အခန်း ၁၅၅၈

အခန်း ၁၅၅၈ အွန်လိုင်းဂိမ်း ဒဏ္ဍာရီ

ကမ္ဘာ့ ရူးသွပ် စစ်သည်တော်က ငွေဖြည့်မည်ဟု အော်ပြောလိုက်သည်နှင့် အင်တာနက်ဆိုင် မန်နေဂျာက ချက်ချင်း ပြေးလာပြီး ပြောလိုက်သည်။ သူတို့ အင်တာနက်ဆိုင်က Wind-Rain ဂိမ်းကုမ္ပဏီနှင့် ပူးပေါင်းဆောင်ရွက်ထားသော အင်တာနက်ဆိုင် ဖြစ်ကြောင်း၊ ငွေဖြည့်ပါက နှစ်ရာခိုင်နှုန်း လျှော့ဈေး ရရှိမည့်အပြင် မဲဖောက်ခွင့်လည်း ရရှိမည်ဖြစ်ပြီး မတူညီသော Yuanbao အရေအတွက်များ ရရှိနိုင်ကြောင်း ပြောပြလိုက်သည်။

ယွမ် ငွေသားသာမကဘဲ O Coin များကိုပါ ငွေဖြည့်ရန် အသုံးပြု၍ ရနိုင်သော်လည်း လျှော့ဈေးတော့ မရရှိပေ။ သို့သော် အင်တာနက်ဆိုင်တွင် O Coin ဝယ်ယူပါကလည်း နှစ်ရာခိုင်နှုန်း လျှော့ဈေး ရရှိမည်ဖြစ်ပြီး ငွေဖြည့်ပြီးပါကလည်း မဲဖောက်ခွင့် ရရှိမည် ဖြစ်ရာ အတူတူပင် ဖြစ်သည်။

"ညီလေး... မင်း ဘယ်လောက် ဖြည့်မလို့လဲ"

"တစ်ရာ"

"တစ်ရာ ဟုတ်လား... တစ်ရာ ဆိုရင် VIP 2 ပဲ ရမှာလေ... ငါ အကြံပေးချင်တာက နှစ်ရာ ဖြည့်လိုက်ပါ... ဒါဆို VIP 3 ဖြစ်သွားပြီ... နေ့တိုင်း လက်ဆောင်ရမယ့် Yuanbao ကလည်း ပိုများလာတဲ့အပြင် တခြား VIP အထူး အခွင့်အရေးတွေလည်း ပိုရလာမှာ... ငါ လိမ်ပြောနေတာ မဟုတ်ဘူး... ငါ ကိုယ်တိုင်လည်း နှစ်ရာ ဖြည့်ထားတာ။ ပြီးတော့ အခုက ပရိုမိုးရှင်း အစီအစဉ်လည်း ရှိနေသေးတယ်လေ... နှစ်ရာ ဖြည့်လိုက်ရင် Yuanbao တွေ အများကြီး ပိုရနိုင်ချေ ရှိတယ်" အင်တာနက်ဆိုင် မန်နေဂျာက အားတိုက်ခွန်တိုက် ကြော်ငြာပေးလိုက်သည်။

အင်တာနက်ဆိုင်တွင် ငွေဖြည့်ပါက အင်တာနက်ဆိုင်ကလည်း ကော်မရှင် ရရှိမည် ဖြစ်ပြီး ထီဆိုင်များတွင် ထီလက်မှတ် ရောင်းချ၍ ကော်မရှင် ရရှိသကဲ့သို့ပင် ဖြစ်သည်။ သူတို့ အင်တာနက်ဆိုင် မန်နေဂျာများက ကြော်ငြာ၍ ငွေဖြည့်ပါကလည်း သေချာပေါက် သူတို့အတွက် ကော်မရှင် ရရှိမည် ဖြစ်သည်။ ကော်မရှင် ရာခိုင်နှုန်းမှာ မများပြားသော်လည်း လူတစ်ဦးလျှင် ယွမ် ဆယ်ဂဏန်းခန့် ရရှိနိုင်ရာ တစ်နေ့လျှင် လူအယောက် နှစ်ဆယ်ခန့်ကို ကြော်ငြာနိုင်ပါက ယွမ် တစ်ရာကျော် ပိုမို ရှာဖွေနိုင်မည် မဟုတ်ပါလော။

