အခန်း ၂၃၈

အခန်း ၂၃၈ ဘုရင်အဆင့် ကောင်းကင်နှင့် မြေကြီး၏ အဖိုးတန်ရတနာ

"ခေါင်းဆောင်... ကျွန်တော်တို့အဖွဲ့ တာဝန်ယူထားတဲ့ နေရာကို အကုန်ရှာဖွေပြီးသွားပြီ... တခြား ဘာမှမတွေ့တော့ဘူး..."

"ကျွန်တော့်ဘက်မှာလည်း ရှာလို့ပြီးပြီ... အကျိုးအမြတ်က မဆိုးဘူး... မီးလျှံတောက်ပ ဝိညာဉ်ကျောက်စိမ်း ဆယ့်ငါးခုတောင် ရတယ်..."

"ရလာတာတွေ အကုန်လုံး ဒီမှာပါ... ခေါင်းဆောင် တစ်ချက်ကြည့်ကြည့်ပါဦး..."

မကြာမီ အဖွဲ့ငယ်အချို့က သူတို့ ရှာဖွေစုဆောင်းရရှိလာသော ပစ္စည်းများကို လာရောက် အပ်နှံကြလေသည်။

"သောက်ကျိုးနည်း... မင်းကံက တကယ်ကောင်းတာပဲ... ကြယ်ရောင်အဆင့် အရည်အသွေးရှိတဲ့ မီးလျှံနှင်းရည် ကိုတောင် ရလာတယ်ပေါ့..."

မုချန်က အံ့အားသင့်စွာဖြင့် ပြောလိုက်လေသည်။

"မလိုပါဘူးကွာ... မင်းတို့အဖွဲ့ ရလာတဲ့ မြေကမ္ဘာနှလုံးသား ကလည်း သာမန်မှ မဟုတ်တာ..."

ရှောင်ရန်၏ မျက်နှာပေါ်တွင် ဂုဏ်ယူဝင့်ကြွားသော အပြုံးတစ်ခု ထွက်ပေါ်လာပြီး ဤတစ်ကြိမ် ပထမနေရာကို ယှဉ်ပြိုင်နိုင်ရန် အခွင့်အရေးရှိပြီဟု ရင်ထဲတွင် တွေးလိုက်လေသည်။

"မင်းတို့က ဘာတွေ လျှောက်ကြွားနေတာလဲ... ခွန်းအစ်ကိုရဲ့ လက်ရပစ္စည်းတွေကို မမြင်ဘူးလား..."

ထိုသူနှစ်ယောက် အချင်းချင်း မြှောက်ပင့်နေကြသည်ကို မြင်သောအခါ လင်းတုန်းက ဝင်ရောက် တားဆီးလိုက်လေသည်။

"သေစမ်း... ခွန်းအစ်ကိုက တကယ်ကို မိုက်တာပဲ... ယန်ဝိညာဉ်ကျောက်သလင်း တွေ အများကြီးကို ဘယ်ကနေ သွားရလာတာလဲ..."

"ဒီတစ်ခေါက် ပထမနေရာက သူ့အတွက်ပဲ... ငါတို့ကတော့ မျှော်လင့်ချက် မရှိတော့ဘူး..."

"အားကျလိုက်တာ... ဒီတစ်ခေါက် အစောင့်အရှောက် နေရာက သေချာသွားပြီ..."

"အစွမ်းထက်လိုက်တာ... ဒီလောက် အချိန်တိုလေးအတွင်းမှာ တစ်ဟုန်ထိုး တက်လာတာ... သူက အခွင့်အရေးကို သေချာဆုပ်ကိုင်နိုင်ခဲ့တာပဲ..."

