အခန်း ၄၆၅

အခန်း။ ၄၆၅

ကျင့်ကြံသူအများစုမှာ ရွှေရောင်သဘာဝနှင့် ပတ်သက်၍ မရေမရာသော ဆန္ဒ၊ မွေးရာပါ လောဘနှင့် တောင့်တမှုတို့ ရှိကြသည်။

ထိုအရာကို အတွေ့အကြုံရှိသူများက သူတို့၏ အကျိုးကျေးဇူးများနှင့် လျှို့ဝှက်ချက်များအကြောင်း ပြောပြသည်ကို နားထောင်ရင်း သူတို့၏ စိတ်ဝင်စားမှုမှာ ပိုမိုပြင်းထန်လာတတ်သည်။

ရွှေရောင်သဘာဝဆိုသည်မှာ အဘယ်အရာဖြစ်ကြောင်း အပြည့်အဝ နားလည်သဘောပေါက်ပြီး ၎င်း၏ နက်နဲသော အသိဉာဏ်ကို ဆုပ်ကိုင်ထားနိုင်သည့်အခါ ချန်ကျီရှင်းမှာ စကားနှစ်ခွန်းသာ ပြောချင်တော့သည်။

“အရမ်ရကောင်းတာပဲ”

နိဗ္ဗာနအဆင့် အဆင့်ကိုးနောက်တွင် အမြင့်ဆုံးအဆင့်၏ ဘေးဒုက္ခများ ရှိနေပြီး ထိုအဆင့်တွင်မှသာ ထာဝရအသက်ရှည်ခြင်း တာအိုကို သက်သေပြနိုင်မည့် လမ်းကြောင်းပေါ်သို့ လျှောက်လှမ်းနိုင်သည်။

ရွှေရောင်သဘာဝသည် တာအိုအသီးပင်။

အမြင့်ဆုံးအဆင့်သည် အမြင့်ဆုံးအဆင့်သာ ဖြစ်သည်။

တာအိုအသီး ရှိနေမှသာ အမြင့်ဆုံးအဆင့်သည် ထာဝရအသက်ရှည်ခြင်း ဖြစ်လာမည်ပင်။

အမြင့်ဆုံးအဆင့်တွင် အဆင့်ကိုးဆင့် ရှိသော်လည်း ရွှေရောင်သဘာဝကို ရရှိပြီးသူများကို ထာဝရအသက်ရှည်ခြင်း အရှင်သခင်ဟု ခေါ်ဆိုနိုင်ပြီ ဖြစ်သည်။

အမြင့်ဆုံးအဆင့် ကိုးဆင့် ပြည့်စုံသွားသည့်အခါ သူတို့၏ တည်ရှိမှုသည် စစ်မှန်သော ဧကရာဇ်မင်းအဖြစ်သို့ ပြောင်းလဲသွားသည်။

အမှန်စင်စစ် ဤနှစ်ခုအကြား ကွာခြားချက်မှာ အလွန်ကြီးမားသည်တော့ မဟုတ်ပေ။

သို့မဟုတ် အလွန်နည်းပါးသည်ဟု ဆိုရမည်ပင်။

တိုက်ပွဲစွမ်းရည်တွင် အနည်းငယ် ကွာခြားမှုရှိသော်လည်း ထာဝရအသက်ရှည်ခြင်း စစ်မှန်သော ဧကရာဇ်မင်းက အမြင့်ဆုံးအဆင့်ကို အနိုင်ယူနိုင်သကဲ့သို့ ထာဝရအသက်ရှည်ခြင်း အရှင်သခင်ကလည်း အမြင့်ဆုံးအဆင့်ကို အနိုင်ယူနိုင်သည်ပင်။

ဧကရာဇ်မင်းက အရှင်သခင်ကို ချက်ချင်း သတ်ပစ်နိုင်သည်ဟူသော သတင်းမျိုးလည်း ဘယ်သူမှ မကြားဖူးသဖြင့် ကွာခြားချက်မှာ သိပ်မများလှပေ။

ထို့ကြောင့် ရွှေရောင်သဘာဝသည် ထာဝရအသက်ရှည်ခြင်းကို ကိုယ်စားပြုသည်။

ချန်ကျီရှင်း၏ ယခင်ဘဝက ကျင့်ကြံခြင်း ဝတ္ထုများမှ စကားလုံးကို သုံးရလျှင် တာအိုအသီးဆိုသည်မှာ အာဏာပင်။

