အခန်း ၁၀၇၄
Vol. 77 Ch. 1074
အခန်း ၁၀၇၄ တိုက်ခိုက်ခြင်းနယ်မြေ (၃)
ထိုလူလေးဦး၏ မျက်နှာများသည် တည်ငြိမ်နေပြီး မည်သည့် အမူအရာ အပြောင်းအလဲမျှ မတွေ့ရှိနိုင်ချေ။ သို့သော်လည်း သူတို့အားလုံးသည် ဝေးလံသော နေရာဆီသို့ ပျံသန်းသွားနေသည့် အလင်းတန်းရှည်ကြီးနှင့် စုမင်ဖြစ်သော ထိုအလင်းတန်းကြီးထံသို့သာ သူတို့၏ အကြည့်များကို ပို့လွှတ်ထားကြသည်။
အသားညိုညိုနှင့် အဘိုးအိုသည် တည်ငြိမ်နေဆဲဖြစ်သော်လည်း သူ့စိတ်ထဲတွင်မူ အေးစက်စွာ လှောင်ရယ်နေခဲ့သည်။ သူသည် စုမင်အား တတ်နိုင်သမျှ ပိုမို ထင်ပေါ် ကျော်ကြား စေချင်နေခဲ့၏။ အကြောင်းမှာ သူ နတ်ဘုရား အနှစ်သာရ နယ်မြေဆီသို့ စေလွှတ်ထားသောသူ ပြန်လည်ရောက်ရှိလာသည့်အခါ ရရှိမည့် အကျိုးသက်ရောက်မှုက ပိုမိုပြင်းထန်လာမည် ဖြစ်သောကြောင့်ပင်။
ထိုကောင်တွင် သွေးမျိုးဆက်မှ ဆင်းသက်လာသော ရွှေရောင်အလင်းတန်း ရှိနေပြီး သူ့အဆင့်အတန်းကို လှုပ်ခတ်ရန် မဖြစ်နိုင်သော်လည်း အသားညိုညိုနှင့် အဘိုးအို အလိုရှိသည်မှာ လူတို့၏ နှလုံးသားများအား လှုပ်ခတ်ပစ်ရန် ဖြစ်သည်။
နံနက်ခင်းတာအိုဂိုဏ်းမှ တပည့်များအနေဖြင့် နတ်ဘုရား အနှစ်သာရ နယ်မြေတွင် တာအိုခုန်း ဖြစ်ပျက်ခဲ့သမျှ အရာအားလုံးကို ကြားသိရပြီး သူ့အပေါ် သံသယဝင်လာကြသရွေ့ အသားညိုညိုနှင့် အဘိုးအို၏ ရည်မှန်းချက် အောင်မြင်ပြီ ဖြစ်သည်။
သူ လိုအပ်သည်မှာ နံနက်ခင်းတာအိုဂိုဏ်းမှ တပည့်များ တာအိုခုန်းကို သံသယ ဝင်ရန်သာဖြစ်ပြီး ထိုသံသယများမှတစ်ဆင့် ကောလာဟလများ သဘာဝအတိုင်း ပေါက်ဖွားလာပေမည်။ ထိုအကြောင်းကြောင့်ပင် သူသည် မင်းသား အလောင်းအလျာ ဖြစ်လာခဲ့လျှင်ပင် သူ့ကို သံသယဝင်သူများ ရှိနေသရွေ့ မင်းသားအဖြစ် တင်မြှောက်ခြင်း မခံရသကဲ့သို့ပင် ဖြစ်နေပေမည်။
လူတစ်ယောက်၏ အဆင့်အတန်းကို ရိုက်ချိုးဖျက်ဆီးပစ်ခြင်းဖြင့် ထိုသူအား အသုံးမဝင်သူတစ်ဦး ဖြစ်အောင် လုပ်ရန် မလိုအပ်ချေ။ အကောင်းဆုံး လက်နက်ဟူသည် လူတို့၏ နှလုံးသားထဲမှ သံသယများနှင့် မသမာသော အတင်းအဖျင်း စကားများသာ ဖြစ်သည်။
အသားညိုညိုနှင့် အဘိုးအို စိတ်ထဲတွင် အေးစက်စွာ လှောင်ရယ်နေစဉ် စုမင်သည် ကောင်းကင်ယံရှိ တတိယမြောက် တိုက်ခိုက်ခြင်းနယ်မြေဆီသို့ ချဉ်းကပ်လာခဲ့ပြီ ဖြစ်သည်။ သူ နီးကပ်လာသည်နှင့် ထိုတိုက်ကြီး၏ ဗဟိုချက်တွင် ရှိသော ပလ္လင်ကြီးကို ပထမဆုံး မြင်တွေ့လိုက်ရသည်။ ထိုနေရာရှိ အလင်းတိုင်ကြီးထက်တွင် လင်းလက်နေသော နာမည်ပေါင်းမှာ သုံးဆယ်ပင် မပြည့်ချေ။
