အခန်း ၃၃၇

အပိုင်း ၃၃၇

မကြာမီမှာပင် လူလေးဦးသား ဓာတ်ခွဲခန်းထဲသို့ ဝင်ရောက်လာခဲ့ကြသည်။

​ဓာတ်ခွဲခန်းအတွင်း၌မူ ပြီးခဲ့သည့်အကြိမ်က ဒုံးဖန်ရန် လာရောက်စဉ်ကအတိုင်းပင် ရှိနေသည်။ အထင်ရှားဆုံးနေရာတွင် ရှိနေသော ရာသီဥတုစောင့်ကြည့်ကိရိယာနှင့် ရိုဘော့အချို့မှလွဲ၍ အခြားမည်သည့်အရာကိုမျှ အပြင်ထုတ်ပြမထားချေ။

​ယန်လိကျွဲသည် ရာသီဥတုစောင့်ကြည့်ကိရိယာကို မြင်လိုက်ရသောအခါ သတိကြီးစွာဖြင့် အနားသို့ လျှောက်လှမ်းသွားခဲ့သည်။ သူသည် စက်ပစ္စည်းကို လက်ဖြင့် တိုက်ရိုက်မကိုင်တွယ်ဘဲ ၎င်း၏ဘေးပတ်ပတ်လည်မှနေ၍ သေသေချာချာ စေ့စေ့စပ်စပ် ကြည့်ရှုလေ့လာနေခဲ့သည်။

​လင်းဖန်ကလည်း သူ့ကို ဝင်ရောက်မနှောင့်ယှက်ခဲ့ချေ။ အဘယ်ကြောင့်ဆိုသော် ဤရာသီဥတုစောင့်ကြည့်ကိရိယာကို အပြင်ပန်းကြည့်ရုံမျှဖြင့် မည်သည့်အကြောင်းရင်းကိုမျှ ရှာဖွေတွေ့ရှိနိုင်မည်မဟုတ်သောကြောင့် ဖြစ်သည်။

​"လွန်ခဲ့တဲ့ အနှစ်လေးဆယ်ကျော်က ဖြစ်ပွားခဲ့တဲ့ ဆူနာမီဘေးဆိုးကြီးက သူ့ရဲ့ မိသားစုဝင်တွေကို အကုန်သယ်ဆောင်သွားခဲ့တာလေ။ အဲဒီအချိန်ကစပြီး ဆရာကြီးယန်က သဘာဝဘေးအန္တရာယ်ကယ်ဆယ်ရေး ကိရိယာတွေ သုတေသနပြုလုပ်ဖို့ စိတ်အားထက်သန်ခဲ့တာ၊ ဒီလိုစက်ပစ္စည်းတွေအပေါ် သူက စိတ်စွဲလမ်းမှုတစ်ခုလို ဖြစ်နေတာ။ သူ့ရဲ့နာမည်ကိုလည်း အဲဒီရာသီဥတုဖြစ်စဉ်ကို အစွဲပြုပြီး ယန်လိကျွဲလို့ ပြောင်းလဲခဲ့တာလေ။" ဒုံးဖန်ရန်က လင်းဖန်၏ နားနားသို့ တိုးတိုးလေး ကပ်ပြောလိုက်သည်။

​ထိုစကားကို ကြားလိုက်ရသောအခါ လင်းဖန်၏ စိတ်ထဲတွင် လေးစားကြည်ညိုစိတ်များ ဖြစ်ပေါ်လာခဲ့သည်။ နယ်ပယ်တစ်ခုတည်းတွင် ဆယ်စုနှစ်ပေါင်းများစွာ အာရုံစိုက်လုပ်ကိုင်လာခဲ့သည့် ဝါရင့်သိပ္ပံပညာရှင်ကြီးများ၏ စိတ်အားထက်သန်စွာ ကြိုးပမ်းအားထုတ်မှုများကြောင့်သာ သူတို့၏ လက်ရှိတည်ငြိမ်အေးချမ်းသော လူနေမှုဘဝကို ရရှိနေခြင်း မဟုတ်ပါလော။

