... အရမ်းမိုက်တာပဲ... အခု ကြုံတွေ့နေရတဲ့ အန္တရာယ်ကို ခေါင်းဆောင်တစ်ယောက်တည်းနဲ့ အလွယ်လေး ရှင်းနိုင်သွားပြီပေါ့..."

အာဖရိက ကစားသမားများသည် ကျိုးဟန် ရောက်လာချိန်က စိတ်ပျက်အားငယ်နေခဲ့ကြသော်လည်း ကာလမ်၏ တိုက်ပွဲဝင်စွမ်းရည် ထိုးတက်သွားမှုကြောင့် သူတို့၏ ယုံကြည်မှုများ တစ်မုဟုတ်ချင်း ပြန်လည်မြင့်တက်လာကြလေသည်။

"အသားဝါကောင်လေး... ခုနက မင်းရဲ့ ဓားချက်အတွက် ကျေးဇူးဆပ်တဲ့အနေနဲ့ မင်းခန္ဓာကိုယ်ပေါ်က အရိုးတိုင်းကို ငါဖြည်းဖြည်းချင်း ချိုးပစ်မယ်..."

ကာလမ်၏ မည်းနက်နေသော မျက်နှာပေါ်တွင် ဖြူဖွေးသော သွားများ ပေါ်လာသည်အထိ ရက်စက်စွာ ပြုံးလိုက်ရင်း ပြောလိုက်သည်။

"မင်းက ကစားချင်နေမှတော့လည်း ငါက အဖော်လုပ်ပေးရမှာပေါ့..."

ကျိုးဟန်က အေးအေးဆေးဆေးပင် ပြုံးလိုက်သည်။

သူ၏ စိတ်ထဲမှ တိတ်တဆိတ် ရေရွတ်လိုက်ပြီး ကံကြမ္မာ လုယူခြင်း ကို အသုံးပြုလိုက်သည်။ မည်သို့ပင်ဖြစ်စေ မိုးချုပ်တော့မည်ဖြစ်ရာ လုယူခွင့် သုံးကြိမ်ကို အလကား အဖြစ်မခံနိုင်ပေ။

ဤကာလမ်က အနည်းငယ် အမှိုက်ကျသော်လည်း ပါရမီရှင်တစ်ယောက်ဟု မဖြစ်မနေ သတ်မှတ်၍ ရနိုင်သေးသည်။ ထို့ကြောင့် စနစ်ကို မေးမြန်းကြည့်ရာ လုယူ၍ ရနေသေးကြောင်း သိလိုက်ရသည်။

[သင်သည် နံပါတ်တစ် ပါရမီရှင် ၏ လုယူခြင်း စွမ်းရည်ကို အသုံးပြုလိုက်ပါသည်... ကျောက်နက် စစ်သည်တော် ကာလမ် အပေါ်သို့ ကံကြမ္မာ လုယူခြင်းကို စတင်လိုက်ပါသည်...]

[လုယူခြင်း ကျရှုံးပါသည်... ကျေးဇူးပြု၍ ထပ်မံကြိုးစားပါ...]

[သင်သည် နံပါတ်တစ် ပါရမီရှင် ၏ လုယူခြင်း စွမ်းရည်ကို အသုံးပြုလိုက်ပါသည်... ကျောက်နက် စစ်သည်တော် ကာလမ် အပေါ်သို့ ကံကြမ္မာ လုယူခြင်းကို စတင်လိုက်ပါသည်...]

[လုယူခြင်း ကျရှုံးပါသည်... ကျေးဇူးပြု၍ ထပ်မံကြိုးစားပါ...]

[သင်သည် နံပါတ်တစ် ပါရမီရှင် ၏ လုယူခြင်း စွမ်းရည်ကို အသုံးပြုလိုက်ပါသည်... ကျောက်နက် စစ်သည်တော် ကာလမ် အပေါ်သို့ ကံကြမ္မာ လုယူခြင်းကို စတင်လိုက်ပါသည်...]

[လုယူခြင်း အောင်မြင်ပါသည်... ကျောက်နက် စစ်သည်တော် ကာလမ် ထံမှ မှော်လက်နက် ပြန်လည်မွေးဖွားခြင်းဒိုင်းလွှား ကို ရရှိပါသည်...]

'ဟင်... ဒါက တော်တော်လေး ဇိမ်ကျတာပဲ...'

