အခန်း ၁၅၅၆

အခန်း ၁၅၅၆ ဖုန်းယွီအမြင်မှားသွားသလား

Thomsonက LCD ပြားချပ် နယ်ပယ်သို့ ဘက်စုံ ဝင်ရောက်မည်ဖြစ်ပြီး Plasma ဈေးကွက်ကို တဖြည်းဖြည်း စွန့်လွှတ်သွားမည်ဟု ရုတ်တရက် ကြေညာလိုက်သည်။

ဤသတင်း ထွက်ပေါ်လာပြီးနောက် လုပ်ငန်းနယ်ပယ်အတွင်း အကြီးအကျယ် တုန်လှုပ်သွားစေခဲ့သည်။

ကမ္ဘာ့ထိပ်တန်း လျှပ်စစ်ပစ္စည်း ကုမ္ပဏီကြီး တစ်ခုက ဤသတင်းကို ကြေညာလိုက်ခြင်း ဖြစ်ပြီး ယခင်က သူတို့သည် Plasmaကို ခိုင်မာစွာ ထောက်ခံအားပေးသော ထိပ်တန်း ကုမ္ပဏီကြီးများထဲမှ တစ်ခု ဖြစ်ခဲ့ရာ လူအများအပြားကို အလိုအလျောက် တွေးတောမိစေခဲ့သည်။ LCD က Plasmaထက် တကယ်ပဲ အားသာချက် ရှိနေလို့လား...

Plasma နည်းပညာသည် လောလောဆယ်တွင် LCD ထက် သာလွန်နေဆဲ ဖြစ်သော်လည်း အကြီးမားဆုံး ပြဿနာမှာ ဂျပန်နိုင်ငံ ကုမ္ပဏီများက နည်းပညာကို လက်ဝါးကြီးအုပ်ထားပြီး အခြားသော ကုမ္ပဏီများကို မျှဝေသုံးစွဲခွင့် မပြုလိုခြင်းပင် ဖြစ်သည်။

Thomson၊ Samsung အုပ်စု အစရှိသည့် ထိပ်တန်း ကုမ္ပဏီကြီးများပင် ဒုတိယ အုပ်စုသို့ နောက်ကျကျန်နေခဲ့ရာ ထိုင်ဝမ်ကဲ့သို့သော ကုမ္ပဏီများ ဆိုလျှင်မူ ပြောနေစရာပင် မလိုတော့ဘဲ တတိယ အုပ်စုတွင်သာ ရှိနေကြပေသည်။

Plasma TV ၏ အမြတ်အစွန်းမှာ မြင့်မားသည်မှာ မှန်သော်လည်း အမြတ်အစွန်း အများစုကို ဂျပန်နိုင်ငံ ကုမ္ပဏီများကသာ ရယူသွားကြသည် မဟုတ်ပါလော။ Panasonic၊ Sony၊ Sharp အစရှိသည့် ဂျပန်နိုင်ငံ ကုမ္ပဏီများက မဟာမိတ် အဖွဲ့တစ်ခု ဖွဲ့စည်းထားပြီး သူတို့သည် Plasma TV ဈေးကွက် ဝေစု၏ ရှစ်ဆယ် ရာခိုင်နှုန်းနှင့် အမြတ်အစွန်း ကိုးဆယ် ရာခိုင်နှုန်းကျော်ကို သိမ်းပိုက်ထားကြသည်။

Thomson စသည့် ကုမ္ပဏီများမှာ ဈေးကွက် ဝေစု နည်းပါးရုံသာမက အမြတ်အစွန်း ရာခိုင်နှုန်းမှာလည်း တစ်ဖက်လူကို မမီနိုင်ပေ။ ဂျပန်နိုင်ငံ ကုမ္ပဏီများမှာမူ မနည်းလှအောင် ငွေရှာနိုင်ခဲ့သော်လည်း ပြဿနာ တစ်ခုကို လျစ်လျူရှုထားခဲ့ကြသည်။ Plasma TVကို အားတိုက်ခွန်တိုက် ကြော်ငြာပေးမည့်သူမှာ သူတို့ ဂျပန်နိုင်ငံ ကုမ္ပဏီများသာ ကျန်ရှိတော့ချိန်တွင် ဤမျှ ရောင်းကောင်းဦးမည်လော။