လူတိုင်းသည် စုဆောင်းရရှိထားသော အရင်းအမြစ်များကို အပ်နှံပြီးနောက် အဖွဲ့အလိုက် စနစ်တကျ တန်းစီရပ်နေကြလေသည်။ ကျိုးဟန်၏ အမိန့်ကို စောင့်ဆိုင်းနေရင်း လျှို့ဝှက်နယ်မြေအတွင်းမှ ရရှိခဲ့သော သူတို့၏ အကျိုးအမြတ်များကို အချင်းချင်း ဖလှယ်ဆွေးနွေးနေကြလေသည်။

မကြာမီ ချိုက်ခွန်း၏ အဖွဲ့က လက်ရပစ္စည်းများ လာရောက်အပ်နှံချိန်တွင် အဖွဲ့ဝင်များအားလုံး အလွန်အမင်း အံ့အားသင့်သွားကြလေသည်။

ယန်ဝိညာဉ်ကျောက်သလင်း အခုတစ်ရာကျော်ဟူသော အရေအတွက်မှာ အလွန် ကြောက်မက်ဖွယ် ကောင်းလှပေသည်။

အခြားသူများအားလုံး၏ ရရှိမှုများကို ပေါင်းလိုက်လျှင်ပင် ကြယ်ရောင်အဆင့် ကောင်းကင်နှင့် မြေကြီး၏ အဖိုးတန်ရတနာ ဆယ်ခုကျော်သာ ရှိလေသည်။ ဤသည်မှာ ထိုနေရာတွင်ရှိနေသော အဖွဲ့များအားလုံး၏ လက်ရပစ္စည်းများ စုစုပေါင်းထက်ပင် အများကြီး ပိုများနေသေးသဖြင့် မည်သူမဆို လက်မခံဘဲ မနေနိုင်အောင် ဖြစ်သွားစေလေသည်။

"ဂုဏ်ယူပါတယ် ခွန်းအစ်ကို... ဒီတစ်ခေါက် အစောင့်အရှောက် နေရာက သေချာသွားပြီ..."

"ဒီအကျိုးအမြတ်က တကယ်ကို ထိုက်တန်ပါတယ်... ငါတော့ လုံးဝ အရှုံးပေးလိုက်ပြီ..."

"အားကျလွန်းလို့ သွားရည်တောင် ကျလာပြီ... ဘုရင်အဆင့် ဝတ်စုံတွေ ဆုချခံရမယ့်အပြင် အစောင့်အရှောက် နေရာကိုပါ တိုက်ရိုက် ရာထူးတိုးသွားဦးမှာ... ငါ့ရဲ့ ထိပ်တန်းအဖွဲ့ဝင် နေရာကနေ ဘယ်တော့မှ ရာထူးတိုးနိုင်မလဲ မသိဘူး..."

"ဟင်... ဝေ့အစ်ကို ကို မတွေ့ပါလား..."

"ဟုတ်တယ်... အန္တရာယ်တစ်ခုခုများ ကြုံနေရလို့လား..."

"ဘယ်လိုလုပ် ဖြစ်နိုင်မှာလဲ... သူ့ရဲ့ တိုက်ခိုက်ရေးစွမ်းအားက သာမန်မှ မဟုတ်တာ... ဘယ်လိုပဲဖြစ်ဖြစ် ထိပ်ဆုံး ဆယ့်ငါးယောက် စာရင်းဝင်ပဲလေ..."

"ဟား ဟား ဟား အားနာပါတယ် ညီအစ်ကိုတို့... ဒီတစ်ခေါက် ပထမနေရာကို ငါ ချိုက်ခွန်း ယူလိုက်ပြီ..."

ချိုက်ခွန်းက လက်အုပ်ချီကာ ရယ်မော၍ ပြောလိုက်လေသည်။

သူ၏ ကြက်မောက်ပုံစံ ဆံပင်ကို မော့ထားကာ အလွန် ဂုဏ်ယူဝင့်ကြွားနေပြီး အောင်ပွဲခံရန် သေချာနေသည့် အသွင်အပြင်မျိုး ဖြစ်နေလေသည်။ မကြာမီ အစောင့်အရှောက် တစ်ယောက် ဖြစ်လာတော့မည်ဟု တွေးမိတိုင်း သူ၏ ရင်ထဲရှိ စိတ်လှုပ်ရှားမှုများကို ဖော်ပြရန် စကားလုံးပင် မရှိတော့ပေ။

တကယ်တမ်းလည်း သူ ဤကဲ့သို့ ဂုဏ်ယူနိုင်စွမ်းရှိသည့် အရင်းအနှီး ရှိနေသည် မဟုတ်ပါလား။

"နေဦး... ဒီ ပထမနေရာကို ငါ လုပွန်ဝေ့ ယူမယ်..."

