အခန်း ၉၄၈

အခန်း(၉၄၈) သံယောဇဉ်ဖဲချပ်ကို ကစားခြင်း

"တကယ်ကို ယုတ်မာလွန်းတယ်... သူတို့အားလုံး တစ်ပါးကျွန်းသား မိစ္ဆာတွေရဲ့ လက်ချက်နဲ့ သေကုန်ကြရင် ပိုကောင်းမှာပဲ"

ခန်းမဆောင်အတွင်းရှိ လူတိုင်းသည် ဒေါသတကြီး ဖြစ်နေကြချေသည်။

ချင်ယွမ်ဖုန်းအနေဖြင့် သူတို့၏ စိတ်ခံစားချက်ကို နားလည်နိုင်ပေသည်။ သူတို့အားလုံးသည် ဂိုဏ်းအသီးသီးမှ လာကြသူများ ဖြစ်ကြပြီး ယခင်တိုက်ပွဲကြီးတွင် ဂိုဏ်းတစ်ခုချင်းစီမှ တပည့်များစွာ အကျအဆုံး များပြားခဲ့ပေရာ ယခုကဲ့သို့ ဒေါသထွက်ခြင်းမှာ မဆန်းလှပေ။

အချို့သော ဂိုဏ်းငယ်လေးများဆိုလျှင် တစ်ဂိုဏ်းလုံး နီးပါးပင် သုတ်သင်ရှင်းလင်းခံခဲ့ရသည်။ သို့ဖြစ်၍ လူများသည် တစ်ပါးကျွန်းသား မိစ္ဆာများနှင့် ပူးပေါင်းခဲ့သော ကမ္ဘာသစ်မဟာမိတ်အဖွဲ့ကို သဘာဝအတိုင်းပင် အထင်သေးရုံမက အာဃာတများပင် ထားရှိနေကြခြင်း ဖြစ်တန်ရာသည်။

ဤအရာအားလုံးမှာ နားလည်ပေး၍ ရနိုင်ပေသည်။ အကယ်၍ ကမ္ဘာသစ်မဟာမိတ်အဖွဲ့သည် နတ်မင်းစစ်သည်တော် မဟာမိတ်အဖွဲ့နှင့် အမှန်တကယ် ပူးပေါင်းသွားလျှင်ပင် နတ်မင်းစစ်သည်တော် မဟာမိတ်အဖွဲ့၏ မူလအဖွဲ့ဝင်များသည် ကမ္ဘာသစ်မဟာမိတ်အဖွဲ့ကို အထင်သေးနေကြဦးမည်ဖြစ်ပြီး ဖယ်ကြဉ်ထားကြဦးမည်သာ ဖြစ်သည်။

ယင်းတို့မှာ ကြိုတင်မြင်တွေ့နိုင်သော အကျိုးဆက်များပင် ချေသည်။

"ကဲ တော်ကြပါတော့... ဒီလိုအခြေအနေမျိုးမှာ အတိတ်ကကိစ္စတွေကို ပြန်ပြောနေလို့ ဘာထူးမှာလဲ... ငါတို့ အခုလုပ်ရမှာက ရှေ့ကိုပဲ ကြည့်ဖို့ပဲ" ဟု ကျောင်းအုပ်ကြီးကျွမ်ယွမ်က တည်ငြိမ်စွာ ပြောလိုက်သည်။

ကျောင်းအုပ်ကြီး၏ အသံကို ကြားလိုက်ရသောအခါ ခန်းမဆောင်တစ်ခုလုံး တိတ်ဆိတ်သွားသော်လည်း လူတိုင်း၏ မျက်နှာပေါ်တွင်မူ မကျေနပ်သည့် အရိပ်အယောင်များ ယှက်သန်းနေဆဲပင် ဖြစ်သည်။

ကျောင်းအုပ်ကြီးအနေဖြင့်လည်း တကယ့်ကို ဗျာများနေရချေပြီ။

"ကျောင်းအုပ်ကြီး... ကမ္ဘာသစ်မဟာမိတ်အဖွဲ့က ကျွန်တော်တို့နဲ့ အမှန်တကယ် ပူးပေါင်းချင်တာ သေချာလို့လား" ဟု ချင်ယွမ်ဖုန်းက မေးလိုက်သည်။