သုံးစွဲသူတွေဟာ စခရင်ရဲ့ မီးခိုးရောင်အဆင့် ပိုကောင်းတာ၊ အရောင်နယ်ပယ် ပိုကျယ်တာစတဲ့ နည်းပညာဆိုင်ရာ အသေးစိတ် အားသာချက်တွေကို နားမလည်ကြသလို စိတ်လည်းမဝင်စားကြမှာ မဟုတ်ပေ။ သူတို့၏အမြင်တွင် သင့်တင့်သော ငွေကြေး အသုံးပြုပြီး သူတို့ ကောင်းသည်ဟု ထင်ရသော ထုတ်ကုန်ကို ဝယ်ယူနိုင်လျှင် လုံလောက်ပြီ ဖြစ်သည်။ ဤကောင်းမွန်သည် ဆိုခြင်း၏ အဓိက အကြောင်းရင်းမှာ ဈေးနှုန်းနှင့် အရည်အသွေး ညီမျှမှုပင် ဖြစ်သည်။

အဘယ်ကြောင့်ဆိုသော် အမှတ်တံဆိပ်ပိုင်းတွင် ဂျပန်နိုင်ငံ ကုမ္ပဏီများက မည်သည့် အားသာချက်မျှ မရှိသောကြောင့် ဖြစ်သည်။

တစ်ခါတစ်ရံတွင် ပိုမိုကောင်းမွန်သော အရာများကို သုံးစွဲသူများက သေချာပေါက် လက်ခံကြလိမ့်မည် မဟုတ်ပေ။ ဥပမာအားဖြင့် ဆက်သွယ်ရေး နယ်ပယ်တွင် စွမ်းအင် အသုံးပြုမှု၊ အသံ အရည်အသွေးနှင့် လုံခြုံရေး ပိုင်းတို့တွင် CDMA နည်းပညာက GSM ထက် သာလွန်သော်လည်း ရလဒ်မှာမူ အသုံးပြုသူ အများစုက GSM ကိုသာ ရွေးချယ်ခဲ့ကြသည်။

အနာဂတ် ဆက်သွယ်ရေး နည်းပညာ ဖွံ့ဖြိုးတိုးတက်မှုမှာလည်း GSM ကို အဆင့်မြှင့်တင်ခြင်းဖြင့် 2G၊ 3G၊ 4G အစရှိသည်တို့ တစ်ဆင့်ပြီး တစ်ဆင့် မြင့်တက်လာခဲ့သည်။ အလွန် မြင့်မားလွန်းသဖြင့် လိုက်မမီနိုင်သော CDMA မှာမူ အချိန်၏ ရေစီးကြောင်းထဲတွင် တဖြည်းဖြည်း ပျောက်ကွယ်သွားခဲ့ရသည်။

သို့သော် ဖုန်းယွီယူဆထားသော အရေးအကြီးဆုံး အကြောင်းရင်းမှာ LCD နည်းပညာ၏ တိုးတက်မှု အရှိန်အဟုန်မှာ ယခင်က လူအများ ထင်မှတ်မထားခဲ့သည့် အတိုင်းအတာအထိ လျင်မြန်လွန်းနေခြင်းပင် ဖြစ်သည်။ ဤနယ်ပယ်တွင် သုတေသန ပြုလုပ်သူများ များပြားလာပြီး များစွာသော တိုးတက်မှု အသေးစားလေးများ ပေါင်းစပ်သွားသောအခါ ဤမျှ ကြီးမားသော တိုးတက်မှုကြီး ဖြစ်လာခဲ့ခြင်း ဖြစ်သည်။

ဤနှစ်များအတွင်း Plasma၏ နည်းပညာ တိုးတက်မှုမှာ သုံးလှမ်း လျှောက်သည်ဟု ဆိုမည်ဆိုပါက LCD နည်းပညာ၏ တိုးတက်မှုမှာ သုံးဆင့် ခုန်ခြင်းဟု ဆိုရပေမည်။