အမြင့်ဆုံးနေရာတွင် နာမည် ရှစ်ခု ရှိနေပြီး ကျန်ရှိသော နာမည်များမှာမူ အနည်းငယ် ပို၍ သေးငယ်ကာ အောက်ဘက်တွင် တည်ရှိနေကြသည်။ ထိုနာမည် ရှစ်ခုမှာ ဤနယ်မြေ တစ်ခုလုံးအား အောင်မြင်စွာ ဖြတ်ကျော်နိုင်ခဲ့သူများကို ရည်ညွှန်းပြီး သေးငယ်သော နာမည်များမှာမူ အချို့သော အဆင့်များကိုသာ ဖြတ်ကျော်နိုင်ခဲ့သူများအား ကိုယ်စားပြုနေခြင်း ဖြစ်သည်။
စုမင်သည် အလင်းတိုင်ကြီးကို စိုက်ကြည့်နေစဉ် နားထဲသို့ လေခွဲသံများ ဆူညံစွာ ဝင်ရောက်လာခဲ့သည်။ ထိုအသံများသည် သူတို့၏ အရှိန်အဟုန်ဖြင့် ဟင်းလင်းပြင်ကို ဖြတ်သန်းကာ သူ့ထံသို့ အပြင်းအထန် ပြေးဝင်လာနေကြသော လူပေါင်း သန်းချီသည့် ကျင့်ကြံသူများထံမှ ထွက်ပေါ်လာခြင်း ဖြစ်သည်။
သူသည် လူအုပ်ကြီးကို ဆွဲဆောင်မိသွားသည့် အချက်အား ဂရုစိုက်မနေခဲ့ချေ။ စုမင်သည် ခြေလှမ်းကို မြှောက်ကာ ပလ္လင်ပေါ်သို့ တက်လှမ်းလိုက်သည်။ သူ ခြေချလိုက်သည့် တစ်ပြိုင်နက် ရှေ့တွင် အလင်းတန်းများဖြင့် ဖွဲ့စည်းထားသော ကြီးမားသည့် လူရိပ်ကြီး တစ်ရိပ် ပေါ်ထွက်လာခဲ့တော့သည်။
ယင်းသည် ဝါးတားတား ဖြစ်နေသော်လည်း ပုံသဏ္ဌာန်အရမူ ရွှေရောင် ချပ်ဝတ်တန်ဆာကို ဝတ်ဆင်ထားသည့် အမျိုးသားတစ်ဦး ဖြစ်သည်။ သူသည် ရွှေရောင်ခမောက်ကို ဆောင်းထားပြီး ချပ်ဝတ်မှာလည်း ရွှေရောင်အလင်းများ ဖြာထွက်နေခဲ့သည်။ သူ့လက်မောင်း နှစ်ဖက်ကိုမူ ရှေ့တွင် ထားရှိပြီး မြေပြင်တွင် ထိုးစိုက်ထားသော ကြီးမားသည့် ရွှေရောင်ဓားကြီး တစ်လက်ပေါ်တွင် ဖိနှိပ်ထားခဲ့သည်။
သူ မျက်ဝန်းများကို ပိတ်ထားခဲ့၏။ သူ့ခန္ဓာကိုယ်သည် တဖြည်းဖြည်း ပိုမိုထင်ရှားလာပြီး ပုံသဏ္ဌာန် တစ်ခုလုံး ပေါ်ထွက်လာသောအခါ သူသည် မျက်လုံးများကို ဖွင့်လိုက်ရာ မျက်ဝန်းများထဲမှ တောက်သော အလင်းတန်းများ ဖြာထွက်လာခဲ့တော့သည်။
ထိုအခိုက်အတန့်တွင် ကျင့်ကြံသူများသည် ပတ်ဝန်းကျင် အနီးသို့ တစ်ယောက်ပြီး တစ်ယောက် ရောက်ရှိလာကြသည်။ အမြန်ဆုံး ရောက်ရှိလာကြသော သူများ၏ မျက်နှာပေါ်တွင် လေးနက်တည်တင်းမှုများ ရှိနေကြပြီး သူတို့၏ ခန္ဓာကိုယ်မှ ထွက်ပေါ်နေသော စွမ်းအားအရ သူတို့အားလုံးမှာ အားနည်းသူများ မဟုတ်ကြချေ။ သူတို့ထဲမှ အတော်များများမှာ နေကပ်ဘေး အဆင့် ကျင့်ကြံသူများ ဖြစ်ကြသည်။
"တတိယမြောက် တိုက်ခိုက်ခြင်း နယ်မြေကတော့ အရင် နယ်မြေနှစ်ခုနဲ့ လုံးဝ မတူဘူး။ အဲဒီနေရာကို ဖြတ်ကျော်နိုင်ခဲ့တဲ့သူ ရှစ်ယောက်စလုံးက မင်းသားအဖြစ် တင်မြှောက်ခြင်း မခံခဲ့ရရင်တောင် သူတို့အားလုံးက နေကပ်ဘေး အဆင့် အထွတ်အထိပ်ကို ရောက်ရှိနေကြသူတွေချည်းပဲ။ တကယ်တော့ အချို့လူတွေဆိုရင် သူတို့က ကိုယ့်အဆင့်ရဲ့ ကန့်သတ်ချက်ကို ကျော်လွန်ပြီး ကံကြမ္မာနဲ့ သေခြင်းရှင်ခြင်း အရှင်သခင်တွေ ဖြစ်နေပြီလို့တောင် သံသယဝင်နေကြတာ"
