အခန်း ၂၂၇၃

အခန်း (၂၂၇၃) ဝိညာဉ်၏ အားနည်းချက်

ထို့ပြင် ဝမ်ချောင်၏ ထိန်းချုပ်မှုအောက်တွင် ဤစိတ်စွမ်းအင်အားလုံးမှာ ဦးတည်ချက် တစ်ခုတည်းသို့ စုစည်းသွားခဲ့ပြီး ဤဝတ်ရုံမည်းဝတ်များ၏ ဦးနှောက်များထဲသို့ အပြင်းအထန် ဝင်ရောက် ရိုက်ခတ်သွားတော့သည်။

အချိန်အခါနှင့် အခြေအနေများ ပြောင်းလဲသွားပြီဖြစ်သည်။ ထိုက်ရှီနှင့် ပြင်းထန်စွာ တိုက်ခိုက်ခဲ့ပြီးနောက် သူ၏ အလင်းနတ်ဘုရားလက်နက်ကိုပါ ရရှိထားခဲ့ပြီဖြစ်ရာ ယခုလက်ရှိ ဝမ်ချောင်၏စိတ်စွမ်းအင်မှာ ယခင်ကနှင့် လုံးဝနှိုင်းယှဉ်၍ မရနိုင်လောက်အောင် အစွမ်းထက်နေပြီ ပင်ဖြစ်သည်။

ဝုန်း! ဝုန်း!

နောက်တစ်ခဏတွင် မိစ္ဆာဧကရာဇ် အဘိုးအိုနှင့် ဝူရှန်းရွာသူကြီးတို့ နှစ်ယောက်လုံး အလွန်အမင်း အံ့ဩမှင်တက်သွားစေလောက်သည့် အခြေအနေတစ်ခု ရုတ်တရက် ဖြစ်ပေါ်လာတော့သည်။

စိတ်စွမ်းအင် ဆိုသည်မှာ အဆုံးတွင်တော့ ပုံသဏ္ဍာန် မရှိသော၊ အရာဝတ္ထု မဟုတ်သော အရာတစ်ခုသာလျှင်ဖြစ်ပြီး ဂန်ချီစွမ်းအင်၏ အခြေခံ သဘောတရားများနှင့် လုံးဝကွဲပြားခြားနားနေပေသည်။ ထို့ကြောင့် စိတ်စွမ်းအင်များကို အသုံးပြု၍ တစ်ဖက်လူကို ပြင်းထန်စွာ ဒဏ်ရာရရှိစေခြင်း၊ ဒါမှမဟုတ် တစ်ဖက်လူ၏ စိတ်အာရုံများကို ကမောက်ကမ ဖြစ်သွားစေခြင်းများ ပြုလုပ်နိုင်သည် ဆိုသော်ငြားလည်း ပုံမှန်အခြေအနေမျိုးတွင် စိတ်စွမ်းအင်ကို အသုံးပြု၍ တစ်ဖက်လူကို အသက်သေဆုံးသွားစေရန် သတ်ဖြတ်ခြင်းမှာ အလွယ်တကူ လုပ်ဆောင်နိုင်သော ကိစ္စရပ်တစ်ခု လုံးဝ မဟုတ်ပါချေ။

ဝမ်ချောင်ကိုယ်တိုင်အတွက်ပင်လျှင် ထိုကဲ့သို့ပင် ဖြစ်ပေသည်။

သို့သော် သူတို့၏မျက်စိရှေ့တွင် ဖြစ်ပျက်နေသော အရာအားလုံးမှာ သူတို့နှစ်ယောက်လုံး၏ တွေးတောမှန်းဆထားမှုများကို လုံးဝအပြည့်အဝ မှောက်လှန်ပစ်လိုက်ခြင်း ပင်ဖြစ်သည်။ ဝုန်းခနဲမြည်သံကြီး တစ်ခုကိုသာ ကြားလိုက်ရပြီး ရှေ့ဆုံးမှ ပြေးဝင်လာသော ဝတ်ရုံမည်းဝတ် နှစ်ယောက်မှာ ဝမ်ချောင်၏ စိတ်စွမ်းအင် မုန်တိုင်းကြီး၏ ရိုက်ခတ်ခြင်းကို ခံလိုက်ရပြီးနောက် ပြင်းထန်သော တိုက်ခိုက်မှုကို ခံလိုက်ရသည့်အလား ခန္ဓာကိုယ်များမှာ ရုတ်တရက် ပြင်းထန်စွာ တုန်ခါသွားကြတော့သည်။

မိစ္ဆာဧကရာဇ် အဘိုးအိုနှင့် ဝူရှန်းရွာသူကြီးတို့ နှစ်ယောက်၏ အကြည့်များရှေ့မှာပင် ဤဝတ်ရုံမည်းဝတ် နှစ်ယောက်၏ မျက်နှာများမှာ လျင်မြန်စွာ ဖြူရော်သွားခဲ့ပြီး သူတို့၏မျက်ဝန်းများမှာလည်း ငါးမျက်လုံးများအလား အလင်းရောင်များ လျင်မြန်စွာ ပျောက်ကွယ်သွားတော့သည်။

သူတို့နှစ်ယောက်မှာ အသံတစ်ချက်မျှပင် မထွက်နိုင်တော့ဘဲ မြေပြင်ပေါ်သို့ ရုတ်တရက် မှောက်ရက်လဲကျသွားကြတော့သည်။