သူကဲ့သို့သော အင်တာနက်ဆိုင် မန်နေဂျာ သေးသေးလေး တစ်ယောက်၏ လစာမှာ တစ်လလျှင် ယွမ်တစ်ထောင်ကျော်ခန့်သာရှိရာ ဤကော်မရှင်များကိုသာ သေချာစုဆောင်းနိုင်ပါက လစာထက်ပင် ပိုမိုများပြားနေနိုင်ပေသည်။

ငွေဖြည့်ပြီးနောက် ကမ္ဘာ့ ရူးသွပ် စစ်သည်တော် မှာ မဲဖောက်ခြင်းမှ Yuanbao အချို့ ရရှိခဲ့သော်လည်း ပေါင်းစပ်ရာတွင် ဤ Yuanbao များမှာ လုံးဝမလုံလောက်ကြောင်း တွေ့ရှိလိုက်ရသည်။

အဆင့်မြင့်သွားသော ထို အစွမ်းထက်ဆုံး သာမန်လူ ကို သွားရှင်းဖို့ မဆိုထားနှင့်၊ အဆင့်မမြင့်ရသေးခင်ကပင် သူက ယှဉ်နိုင်မည့် ပြိုင်ဘက် မဟုတ်ခဲ့ပေ။

သို့သော် ဤကိစ္စကို သူက ဘယ်လိုလုပ်ပြီး အလွယ်တကူ လက်ခံနိုင်မည်နည်း။

သူက အရင် စတင် ရန်စခဲ့သည် ဆိုသော်လည်း တစ်ဖက်လူက ဝက်ယောင်ဆောင်ပြီး ကျားကို စားခဲ့ခြင်း အပေါ် သူ၏ စိတ်ထဲတွင် အလွန် မကျေမနပ် ဖြစ်နေဆဲ ဖြစ်သည်။ အကယ်၍ မင်းက VIP 9 ဆိုတဲ့ ဂုဏ်ပုဒ်ကို ခေါင်းပေါ်မှာ တင်ထားမယ်ဆိုရင် ငါက လက်ပါမိပါ့မလား...

ရှင်းရှင်းလင်းလင်းကြီး တမင်သက်သက် မြှူဆွယ်နေတာပဲ... ဒီ အစွမ်းထက်ဆုံး သာမန်လူ ဆိုတဲ့ ကောင်က တကယ်ကို ရည်ရွယ်ချက် ဆိုးရွားလွန်းတယ်...

ကမ္ဘာ့ ရူးသွပ် စစ်သည်တော်သည် Legend of Mir တရားဝင် ဝက်ဘ်ဆိုက် ဖိုရမ်သို့ ဝင်ရောက်ကာ ဤ အစွမ်းထက်ဆုံး သာမန်လူ က သူ့ကို 'အနိုင်ကျင့်' ခဲ့သည့် သွေးစွန်းသော သမိုင်းကြောင်းများကို ဖော်ပြထားသည့် ပို့စ်တစ်ခု တင်လိုက်သည်။