"သူတို့က မင်းသားတွေ မဟုတ်ကြပေမဲ့ လက်ရှိ မင်းသား ဆယ်ယောက်တောင်မှ သူတို့ရဲ့ ထောက်ခံမှုကို ရဖို့အတွက် သူတို့နဲ့ တွေ့တဲ့အခါ ယဉ်ယဉ်ကျေးကျေး ဆက်ဆံကြရတာ။ မင်းသား တာအိုခုန်းက အရင် တိုက်ခိုက်ခြင်းနယ်မြေ နှစ်ခုကို ဖြတ်ကျော်နိုင်တဲ့ စွမ်းရည် ရှိခဲ့ရင်တောင် တတိယနယ်မြေမှာတော့ အောင်မြင်ဖို့ မလွယ်လောက်တော့ဘူး"
"မှန်တယ်။ အားလုံးခြုံကြည့်ရရင် တာအိုလင်းနဲ့ တာအိုဖာတို့တောင်မှ ကိုးဆင့်မြောက်ကို ရောက်တဲ့အခါ ရပ်တန့်ဖို့ ဖိအားပေးခံခဲ့ရတာလေ။ ဒီတာအိုခုန်းက ဘယ်လောက်ပဲ အစွမ်းထက်ပါစေ ဒီနေရာမှာတော့ ရပ်တန့်သွားရမှာပဲ"
"ဟုတ်တယ်။ အဲဒီ ရှစ်ယောက်စလုံးက ကိုယ့်နာမည်နဲ့ကိုယ် ကျော်ကြားမှု အခိုင်အမာ တည်ဆောက်ထားနိုင်ကြသူတွေပဲ။ ဖြစ်နိုင်တာက သူတို့က မင်းသားဆိုတဲ့ ဘွဲ့အဆင့်အတန်းကိုတောင် သူတို့နဲ့ မထိုက်တန်ဘူးလို့ ထင်နေကြလို့ ဒီတစ်ခါ စိန်ခေါ်ပွဲကို လာမပြိုင်ကြတာ ဖြစ်လိမ့်မယ်။ တကယ်တော့ နံနက်ခင်းတာအိုဂိုဏ်းထဲမှာ အစွမ်းထက်တဲ့ တိုက်ရိုက် သွေးမျိုးဆက်က ဆင်းသက်လာသူတွေလည်း ရှိသေးတယ်။ ဒါပေမဲ့ သူတို့က တံခါးပိတ် ကျင့်ကြံနေကြတုန်းပဲ။ သူတို့က ဒီဘိသိက်မင်္ဂလာ အခမ်းအနားကို လုံးဝ ဂရုမစိုက်ကြဘူးလေ"
"အဲဒါက လက်ရှိ မင်းသား ဆယ်ယောက်က လုံလောက်အောင် မသန်မာလို့ပေါ့။ မဟုတ်ရင် အစွမ်းထက်တဲ့ စစ်သည်တော်တွေက သူတို့ကို လာပြီး စိန်ခေါ်မှာ မဟုတ်ဘူးလို့ ခင်ဗျား ထင်လား"
လူအုပ်ကြီးက အချင်းချင်း ဆွေးနွေးငြင်းခုံနေကြစဉ် သူတို့သည် ရုတ်တရက် စကားပြောသံများကို ရပ်တန့်လိုက်ကြပြီး ပလ္လင်ကြီးဘက်သို့ လှည့်ကြည့်လိုက်ကြတော့သည်။
ထိုအခိုက်အတန့်တွင် စုမင် ရှေ့ရှိ ရွှေရောင်ချပ်ဝတ်နှင့် အမျိုးသားသည် မျက်ဝန်းများကို အပြည့်အဝ ဖွင့်လိုက်ပြီ ဖြစ်သည်။ သူ့မျက်ဝန်းထဲတွင် လျှပ်စီးကြောင်း နှစ်ကြောင်း ဖြတ်သန်းစီးဆင်းနေပြီး ထိုအမျိုးသားသည် စုမင်အား အေးစက်စွာ စိုက်ကြည့်လိုက်သည်။
"ဒီနယ်မြေကို ရွှေရောင်ချပ်ဝတ် တိုက်ပွဲရဲ့ တိုက်ခိုက်ခြင်းနယ်မြေလို့ ခေါ်တယ်။ ငါကတော့ အစောင့်အရှောက် ကျင်းရှို့ပဲ။ နံနက်ခင်းတာအိုဂိုဏ်းက ငါ့အပေါ် ပေးအပ်ထားတဲ့ ကာကွယ်မှုကြောင့် ငါက ဂိုဏ်းရဲ့ တပည့်တွေကို တိုက်ပွဲထဲမှာ လေ့ကျင့်ပေးရတယ်။ ဒီမှာ အဆင့်ကိုးဆင့် ရှိပြီး မင်းစိန်ခေါ်မယ့် အဆင့်အလိုက် ငါ့ရဲ့ ကျင့်ကြံခြင်းအဆင့် တစ်ပုံကနေ ကိုးပုံအထိ ထုတ်ဖော်ပြီး မင်းနဲ့ တိုက်ခိုက်မှာ ဖြစ်တယ်။ တကယ်လို့ မင်းက ပထမအဆင့်ကနေ ကိုးဆင့်အထိ မရပ်မနားဘဲ ငါနဲ့ ရင်ဆိုင်နိုင်မယ်ဆိုရင်တော့ ငါ့ရဲ့ အစွမ်းကုန်အခြေအနေကို စိန်ခေါ်ခွင့် ရလိမ့်မယ်..."
