အခန်း (၉၃-၉၄)

အခန်း (၉၃) မင်း ဘာတွေစားထားတာလဲ

ထိုဆုတ်ဖြဲခံထားရသော အဝတ်စလေးမှာ ဖြူလွှလွှအရောင်ရှိပြီး အလွန်ပါးလွှာလှသည်။

ပထမအဆင့် ဆင့်ကဲပြောင်းလဲသူ တစ်ဦးဖြစ်သော ချူဟန်၏ ထက်မြက်လှသည့် အာရုံခံစားမှုက မျက်စိရှေ့ရှိ ဇွန်ဘီနှင့် ရင်ဆိုင်မိသော တစ်ခဏအတွင်းမှာပင် ထိုအဝတ်စလေး၌ ပိုင်ယွန့်အာ၏ ကိုယ်သင်းနံ့ ကျန်ရစ်နေကြောင်းကို အာရုံခံမိလိုက်သည်။ သေချာပေါက် သူမ၏ အဝတ်အစားမှ ဆွဲဖြဲခံထားရခြင်း ဖြစ်ပေမည်။

ပျောက်ဆုံးနေသော ပိုင်ယွန့်အာ ဘယ်ကို ရောက်သွားသနည်း။

တောက်… တောက်…

မျက်နှာကြက် ထုပ်တန်းပေါ်မှ သွေးစက်များက တစ်တောက်တောက် ကျနေဆဲ ဖြစ်သည်။ မျက်နှာချင်းဆိုင်ရှိ ဇွန်ဘီက ခေါင်းကို ဖြည်းညင်းစွာ မော့လာသည်။ ၎င်း၏ မျက်နှာမှာ ရိုးရိုးဇွန်ဘီများထက် အဆပေါင်းများစွာ ပို၍ ကြောက်မက်ဖွယ် ကောင်းနေသည်။ ဖြူရော်ရော် အရောင်ပြောင်းနေသော ကျောချမ်းဖွယ် မျက်လုံးများနှင့် နားရွက်အထိ ပြဲလန်နေသော ပါးစပ်ပေါက်ကြီး ရှိနေသည်။ ထိုပါးစပ်ကြီးထဲမှ ချွန်ထက်သော အစွယ်နှစ်ချောင်းက အပြင်သို့ ငေါထွက်နေလေသည်။

သို့သော် အသည်းအေးလောက်အောင် အကြောက်ဆုံးအရာမှာ ထိုကောင်၏ မျက်နှာပေါ်၌ ကြွက်သားမျှင်များ လှုပ်ရှားနေခြင်း ကို အထင်အရှား မြင်တွေ့နေရခြင်း ဖြစ်သည်။

ဤကောင်သည် ဒုတိယအကြိမ် မျိုးရိုးဗီဇ ပြောင်းလဲခြင်းကို ဖြတ်သန်းထားပြီ ဖြစ်သည်။

ဒုတိယအဆင့် ဇွန်ဘီ…

ချူဟန်၏ အာရုံကြောများ ချက်ချင်း တင်းမာသွားတော့သည်။ ဒုတိယအဆင့် ဇွန်ဘီများသည် ပထမအဆင့်များနှင့် လုံးဝကို ကွာခြားလှသည်။ ခွန်အား၊ အမြန်နှုန်းနှင့် တွေးခေါ်နိုင်စွမ်းတို့ကအစ ကနဦးအဆင့်မှ အပြည့်အဝ ရုန်းထွက်သွားပြီဖြစ်ကာ လုံးဝအသစ်ဖြစ်သော အခြေအနေတစ်ခုသို့ ပြောင်းလဲနေပြီ ဖြစ်သည်။

အခြေခံအားဖြင့် ဇွန်ဘီဆိုသည်မှာ မျိုးရိုးဗီဇ ပြောင်းလဲမှု အစွန်းရောက်သွားသော သက်ရှိများ ဖြစ်ကြသည်။ ၎င်းတို့သည် သာမန် အလောင်းကောင်များ မဟုတ်ပေ။ အသက်ရှင်နေကြသေးသည်။

စားသောက်ခြင်း၊ လှုပ်ရှားခြင်း၊ အာရုံခံစားခြင်းနှင့် ဇီဝကမ္မဖြစ်စဉ်...။ ပုံမှန် သက်ရှိများ ပိုင်ဆိုင်ထားသော လုပ်ဆောင်ချက်များကို ၎င်းတို့လည်း ပိုင်ဆိုင်ထားကြသော်လည်း၊ တချို့သော လုပ်ဆောင်ချက်များမှာ သုညနှင့် ညီမျှလုနီးပါး ဆုတ်ယုတ်သွားပြီး တချို့သော လုပ်ဆောင်ချက်များမှာ အမြင့်ဆုံးအထိ အားကောင်းလာခဲ့သည်။ အမြင်အာရုံနှင့် စားသောက်နိုင်စွမ်းတို့မှာ ထိုအစွန်းနှစ်ဖက် ဆင့်ကဲပြောင်းလဲမှု၏ အထင်ရှားဆုံး ဥပမာပင် ဖြစ်သည်။ ဇွန်ဘီများတွင် အမြင်အာရုံ မရှိသော်လည်း အစားထိုးအနေဖြင့် ၎င်းတို့၏ စားသောက်နိုင်စွမ်းမှာ ကြောက်ခမန်းလိလိ အဆင့်အထိ ရောက်ရှိနေလေသည်။

ဆင့်ကဲပြောင်းလဲခြင်းဆိုသည်မှာ မဖြစ်မနေ ဖြတ်သန်းရမည့် လုပ်ငန်းစဉ်တစ်ခု ဖြစ်သည်။ ကနဦးအဆင့်၌သာ ဆက်လက် ရပ်တန့်နေရန်ဆိုသည်မှာ လုံးဝ မဖြစ်နိုင်ချေ။ ဤသက်ရှိများသည် လူသားများနှင့် အခြားသက်ရှိများနည်းတူ အဆက်မပြတ် ဆင့်ကဲပြောင်းလဲနေကြသည်။

ကမ္ဘာကြီး ပြောင်းလဲသွားခဲ့လေပြီ။ ကမ္ဘာမြေကို ဖုံးလွှမ်းသွားသော အမှောင်ထုကြီးက သက်ရှိအားလုံး၏ မျိုးရိုးဗီဇကို အသစ်ပြန်လည်ဖွဲ့စည်းကာ ပြန်လည်တည်ဆောက်လိုက်ခြင်းပင်။ နောင်ငါးနှစ်ခန့် ကြာမြင့်ပြီးနောက်မှသာ ဤဖြစ်စဉ်ကြီးကို နိယာမတစ်ခုအဖြစ် သတ်မှတ်လာကြမည် ဖြစ်သည်။