ကျောင်းအုပ်ကြီးက ခေါင်းခါယမ်းလိုက်ရင်း "ဒါကတော့ အခုထိ မရေရာသေးဘူး... ငါလည်း သူ့ကို သွားမတွေ့ရသေးဘူးလေ... ဒါပေမဲ့ အခုလို အခြေအနေမျိုးမှာတော့ သူတို့အတွက် ငါတို့နဲ့ ပူးပေါင်းတာကလွဲလို့ တခြားရွေးချယ်စရာ မရှိတော့ဘူး" ဟု ဆိုသည်။

ကမ္ဘာသစ်မဟာမိတ်အဖွဲ့သည် ယခုအခါ ကြားညပ်နေပြီး အကျပ်ရိုက်နေသည့် အခြေအနေသို့ ဆိုက်ရောက်နေပေရာ အချို့သော သိုင်းပညာရှင်များသည် ပင်လယ်ပြင်သို့ပင် ထွက်ပြေးတိမ်းရှောင်နေကြပြီ ဖြစ်သည်။

ထိုသို့ ပြုလုပ်ခြင်းက သူတို့ကို တိုက်ကြီးပေါ်က အရေးအခင်းများမှ ယာယီတိမ်းရှောင်ခွင့် ရစေမည်ဖြစ်သော်လည်း တစ်ပါးကျွန်းသား မိစ္ဆာများသာ အောင်မြင်သွားပါက မည်သို့ပင်ဖြစ်စေ သူတို့လည်း လွတ်မြောက်နိုင်မည် မဟုတ်ပေ။

"အကယ်၍ သူတို့သာ အမှန်တကယ် ပူးပေါင်းနိုင်မယ်ဆိုရင် ကျွန်တော်တို့ရဲ့ အင်အားကို ပိုတောင့်တင်းစေမှာပါ" ဟု ချင်ယွမ်ဖုန်းက တည်ငြိမ်စွာ ပြောလိုက်သည်။

သို့သော်လည်း အဓိကခန်းမဆောင်အတွင်းရှိ အကြီးအကဲများနှင့် ဂိုဏ်းချုပ်များသည် ထိုစကားကို ဂရုမစိုက်ကြဘဲ သူတို့၏ မျက်ဝန်းများထဲတွင် အထင်မြင်သေးမှုများဖြင့် ပြည့်နှက်နေသည်မှာ ထင်ရှားလှပေသည်။

"ဒါပေမဲ့ ဒါက မြူနှင်းဂိုဏ်းနဲ့ တစ်ပါးကျွန်းသား မိစ္ဆာတွေ ပူးပေါင်းပြီး ထောင်ထားတဲ့ ထောက်ချောက်လည်း ဖြစ်နိုင်တယ်... သူတို့က ပူးပေါင်းချင်ယောင်ဆောင်ပြီး ကျွန်တော်တို့ကို အထဲဝင်ခိုင်းမယ်ဆိုရင် အစီအရင်ကြီးကို ဖွင့်ပေးရမှာပဲ... အဲဒီအချိန်ကျရင် တစ်ပါးကျွန်းသား မိစ္ဆာတွေက အခွင့်ကောင်းယူပြီး ကျွန်တော်တို့ကို တိုက်ခိုက်လာနိုင်တယ်" ဟု ချင်ယွမ်ဖုန်းက ဆက်လက်၍ သုံးသပ်ပြလိုက်သည်။

"ဟုတ်တယ်... အဲဒါပဲ ဖြစ်ရမယ်... ကမ္ဘာသစ်မဟာမိတ်အဖွဲ့ကတော့ တကယ့်ကို မရိုးသားဘူး" ဟု အကြီးအကဲတစ်ဦးက ပြတ်သားစွာ ပြောဆိုလိုက်သည်။

