အခန်း ၄၄

ငါးဆားနယ် ကိုယ်လုပ်တော်

အပိုင်း ၄၄

ယွီမြောင်ဟွာသည် ဂုဏ်ယူဝင့်ကြွားစွာ ပြုံးနေခဲ့သည်။ "ဘာပဲဖြစ်ဖြစ်၊ သမီးတစ်ယောက်တည်း ဒါတွေကို အကုန်သုံးနိုင်မှာ မဟုတ်ဘူး။ အချို့ကို ပေးမပစ်ရင် ဒီသိုလှောင်ခန်းက မကြာခင် ပြည့်သွားတော့မှာ။ သမီးက အားလုံးရဲ့ အချစ်တော်မို့လို့ လူတိုင်းဆီက လက်ဆောင်တွေ ရနေတာလေ။ တချို့ကို လက်ဆင့်မကမ်းရင်

နောက်နှစ်အနည်းငယ်အတွင်းမှာ နေရာရှိတော့မှာ မဟုတ်ဘူး"

မိသားစုဝင်များရှေ့တွင် ယွီမြောင်ဟွာသည် သူမ၏ မိခင် အပြင်မှာ စိတ်မပူစေရန် နန်းတော်ထဲက သူမ၏ သာယာလှပသော ဘဝအကြောင်းကို ပို၍ ပြောပြချင်နေခဲ့၏။

"မယ်တော်ကြီးက သမီးကို အလိုလိုက်ရုံတင်မကဘူး၊ မိဖုရားခေါင်ကြီးကလဲ သမီးကို ချစ်တယ်။ ရှု့ဖေး၊ သဲ့ဖေးနဲ့ ကွေ့ဖေးတို့လဲ သမီးနဲ့ အဆင်ပြေကြတယ်..."

ယွီမြောင်ပင်းကမူ မေးခွန်းမေးကာ အရှိန်သတ်လိုက်၏။ "ဒါဆို အစ်မနဲ့ အဆင်မပြေတဲ့ ညီအစ်မတွေကကော"

ယွီမြောင်ဟွာက ပြတ်သားစွာ ပြန်ပြောလိုက်သည်။ "သူတို့အားလုံးကို အအေးနန်းဆောင်၊ မဟုတ်ရင် သီလရှင်ကျောင်းဆီ ပို့လိုက်ပြီ!"

ထိုစဉ် ဟုန်ရှင်းက စိုးရိမ်တကြီး မျက်နှာထားဖြင့် အပြေးဝင်လာခဲ့သည်။ "သခင်မ... ကွေ့ဖေးရောက်လာပါပြီ"

တစ်နန်းတော်လုံးတွင် ကွေ့ဖေးဟူသည် တစ်ဦးတည်းသာ ရှိ၏။

ယွီမြောင်ဟွာမှာ အနည်းငယ် ဇဝေဇဝါ ဖြစ်သွားရသည်။ ကွေ့ဖေးလာလည်လျှင်တောင်မှ ပုံမှန်အားဖြင့် သူမ အနှောင့်အယှက်မဖြစ်စေရန် နေ့လယ်အိပ်စက်ပြီးမှသာ လာလေ့ရှိသည်။ သို့သော် ယခုမှာမူ ထမင်းစားချိန် ဖြစ်နေခဲ့၏။

ဟုန်ရှင်း၏ မျက်နှာကို ကြည့်ရသည်မှာ ရောက်လာသူမှာ စေတနာကောင်းနှင့် လာပုံမရပေ။

ယွီမြောင်ဟွာက ပြောလိုက်သည်။ "အမေ... အမေတို့ပဲ ဆက်ကြည့်နေကြပါ၊ သမီး ကွေ့ဖေးကို သွားကြိုလိုက်အုံးမယ်"

……

လွန်ခဲ့သော မိနစ်သုံးဆယ်ခန့်က—

ဖုန့်ယီ နန်းဆောင် ပိတ်ထားရသည်ဟူသော သတင်းကို ရရခြင်းတွင် ကွေ့ဖေး ယန်ဟွေ့ရုန်သည် အလွန်အမင်း စိုးရိမ်ပူပန်သွားခဲ့၏။

သူမ မိဖုရားခေါင်ကြီးနှင့် သိကျွမ်းခဲ့သည်မှာ နှစ်ပေါင်းများစွာ ရှိပြီဖြစ်ကာ သူတို့၏ ဆက်ဆံရေးမှာလည်း အဆင်ပြေပြီး နက်ရှိုင်းလှသည်။