၎င်းကို ပြန်လည်စတင်ခြင်း စနစ် ဟု ခေါ်သည်။

အရာအားလုံးသည် မူလအစသို့ ပြန်လည်ရောက်ရှိသွားပြီး သဘာဝတရား၏ အသစ်တဖန် ရွေးချယ်ဖယ်ရှားမှု သံသရာကြီး စတင်လာခဲ့လေပြီ။ အားနည်းသူများ ဖယ်ရှားခံရမည်ဖြစ်ပြီး အင်အားကြီးသူများသာ အသက်ရှင်ကျန်ရစ်မည် ဖြစ်သည်။

ဂျစ်…ဂျစ်…

မျက်စိရှေ့ရှိ ဒုတိယအဆင့် ဇွန်ဘီက သွားချင်း ကြိတ်လိုက်သဖြင့် နားကလော်စရာ အသံကြီး ထွက်ပေါ်လာသည်။ ထို့နောက် ကြီးမားစွာ ပြဲလန်နေသော ပါးစပ်ကြီးထဲမှ ပုံမှန်ဇွန်ဘီများထက် အဆများစွာ ရှည်လျားသော လျှာကြီးတစ်ချောင်းက ပျစ်ချွဲစွာ ထွက်ပေါ်လာသည်။ ထိုလျှာကြီးပေါ်၌ ကြွက်သားမျှင်များ ဖြစ်ပေါ်နေပြီး အစွမ်းနှင့် ပျော့ပျောင်းကျစ်လျစ်မှုတို့ကို ပိုင်ဆိုင်ထားလေသည်။ တစ်တောက်တောက် ကျဆင်းနေသော အချွဲရည်များထဲ၌ အလွန် ရဲရဲတောက်နေသော သွေးနီများ ရောနှောနေသည်။

ပြွတ်…

ရှည်လျားသော လျှာကြီးက ပါးစပ်ထဲသို့ ပြန်လည်ဝင်ရောက်သွားသည်။ ဇွန်ဘီ၏ လည်စေ့ကြီး လှုပ်ရှားသွားကာ လျှာပေါ်တွင် ကပ်နေသော သွေးများကို မျိုချလိုက်သည်ကို ချူဟန် အထင်အရှား မြင်တွေ့လိုက်ရသည်။ ထိုသွေး၏ အရသာမှာ အလွန်တရာ ကောင်းမွန်နေပုံရသည်။ ဖြူရော်နေသော ဇွန်ဘီ၏ မျက်လုံးများမှာ သာယာမိန်းမောသွားသည့်အလား မှေးစင်းသွားလေသည်။

ဇွန်ဘီများ၏ သွေးများသည် ချွင်းချက်မရှိ အမည်းရောင်များ ဖြစ်ကြသည်။ သို့ဖြစ်လျှင် ထိုရဲရဲတောက်နေသော သွေးနီများက မည်သူ့သွေး ဖြစ်မည်နည်း။

ဇွန်ဘီ၏ လက်သည်းများကြား၌ ငြိနေသော အဖြူရောင် အဝတ်စုတ်လေးဆီသို့ အကြည့်ရောက်သွားသည့် ခဏ၌ပင် ချူဟန်၏ ရင်ထဲမှနေ၍ ပြင်းထန်သော သတ်ဖြတ်လိုစိတ်များ ပေါက်ကွဲထွက်ပေါ်လာတော့သည်။

"မင်း... ဘာကို စားလိုက်တာလဲ"

ဒေါသများ ပြည့်နှက်နေသော ချူဟန်၏ အော်ဟစ်သံကြီးက စင်္ကြံလမ်း၏ အဆုံးအထိ ဟိန်းထွက်သွားလေသည်။ ပဲ့တင်ထပ်သွားသော အသံကြီးက အထပ်ထပ် အခါခါ နားထဲသို့ ရိုက်ခတ်လာသည်။

နောက်ကျောဘက်ရှိ ရှန်ကျိုတီ၊ လော့ရှောင်ရှောင်နှင့် ချန်ရှောက်ရယ်တို့မှာ လန့်ဖြတ်ကာ ပခုံးများ တုန်တက်သွားကြသည်။ ထို့နောက် သူတို့၏ အကြည့်များက နှင်းပွင့်ပမာ ဖြူလွှနေသော အဝတ်စုတ်လေးဆီသို့ ကျရောက်သွားသည့် ခဏမှာပင် လူသုံးယောက်လုံး ကြက်သီးမွေးညင်းများ ထလျက် ချမ်းစိမ့်တုန်ယင်သွားကြတော့သည်။

‘ပိုင်ယွန့်အာ’

ချန်ရှောက်ရယ်၏ ခြေထောက်နှစ်ဖက်မှာ တုန်ယင်လာလေပြီ။

ပိုင်ယွန့်အာ... ထိုအဆုံးအစမဲ့ ကြောက်မက်ဖွယ်ကောင်းသော ကောင်မလေးက အစားခံလိုက်ရပြီတဲ့လား။

ရှန်ကျိုတီမှာ ကြောက်ရွံ့လွန်းသဖြင့် အော်ဟစ်တော့မည့်ဆဲဆဲ ဖြစ်သွားသော်လည်း လက်နှစ်ဖက်ဖြင့် ပါးစပ်ကိုအုပ်ကာ အတင်းအကျပ် အောင့်အည်းထားလိုက်ရသည်။

လော့ရှောင်ရှောင်၏ မျက်နှာမှာ ဖြူလျော့သွားလေပြီ။ သူမက ကြောက်ရွံ့တုန်လှုပ်စွာဖြင့် လက်ကို ဆန့်ထုတ်ကြည့်လိုက်သောအခါ၊ မူလက ဖြူဖွေးနေရမည့် သူမ၏ လက်သေးသေးလေးများမှာ သွေးများဖြင့် ရွှဲနစ်နေလေသည်။ စောစောက သူမ၏ လည်ပင်းပေါ်သို့ ကျလာသော အရည်များမှာ ချန်ရှောက်ရယ်၏ တံတွေးများ မဟုတ်ဘဲ၊ မျက်နှာကြက် ထုပ်တန်းပေါ်မှ တစ်တောက်တောက် ကျဆင်းလာသော လူ့သွေး များပင် ဖြစ်လေသည်။

‘ဒါက ပိုင်ယွန့်အာရဲ့ သွေးတွေလား။ မဖြစ်နိုင်တာ။ ဒီလောက် သန်မာပြီး အဲဒီလောက် အစွမ်းထက်နေခဲ့တာကို... ဘာလို့ ဒီလိုဖြစ်ရတာလဲ။ ဒီလိုမျိုး တကယ် ဖြစ်နိုင်လို့လား’

ခေါင်းမော့လိုက်ပြီး တံခါးပေါက်ရှေ့၌ ရပ်တန့်နေသော ဇွန်ဘီကို ချူဟန် ကြည့်လိုက်သည်။ သာမန်ထက် သာလွန်သော အကဲခတ်နိုင်စွမ်းရှိသည့် လော့ရှောင်ရှောင်အတွက် ထိုဇွန်ဘီမှာ ပုံမှန်မဟုတ်ကြောင်းကို တစ်ချက်ကြည့်ရုံဖြင့် သိလိုက်ပေသည်။ အလွန်အမင်း အစွမ်းထက်နေသည်။ ပိုင်ယွန့်အာထက်ပင် ပိုမို အစွမ်းထက်နေနိုင်သေးသည်။ သို့ဆိုလျှင်... မိမိတို့ ဒီနေရာမှာတင် သေဆုံးရတော့မည်လား။

"ဂရား..."

