အခန်း ၁၀၆၈

အခန်း ၁၀၆၈ ခုနစ်သန်းသော စိန်ခေါ်သူများ

ဒုတိယ အဆင့်ရှိ တိုက်ကြီး ကိုးဆယ့်ကိုးတိုက်မှ အထက်အဆင့်ရှိ တိုက်ကြီးကိုးတိုက်၏ ဗဟိုချက်မကို မော့ကြည့်လျှင် ထိုနေရာသည် သိပ်မကျယ်ဝန်းလှဟု ထင်ရသော်လည်း အမှန်တကယ် ထိုနေရာသို့ ရောက်ရှိသွားသည့် အခါတွင်မူ အဆုံးအစမဲ့ ကျယ်ပြောသည်အား သိမြင်နိုင်သည်။

​ထိုနေရာသည် လူပေါင်းဆယ်သန်းကို တစ်ပြိုင်တည်း ဆံ့ရုံမျှမက အခြားနေရာလွတ်များစွာပင် ကျန်ရှိနေသေး၏။

​ထိုခဏ၌ ဝေဟင်ထက်တွင် ကြီးမားသော ကြာပန်းပလ္လင် ဆယ့်တစ်ချပ် ပေါ်ထွက်နေသည်။ ဗဟိုချက်မရှိ ကြာပန်းပလ္လင်သည် အကြီးမားဆုံးဖြစ်ပြီး ပေပေါင်းသိန်းချီ၍ ကျယ်ဝန်း၏။ ထိုပတ်ပတ်လည်တွင် သေးငယ်သော အခြားကြာပန်းပလ္လင် ဆယ်ချပ်က ဝိုင်းရံထားသည်။

​သာ၍ ဝေးကွာသော နေရာများတွင်မူ ငါးရောင်ခြည်လင်းလက်နေသော ကျောက်တုံးဝိုင်းကြီးများ ရှိနေပြီး ထိုကျောက်တုံးများပေါ်တွင် နံနက်ခင်း တာအိုဂိုဏ်း၏ ကျင့်ကြံသူများ သိပ်သည်းစွာ ရပ်နေကြသည်။ ထိုကျောက်တုံးများမှ ထွက်ပေါ်လာသော ငါးရောင်ခြည် အလင်းတန်းများသည် တစ်ပြင်လုံးကို လင်းထိန်သွားစေပြီး ထိုနေရာတွင် ကျင့်ကြံသူပေါင်း ဆယ်သန်းကျော် ရှိနေသည်။

​လှမ်းကြည့်လိုက်သူ မည်သူမဆို ဤမြင်ကွင်းကြီးကို အလွန်တရာ အံ့ဩ မှင်သက်သွားကြရပေမည်။

​အပြင်ဘက်ဆုံး အဝန်းအဝိုင်းတွင်မူ ဗုံကြီးများ ဝိုင်းရံထားပြီး ထစ်ချုန်းသော ဗုံသံများသည် နဂါးငွေ့တန်း တစ်ခုလုံးသို့ ပျံ့နှံ့ကာ ဝေဟင်ထက်တွင် ပဲ့တင်ထပ်နေတော့သည်။

​ဗဟိုရှိ အကြီးမားဆုံး ကြာပန်းပလ္လင်ပေါ်တွင် ရွှေရောင်ဝတ်ရုံရှည်ကို ဆင်မြန်းထားသော အဘိုးအိုတစ်ဦး ရပ်နေသည်။ သူ့မျက်နှာသည် အိုမင်းရင့်ရော်နေသော်လည်း မျက်လုံးများကို ဖွင့်လိုက်သည့်အခါတွင်မူ စူးရှတောက်ပသော အလင်းတန်းများ ထွက်ပေါ်လာ၏။ သူ့အကြည့်နှင့် ဆုံမိသူတိုင်းသည် မိမိတို့၏ အသက် စွမ်းအားများ ဆူပွက်လာသကဲ့သို့ ခံစားလိုက်ကြရသည်။

​လူတစ်ဦးအား ဤကဲ့သို့သော သက်ရောက်မှုမျိုး ဖြစ်ပေါ်စေနိုင်သည့် အကြောင်းပြချက် တစ်ခုတည်းသာ ရှိသည်။ ဤသည်မှာ ထိုသူသည် ရှင်ခြင်းနယ်ပယ်သို့ ရောက်ရှိနေခြင်းကြောင့်ပင်။