​လင်းဖန်က "လှိုင်းနှုန်းစမ်းသပ်ချက်တွေကိုတော့ ရိုးရိုးရှင်းရှင်း ပုံတူစမ်းသပ်မှုအနေနဲ့ လုပ်ဆောင်ပြီးပါပြီ၊ စက်ပစ္စည်းကလည်း ပုံမှန်လည်ပတ်နိုင်ပါတယ်။ အခု ကျွန်တော်တို့ လက်တွေ့ကွင်းဆင်းစမ်းသပ်ဖို့ ပြင်ဆင်နေတာပါ။ ကုန်းပြင်မြင့်ပေါ်မှာ စမ်းသပ်စခန်းအချို့ တည်ဆောက်ပြီး စက်အချို့ကိုလည်း ကုန်းမြေနဲ့ ပင်လယ်ရေပြင် နှစ်ဖက်စလုံးရဲ့ ပတ်ဝန်းကျင်မှာ တစ်ပြိုင်နက်တည်း စမ်းသပ်သွားမှာပါ၊ ဒါမှ အချိန်ကုန်သက်သာမှာ" ဟု ဆိုသည်။

​သူက ဆက်လက်၍ "ကုန်ကျစရိတ်ကတော့ ပြဿနာမဟုတ်ပါဘူး။ စမ်းသပ်မှုတွေကို အမြန်ဆုံး အဆုံးသတ်နိုင်ပြီး တကယ်ပဲ အလုပ်ဖြစ်တယ်ဆိုရင် အမြန်ဆုံး အသုံးပြုနိုင်အောင် လုပ်ရမှာပါ။ ဒါက လူအများကြီးအတွက် သတင်းကောင်း ဖြစ်လာလိမ့်မယ်" ဟု ပြောလိုက်သည်။

​"အင်း..." ယန်လိကျွဲက လင်းဖန်ကို လေးစားသောမျက်လုံးများဖြင့် ကြည့်လိုက်ပြီးနောက် ရာသီဥတုစောင့်ကြည့်ကိရိယာဆီသို့ အကြည့်ပြန်လွှဲကာ စကားတစ်ခွန်းကို ပြောရန် တုံ့ဆိုင်းနေခဲ့သည်။

​လင်းဖန်က ရိပ်မိသဖြင့် "ဆရာကြီးယန်... ပြောစရာရှိတာကို ပွင့်ပွင့်လင်းလင်းသာ မိန့်ပါခင်ဗျာ" ဟု ဆိုသည်။

​ယန်လိကျွဲက တုံ့ဆိုင်းတုံ့ဆိုင်းဖြင့် "ဒီစက်က တကယ်ပဲ အလုပ်လုပ်၊ မလုပ်ဆိုတာကို ငါ အခုထိတော့ အသေအချာ မပြောနိုင်သေးဘူး။ ဒါပေမဲ့ တကယ်လို့ အလုပ်ဖြစ်ခဲ့ရင် အဲဒီကရတဲ့ အချက်အလက်တွေကို ငါ့ကို မိတ္တူတစ်စောင်လောက် ပေးလို့ရမလား" ဟု မေးလိုက်သည်။

​လင်းဖန်က ပြုံးလျက် "ရတာပေါ့ခင်ဗျာ၊ ဒီလောက်ကြီးမားတဲ့ ကိစ္စကြီးကို ကျွန်တော်တစ်ယောက်တည်း လုပ်လို့မရပါဘူး။ ကျွန်တော်လည်း ကျင်းလင်တက္ကသိုလ်နဲ့ ပူးပေါင်းဖို့ စီစဉ်ထားတာမို့ ဆရာကြီးတို့ဘက်က ပါဝင်ကူညီပေးမယ်ဆိုရင် ပိုပြီးတော့ ဝမ်းမြောက်မိမှာပါ" ဟု ဆိုလိုက်သည်။