စနစ်၏ အသိပေးချက်ကို ကြားလိုက်ရချိန်တွင် ကျိုးဟန် ချက်ချင်း ရယ်မောလိုက်သည်။

တစ်ဖက်လူ၏ ကိုယ်ပေါ်ရှိ တန်ဖိုးအကြီးဆုံး ပစ္စည်းကို ဤကဲ့သို့ လုယူလိုက်ရသည်မှာ အလွန်ပင် ကျေနပ်စရာ ကောင်းလှသည်။

"ပြန်လည်မွေးဖွားခြင်းဒိုင်းလွှားလား... ဒါ ငါ့ဟာလေ..."

ကာလမ်၏ ခန္ဓာကိုယ်တစ်ချက် တုန်ယင်သွားပြီးနောက် မှော်လက်နက်မှာ အတောင်ပံမပါဘဲ ပျံသန်းသွားကာ ကျိုးဟန်၏ လက်ထဲတွင် အလွန် ထူးဆန်းစွာ ပေါ်လာသည်ကို တွေ့လိုက်ရလေသည်။

"သေစမ်း... မင်းကို သတ်ပစ်မယ်ကွာ..."

ထိုမျှ တန်ဖိုးကြီးမားသော ရတနာ ဤသို့ ခိုးယူခံလိုက်ရသဖြင့် သူ လုံးဝ ရူးသွပ်မတတ် ဒေါသထွက်သွားလေသည်။

သို့သော် ကာလမ်၏ တိုက်ပွဲဝင်စွမ်းရည်မှာ ကြယ် ၃၀ ဘုရင်အဆင့်တွင် ရှိနေဆဲဖြစ်သည်။ ထို့ကြောင့် သူ၏ စွမ်းအားကို အားကိုး၍ ဆုံးရှုံးသွားသော မှော်လက်နက်ကို ပြန်လည်လုယူရန် ဆန္ဒရှိနေသည်။

"ရက်စက်ကြမ်းကြုတ်သော လက်သီးအလင်းတန်း..."

သွေးရောင် အလင်းတန်းကြီး ထွက်ပေါ်လာပြီး ကျိုးဟန်ထံသို့ တိုက်ရိုက် ဝင်တိုက်လာလေသည်။

"ဟက်... ရေတွင်းထဲက ဖားမည်းကောင်... ကိုယ့်ကိုယ်ကိုယ် တကယ် အစွမ်းထက်နေတယ်လို့ ထင်နေတာလား..."

"မင်းကိုသတ်ဖို့ ဓားတစ်ချက်တည်းပဲ လိုတယ်..."

ကျိုးဟန် နှုတ်ခမ်းထောင့် အနည်းငယ် တွန့်ကွေးသွားပြီး လှောင်ပြောင်လိုက်သည်။

ဓားချီစွမ်းအင်များ လှုပ်ခတ်သွားပြီး အေးစက်သော ဓားအလင်းတန်း တစ်ချက်က ကျိုးဟန်၏ စိတ်ဆန္ဒနှင့်အတူ ကန့်လန့်ဖြတ် ပိုင်းဖြတ်သွားလေသည်။

သွေးရောင် လက်သီးအလင်းတန်းမှာ မျက်စိတစ်မှိတ်အတွင်း ထက်ပိုင်းပြတ်သွားပြီး ကာလမ်၏ ခန္ဓာကိုယ်ပါ ပြတ်တောက်သွားလေသည်။ ဓား၏ အရှိန်အဝါ ပြင်းထန်မှုမှာ ပြိုင်ဘက်ကင်းလှသည်။

"ဟင့်အင်း... မလုပ်ပါနဲ့ကွာ..."

ဓားသွားရောက်ရှိလာချိန်တွင် သူ မည်မျှပင် ထိတ်လန့်တကြား အော်ဟစ်နေပါစေ အချည်းနှီးသာ ဖြစ်သည်။

"ကြောင်ကြည့်မနေကြနဲ့လေ... ကျန်နေတဲ့ အာဖရိက ကစားသမားတွေကို မသတ်ဘဲ နှစ်သစ်ကူးဖို့ ချန်ထားဦးမလို့လား..."