​ထို့ပြင် သူသည် ရှင်ခြင်း နယ်ပယ်ရှိ သာမန်အနန္တတန်ခိုးရှင်တစ်ဦး မဟုတ်ပေ။ သူသည် ဤနယ်ပယ်သို့ ရောက်ရှိခဲ့သည်မှာ ကြာမြင့်ပြီဖြစ်ရာ သူ၏ စွမ်းအားသည် အလွန်တရာ နက်ရှိုင်းခိုင်မာပြီး လူအများ၏ နှလုံးသားကို တုန်လှုပ်စေနိုင်သည့် စွမ်းအားကြီး ဖြစ်တည်မှု တစ်ခု ဖြစ်သည်။

​ထိုအဘိုးအို၏ နောက်ကွယ်တွင်မူ စုမင် ယခင်က မြင်တွေ့ခဲ့ဖူးသော လူသုံးဦး ရှိနေသည်။ သူတို့သည် ယခုရာစုနှစ်အတွင်း နံနက်ခင်း တာအိုဂိုဏ်း၏ အရေးကိစ္စ အားလုံးကို စီမံခန့်ခွဲနေရသော ဂိုဏ်းသခင်သုံးပါး ဖြစ်ကြ၏။ သို့သော် သူတို့ ရပ်နေသည့် နေရာကို ကြည့်ခြင်းအားဖြင့် သူတို့၏ အဆင့်အတန်းသည် ရှင်ခြင်းနယ်ပယ်မှ အဘိုးအိုလောက် မမြင့်မားကြောင်း ထင်ရှားသည်။

​အဘိုးအို ရပ်နေသော ကြာပန်းပလ္လင် ပတ်လည်တွင် မင်္ဂလာရှိသော သားရဲရုပ်တုများ ထုဆစ်ထားသည့် အလွန်တရာ လက်ရာမြောက်ပြီး ခမ်းနားသော စားပွဲပေါင်း ထောင်ချီ၍ ခင်းကျင်းထားသည်။ သို့သော် ထိုစားပွဲများ အားလုံးမှာ အလွတ်များ ဖြစ်နေကြ၏။ အမြင်စူးရှသော လူများကမူ ဤအရာ၏ အဓိပ္ပာယ်ကို ချက်ချင်း သဘောပေါက်လိုက်ကြသည်။ ဤစားပွဲများသည် မင်းသားများ စစ်မှန်သော ဘိသိက်ခံယူပြီးသည့်အခါ ဂုဏ်ပြုရန် ရောက်ရှိလာကြမည့် အခြားမဟာလောကကြီး သုံးခုမှ ဧည့်သည်တော်များအတွက် ပြင်ဆင်ထားခြင်း ဖြစ်သည်။

​ရှင်ခြင်းနယ်ပယ် အဘိုးအို၏ ရှေးဟောင်းအသံကြီး ပျံ့နှံ့သွားသည်နှင့် စုမင်နှင့်အတူ ရောက်ရှိလာသော မင်းသားကိုးဦးသည် ချက်ချင်း လှုပ်ရှားလိုက်ကြပြီး သေးငယ်သော ကြာပန်းပလ္လင် ဆယ်ချပ်ပေါ်သို့ အသီးသီး ဆင်းသက်လိုက်ကြသည်။ စုမင်သည်လည်း ခြေလှမ်းတစ်လှမ်း လှမ်းကာ ကြာပန်းပလ္လင်တစ်ချပ်ပေါ်သို့ ဆင်းသက်လိုက်၏။ သူ ခြေချလိုက်သည့် ခဏ၌ပင် အောက်ခြေရှိ ကြာပန်းပလ္လင်မှ စူးရှတောက်ပသော အလင်းတန်းများ ဖြာထွက်သွားခဲ့သည်။

​သူ့တစ်ခုတည်း မဟုတ်ဘဲ အခြားမင်းသား ကိုးဦး၏ ကြာပန်းပလ္လင်များမှလည်း ထိုနည်းတူပင် အလင်းတန်းများ ထွက်ပေါ်လာရာ ဟင်းလင်းပြင်ကြီးထဲတွင် လှပသော ကြာပန်းဆယ်ပွင့် တစ်ပြိုင်တည်း ပွင့်လန်းလာသကဲ့သို့ ဖြစ်သွားပြီး သင်းပျံ့သော ရနံ့များပင် အရပ်မျက်နှာအနှံ့ ပျံ့လွင့်သွားခဲ့သည်။