ရွှေရောင်ချပ်ဝတ်နှင့် အဘိုးအိုသည် ကျယ်လောင်သော မိုးခြိမ်းသံကဲ့သို့ ပြောဆိုလိုက်သော်လည်း ပြင်ပရှိ မည်သူမျှ ထိုစကားကို မကြားနိုင်ကြချေ။ စုမင်တစ်ဦးတည်းသာ သူ့စကားလုံးများကို ကြားနိုင်ခဲ့ခြင်း ဖြစ်သည်။
သူ စကားပြောပြီးသည်နှင့် ရွှေရောင် အလင်းတန်းများနှင့် အမျိုးသားသည် ရှေ့သို့ ခြေတစ်လှမ်း လှမ်းလိုက်သည်။ သူသည် ညာလက်ဖြင့် ရွှေရောင်ဓားကြီးကို ဆုပ်ကိုင်လိုက်ပြီးနောက် ရှေ့သို့ တိုးဝင်လာစဉ် ရိုးရှင်းသော လှုပ်ရှားမှု တစ်ချက်ဖြင့် ညာလက်အား အထက်သို့ မြှောက်ကာ အောက်သို့ ဆတ်ခနဲ ဝေ့ယမ်းချလိုက်တော့သည်။
ထိုလှုပ်ရှားမှုနှင့်အတူ သူ့ခန္ဓာကိုယ်မှ ပေါက်ကွဲထွက်လာသော စွမ်းအားမှာ ကမ္ဘာမြေပြင် နယ်ပယ် အလယ်အလတ် အဆင့်မျှသာ ရှိသေးသည်။ ၎င်းသည် သာမန်ကဲ့သို့ ထင်ရသော်လည်း စုမင်၏ မျက်ဝန်းထဲတွင်မူ ထိုရွှေရောင်ဓား၏ ခုတ်ချက်ထဲ၌ နိယာမများကို ဖြတ်တောက်ပစ်နိုင်သော စိတ်ဆန္ဒတစ်ခု ပါဝင်နေသည်ကို သူ တွေ့ရှိလိုက်ရသည်။
ဤတွေ့ရှိမှုကြောင့် စုမင်သည် ရှေ့သို့ တက်လှမ်းမည့် ခြေလှမ်းကို ချက်ချင်း ရပ်တန့်လိုက်ပြီး နောက်သို့ ဆုတ်ခွာလိုက်တော့သည်။ သူသည် တိုက်ခိုက်ရန် အခွင့်အရေးကို လက်လွှတ်လိုက်ပြီး နောက်သို့ ဆုတ်ခွာရင်းနှင့်ပင် ကျရောက်လာသော ဓားချက်ကို စိုက်ကြည့်နေခဲ့သည်။ သူ ထိုသို့ ပြုလုပ်စဉ် သူ့မျက်ဝန်းများ ဝင်းခနဲ ဖြစ်သွားခဲ့၏။
ဓားချက်သည် ဟင်းလင်းပြင်ကို ဖြတ်သန်းကာ စုမင်ထံသို့ ခဏချင်းအတွင်း ကျရောက်လာခဲ့သည်။ ထိုအခိုက်အတန့်တွင် သူ့ပတ်ဝန်းကျင်ရှိ နိယာမများမှာ ပြောင်းလဲသွားခဲ့ပြီး အရပ်မျက်နှာအနှံ့မှ ထိုအဘိုးအိုထံသို့ ဦးတည်သွားသော မမြင်နိုင်သည့် လှိုင်းတွန့်တစ်ခုအဖြစ် ပုံဖော်လာသည်ကို သူ ဝါးတားတား ခံစားလိုက်ရသည်။ ယင်းသည် ဓားကြီးအတွင်းသို့ ပေါင်းစပ်သွားပြီး ဓားနှင့်အတူ အောက်သို့ ခုတ်ချလာခြင်း ဖြစ်သည်။
'ဒါက... ကံကြမ္မာရဲ့ နိယာမတွေကို ဖြတ်တောက်ပစ်တဲ့ စွမ်းအားပဲ'
စုမင်၏ မျက်ဝန်းထဲတွင် တောက်ပသော အလင်းတန်းများ လင်းထိန်သွားခဲ့သည်။ အကယ်၍ သူသည် မိစ္ဆာသုံးပါး ကွပ်မျက်ခြင်းအား နားလည်သဘောပေါက်ထားခြင်း မရှိခဲ့ပါက ထိုရွှေရောင်ချပ်ဝတ်နှင့် အမျိုးသား၏ ဓားချက်ထဲတွင် ပါဝင်နေသော ထူးဆန်းသည့် စွမ်းအားကို သေချာပေါက် မြင်တွေ့နိုင်မည် မဟုတ်ချေ။
ဝှစ်...