ရုတ်တရက် အချိန်အခါနှင့် မကိုက်ညီသော အသံတစ်သံ ထွက်ပေါ်လာပြီး ပျော်ရွှင်ကြည်နူးနေသော လေထုကို ဖြတ်တောက်လိုက်လေသည်။

"ဟင်... လုပွန်ဝေ့ မင်းက ဘာနဲ့များ ငါ့ကို လာယှဉ်မလို့လဲ... ငါ့ဆီက ယန်ဝိညာဉ်ကျောက်သလင်း အခုတစ်ရာကျော်ကို မမြင်ဘူးလား..."

ချိုက်ခွန်းက မျက်နှာပျက်သွားကာ မကျေမနပ်ဖြင့် ပြောလိုက်လေသည်။

"သေချာပေါက် မြင်တာပေါ့... ဒါပေမဲ့ အဲဒါက ကြယ်ရောင်အဆင့် အရည်အသွေးပဲ ရှိတာလေ..."

"ငါ့လက်ထဲမှာ ဘာရှိလဲဆိုတာ ကြည့်လိုက်စမ်း..."

လုပွန်ဝေ့က တည်ငြိမ်စွာ ပြုံးလိုက်ပြီးနောက် သူ၏ လက်ထဲရှိ ပစ္စည်းများအားလုံးကို ထုတ်ဖော် ပြသလိုက်လေသည်။

တစ်ခဏချင်းအတွင်းမှာပင် ကြမ်းတမ်းသော အပူလှိုင်းလုံးကြီး တစ်ခု ရိုက်ခတ်လာပြီး မျက်စိကျိန်းမတတ် တောက်ပသွားကာ ဂူတစ်ခုလုံးကို နီရဲသွားစေလေသည်။

ပတ်ဝန်းကျင်ရှိ ကျောက်ဆောင်များသည် ကြောက်မက်ဖွယ်ကောင်းသော အပူချိန်အောက်တွင် အရည်ပျော်တော့မည့် အရိပ်အယောင်များပင် ပြသနေလေသည်။

"သောက်ကျိုးနည်း... အရမ်း အစွမ်းထက်တဲ့ ဖိအားပဲ... ဒါက..."

"ဒီကျောက်တုံးက သာမန် မဟုတ်ဘူး... ငါ ခန့်မှန်းတာသာ မှန်မယ်ဆိုရင် ဒါက ဘုရင်အဆင့် အရည်အသွေးရှိတဲ့ ကောင်းကင်နဲ့ မြေကြီးရဲ့ အဖိုးတန်ရတနာ ပဲ ဖြစ်ရမယ်..."

"ဘုရင်အဆင့် အရည်အသွေး ဟုတ်လား... အရမ်း မိုက်တာပဲ..."

"ဝေ့အစ်ကိုက ဟက် သုံးထားတာများလား..."

"အရမ်း လွန်လွန်းတယ်ကွာ... သူ့လက်ထဲမှာ ကျောက်တုံး ငါးတုံးတောင် ရှိနေတာ... ဒီတစ်ခါတော့ အခြေအနေက လုံးဝ ပြောင်းပြန် ဖြစ်သွားပြီ..."

ကြောက်မက်ဖွယ်ကောင်းသော စွမ်းအင်များကြောင့် လူတိုင်းက ပြင်းထန်စွာ ဆွေးနွေးလာကြပြီး တစ်ယောက်ပြီးတစ်ယောက် အလွန်အမင်း အံ့အားသင့် နေကြလေသည်။

"မင်းက ဟက် များ သုံးထားတာလား..."