အရှင်သခင်နှင့် စစ်မှန်သော ဧကရာဇ်မင်း နှစ်ဦးစလုံးမှာ တူညီသော အာဏာအဆင့် ရှိကြပြီး သူတို့၏ နယ်မြေ ကျယ်ပြောမှုသာ ကွာခြားသည်။

အရည်အသွေး တူညီသောကြောင့် ကွာခြားချက်မှာလည်း မကြီးမားလှပေ။

ချန်ကျီရှင်းသည် ဤအချက်ကို သဘောပေါက်ထားသဖြင့် နိဗ္ဗာနအဆင့်တွင် အသည်းအသန် ကြိုးစားခဲ့ခြင်းပင်။

ဤအဆင့်ကို အဘယ်ကြောင့် နိဗ္ဗာနဟု ခေါ်ဆိုသလဲဆိုသည်ကိုလည်း သူ နားလည်လာသည်။

“ဒါက ဖီးနစ်ငှက်တွေလိုမျိုး သေပြီးမှ ပြန်ရှင်လာတာမျိုး မဟုတ်ဘူး။ ဒီအဆင့်မှာ တကယ်ကို အသွင်ပြောင်းပြီး နိဗ္ဗာန ပြန်လည်မွေးဖွားခြင်းကို ခံယူနိုင်တာမျိုးပဲ။ ဒီအဆင့်မှာ ခိုင်မာမှသာ အနာဂတ်အတွက် ယုံကြည်ချက် ရှိမှာ"

အရာအားလုံးကို အောင်မြင်စွာ ရရှိပြီး ပြန်သွားသော ချန်ကျောက်ရှင်းကို လိုက်ပို့ပြီးနောက် ချန်ကျီရှင်းသည် နှစ်နှစ်တာ ကာလအတွင်း ကျောက်စိမ်းကဲ့သို့ ပြောင်းလဲသွားသော သူ၏ လက်ကို ကြည့်ကာ ခံစားချက်ပေါင်းစုံဖြင့် တွေးတောနေသည်။

နိဗ္ဗာနကို အမှန်တကယ် ရောက်ရှိသွားသည့်အခါ သူသည် လူသား မဟုတ်တော့ပေ။

အနည်းဆုံးတော့ ချန်ကျီရှင်းသည် ယခုအခါ သူ့ကိုယ်သူ လူသားဟူသော သဘောတရားမှ ဖယ်ထုတ်လိုက်နိုင်ပြီဟု ခံစားရသည်။

ရေခဲကဲ့သို့ အသားအရေ၊ ကျောက်စိမ်းကဲ့သို့ အရိုးများ၊ အနှစ်သာရကဲ့သို့ သွေးများအား မသေခြင်းဟု မဆိုနိုင်သော်လည်း ဤသည်မှာ ထာဝရအသက်ရှည်ခြင်းပင်။

“လက်ရှိ ကိုယ်ခန္ဓာနဲ့ဆိုရင် သေဆုံးပြီးနောက် စွမ်းအင်တွေ ကုန်စင်သွားရင်တောင် နှစ်သန်းပေါင်းများစွာ မြေမြှုပ်ထားရင် ပျက်စီးမှာ မဟုတ်ဘူး။ နောက်တစ်ခေတ်က သက်ရှိတွေ တူးဖော်တွေ့ရှိပြီး ဒဏ္ဍာရီလာ သတ္တဝါအဖြစ် ကိုးကွယ်ကြလိမ့်မယ်"

“နိဗ္ဗာနအဆင့်ဆိုတာ ဒီလောက်ပါပဲ။ ဒါပေမဲ့ ဒါက လမ်းကြောင်းသေးသေးလေး တစ်ခုပဲ။ ငါတို့လိုလူတွေအတွက် ခန္ဓာကိုယ်ဆိုတာ နိဗ္ဗာနအဆင့်လိုမျိုး အမြင့်ဆုံးအဆင့်ကို သွားတဲ့ ကြားခံနယ်မြေပဲ။ မင်းလိုမျိုး အသွင်ပြောင်းဖို့အတွက် နိဗ္ဗာနရဲ့ အခြေခံအုတ်မြစ်ကို တည်ဆောက်သူကတော့ အရမ်းနည်းပါးတယ်”