ထို့ပြင် သူတို့၏နောက်ကျောဘက်တွင် တစ်ယောက်ပြီးတစ်ယောက်၊ ဝတ်ရုံမည်းဝတ် အမြောက်အမြားမှာ မည်သည့် ကြိုတင်သတိပေးမှုမျှမရှိဘဲ မြေကြီးပေါ်သို့ အဆက်မပြတ် လဲကျသွားကြရာ ထိုဂူကောင်းကင်အဆင့် တစ်ဝက်သို့ ရောက်ရှိနေသော ဝတ်ရုံမည်းဝတ်များပင်လျှင် လွတ်မြောက်နိုင်စွမ်း လုံးဝ ရှိမနေခဲ့ကြပါချေ။

"ဒါက ဘာဖြစ်တာလဲ"

မိစ္ဆာဧကရာဇ် အဘိုးအိုနှင့် ဝူရှန်းရွာသူကြီးတို့ နှစ်ယောက်လုံးမှာ အလွန်အမင်း အံ့ဩမှင်တက်သွားကြတော့သည်။

ဝမ်ချောင်၏စွမ်းရည်မှာ အလွန်အမင်း အစွမ်းထက်နေသည်မှာ သေချာလှပေသည်။ သို့သော် ပုံမှန်အခြေအနေမျိုးတွင်ဆိုပါက ဤမျှလောက်အထိ ကြောက်မက်ဖွယ်ကောင်းလှသော စွမ်းအားမျိုး လုံးဝမရှိသင့်ပါချေ။ ထို့ပြင် ဤဝတ်ရုံမည်းဝတ်များ၏ အခြေအနေကို ကြည့်ရသည်မှာ သေလောက်သည့် ဒဏ်ရာကြီးများကို ရရှိသွားသည့်အလား ပင်ဖြစ်နေတော့သည်။

"ဒီဝတ်ရုံမည်းဝတ်တွေက အတော်လေး ထူးဆန်းတယ်။ သူတို့ရဲ့ ဝိညာဉ်တွေက လုံးဝ ပြည့်စုံမှု မရှိဘူး၊ အရင်တုန်းက ထိုက်ရှီရဲ့ အခြေအနေနဲ့ အတော်လေး ဆင်တူနေတယ်"

ဝမ်ချောင်က ဖြည်းညင်းစွာ ပြောလိုက်တော့သည်။

ယခုလက်ရှိ ဝမ်ချောင်၏ စွမ်းရည်မှာ မိစ္ဆာဧကရာဇ် အဘိုးအိုနှင့် ဝူရှန်းရွာသူကြီးတို့ထက် များစွာသာလွန်နေပြီဖြစ်ရာ ဆရာ့ထက်ပင် ပိုမိုအစွမ်းထက်နေပြီ ဖြစ်သည်။ ဤနေရာသို့ သူ ခြေချလိုက်သည်နှင့်တစ်ပြိုင်နက် ဤနေရာတွင် စုဝေးနေကြသော ဝတ်ရုံမည်းဝတ်များ၏ ကိုယ်တွင်းရှိ အခြေအနေများကို ချက်ချင်း ခံစားသိရှိလိုက်ရခြင်း ပင်ဖြစ်သည်။ အပြင်ပန်းတွင် ကြည့်မည်ဆိုပါက ဂန်ချီစွမ်းအင်များ အလွန်အမင်း အစွမ်းထက်ပြီး စွမ်းရည်များမှာလည်း ကြောက်မက်ဖွယ်ကောင်းလှသည်ဟု ထင်ရသော်လည်း အမှန်တကယ်တော့ သူတို့၏ဝိညာဉ်များမှာ လေတိုက်ခံနေရသော ဖယောင်းတိုင်မီးလေးများအလား လုံးဝပြည့်စုံမှု မရှိဘဲ တွေးတောမှန်းဆထားသလောက် လုံးဝအစွမ်းထက်နေခြင်း မရှိပါချေ။

ဤကဲ့သို့သော အခြေအနေမျိုးမှာ သိမ်မွေ့နက်နဲသောအဆင့် အထွတ်အထိပ် သို့မဟုတ် ဂူကောင်းကင်အဆင့် တစ်ဝက်သို့ ရောက်ရှိနေသော အစွမ်းထက်သိုင်းပညာရှင် တစ်ဦးအတွက်မူ ပုံမှန် အခြေအနေ လုံးဝမဟုတ်ပါချေ။

အမှန်တကယ် မည်သည့်အရာများ ဖြစ်ပျက်ခဲ့သနည်းဆိုတာကို အတိအကျ မသိရှိရဘူးဆိုသော်ငြားလည်း ဤကဲ့သို့သော ဝိညာဉ်မပြည့်စုံသည့် ပြိုင်ဘက်များကို ကိုင်တွယ်ဖြေရှင်းရန်အတွက်မူ ဝမ်ချောင်မှာ အလွန်အမင်း ကြီးမားလှသော အတွေ့အကြုံများစွာ ရှိနေပြီ ဖြစ်သည်။

ဝှစ်…

လေပြင်းများ တိုက်ခတ်သံများနှင့်အတူ လေစီးကြောင်းများ ပြင်းထန်စွာ လှုပ်ရှားသွားခဲ့ပြီး ဝမ်ချောင်မှာ မြေကြီးပေါ်တွင် မတ်မတ်ကြီး ရပ်တည်နေခဲ့သည်။ သူ ဆန့်ထုတ်ထားခဲ့သော ညာဘက်လက်ကို ဖြည်းညင်းစွာ ပြန်လည် ရုပ်သိမ်းလိုက်ရာ အဝေးကို လှမ်းကြည့်လိုက်မည်ဆိုပါက ဘေးပတ်ဝန်းကျင်ရှိ မီတာထောင်ပေါင်းများစွာခန့် အကွာအဝေး အတွင်း၌ လုံးဝတိတ်ဆိတ်ငြိမ်သက်သွားခဲ့ပြီး ဝတ်ရုံမည်းဝတ်များ အားလုံးမှာ မြေကြီးပေါ်တွင် လဲကျနေကာ အနည်းငယ်မျှပင် လှုပ်ရှားနိုင်စွမ်း မရှိတော့ချေ။