ချိုက်ခွန်းက လက်မခံနိုင်သေးသည့်ဟန်ဖြင့် ပြောလိုက်လေသည်။ အခြေအနေ ပြောင်းပြန်လှန်ခံလိုက်ရသည့် ခံစားချက်က အလွန် ခံရခက်လှသည်။

"ငါ ဘာ ဟက် မှ မသုံးထားဘူး..."

လုပွန်ဝေ့က တည်ငြိမ်စွာပင် ပြန်ဖြေလိုက်လေသည်။

"မင်း တော်ပါတယ်... နောက်တစ်ခါကျရင်တော့ ငါ သေချာပေါက် ပြန်နိုင်အောင် လုပ်ပြမယ်..."

ချိုက်ခွန်းသည် သူရှုံးနိမ့်သွားပြီဖြစ်ကြောင်း သိလိုက်သဖြင့် ရင်ထဲမှစကားကို ပြတ်ပြတ်သားသား ပြောလိုက်ပြီး ထပ်မပြောတော့ပေ။ အားလုံးက ကျန်းမာသော ပြိုင်ဆိုင်မှုသာ ဖြစ်ပြီး ကိုယ့်အရည်အချင်းနှင့်ကိုယ် ယှဉ်ပြိုင်ကြခြင်း ဖြစ်ရာ မည်သည့် ရန်ငြိုးရန်စမှ မရှိကြပေ။

ကျိုးဟန်က တစ်ချက် ဝေ့ကြည့်လိုက်ရာ မျက်လုံးများ တောက်ပသွားလေသည်။ ဤသည်မှာ ဘုရင်အဆင့်၏ အရှိန်အဝါဖြစ်ကြောင်း ယုံမှားသံသယဖြစ်ဖွယ် မရှိပေ။

မူလက သူသည် လျှို့ဝှက်နယ်မြေကို ဘုရင်အဆင့်သို့ အဆင့်မြှင့်တင်လိုက်ပြီဖြစ်ရာ သဘာဝကျကျပင် ထိုအဆင့်နှင့် ကိုက်ညီသော ဘုရင်အဆင့် ကောင်းကင်နှင့် မြေကြီး၏ အဖိုးတန်ရတနာများ ထွက်ပေါ်လာသင့်သည်ဟု အမြဲ တွေးတောနေခဲ့ခြင်း ဖြစ်သည်။

သို့သော် တစ်ပတ် ပတ်ကြည့်ပြီးနောက် မည်သည့်အရာမှ မတွေ့ရသဖြင့် ကျိုးဟန် အလွန် စိတ်ပျက်သွားခဲ့လေသည်။

မမျှော်လင့်ဘဲ လုပွန်ဝေ့က ရှာဖွေတွေ့ရှိသွားလိမ့်မည်ဟု မထင်ထားခဲ့ပေ။ ဤကောင်လေးက အနည်းငယ်တော့ အရည်အချင်းရှိလှသည်။

"မင်း လုပ်တာ အရမ်းကောင်းတယ်..."

ကျိုးဟန် ခေါင်းညိတ်ကာ ချီးကျူးလိုက်လေသည်။

"အာ... ဒါတွေ အားလုံးက ခေါင်းဆောင်ရဲ့ လမ်းညွှန်မှုတွေကြောင့်ပါ... ခေါင်းဆောင်ရဲ့ ပြုစုပျိုးထောင်မှုသာ မပါရင် ကျွန်တော်တို့ ဒီလို နေ့ရက်မျိုးကို ရောက်လာမှာ မဟုတ်ပါဘူး... ခေါင်းဆောင်ရဲ့ ထက်မြက်တဲ့ ဦးဆောင်မှုအောက်မှာ ကျွန်တော်တို့ နတ်ဘုရားသတ်ဖြတ်ခြင်း နန်းတော် က သေချာပေါက် အတောက်ပဆုံး အလင်းတန်းတွေကို ဖြာထွက်နိုင်လိမ့်မယ်လို့ ကျွန်တော် ယုံကြည်ပါတယ်..."