ဘေးရှိ သူငယ်ချင်းဖြစ်သူက ခေါင်းပြူကြည့်လိုက်ပြီး ပြောသည်။ "မင်း ဒါ ဘာလုပ်နေတာလဲ... တရားဝင် ဘက်ကို အကောင့်ပိတ်ခိုင်းဖို့ တောင်းဆိုနေတာလား။ ဒါက ဘယ်လိုလုပ် ဖြစ်နိုင်မှာလဲ. သူများက သေချာ ငွေဖြည့်ပြီး လက်နက် ကိရိယာတွေ အဆင့်မြှင့်နေတာ... တရားဝင် ဘက်ကလည်း ပိုက်ဆံရနေတာဆိုတော့ ဘယ်လိုလုပ် အကောင့်ပိတ်ပေးမှာလဲ... မင်းသာလျှင် စောစောက ဘာဖြစ်လို့ အဲဒီလောက် စိတ်မြန်လက်မြန် ဖြစ်သွားပြီး ယွမ် နှစ်ရာကို ချက်ချင်း ဖြည့်လိုက်ရတာလဲ... မင်း တစ်လ လစာက ယွမ် နှစ်ထောင်ကျော်ပဲ ရှိတာ မဟုတ်ဘူးလား... အိမ်လစာ၊ ဖုန်းဘေလ်တွေ ပေးပြီးရင် မင်းမှာ ပိုက်ဆံ ဘယ်လောက် ကျန်ဦးမှာလဲ... ဒီလတော့ ရှောင်မေကို ထမင်းဝယ်မကျွေးတော့ဘူးလား"

ထိုအချိန်ကျမှသာ ကမ္ဘာ့ ရူးသွပ် စစ်သည်တော်လည်း ငွေဖြည့်လိုက်မိသည်ကို အနည်းငယ် နောင်တရသွားခဲ့သည်။ သို့သော် ငွေဖြည့်ပြီးသွားပြီဖြစ်ရာ ငွေကိုလည်း ပြန်အမ်း၍ မရနိုင်တော့ပေ။ အင်း... မဖြစ်ဘူးဆိုရင် လက်နက် ကိရိယာတွေ ရှာပြီး ပြန်ရောင်းမယ်လေ... သိပ်မများဘူး ဆိုပေမဲ့ နည်းနည်း ပင်ပန်းခံလိုက်ပြီး သူ့ရဲ့ ဒီနှစ်ပေါင်းများစွာ အတွေ့အကြုံတွေကို အားကိုးရင် နည်းနည်းပါးပါးတော့ ပြန်ရနိုင်မှာပါ...

သို့သော် ဒါတွေ အားလုံးက ထို အစွမ်းထက်ဆုံး သာမန်လူကြောင့်ပဲ... သူသာ မဟုတ်ရင် ငါ ငွေဖြည့်စရာ လိုပါ့မလား... ဒီလောက် ပင်ပန်းခံနေစရာ လိုပါ့မလား။

ခဏအကြာတွင် သူ၏ပို့စ်အောက်၌ မှတ်ချက်များ အများအပြား ပေါ်ထွက်လာသည်ကို သူ မြင်တွေ့လိုက်ရသည်။

[ပို့စ်ပိုင်ရှင်က အရမ်းရယ်ရတာပဲ... သူက အဝတ်ကြမ်းလေး ဝတ်ထားတဲ့ ကောင်လေး တစ်ယောက်ရဲ့ ခုတ်သတ်တာ ခံလိုက်ရတယ်တဲ့လား]

[အဆင့် ၅၈ အကောင့်ကြီးက အဆင့် ၂၅ တောင် မပြည့်သေးတဲ့ အကောင့်ငယ်လေးရဲ့ ခုတ်သတ်တာ ခံလိုက်ရတယ်... ဒါ သေချာပေါက် အလကား ပြောနေတာပဲ]

[ဟုတ်တယ်... ပြီးတော့ တစ်ဖက်လူက VIP 9 တဲ့လား... VIP 9 က Yuanbao ဘယ်လောက်များ ရနိုင်မှာလဲ... ပို့စ်ပိုင်ရှင် ပြောတဲ့ အဲဒီ အစွမ်းထက်ဆုံး သာမန်လူ ရဲ့ လက်နက် ကိရိယာ တစ်စုံလုံးကို ကြည့်ရရင် အဝတ်အစား တစ်ထည်ကို အဆင့်မြှင့်ဖို့တောင် လုံလောက်ပါ့မလား မသိဘူး... အဲဒီ လခွမ်းအောင်မြင်နိုင်ချေ ရာခိုင်နှုန်းကိုလည်း မမေ့နဲ့ဦးလေ... တစ်စုံလုံး ဆိုတာကတော့ ပြောနေစရာတောင် မလိုတော့ဘူး]

