အခန်း ၁၃၄၇
Vol. 118 Ch. 1347
အခန်း ၁၃၄၇
ယခုကိစ္စသည် ဒုတိယအဆင့်၏ ကနဦးအစောပိုင်းကာလသာ ရှိသေးသဖြင့် မည်သူ့ထံတွင်မှ ပုံရိပ်ပြုပြင်တည်းဖြတ်သည့်စနစ် မရှိကြသေးပေ။ ထို့ကြောင့် ဓာတ်ပုံများကို အတုအယောင်ဖန်တီးရန် လုံးဝမဖြစ်နိုင်ပါချေ။
ကျွန်းအထိမ်းအမှတ်ကျောက်တိုင်ပေါ်ရှိ စခရင်ရှော့များကို အခြေခံအားဖြင့် ခိုင်မာသော သက်သေအထောက်အထားအဖြစ် သတ်မှတ်နိုင်သည်။
လူတိုင်းသည် ကျူးဝူတင်လိုက်သော စခရင်ရှော့ကို မြင်လိုက်ရသောအခါ ချက်ချင်းပင် ဝိုင်းဝန်းမေးမြန်းကြတော့သည်။ ၎င်းတို့သည် မိမိတို့၏ အဖော်များကို ရှာဖွေတွေ့ရှိခြင်း ရှိ၊ မရှိကိုသာ အလုအယက် မေးမြန်းနေကြခြင်း ဖြစ်သည်။
ကျူးဝူက အဖွဲ့လိုက်စကားပြောခန်းထဲတွင် ပြန်ဖြေလိုက်သည်။
“အားလုံးပဲ ကျေးဇူးပြုပြီး မဆူကြပါနဲ့။ အကယ်၍ သက်ဆိုင်တဲ့သူကို ရှာတွေ့တယ်ဆိုရင် ငါ့ဘက်က သီးသန့်စာ ပို့ပေးပါ့မယ်။ ဒီတစ်ခါတော့ ငါ အဖော်တစ်ယောက်ပဲ ရှာတွေ့ခဲ့ပြီး သူကလည်း ငါ့ကို စကားပါးခိုင်းလိုက်ပါတယ်။ ခဏနေရင် သူ့ဆီ သီးသန့်စာ ပို့လိုက်ပါ့မယ်။။ဒါပေမဲ့ အားလုံးလည်း မျှော်လင့်ချက် အလွန်အမင်းကြီး မထားကြပါနဲ့။ သူဌေးကော ငါပါ ဒီဂလက်ဆီထဲမှာ ကိုယ့်အဖော်တွေကို ရှာမတွေ့ခဲ့ဘူး။ သတင်းမကြားရခြင်းကပဲ အကောင်းဆုံးသတင်း ဖြစ်နိုင်တယ်။”
“အဲဒီလိုလား။ လူပျောက်ရှာတဲ့ မက်ဆေ့ခ်ျတွေ ဒီလောက်အများကြီးကို မင်း တကယ်ပဲ မမြင်မိတာလား။”
“ဖြစ်နိုင်တာပေါ့။ ဒါပေမဲ့ စခရင်ရှော့ကို သေချာကြည့်ရင် အစ်ကိုကျူးက သူတို့ကို စာတွေ အလွန်အကျွံမပို့ဖို့ ပြောထားပြီး မိနစ်အနည်းငယ်လောက် စာမျက်နှာကို ထိန်းထားပေးတာ တွေ့လိမ့်မယ်။”
“မှန်တယ်။ အခု လူတိုင်းရဲ့ ကြံ့ခိုင်မှုအဆင့် အရဆိုရင် တစ်ချက်လောက် ဝှေ့ကြည့်လိုက်ရုံနဲ့တင် ကိုယ်လိုချင်တဲ့ အချက်အလက်ကို ရှာတွေ့နိုင်တယ်။”
“အခြေခံအားဖြင့်တော့ သတင်းမကြားရဘူးဆိုရင် တစ်ဖက်လူက စာကိုမမြင်တာ၊ ဒါမှမဟုတ် အဲဒီဂလက်ဆီထဲမှာ မရှိတာ၊ ဒါမှမဟုတ်ရင်တော့...”