လုပွန်ဝေ့က နှိမ့်ချစွာဖြင့် ပြောလိုက်သော်လည်း သူ၏ အသွင်အပြင်မှာမူ အလွန် မျက်နှာပြောင်တိုက်လွန်းနေလေသည်။

ရှောင်ရန် - '...'

ရှဲ့ရွှန်း - '...'

တိုင်ရှောင်မေ - '...'

ဝေ့အစ်ကိုသည် တိုက်ခိုက်ရေးစွမ်းအား အလွန်မြင့်မားရုံသာမက ဤစကားပြောဆိုမှု အဆင့်အတန်းမှာလည်း အခြားသူများ လိုက်မမီနိုင်အောင် ပင်ဖြစ်သည်။ သူ၏ ဤကဲ့သို့သော သိမြင်နားလည်မှုကို ကြည့်ပါက သူ မအောင်မြင်ရန်မှာ အလွန် ခက်ခဲလှပေသည်။

"ရပါပြီ... အပိုတွေ လျှောက်ပြောမနေနဲ့တော့..."

ကျိုးဟန်က လက်ဝှေ့ယမ်းလိုက်ပြီး ဆက်ပြောလိုက်လေသည်။

"အခု ငါ မင်းတို့အဖွဲ့က လူဆယ်ယောက်စလုံးကို အစောင့်အရှောက် အဖြစ် ရာထူးတိုးပေးမယ်... ပြီးတော့ ဒီ ဘုရင်အဆင့် ဝတ်စုံတွေကို မင်းတို့အချင်းချင်း ခွဲဝေယူလိုက်ကြ..."

"ကျေးဇူးတင်ပါတယ် ခေါင်းဆောင်..."

"ဝိုး... ငါလည်း အစောင့်အရှောက် ဖြစ်သွားပြီကွ..."

"ဒီ အထောက်အကူ စွမ်းရည်က တကယ်ကို မိုက်တာပဲ... သွေးပမာဏ တစ်သိန်းရှစ်သောင်း နဲ့ တိုက်ခိုက်မှု လေးသောင်းဆိုတော့ အရမ်းကို ဇိမ်ကျတာပဲ..."

ကျိုးဟန် ကြေညာလိုက်သည်နှင့်တပြိုင်နက် လုပွန်ဝေ့၏ အဖွဲ့ဝင်များသည် ပျော်ရွှင်စွာ အော်ဟစ်လိုက်ကြလေသည်။ အစွမ်းထက်သော စွမ်းအားများ ဝင်ရောက်လာပြီး ပိုမို အစွမ်းထက်လာသည်ကို ခံစားလိုက်ရသဖြင့် သဘာဝကျကျပင် အလွန်အမင်း ပျော်ရွှင်နေကြလေသည်။

"ခေါင်းဆောင်... ကျွန်တော်တို့ မီးဓာတ်ပါဝင်တဲ့ ကောင်းကင်နဲ့ မြေကြီးရဲ့ အဖိုးတန်ရတနာ တွေ အများကြီး ရထားတယ်ဆိုတော့ ဂိုဏ်းအစောင့်အရှောက်သားရဲ ကို သွားကျွေးရင် ဘုရင်အဆင့် အထိ ဆင့်ကဲပြောင်းလဲ သွားနိုင်တယ်နော်..."

ကျန်းရှောင်ပိုင်က အကြံပြုလိုက်လေသည်။

"ဘုရင်အဆင့် ဟုတ်လား... အရမ်းကို မျှော်လင့်ချင်စရာပဲ..."

"ဒါဆိုရင် ဂိုဏ်းတစ်ခုလုံးက ပိုပြီး အစွမ်းထက်လာမှာပဲ..."