ဒုတိယအဆင့် ဇွန်ဘီ၏ ပါးစပ်မှ လေထုကို ခွဲဖြာသွားမတတ် ဟိန်းဟောက်သံကြီး ထွက်ပေါ်လာသည်။

ရွှီး ရွှီး ရွှီး

လေထုကို ဖြတ်သန်းသွားသော ရွှီး ခနဲ လေခွင်းသံများနှင့်အတူ မျက်စိရှေ့ရှိ ဇွန်ဘီ၏ ပုံသဏ္ဌာန်မှာ လျှပ်စီးလက်သကဲ့သို့ တစ်ခဏချင်းအတွင်း ပျောက်ကွယ်သွားတော့သည်။ သို့သော် ချူဟန် အထင်အရှား ခံစားမိနေသည်။ ထိုကောင်သည် အမြင့်ဆုံးသော အမြန်နှုန်းဖြင့် သူဆီသို့ တည့်မတ်စွာ ပြေးဝင်လာနေလေပြီ။

သံပုဆိန်က အေးစက်စက် အလင်းရောင်များ ရောင်ပြန်ဟပ်သွားသည်။ ချူဟန်သည် အပြည့်စုံဆုံးသော ထောင့်ချိုးတစ်ခုမှနေ၍ ပုဆိန်သွားကို ခုတ်ချလိုက်တော့သည်။

ချလွင်...

ပြင်းထန်လှသော ထိပ်တိုက်ရင်ဆိုင်မှု အသံကြီး ထွက်လာသည်။

ထိုခဏမှာပင်... ဂျိ...

အလွန် မာကျောသော အရာတစ်ခုက ပုဆိန်၏ ဘေးမျက်နှာပြင်နှင့် ပွတ်တိုက်မိသွားကာ စူးရှသော မီးပွားများ လွင့်စင်သွားသည်။ ၎င်းမှာ ဒုတိယအဆင့် ဇွန်ဘီ၏ ချွန်ထက်လှသော လက်သည်းများ ဖြစ်သည်။ ကွန်ကရစ် နံရံများကိုပင် အလွယ်တကူ ထိုးဖောက်နိုင်လောက်အောင် ပုံမှန်မဟုတ်သော မာကျောမှုမျိုး ဖြစ်ပေသည်။

ချူဟန်သည် လက်နှစ်ဖက်ဖြင့် ပုဆိန်ကို ကျစ်ကျစ်ပါအောင် ဆုပ်ကိုင်ထားလျက် လည်ချောင်းအောက်မှ ညည်းတွားသံသဲ့သဲ့ ထွက်ပေါ်လာသည်။ ဤဇွန်ဘီ၏ ခွန်အားမှာ ကြောက်မက်ဖွယ်ကောင်းလှပြီး အမြန်နှုန်းမှာလည်း အလွန် လျင်မြန်လှပေသည်။ ထို့အပြင် မာကျောသော လက်သည်းများနှင့် အစွယ်များပင် ရှိသေး၏။

တိကျသေချာမှု ပါရမီစွမ်းရည် ရှိနေလျှင်ပင် တစ်ချက်တည်းဖြင့် အသေမသတ်နိုင်တော့ချေ။ လက်ရှိ သူ၏ ခန္ဓာကိုယ် စွမ်းရည်မှာ ပထမအဆင့် ၌သာ ရှိနေသေးသည်။ တုံ့ပြန်နိုင်စွမ်းက ဤဇွန်ဘီ၏ အမြန်နှုန်းကို မမီသေးပေ။

နေရာအနေအထား အသာစီးမရသည့် အခြေအနေမျိုး၌ပင်၊ ပုံမှန် ပထမအဆင့် ပြောင်းလဲသူ တစ်ဦးဆိုလျှင် ပထမအဆင့် ဇွန်ဘီ အကောင်နှစ်ဆယ် ဝိုင်းရံထားခြင်းကို ခံရလျှင်တောင် သွေးလမ်းခင်း၍ ဖောက်ထွက်နိုင်ပေသည်။ တစ်ကောင်ချင်းစီကိုသာ ရင်ဆိုင်ရမည်ဆိုလျှင် အကောင်တစ်ရာကို ဆက်တိုက် ခုတ်လှဲပစ်နိုင်စွမ်း ရှိပေလိမ့်မည်။

ထို့အပြင် ပထမအဆင့် ခန္ဓာကိုယ် စွမ်းရည်အပြင် [တိကျသေချာမှု] နှင့် [ခွန်အား] ပါရမီစွမ်းရည် နှစ်ခုကို တစ်ပြိုင်နက်တည်း အသုံးပြုထားသော ချူဟန်ဆိုလျှင် အကောင်တစ်ရာ၏ ဝိုင်းရံပိတ်ဆို့မှုမျိုးကိုပင် ရင်ဆိုင်နိုင်ပေသည်။ အဆက်မပြတ် တက်လာမည့် ပထမအဆင့် ဇွန်ဘီများကို ရင်ဆိုင်ရမည်ဆိုလျှင် ယခုအဆင့်၌ ဆက်တိုက် သတ်ဖြတ်နိုင်စွမ်းမှာ အကောင် ရှစ်ရာအထိပင် ရှိပေလိမ့်မည်။

သို့သော် ထိုမျှ အစွမ်းထက်သော သူပင်လျှင်၊ မျက်စိရှေ့ရှိ ဒုတိယအဆင့် ဇွန်ဘီ နှင့် ရင်ဆိုင်ရရာ၌ မနည်းအားကုန်ထုတ်၍ ခုခံနေရလေသည်။ ဒုတိယအဆင့်သို့ ရောက်ရှိသွားသော ဇွန်ဘီများသည် မည်မျှ ကြောက်မက်ဖွယ်ကောင်းသော တည်ရှိမှုမျိုး ဖြစ်ကြောင်းကို သိမြင်နိုင်ပေသည်။