ယခုအခါ အပြင်ပန်း အသွင်အပြင်တွင် LCD နှင့် Plasmaတို့ ကွာခြားချက်မှာ ပိုပိုပြီး နည်းပါးလာခဲ့သည်။ သာမန် အသုံးပြုသူများ အမြင်တွင်မူ သိသိသာသာကို ပိုမို ဈေးသက်သာသော LCD က ပိုကောင်းပြီး အသုံးပြုနိုင်သည့် သက်တမ်းလည်း ပိုရှည်ကာ အလွယ်တကူ မပျက်စီးနိုင်ပေ။

ထို Plasma TV က ပျက်သွားလျှင် တစ်ခါ ပြင်ရန်အတွက် ငွေအများကြီး ကုန်ကျသော်လည်း LCD မှာမူ မတူညီပေ။

ထို့အပြင် LCD မှာ LCD မှသည် LED အထိ၊ ၎င်းအထဲတွင် TFT နည်းပညာ၊ IPS နည်းပညာ၊ TN နည်းပညာ၊ PVA နည်းပညာ၊ MVA နည်းပညာ၊ CPA နည်းပညာ အစရှိသည့် မျိုးစုံသော LCD နည်းပညာသစ်များစွာ သုတေသနပြု အောင်မြင်လာခဲ့သည်။

၎င်းတို့အထဲတွင် အချို့မှာ Wind-Rain အီလက်ထရောနစ် ကဲ့သို့သော ကုမ္ပဏီများက သုတေသနပြု အောင်မြင်ခဲ့ခြင်းဖြစ်ပြီး အချို့မှာ Samsung အုပ်စု ဘက်မှ ဖြစ်ကာ အချို့မှာမူ ဂျပန်နိုင်ငံ ကုမ္ပဏီများမှပင် ဖြစ်နေသေးသည်။ သူတို့က Plasma TV ကို အဓိကထား ထုတ်လုပ်သော်လည်း LCD မျက်နှာပြင်များကိုလည်း ထုတ်လုပ်ကြသေးသည်။ ဆိုလိုသည်မှာ ယခုအခါ LCD နည်းပညာ ဖွံ့ဖြိုးတိုးတက်မှုမှာ နေ့စဉ်နှင့်အမျှ တိုးတက်ပြောင်းလဲနေပြီး အားလုံးတွင် ကိုယ်ပိုင် အဓိက တိုက်ခိုက်မည့် လမ်းကြောင်းများ ရှိနေကြပြီ ဖြစ်သည်။

အသေးစိတ် စံနှုန်းများ မတူညီကြသော်လည်း အနည်းဆုံးတော့ LCD ၏ အခြေခံ စံနှုန်းများကို လိုက်နာကြသည်။ စံနှုန်းများ ပြန့်ပွားရေးနှင့် ကြော်ငြာမှုက ထုတ်ကုန်များအပေါ် အလွန် အရေးပါသော သက်ရောက်မှု ရှိနေပေသည်။

Plasma စံနှုန်းများကို ဂျပန်နိုင်ငံ ကုမ္ပဏီများက ထိန်းချုပ်ထားပြီး အခြားသူများကိုလည်း သူတို့နှင့် အတူတူဖြစ်ရန် တောင်းဆိုကြသည်။ အကယ်၍ မတူညီပါက မှားယွင်းနေသည်ဟု သတ်မှတ်ကြသည်။ ဤအချက် တစ်ချက်တည်းဖြင့်ပင် Plasma TV ထုတ်လုပ်သော ကုမ္ပဏီ အများအပြားကို အရှုံးပေါ်စေခဲ့သည်။

အစပိုင်းတွင် အမြတ်ရနေသယောင် ရှိသော်လည်း စံနှုန်းများ အဆင့်မြှင့်တင်လာသည်နှင့်အမျှ သူတို့၏ နည်းပညာများက မမီတော့ဘဲ တဖြည်းဖြည်း နောက်ကျကျန်လာခဲ့သည်။ သုံးနှစ် အချိန်အတွင်းမှာပင် သူတို့ကို အလွန် နောက်ကျကျန်သွားစေခဲ့ပြီး အုပ်စုထဲမှ ကျန်ရစ်ခဲ့စေသည်။