သူတို့၏ ကိုယ်ပေါ်တွင် မည်သည့် သေလောက်သည့် ဒဏ်ရာမျိုးကိုမျှ လုံးဝ တွေ့ရှိရခြင်း မရှိပါချေ။ ထို့ပြင် ဝင်္ကပါကြီး၏ စွမ်းအားများမှာ သူတို့၏ဒဏ်ရာများကို ကုသပေးနေဆဲပင် ဖြစ်သည်။ သို့သော် သူတို့၏ ကိုယ်တွင်းရှိ ဝိညာဉ်များ အားလုံးမှာမူ အစောကြီးကတည်းက လုံးဝဖျက်ဆီးခံလိုက်ရပြီး အစအနပင် မကျန်အောင် ပျောက်ကွယ်သွားခဲ့ပြီ ဖြစ်သည်။

"အကယ်၍ ကျွန်တော် တွေးတောမှန်းဆထားတာသာ မှန်မယ်ဆိုရင် ဒီဝတ်ရုံမည်းဝတ်တွေက ဒီနေရာမှာပဲ အသက်ရှင် နေထိုင်နိုင်ကြတာ ဖြစ်ရမယ်။ အဲဒီလိုမှ မဟုတ်ရင် အရှေ့မြောက်ဘက် စစ်ပွဲတုန်းက ကျွန်တော်တို့ တွေ့ခဲ့ရတဲ့ နတ်ဘုရားအရှင်သခင် အဆင့်ရှိတဲ့ အစွမ်းထက်သိုင်းပညာရှင်တွေရဲ့ အရေအတွက်က ဒီလောက်လေးပဲ ရှိမှာ မဟုတ်ဘူး"

ဝမ်ချောင်က ဖြည်းညင်းစွာ ပြောလိုက်တော့သည်။ သူ၏မျက်နှာအမူအရာမှာ အလွန်အမင်း တည်ငြိမ်အေးဆေးနေပုံ ရပေသည်။

သူတို့၏ မျက်စိရှေ့ရှိ မြင်ကွင်းကို ကြည့်ခြင်းအားဖြင့် ဤနှင်းမုန်တိုင်းကြီး၏ မူလဇစ်မြစ်ကို စောင့်ကြပ်နေကြသော နတ်ဘုရားအရှင်သခင် အဆင့်နှင့် ဂူကောင်းကင်အဆင့် တစ်ဝက်သို့ ရောက်ရှိနေသည့် အစွမ်းထက်သိုင်းပညာရှင်များ၏ အရေအတွက်မှာ အနည်းဆုံး ခြောက်ဆယ်ကျော်ခန့်အထိ ရှိနေမည်မှာ သေချာလှပေသည်။

"သူတို့က တချို့သော စမ်းသပ်မှုတွေရဲ့ ကျရှုံးသွားတဲ့ ရလဒ်တွေနဲ့အတော်လေး ပိုပြီးဆင်တူနေတယ်လို့ ကျွန်တော် ခံစားရတယ်"

ဝမ်ချောင်က အသံနိမ့်နိမ့်ဖြင့် နောက်ထပ်တစ်ခွန်း ထပ်မံ၍ ဖြည့်စွက်ပြောဆိုလိုက်တော့သည်။

ဝတ်ရုံမည်းဝတ် အဖွဲ့အစည်းကြီးမှာ အမျိုးမျိုးသော စမ်းသပ်မှုများကို ပြုလုပ်ရန် အလွန်အမင်း နှစ်သက်ကြပေသည်။ ယခင်က အာရပ် အင်ပါယာ၏ ဧရာမ သားရဲကြီးများ စစ်တပ်ပင်ဖြစ်စေ၊ ဒါမှမဟုတ် မြောက်ဝင်ရိုးစွန်း ရေခဲပြင်ကြီးတွင် ကြုံတွေ့ခဲ့ရသော ထိုရှေးဟောင်း ဟို့များပင်ဖြစ်စေ၊ ဒါမှမဟုတ် နတ်ဘုရားအဖွဲ့အစည်းကြီး အတွင်းရှိ ထိုထူးဆန်းလှသော မီးတောက် စွမ်းအင်သုံး သိုင်းပညာရပ်များပင်ဖြစ်စေ၊ ဝမ်ချောင်၏အမြင်တွင်မူ ထိုအရာများ အားလုံးမှာ စမ်းသပ်မှုများ ပြုလုပ်ထားခဲ့သည့် အထောက်အထားများ အပြည့်အဝ ရှိနေသည်ဟု ခံစားရပေသည်။

စမ်းသပ်မှုများ ရှိလာပြီဆိုပါက ကျရှုံးမှုများ ဆိုတာလည်း သေချာပေါက် ရှိလာမည်မှာ အမှန်ပင်ဖြစ်သည်။ ယခုလေးတင် တွေ့ရှိခဲ့ရသော ထိုလူများမှာလည်း ထိုအထဲမှ တစ်ခုဖြစ်ပုံ ရပေသည်။

သို့သော် ဤကမ္ဘာလောကကြီးတွင် လူအများအပြားမှာ "စမ်းသပ်မှု" ဟူသော စကားလုံး နှစ်လုံး၏ အဓိပ္ပာယ်ကိုပင် သေချာစွာ နားလည်သဘောပေါက်ထားကြခြင်း မရှိရာ ထိုကဲ့သို့သော အရာမျိုးကို အလွယ်တကူ ခွဲခြားသိရှိနိုင်မည် မဟုတ်သည်မှာ သေချာလှပေသည်။