​သူ့အနေဖြင့် လက်ရှိတွင် ဤနယ်ပယ်၌ ထိန်းသိမ်းစောင့်ရှောက်ရေးပိုင်းဆိုင်ရာ လုပ်သားအင်အား လိုအပ်နေသည်။ ယန်လိကျွဲသည် ဆယ်စုနှစ်ပေါင်းများစွာ လုပ်ကိုင်လာခဲ့သည့် ဝါရင့်ပညာရှင်ကြီးတစ်ဦးဖြစ်ရာ သူ၏လက်အောက်တွင် တပည့်ကျောင်းသားများစွာ ရှိနေမည်မှာ အသေအချာပင်။ ထို့အပြင် သူ၏အဆက်အသွယ်များနှင့် အရင်းအမြစ်များက ပြဿနာများစွာကို လျော့ပါးသက်သာစေနိုင်သည်။ လင်းဖန်အနေဖြင့် စက်မှရရှိသော အချက်အလက်များကို ပေးရန်မှာ အလွန်လွယ်ကူလှပြီး ၎င်းမှာ စက်ပစ္စည်းထုတ်လုပ်ရေး နည်းပညာလည်း မဟုတ်ချေ။

​လင်းဖန်၏ ကတိစကားကို ရရှိပြီးနောက် ယန်လိကျွဲ၏ မျက်နှာတွင် အပြုံးများ ပေါ်ထွက်လာခဲ့သည်။

​သူသည် ဤစက်ပစ္စည်းအပေါ် မျှော်လင့်ချက်အများကြီး မထားသော်လည်း တစ်သောင်းပုံတစ်ပုံမျှသာ ရှိသော ဖြစ်နိုင်ခြေကိုပင် ဆုပ်ကိုင်ထားလိုခြင်း ဖြစ်သည်။ အကယ်၍သာ အမှန်တကယ် ဖြစ်လာခဲ့လျှင် ဤရာသီဥတုစောင့်ကြည့်ကိရိယာသည် သူ၏ တစ်သက်တာလုံး အိပ်မက်ကို ဖြည့်ဆည်းပေးနိုင်လိမ့်မည် ဖြစ်သည်။

​ကိစ္စရပ်များအားလုံးမှာ အလွန်ပင် ချောမွေ့နေခဲ့သည်။ ယန်လိကျွဲသည် လင်းဖန်၏ ဤစမ်းသပ်မှုအတွက် အစွမ်းကုန် ကူညီပေးရန် ဆုံးဖြတ်လိုက်သည်။ အတည်ပြုချက် ရရှိပြီးနောက် လင်းဖန်အတွက် နောက်ထပ်လုပ်ဆောင်ရမည့်အရာမှာ ရာသီဥတုစောင့်ကြည့်ကိရိယာကို ပင်လယ်ရေအောက်၌ ထားရှိနိုင်ရန်အတွက် မွမ်းမံပြင်ဆင်ရန်သာ ကျန်တော့သည်။

​ရာသီဥတုစောင့်ကြည့်ကိရိယာ၏ ဖွဲ့စည်းပုံကို ပြောင်းလဲရန်မှာ ခက်ခဲသော ပြဿနာတစ်ခု ဖြစ်သော်လည်း ကံကောင်းထောက်မစွာဖြင့် ရှုံ့တာ ရှိနေသဖြင့် ပြဿနာမှာ များစွာလျော့ပါးသွားခဲ့သည်။

​လှိုင်းတိုများသည် ရေအောက်တွင် အားနည်းပျက်ပြယ်သွားရန် လွယ်ကူလှသည်။ ထို့ကြောင့် ပင်လယ်ရေအောက်ကြမ်းပြင်မှ အချက်ပြလှိုင်း ပေးပို့လိုပါက အလွန်ရှည်လျားသော လှိုင်းနှုန်း (Ultra-long wave) သို့မဟုတ် အလွန်အမင်း ရှည်လျားသော လှိုင်းနှုန်း (Extremely long wave) ဆက်သွယ်ရေးစနစ်ကို အသုံးပြုရမည်ဖြစ်ပြီး ၎င်းမှာ ရေအောက်ရာသီဥတုစောင့်ကြည့်ကိရိယာအတွက် အချက်ပြလှိုင်း ပြောင်းလဲခြင်း၏ ဦးတည်ချက်ပင် ဖြစ်သည်။

​ပင်လယ်ရေအောက် ရေဖိအားပြဿနာအတွက်မူ ရာသီဥတုစောင့်ကြည့်ကိရိယာ၏ ဖွဲ့စည်းပုံကို ပင်လယ်ရေအောက်ရှိ ပြင်းထန်သော ရေဖိအားဒဏ်ကို ခံနိုင်ရည်ရှိစေရန် မုချ ပြောင်းလဲရမည်ဖြစ်သည်။ မဟုတ်ပါက ဤကဲ့သို့ ကြောက်မက်ဖွယ်ကောင်းသော ရေဖိအားအောက်တွင် စက်ပစ္စည်းသည် ပုံမှန်လည်ပတ်နိုင်ပါ့မလားဆိုသည်မှာ ကြီးမားသော ပြဿနာတစ်ခု ဖြစ်လာပေလိမ့်မည်။