ရွှေရောင်ဓားသည် အရှိန်အဟုန်ဖြင့် ခုတ်ချလာခဲ့သည်။ စုမင်သည် သိသာစွာပင် နောက်သို့ ဆုတ်ခွာခဲ့သော်လည်း သူသည် ထိုတိုက်ခိုက်မှုကို ရှောင်ကွင်းပြီး သေချာစွာ စောင့်ကြည့်ရန် ကြံစည်လိုက်သည့် အခိုက်အတန့်တွင် ဓားကြီး အောက်သို့ ဝေ့ယမ်းချလိုက်သည့် တစ်ပြိုင်နက် သူ့ပတ်ဝန်းကျင်ရှိ အရပ်မျက်နှာများ ပြောင်းလဲသွားသည်အား သူ တွေ့ရှိလိုက်ရသည်။ ယင်းသည် သူ ရှိနေသော ဟင်းလင်းပြင်ကြီး တစ်ခုလုံးက ထိုဓားချက်၏ အောက်သို့ သူ့အလိုလို ရွေ့လျားသွားခဲ့သည့်အလား ဖြစ်နေတော့သည်။
စုမင် ရှောင်ကွင်း၍ မရတော့ချေ။
'ဒါက ကံကြမ္မာကို ဖြတ်တောက်တဲ့ စွမ်းအား ပါဝင်နေတဲ့ ဓားချက်သက်သက်တင် မဟုတ်ဘူး။ ခုနက နိယာမတွေကို ပြောင်းလဲပစ်ဖို့ ပျံ့နှံ့သွားတဲ့ စွမ်းအားက ငါ့ပတ်ဝန်းကျင်က ဟင်းလင်းပြင်နဲ့ ငါ့ရဲ့ တည်နေရာကိုပါ ပြောင်းလဲပစ်လိုက်တာ။ ဒါမှ ဒီဓားက ငါ့ကို သေချာပေါက် ထိမှာ ဖြစ်လို့ပဲ'
'ကျင်းရှို့... မင်းက တကယ့်ကို အစွမ်းထက်တဲ့သူပဲ'
ပထမဆုံးအကြိမ်အဖြစ် စုမင်၏ မျက်ဝန်းထဲတွင် တိုက်ခိုက်လိုစိတ်များ မြင့်တက်လာခဲ့သည်။ သူ နံနက်ခင်းတာအိုဂိုဏ်းသို့ ရောက်ရှိလာကတည်းက ဤမျှအခြေအနေအထိ စိတ်လှုပ်ရှားခဲ့ရခြင်းမှာ ယခုက ပထမဆုံးပင် ဖြစ်သည်။ ယခင်က စိန်ခေါ်ပွဲများဖြစ်စေ၊ ကျောက်တုံးပြိုကျရာ မြေရိုင်းဖြစ်စေ သို့မဟုတ် ပုံရိပ်ယောင် နယ်မြေ၏ အရှင်သခင် ဖြစ်လာခဲ့ခြင်းဖြစ်စေ ထိုအရာများအနက် မည်သည့်အရာကမျှ စုမင်အား ဤမျှပြင်းထန်သော တိုက်ခိုက်လိုစိတ်မျိုး ပေါ်ပေါက်လာအောင် မစွမ်းဆောင်နိုင်ခဲ့ကြချေ။
ယခု အခိုက်အတန့်မှသာ ထိုစိတ်ဆန္ဒသည် သူ့စိတ်ထဲတွင် မြင့်တက်လာခဲ့ပြီး မျက်ဝန်းထဲ၌ တောက်ပသော အလင်းတန်းများ ပေါ်ထွက်လာခဲ့ရသည်။ သူသည် ဆက်လက်၍ နောက်သို့ ဆုတ်ခွာခြင်း မပြုတော့ဘဲ ညာလက်ကို မြှောက်ကာ ကျရောက်လာသော ဓားချက်ဆီသို့ လက်သီးတစ်ချက် ဝှေ့ယမ်း ထိုးနှက်လိုက်တော့သည်။
ကျယ်လောင်သော ပေါက်ကွဲသံများသည် ဝေဟင်တွင် ပဲ့တင်ထပ်သွားခဲ့ပြီး ရွှေရောင်ဓားမှာ ကောက်ကွေးသွားခဲ့ရသည်။ ၎င်းသည် စုမင်၏ လက်သီးနှင့် ထိတွေ့မိသောအခါ ပျောက်ကွယ်သွားခဲ့သော်လည်း ပြင်ပထက် ပြင်းထန်သော တုန်ခါလှိုင်း တစ်လှိုင်းသည် သူ့လက်ထဲသို့ တိုးဝင်သွားခဲ့ပြီး ခန္ဓာကိုယ် တစ်ကိုယ်လုံးသို့ ဆက်တိုက် ရိုက်ခတ်သွားခဲ့သဖြင့် သူ့အား ယိမ်းထိုးသွားစေခဲ့သည်။ သူ နောက်သို့ ဆုတ်ခွာခြင်း မရှိသော်လည်း သူ့သွေးများမှာမူ ဆူဝေ လှုပ်ခတ်သွားခဲ့ရသည်။ ဤမြင်ကွင်းကြောင့် သူ့မျက်ဝန်းထဲမှ တိုက်ခိုက်လိုစိတ်များ ပိုမိုပြင်းထန်လာခဲ့ရပြီး တစ်ချိန်တည်းမှာပင် ပြတ်သားသော အကြည့်တစ်ခု ပေါ်ထွက်လာခဲ့တော့သည်။