​ဤမြင်ကွင်းသည် စုမင်နှင့် အခြားသူများကို လူအများကြားတွင် အထူးခြားဆုံးနှင့် မျက်စိကျစရာ အကောင်းဆုံး ဖြစ်သွားစေကာ ထိုအခိုက်အတန့်တွင် နံနက်ခင်း တာအိုဂိုဏ်း၏ အတောက်ပဆုံးသော နေမင်းကြီးများသဖွယ် ဖြစ်သွားစေတော့သည်။

​အဘိုးအိုက တည်ငြိမ်သော လေသံဖြင့် ဆက်လက်ပြောကြားသည်။

​"နံနက်ခင်း တာအိုဂိုဏ်း... အခြား မျိုးနွယ်စုက လာတဲ့ တပည့်တွေက ဂိုဏ်းရဲ့ အုတ်မြစ်ဖြစ်ပြီး မျိုးနွယ်ခွဲတွေကတော့ သွေးကြောတွေ ဖြစ်ကြတယ်။ တိုက်ရိုက် အနွယ်ဝင်တွေကတော့ နံနက်ခင်း တာအိုဂိုဏ်းရဲ့ ဝိညာဉ်ပဲ။ ဒါကြောင့် မင်းတို့ဆယ်ယောက်က မင်းသား အလောင်းအလျာတွေပဲ ရှိသေးပေမဲ့ တခြားသူတွေနဲ့ မတူဘဲ ထူးခြားမြင့်မြတ်ကြောင်း ပြသဖို့အတွက် နံနက်ခင်း တာအိုဂိုဏ်းရဲ့ ကြာပန်းပလ္လင်ပေါ်မှာ ရပ်တည်ခွင့် ပေးထားတာ ဖြစ်တယ်။ ဘိုးဘေး တာအိုချန်ရဲ့ ကိုယ်စား ငါက မင်းတို့ဆယ်ယောက်ကို ကြာပန်းနက္ခတ်ဝတ်ရုံကို ယာယီ ချီးမြှင့်မယ်"

"​မင်းတို့ ဒီဝတ်ရုံကို ဆက်ပြီး ပိုင်ဆိုင်ခွင့် ရှိ၊ မရှိ ဆိုတာကတော့ ဒီအခမ်းအနား ပြီးဆုံးတဲ့အထိ ကြံ့ကြံ့ခံနိုင်မလား ဆိုတဲ့အပေါ်မှာပဲ မူတည်တယ်။ ငါ အမှန်အတိုင်း ပြောပြရရင် ဒီဝတ်ရုံက အပြည့်အဝ နိုးထခြင်း မရှိသေးဘူး။ ဒါပေမဲ့ ဒါကို ဆင်မြန်းထားရုံနဲ့တင် မင်းတို့ဟာ နံနက်ခင်း တာအိုလောကရဲ့ ကံတရား အရှိန်အဝါကို ငှားယမ်းအသုံးပြုနိုင်မှာ ဖြစ်တယ်။ ဒါက မင်းတို့ကို ဉာဏ်အလင်းပွင့်ဖို့ အထောက်အကူပြုမှာဖြစ်ပြီး မင်းတို့ရဲ့ ကျင့်ကြံခြင်းလမ်းစဉ် တိုးတက်မှုက တခြားသူတွေထက် အဆပေါင်းရာချီ မြန်ဆန်သွားလိမ့်မယ်"

"​ဒီဝတ်ရုံနဲ့ဆိုရင် တစ်နှစ်ကျင့်ကြံတာက အခြားသူတွေ နှစ်ပေါင်းတစ်ရာ အားထုတ်ကျင့်ကြံတာနဲ့ ညီမျှလိမ့်မယ်"

"​ဝတ်ရုံကို အပြည့်အဝ နိုးထစေပြီးတဲ့ အခါမှာတော့ သူ့ရဲ့ အကာအကွယ် စွမ်းရည်က အရှင်သခင် နယ်ပယ် တန်ခိုးရှင်တစ်ဦးရဲ့ စွမ်းအားအပြည့် ထိုးနှက်ချက်ကို တောင့်ခံနိုင်လိမ့်မယ်။ အမှန်တကယ်တော့ ဒီထဲမှာ ဘိုးဘေး တာအိုချန်ရဲ့ အလိုဆန္ဒ ဝိညာဉ် တစ်စိတ်တစ်ပိုင်း ကိန်းအောင်းနေတာကြောင့် တစ်ကြိမ်တည်းပဲ အသုံးပြုနိုင်မှာ ဖြစ်ပေမဲ့ ထိုတစ်ကြိမ်တည်းနဲ့တင် အရှင်သခင် နယ်ပယ် တန်ခိုးရှင် တစ်ဦးကို အသေသတ်ပစ်ဖို့ လုံလောက်တယ်"