ကျောင်းအုပ်ကြီးက ခါးသက်သက် ပြုံးလိုက်ရင်း ခေါင်းခါယမ်းကာ "အဲဒီအချက်ကိုလည်း ငါစဉ်းစားပြီးသားပါ... ဒါကြောင့်မို့လို့ ကျိုတိုကို ကိုယ်တိုင်သွားတွေ့ဖို့ ဆုံးဖြတ်လိုက်တာ... ဘာပဲဖြစ်ဖြစ် ငါတို့သာ အမှန်တကယ် ပူးပေါင်းနိုင်ရင် ပြန်လည်တိုက်ခိုက်ဖို့ အခွင့်အရေး ရှိနေဦးမှာပဲ" ဟု ပြောသည်။

ထိုအခါ လူတိုင်း တိတ်ဆိတ်သွားကြပေသည်။

"အားလုံးပဲ စိတ်အေးအေးထားကြပါ... မင်းတို့အားလုံး အထိနာခဲ့ကြတယ်ဆိုတာ ငါသိပါတယ်... ဒါပေမဲ့ ဒီလိုအရေးကြီးတဲ့ အချိန်မှာတော့ ဒီလိုအာဃာတတွေကို ခဏဘေးဖယ်ထားလိုက်ကြပါဦး... အခု ငါတို့ရဲ့ ရန်သူက တစ်ပါးကျွန်းသား မိစ္ဆာတွေပဲ ဖြစ်တယ်"

"ကမ္ဘာသစ်မဟာမိတ်အဖွဲ့ပဲဖြစ်ဖြစ်၊ နတ်မင်းစစ်သည်တော် မဟာမိတ်အဖွဲ့ပဲဖြစ်ဖြစ် အားလုံးက လူသားတွေချည်းပဲ... တစ်ဖက်ဖက် ပျက်စီးသွားရင် တခြားတစ်ဖက်အတွက်လည်း ဘာမှကောင်းမှာ မဟုတ်ဘူး... နှုတ်ခမ်းမရှိရင် သွားတွေ ချမ်းရတတ်တယ်ဆိုတဲ့ သဘောတရားကို မင်းတို့အားလုံး နားလည်ကြမှာပါ"

ကျောင်းအုပ်ကြီးက ထိုသို့ ပြောကြားပြီးနောက် စိတ်လှုပ်ရှားနေသူများအားလုံး ငြိမ်သက်သွားကြချေသည်။ ယခုအချိန်တွင် သူတို့၏ အင်အားကို တိုးတက်စေနိုင်မည့် နည်းလမ်းမှန်သမျှကို မမည်သို့ပင်ဖြစ်စေ စမ်းသပ်ကြည့်ရမည်သာ ဖြစ်သည်။

အကယ်၍ အစီအရင်ကြီးသာ ပျက်စီးသွားပါက သူတို့သည် ရက်စက်ကြမ်းကြုတ်သော တစ်ပါးကျွန်းသား မိစ္ဆာများနှင့် ထိပ်တိုက်ရင်ဆိုင်ရမည် ဖြစ်ပေသည်။

"ဒါဆိုရင်တော့ ကျွန်တော်လည်း ကျောင်းအုပ်ကြီးနဲ့အတူ လိုက်ခဲ့ပြီး သူတို့ ဘာကြံစည်နေလဲဆိုတာ သွားကြည့်ပါ့မယ်" ဟု ချင်ယွမ်ဖုန်းက ပြောလိုက်သည်။

ကျောင်းအုပ်ကြီးက ခေါင်းညိတ်ကာ အချို့သောအမိန့်များကို မှာကြားပြီးနောက် ချင်ယွမ်ဖုန်းကို နေရာပြောင်းအစီအရင်ရှိရာသို့ ခေါ်ဆောင်သွားခဲ့သည်။ လျှပ်ခနဲ အလင်းတန်းတစ်ခုနှင့်အတူ သူတို့နှစ်ဦးသည် ချီဖုန်းချောက်ကမ္ဘာသို့ ရောက်ရှိသွားကြချေသည်။

---

ထန်ဂူဒေသသည် ယခုအခါ ကမ္ဘာသစ်မဟာမိတ်အဖွဲ့၏ လက်အောက်သို့ ရောက်ရှိနေပြီဖြစ်ရာ လူသားများသည် ချီဖုန်းချောက်ကမ္ဘာတွင်သာ အစီအရင်ကြီးကို တည်ဆောက်ထားနိုင်ပေသည်။