[အင်းလေ... ငါတို့ ဆာဗာက ခေါင်းဆောင် ကောင်းကင်ယံ နတ်ဘုရားကလည်း VIP 9 ပဲ... အဲဒါ ယွမ် တစ်သိန်းတောင်နော်... အဲဒါတောင် သူ့မှာ နတ်လက်နက် တစ်လက်ပဲ ရှိတာ]

[ပို့စ်ပိုင်ရှင်ရဲ့ အကြီးမားဆုံးဟာကွက်က ဘယ်ဦးနှောက် မရှိတဲ့သူကများ ဒီလောက် များပြားတဲ့ ငွေတွေကို သုံးပြီး လူသစ် လက်နက် ကိရိယာတွေကို အဆင့်မြှင့်တင်ဖို့ ရွေးချယ်မှာလဲ။ ပြီးတော့ အကုန်လုံးကို အမြင့်ဆုံး အဆင့်ရောက်အောင် အဆင့်မြှင့်ထားတယ်တဲ့လား... အကယ်၍ ဒီ Yuanbao တွေနဲ့ ပစ္စည်းတွေကိုသာ အဆင့်မြင့် လက်နက် ကိရိယာတွေ အဆင့်မြှင့်ဖို့ သုံးလိုက်မယ်ဆိုရင် ဆာဗာတစ်ခုလုံးမှာ တိုက်ခိုက်ရေးစွမ်းအား နံပါတ်တစ် ဖြစ်နေတာ ကြာပြီပေါ့]

[ပို့စ်ပိုင်ရှင်ရဲ့ ဦးနှောက်က တံခါးညပ်သွားတာလို့ သံသယ ဖြစ်မိတယ်... ဆရာဝန် သွားပြဖို့ အကြံပေးချင်တယ်... ငါ သိတဲ့ အာရုံကြော ဆရာဝန် တစ်ယောက် ရှိတယ်... အရည်အချင်း တော်တော်လေး ကောင်းတယ်။ ဖုန်းနံပါတ်က 139XXXXXXXX ပဲ]

ကမ္ဘာ့ ရူးသွပ် စစ်သည်တော်မှာ အကြီးအကျယ် ဒေါသထွက်သွားခဲ့သည်။ ဤလူများက ဘာကိုအကြောင်းပြု၍ သူ့ကို ဦးနှောက် မရှိဟု ပြောဆိုရဲသနည်း။ သူ့တွင် စိတ်ရောဂါ ရှိနေသည်ဟုပင် သွယ်ဝိုက်ပြောဆိုနေကြသေးသည်။

ထိုအစွမ်းထက်ဆုံး သာမန်လူ ဘယ်လို တွေးနေသလဲ ဆိုတာကို သူ ဘယ်လိုလုပ် သိနိုင်မှာလဲ။ ဘာဖြစ်လို့ ငွေဖြည့်ပြီး လူသစ် လက်နက် ကိရိယာတွေကို အဆင့်မြှင့်ရတာလဲ ဆိုတာကို သူ ဘယ်လိုလုပ် သိနိုင်မှာလဲ။ ဒါပေမဲ့ အဲဒါက အမှန်တကယ်ပဲလေ... သူ ကိုယ်တိုင် မျက်စိနဲ့ မြင်ခဲ့ရတာကို ဘာဖြစ်လို့ ဘယ်သူမှ မယုံကြရတာလဲ။

သူ့ သူငယ်ချင်းက ဤဖိုရမ်ရှိ မှတ်ချက်များကို ကြည့်ရင်း သူ့အား ပြောလိုက်သည်။ "ငါ ဘာပြောခဲ့လဲ... မင်းရဲ့ဒီပို့စ်ကို ဘယ်သူမှ ယုံမှာ မဟုတ်ဘူးလို့"

"ဒါဆို ဘယ်လိုလုပ်ရမလဲ"