နောက်ဆုံးဖြစ်နိုင်ခြေကိုမူ သူ ထုတ်ဖော်မပြောခဲ့သော်လည်း လူတိုင်းက ဘာကိုဆိုလိုသည်ကို နားလည်ကြပေသည်။ ၎င်းတို့မှာ ပွဲထွက် သွားကြရပြီ ဖြစ်သည်။
“သတင်းမကြားရခြင်းက တကယ်ပဲ အကောင်းဆုံးသတင်းပါပဲ။”
“သတင်းကြားရတာကလည်း ကောင်းချင်မှ ကောင်းတာပါ။ ဥပမာ ဒီတစ်ခါ အစ်ကိုကျူး ရှာတွေ့ခဲ့တဲ့သူဆိုရင် စကားပါးလိုက်တာပဲရှိတယ်။ အဲဒါက သိပ်ပြီး အသုံးမဝင်ဘူး။”
ကျူးဝူသည် သူ၏ ယခင်သီးသန့်စကားပြောမှတ်တမ်းများကို လိုက်လံရှာဖွေလိုက်ရာ ပန်းသီးပွင့်လေးကို ရှာနေသော ပန်းသီးလေးဆိုသည့် အသက်ရှင်ကျန်ရစ်သူ၏ အိုင်ဒီကို ရှာတွေ့သွားခဲ့သည်။
“တကယ် လိုက်ဖက်တဲ့ အိုင်ဒီအတွဲအစပ်ပဲ။”
ကျူးဝူ ရယ်မောလိုက်ရင်း ပန်းသီးပွင့်လေးပို့ထားသော မက်ဆေ့ခ်ျကို မျက်နှာပြင်ဓာတ်ပုံရိုက်ကာ ပန်းသီးလေးထံသို့ ပို့ပေးလိုက်သည်။
ပန်းသီးလေးသည် ကျူးဝူပို့လိုက်သော ဓာတ်ပုံကို မြင်သောအခါ ခဏမျှ ကြောင်အမ်းသွားပြီးနောက် ကျူးဝူထံသို့ စိတ်လှုပ်ရှားတုန်လှုပ်စွာဖြင့် ချက်ချင်း စာပို့လာတော့သည်။
“အစ်ကိုကျူး... မင်း တကယ်ပဲ ပန်းသီးပွင့်ကို ရှာတွေ့ခဲ့တာလား။”
“ဒါပေါ့...စခရင်ရှော့က လိမ်ပါ့မလား။”
ကျူးဝူက ခပ်ပြတ်ပြတ် ပြန်ဖြေလိုက်သည်။
“မဟုတ်ပါဘူး၊ မဟုတ်ပါဘူး...ကျုပ် အရမ်း ဝမ်းသာလွန်းလို့ပါ။ အခု သူ ဘယ်လိုနေလဲ။”
ပန်းသီးလေးက အလောတကြီး မေးလိုက်သည်။
“သူ့ရဲ့ အခြေအနေကတော့ သိပ်မကောင်းတာ သေချာတယ်။ မဟုတ်ရင် မင်းဆီကနေ ပစ္စည်းအရင်းအမြစ်တွေ ထောက်ပံ့ပေးဖို့ တောင်းဆိုပါ့မလား။”
ကျူးဝူက ပြန်ပြောလိုက်သည်။ ၎င်းကို ကြားရသောအခါ ပန်းသီးလေးမှာ အလွန်စိုးရိမ်သွားခဲ့သည်။
“အစ်ကိုကျူး... ကျေးဇူးပြုပြီး ငါ့ကို ကူညီပါဦး။ မင်း ဘယ်တော့ အဲဒီကို ပြန်သွားမှာလဲ။ သူ့အတွက် ပစ္စည်းအချို့ သယ်သွားပေးဖို့ ကူညီပေးပါဦး။”
သူက တောင်းပန်တိုးလျှိုးလာခဲ့သည်။