"​မင်းတို့ စစ်မှန်တဲ့ မင်းသားတွေ ဖြစ်လာတဲ့အခါ ဘိုးဘေးရဲ့ သီးသန့်ကျင့်ကြံရာ နယ်မြေကို သွားရောက်ခွင့် ရမှာဖြစ်ပြီး ဘိုးဘေး တာအိုချန် ကိုယ်တိုင် ဝတ်ရုံကို နှိုးပေးလိမ့်မယ်"

​အဘိုးအို၏ အသံ ဝေဟင်တွင် ပဲ့တင်ထပ်သွားသည်နှင့်အမျှ လူပေါင်းဆယ်သန်း၏ အသက်ရှူသံများ မြန်ဆန်လာခဲ့သည်။ ထိုအချိန်တွင် စုမင်နှင့် အခြားသူများ ရပ်နေသည့် ကြာပန်းပလ္လင်ဆယ်ချပ်မှ သာ၍ စူးရှတောက်ပသော အလင်းတန်းများ ဖြာထွက်လာကာ မျက်စိကျိန်းမတတ် ဖြစ်လာချိန်တွင် ကြာပန်းများ ပွင့်လန်းသွားခဲ့သည်။ ကြာပန်းပွင့်ဖတ်များ ဟင်းလင်းပြင်ထဲမှ ပေါ်ထွက်လာပြီး စုမင်နှင့် အခြားကိုးဦးကို ဝန်းရံသွားခဲ့၏။ ထိုနည်းတူ သူတို့ ဆင်မြန်းထားသော ဝတ်ရုံများမှလည်း ပွင့်ဖတ်များ၏ အလင်းကို ထင်ဟပ်ကာ တောက်ပလာခဲ့သည်။

​ချက်ချင်းပင် ထိုပွင့်ဖတ်များသည် စုမင်ထံသို့ တိုးဝင်လာပြီး ဝတ်ရုံအတွင်းသို့ ပေါင်းစပ်သွားခဲ့သည်။ စုမင်အပါအဝင် အားလုံး၏ ဝတ်ရုံများ ပြောင်းလဲသွားခဲ့ပြီး ထိုပေါ်ရှိ ကြယ်တာရာများသည် ရွေ့လျားကာ ရေတွက်၍ မရနိုင်သော ကြယ်စင်များဖြင့် ဖွဲ့စည်းထားသည့် ပွင့်လန်းနေသော မဟာကြာပန်း ပုံသဏ္ဍာန်အဖြစ်သို့ ပြောင်းလဲသွားတော့သည်။

​စုမင်၏ အကြည့်များ တည်ငြိမ်သွားသည်။ သူသည် ဝတ်ရုံမှ ထွက်ပေါ်လာသော ဆန်းကြယ်သည့် အရှိန်အဝါလှိုင်းများကို ချက်ချင်း ခံစားလိုက်ရ၏။ ထိုအရှိန်အဝါသည် သူ့ခန္ဓာကိုယ်အား အာဟာရပြုပေးနေပြီး စိတ်ကို ကြည်လင် လန်းဆန်းစေရုံမျှမက နောက်နောင်တွင် မည်သည့် ဒဏ်ရာရစေကာမူ လျင်မြန်စွာ ပြန်လည် ကောင်းမွန်လာစေမည်ဟု ခံစားရစေသည်။

​ထို့ပြင် စုမင်သည် တစ်နှစ်ကျင့်ကြံခြင်းက နှစ်ပေါင်းတစ်ရာနှင့် ညီမျှစေမည့် စွမ်းအားကိုလည်း ရှင်းလင်းစွာ ခံစားလိုက်ရသည်။ ဝတ်ရုံပေါ်ရှိ အချိန်စီးဆင်းမှုသည် ပတ်ဝန်းကျင်ကမ္ဘာနှင့် သိသိသာသာ ကွဲပြားနေ၏။ ထို့ကြောင့် အခြားသူများက လှမ်းကြည့်လိုက်လျှင် သူတို့သည် မြူခိုးများအကြား ဖုံးလွှမ်းနေသကဲ့သို့ ဖြစ်နေပြီး စုမင်နှင့် အခြားမင်းသားကိုးဦး၏ မျက်နှာကို သဲသဲကွဲကွဲ မြင်တွေ့နိုင်ရန် ခက်ခဲသွားစေကာ ဟင်းလင်းပြင်နှင့် တသားတည်း ပေါင်းစပ်တော့မည့်အလား ခံစားရစေသည်။