"ဘယ်လိုလုပ်ရမလဲ ဟုတ်လား... အဲဒီအစွမ်းထက်ဆုံး သာမန်လူရဲ့ အသေးစိတ် အချက်အလက် တွေကို ချပြလိုက်ပေါ့... မင်း သူ့ကို သွားရှာပြီး မျက်နှာပြင် မှတ်တမ်းတင်လိုက်... ပြီးတော့ အားလုံးကို မင်း လိမ်ပြောနေတာ မဟုတ်ဘူးဆိုတာကို သိအောင် လုပ်လိုက်... ဒါပေမဲ့ အကောင့်ပိတ်ဖို့ ဘာညာ ဆိုတာတွေကိုတော့ မပြောပါနဲ့တော့... ဘယ်သူမှ မင်းကို အာရုံစိုက်မှာ မဟုတ်ဘူး။ တရားဝင် ဘက်ကဆိုရင် ပိုပြီးတော့တောင် ဂရုစိုက်မှာ မဟုတ်ဘူး"

ဖုန်းယွီသည် မြေအောက်ကမ္ဘာ မိစ္ဆာဂိုဏ်းချုပ်ကို သတ်ရန် ပြင်ဆင်နေစဉ် ရုတ်တရက် သူ့ထံသို့ လျှို့ဝှက် မက်ဆေ့ခ်ျ ပို့လာသူ အများအပြား ရှိနေသည်ကို မြင်တွေ့လိုက်ရသည်။ သို့သော် ဤလူများကို သူ တစ်ယောက်မျှ မသိပေ။

သူက ကျပန်း တစ်ယောက်ကို ရွေးပြီး ပြန်ပို့လိုက်သည်။ "ဘာလဲ"

"ချီးတဲ့မှ... ဒီအကောင့်က တကယ် ရှိတာပဲ... ငါ ဖိုရမ်ပေါ်မှာ ကြည့်တာလေ... မင်းမှာ လူသစ် နတ်လက်နက် တစ်စုံလုံး ရှိပြီး တိုက်ခိုက်ရေးစွမ်းအားက ဆာဗာတစ်ခုလုံးရဲ့ ထိပ်ဆုံး စာရင်းမှာ ပါနေတယ် ဆိုတာ ဟုတ်လား"

ဖုန်းယွီမှာ အနည်းငယ် လက်မြှောက် အရှုံးပေးချင်စိတ် ပေါက်သွားခဲ့သည်။ သူ လူသစ် လက်နက် ကိရိယာများကို အဆင့်မြှင့်တင်ခဲ့သည့် အကြောင်းရင်းမှာ လူသိမခံချင်၍ သက်သက်သာ ဖြစ်သည်။ သို့သော် သူ၏လျှို့ဝှက်ချက်မှာ အခြားသူများ၏ တွေ့ရှိခြင်းကို ခံလိုက်ရလိမ့်မည်ဟု ထင်မှတ်မထားခဲ့ပေ။

ဤလူကို သူ သေချာပေါက် စာပြန်မည် မဟုတ်ပေ။ အခြားသူများနှင့် အဖွဲ့ဖွဲ့ရန်လည်း ရည်ရွယ်မထားပေ။ ယခု လက်နက် ကိရိယာ စွမ်းရည်များနှင့်ဆိုလျှင် သာမန်ဘော့စ်များကို သူ တစ်ယောက်တည်း သတ်ဖြတ်နိုင်ပြီ ဖြစ်သည်။ မတိုက်နိုင်သည့် အချိန်မျိုးတွင် ဆေးသောက်၍ ရသေးသည် မဟုတ်ပါလော။