မျှော်လင့်ထားသည့်အတိုင်းပင် ကျိုတိုသည် အစီအရင်၏ အပြင်ဘက်တွင် စောင့်ဆိုင်းနေချေသည်။ ကျောင်းအုပ်ကြီး ရောက်ရှိလာသည်ကို မြင်လိုက်ရသောအခါ သူ၏ မျက်နှာပေါ်တွင် ဝမ်းမြောက်ဝမ်းသာ ဖြစ်သွားသည့် အရိပ်အယောင်များ ပေါ်လွင်လာခဲ့သည်။

"မဟာမိတ်ခေါင်းဆောင်ကြီး..." ဟု ကျိုတိုက ကျောင်းအုပ်ကြီးကို ဦးညွှတ် ဂါရဝပြုရင်း နှုတ်ဆက်လိုက်သည်။

အစီအရင်ကြီးက သူတို့နှစ်ဦးကို ခြားနားထားပြီး ဘေးပတ်ဝန်းကျင်ရှိ လူအားလုံးမှာလည်း ဝေးရာသို့ ဆုတ်ခွာသွားကြပြီ ဖြစ်သည်။

"ကျိုတို... စကားတွေကို လှည့်ပတ်မပြောနဲ့တော့... မင်းတို့ အဓိက ဘာလိုချင်တာလဲ" ဟု ကျောင်းအုပ်ကြီးက မေးလိုက်သည်။

ကျိုတိုက ခါးသက်သက် ပြုံးလိုက်ရင်း "မဟာမိတ်ခေါင်းဆောင်ကြီး... ဒါက ငါတို့ ဘာလိုချင်လဲဆိုတဲ့ ကိစ္စမဟုတ်ပါဘူး... တကယ်တော့ တစ်ပါးကျွန်းသား မိစ္ဆာတွေက ငါတို့ကို အသုံးချပြီးတာနဲ့ စွန့်ပစ်ဖို့ ပြင်နေလို့ပါ... ဒါကြောင့်မို့လို့ ငါတို့လည်း တခြားနည်းလမ်းမရှိဘဲ မဟာမိတ်ခေါင်းဆောင်ကြီးတို့နဲ့ လာပြီး ပူးပေါင်းရတာပါ" ဟု ဆိုသည်။

"အော်... ဒါကြောင့်ကိုး... ငါကတော့ မင်းတို့ စိတ်ပြောင်းသွားပြီ ထင်နေတာ... မင်းတို့ကြောင့်ပဲ မရေမတွက်နိုင်တဲ့ သာမန်လူတွေနဲ့ သိုင်းပညာရှင်တွေ သေဆုံးခဲ့ရပြီ... မင်းတို့ရဲ့ စိတ်နှလုံးတွေကို ဘာတွေနဲ့ လုပ်ထားလဲဆိုတာ ငါတကယ်ပဲ မသိတော့ဘူး" ဟု ကျောင်းအုပ်ကြီးက အေးစက်စွာ ပြောဆိုလိုက်သည်။

အကယ်၍ ကမ္ဘာသစ်မဟာမိတ်အဖွဲ့သာ ရှန်းဝူစကြဝဠာတိုက်ကြီး၏ နယ်မြေများကို လွှဲပြောင်းမပေးခဲ့ပါက သတ်ဖြတ်ခြင်း ခံခဲ့ရသော ထိုနေရာများသည် ယခုကဲ့သို့သော ကပ်ဘေးဆိုးကြီးနှင့် ကြုံတွေ့ရမည် မဟုတ်ပေ။

ကျိုတို၏ မျက်နှာသည် နီမြန်းသွားရာမှ ဖြူလျော်သွားပြီး အနည်းငယ် တုန်လှုပ်သွားဟန် တူသော်လည်း နောက်ဆုံးတွင်မူ ကျောင်းအုပ်ကြီးကို ရင်ဆိုင်ရန် သတ္တိမွေးလိုက်ပေသည်။

" အရင်က လူမိုက်လုပ်ခဲ့မိတာကို သိပါတယ်... ဒါပေမဲ့ အခုအချိန်မှာတော့ အာဃာတတွေကို ဘေးဖယ်ထားပြီး တစ်ပါးကျွန်းသား မိစ္ဆာတွေကို တိုက်ထုတ်ဖို့ လက်တွဲသင့်တယ် မဟုတ်ဘူးလား"