ပထမအဆင့် ဇွန်ဘီများ၏ ထုံထိုင်းလေးလံမှုနှင့် လုံးဝကို ကွဲပြားခြားနားလှသည်။ ဒုတိယအဆင့် ဇွန်ဘီများသည် စွမ်းရည်အားလုံး ခုန်ပျံကျော်လွှားကာ ဆင့်ကဲပြောင်းလဲနေကြပြီ ဖြစ်သည်။ ဆတိုးကိန်းပမာ တိုးပွားလာနေသော ထိုစွမ်းရည်များက ဤကပ်ဘေးကာလကြီးထဲ၌ လှုပ်ရှားနေသော အလောင်းကောင်များကို ထင်တိုင်းကျဲစေပြီး လူသားများ၏ ရှင်သန်မှုကို ကာလကြာရှည်စွာ ခြိမ်းခြောက်လာလိမ့်မည် ဖြစ်သည်။ ချူဟန် အတိတ်သို့ ပြန်မရောက်လာမီ အချိန်အထိ၊ ၎င်းတို့သည် ကမ္ဘာမြေပေါ်၌ အန္တရာယ်အများဆုံး သက်ရှိများအဖြစ် ဆက်လက် ရပ်တည်နေခဲ့ကြဆဲပင် ဖြစ်သည်။

ကန့်သတ်ချက်ကို ချိုးဖျက်ခြင်း။ မျိုးရိုးဗီဇ ပြောင်းလဲခြင်း။ ၎င်းတို့ ပေါင်းစပ်သွားခြင်းဖြင့်၊ ထိုကောင်များသည် ပြိုင်ဘက်ကင်းသော ခွန်အားကို ရရှိသွားကြလေသည်။

ကန့်သတ်ချက်အထိ ဆွဲထုတ်ထားသော အင်အားများကို ပေါင်းစပ်လျက်၊ ချူဟန်သည် လက်နှစ်ဖက်ဖြင့် ပုဆိန်ကို အားပါးတရ ခုတ်ပိုင်းချလိုက်တော့သည်။

စူးရှသော သတ္တုသံကြီးနှင့်အတူ သံပုဆိန်၏ မျက်နှာပြင်ပေါ်၌ နက်ရှိုင်းစွာ ခုတ်ထစ်ခံလိုက်ရသကဲ့သို့ လက်သည်းရာ အချို့ ထင်ကျန်သွားလေသည်။

ဇွန်ဘီမှာ ခြေလှမ်းအနည်းငယ် နောက်ဆုတ်သွားရသည်။ ထိုကောင်သည်လည်း မျက်စိရှေ့ရှိ သားကောင်မှာ သာမန်မဟုတ်ကြောင်းကို ရိပ်မိသွားပုံရသည်။ သူငယ်အိမ်မပါသော ဖြူရော်ရော် မျက်လုံးကြီးထဲ၌ သေးငယ်သော်လည်း အထင်အရှား သိသာလှသည့် တွေဝေသွားသော အရိပ်အယောင်များ ပေါ်လာသည်။

သို့သော် ထိုခဏမှာပင်၊ ဇွန်ဘီက မြေကြီးကို ဆောင့်ကန်လိုက်ပြန်သည်။ စောစောကထက် ပိုမိုမြန်ဆန်ပြီး ပိုမို အားပါပြင်းထန်လှသည်။ ပစ်လွှတ်လိုက်သော အမြောက်ဆန်တစ်ခုပမာ အရှိန်အဟုန် ပြင်းထန်လှပေသည်။ အတွင်းဘက်သို့ ကွေးညွတ်နေသော ကျောချမ်းဖွယ်ရာ လက်သည်းများက အန္တရာယ်များသော အေးစက်စက် အလင်းများ ဖြာထွက်နေလျက် ပြေးဝင်လာတော့သည်။

ဇွန်ဘီက အနီးကပ် ဝင်ရောက်လာသည်။ ဆန့်ထုတ်ထားသော လက်သည်းနှစ်ဖက်က ချူဟန်၏ ပါးပြင်နှင့် ပွတ်တိုက်မိမတတ် နီးကပ်လာလေပြီ။ မျက်လုံးနှစ်လုံးကို ဖောက်ထုတ်ခံရတော့မည့်အလား၊ ထက်မြက်လှသည့် ဖိအားများက အရေပြားကို စူးဝင်လာသည်။

‘အခုပဲ’

ချူဟန်သည် စိတ်ကို အမြင့်ဆုံးအထိ စုစည်းလိုက်ပြီး သာမန်လူများ မလုပ်နိုင်သော ထူးဆန်းသည့် ထောင့်ချိုးတစ်ခုဖြင့် ခန္ဓာကိုယ် အထက်ပိုင်းကို နောက်သို့ အကြီးအကျယ် လှန်ချလိုက်သည်။ အေးစက်စက် လူသတ်ငွေ့များ ပါဝင်နေသော ကြောက်မက်ဖွယ် လက်သည်းများမှ ရှောင်လွှဲလိုက်သည့် ခဏမှာပင်၊ သူ၏ လက်နှစ်ဖက်လုံးသို့ ပေါက်ကွဲထွက်မတတ် အင်အားများကို ထည့်သွင်းလိုက်တော့သည်။

ရွှီး...

လက်နှစ်ဖက်ကို ပြင်းထန်စွာ လွှဲယမ်းလိုက်ပြီး သံပုဆိန်ကို အောက်မှနေ၍ အထက်သို့ ပင့်တင်ခုတ်ချလိုက်သည်။

အားကုန်သုံးသော ခုတ်ချက်ကို စွန့်လွှတ်လိုက်ပြီး အခြားထောင့်တစ်ခုမှ တိုက်ခိုက်မှုကို ရွေးချယ်လိုက်ခြင်းပင် ဖြစ်သည်။ အာရုံစူးစိုက်မှု အထွတ်အထိပ်သို့ ရောက်ရှိသွားကာ [တိကျသေချာမှု] ပါရမီစွမ်းရည်ကို အမြင့်ဆုံးအဆင့်ထိ အသုံးချလိုက်တော့သည်။

ဇွပ်...

မျက်စိတစ်မှိတ်အတွင်း ပွတ်တိုက်သံကြီး ထွက်ပေါ်လာသည်။ ဒုတိယအဆင့် ဇွန်ဘီ၏ လက်နှစ်ဖက်ကြား ဟာကွက်မှနေ၍ ထိုးသွင်းလိုက်သော သံပုဆိန်သည် အမြင့်ဆုံးသော အမြန်နှုန်းနှင့် အင်အားတို့ဖြင့် ၎င်း၏ မေးရိုးကို အောက်မှနေ၍ ခုတ်ပိုင်းချလိုက်လေပြီ။

ထိုခဏမှာပင်...

"ဂယား..."