ဖုန်းယွီက LCD ပြားချပ် နည်းပညာကို တစိုက်မတ်မတ် ဖွံ့ဖြိုးတိုးတက်စေချင်ခဲ့သည့် အကြောင်းရင်းမှာ ယခင်ဘဝက မှတ်ဉာဏ်များအရ နောက်ပိုင်းတွင် LCD က Plasmaကို အနိုင်ယူသွားမည်ဖြစ်ကြောင်း သိရှိနေခြင်းကြောင့် ဖြစ်သည်။ အခြားသော အလွန် သိသာထင်ရှားသည့် အချက်မှာ LCD ၏ အသုံးချမှု နယ်ပယ်က ပိုမိုကျယ်ပြန့်နေခြင်းပင် ဖြစ်သည်။

မိုဘိုင်းဖုန်း တစ်ခုတည်းမှာပင် အနာဂတ်တွင် ဤဘက်ပိုင်းမှ နည်းပညာများ အဆက်မပြတ် တိုးတက်လာရန် လိုအပ်မည်ဖြစ်ပြီး ကွန်ပျူတာ၊ တီဗွီ စသည့် ကဏ္ဍပေါင်းစုံကိုဆိုလျှင် ပို၍ပင်ပြောနေစရာ မလိုတော့ပေ။

Plasmaကို တကယ် အထိနာသွားစေခဲ့သည့်အချိန်မှာ ၂၀၀၈ ခုနှစ် စီးပွားရေး အကျပ်အတည်းကာလတွင် ဖြစ်သည်။ ဈေးနှုန်း မြင့်မားလွန်းသော Plasma TVများမှာ ရုတ်တရက် ရောင်းမစွံသည့် ပြဿနာထဲသို့ ကျဆင်းသွားခဲ့ပြီး ထို့ကြောင့် ပြားချပ် တီဗွီများထဲတွင် LCD တီဗွီ၏ ပါဝင်မှုမှာ ရှစ်ဆယ် ရာခိုင်နှုန်းကို တစ်ဟုန်ထိုး ကျော်လွန်သွားစေခဲ့သည်။

ထိုအချိန်တွင် Plasma TV ကို လုပ်ကိုင်နေဆဲ ဖြစ်သည့် ကုမ္ပဏီများ အားလုံး ငွေရှုံးလာကြပြီး LCD တီဗွီများမှာ အစစ်အမှန် ရွှေရောင် ကာလသို့ ဝင်ရောက်သွားခဲ့သည်။

ယခု လက်ရှိ LCD တီဗွီများမှာ အတော်လေး ထူထဲနေသေးသော်လည်း LED နည်းပညာ အဆင့်မြှင့်တင်လာမှုနှင့်အတူ LCD တီဗွီများမှာ ပိုပိုပြီး ပါးလွှာလာမည် ဖြစ်သည်။ LED ဆိုသည်မှာ နည်းပညာသစ် မဟုတ်သော်လည်း ယခင်က အလေးထားသူ သိပ်မများခဲ့ဘဲ အားလုံးက ၎င်းကို မီးသီး တစ်မျိုးအဖြစ်သာ သတ်မှတ်ထားခဲ့ကြသည်။

LCD ကိုယ်တိုင်က အလင်းမထုတ်လွှတ်နိုင်ဘဲ နောက်ခံအလင်း လိုအပ်သည်။ LED က အလင်းရင်းမြစ်ကို ပိုမိုသေးငယ်သွားစေနိုင်ပြီး တီဗွီကို ပိုမိုပါးလွှာသွားစေနိုင်သည်။ တီဗွီစင်ပေါ် တင်ထားရာမှ နံရံကပ် အဖြစ်သို့ ပြောင်းလဲသွားစေနိုင်သည်။