"တကယ်ကို နှစ်ထောင်ပေါင်းများစွာ အတွင်းမှာ တစ်ကြိမ်တစ်ခါမျှ မပေါ်ထွက်ခဲ့ဖူးတဲ့ ဖျက်ဆီးခြင်းရဲ့ သားတော် ပီသပါပေတယ်။ တစ်ချက်လေး ကြည့်လိုက်ရုံနဲ့ ဒီနေရာရဲ့အခြေအနေမှန်ကို အပြည့်အဝ ဖောက်ထွင်း သိမြင်သွားခဲ့ပြီပဲ။ ဒါပေမဲ့ မင်းတို့တွေ အရာအားလုံးကို အရမ်း လွယ်ကူလွန်းတယ်လို့ ထင်နေကြပုံရတယ်"

"နှင်းမုန်တိုင်းကြီးရဲ့ မူလဇစ်မြစ်ထဲကို ဝင်ရောက်ဖို့ဆိုတာ အဲဒီလောက် မလွယ်ကူဘူး"

ထိုအချိန်မှာပင် ကျယ်လောင်လှသော အသံကြီးတစ်ခုမှာ ဟင်းလင်းပြင်နယ်မြေတစ်ခုလုံး အတွင်း၌ ရုတ်တရက် ပဲ့တင်ထပ်သွားတော့သည်။

ယခင်က မြောက်ဝင်ရိုးစွန်း ရေခဲပြင်ကြီးရှိ လျှပ်စီးမုန်တိုင်းကြီး အတွင်း၌ တစ်ကြိမ် ပေါ်ထွက်ခဲ့ဖူးပြီး ထို့နောက်ပိုင်း လုံးဝတိတ်ဆိတ် ပျောက်ကွယ်သွားခဲ့သော ထိုအသံနှစ်သံမှာ ဝမ်ချောင်နှင့် မိစ္ဆာဧကရာဇ် အဘိုးအိုတို့၏ နားထဲသို့ နောက်တစ်ကြိမ် ထပ်မံ၍ ဝင်ရောက်လာပြန်သည်။

မြေကြီးမှာ ပြင်းထန်စွာ တုန်ခါသွားခဲ့ပြီး နောက်တစ်ခဏတွင် လူတိုင်း၏ အာရုံခံစားမှု အတွင်း၌ ဟင်းလင်းပြင်နယ်မြေ တစ်ခုလုံး အတွင်းမှနေ၍ ဧရာမ စွမ်းအားကြီးတစ်ခုမှာ ကျယ်လောင်စွာ မြည်ဟည်းလျက် ရုတ်တရက် ပေါက်ကွဲထွက်ပေါ်လာတော့သည်။

ဟင်းလင်းပြင်နှင့် အချိန်တစ်ခုလုံး၏ မြေအောက် အနက်ရှိုင်းဆုံးနေရာတွင် ဧရာမ ဝင်္ကပါကြီး တစ်ခုမှာ အလွန်အမင်း လျင်မြန်စွာ လည်ပတ်လာခဲ့ပြီး ဤဧရိယာရှိ စစ်ပွဲ အခြေအနေကို ချက်ချင်း ပြောင်းလဲပစ်လိုက်တော့သည်။

"ဂျွတ် ဂျွတ် ဂျွတ်!"

အရိုးများ ကျိုးပဲ့သွားသံကြီးများနှင့်အတူ မြေကြီးပေါ်တွင် ယခင်က ဝမ်ချောင်၏ ဝိညာဉ် ဖျက်ဆီးခြင်းကို ခံလိုက်ရပြီး မြေကြီးပေါ်တွင် လဲကျနေခဲ့ကြသော ဝတ်ရုံမည်းဝတ် အမြောက်အမြားမှာ လူတိုင်း၏ မျက်စိရှေ့မှာပင် အရိုးများကို လှုပ်ရှားလျက် တစ်ယောက်ပြီးတစ်ယောက် မြေကြီးပေါ်မှနေ၍ ရုတ်တရက် ထရပ်လာကြတော့သည်။

ဤမျှသာမက အလင်းတန်းများ တစ်ချက် လက်သွားပြီးနောက် သူတို့၏ ဘေးပတ်ဝန်းကျင်တွင် ဝတ်ရုံမည်းဝတ် အစွမ်းထက်သိုင်းပညာရှင် အယောက်ငါးဆယ်ကျော်ခန့် ထပ်မံ၍ ပေါ်ထွက်လာတော့သည်။ သူတို့ တစ်ယောက်စီတိုင်းမှာ အလွန်အမင်း ကြောက်မက်ဖွယ်ကောင်းလှသော အရှိန်အဝါများကို ပိုင်ဆိုင်ထားကြပြီး ယခင်ကထက် များစွာပို၍ကြီးမားလှသော အန္တရာယ်များကို ပေးစွမ်းနိုင်ပုံ ရပေသည်။

"ဖျက်ဆီးခြင်းရဲ့ သားတော် မင်းရဲ့စွမ်းရည်က အရမ်း အစွမ်းထက်တယ် ဆိုတာကို ငါတို့ သိပါတယ်။ ဒါပေမဲ့ ဒီလိုဝိညာဉ်မျိုးတွေကို ငါတို့ လက်ထဲမှာ သောင်းနဲ့ချီပြီး ရှိနေပါသေးတယ်။ မင်း သူတို့ရဲ့ ဝိညာဉ်တွေကို ဘယ်နှစ်ခါပဲ ဖျက်ဆီးပစ် ဖျက်ဆီးပစ် ငါတို့က သူတို့ကို အကြိမ်ကြိမ်အခါခါ ပြန်အသက်သွင်းပေးနိုင်တယ်"