​ရှုံ့တာက စက်၏ ဖွဲ့စည်းပုံပိုင်းဆိုင်ရာ အကောင်းဆုံးဖြစ်အောင် ကူညီပေးခဲ့ပြီး လင်းဖန်ကလည်း အလွန်အမင်း ရှည်လျားသော လှိုင်းနှုန်းဆက်သွယ်ရေးနည်းပညာ တစ်စုကို အဆင့်မြှင့်တင်ပေးခဲ့သည်။

​ဤဆက်သွယ်ရေးနည်းပညာသည် လမ်းကြောင်းတစ်ခုတည်းသာဖြစ်ပြီး အချက်ပြလှိုင်းကို ပေးပို့ရုံသာ တတ်နိုင်ကာ လက်ခံနိုင်ခြင်း မရှိချေ၊ ၎င်းကို ယေဘုယျအားဖြင့် ရေငုပ်သင်္ဘော ဆက်သွယ်ရေးစနစ်များတွင် အသုံးပြုကြသည်။ သို့သော် လက်ရှိအခြေအနေတွင် ပင်လယ်ရေအောက် မီတာရာချီ သို့မဟုတ် မီတာထောင်ချီအနက်မှနေ၍ အချက်ပြလှိုင်း ပေးပို့နိုင်ခြင်းမှာပင် အလွန်အံ့ဩစရာကောင်းလှပြီ ဖြစ်သည်။ ဤအရာအတွက် ရာသီဥတုစောင့်ကြည့်ကိရိယာတွင် မျောပါနိုင်သော အင်တင်နာ (Buoy-type antenna) တစ်ခု တပ်ဆင်ရန် လိုအပ်သည်။

​ဉာဏ်ရည်တုနှင့် သိပ္ပံနှင့်နည်းပညာစာကြည့်တိုက်၏ အကူအညီအပြင် လုံထိန်ဂရု(ပ်)၏ အပြည့်အဝ ပံ့ပိုးကူညီမှုများကြောင့် ရာသီဥတုစောင့်ကြည့်ကိရိယာ မွမ်းမံပြင်ဆင်မှုမှာ အလွန်ပင် ချောမွေ့ခဲ့သည်။

​ယခုအခါ ရာသီဥတုစောင့်ကြည့်ကိရိယာ၏ ဗားရှင်းအသစ် ထွက်ရှိလာပြီဖြစ်ရာ လင်းဖန်သည် သူ၏ အာရုံစိုက်မှုအားလုံးကို ရာသီဥတုစောင့်ကြည့်ကိရိယာများ ထုတ်လုပ်ရေးတွင်သာ မြှုပ်နှံထားခဲ့သည်။ သိပ္ပံအကယ်ဒမီ၏ ပင်လယ်ရေကြောင်း စမ်းသပ်လေ့လာရေးအဖွဲ့ မထွက်ခွာမီ လိုအပ်သော ရာသီဥတုစောင့်ကြည့်ကိရိယာ အားလုံးကို ထုတ်လုပ်နိုင်ရန်အတွက် ဖြစ်သည်။ ကုန်းမြေပေါ်ရှိ စမ်းသပ်လေ့လာရေးအဖွဲ့သည်လည်း ကျင်းလင်မြို့တက္ကသိုလ်နှင့် ပူးပေါင်းကာ ပါမောက္ခများနှင့် ကျောင်းသားများ ပူးတွဲ၍ ကုန်းပြင်မြင့်ဆီသို့ ဦးတည်သွားခဲ့ကြရာ အားလုံးမှာ အရှိန်အဟုန်ဖြင့် အကောင်အထည်ဖော်နေကြပြီ ဖြစ်သည်။