​ထိုသို့သော အစစ်နှင့် အတုအယောင်ကြား ခွဲခြားရခက်သည့် အငွေ့အသက်သည် သဘာဝကျကျပင် ဆန်းကြယ်သော လွှမ်းမိုးမှု အရှိန်အဝါကို ဖန်တီးပေးလိုက်ရာ မင်းသားများ၏ အဆင့်အတန်းနှင့် အခြားသူများ၏ ဖြစ်တည်မှုအကြား ကြီးမားသော ကွာခြားချက်အား ဖော်ပြနေတော့သည်။

​ဤကဲ့သို့ ခံစားရသူမှာ စုမင်တစ်ဦးတည်း မဟုတ်ပေ။ ထိုအခိုက်အတန့်တွင် အခြားမင်းသားကိုးဦးသည်လည်း ခေါင်းငုံ့ကာ မိမိတို့ခန္ဓာကိုယ်ပေါ်ရှိ ပွင့်လန်းနေသော ကြာပန်းပုံသဏ္ဍာန်များကို ကြည့်ရင်း မျက်နှာအမူအရာများ ပြောင်းလဲသွားကြသည်။

​တစ်ပြိုင်တည်းပင် ကျင့်ကြံသူ ဆယ်သန်း၏ အကြည့်များသည် မင်းသားဆယ်ဦးထံသို့ ချက်ချင်း ကျရောက်လာခဲ့သည်။ ထိုအကြည့်များထဲတွင် လောဘ၊ မကျေနပ်မှု၊ မနာလိုမှုနှင့် အားကျအတုယူမှုများ ပြည့်နှက်နေခဲ့ကြ၏။

အမျိုးမျိုးသော မျက်နှာပေးများနှင့် ခံစားချက်များအား မြင်တွေ့နိုင်ပြီး လူသားတစ်ယောက် ဘဝတွင် ခံစားရနိုင်သမျှသော စိတ်ခံစားမှု အားလုံးကို ထိုလူပေါင်းဆယ်သန်းကြားတွင် တွေ့ရှိနိုင်သည်။

​ရှင်ခြင်းနယ်ပယ်မှ အဘိုးအိုက တည်ငြိမ်စွာ ဆိုသည်။

​"မင်းတို့ဆယ်ယောက်လုံး ဝတ်ရုံရဲ့ စွမ်းရည်တွေကို သတိပြုမိကြမှာပါ။ ငါပြောပြရရင် မင်းတို့ခန္ဓာကိုယ်ပေါ်က ပွင့်လန်းနေတဲ့ ကြာပန်းဟာ ဘိုးဘေး တာအိုချန် သီးသန့် ကျင့်ကြံနေစဉ်အတွင်း ကိုယ်တိုင် ဖန်တီးခဲ့တဲ့ အထွတ်အထိပ် ရတနာတစ်ပါး ဖြစ်တယ်။ ဒီအထွတ်အထိပ် ရတနာမှာ ကြောက်မက်ဖွယ်ကောင်းတဲ့ နတ်ဘုရားစွမ်းရည်တစ်ခု ရှိပြီး သူ့ရဲ့ နာမည်က ဝတ်ရုံ နာမည်အတိုင်း ပွင့်လန်းတဲ့ ကြာပန်းပဲ ဖြစ်တယ်"