လူတိုင်း ဤမျှ စိတ်အားထက်သန်နေကြသည်ကို မြင်သောအခါ ကျိုးဟန် ခေါင်းညိတ်လိုက်လေသည်။ သူလည်း ထိုသို့ပင် ရည်ရွယ်ထားခဲ့ခြင်း ဖြစ်သည်။

သို့သော် အစာမကျွေးမီ သူသည် လာရောက်အပ်နှံထားသော ကောင်းကင်နှင့် မြေကြီး၏ အဖိုးတန်ရတနာများကို အရင် စီစဉ်စစ်ဆေးရဦးမည် ဖြစ်သည်။

အနည်းငယ် စစ်ဆေးကြည့်ရှုပြီးနောက် အရည်အသွေးမှာ အနိမ့်အမြင့် ရောနှောနေလေသည်။ ယန်ဝိညာဉ်ကျောက်သလင်း မှလွဲ၍ မီးလျှံနှင်းရည် နှင့် မြေကမ္ဘာနှလုံးသား တို့သာ ကြယ်ရောင်အဆင့် ရှိလေသည်။

လုပွန်ဝေ့ လက်ထဲမှ ဘုရင်အဆင့် အရည်အသွေးရှိသော နေမီးတောက်ကျောက်တုံး ငါးတုံးနှင့်ပါ ပေါင်းလိုက်လျှင် အချုပ်အားဖြင့် ပြောရလျှင် ဤ မီးတောင် လျှို့ဝှက်နယ်မြေ အတွင်းမှ ရရှိသော အကျိုးအမြတ်များသည် ကျိုးဟန်၏ စိတ်ထဲမှ မျှော်မှန်းထားမှုထက် အများကြီး ကျော်လွန်နေပြီ ဖြစ်သည်။

ကျိုးဟန်သည် တစ်ခါတည်း အားလုံးကို အဆင့်မြှင့်တင်ခြင်း ကို တိုက်ရိုက် စတင်လိုက်လေသည်။ ဝိညာဉ်ကျောက်တုံး အချို့ကို အသုံးပြုပြီးနောက် အဆင့်မြှင့်တင်ထားသော အချက်အလက်များ အားလုံး ထွက်ပေါ်လာလေသည်။

[မီးလျှံနှင်းရည် (၈ ကြိမ်မြှင့်)]

[အရည်အသွေး - ကြယ်ရောင်အဆင့်]

[အမျိုးအစား - ကောင်းကင်နှင့် မြေကြီး၏ အဖိုးတန်ရတနာ]

[ဖော်ပြချက် - ကောင်းကင်မီးလျှံ၏ အနှစ်သာရများမှ ဖြစ်တည်လာသော အရည်ဖြစ်ပြီး စီးဆင်းနေသော မီးတောက်များနှင့် တူညီသည်]

[အကျိုးသက်ရောက်မှု - သောက်သုံးပြီးနောက် ကြမ်းတမ်းရက်စက်သော မီးဓာတ်စွမ်းအားများကို တိုးမြှင့်ပေးနိုင်သည်]

[ရှင်းလင်းချက် - ဤပစ္စည်းအမျိုးအစားကို မီးဓာတ်လျှို့ဝှက်ချက် အောက်ရှိသူများသာ သောက်သုံးနိုင်ပြီး တစ်ကြိမ်သာ သောက်သုံးခွင့်ရှိသည်... အကြိမ်ကြိမ် သောက်သုံးပါက အာနိသင် မရှိပါ]

ကျိုးဟန်သည် ရှင်းလင်းချက်ကို ဖတ်ရှုပြီးနောက် ခေါင်းညိတ်လိုက်လေသည်။ အစောင့်အရှောက်သားရဲ ၏ မီးစွမ်းအင် ထိန်းချုပ်မှု အဆင့်မှာ မီးတောက်စည်းမျဉ်း သာ ရှိသေးသဖြင့် ၎င်းကို တိုက်ကျွေးရန် အတိအကျပင် သင့်တော်လေသည်။

ထို့နောက် ကျိုးဟန်သည် မြေကမ္ဘာနှလုံးသား ၏ အချက်အလက်များကို ဆက်လက် ဖွင့်ကြည့်လိုက်လေသည်။