“ကူညီပေးလို့တော့ ရပါတယ်။ ကုန်စည်ပို့ဆောင်ခ အနေနဲ့ သယ်ယူမယ့် ပစ္စည်းစုစုပေါင်း ပမာဏရဲ့ ၁ ရာခိုင်နှုန်း ကျသင့်မယ်။ ဒါက မင်းက ငါ့ရဲ့ ကုန်စည်ပို့ဆောင်ရေး ဝန်ဆောင်မှုကို ပထမဆုံး အသုံးပြုတဲ့ အော်ဒါအသစ်မို့လို့ ဒီလောက်အထိ လျှော့ဈေးပေးထားတာနော်။ ပုံမှန်ဆိုရင်တော့ အနည်းဆုံး ၃ ရာခိုင်နှုန်း ယူတယ်။”
ကျူးဝူက ချက်ချင်း ပြောလိုက်သည်။
“ဒါဆိုရင် အများကြီး ကျေးဇူးတင်ပါတယ် အစ်ကိုကျူး။ ငါ အခု ပစ္စည်းတွေကို ကုန်သွယ်ပေးရမလား။”
ပန်းသီးလေးက ကျေးဇူးတင်စွာဖြင့် ဆိုသည်။
“အခုတော့ မဟုတ်သေးဘူး။ ငါ့ရဲ့ ပျံသန်းမှု လမ်းကြောင်းအရဆိုရင် ငါ နောက်တစ်ခါ သွားမှာက အရင်သွားခဲ့ဖူးတဲ့ ဂလက်ဆီကို ဖြစ်ပြီး ပန်းသီးပွင့်ရှိတဲ့ ဂလက်ဆီဆီ မဟုတ်သေးဘူး။ အဲ့ဒါကြောင့် မင်း ခဏတော့ စောင့်ဆိုင်းရဦးမယ်။”
ကျူးဝူက ပြန်ဖြေလိုက်သည်။ ကျူးဝူ၏ ပြန်စာကို မြင်သောအခါ ပန်းသီးလေး ကြောင်အမ်းသွားပြီး အလောတကြီး မေးလိုက်တော့သည်။
“ဒါဆိုရင် ငါ နောက်ထပ် ဘယ်လောက်တောင် ကြာအောင် စောင့်ရဦးမှာလဲ။”
“လက်ရှိ တွက်ချက်မှုအရဆိုရင်တော့ နောက်ထပ် ငါးရက် ဒါမှမဟုတ် ခြောက်ရက်လောက် ကြာဦးမယ်။”
ကျူးဝူက ပြန်ပြောလိုက်သည်။
“အဲဒီလောက်တောင် ကြာမှာလား။”
ပန်းသီးလေး ထိတ်လန့်သွား၏။
“ပန်းသီးပွင့်လေးက အဲဒီ ငါးရက်လောက်အထိ အောင့်ခံနိုင်ပါ့မလား။”
“အဲဒါကိုတော့ ငါ အာမမခံနိုင်ဘူး။ အဲဒီတုန်းကတော့ သူ ငါ့ဆီကနေ အရင်းအမြစ်အချို့ ဝယ်သွားသေးတယ်။ သူ ဘယ်လောက်အထိ တောင့်ခံနိုင်မလဲဆိုတာကတော့ သူ့ရဲ့ ကံတရားအပေါ်မှာပဲ မူတည်လိမ့်မယ်။”
ကျူးဝူက မတတ်သာသလို ပုခုံးတွန့်ပြရင်း ပြောလိုက်သည်။ ပန်းသီးလေးသည်လည်း အကြံကုန်သွားခဲ့သည်။
“ကျေးဇူးတင်ပါတယ် အစ်ကိုကျူး။”
ပန်းသီးလေးနှင့် သီးသန့်စကားပြောခြင်းကို အဆုံးသတ်ပြီးနောက် ကျူးဝူသည် ကျွန်းအထိမ်းအမှတ်ကျောက်တိုင်၏ မျက်နှာပြင်ကို အများသုံးချန်နယ်သို့ ပြန်လည်ပြောင်းလဲလိုက်လေသည်။