"​ဒါဟာ ဘိုးဘေး တာအိုချန် သီးသန့် ကျင့်ကြံစဉ်အတွင်း သိမြင်နားလည်ခဲ့တဲ့ နတ်ဘုရားစွမ်းရည်ဖြစ်ပြီး မင်းတို့ရဲ့ ဝတ်ရုံတွေထဲကို ထည့်သွင်းပေးထားတာ ဖြစ်တယ်။ မင်းတို့အနေနဲ့ ဒါကို ကိုယ်တိုင် နှိုးဆွပြီး ဝတ်ရုံက မင်းတို့ရဲ့ အသန်မာဆုံး အချိန် အခြေအနေကို မှတ်သားထားလိမ့်မယ်။ အချိန်တွေကို အဲဒီအခိုက်အတန့်မှာတင် အေးခဲရပ်တန့်ထားသလိုမျိုးပေါ့။ ပြီးတော့ မင်းတို့ ပြင်းပြင်းထန်ထန် ဒဏ်ရာရတဲ့အခါ ဒါမှမဟုတ် အသက်အန္တရာယ်နဲ့ ကြုံရတဲ့အခါ ဒီနတ်ဘုရား စွမ်းရည်ကို အသုံးပြုပြီး အချိန်ကို နောက်ပြန်လှည့်ပြီး ဝတ်ရုံက မှတ်သားထားတဲ့ အသန်မာဆုံး အခြေအနေဆီကို ချက်ချင်း ပြန်ရောက်ရှိသွားစေနိုင်တယ်"

​သူ့စကားလုံးများသည် အေးဆေးတည်ငြိမ်သော်လည်း အခြားသူများ မသိနိုင်သည်မှာ သူကိုယ်တိုင်ပင်လျှင် ထိုပွင့်လန်းသော ကြာပန်း ဆယ်စုံအပေါ် အလွန်တရာ လိုချင်မက်မောနေခြင်း ဖြစ်၏။

​သူပင် ထိုမျှ ဖြစ်နေပါက သူ့နောက်ကွယ်မှ ဂိုဏ်းသခင်သုံးပါး ဆိုလျှင်မူ ပြောနေစရာပင် မလိုတော့ပေ။ ပတ်ပတ်လည်ရှိ ကျင့်ကြံသူ ဆယ်သန်းသည်လည်း အသက်ရှူသံများ ပြင်းထန်လာကြပြီး လူပေါင်းဆယ်သန်း၏ ပြင်းထန်သော အသက်ရှူသံများ စုစည်းမှုသည် ဝေဟင်ထက်တွင် မိုးထစ်ချုန်းသံကြီးများကဲ့သို့ ဖြစ်ပေါ်လာခဲ့သည်။ ပြင်းထန်သော အလိုရမ္မက် အကြည့်များသည် မင်းသားဆယ်ဦးထံသို့ ကျရောက်လာခဲ့ပြီး သူတို့၏ တိုက်ပွဲဝင်လိုစိတ်များကို သေချာပေါက် တောက်လောင်စေခဲ့ပြီ ဖြစ်သည်။

​"ဘယ်သူမဆို မင်းသား ဖြစ်လာတဲ့သူက ဒါကို ရရှိပိုင်ဆိုင်မှာ ဖြစ်တယ်။ မင်းတို့က အခြား မျိုးနွယ်စုက တပည့်ပဲဖြစ်ဖြစ် နံနက်ခင်း တာအိုလောကရဲ့ အရှင်သခင် မဖြစ်လာနိုင်ရင်တောင် ဒီကြာပန်းနက္ခတ် ဝတ်ရုံကိုတော့ ရရှိ ပိုင်ဆိုင်နိုင်မှာပဲ"

"​အခုအချိန်ကတော့ ဘိသိက်မင်္ဂလာပွဲရဲ့ ပထမဆုံးအဆင့်ဖြစ်တဲ့ စိန်ခေါ်ပွဲတွေကို စတင်မယ့် အချိန်ပဲ။ မင်းတို့ရဲ့ နတ်ဘုရားအာရုံတွေက ဒီမြေပြင်နဲ့ ပေါင်းစပ်ထားပြီးပြီဖြစ်လို့ မင်းတို့ စိန်ခေါ်ချင်တဲ့ မင်းသားဆီကို အကြည့်ပို့လွှတ်ပြီး မင်းတို့ရဲ့ တိုက်ပွဲဝင်လိုစိတ်ကို နှိုးဆွလိုက်ရုံပဲ။ တိုက်ပွဲဝင်လိုစိတ် အသန်မာဆုံးဖြစ်တဲ့ သူဟာ သူစိန်ခေါ်ချင်တဲ့ မင်းသားရှိရာ ကြာပန်းပလ္လင်ဆီကို အလိုအလျောက် ပို့ဆောင်ခြင်း ခံရလိမ့်မယ်။ မင်းတို့ စိန်ခေါ်ချင်တဲ့ မင်းသား အလောင်းအလျာကို ရွေးချယ်ကြစမ်း။ ဒီနေရာကို ရောက်ရှိနေပြီး ငါးရောင်ခြည် ကျောက်တုံးပလ္လင်ပေါ်မှာ ရပ်နေတဲ့ တပည့်အားလုံးမှာ စိန်ခေါ်ပွဲ ဆင်နွှဲခွင့် ရှိတယ်"