အထူးသဖြင့် သူမသည် ပွင့်လင်းလွန်းသဖြင့် နှစ်များစွာအတွင်း ကိုယ်လုပ်တော် အများအပြားကို စိတ်အနှောင့်အယှက် ဖြစ်စေခဲ့သော်လည်း မိဖုရားခေါင်ကြီးကမူ သူမကို များစွာ စောင့်ရှောက်ပေးခဲ့သည်။ မိဖုရားခေါင်ကြီးသာ မရှိလျှင် သူမသည် အေးချမ်းသော ဘဝကို ပိုင်ဆိုင်နိုင်မည် မဟုတ်ပေ။

ဖုန့်ယီ နန်းဆောင်ကို ပိတ်ထားရခြင်း၏ တရားဝင် အကြောင်းပြချက်မှာ မိဖုရားခေါင်ကြီးကျန်းမာရေး ပြန်လည်ကောင်းမွန်စေရန် ဖြစ်သော်လည်း ရာထူးတိုးမြှင့်ခြင်း အခမ်းအနားတွင် သူမ ကြည့်ခဲ့ရစဉ်က မိဖုရားခေါင်ကြီး၏ မျက်နှာမှာ ကြည်လင်နေခဲ့ပြီး ဖျားနာနေသူနှင့် မတူခဲ့ချေ။

မနေ့က ဖြစ်ပျက်ခဲ့သည့် အကြောင်းအရာများကြောင့် မိဖုရားခေါင်ကြီး အပြစ်ပေးခံရခြင်း ဖြစ်နိုင်သည်ဟု သူမ သံသယမဝင်ဘဲ မနေနိုင်ခဲ့ပေ။

မနေ့က ပြုလုပ်ခဲ့သော "ငှက်တစ်ရာက ဖီးနစ်ကို ဂါရဝပြုခြင်း" တင်ဆက်မှုမှာ သံသယဖြစ်ဖွယ် အချက်အလက်များဖြင့် ပြည့်နှက်နေခဲ့သည်။

ထိုအချိန်မှစ၍ မိဖုရားခေါင်ကြီး၏ မိခင်နှင့် ညီမငယ်တို့မှာ အကျဉ်းချခံထားရသကဲ့သို့ လူမြင်ကွင်းသို့ ထွက်မလာကြတော့ပေ။

ယွမ်ဟွေ့ရုန် စဉ်းစားကြည့်ပြီးနောက် မိဖုရားခေါင်ကြီးထံ သွားရောက်တွေ့ဆုံရန် အကြောင်းပြချက်ဖြင့် နှစ်တစ်ရာသက်တမ်းရှိ ဂျင်ဆင်းမြစ်ကို ယူဆောင်သွားရန် ဆုံးဖြတ်လိုက်သည်။ သူတို့သည် ခင်မင်ရင်းနှီးကြသဖြင့် မိဖုရားခေါင်ကြီး ဖျားနာနေလျှင်တောင်မှ ကူးစက်ရောဂါ မဟုတ်ပါက သူမကို တွေ့ခွင့်ပေးလေ့ရှိသည်။

သို့သော် ယနေ့တွင်မူ သူမ ကံမကောင်းခဲ့ပေ။

ဖုန့်ယီ နန်းဆောင်ရှိ အစေခံများက မိဖုရားခေါင်ကြီးကျန်းမာရေး မကောင်းသဖြင့် ပြင်ပလူများ မတွေ့လိုကြောင်းသာ ပြောခဲ့၏။

ဒါက တစ်ခါမှ မဖြစ်ဖူးသည့် ကိစ္စဖြစ်ရာ မိဖုရားခေါင်ကြီးသည် နေမကောင်းခြင်း မဟုတ်ဘဲ အကျဉ်းချခံထားရခြင်း ဖြစ်သည်ဟု ယွမ်ဟွေ့ရုန် ပို၍ ယုံကြည်သွားစေခဲ့သည်။

ထို့နောက် ယွမ်ဟွေ့ရုန်သည် သတင်းအချက်အလက်အချို့ သိရရန် မျှော်လင့်ချက်ဖြင့် ခေါက်ဆွဲတစ်ပွဲ ကိုယ်တိုင်ချက်ကာ ချမ့်ယွမ် နန်းဆောင်သို့ သွားခဲ့သည်။ မထင်မှတ်ထားဘဲ သူမသည် ဧကရာဇ်ကိုလည်း တွေ့ခွင့်မရခဲ့ပေ။