ထိုအချိန်တွင် လူတိုင်းသည် အခြားဂလက်ဆီများရှိ အကြောင်းအရာများကို အားရပါးရ ဆွေးနွေးနေကြဆဲ ဖြစ်သည်။
“အစ်ကိုကျူး... ငါ့မှာ အကြံတစ်ခုရှိတယ်။ ငါ့ဘက်က အရင်းအမြစ် တချို့ကို မင်းဆီ အရင် ကုန်သွယ်မှုလုပ်ပြီး အပ်ထားလို့ရမလား။ အကယ်၍ မင်း တကယ်ပဲ ငါရှာနေတဲ့ အဖော်ကို တွေ့သွားရင် ဒီအရင်းအမြစ်တွေကို သူ့ဆီ ကူပြီး ကုန်သွယ်ပေးပါဦး။ ပြီးရင် ငါ့ဆီကို စခရင်ရှော့တစ်ပုံ ပြန်ပို့ပေးရုံပဲလေ။”
“ဟုတ်တယ်။ မဟုတ်ရင် စကားတစ်ခွန်းတည်း ပါးလိုက်တာက တကယ် ဘာမှ အဓိပ္ပာယ်မရှိဘူး။”
“စခရင်ရှော့ ရှိနေရင် ဒီအရောင်းအဝယ် တကယ်ဖြစ်သွားတယ်ဆိုတာကို အပြည့်အဝ အတည်ပြုနိုင်တာမို့ အားလုံးလည်း အပြန်အလှန် ယုံကြည်လို့ရတာပေါ့။”
ကျူးဝူသည် အများသုံးချန်နယ်ရှိ စကားဝိုင်းကို မြင်သောအခါ မျက်ခုံးကို အသာအယာပင့်လိုက်ပြီးနောက် ရှောင်းယီထံသို့ သီးသန့်စာ ပို့လိုက်သည်။
“သူဌေး... ဒါက လုပ်လို့ရမယ့် ကိစ္စလို့ ကျွန်တော်ထင်တယ်။ အရင်းအမြစ်တွေကို ကျွန်တော့်ဆီ အရင်ကုန်သွယ်ပြီး အပ်ထားသရွေ့တော့ တခြားဂလက်ဆီမှာ ဒီအရောင်းအဝယ် ပြီးမြောက်သည်ဖြစ်စေ၊ မပြီးမြောက်သည်ဖြစ်စေ ကျွန်တော်က ၃ ရာခိုင်နှုန်းကနေ ၅ ရာခိုင်နှုန်းအထိ ကော်မရှင် ဖြတ်လို့ရတယ်။ ဒါက အရင်းအနှီး လုံးဝစိုက်စရာမလိုတဲ့ ဘောနပ်စ်စီးပွားရေးပဲ။”
ကျူးဝူက ဆိုသည်။
“သူဌေး ဘယ်လိုထင်လဲ။”
ရှောင်းယီသည် ကျူးဝူ၏ သီးသန့်စာကို မြင်သောအခါ ပြုံးကာ ခေါင်းခါလိုက်မိသည်။
“ငါလည်း ဒီလိုလုပ်တာကို သဘောတူတယ်။ ဒါပေမဲ့ မင်းရဲ့ ကယ်ဆယ်ရေးယာဉ်မှာ အဲဒီလောက်အထိ ဆံ့မယ့် ထုထည် ရှိတယ်ဆိုတာ သေချာလို့လား။”
လူဦးရေ တစ်သန်းက သူတို့၏ အဖော်များကို လိုက်ရှာချင်နေကြခြင်း ဖြစ်သည်။ တစ်ယောက်ကို အောက်ဆီဂျင် တစ်လီတာသာ အပ်လျှင်ပင် လီတာတစ်သန်း ဖြစ်သွား ယပေလိမ့်မည်။ အကယ်၍ တစ်ယောက်ကို ဆယ်လီတာဆိုလျှင် လီတာ ဆယ်သန်း ဖြစ်သွားပေလိမ့်မည်။