"​ဒါပေမဲ့ ငါ မင်းတို့ကို နောက်ဆုံး သတိပေးချက် တစ်ခု ပေးရမယ်။ စိန်ခေါ်သူတွေ အနေနဲ့ အသက်သေဆုံးအောင် သတ်ပိုင်ခွင့် မရှိဘူး။ ဒါပေမဲ့ စိန်ခေါ်ခြင်းခံရတဲ့ မင်းသား ဆယ်ဦးမှာတော့ သတ်ပိုင်ခွင့် ရှိတယ်"

​အဘိုးအိုက ပတ်ပတ်လည်ရှိ ကျင့်ကြံသူ ဆယ်သန်းကို တစ်ချက်ဝေ့ကြည့်လိုက်ပြီးနောက် စုမင်နှင့် အခြားကိုးဦးထံသို့ အကြည့်ကို ပြန်လည်ပို့လွှတ်လိုက်သည်။

​"မင်းတို့ တစ်ယောက်ချင်းစီကို အနိုင်ရတဲ့ အခါတိုင်း မင်းတို့ရဲ့ အောက်ခြေက ကြာပန်းပလ္လင်နဲ့ ဝတ်ရုံတွေက မင်းတို့ရဲ့ ဒဏ်ရာအားလုံး ပြန်ကောင်းလာဖို့အတွက် သက်စောင့် စွမ်းအားတွေကို ပေးလိမ့်မယ်။ အဲဒီသက်စောင့် စွမ်းအားကို ငါကိုယ်တိုင် ထောက်ပံ့ပေးမှာဖြစ်လို့ ခုနစ်ရက်ပတ်လုံး ဆက်တိုက် စိန်ခေါ်ခြင်း ခံရရင်တောင် မင်းတို့မှာ သက်စောင့် စွမ်းအား လျော့နည်းသွားမှာ မဟုတ်ဘူး။ ဘာမှ စိုးရိမ်ပူပန်စရာမလိုဘဲ တိုက်ခိုက်နိုင်တယ်"

​ရှင်ခြင်းနယ်ပယ် အဘိုးအိုက တည်ငြိမ်စွာ ဆိုလိုက်သည်။ သူ့မျက်နှာတွင် မာန်မာနများ မရှိသော်လည်း စကားလုံးများထဲတွင် ယုံကြည်ချက်များ အပြည့် ရှိနေသည်။ သူက လက်မောင်းကို ဝေ့ယမ်းလိုက်သောအခါ နောက်ထပ် စကားလုံးများသည် အရပ်မျက်နှာအနှံ့ ပဲ့တင်ထပ်သွားခဲ့၏။

​"စိန်ခေါ်ပွဲကို စတင်စေ"

​သူ့အသံ ဟိန်းထွက်သွားသည်နှင့် လူပေါင်းဆယ်သန်းကြားမှ အချို့သော သူများသည် သူတို့၏ ပြင်းထန်သော တိုက်ပွဲဝင်လိုစိတ်များကို ချက်ချင်း ထုတ်ဖော်လိုက်ကြသည်။ ၎င်းသည် လေထုနှင့် ပေါင်းစပ်သွားသည်နှင့် စုမင်နှင့် အခြားကိုးဦးထံသို့ တဟုန်ထိုး ပြေးဝင်သွားခဲ့ကြ၏။

​ထိုအခိုက်အတန့်တွင် စုမင်၏ ကြာပန်းပလ္လင်ဆီမှ ကျယ်လောင်သော ပေါက်ကွဲသံကြီး တစ်သံ ထွက်ပေါ်လာခဲ့သည်။ စုမင်၏ အထက် ကောင်းကင်ယံတွင် မြူခိုးများနှင့် တိမ်တိုက်များ လျင်မြန်စွာ ပေါ်ထွက်လာခဲ့ပြီး ပြင်းထန်သော စွမ်းအားတစ်ခုက သူ့ထံသို့ လာရောက် ရိုက်ခတ်နေသကဲ့သို့ ဖြစ်နေသည်။ အခြားသူများ၏ ကြာပန်းပလ္လင် အများစုတွင်လည်း ထိုနည်းတူ ဖြစ်ပျက်နေသော်လည်း စုမင် အနီးအနားတွင် ဖြစ်ပေါ်နေသော ရိုက်ခတ်မှုသံလောက် ပြင်းထန်ခြင်း မရှိပေ။