သူမ စိတ်ပျက်လက်ပျက်ဖြင့်သာ နန်းဆောင်သို့ ပြန်လာခဲ့ရတော့၏။

"သခင်မ... ဒါက ကွမ်ကျွီ နန်းဆောင်နဲ့ ပတ်သက်နေတာများလား" မန့်နောင် အမည်ရှိ အစေခံမလေးက ဝံ့ဝံ့ရဲရဲ ပြောလိုက်သည်။ မူလက တတိယတန်းစား အစေခံဖြစ်သော်လည်း သူမမှာ သွက်လက်ပြီး ရယ်ရွှင်ဖွယ်ကောင်းသဖြင့် ယွမ်ဟွေ့ရုန်က ရာထူးတိုးပေးထားခြင်း ဖြစ်၏။

ယွမ်ဟွေ့ရုန်မှာ ဇဝေဇဝါ ဖြစ်သွားရသည်။ "ဘာလို့ ဒါက ကွမ်ကျွီ နန်းဆောင်နဲ့ ပတ်သက်နေတယ်လို့ ထင်တာလဲ"

မန့်နောင်ကမူ မျက်နှာလွှဲလိုက်ပြီး ပြောလိုက်၏။ "အကယ်၍ မနေ့က နိမိတ်တွေနဲ့ ပတ်သက်နေရင် မိဖုရားခေါင်ကြီးက မနေ့ကတည်းက ဖျားနေရမှာလေ၊ ဒီနေ့မှ မဟုတ်ဘူး။ မနေ့က ဧကရာဇ်က ကွမ်ကျွီ နန်းဆောင်မှာ အနားယူခဲ့တာပါ"

ယွမ်ဟွေ့ရုန်သည် ဤအကြောင်းပြချက်မှာ တစ်မျိုးတော့ ဟုတ်သလိုလို ရှိသော်လည်း—

"ဟွေ့ဖေး အဲဒီလိုလူမျိုး မဟုတ်လောက်ပါဘူး။ သူမက နည်းနည်း ထုံသလိုလို ရှိတယ်၊ ဒါမျိုးလုပ်ဖို့ ဦးနှောက်ရှိမှာ မဟုတ်ဘူး"

ဒါကို ကြားလိုက်ရသောအခါ ယွမ်ဟွေ့ရုန်၏ ပတ်ဝန်းကျင်ရှိ အစေခံများမှာ တိတ်ဆိတ်စွာ ခေါင်းငုံ့လိုက်ကြ၏။ မည်သူမျှ သူမက ထိုသို့ပြောရန် သင့်တော်သည်ဟု မထင်ကြပေ။

ယွမ်ဟွေ့ရုန်က သူမဘာသာ ရေရွတ်လိုက်သည်။ "သူမက အဲဒီလိုလူမျိုးလို့ ငါ မယုံချင်သေးဘူး။ မိဖုရားခေါင်ကြီးက သူမအပေါ် သိပ်ကောင်းခဲ့တာပဲ"

သို့သော်လည်း သူမသည် အခြေအနေကို ထပ်မံစုံစမ်းရန် လူလွှတ်လိုက်၏။

သူမ စုံစမ်းလိုက်သည်နှင့် တပြိုင်နက် ကိုယ်လုပ်တော်ဟွေ့သည်လည်း ချမ့်ယွမ် နန်းဆောင်သို့ သွားရောက်ခဲ့ပြီး ဧကရာဇ်နှင့် အောင်မြင်စွာ တွေ့ဆုံခဲ့သည်ဟူသော သတင်း ရောက်လာခဲ့သည်။

တွေ့ခွင့်မရဘဲ ပြန်လာခဲ့ရသော ယွမ်ဟွေ့ရုန်၏ စိတ်ထဲ၌ ရှုပ်ထွေးသွားရ၏။ သူမ တွေ့ချင်တုန်းက ဧကရာဇ်က အလုပ်ရှုပ်နေသည်၊ သို့သော် ဟွေ့ဖေး ရောက်လာတော့ ဧကရာဇ်က အားနေပြန်သည်။ ဆက်ဆံပုံကွာခြားချက်က သိသာလွန်းလှသဖြင့် သူမ မသိချင်ယောင်ဆောင်၍ မရတော့ပေ။ သူမသည် ဧကရာဇ်အတွက် ကိုယ်တိုင်တောင် ခေါက်ဆွဲချက်ပေးခဲ့သေးသည် မဟုတ်ပါလား။

အဲဒီခေါက်ဆွဲကို စားဖို့ ဧကရာဇ်မှာ အရည်အချင်း မရှိဘူး။

ယွမ်ဟွေ့ရုန်က ဒေါသတကြီးဖြင့် ဆိုလိုက်၏။ "ငါချက်ထားတဲ့ ခေါက်ဆွဲကို ယူလာခဲ့၊ ငါ ဗိုက်ဆာတယ်"