"မင်းဆီမှာ ဘယ်လောက်တောင် အစွမ်းအစတွေ ရှိနေသေးလဲ ဆိုတာကို ငါ ကြည့်ချင်သေးတယ်"

ထိုအသံ နှစ်သံမှာ အေးစက်စက် လှောင်ပြောင်ရယ်မောလိုက်ပြီး လျင်မြန်စွာပင် နောက်တစ်ကြိမ် ထပ်မံ၍ ပျောက်ကွယ်သွားတော့သည်။

ဘေးပတ်ဝန်းကျင်ရှိ နောက်တစ်ကြိမ် ထပ်မံ၍ အသက်ပြန်ဝင်လာကြသော ဝတ်ရုံမည်းဝတ်များမှာ သားရဲကြီးများအလား ဆိုးရွားရက်စက်စွာ အော်ဟစ်လိုက်ကြပြီး သူတို့သုံးယောက်ကို နောက်တစ်ကြိမ် ထပ်မံ၍ အသေအချာ စိုက်ကြည့်လိုက်ကြတော့သည်။

တစ်ချိန်တည်းလိုလိုပင် ယခင်ကထက် များစွာ ပိုသိပ်သည်းလှသော တိုက်ခိုက်မှုများမှာ ကောင်းကင်နှင့်မြေကြီးကို ဖုံးလွှမ်းသွားခဲ့ပြီး သူတို့သုံးယောက်ဆီသို့ ရူးသွပ်စွာဖြင့် ပြေးဝင်လာကြတော့သည်။

ဝုန်း…

ဤဝတ်ရုံမည်းဝတ်များ၏ ပြင်းထန်လှသော တိုက်ခိုက်မှုများ အနီးသို့ မရောက်ရှိလာမီ အချိန်လေးအတွင်းမှာပင် ဝမ်ချောင်၏ညာဘက် လက်ချောင်း ငါးချောင်းမှာ ရုတ်တရက် ဖြန့်ကားသွားခဲ့ပြီး ဧရာမ စိတ်စွမ်းအင်ကြီးတစ်ခုမှာ ရုပ်ဝတ္ထုတစ်ခုအလား ရေလှိုင်းလေးများသဖွယ် အရပ်လေးမျက်နှာသို့ ရုတ်တရက် ပြန့်ကျက်သွားတော့သည်။

မျက်တောင်တစ်ခတ်မျှ အချိန်လေးအတွင်းမှာပင် ယခုလေးတင် အသက်ပြန်ဝင်လာကြသော ဝတ်ရုံမည်းဝတ်များမှာ နောက်တစ်ကြိမ် ထပ်မံ၍ လဲကျသွားကြပြန်သည်။ သို့သော် ဤအရာများ အားလုံးကို လုပ်ဆောင်ပြီးသွားသည့်တိုင်အောင် ဝမ်ချောင်မှာ အနည်းငယ်မျှ ရပ်တန့်သွားခြင်း လုံးဝမရှိခဲ့ပါချေ။

နောက်တစ်ခဏတွင် ဝမ်ချောင်မှာ ခြေထောက်ကို တစ်ချက် ဖိချလိုက်ရာ မှောင်မိုက်သော ရွှေရောင် ဟင်းလင်းပြင်နှင့် အချိန်၏ စက်ကွင်းတစ်ခုမှာ ရုတ်တရက် ပေါက်ကွဲထွက်ပေါ်လာတော့သည်။ တစ်ချိန်တည်းလိုလိုပင် ဂူကောင်းကင်အဆင့်သို့ ရောက်ရှိနေသော ဝမ်ချောင်၏ အလွန်အမင်း အစွမ်းထက်လှသည့် တိုက်ခိုက်မှုကြီးမှာ ဟင်းလင်းပြင်နှင့် အချိန်ကို ပြင်းထန်စွာ တုန်ခါသွားစေခဲ့ပြီး မြေအောက် အနက်ရှိုင်းဆုံးနေရာရှိ ထိုလျှို့ဝှက်ဆန်းကြယ်လှသော ဧရာမ ဝင်္ကပါကြီးဆီသို့ အပြင်းအထန် ပစ်ချလိုက်တော့သည်။

ဝမ်ချောင် ပေါက်ကွဲထွက်ပေါ်စေလိုက်သော ဂန်ချီစွမ်းအင်များ၏နောက်သို့ လိုက်ပါသွားပြီး ရှုပ်ထွေးလှသော ဟင်းလင်းပြင် ဖွဲ့စည်းပုံ အလွှာပေါင်းများစွာကို ဖြတ်သန်းသွားမည်ဆိုပါက သူတို့သုံးယောက်၏ခြေထောက်အောက်ရှိ မြေအောက် အနက်ရှိုင်းဆုံးနေရာတွင် ဧရာမ ဝင်္ကပါကြီးတစ်ခုမှာ ပြင်းထန်စွာ တုန်ခါလျက် အမည်မသိ စည်းမျဉ်းတစ်ခုအရ မြေကြီးပေါ်ရှိ ထိုဝတ်ရုံမည်းဝတ်များ၏ ကိုယ်တွင်းသို့ စွမ်းအားများကို အဆက်မပြတ် ပို့လွှတ်ပေးနေသည်ကို တွေ့ရှိရမည်ဖြစ်သည်။

၎င်းမှာ စွမ်းအင်သက်သက်သာ မဟုတ်ဘဲ ဖုံးကွယ်ထားသော ဝိညာဉ် စွမ်းအင်အချို့လည်း ပါဝင်နေသေးသည်။