LCD နည်းပညာ၏ အဆက်မပြတ် တိုးတက်လာမှုက Taihua Holdings အုပ်စုနှင့် သူတို့၏ မဟာမိတ်များကို ပိုမိုမြင့်မားသော အမြတ်အစွန်းများ ယူဆောင်လာပေးမည် ဖြစ်သည်။ သေချာပေါက် ယခုအချိန်တွင် ပြားချပ် တီဗွီ ဘက်တွင် LCD ၏ ရောင်းအားမှာ အချိန်တိုအတွင်း Plasmaနှင့် ယှဉ်နိုင်မည်ဟု ထင်ရသော်လည်း လက်တွေ့တွင် အမြတ်အစွန်းမှာ Plasmaကို အများကြီး မမီနိုင်သေးပေ။

ဤအကြောင်းရင်းကြောင့်ပင် Thomsonက Plasma ဈေးကွက်မှ မထွက်ခွာချင်ရခြင်း ဖြစ်သည်။ ထို့ကြောင့် သူတို့သည် ဖုန်းယွီ၏ အကြံပြုချက်ကို လက်ခံခဲ့သော်လည်း လမ်းကြောင်း နှစ်ခုလုံး လျှောက်ရန် ဆုံးဖြတ်ခဲ့ခြင်း ဖြစ်သည်။

Thomson ၏ ဤကြေညာချက်က ဂျပန်နိုင်ငံ ကုမ္ပဏီများကို ပျော်ရွှင်စွာဖြင့် အောင်ပွဲခံလုမတတ် ဖြစ်သွားစေခဲ့သည်။ ဤသို့ဖြင့် သူတို့၏ Plasma ဘက်တွင် အကြီးမားဆုံးသော ရန်သူမှာ တောင်ကိုရီးယားမှ Samsung နှင့် LG တို့သာ ကျန်ရှိတော့ပြီး တောင်ကိုရီးယားကို ထပ်မံအနိုင်ယူလိုက်မည်ဆိုပါက သူတို့သည် Plasma ဈေးကွက်ကို တစ်ဦးတည်း လက်ဝါးကြီးအုပ်နိုင်တော့မည် ဖြစ်သည်။

ဈေးကွက်က ဤမျှ ကြီးမားနေပြီး ဆက်လက်၍လည်း ကျယ်ပြန့်နေဆဲဖြစ်ရာ Thomsonက တဖြည်းဖြည်း ဆုတ်ခွာမည်ဆိုမှတော့ သူတို့အနေဖြင့် တိုးချဲ့သင့်ပြီး Thomson ဖယ်ပေးလိုက်မည့် ဈေးကွက်ကို သိမ်းပိုက်ရမည် ဖြစ်သည်။ သို့မှသာ တောင်ကိုရီးယား ကုမ္ပဏီများ အချောင်နှိုက်သွားခြင်းမှ ကာကွယ်နိုင်မည် ဖြစ်သည်။

ထို့ကြောင့် ဂျပန်နိုင်ငံမှ ထိုကုမ္ပဏီ အထက်တန်း စီမံခန့်ခွဲသူများမှာ ထပ်မံ တွေ့ဆုံကြပြီး ဈေးကွက် ဝေစုကို မည်သို့ ခွဲဝေရမည်ကို ဆွေးနွေးကြသည်။ နှမြောစရာကောင်းသည်မှာ သူတို့၏ ဤမဟာမိတ် အဖွဲ့မှာလည်း အတော်လေး ဖရိုဖရဲ ဖြစ်နေသည်။ အဘယ်ကြောင့်ဆိုသော် သူတို့ ကိုယ်တိုင်ကလည်း ပြိုင်ဘက်များ ဖြစ်နေကြသောကြောင့်ပင် ဖြစ်သည်။

Panasonicကမှ ကမ္ဘာ့ Plasma ခေါင်းဆောင် ဖြစ်သည်။ အစတုန်းက သူက ဂျပန်နိုင်ငံမှ အခြားသော ကုမ္ပဏီများကို ဆွဲသွင်းလာခဲ့ခြင်းမှာ ဈေးကွက်ကို ပူးပေါင်း ထိန်းချုပ်ရန် သက်သက်သာ ဖြစ်သည်။ ယခုအခါ ဈေးကွက်မှာ အလွန် ကောင်းမွန်စွာ ကျယ်ပြန့်နေပြီ ဖြစ်ရာ သူက Sony စသည့် ကုမ္ပဏီများ ကြီးထွားလာသည်ကို မည်သို့လုပ် ကြည့်နေနိုင်မည်နည်း။