ချန်ကျောက်ရှင်းက တိုးတိုးလေး ပြောသည်။

“အကြောင်းရင်းကိုတော့ ငါပြောဖို့ မလိုလောက်ဘူး။ မင်း သိပြီးသား ဖြစ်မှာပါ"

“အင်း ငါ လူသား မဟုတ်တော့ဘူး"

“ဒါတင်မကသေးဘူး မင်း သာမန်မိန်းကလေးတွေနဲ့ ကလေးမရနိုင်တော့ဘူး။ ဒါပေမဲ့ ရှူချင်ချင်နဲ့ ကလေး ရပြီးသားဆိုတော့ ငါ သတိပေးစရာ မလိုတော့ပါဘူး"

ချန်ကျောက်ရှင်းသည် ထာဝရအသက်ရှည်ခြင်းလမ်းကြောင်းသို့ လျှောက်လှမ်းမည့် ကျင့်ကြံသူတစ်ယောက်အတွက် ဤကိစ္စကို ကြီးကျယ်သောကိစ္စအဖြစ် မမြင်ဘဲ တည်ငြိမ်စွာ ပြောလိုက်သည်။

သူ၏ ထာဝရအသက်ရှည်ခြင်း လမ်းကြောင်းတွင် အနည်းဆုံး သက်တမ်း နှစ်ငါးထောင်ကို ပိုင်ဆိုင်ထားနိုင်ပြီး သားသမီးများမှာမူ အမြင့်ဆုံးအဆင့်သို့ ရောက်လျှင်ပင် သက်တမ်း နှစ်ထောင်ခုနှစ်ရာသာ ရှိကြသည်။

ထို့ကြောင့် မျိုးဆက်ကို ဆက်ခံရန် ကလေးတစ်ယောက် ရှိခြင်းက လုံလောက်ပြီဖြစ်သည်။ မျိုးဆက်တိုးပွားရေးအတွက်ဆိုလျှင် သားဖြစ်သူကို ကလေးများ ပိုမွေးခိုင်းလိုက်ရုံသာဖြစ်သည်။

သူကိုယ်တိုင် နောက်ထပ် ကလေးမွေးရန် မလိုပေ။

အကယ်၍ ထိုကိစ္စမျိုးကို ကိုယ်တိုင် ပါဝင်ဆောင်ရွက်ရမည်ဆိုပါက နိဗ္ဗာနအသွင်ပြောင်းခြင်းကို အပြည့်အဝ ဆောင်ရွက်ပြီးသော လူမဟုတ်သည့် အမျိုးသမီးတစ်ယောက်ကို ရှာဖွေရမည်ဖြစ်ပြီး ထိုအခါမှသာ ကလေးရရန် အနည်းငယ်မျှ အခွင့်အရေး ရှိပေလိမ့်မည်။

“မင်းကော မင်းက အပြည့်အဝ အသွင်ပြောင်းမှာလား”

ဤအချက်သို့ ရောက်လာလျှင်မူ နောက်ကြောင်းပြန်လှည့်၍ မရတော့ပေ။

အကယ်၍ သူသည် နတ်ဘုရားမှ လူသားအဖြစ် ပြန်ပြောင်းလဲနိုင်သည့် နည်းလမ်းကို ရှာမတွေ့ဘဲ ထာဝရအသက်ရှည်ခြင်း လမ်းကြောင်းဟု ခေါ်ဆိုနိုင်သော ဤခန္ဓာကိုယ်ကို စွန့်လွှတ်ရန် ဆန္ဒမရှိပါက တွေးတောနေခြင်းမှာ အချိန်ကုန်ရုံသာ ဖြစ်သည်။

သူသည် လူသားဟူသော အမှတ်အသားမှ ဖယ်ရှားခံလိုက်ရပြီ ဖြစ်သည်။

ကျင့်ကြံခြင်းတွင် ကျင့်ကြံရင်းနှင့်ပင် သားသမီး မရနိုင်တော့သည့် အခြေအနေသို့ ရောက်သွားခြင်းမှာ အခြားသော ရှေ့ပြေး ပုဂ္ဂိုလ်များ မကြုံဖူးသည့် ထူးဆန်းသော အခြေအနေပင်။

သူက ပထမဆုံး ဖြစ်နိုင်သည်...