ကျူးဝူ၏ ကယ်ဆယ်ရေးယာဉ် အရွယ်အစားဖြင့်မူ ထိုမျှများပြားသော အောက်ဆီဂျင်များကို သိုလှောင်ရန်မှာ ဘယ်လိုမှ မဖြစ်နိုင်ပေ။ အစောပိုင်းတုန်းက အနက်ရောင်ရွှေ သုံးသိန်းနှင့် လဲလှယ်ခဲ့သော အောက်ဆီဂျင်အများစုသည် အာကာသယာဉ်၏ လောင်စာဆီတိုင်ကီထဲမှ ထုတ်လွှတ်ပေးခဲ့ခြင်းကြောင့်သာ ထိုမျှလောက်အထိ များပြားနေခြင်း ဖြစ်သည်။ မဟုတ်ဘဲ ကျူးဝူ၏ ကယ်ဆယ်ရေးယာဉ် ထုထည်တစ်ခုတည်းအပေါ်တွင်သာ အားကိုးမည်ဆိုပါက ထိုမျှလောက်အထိ အောက်ဆီဂျင် ရှိနေရန်မှာ မဖြစ်နိုင်ပါချေ။
ရှောင်းယီ၏ သတိပေးချက်ကြောင့် ကျူးဝူသည် ရှောင်းယီ ဆိုလိုသည့်အဓိပ္ပာယ်ကို ချက်ချင်း သဘောပေါက်သွားပြီး စိတ်ပျက်လက်ပျက် သက်ပြင်းချလိုက်မိသည်။
“ဟူး... ကျွန်တော် ကျွန်တော့်ရဲ့ ကယ်ဆယ်ရေးယာဉ် အရွယ်အစားကို တကယ်ကြီး မေ့သွားတယ်။ ဒီစီးပွားရေးတော့ သွားပြီထင်ပါတယ်။”
ကျူးဝူက စိတ်ပျက်လက်ပျက်ဖြင့် ညည်းတွားလိုက်၏။ ရှောင်းယီက အနည်းငယ် တွေးတောကြည့်လိုက်သည်။
“ဒီတစ်ခါ မင်း အစ်ကိုကျန်းတို့ဘက်ကနေ ပြန်လာပြီးရင် ငါတို့ မင်းရဲ့ ကယ်ဆယ်ရေးယာဉ်ကို စမ်းပြီး အဆင့်မြှင့်တင်ကြည့်ရအောင်။”
“ကယ်ဆယ်ရေးယာဉ်ကို အဆင့်မြှင့်တင်မလို့လား။”
ကျူးဝူ မျက်မှောင်ကြုတ်လိုက်မိသည်။
“အကယ်၍ အဆင့်မြှင့်လိုက်လို့ ကြယ်တံခွန်ရဲ့ ဆွဲငင်မှုကို ခံနေရတဲ့ မျှခြေအဆင့် ပျက်စီးသွားရင် ဘယ်လိုလုပ်မလဲ။ ကျွန်တော်တို့ ကြယ်တံခွန်ဆိုတဲ့ အရင်းအမြစ်အကြီးကြီးကို ဆုံးရှုံးသွားနိုင်တယ်။”
ကျူးဝူသည် အရင်းအမြစ်များ ဆုံးရှုံးသွားမည်ကိုသာ အရင်တွေးနေခြင်းဖြစ်သည်။ ရှောင်းယီ ခေါင်းခါယမ်းလိုက်၏။