'ဒါက ဘယ်လို နတ်ဘုရား စွမ်းရည်မျိုးလဲ' စုမင်သည် အသက်ကို ပြင်းပြင်းတစ်ချက် ရှူသွင်းလိုက်ပြီး ပြတ်သားမှုမှာ ပိုမိုအားကောင်းလာခဲ့သည်။ အားလုံးခြုံကြည့်ရလျှင် သူရုပ်ခန္ဓာသည် အရှင်သခင် အဆင့်မှ တန်ခိုးရှင် တစ်ဦးကိုပင် တုန်လှုပ်စေနိုင်လောက်အောင် သန်မာသော်လည်း ကမ္ဘာမြေပြင် နယ်ပယ် အလယ်အလတ် စွမ်းအားသာ ပါဝင်သော ဓားချက် တစ်ချက်တည်းကြောင့် သူ့သွေးများ ဆူဝေသွားခဲ့ရခြင်း ဖြစ်သည်။ ဤအခြေအနေ မတိုင်ခင်အထိ စုမင်အနေဖြင့် ဤကဲ့သို့သော အရာမျိုး ဖြစ်နိုင်မည်ဟု လုံးဝ မတွေးထင်ထားခဲ့မိချေ။
'ကမ္ဘာမြေပြင် နယ်ပယ် အလယ်အလတ် ကျင့်ကြံသူ တစ်ယောက်အနေနဲ့ ဒီဓားချက်ကို ဘယ်လိုမှ အနိုင်ယူနိုင်မှာ မဟုတ်ဘူး။ ကမ္ဘာမြေပြင် နယ်ပယ် နှောင်းပိုင်းက လူတွေဆိုရင်တောင် ဒီဓားချက်ကို ရင်ဆိုင်ဖို့ ခက်ခဲလိမ့်မယ်။ ကမ္ဘာမြေပြင် နယ်ပယ် အထွတ်အထိပ်ကို ရောက်နေတဲ့ ကျင့်ကြံသူ တစ်ယောက်ဆိုရင်တော့ အလွန် ခက်ခက်ခဲခဲနဲ့ ဒီဓားချက်ကို တောင့်ခံနိုင်လိမ့်မယ်။ ဒါပေမဲ့ နောက်ဆုံး တုန်ခါလှိုင်းကတော့ သူတို့ကို သေချာပေါက် ဒဏ်ရာရစေမှာပဲ'
'ဒါကြောင့်မို့လို့ကိုး၊ ဒါကြောင့်မို့လို့ ဒီနေရာမှာ နာမည် သုံးဆယ်ကျော်ပဲ ရှိနေပြီး လူရှစ်ယောက်တည်းပဲ အောင်မြင်ခဲ့တာပေါ့။ အဲဒီ ရှစ်ယောက်ကတော့ သေချာပေါက် မယုံနိုင်လောက်အောင် ကြီးမားတဲ့ စွမ်းအားတွေ ရှိကြမှာပဲ'
'ဟန်သုံးမျိုး ပါဝင်တဲ့ ဓားသိုင်းကွက် တစ်ကွက်... ဒါက ဒီဓားရဲ့ အစွမ်းပဲ။ ဒါပေမဲ့ ဒီလိုဆိုရင် တိုက်ခိုက်ခြင်းနယ်မြေ ကိုးခုစလုံးမှာ နတ်ဘုရားစွမ်းရည်တွေ ဖုံးကွယ်ထားတာများလား။ တကယ်လို့ ဒါက အမှန်ဆိုရင် ပထမနဲ့ ဒုတိယ တိုက်ခိုက်ခြင်း နယ်မြေတွေထဲမှာ ဘာတွေ ဖုံးကွယ်ထားလို့လဲ။ ငါ ဒါကို စောစောစီးစီး သတိမထားမိခဲ့တာ နှမြောဖို့ကောင်းလိုက်တာ' စုမင်၏ မျက်ဝန်းထဲတွင် အလင်းတန်းတစ်ချက် လင်းလက်သွားခဲ့ပြီး ရွှေရောင်ချပ်ဝတ်နှင့် အမျိုးသား ရှေ့တွင် ခေါင်းကို အနည်းငယ် မော့လိုက်သည်။
"အခု ငါ ငါ့ရဲ့စွမ်းအား နှစ်ပုံကို အသုံးပြုတော့မယ်"