ဇွန်ဘီ၏ ပါးစပ်မှ ကောင်းကင်နှင့် မြေကြီးကို တုန်လှုပ်သွားစေမတတ် အော်ဟစ်သံကြီး ထွက်ပေါ်လာသည်။ သံပုဆိန်သွားက ထိုကောင်၏ မေးရိုးအောက်ပိုင်း အရိုးများထဲသို့ နက်ရှိုင်းစွာ စိုက်ဝင်သွားခဲ့လေပြီ။ သို့သော် ချူဟန်သည် သတိရှိမှုကို လုံးဝ လျှော့ချလိုက်ခြင်း မရှိပေ။ ဒုတိယအဆင့် ဇွန်ဘီ၏ အရိုးစုများမှာ အလွယ်တကူ ကျိုးပဲ့သွားတတ်သော ပထမအဆင့် ဇွန်ဘီများကဲ့သို့ မကျွတ်ဆတ်လှချေ။ ဒုတိယအဆင့် ပြောင်းလဲထားသော ဇွန်ဘီ၏ အရိုးများမှာ သာမန်လူများထက် အဆပေါင်းများစွာ ပို၍ ခိုင်မာ မာကျောပေသည်။

ယခု တစ်ချက်တည်းဖြင့်တော့ ဤကောင်ကို သေချာပေါက် အသေမသတ်နိုင်သေးချေ။

အခန်း (၉၄) ပျောက်ကွယ်သွားသော ပိုင်ယွန့်အာ

ဂါး...

အရှေ့ရှိ အဆင့်နှစ် ဇွန်ဘီ၏ ပါးစပ်မှ ကောင်းကင်ယံကိုပင် တုန်ခါသွားစေလောက်သည့် ဟိန်းဟောက်သံကြီး ထွက်ပေါ်လာသည်။

အနီးကပ်ဆုံးအကွာအဝေးတွင်ရှိနေသော ချုဟန်၏ နှာခေါင်းထဲသို့ သားရဲတစ်ကောင်ကဲ့သို့ ညှီစော်နံလှသော လေပူများနှင့် ထိုအကောင်ထံမှ ထွက်ပေါ်နေသည့် ပြင်းထန်လှသော ဒေါသအငွေ့အသက်များ ရိုက်ခတ်လာသည်။

တံခါးအနောက်တွင်ရှိနေသော ရှန်ကျိုတီ၊ လော့ရှောင်ရှောင်နှင့် ချန်ရှောက်ရယ်တို့ သုံးဦးလုံး တစ်ပြိုင်နက် သေနတ်များဖြင့် ချိန်ရွယ်လိုက်ကြသည်။ သို့သော် သူတို့၏ တုံ့ပြန်နိုင်စွမ်းမှာ ချုဟန်နှင့် နှိုင်းယှဉ်လျှင် အဝေးကြီး ကွာခြားနေဆဲပင် ဖြစ်သည်။

ရွှီး...

ချုဟန်သည် တစ်ကိုယ်လုံးရှိ ကြွက်သားခွန်အားနှင့် အရှိန်ကို အမြင့်ဆုံးအထိ ပေါက်ကွဲထွက်စေလိုက်ပြီး နောက်သို့လန်နေသော ခန္ဓာကိုယ်အထက်ပိုင်းကို အတင်းဆွဲမတ်လိုက်သည်။

ထို့နောက် ခန္ဓာကိုယ်ကို အနည်းငယ် စောင်းငဲ့လျက် ပြေးဝင်လာသော ချွန်ထက်လှသည့် လက်သည်းများကို သီသီလေး ရှောင်တိမ်းလိုက်သည်။ ထိုအချိန်မှာပင် သူ၏လက်ထဲ၌ ပြောင်းပြန်လှည့်ကိုင်ထားသော သံပုဆိန်ကြီးက လျှပ်တစ်ပြက် မြင့်တက်သွားသည်။

အထက်မှနေ၍ အားကုန်လွှဲခုတ်လိုက်ခြင်းပင်။

ရေစီးကြောင်းပမာ ညက်ညောလှသော ဤလှုပ်ရှားမှုတန်းဆက်ကြီးတစ်ခုလုံးမှာ တစ်စက္ကန့်ပင် မပြည့်လိုက်ပေ။

ချုဟန်၏ အရှိန်မှာ ထိတ်လန့်ဖွယ်ကောင်းသော်လည်း ဇွန်ဘီ၏ တုံ့ပြန်မှုကလည်း မြန်ဆန်လှသည်။ ချုဟန် လှုပ်ရှားလိုက်သည်နှင့် တစ်ပြိုင်နက် ထိုအကောင်က အနောက်သို့ အရှိန်ပြင်းပြင်း ဆုတ်ခွာသွားသည်။ သို့တိုင် ချုဟန်၏ ပြီးပြည့်စုံသော တိုက်ကွက်က ထိုအကောင်ထံသို့ တိကျစွာ ကျဆင်းသွားဆဲဖြစ်သည်။ သံပုဆိန်သွားက ဇွန်ဘီ၏ မျက်ခုံးနှစ်ခုကြားသို့ အံဝင်ခွင်ကျ ကျရောက်သွားပြီး ဒေါင်လိုက်အက်ကွဲကြောင်းကြီးတစ်ခု ဖြစ်ပေါ်သွားစေသည်။

အသက်အန္တရာယ် မစိုးရိမ်ရသော်လည်း ထိုအကောင်မှာ နာကျင်လွန်းသဖြင့် ရူးသွပ်မတတ်ဖြစ်သွားကာ အမည်းရောင်သွေးများ ပန်းထွက်လာတော့သည်။

ဂရား...

ဇွန်ဘီက ထပ်မံအော်ဟစ်လိုက်ပြီး အနောက်သို့ ဆက်တိုက်ဆုတ်ခွာသွားသည်။ ၎င်း၏ မျက်နှာပေါ်တွင် လူသားတစ်ဦးပမာ ရက်စက်ကြမ်းကြုတ်ကာ တွန့်လိမ်နေသော အမူအရာမျိုး ပေါ်လွင်နေသည်။

ရွှစ်...

သို့သော် ချုဟန်၏ တတိယမြောက် တိုက်ကွက်က မည်သည့်အရိပ်အယောင်မှမပြဘဲ ထွက်ပေါ်လာပြန်သည်။

လက်ထဲမှ ပစ်လွှတ်လိုက်သော ဓားမြှောင်တစ်လက်က လေထုထဲတွင် လှပသော လမ်းကြောင်းတစ်ခုကို ရေးဆွဲသွားသည်။ ထိုဓားမြှောင်က လက်တစ်လုံးမျှပင် လွဲချော်ခြင်းမရှိဘဲ ဇွန်ဘီ၏ အက်ကွဲနေသော မျက်ခုံးနှစ်ခုကြားသို့ တိကျစွာ စိုက်ဝင်သွားတော့သည်။

ဇုတ်...