ကျောင်းအုပ်ကြီးက ခေါင်းညိတ်ပြကာ "မင်းပြောတာ မှန်ပါတယ်... ဒါပေမဲ့ မင်းတို့ရဲ့ စိတ်ရင်းအမှန်ကို ငါတို့ ဘယ်လိုယုံရမလဲ... ဒါက ထောက်ချောက်တစ်ခု မဟုတ်ဘူးလို့ ဘယ်သူ အာမခံနိုင်မှာလဲ" ဟု ဆိုသည်။

ကျိုတိုက သက်ပြင်းချလိုက်ရင်း "မဟာမိတ်ခေါင်းဆောင်ကြီးလည်း သတင်းရရှိပြီးသား ဖြစ်မှာပါ... မိစ္ဆာတပ်မတော်က ထန်ဂူဒေသဆီကို ဦးတည်ရွေ့လျားနေပြီလေ... အဲဒီကောင်တွေက ငါတို့ကို ကူညီဖို့ လာနေတာလို့ မဟာမိတ်ခေါင်းဆောင်ကြီး ထင်နေလို့လား" ဟု မေးသည်။

"အဲလိုတော့ မဖြစ်နိုင်ဘူး" ဟု ကျောင်းအုပ်ကြီးက ခေါင်းညိတ်လိုက်ပြီး "ဒါပေမဲ့ ငါတို့က မင်းတို့ကို အခုထိ မယုံကြည်နိုင်သေးဘူး... ဘာပဲဖြစ်ဖြစ် မင်းတို့က ငါတို့ကို တစ်ကြိမ် သစ္စာဖောက်ဖူးတယ်လေ" ဟု ပြောသည်။

"ဒါတင်နဲ့ မင်းတို့ကို ယုံကြည်အောင် လုပ်ဖို့မလုံလောက်ဘူးဆိုတာ သိပါတယ်... ဒါပေမဲ့ တစ်ပါးကျွန်းသား မိစ္ဆာတွေနဲ့ ပူးပေါင်းဖို့ သဘောတူခဲ့တုန်းက နတ်ဆိုးဘုရင်ရဲ့ ကိုယ်ထဲမှာ မျိုးစေ့တစ်ခု ချန်ထားခဲ့တယ်... ငါသာ လျှို့ဝှက်ပညာရပ်ကို အသုံးပြုလိုက်ရင် နတ်ဆိုးဘုရင်ကို ပြင်းထန်တဲ့ ဒဏ်ရာရအောင် လုပ်နိုင်တယ်" ဟု ကျိုတိုက လေးနက်စွာ ပြောလိုက်သည်။

ထိုစဉ် ချင်ယွမ်ဖုန်းက လှမ်းလာပြီး "မဖြစ်နိုင်တာ... ကျွန်တော် နတ်ဆိုးဘုရင်နဲ့ ထိတွေ့ဖူးတယ်... သူက အကွက်အကွင်း အလွန်စေ့စပ်တဲ့သူပဲ... မင်းမှာ သူ့ကို ထိန်းချုပ်နိုင်မယ့် နည်းလမ်းမျိုး ရှိနိုင်ပါ့မလား" ဟု ဆိုလိုက်သည်။

"ငါ့မှာလည်း သံသယရှိခဲ့ပါတယ်... ဒါပေမဲ့ သူက အဲဒီမျိုးစေ့ရဲ့ တန်ပြန်သက်ရောက်မှုကို တကယ်ပဲ ခုခံနိုင်မယ်လို့ ထင်နေတာ ထင်တယ်" ဟု ကျိုတိုက အေးစက်စွာ ပြောဆိုကာ ထိုမျိုးစေ့၏ မြစ်ဖျားခံရာကို ရှင်းပြလိုက်ပေသည်။

ထိုအကြောင်းအရာကြောင့် ချင်ယွမ်ဖုန်းနှင့် ကျောင်းအုပ်ကြီးကျွမ်ယွမ်တို့ နှစ်ဦးစလုံး မျက်မှောင်ကြုတ်သွားကြချေသည်။