​မျက်စိတစ်မှိတ်အတွင်း ထိုရိုက်ခတ်မှုများအလယ်တွင် ရှေးဟောင်း မှော်သင်္ကေတ တစ်လုံး ပေါ်ထွက်လာခဲ့သည်။ ပလ္လင်ဆယ်ချပ်တွင် မှော်သင်္ကေတ ဆယ်လုံး ရှိနေသော်လည်း ၎င်းတို့သည် တစ်လုံးနှင့်တစ်လုံး လုံးဝ ကွဲပြားခြားနားနေကြ၏။

​ထိုမှော်သင်္ကေတများသည် ရှေးဟောင်းအက္ခရာများ ဖြစ်ကြပြီး တစ်လုံးချင်းစီက ဂဏန်းအရေအတွက်ကို ဖော်ပြနေကာ ထိုလူဆယ်ဦးအား စိန်ခေါ်နေကြသည့် လူအရေအတွက် မည်မျှရှိသည်ကို မင်းသားများအား အနီးစပ်ဆုံး သိရှိစေရန် အသိပေးနေခြင်း ဖြစ်သည်။

​ကြာပန်းပလ္လင် ဆယ်ချပ်ပေါ်တွင် မှော်သင်္ကေတများ ပေါ်ထွက်လာသည်နှင့် လူပေါင်းဆယ်သန်းကြားမှ မိုးထစ်ချုန်းသံကဲ့သို့ ကျယ်လောင်သော ဆူညံသံကြီး ဝေဟင်သို့ ပျံတက်သွားခဲ့တော့သည်။

​"အဲဒါ ဘယ်သူလဲ။ သူ... သူ့ကို စိန်ခေါ်တဲ့ လူပေါင်း ခုနစ်သန်းတောင် ရှိနေတာလား"

​"အဲဒီလူက လူစိမ်း မျက်နှာအသစ်ပဲ။ ဒါပေမဲ့ သူက သေချာပေါက် တာအိုခုန်းပဲ ဖြစ်ရမယ်။ ကြည့်ရတာ ဂိုဏ်းသားတွေက တခြားလူတွေကို စိန်ခေါ်ဖို့ တွန့်ဆုတ်နေကြပြီး သူ့ကိုပဲ ရွေးချယ်ပြီး စိန်ခေါ်လိုက်ကြတာ ဖြစ်ရမယ်"

​"ဒါပေမဲ့ ကောလာဟလတွေအရ ဒီလူက တာအိုဖေးဖန်းကို သတ်ခဲ့ပြီး အင်မော်တယ် မဟာမိတ်က ကျင့်ကြံသူ သောင်းချီကိုလည်း သတ်ပစ်ခဲ့တာ မဟုတ်ဘူးလား"

​"သတ်တော့ရော ဘာဖြစ်လဲ။ သူက သူ့နောက်မှာ အစွမ်းထက်တဲ့ နောက်လိုက်တစ်ယောက် ရှိနေလို့ အဲဒီလို လုပ်နိုင်ခဲ့တာလေ"

​ကျယ်လောင်သော အော်ဟစ်သံများ ဝေဟင်တွင် ပဲ့တင်ထပ်နေစဉ် စုမင်သည် ခေါင်းကိုမော့ကာ မိမိ အထက်တွင် တိုက်ပွဲဝင်လိုစိတ်များ မြူခိုးတိမ်တိုက်များနှင့် လာရောက်ရိုက်ခတ်ပြီးနောက် ဖြစ်ပေါ်လာသော အရေအတွက်ပြ မှော်သင်္ကေတအား လှမ်းကြည့်လိုက်သည်။ သူ့မျက်နှာ အမူအရာမှာ အနည်းငယ် ညှိုးမှိန်သွားခဲ့၏။ သူနှင့် နှိုင်းယှဉ်လျှင် အခြားမင်းသားများမှာမူ သူတို့ကို စိန်ခေါ်သည့် ကျင့်ကြံသူ အရေအတွက် တစ်သန်းခန့် သို့မဟုတ် သောင်းဂဏန်းအနည်းငယ်မျှသာ ရှိနေကြသောကြောင့် ဖြစ်သည်။

​