ရွှေရောင်ချပ်ဝတ်နှင့် အမျိုးသား စကားပြောလိုက်သည့် တစ်ပြိုင်နက် သူသည် ရှေ့သို့ ခြေတစ်လှမ်း လှမ်းလိုက်သည်။ ယခုတစ်ကြိမ်တွင်မူ သူသည် ယခင်က အနေအထားအတိုင်းပင် ရှိနေခဲ့သည်။ သူ့ညာလက်ထဲမှ ရွှေရောင်အလင်းတန်းများ စတင်လင်းလက်လာခဲ့ပြီး ရွှေရောင်ဓားကြီး ထပ်မံပေါ်ထွက်လာသောအခါ သူသည် စုမင်ထံသို့ ဝေ့ယမ်း ခုတ်ချလိုက်တော့သည်။
သူ့ခန္ဓာကိုယ်မှ ပေါက်ကွဲထွက်လာသော စွမ်းအားမှာ ကမ္ဘာမြေပြင် နယ်ပယ် အလယ်အလတ် မဟုတ်တော့ဘဲ နှောင်းပိုင်းအဆင့်သို့ ရောက်ရှိနေပြီ ဖြစ်သည်။ တကယ်တွင် စူးရှသော ရွှေရောင်အလင်းတန်းများသည် ရွှေရောင်ဓားကြီးကို ဝန်းရံထားခဲ့၏။ ထိုပတ်ဝန်းကျင်တွင် လေခွဲသံများ ပဲ့တင်ထပ်နေခဲ့သည်။ ထိုအမျိုးသားသည် တူညီသော ဓားဟန်ကို အသုံးပြုခဲ့သော်လည်း စုမင်၏ မျက်ဝန်းထဲတွင်မူ ယခင်ကထက် ပိုမိုမြန်ဆန်ပြီး ပိုမိုပြင်းထန်နေသည်။
စုမင်၏ မျက်ဝန်းများသည် ပြင်းထန်စွာ တောက်ပသွားခဲ့သည်။ သူသည် ထိုအမျိုးသား ခုတ်ချလာသော ဓားလမ်းကြောင်းကို မှတ်သားထားလိုက်ပြီး ဓားချက် သူ့ခေါင်းထက်သို့ ကျရောက်လာတော့မည့် အခိုက်အတန့်တွင် ညာလက်အား မြှောက်ကာ ရှေ့တွင် ဝေ့ယမ်းလိုက်တော့သည်။
ပေါက်ကွဲသံ တစ်ချက်နှင့်အတူ စုမင် ထပ်မံ လှုပ်ရှားလိုက်သည်။ သူ့သွေးများသည် ပိုမိုပြင်းထန်စွာ ဆူဝေ လှုပ်ခတ်သွားခဲ့ရသည်။ ၎င်းသည် ခဏချင်းအတွင်းပင် ပျောက်ကွယ်သွားခဲ့သော်လည်း ဤကဲ့သို့သော အစွမ်းထက်သည့် နတ်ဘုရားစွမ်းရည်ကြောင့် စုမင်၏ မျက်ဝန်းထဲမှ ပြတ်သားမှုမှာ ပိုမိုကြီးမားလာခဲ့ရသည်။
"ပြန်လုပ်မယ်" စုမင်က အားရပါးရ ရယ်မောလိုက်ပြီးနောက် ရှေ့သို့ ခြေတစ်လှမ်း လှမ်းလိုက်သည်။
ရွှေရောင်ချပ်ဝတ်နှင့် အမျိုးသား၏ မျက်ဝန်းထဲတွင် သတိမပြုမိနိုင်လောက်သော အလင်းတန်း တစ်ချက် လင်းလက်သွားခဲ့သည်။ သူသည် ခေါင်းညိတ်လိုက်ပြီး ညာလက်အား မြှောက်လိုက်သောအခါ တူညီသော ဓားဟန်၊ တူညီသော လှုပ်ရှားမှုကိုပင် အသုံးပြုခဲ့သော်လည်း ယခုတစ်ကြိမ် တိုက်ခိုက်မှုတွင်မူ ကမ္ဘာမြေပြင် နယ်ပယ် အထွတ်အထိပ်သို့ ရောက်ရှိနေသူများ၏ စွမ်းအားကို ထည့်သွင်းအသုံးပြုခဲ့သည်။
ကျယ်လောင်သော ပေါက်ကွဲသံကြီး ဝေဟင်သို့ ထိုးတက်သွားခဲ့ပြီး စုမင်သည် အမှန်တကယ်ပင် နောက်သို့ ခြေလှမ်းဝက်ခန့် ဆုတ်ခွာသွားခဲ့ရသည်။ သူ ခေါင်းမော့ ကြည့်လိုက်သောအခါ အတုအယောင်မှ အစစ်အမှန်အဖြစ် ပြောင်းလဲတော့မည့်အလား ဖြစ်နေသော ရွှေရောင်ဓားကြီး တစ်စင်းကို ဝါးတားတား မြင်တွေ့လိုက်ရသည်။