တုံးတိတိဖြင့် ပြင်းထန်သော အသံတစ်ခု ထွက်ပေါ်လာသည်။ ဓားမြှောင်မှာ ဇွန်ဘီ၏ ဦးနှောက်အနက်ပိုင်းအထိ ထိုးဖောက်ဝင်ရောက်သွားပြီး စီးကျလာသော အမည်းရောင်သွေးများက ၎င်း၏ ဖြူရော်နေသော မျက်လုံးများကို အမည်းရောင်အဖြစ် ပြောင်းလဲသွားစေသည်။ ဦးနှောက်တစ်ခုလုံး ပျက်စီးသွားပြီး ခေါင်းတွင် သံမဏိဓားရိုးသာ တန်းလန်း ကျန်ရစ်တော့သည့် အဆင့်နှစ် ဇွန်ဘီကြီးသည် မြေပြင်ပေါ်သို့ ဝုန်းကနဲ လဲကျသွားရာ အခန်းတစ်ခုလုံး ပဲ့တင်ထပ်သွားတော့သည်။

မည်မျှပင် ဆင့်ကဲပြောင်းလဲထားသော ဇွန်ဘီဖြစ်နေပါစေ၊ ဦးနှောက်ဖျက်ဆီးခံရခြင်းက သေဆုံးခြင်းဆီသို့ ဦးတည်သွားစေမည့် တစ်ခုတည်းသော သံမဏိစည်းမျဉ်းပင် ဖြစ်သည်။

တိုက်ခိုက်ခြင်းဆိုသည်မှာ ချုဟန်၏ ခန္ဓာကိုယ်ထဲတွင် စွဲကပ်နေပြီဖြစ်သော ဗီဇတစ်ခုဖြစ်သည်။ ညာဘက်လက်မောင်းတွင် အမြဲတပ်ဆင်ထားလေ့ရှိသော ဓားမြှောင်က ယနေ့တွင်လည်း အကောင်းဆုံးသော အဆုံးအဖြတ်ပေးသည့် လက်နက်အဖြစ် ၎င်း၏ တန်ဖိုးကို ထပ်မံသက်သေပြလိုက်ပြန်သည်။

တင်းမာနေသော လေထုက ချက်ချင်းဆိုသလို ပြေလျော့သွားသည်။ ချုဟန် သက်ပြင်းရှည်ကြီးတစ်ခု ချလိုက်သည်။ အချိန်တိုတောင်းသော တိုက်ပွဲလေးဖြစ်သော်လည်း သူ၏ နဖူးပေါ်တွင် ချွေးပေါက်ကြီးများ အစီအရီ ထွက်ပေါ်နေသည်။ ဤတိုက်ပွဲက အဆင့်တစ် ဇွန်ဘီ ရာပေါင်းများစွာကို သတ်ဖြတ်ရသည်ထက်ပင် စိတ်ကို ပို၍ ပင်ပန်းနွမ်းနယ်စေသည်။ အမြင့်ဆုံးအထိ တင်းမာနေခဲ့ရသော အာရုံကြောများကြောင့် ခြေတစ်လှမ်း မှားယွင်းသွားသည်နှင့် တစ်ကိုယ်လုံး အပိုင်းပိုင်းအစစ ဆွဲဖြဲခံရနိုင်သည့် အကြောက်တရားနှင့် ရင်ဆိုင်ခဲ့ရခြင်းဖြစ်သည်။

စစ်ဖိနပ်နှင့် အေးစက်နေသော ကြမ်းပြင် ရိုက်ခတ်သံ ထွက်ပေါ်လာကာ ချုဟန် တိတ်ဆိတ်စွာ လျှောက်သွားသည်။ ဇွန်ဘီ၏ မျက်ခုံးနှစ်ခုကြားတွင် စိုက်ဝင်နေသော ဓားမြှောင်ကို အားကုန်ဆွဲနှုတ်လိုက်ရာ ဖျက်ဆီးခံထားရသော ဦးနှောက်စများနှင့်အတူ အမည်းရောင်အရည်များက ရေပန်းငယ်တစ်ခုပမာ ပန်းထွက်လာသည်။ ဓားမြှောင်ကို အိမ်ထဲသို့ ပြန်မထည့်မီ ချုဟန်က ကျွမ်းကျင်သော လက်ဟန်ဖြင့် ဇွန်ဘီ၏ နောက်စေ့ကို ဆွဲလှန်လိုက်သည်။ ရွှတ်ကနဲ အသံနှင့်အတူ တွေဝေခြင်းအလျဉ်းမရှိဘဲ ဓားဖြင့် ထပ်မံထိုးစိုက်လိုက်သည်။ ဤလုပ်ဆောင်ချက်က အလွန်တိကျလှသည်။

ချုဟန်ကိုယ်တိုင်၏ အမှားအယွင်းမရှိသော စွမ်းရည်ကြောင့် ဆိုသည်ထက် ဤလုပ်ရပ်အပေါ် ကြက်သီးထဖွယ်ကောင်းလောက်အောင် ကျွမ်းကျင်နေမှုကသာ ဤမျှတိကျနေစေခြင်းဖြစ်သည်။ နောက်စေ့ရှိ အသားစများကြားမှ အမည်းရောင် နောက်ကျိကျိဖြစ်နေသော်လည်း တစ်စိတ်တစ်ပိုင်း ကြည်လင်နေသည့် သလင်းကျောက်နှင့်တူသော ပုံဆောင်ခဲတစ်ခုကို ထုတ်ယူလိုက်သည်။ ထို့နောက် ချုဟန်က ၎င်းကို အိတ်ကပ်ထဲသို့ လျင်မြန်စွာ ကောက်ထည့်လိုက်သည်။

တံခါးအနောက်ဘက်တွင်မူ ချန်ရှောက်ရယ်၊ လော့ရှောင်ရှောင်နှင့် ရှန်ကျိုတီတို့ သုံးဦးက သေနတ်ချိန်ရွယ်ထားသော ကိုယ်နေဟန်ထားဖြင့် တောင့်တင်းနေဆဲပင် ဖြစ်သည်။

ခလုတ်နှိပ်ရန် အချိန်ပင်မရလိုက်ဘဲ ချုဟန်၏ လက်ထဲတွင် တိုက်ပွဲက ပြီးဆုံးသွားခဲ့ပြီဖြစ်သည်။ သုံးဦးလုံး၏ မျက်နှာပေါ်တွင် အံ့အားသင့်မှုများ ဖုံးလွှမ်းနေပြီး အတွေးများ လုံးဝရပ်တန့်သွားကြသည်။