အမှောင်ထဲတွင် ပုန်းအောင်းနေကြသော ထို ထိုက် မျိုးဆက်မှ အစွမ်းထက်သိုင်းပညာရှင် နှစ်ယောက်မှာ လုံးဝလိမ်ညာပြောဆိုနေခြင်း မဟုတ်ပါချေ။ နတ်ဘုရားအဖွဲ့အစည်းကြီးက ဤနေရာတွင် ချထားခဲ့သော ကာကွယ်ရေး နည်းလမ်းများမှာ လူတိုင်း တွေးတောမှန်းဆထားသည်ထက် များစွာပို၍အစွမ်းထက်နေသည်မှာ သေချာလှပေသည်။

ဝမ်ချောင်မှာ မြေကြီးပေါ်ရှိ ဟင်းလင်းပြင်နယ်မြေ အတွင်းမှ ဝတ်ရုံမည်းဝတ်များကို ယခုလေးတင် သတ်ဖြတ်ပြီးသွားသည့် အချိန်လေးအတွင်းမှာပင် ဝင်္ကပါကြီးမှာ ချက်ချင်း စတင်လည်ပတ်လာခဲ့ပြီး ထိုဝတ်ရုံမည်းဝတ်များကို ပြန်လည်အသက်သွင်းပေးရန် ပြင်ဆင်နေခဲ့ပြီ ပင်ဖြစ်သည်။

ဝမ်ချောင်၏ စွမ်းရည်မှာ မည်မျှပင် အစွမ်းထက်နေပါစေ… ဤကဲ့သို့ စိတ်စွမ်းအင်များကို အဆက်မပြတ် အသုံးပြုနေရခြင်းမှာ အလွန်အမင်း ကြီးမားလှသော ဝန်ထုပ်ဝန်ပိုးကြီး တစ်ခုပင်ဖြစ်သည်။ အကယ်၍ ဤအခြေအနေအတိုင်းသာ ဆက်လက်ဖြစ်ပေါ်နေမည်ဆိုပါက ဝမ်ချောင်မှာ နှင်းမုန်တိုင်းကြီး၏ မူလဇစ်မြစ်သို့ မရောက်ရှိမီ အချိန်လေးအတွင်းမှာပင် သူ၏စွမ်းအားများအားလုံးမှာ ခုနစ်ဆယ်၊ ရှစ်ဆယ်ရာခိုင်နှုန်းခန့်အထိ ကုန်ခမ်းသွားတော့မည်မှာ သေချာလှပေသည်။

"ဝုန်း"

နောက်တစ်ခဏတွင် အနည်းငယ်မျှ တွန့်ဆုတ်နေခြင်း လုံးဝမရှိပါချေ။ ဝမ်ချောင်၏ ခန္ဓာကိုယ်တစ်ခုလုံးရှိ ကြီးမားလှသော စွမ်းအားများမှာ အစွမ်းထက်လှသည့် ဟင်းလင်းပြင်နှင့်အချိန်၏စွမ်းအားများနှင့် ပေါင်းစပ်သွားခဲ့ပြီး မိုးကြိုးများ၊ လျှပ်စီးများအလား အလွန်အမင်း ပြင်းထန်သော အရှိန်အဟုန်ဖြင့် မြေအောက် အနက်ရှိုင်းဆုံးနေရာတွင် ပုန်းကွယ်နေသော ဝင်္ကပါကြီး၏အလယ်ဗဟိုချက်ဆီသို့ အပြင်းအထန် ဝင်ရောက် ရိုက်ခတ်သွားတော့သည်။

ယခုလက်ရှိ အချိန်တွင် ဝမ်ချောင်၏စွမ်းရည်မှာ အလွန်အမင်း ကြောက်မက်ဖွယ်ကောင်းလှပေသည်။ သူ အစွမ်းကုန် ပေါက်ကွဲထွက်ပေါ်စေလိုက်သော တိုက်ခိုက်မှုကြီးမှာ ကောင်းကင်နှင့် မြေကြီးကို ဖျက်ဆီးပစ်နိုင်ပြီး ဟင်းလင်းပြင်နှင့် အချိန်ကိုပင် ဆုတ်ဖြဲပစ်နိုင်လောက်သော စွမ်းအားများ အပြည့်အဝ ပါဝင်နေပြီ ပင်ဖြစ်သည်။

ဝမ်ချောင်အနေဖြင့် ဤဝင်္ကပါကြီး၏ အတိအကျ လည်ပတ်မှုပုံစံကို နားမလည်ဘူးဆိုသော်ငြားလည်း ဝင်္ကပါ ပညာရပ်တွင် သူ၏ကျွမ်းကျင်မှုအဆင့်နှင့်ဆိုပါက ဝင်္ကပါကြီး၏ အလယ်ဗဟိုချက် တည်ရှိရာ နေရာကို အကြမ်းဖျင်း ခန့်မှန်းနိုင်ရန်အတွက်မူ သေချာလှပေသည်။

"ဝုန်း…"

ကျယ်လောင်လှသော ပေါက်ကွဲသံကြီး တစ်ခုကိုသာ ကြားလိုက်ရပြီးနောက် ဧရာမ ကွဲအက်သံကြီး တစ်ခုနှင့်အတူ ဟင်းလင်းပြင်နှင့် အချိန်များ ပြင်းထန်စွာ တုန်ခါသွားခဲ့သည်။ တိုက်ခိုက်မှု တစ်ချက်တည်းဖြင့် ဝမ်ချောင်၏ဂန်ချီစွမ်းအင် အတွင်း၌ ပါဝင်နေသော ဟင်းလင်းပြင်နှင့် အချိန်ကို ဆုတ်ဖြဲပစ်နိုင်သည့် ဟင်းလင်းပြင် စည်းမျဉ်းစည်းကမ်းများမှာ ဤဧရာမဝင်္ကပါကြီးကို ရုတ်တရက် အပြင်းအထန် ဆုတ်ဖြဲပစ်လိုက်တော့သည်။