၎င်းမှာ အလွန်ပင် စိတ်ပျက်စရာ ကောင်းလှသည်။

သူ တစ်ယောက်ယောက်ကို တိုင်ပင်ချင်ပြီး သူနှင့် အလားတူ ဖြစ်အောင်လည်း အခြားသူများကို ဆွဲဆောင်ချင်နေမိသည်။

ဆန္ဒအလျောက် ရောက်လာသည့် ချန်ကျောက်ရှင်းမှာ ချန်ကျီရှင်း၏ စိတ်အနှောင့်အယှက် ပြေပျောက်ရာ နေရာဖြစ်လာတော့သည်။

“...”

ချန်ကျီရှင်းက သူ့ကို ကြည့်လိုက်သည့်အခါ ချန်ကျောက်ရှင်းမှာ တိတ်ဆိတ်နေပြီး အနည်းငယ် ရှက်ရွံ့သော အမူအရာကိုသာ ပြသသည်။

ချန်ကျီရှင်း: “...”

ကောင်းလိုက်တဲ့လူ မင်းက နိဗ္ဗာနမဝင်ဖို့ ကြံစည်နေတာပေါ့လေ။

မင်း သိလျက်နဲ့ ငါ့ကို မပြောပြဘဲ ငါ့ကို လှည့်စားဖို့ ကြံစည်နေတာ မဟုတ်ဘူးလား။

ခွေးကောင်...

မသိစိတ်ဖြင့်ပင် ချန်ကျီရှင်း၏ ချန်ကျောက်ရှင်းကို ကြည့်သော အကြည့်တို့မှာ အန္တရာယ်ရှိလာသည်။

သူ၏ မျက်ခုံးကြားရှိ အကြေးခွံများမှ အနက်ရောင် မီးလျှံများ ထွက်ပေါ်လာပြီး ဓားစွမ်းအင်များက ဇီဝေတောင် တစ်ခုလုံးကို လွှမ်းခြုံသွားသည်။

နောက်တစ်စက္ကန့်တွင် ချန်ကျောက်ရှင်း၏ မျက်လုံးထဲတွင် ချန်ကျီရှင်းမှာ အရှိန်မြှင့်ထားသည့် ပုံစံဖြင့် ရွေ့လျားသွားသည်။

သူ တကယ်ပင် လုပ်ဆောင်တော့မည်ပင်။

“သေစမ်း...”

ချန်ကျီရှင်း တကယ်ပင် လုပ်တော့မည့်အပြုအမူကို မြင်သဖြင့် ချန်ကျောက်ရှင်းက အမြန် အော်ပြောသည်။

“အထင်မလွဲပါနဲ့၊ ဒါက မင်းအတွက်ပဲ။ နိဗ္ဗာနအဆင့် ဆိုတာက ထူးဆန်းတဲ့ အဆင့်တစ်ခုပါ။ သာမန် အမျိုးသမီးတစ်ယောက်သာ မင်းရဲ့ ကလေးကို ကိုယ်ဝန်ဆောင်ရင် သုံးရက်အတွင်းမှာပဲ ကလေးက သူ့ရဲ့ အနှစ်သာရတွေကို စုပ်ယူပြီး သေဆုံးသွားလိမ့်မယ်။ မင်း အမြင့်ဆုံးအဆင့်ရောက်သွားရင် နိဗ္ဗာနအဆင့် အမျိုးသမီးတွေတောင် မင်းရဲ့ မျိုးစေ့ကို မခံနိုင်တော့ဘူး။ ဒါကြောင့်ပဲ ဘိုးဘေး ချန်ထျန်ယွမ်က ဒီနှစ်တွေအထိ တစ်ကိုယ်တည်း နေခဲ့ရတာပေါ့"

ချန်ကျီရှင်း: “...”

“မင်း ပြောနေတာတွေက ဘာအသုံးဝင်လို့လဲ အကုန်လုံးက အမှန်တရားပဲ ဖြစ်နေရင်တောင် ဒါက ငါ့ကို သတိမပေးရတဲ့ အကြောင်းပြချက်လား”

ဒုန်းဟူသော အသံနှင့်အတူ သူ၏ ဒူးခေါင်းကို ချန်ကျောက်ရှင်း၏ ပုခုံးပေါ်သို့ အားပြင်းစွာ ဆောင့်ချလိုက်ရာ ချန်ကျောက်ရှင်း၏ ခြေထောက်တို့မှာ ကျောက်တုံးထဲသို့ နစ်ဝင်သွားတော့သည်။