ချုဟန် ထုတ်ဖော်ခဲ့သော တိုက်ကွက်သုံးခုဆက်တိုက်က အလွန်မြန်ဆန်လွန်းကာ တိကျလွန်းလှသည်။ အပိုအလိုမရှိသော လှုပ်ရှားမှုများက အကြိမ်ပေါင်း ထောင်နှင့်ချီ၍ လေ့ကျင့်ထားသူတစ်ဦးပမာ ဇွန်ဘီ၏ တုံ့ပြန်မှု ကွက်လပ်ကို အတိအကျ အသုံးချသွားပြီး အထိရောက်ဆုံးသော သေကွက်ကို ဖော်ဆောင်သွားခြင်းဖြစ်သည်။

ဒါက တိုက်ခိုက်ရေး ဗီဇများလား။ မွေးရာပါ ပါရမီများလား။

သို့မဟုတ်လျှင် သူတို့ရှေ့မှောက်ရှိ လက်မခံနိုင်ဖွယ်ရာ အဖြစ်အပျက်ကို မည်သို့ ရှင်းပြရမည်နည်း။ ချုဟန်ဆိုသည်မှာ အသက်နှစ်ဆယ်အရွယ် တက္ကသိုလ်ကျောင်းသားတစ်ဦးမျှသာ ဖြစ်သည်မဟုတ်ပါလော။

မြေပြင်ပေါ်တွင် လဲကျနေသော စုတ်ပြတ်သတ်နေသည့် အလောင်းကောင်ကြီးကို ကြည့်လိုက်ရုံဖြင့် ရိုးရှင်းသော ဇွန်ဘီမျိုးမဟုတ်ကြောင်း သာမန်လူပင် သိနိုင်ပေသည်။ အခြားလူတစ်ဦးသာဆိုလျှင် တုံ့ပြန်ရန် အချိန်ပင်မရလိုက်ဘဲ ဗိုက်ပွင့်ကာ ကလီစာများ ထွက်ကျလာမည်မှာ သေချာသည်။

သို့တိုင် ချုဟန်က မျက်တောင်တစ်ခတ်အတွင်း ရှင်းလင်းပြလိုက်သည်။ ကြည့်ရှုနေသူများအား တွေးတောရန် အချိန်ပင်မပေးလိုက်သော အံ့မခန်း ဇာတ်သိမ်းတစ်ခုပင် ဖြစ်သည်။ ချုဟန်၏ တုံ့ပြန်နိုင်စွမ်းကပင် ပုံမှန်မဟုတ်လေသလား၊ သို့မဟုတ် သူ၏ တွေးခေါ်နိုင်စွမ်းက သာမန်လူများထက် ကျော်လွန်နေလေသလား။ သုံးဦးလုံးမှာ အဖြေမရှိသော မေးခွန်းများကြားတွင် နစ်မွန်းလျက် မှင်သက်စွာ ရပ်နေကြဆဲဖြစ်သည်။

"သွားကြမယ်"

ချုဟန်က အမည်းရောင် ပုံဆောင်ခဲအကြောင်း တစ်ခွန်းမျှမဟဘဲ ဓားမြှောင်ကို အိမ်ထဲပြန်ထည့်ရင်း ပြောလိုက်သည်။ ထို့နောက် သံပုဆိန်ကို ကိုင်ဆောင်လျက် မှင်သက်နေသော သုံးဦးအနီးသို့ လျှောက်လာသည်။

"အရင်ဆုံး ပိုင်ယွန့်အာကို ရှာကြမယ်"

ပိုင်ယွန့်အာ...

ထိုနာမည်က သူတို့သုံးဦး၏ ရပ်တန့်နေသော အတွေးများကို အတင်းအဓမ္မ ဆွဲခေါ်သွားသည်။ ရှန်ကျိုတီ အသိဝင်လာပြီး မယုံကြည်နိုင်သော မျက်ဝန်းများဖြင့် ချုဟန်ကို တစ်ချက်ကြည့်လိုက်ပြီးနောက် လေးနက်စွာ ခေါင်းညိတ်လိုက်သည်။ ပိုင်ယွန့်အာ၏ အသက်အန္တရာယ်က မည်သို့ရှိနေမည်ကို မသိရသဖြင့် အချိန်ဆွဲနေ၍မရပေ။

ချန်ရှောက်ရယ်မှာ မိမိသဘောဖြင့် အနောက်ဘက်မှ လိုက်ပါလာကာ ပတ်ဝန်းကျင်ကို သတိကြီးစွာ စောင့်ကြည့်ရင်း လျှောက်လာခဲ့သည်။

‘ဘော့စ်က ဒီလောက်တောင် စွမ်းနေတာ၊ ငါက ဆွဲချတဲ့သူ မဖြစ်စေရဘူး’

တီ...

ထိုစဉ် ချုဟန်၏ ဦးနှောက်ထဲမှ ပြန်လည်စတင်ခြင်း စနစ် ၏ အီလက်ထရောနစ် အသံက ရုတ်တရက် ထွက်ပေါ်လာသည်။

[လော့ရှောင်ရှောင်၏ သစ္စာရှိမှု ၉၀ ရာခိုင်နှုန်းသို့ ရောက်ရှိသွားပါပြီ]

စက်ရုပ်ဆန်ဆန် အသံက အမြဲတမ်းလိုလို အေးစက်နေဆဲဖြစ်သော်လည်း ယခုအချိန်တွင် ချုဟန်အတွက်မူ အလွန်ချိုမြိန်ကာ နားထောင်ကောင်းသော အသံတစ်ခုအဖြစ် ခံစားနေရသည်။

အောက်သို့ ငုံ့ကြည့်လိုက်ရာ သူ၏ဘေးတွင် ကပ်လျက် လျှောက်လာသော လော့ရှောင်ရှောင်ကို တွေ့လိုက်ရသည်။ ကောင်မလေး၏ တောက်ပနေသော မျက်လုံးဝိုင်းကြီးများထဲတွင် ချုဟန်အပေါ် ရူးသွပ်မတတ် အားကျကြည်ညိုမှုများ ပြည့်နှက်နေသည်။

‘ကောင်းပြီလေ။ နောက်ဆုံးတော့ ၉၀ ရာခိုင်နှုန်းကို ကျော်လွန်သွားခဲ့ပြီပဲ’

သစ္စာရှိမှုက ၉၀ ရာခိုင်နှုန်းသို့ ရောက်ရှိသွားပါက ထိုကိန်းဂဏန်းမှာ အသေဖြစ်သွားပြီး တစ်သက်လုံး ပြန်ကျသွားမည်မဟုတ်တော့ပေ။ ဤကောင်မလေးလည်း နောက်ဆုံးတွင် သူ၏ လက်ခုပ်ထဲသို့ လုံးလုံးလျားလျား ရောက်ရှိလာပြီဖြစ်သည်။