“အရင်းအမြစ် ဆုံးရှုံးတာက အလွန်ဆုံးရှိလှ နေ့တိုင်း ရေအရင်းအမြစ် စုဆောင်းရတာ နည်းနည်း နည်းသွားရုံပါပဲ။ ငါ ပိုပြီး စိုးရိမ်တာက အဆင့်မြှင့်ပြီးနောက်ပိုင်း ဘေးကင်းလုံခြုံမှု ရှိ၊ မရှိ ဆိုတာပဲ။ ကယ်ဆယ်ရေးယာဉ်ရဲ့ ဒြပ်ထု တိုးလာတာနဲ့အမျှ မင်းနဲ့ ကြယ်တံခွန်ကြားက ဆွဲငင်အားက ပိုပြီး မြင့်တက်လာလိမ့်မယ်။ အဲဒါက မင်းကို ကြယ်တံခွန်ထဲ ဆွဲသွင်းသွားပြီး တခြား မတော်တဆမှုတွေ ဖြစ်လာနိုင်မလား။”
ရှောင်းယီ၏ စကားကို ကြားသောအခါ ကျူးဝူ အနည်းငယ် ခေါင်းငြိမ့်လိုက်သည်။
“ရေအရင်းအမြစ်တွေက မရှိမဖြစ် လိုအပ်နေတာမျိုး မဟုတ်ရင်တော့ နောက်တစ်ခါ ကျွန်တော် ဒီဂလက်ဆီထဲကို ပြန်ရောက်လာတဲ့အခါ စမ်းကြည့်လို့ရပါတယ်။”
ရှောင်းယီ အနည်းငယ် အံ့အားသင့်သွား၏။ ကျူးဝူက ဤမျှလောက်အထိ စွန့်စားရဲသူတစ်ယောက် ဖြစ်လိမ့်မည်ဟု သူ ထင်မထားခဲ့မိပေ။
“ဘာပဲဖြစ်ဖြစ် ကြယ်တံခွန်နောက်ကိုပဲ အမြဲတမ်း လိုက်နေရတာက ကျွန်တော့်ရဲ့ ကံကြမ္မာက ကျွန်တော့်လက်ထဲမှာ ရှိမနေဘူးလို့ အမြဲ ခံစားနေရတယ်။”
ကျူးဝူက ဆက်ပြောလိုက်သည်။
“အာကာသယာဉ်အဖြစ် အဆင့်မြှင့်တင်တာ ဖြစ်တဲ့အတွက် ကြယ်တံခွန်နဲ့ ကြုံတွေ့ရမယ့် အခြေအနေမျိုးတွေကိုလည်း ထည့်သွင်းစဉ်းစားပြီးသား ဖြစ်ရမယ်။ ဒါကြောင့် ဘေးကင်းလုံခြုံမှုကိုတော့ အာမခံချက် ရှိသင့်ပါတယ်။”
ရှောင်းယီ အနည်းငယ် ခေါင်းငြိမ့်လိုက်သည်။
“မင်းဘက်က စမ်းသပ်ဖို့ ပြင်ဆင်ထားတယ်ဆိုရင်တော့ ငါ မင်းကို ထောက်ခံပါတယ်။ အဲဒီအချိန်ကျရင် ငါ မင်းအတွက် ပစ္စည်းအချို့ သေချာပြင်ဆင်ပေးထားမယ်။”
“ဒါဆိုရင် သူဌေးကို အများကြီး ကျေးဇူးတင်ပါတယ်။”
ကျူးဝူက ပြုံးကာ ပြောလိုက်သည်။
“ဒီလောက်အထိ အားနာနေစရာ မလိုပါဘူး။ နောက်ထပ် ရက်အနည်းငယ် လိုသေးတာပဲ။ အဲဒီအချိန်ကျရင် ဒီပြဿနာကို ဖြေရှင်းနိုင်မယ့် နည်းလမ်း ရှိလာနိုင်တာပဲလေ။”
ရှောင်းယီက ခေါင်းခါယမ်းကာ ပြောလိုက်သည်။
“ဒါဆိုရင်လည်း ကောင်းပါပြီ။ ကျွန်တော် ကုန်စည်ပို့ဆောင်ပေးဖို့အတွက် အသက်ရှင်ကျန်ရစ်သူ တစ်ရာလောက် သွားရှာလိုက်ဦးမယ်။”
ကျူးဝူက ပြုံးကာ ပြောလိုက်သည်။