​စာတမ်းနှင့်ပတ်သက်သည့် အငြင်းပွားမှုများမှာလည်း ပြီးဆုံးသွားခဲ့ပြီဖြစ်ပြီး အချိန်အတော်ကြာသည့်တိုင်အောင် မည်သည့် သတင်းကြီးမျှ ထွက်မလာခဲ့ချေ။ ယခုအခါ လုံထန်ဂရုကို မည်သူမျှ အာရုံမစိုက်ကြတော့ဘဲ မီဒီယာများ၏ အာရုံစိုက်မှုမှာလည်း အခြားနေရာများသို့ ရောက်ရှိသွားခဲ့ပြီ ဖြစ်သည်။ ထို့အပြင် လုံထန်ဂရု၏ လှုပ်ရှားမှုများကို လျှို့ဝှက်ထားသဖြင့် ပြင်ပလူများအနေဖြင့် လုံထန်ဂရုက မည်သည့် လှုပ်ရှားမှုကြီးကို လုပ်ဆောင်နေသည်ဆိုသည်ကို လုံးဝ မသိရှိကြချေ။

​ကျင်းလင်မြို့ ဆိပ်ကမ်း။

​နောက်ဆုံး ကြီးမားလှသော သေတ္တာကြီးကို သင်္ဘောပေါ်သို့ သယ်ဆောင်ပြီးသွားသည်နှင့်အမျှ လင်းဖန်သည် သက်ပြင်းတစ်ချက်ကို အသာချလိုက်မိသည်။ နှစ်လတိုင်တိုင် သူသည် ဤနေ့ရက်အတွက် အချိန်ပြည့် ပြင်ဆင်နေခဲ့ခြင်းဖြစ်ရာ ယခုအခါ နောက်ဆုံးတွင် ရောက်ရှိလို့လာခဲ့ပြီ ဖြစ်သည်။

​"ဒီထဲမှာ ရာသီဥတုစောင့်ကြည့်ကိရိယာ တပ်ဆင်ခြင်းဆိုင်ရာ လမ်းညွှန်ဗီဒီယို ပါတယ်၊ အရမ်းရိုးရှင်းပါတယ်။ အစ်ကို ဒါကို ဆရာကြီး ယန်လိကျွဲဆီပဲ ပေးလိုက်ပါ" လင်းဖန်က ယူအက်စ်ဘီတစ်ခုကို ထုတ်ယူကာ ဒုံးဖန်ရန်ထံသို့ ကမ်းပေးလိုက်သည်။

​ဒုံးဖန်ရန်က ယူအက်စ်ဘီကို လှမ်းယူကာ သိမ်းဆည်းလိုက်ရင်း လင်းဖန်ကို အဓိပ္ပာယ်ပါပါ စိုက်ကြည့်လိုက်သည်။ ဤတစ်ကြိမ်တွင် လင်းဖန်၏ ဤပရောဂျက်အတွက် လျှောက်ထားမှုမှာ ထင်မှတ်မထားလောက်အောင် ချောမွေ့ခဲ့သည်။ ဖြစ်နိုင်သည်မှာ အထက်လူကြီးများအနေဖြင့် လင်းဖန်က နောက်ထပ် အံ့ဖွယ်အမှုများကို ဖန်တီးနိုင်မလားဆိုသည်ကို စောင့်ကြည့်ချင်နေ၍ ဖြစ်နိုင်သည်။

​သူသည် ဤစက်ပစ္စည်းများကို အခြားနိုင်ငံများက လာရောက်သိမ်းဆည်းသွားမည်ကို စိုးရိမ်ခြင်းမရှိချေ။ သူ လင်းဖန်ကို ဤမေးခွန်းကို မေးမြန်းခဲ့ဖူးရာ လင်းဖန်ကလည်း သူ့တွင် ပြင်ဆင်မှုများ ရှိပြီးသားဖြစ်ကြောင်း ပြောပြခဲ့သည်။ စက်ကို စတင်လည်ပတ်လိုက်ပြီဆိုပါက ၎င်းကို ပြန်လည်ဆယ်ယူရန်အတွက် လည်ပတ်မှုကို ရပ်ဆိုင်းရန် အမိန့်ပေးရမည်ဖြစ်ပြီး မဟုတ်ပါက ၎င်းသည် ကိုယ်တိုင်ဖျက်ဆီးရေးစနစ် ကို စတင်မည် ဖြစ်သည်။