အခြားသူများက သွေးဆေးနီ၊ မှော်ဆေးပြာ များ သောက်သုံးနေချိန်တွင် သူက တိုက်ရိုက်ပင် အသက်ကယ်ဆေးလုံးကြီးကို စားသုံးလိုက်သည်။ ဘော့စ်က သူ့ကို ချက်ချင်း မသတ်နိုင်သရွေ့ သူ လုံးဝ သေမည် မဟုတ်ပေ။ အသက်ကယ်ဆေးလုံးကြီးမှာ အလွန် ဈေးကြီးပြီး သာမန် ကစားသမားများမှာ တစ်လုံးဝယ်၍ အသက်ကယ်ရန် သိမ်းထားတတ်ကြပြီး ချမ်းသာသော ကစားသမားများကလည်း အဓိက ဘော့စ်ကြီးများကို သတ်ချိန်မှသာ အသုံးပြုရန် သိမ်းထားလေ့ရှိသော်လည်း ဖုန်းယွီကမူ ၎င်းကို သာမန် ဆေးရည် တစ်ခွက်ကဲ့သို့ အသုံးပြုနေခြင်း ဖြစ်သည်။

ယခုအခါ Legend of Mir 3 တွင် ဘော့စ်အသစ်များ အများအပြား ပေါင်းထည့်ထားရုံ သာမကဘဲ အသေးစား မြေပုံ အသစ်များလည်း ပါဝင်လာခဲ့သည်။ ဥပမာအားဖြင့် ဘော့စ်တို့၏ အိမ်၊ အမှောင် မိစ္ဆာဂူ၊ ဝက်ဂူ ၈၊ ဝက်ဂူ ၉၊ စမ်းသပ်မှု မျှော်စင် အစရှိသည်တို့တွင် ဘော့စ်များ အလွန်များပြားလှပေသည်။

လူအများအပြားမှာ အဖွဲ့ဖွဲ့၍ သွားရောက် တိုက်ခိုက်လေ့ ရှိကြသော်လည်း ဖုန်းယွီကမူ တစ်ယောက်တည်းသာ သွားရောက် တိုက်ခိုက်လေ့ ရှိသည်။

ထို့အပြင် ယခုအခါ အသက်မွေးဝမ်းကျောင်း အစုံအလင် စွမ်းရည်များကိုပါ ဖွင့်ပေးထားပြီဖြစ်ရာ မည်သည့် အသက်မွေးဝမ်းကျောင်း အလုပ်အကိုင် ဖြစ်နေပါစေ အထူး စွမ်းရည်စာအုပ်များ ရရှိပါက စစ်သည်တော်ကလည်း မှော်ဆရာနှင့် တာအိုဆရာတို့၏ စွမ်းရည်များကို သင်ယူနိုင်ပြီ ဖြစ်သည်။ ဥပမာအားဖြင့် ဖုန်းယွီ၏ ဤအကောင့်မှာ စစ်သည်တော် ဖြစ်သော်လည်း နောက်တွင် စူပါနတ်သားရဲတစ်ကောင် လိုက်ပါနေသည်။ သာမန် နတ်သားရဲများထက် ပိုမိုကြံ့ခိုင်ရုံ သာမက အဆင့် ၉ အထိပင် မြှင့်တင်နိုင်ပေသည်။

ဖုန်းယွီသည် တစ်နေကုန် ဘော့စ်များကို သတ်ဖြတ်နေခဲ့ရာ အဆင့်မှာ မြားတစ်စင်းကဲ့သို့ တက်သွားခဲ့သည်။ အခြေခံ စွမ်းရည်များ မြင့်တက်လာမှုနှင့်အတူ သူ၏တိုက်ခိုက်ရေးစွမ်းအားမှာလည်း ဆာဗာတစ်ခုလုံး၏ ထိပ်ဆယ်စာရင်းသို့ ဝင်ရောက်သွားခဲ့သည်။

လုံခြုံရေးဇုန်တွင် ရှိနေသော လူအချို့က ဆာဗာတစ်ခုလုံး တိုက်ခိုက်ရေးစွမ်းအား ထိပ်ဆယ်စာရင်းရုပ်ပုံများ လူစားထိုးသွားသည်ကို တွေ့ရှိလိုက်ရသောအခါ သူတို့ အလွန် အံ့အားသင့်သွားကြသည်။