ကာလမ်၏ အလောင်းကို ထပ်မကြည့်တော့ဘဲ ခေါင်းလွှဲလိုက်ကာ ကြောင်အမ်းအမ်း ဖြစ်နေသော ချိုက်ခွန်းတို့ အုပ်စုကို ကျိုးဟန် လှမ်းပြောလိုက်သည်။

"အာ... ဟုတ်ကဲ့..."

"ဂိုဏ်းချုပ်ရဲ့ ဒီဟန်ပန်က အရမ်းမိုက်တာပဲကွာ... ငါရော ဘယ်တော့များမှ ဒီလို အရှိန်အဝါမျိုး ရလာပါ့မလဲ..."

"အရမ်း အထာကျတာပဲ... ဒီလို ဂိုဏ်းချုပ်နောက် လိုက်ရတာ ငါတို့ ကံကောင်းတာပဲဟေ့..."

လူဆယ်ယောက်စလုံးမှာ တအံ့တဩ ဖြစ်နေမှုမှ သတိပြန်ဝင်လာကြသည်။

အမှန်အတိုင်း ပြောရလျှင် ခုနက ကာလမ်၏ အဆက်မပြတ် မြင့်တက်လာသော အရှိန်အဝါကို ရင်ဆိုင်လိုက်ရချိန်တွင် သူတို့၏ စိတ်ထဲ၌ ထိတ်လန့်မှု တစ်ချို့ ဖြစ်ပေါ်ခဲ့သည်။ သို့သော် ကျိုးဟန်က မည်သည့်အခါမှ စိတ်ပျက်အောင် မလုပ်ခဲ့ပေ။ ဓားတစ်ချက်တည်းနှင့် ချက်ချင်း သတ်ဖြတ်လိုက်နိုင်မှုက အလွန် လွယ်ကူလွန်းနေသည်။

ထို့နောက် အာဖရိက ကစားသမားများကို တိုက်ရိုက်ပင် အပြတ်ရှင်းလိုက်ကြသည်။ ထိုကဲ့သို့ အကြံဆိုးရှိနေသော ကောင်များအပေါ် မည်သည့် သနားညှာတာမှုမှ ထားစရာ အကြောင်းမရှိပေ။

ကျိုးဟန် ချမှတ်ထားသော စည်းမျဉ်းမှာ မိမိတို့ဘက်မှ ပြဿနာ အရင်မရှာရန်၊ သူတစ်ပါးက ကိုယ့်ကို မထိခိုက်လျှင် ကိုယ်ကလည်း မထိခိုက်စေရန်၊ အကယ်၍ သူတစ်ပါးက ကိုယ့်ကို ထိခိုက်လာလျှင်မူ ထိုသူကို အသေသတ်ရန် ပင်ဖြစ်သည်။

"မင်းတို့ သေချာ ရှာကြည့်ကြ... ကျဆင်းလာတဲ့ ပစ္စည်းတွေ ရှိမရှိဆိုတာကိုပေါ့..."

ကျိုးဟန် ညွှန်ကြားလိုက်သည်။ ကာလမ်မှာ ဘုရင်အဆင့် တစ်ယောက်သာ ဖြစ်ရာ ပစ္စည်းများ ကျဆင်းလာလျှင်တောင် အရည်အသွေးက သိပ်မြင့်မည် မဟုတ်ပေ။ ထို့ကြောင့် ကျိုးဟန်က သဘာဝကျကျပင် စိတ်မဝင်စားပေ။

ယင်းအစား သူက ခုနက လုယူထားသော ပြန်လည်မွေးဖွားခြင်းဒိုင်းလွှား ကို ထုတ်ယူကာ လေ့လာကြည့်လိုက်သည်။ ၎င်းမှာ လက်ဝါးအရွယ်အစားရှိ ရွှေရောင် ဒိုင်းလွှားငယ်လေး တစ်ခုဖြစ်သည်။

၎င်းသည် နတ်ဘုရားအဆင့် မှော်လက်နက်သာ ဖြစ်ပြီး အမြင့်ဆုံးအဆင့်နှင့် ယှဉ်၍ မရသော်လည်း သေဘေးမှ ကင်းလွတ်နိုင်သည့် အာနိသင် ပါရှိသဖြင့် အစွမ်းထက်လှသည်။ ထိုကဲ့သို့သော အချက်အလက်မျိုးကို မနှစ်သက်သူ မရှိနိုင်ပေ။