ဆက်လက်၍ ချုဟန်က ရရှိလာသော အမှတ်များကို စစ်ဆေးကြည့်လိုက်သည်။ သို့သော် နောက်တစ်ခဏတွင် သူ၏ နှုတ်ခမ်းများ တွန့်လိမ်သွားပြီး စိတ်ထဲမှနေ၍ ကျိန်ဆဲလိုက်မိသည်။

‘ အဆင့်နှစ် ဇွန်ဘီတစ်ကောင်လုံး သတ်တာကို ၂ မှတ်တည်းလား... ဒီ သောက်သုံးမရတဲ့ စနစ်ကတော့ ကပ်စေးနှဲလွန်းတာပဲ ’

နောက်နေတာလားဟုပင် မေးချင်သွားသည်။ အဆင့်တစ် သာမန်ဇွန်ဘီ ဆိုလျှင် အကောင်တစ်ရာနှင့် ညီမျှသော တိုက်ခိုက်ရေးစွမ်းရည်ရှိသည့် အကောင်ဖြစ်သည်။ သူကိုယ်တိုင်ပင် အစွမ်းကုန်ထုတ်သုံးပြီးမှ သတ်ဖြတ်နိုင်ခဲ့ခြင်းဖြစ်သည်။ အလွန်အကျိုးအကြောင်းမဆီလျော်လွန်းလှသည်။ ဖြစ်နိုင်လျှင် တိုင်စာပင် ပို့လိုက်ချင်စိတ် ပေါက်သွားသည်။

သံရည်ကျိုစက်ရုံထဲတွင် မှောင်မိုက်နေပြီး ချုဟန်က ရှုံ့မဲ့နေသော မျက်နှာဖြင့် ရှေ့ဆုံးမှ လျှောက်သွားသည်။ လမ်းတစ်လျှောက် တွေ့သမျှ အဆင့်တစ် ဇွန်ဘီများကို သူက ဒေါသဖြေသည့်အလား အကြမ်းတမ်းဆုံးနည်းလမ်းများဖြင့် ရိုက်ချေပစ်လိုက်သည်။ လျှောက်လမ်းတစ်လျှောက် အမည်းရောင်သွေးများ ပန်းထွက်ကုန်ပြီး သူ၏ ရက်စက်ကြမ်းကြုတ်လွန်းမှုကြောင့် အနောက်မှ လိုက်လာသော သုံးဦးမှာ အသက်ပင် ဝဝမရှူရဲဘဲ စကားတစ်ခွန်းမျှ မဟရဲတော့ပေ။

သူတို့လေးဦး အနည်းငယ် ရှေ့ဆက်သွားလိုက်ချိန်တွင် အရှေ့ဘက်မှ နံရံနှင့် ကြမ်းပြင်ကို ပြင်းထန်စွာ ရိုက်ခတ်နေသည့်အသံများ ဆက်တိုက် ထွက်ပေါ်လာသည်။

ဗိုင်း... ဗိုင်း... ဟူသော မသင်္ကာဖွယ် အသံများ ထပ်တလဲလဲ မြည်နေသည်။

ဇွန်ဘီလား။ ဒါမှမဟုတ် အသက်ရှင်ကျန်ရစ်သူလား။

လေးဦးသားမှာ ချက်ချင်း ခြေလှမ်းသွက်သွားကြသည်။ မှောင်မိုက်နေသည့်ကြားမှ အရှိန်ပြင်းပြင်း ပြေးလွှားသွားပြီးနောက် ရုတ်တရက် သူတို့ရှေ့မှောက်သို့ လူသေအလောင်းတစ်လောင်း လိမ့်ထွက်လာသည်။

ထိုအရာမှာ အောက်ပိုင်းတစ်ခုလုံး စုတ်ပြတ်သတ်ကာ ပျောက်ဆုံးနေသော ခန္ဓာကိုယ်တစ်ဝက်မျှသာရှိသည့် အလောင်းဖြစ်သည်။

မခဲသေးသော သွေးစိမ်းရှင်ရှင်များကို ကြည့်ခြင်းအားဖြင့် သေဆုံးသွားသည်မှာ အချိန်သိပ်မကြာသေးကြောင်း သိသာလှသည်။ မျက်နှာနှင့် အရေပြားများမှာ ပြင်းထန်စွာ အကိုက်ဖြတ်ခံထားရသဖြင့် မူလရုပ်သွင်ကိုပင် ခွဲခြား၍မရတော့ပေ။ ဝတ်ဆင်ထားသော အဖြူရောင် အပေါ်အင်္ကျီမှာလည်း အပိုင်းပိုင်းအစစ ဆုတ်ဖြဲခံထားရပြီး အမည်းရောင်သွေးများ၊ ပုပ်သိုးနေသော အသားစများနှင့် ရောထွေးနေသည်။ အတွင်းပိုင်းမှနေ၍ သွေးနံ့ရသွားသော ဇွန်ဘီအချို့က ငတ်မွတ်နေသော သားရဲများပမာ စားကြွင်းစားကျန် အသားတုံးများကို မျိုချရန် တွားသွားကာ ချဉ်းကပ်လာကြသည်။

ချုဟန်မှလွဲ၍ ကျန်သုံးဦးမှာ ထိုကြောက်မက်ဖွယ် မြင်ကွင်းကို မြင်လိုက်ရသည်နှင့် တစ်ပြိုင်နက် မျက်နှာများ ဖြူရော်သွားကြသည်။ ရှန်ကျိုတီမှာ မူးဝေသွားသကဲ့သို့ ပြင်းထန်စွာ ယိုင်နဲ့သွားပြီး ချန်ရှောက်ရယ်၏ ဝတုတ်နေသော ခန္ဓာကိုယ်ကြီးမှာ ကြောက်လန့်လွန်းသဖြင့် တဆတ်ဆတ် တုန်ရီလာသည်။ လော့ရှောင်ရှောင်မှာ အကြောက်လွန်ကာ ချုဟန်၏ ရင်ခွင်ထဲသို့ မျက်နှာအပ်ထားပြီး မျက်လုံးကို လုံးဝမဖွင့်ရဲတော့ပေ။

အကြောင်းရင်းမှာ ထိုစုတ်ပြတ်နေသော အလောင်း၏ ဘေးတွင် ဆွဲဖြဲခံထားရသော အမည်းရောင် ဆံပင်ရှည်ကြီးများ ပြန့်ကျဲနေသောကြောင့် ဖြစ်သည်။ ထိုအသားတုံးကြီးက တစ်ချိန်က မိန်းကလေးတစ်ဦးဖြစ်ခဲ့ကြောင်း ဤမြင်ကွင်းက ရက်စက်စွာ သက်သေပြနေတော့သည်။