ထို့ကြောင့် Panasonicက Plasma TV ထုတ်လုပ်ရေး လိုင်းများကို တိုးချဲ့ရန် တိတ်တဆိတ် ဆုံးဖြတ်လိုက်သည်။ Thomson ဖယ်ပေးလိုက်မည့် ဈေးကွက်ကို သိမ်းပိုက်ရုံ သာမကဘဲ Thomson ကိုပါ Plasma ဈေးကွက်မှ ပိုမို စောစီးစွာ ထွက်ခွာသွားစေရန် လုပ်ဆောင်မည် ဖြစ်သည်။

Sony၊ Sharp စသည့် ကုမ္ပဏီများကလည်း ဤအကြံအစည်မျိုးပင် ဖြစ်သည်။ သူတို့က ကိုယ်ပိုင် ထုတ်လုပ်နိုင်စွမ်းကို တိုးချဲ့ပြီး ကိုယ့်စကား၏ သြဇာအာဏာကို မြှင့်တင်ရမည် ဖြစ်သည်။ ဤမဟာမိတ် အဖွဲ့၏ ခေါင်းဆောင်နေရာကို Panasonicက အမြဲတမ်း ယူထား၍ မရနိုင်ပေ။

မနှစ်တစ်ခါကလည်း မင်းပဲ... မနှစ်ကလည်း မင်းပဲ... ဒီနှစ်လည်း မင်းပဲ ဆိုရင်... နောက်နှစ်တော့ ငါ့အလှည့် ရောက်သင့်ပြီ မဟုတ်ဘူးလား...

အများဆုံး ရောင်းအား၊ အမြင့်မားဆုံး အမြတ်အစွန်းများ ရှိနေသရွေ့ အကြီးမားဆုံးသော စကားပြောခွင့် အာဏာကို ရရှိနိုင်မည် ဖြစ်သည်။

တစ်ချိန်တည်းမှာပင် အခက်အခဲ မျိုးစုံဖြင့် ရုန်းကန်နေရသော ထိုင်ဝမ်မှ Plasma ကုမ္ပဏီများကလည်း အလင်းရောင်ကို မြင်တွေ့လိုက်ရသည်။ ထိပ်တန်း ပြိုင်ဘက်ကြီးတစ်ဦး လျော့နည်းသွားသဖြင့် သူတို့အတွက် အခွင့်အရေးများ ပိုမို များပြားလာပြီ ဖြစ်သည်။

ဤသို့ဖြင့် သူတို့ အနေဖြင့် Plasma TV လုပ်ငန်းတွင် ထူးထူးခြားခြား ပေါ်လွင်လာမည့် အခွင့်အရေးမှာလည်း ပိုမို ကြီးမားလာပြီ ဖြစ်သည်။

ဤ Plasma ကုမ္ပဏီများ အမြင်တွင် Thomson သည် အလွန် မှားယွင်းသော ဆုံးဖြတ်ချက် တစ်ခုကို ချမှတ်လိုက်ခြင်း ဖြစ်သည်။ အထူးသဖြင့် ဤဆုံးဖြတ်ချက်မှာ ဖုန်းယွီ၏ အကြံပေးချက်ကို နားထောင်ခဲ့ခြင်း ဖြစ်သည်ဆိုသော သတင်းများကြောင့် သူတို့ ပို၍ပင် တိတ်တဆိတ် လှောင်ပြောင်နေကြသည်။

မင်း ဖုန်းယွီက ရင်းနှီးမြှုပ်နှံမှု လုပ်တိုင်း အမြဲတမ်း မှန်ကန်တယ် မဟုတ်ဘူးလား... မင်းမှာလည်း အမြင်မှားသွားတဲ့ အချိန် ရှိသေးတာကိုး...

...

******