မြေကြီးပေါ်တွင် နောက်တစ်ကြိမ် ထပ်မံ၍ အသက်ပြန်ဝင်လာရန် ပြင်ဆင်နေကြသော ဝတ်ရုံမည်းဝတ်များမှာ သစ်တုံးကြီးများအလား မြေကြီးပေါ်သို့ ရုတ်တရက် လဲကျသွားကြတော့သည်။

"တကယ်ကို အစွမ်းထက်တာပဲ။ ဝင်္ကပါကြီးကိုတောင် ဖျက်ဆီးပစ်နိုင်တယ်။ ဒါပေမဲ့ ဒီနေရာမှာ ဧရာမ ပြန်လည်မွေးဖွားခြင်း ဝင်္ကပါပေါင်း လေးဆယ့်ကိုးခုတိတိ ရှိတယ်။ တစ်ခုတည်းကို ဖျက်ဆီးပစ်ရုံနဲ့တော့ လုံးဝလုံလောက်မှာ မဟုတ်ဘူး"

ထိုအချိန်မှာပင် ရင်းနှီးကျွမ်းဝင်နေသော အသံကြီးမှာ ဟင်းလင်းပြင်နယ်မြေအတွင်း၌ နောက်တစ်ကြိမ် ထပ်မံ၍ ပေါ်ထွက်လာပြန်သည်။ ထိုအသံကြီးနှင့်အတူ သူတို့သုံးယောက်၏ ခြေထောက်အောက်ရှိ မြေအောက် အနက်ရှိုင်းဆုံးနေရာမှနေ၍ အလွန်အမင်း ပြင်းထန်လှသော တုန်ခါမှုကြီးတစ်ခု ထပ်မံ၍ ထွက်ပေါ်လာပြန်သည်။

ဝမ်ချောင်အနေဖြင့် ပြန်လည်တုံ့ပြန်ရန် အချိန်ပင်မရလိုက်မီ ပို၍နက်ရှိုင်းသော ဟင်းလင်းပြင်နှင့်အချိန်၏အတွင်း၌ ဝမ်ချောင်၏ ဖျက်ဆီးခြင်းကို ပထမ ဝင်္ကပါကြီး ခံလိုက်ရပြီးနောက် ပို၍ကြီးမားကျယ်ပြန့်လှသော အခြားဝင်္ကပါကြီးတစ်ခုမှာ ရုတ်တရက် ထွက်ပေါ်လာခဲ့ပြီး မူလက ပထမ ဝင်္ကပါကြီး၏ နေရာကို လျင်မြန်စွာ အစားထိုး ဝင်ရောက်သွားတော့သည်။

ဤမြင်ကွင်းကို မြင်တွေ့လိုက်ရသည့်အခါ ဝမ်ချောင်ကိုယ်တိုင်ပင်လျှင် မျက်နှာအမူအရာ အနည်းငယ် ပြောင်းလဲသွားတော့သည်။

ဤဝတ်ရုံမည်းဝတ်များ ချန်ရစ်ထားခဲ့သော နည်းလမ်းများမှာ လူတိုင်း တွေးတောမှန်းဆထားသည်ထက် အဆပေါင်းများစွာ ပို၍ကြောက်မက်ဖွယ်ကောင်းနေသည်မှာ သေချာလှပေသည်။

အောင်ပွဲမရမီ အရေးနိမ့်မှုကို ဦးစွာ တွေးတောခြင်း။ ယခင်က ခေတ်ကာလ အဆက်ဆက်တွင် ထိုခေတ်ကာလများမှ အစွမ်းထက်သိုင်းပညာရှင်များမှာ ဤနေရာသို့ အဆက်မပြတ် ဝင်ရောက်လာခဲ့ကြသောကြောင့် နတ်ဘုရားအဖွဲ့အစည်းကြီးက ဤနှင်းမုန်တိုင်းကြီး၏ မူလဇစ်မြစ်တွင် လုပ်ဆောင်ထားခဲ့သော ကြိုတင်ပြင်ဆင်မှုများမှာ မည်သူတွေးတောမှန်းဆထားသည်ထက်မဆို အများကြီး ပို၍ ပြည့်စုံလုံလောက်နေမည်မှာ သေချာလှပေသည်။

"ဟွန့်၊ အဲဒီလောက်လည်း မလွယ်ကူပါဘူး"

သို့သော် မျက်တောင်တစ်ခတ်မျှ အချိန်လေးအတွင်းမှာပင် ဝမ်ချောင်မှာ လျင်မြန်စွာ သတိပြန်ဝင်လာတော့သည်။

မကောင်းဆိုးဝါးက တစ်တောင်မြင့်လျှင် တရားဓမ္မက တစ်လံမြင့်သည်။ နတ်ဘုရားအဖွဲ့အစည်းကြီး၏ စွမ်းရည်မှာ ကောင်းကင်ဘုံကိုပင် လွှမ်းမိုးနိုင်စွမ်းရှိသည်ဟု ဆိုနိုင်သော်ငြားလည်း သူတို့သည် ဝမ်ချောင်ကို အလွန်အမင်း အထင်သေးလွန်းနေကြပုံ ရပေသည်။