​ဤမျှကြီးမားသော စက်ပစ္စည်းကို ထိုနေရာတွင် ထားရှိပြီး အချက်ပြလှိုင်း ပေးပို့နေသောအခါ အခြားနိုင်ငံများက အချက်ပြလှိုင်း တည်ရှိမှုကို တွေ့ရှိသွားပါက ၎င်းကို ပင်လယ်ထဲမှ ဆယ်ယူရန် နည်းလမ်းရှာကြမည်မှာ အသေအချာပင်။ ၎င်း၏အတွင်း၌ လူအများ လိုချင်တက်မက်နေကြသော နည်းပညာများစွာ ပါရှိနေသည် မဟုတ်ပါလော။

​နည်းပညာများ ပေါက်ကြားမှုကို ကာကွယ်ရန်နှင့် လည်ပတ်မှုကို မရပ်ဆိုင်းဘဲ ဆယ်ယူပါက ရာသီဥတုစောင့်ကြည့်ကိရိယာသည် ပင်လယ်ရေအောက်ကြမ်းပြင်တွင် ပြင်းထန်သော ရေဖိအား၏ အကူအညီဖြင့် ကိုယ်တိုင် ပေါက်ကွဲဖျက်ဆီးပစ်မည် ဖြစ်သည်။ လင်းဖန်သည် ဤရာသီဥတုစောင့်ကြည့်ကိရိယာကို တစ်ပိုင်းတစ်စ ဉာဏ်ရည်တုစက်ပစ္စည်းအဖြစ် ပြောင်းလဲထားခြင်း ဖြစ်သည်။ အကယ်၍ သူ့ကို အချိန်အနည်းငယ် ထပ်ပေးမည်ဆိုပါက ရာသီဥတုစောင့်ကြည့်ကိရိယာကို မိမိဘာသာ ရွေ့လျားနိုင်သော ရိုဘော့တစ်ခုအဖြစ် ပြောင်းလဲရန်ပင် သူ ဝန်လေးမည်မဟုတ်ချေ၊ ထိုအချိန်ကျမှသာ ၎င်းကို ဆယ်ယူရန် ပို၍ ခက်ခဲသွားပေလိမ့်မည်။

​ဒုံးဖန်ရန်သည် လင်းဖန်ကို နှုတ်ဆက်ပြီးနောက် သင်္ဘောပေါ်သို့ တက်ရောက်ကာ ထွက်ခွာသွားခဲ့ပြီး စက်ပစ္စည်းများကို သိပ္ပံစမ်းသပ်လေ့လာရေး သင်္ဘောအုပ်စုဆီသို့ ပို့ဆောင်ပေးခဲ့သည်။

​ပြန်လမ်းတွင် မိုရှင်းယာက ဘေးတွင်ရှိနေသော လင်းဖန်ကို ကြည့်ကာ "သူဌေး... စက်ပစ္စည်းမှာ တကယ်ပဲ ဘာပြဿနာမှ မရှိနိုင်ဘူးမလား" ဟု မေးလိုက်သည်။

​လင်းဖန်က ပြုံးလျက် "စိတ်မပူပါနဲ့၊ သူတို့ စက်ပစ္စည်းကို ပင်လယ်ထဲ တိုက်ရိုက်ပစ်ချလိုက်ရင်တောင် ရေအောက်ကြမ်းပြင်ကို နစ်မြုပ်သွားပြီးတာနဲ့ ၎င်းဘာသာ အလိုအလျောက် စတင်လည်ပတ်မှာပါ။ နေရာအတိအကျပဲ လိုတာ။ ဆရာကြီးယန်က မိုးလေဝသ ပညာရှင်တစ်ဦး ဖြစ်တာမို့ ဘယ်နေရာက တပ်ဆင်ဖို့ အသင့်တော်ဆုံးလဲဆိုတာ ကောင်းကောင်းသိပါတယ်။ ဒါကြောင့် ပိုပြီးတော့ အဆင်ပြေမှာပါ၊ ဘာပြဿနာမှ ကြီးကြီးမားမား ရှိလာမှာမဟုတ်ဘူး" ဟု ယုံကြည်မှုအပြည့်ဖြင့် ဆိုလိုက်လေတော့သည်။

................................................................