အတန်ကြာ တိတ်ဆိတ်သွားပြီးနောက် ကျောင်းအုပ်ကြီးက ခက်ခဲသော ဆုံးဖြတ်ချက်တစ်ခုကို ချမှတ်လိုက်ပေသည် "ကောင်းပြီ... ငါ မင်းကို ယုံကြည်ပေးမယ်... ဒါပေမဲ့ ကမ္ဘာသစ်မဟာမိတ်အဖွဲ့က အစီအရင်ထဲကို ဝင်လာတာနဲ့ နတ်မင်းစစ်သည်တော် မဟာမိတ်အဖွဲ့ရဲ့ စီစဉ်ညွှန်ကြားမှုတွေကို လုံးဝနာခံရမယ်"

"စိတ်ချပါ... သူတို့ရဲ့ ကိုယ်ပိုင်အသက်တွေအတွက်တော့ ဘယ်သူမှ ဖီဆန်ဝံ့ကြမှာ မဟုတ်ပါဘူး" ဟု ကျိုတိုက သက်ပြင်းချရင်း အားကိုးရာမဲ့စွာ ပြောရှာသည်။

အကယ်၍ သူတို့၏ ကမ္ဘာသစ်မဟာမိတ်အဖွဲ့သာ ယခုကဲ့သို့ အကျပ်ရိုက်မနေပါက သူသည်လည်း ဤကဲ့သို့ ပြုလုပ်မည် မဟုတ်ပေ။

"ဒါဆိုရင်တော့ ပြန်သွားပြီး ကမ္ဘာသစ်မဟာမိတ်အဖွဲ့က လူအားလုံးကို စုစည်းလိုက်ပါ... သုံးရက်ကြာရင် ဒီနေရာကို ပြန်လာခဲ့... ငါ ဒီက အစီအရင်ကို ဖွင့်ပြီး မင်းတို့ကို အထဲပေးဝင်မယ်" ဟု ကျောင်းအုပ်ကြီးက အေးစက်စွာ ပြောလိုက်သည်။

ကျိုတိုက လက်အုပ်ချီ ဂါရဝပြုလိုက်ရင်း "တကယ်ပဲ ကျေးဇူးတင်ပါတယ်... ငါနဲ့ ယွင်ယူတို့လည်း တစ်ပါးကျွန်းသား မိစ္ဆာတွေကို တိုက်ထုတ်ဖို့ အစွမ်းကုန် ကြိုးစားသွားမှာပါ" ဟု ဆိုသည်။

ယွင်ယူသည် ကမ္ဘာသစ်မဟာမိတ်အဖွဲ့သို့ ပူးပေါင်းခဲ့သော ထိုနတ်ဘုရားတစ်ပိုင်းအဆင့် မိစ္ဆာသားရဲ ဖြစ်ပြီး တစ်စုံတစ်ခုသော အကြောင်းပြချက်ကြောင့် ကျိုတို၏ ဖျောင်းဖျမှုကို ခံခဲ့ရခြင်း ဖြစ်တန်ရာသည်။

"ဒါနဲ့... မင်းတို့ ပြန်ရောက်တာနဲ့ ကမ္ဘာသစ်မဟာမိတ်အဖွဲ့ထဲမှာရှိတဲ့ သူလျှိုတွေနဲ့ တစ်ပါးကျွန်းသား မိစ္ဆာတွေကို အရင်ဆုံး စုံစမ်းစစ်ဆေးလိုက်ဦး... သူတို့သာ အစီအရင်ကြီးထဲ ဝင်လာရင် ငါတို့က သေချာစစ်ဆေးရမှာ ဖြစ်ပြီး ဘယ်လိုဟာကွက်မျိုးကိုမှ အခွင့်ကောင်း အယူခံလို့ မဖြစ်ဘူး" ဟု ကျောင်းအုပ်ကြီးက အေးစက်စွာ သတိပေးလိုက်သည်။

ကျိုတိုက ခေါင်းညိတ်ပြကာ "ဒါပေါ့... ငါ အခုပဲ ပြန်ပါ့မယ်... သုံးရက်ကြာရင် ဒီနေရာမှာ ပြန်တွေ့ကြတာပေါ့" ဟု ဆိုလေသည်။