ဝုန်းခနဲမြည်သံကြီး တစ်ခုနှင့်အတူ ဝမ်ချောင်က လက်ကောက်ဝတ်ကို တစ်ချက် လှည့်လိုက်ရာ ကြီးမားလှသော ဂန်ချီစွမ်းအင်များမှာ ကိုယ်တွင်း၌ နောက်တစ်ကြိမ် ထပ်မံ၍ စုစည်းသွားတော့သည်။ ထို့နောက် မြေကြီးမှာ ပြင်းထန်စွာ တုန်ခါသွားခဲ့ပြီး ဤစွမ်းအားကြီးမှာ ခြောက်ပိုင်း ကွဲသွားကာ ဝမ်ချောင်၏ ကြီးမားလှသော စိတ်စွမ်းအင်များ၊ ဟင်းလင်းပြင်နှင့် အချိန်၏ စွမ်းအားများနှင့် ပေါင်းစပ်သွားပြီး မြေအောက်သို့ လျင်မြန်စွာ ဝင်ရောက်သွားတော့သည်။

အလင်းတန်းတစ်ချက် လက်သွားခဲ့ပြီး မြေအောက်ရှိ ဒုတိယမြောက် ဝင်္ကပါကြီး အပေါ်သို့ လျင်မြန်စွာ တက်လာပြီး ပုံသဏ္ဍာန် ဖြစ်ပေါ်တော့မည့် မျက်တောင်တစ်ခတ်မျှ အချိန်လေးအတွင်းမှာပင် ဝမ်ချောင်က ဟင်းလင်းပြင်နှင့် အချိန်၏ စွမ်းအားများ ပါဝင်နေသော ကြီးမားလှသည့် စွမ်းအားကြီးကို ရုတ်တရက် ပေါက်ကွဲထွက်ပေါ်စေလိုက်တော့သည်။ ထိုစွမ်းအားများမှာ လျင်မြန်စွာ ပြောင်းလဲသွားခဲ့ပြီး တစ်ခုနှင့်တစ်ခု အပြန်အလှန် ရစ်ပတ်သွားကာ မျက်တောင်တစ်ခတ်အတွင်းမှာပင် ဆဋ္ဌဂံပုံသဏ္ဍာန် ဟင်းလင်းပြင်နှင့် အချိန်၏ တားဆီးပိတ်ပင်မှု ဝင်္ကပါကြီး တစ်ခုအဖြစ်သို့ ပြောင်းလဲသွားပြီး မိုးကြိုးများ၊ လျှပ်စီးများအလား အလွန်အမင်း ပြင်းထန်သော အရှိန်အဟုန်ဖြင့် အောက်ဘက်သို့ အပြင်းအထန် ကျဆင်းသွားတော့သည်။

ဝုန်း… ဟင်းလင်းပြင်နှင့် အချိန်များ ပြင်းထန်စွာ တုန်ခါသွားခဲ့ပြီး ပုံသဏ္ဍာန် ဖြစ်ပေါ်ရန် နီးကပ်နေပြီဖြစ်သော ဒုတိယမြောက် ဧရာမ ပြန်လည်မွေးဖွားခြင်း ဝင်္ကပါကြီးမှာ ဤလွှမ်းမိုးမှုကြောင့် လေဟာနယ် အတွင်း၌ တစ်ချက် ရပ်တန့်သွားခဲ့ပြီး ချက်ချင်း ရပ်တန့်သွားတော့သည်။

"မင်း"

ဤရုတ်တရက် ဖြစ်ပေါ်လာသော မြင်ကွင်းကြီးကြောင့် အမှောင်ထဲတွင် ပုန်းအောင်းနေကြသော ထိုထိုက်မျိုးဆက်မှ အစွမ်းထက်သိုင်းပညာရှင် နှစ်ယောက်ပင်လျှင် မျက်နှာအမူအရာ ချက်ချင်း ပြောင်းလဲသွားကြတော့သည်။

ဝမ်ချောင်၏ စွမ်းရည်၊ ရဲရင့်မှုနှင့် နည်းလမ်းများမှာ သူတို့ တွေးတောမှန်းဆထားသည်ထက် များစွာပို၍အစွမ်းထက်နေတော့သည်။ သူသည် ဂန်ချီစွမ်းအင်များကို ဝင်္ကပါအဖြစ် ပြောင်းလဲကာ ဝင်္ကပါကို ဝင်္ကပါဖြင့် ပြန်လည် တိုက်ခိုက်သည့် နည်းလမ်းကို အသုံးပြု၍ မြေအောက်ရှိ ဝင်္ကပါများ၏ လည်ပတ်မှုကို လွှမ်းမိုးရန် တွေးတောနိုင်ခဲ့ခြင်းပင်ဖြစ်သည်။

ပို၍မယုံကြည်နိုင်ဖြစ်ရသည့်အရာမှာ ဝမ်ချောင်၏ ဤနည်းလမ်းမှာ အမှန်တကယ် အောင်မြင်သွားခဲ့ခြင်း ပင်ဖြစ်သည်။

ဤကဲ့သို့သော နည်းလမ်းမျိုးမှာ ထိုက်မျိုးဆက် မှ အစွမ်းထက်သိုင်းပညာရှင်များ အတွက်ပင်လျှင် အလွန်အမင်း ခက်ခဲလွန်းလှပြီး သီအိုရီအရသာ ဖြစ်နိုင်ခြေရှိသော နည်းလမ်းတစ်ခု သာလျှင် ဖြစ်ပေသည်။

ဤဖျက်ဆီးခြင်း၏ သားတော်မှာ သူတို့ တွေးတောမှန်းဆထားသည်ထက် များစွာပို၍ကိုင်တွယ်ဖြေရှင်းရန် ခက်ခဲလွန်းလှပေသည်။

******