ယခင်က ဤရုပ်ပုံများ လူစားထိုးခြင်းမျိုး မရှိခဲ့ဖူးသည်တော့ မဟုတ်ပေ။ အဆင့်ဆယ် နေရာကို မဆိုထားနှင့်၊ ပထမနေရာပင် အမြဲတမ်း ပြောင်းလဲလေ့ ရှိသည်။ သို့သော် ထိပ်ဆယ်စာရင်းဝင် ကစားသမားများထဲတွင် တစ်ကိုယ်လုံး လူသစ် သာမန်ဝတ်စုံကို ဝတ်ဆင်ကာ လူသစ် ဓားကို ကိုင်ဆောင်ထားသူ တစ်ဦး တစ်ယောက်မျှ မရှိခဲ့ဖူးပေ။

စနစ်မှာ ပြဿနာ တစ်ခုခု ဖြစ်နေတာ သေချာရဲ့လား... ဒါမှမဟုတ် သူတို့ရဲ့ လက်နက် ကိရိယာ Patch တွေ အမှားအယွင်း ဖြစ်နေလို့ အသစ်ပြန် ဒေါင်းလုဒ် လုပ်ရမှာလား...

လူအများအပြားက ရုပ်ပုံကို နှိပ်၍ ထိုသူ၏ စွမ်းရည်များကို ကြည့်ရှုလိုက်ကြသောအခါမှ ဤလူ၏ လူသစ်ဝတ်စုံ အစုံအလင်မှာ တကယ်တမ်းတွင် နတ်လက်နက် အစုံအလင်ဖြစ်နေကြောင်း တွေ့ရှိလိုက်ကြရသည်။

နေပါဦး... ဒီလူရဲ့ နာမည်က အစွမ်းထက်ဆုံး သာမန်လူတဲ့လား... ကြည့်ရတာ နည်းနည်း ရင်းနှီးနေသလိုပဲ... ဒီနေ့ Chat Screen ပေါ်မှာ လူတော်တော်များများ သူ့အကြောင်း ပြောနေကြတာ တွေ့လိုက်သလိုပဲနော်။

ဖုန်းယွီ၏ နေရာလုခြင်းကို ခံလိုက်ရသော ထိုကစားသမားမှာ အကြီးအကျယ် ဒေါသထွက်သွားခဲ့သည်။ ဒီလိုမျိုး ဝတ်စုံ ဝတ်ထားတဲ့ ကစားသမား တစ်ယောက်ကို ဘယ်လိုလုပ်ပြီး ရှုံးရတာလဲ။

Yuanbao တွေနဲ့ လက်နက် ကိရိယာတွေကို အဆင့်မြှင့်တင်တာပဲ မဟုတ်ဘူးလား... အတော်ပဲ... ငါလည်း ငွေမဖြည့်တာ တော်တော်ကြာပြီဆိုတော့ ဒီတစ်ကြိမ်မှာ ထိပ်ဆယ်စာရင်း နေရာကို ပြန်လုယူရုံတင် မကဘူး။ ဒသမ နေရာလောက်နဲ့ မကျေနပ်ဘူး... ထိပ်ဆုံး သုံးယောက် စာရင်းထဲအထိ တစ်ဟုန်ထိုး တက်လှမ်းပြမယ်။

ဖုန်းယွီ၏ ဤအစွမ်းထက်ဆုံး သာမန်လူ အကောင့်ငယ်လေး ပေါ်ထွက်လာမှုကြောင့် Legend of Mir 3 ၏ ပထမဆုံး ဆာဗာမှာ ငွေဖြည့်မှု ဒီရေအမြင့်ဆုံး အချိန်သို့ ထပ်မံ ရောက်ရှိသွားခဲ့သည်။

ထို့အပြင် အစွမ်းထက်ဆုံး သာမန်လူ ဆိုသည့် ဤအကောင့်မှာလည်း Legend of Mir 3၏ ဒဏ္ဍာရီ တစ်ခု ဖြစ်လာခဲ့ပေတော့သည်။

...

******