"ပြန်လုပ်မယ်"
ရွှေရောင်ချပ်ဝတ်နှင့် အမျိုးသား၏ မျက်ဝန်းထဲတွင် လေးနက်တည်တင်းသော အမူအရာတစ်ခု ပေါ်ထွက်လာခဲ့သည်။ သူသည် ညာလက်ကို မြှောက်ကာ မျက်ခုံးနှစ်ခုကြား ဗဟိုချက်သို့ ရိုက်နှက်လိုက်ရာ သူ့ခန္ဓာကိုယ်ထဲမှ ကွဲအက်သံများ ထွက်ပေါ်လာခဲ့တော့သည်။ ချက်ချင်းပင် လကပ်ဘေး အဆင့် စွမ်းအား လှိုင်းတွန့်များသည် သူ့ခန္ဓာကိုယ်မှ ပေါက်ကွဲထွက်လာခဲ့သည်။ သူ့နောက်တွင် ရွှေရောင်လမင်းကြီး တစ်စင်း ပေါ်ထွက်လာခဲ့ပြီး သူ့လက်ထဲရှိ ဓားမှ ရွှေရောင် အလင်းတန်းများသည် ကောင်းကင်ထက်သို့ ထိုးတက်သွားခဲ့တော့သည်။
"ဒါက ငါ့ရဲ့စွမ်းအား လေးပုံကို သုံးထားတာပဲ။ သေချာ စောင့်ကြည့်စမ်း"
ရွှေရောင်ချပ်ဝတ်နှင့် အမျိုးသား လှုပ်ရှားလိုက်ပြီ ဖြစ်သည်။ ယင်းသည် တူညီသော ဓားလမ်းကြောင်းအတိုင်းပင် ဖြစ်သော်လည်း ကျရောက်လာသည့် တစ်ပြိုင်နက် ဓားကြီးသည် ဝေဟင်ထက်တွင် တုန်ခါသွားသကဲ့သို့ ဖြစ်သွားသည်ကို စုမင် အပြင်းအထန် ခံစားလိုက်ရသည်။ ထိုသို့ ဖြစ်သွားသည့် အခိုက်အတန့်တွင် ဓား၏ စူးရှထက်မြက်မှုမှာ ချက်ချင်းပင် အဆမတန် မြင့်တက်သွားခဲ့တော့သည်။
ဓားချက် ကျရောက်လာခဲ့ပြီး ကျယ်လောင်သော ပေါက်ကွဲသံများ ဝေဟင်သို့ ပျံ့နှံ့သွားခဲ့သည်။ ယခုတစ်ကြိမ်တွင်မူ စုမင်သည် နောက်သို့ ခြေတစ်လှမ်း ဆုတ်ခွာသွားခဲ့ရသော်လည်း ရွှေရောင်ချပ်ဝတ်နှင့် အမျိုးသားသည်လည်း တုန်ခါသွားခဲ့ပြီး နောက်သို့ ခြေတစ်လှမ်း ဆုတ်ခွာသွားခဲ့ရသည်။ သူ ခေါင်းမော့ကြည့်လိုက်သောအခါ မျက်နှာပေါ်တွင် အံ့သြထိတ်လန့်မှု အရိပ်အယောင် တစ်ခုကို မြင်တွေ့လိုက်ရ၏။
"မင်း နားလည်သွားပြီလား"
"နည်းနည်း လိုသေးတယ်" စုမင်၏ မျက်ဝန်းထဲတွင် ရွှေရောင်ဓား တစ်လက်၏ ပုံရိပ်သည် ထင်ဟပ်နေပြီဖြစ်ပြီး ၎င်းသည် အရှိန်အဟုန်ဖြင့် လင်းလက်နေခဲ့သည်။
ဓားသိုင်းကွက်ကို သင်ယူရန် ပြတ်သားနေသော စုမင်အနေဖြင့် သူနှင့် ရွှေရောင်ချပ်ဝတ်နှင့် အမျိုးသားတို့၏ တိုက်ပွဲကို မြင်တွေ့လိုက်ရသည့် ပြင်ပရှိ လူပေါင်း သန်းချီသော ကျင့်ကြံသူများအကြားတွင် ကောင်းကင်သို့ ထိုးတက်သွားမတတ် ဆူညံသံများ ပွက်လောရိုက် သွားခဲ့သည်ကို မသိရှိခဲ့ချေ။ နေကပ်ဘေးအဆင့် ကျင့်ကြံသူများနှင့် မင်းသား အလောင်းအလျာများ၏ မျက်နှာအမူအရာများပင်လျှင် လုံးဝ ပြောင်းလဲသွားခဲ့ကြရတော့သည်။