ခေါက်ဆွဲများကို နန်းတွင်းစားဖိုဆောင်တွင် ပြန်နွေးပြီးမှ လာချပေးကြသည်—အစေခံများမှာ သူတို့၏သခင်မအား အေးစက်နေသော အစားအစာကို မကျွေးဝံ့ကြပေ။ သူမ တစ်ခုခုဖြစ်လျှင် သူတို့သာ ခံရမည် မဟုတ်ပါလား။

ယွမ်ဟွေ့ရုန် တစ်လုတ်စားကြည့်ပြီးနောက် ချက်ချင်းပင် ပြန်ထွေးထုတ်လိုက်၏။

ဘာလို့ ဒါက ချိုလိုက် ငန်လိုက် ဖြစ်နေတာလဲ။ တကယ့်ကို စက်ဆုပ်စရာပဲ။

ခေါက်ဆွဲချက်နေစဉ် စိုးရိမ်စိတ်များကြောင့် သူမ သကြားမှားထည့်ခဲ့မိသည်ဟု သူမ ခန့်မှန်းလိုက်သည်။

သူမက မျက်မှောင်ကြုတ်ရင်း ပြောလိုက်၏။ "ဒီခေါက်ဆွဲတွေကို သွန်ပစ်လိုက်တော့"

ကံကောင်းလို့ ဧကရာဇ်မစားလိုက်ရတာ။

မဟုတ်ဘူး... သူ စားလိုက်ရမှာ။

သူမ ဒေါသတကြီး တွေးလိုက်သည်။

ထိုစဉ် အစေခံတစ်ဦးက နောက်ဆုံးရသတင်းများကို သယ်ဆောင်လာခဲ့၏။ မိဖုရားခေါင်ကြီးပြီးလျှင် ဒုတိယအဆင့်ရှိသော ကွေ့ဖေးတစ်ဦးအနေဖြင့် ယွမ်ဟွေ့ရုန်တွင် သူမ၏ ကိုယ်ပိုင်သတင်းရင်းမြစ်များ ရှိနေဆဲပင်။

"ဟွေ့ဖေး ချမ့်ယွမ် နန်းဆောင်ကနေ ပျော်ပျော်ရွှင်ရွှင်နဲ့ ထွက်သွားပါတယ်"

"သူမက အစားအသောက် အစုံအလင်နဲ့ စားသောက်ပွဲတစ်ခုကို မှာထားပါတယ်"

"ကွမ်ကျွီ နန်းဆောင်က ဒီလအတွက် ဆုကြေးလစာတွေကိုလဲ ကြေညာလိုက်ပါတယ်"

မိဖုရားခေါင်ကြီးသည် ချမ့်ယွမ် နန်းဆောင်သို့ တိတ်တဆိတ် သွားခဲ့ခြင်းဖြစ်သဖြင့် ရုန်အန်း နန်းဆောင်မှ လူများက ထိုအကြောင်းကို မသိရှိခဲ့ကြပေ။ သို့သော် ယွီမြောင်ဟွာကမူ ထိုကဲ့သို့သော အရာများကို ဘယ်သောအခါမှ ဖုံးကွယ်ထားလေ့ မရှိချေ။

ယွမ်ဟွေ့ရုန်မှာ သူမ၏ ကုလားထိုင်ပေါ်တွင် ထိုင်နေရင်း မျက်နှာအမူအရာမှာ တစ်မျိုးပြီးတစ်မျိုး ပြောင်းလဲနေခဲ့သည်။

မိဖုရားခေါင်ကြီး ဒုက္ခရောက်နေချိန်မှာ ယွီမြောင်ဟွာကတော့ အဲဒီလောက်တောင် ပျော်နေတာလား၊ ဂုဏ်တောင် ပြုနေသေးတယ်ပေါ့။

ဒါက မိဖုရားခေါင်ကြီးအပေါ် သူ့ရဲ့ ကျေးဇူးဆပ်နည်းလား။

သူမ ပိုတွေးလေလေ ပိုပြီး စိတ်မကောင်းဖြစ်လေလေပင်။ သူမသည် ယွီမြောင်ဟွာကို ညီအစ်မရင်းချာလို သဘောထားပြီး ကိုယ်တိုင်လုပ်ထားသည့် ပိုးပန်းလေးတစ်ပွင့်ကိုပင် လက်ဆောင်ပေးခဲ့ဖူးသည်။ နန်းတော်ထဲရှိ ကိုယ်လုပ်တော်အနည်းငယ်သာ ဤကဲ့သို့သော ဆက်ဆံမှုကို ရရှိဖူးခြင်း ဖြစ်၏။

ယွီမြောင်ဟွာက ဒါနဲ့ မတန်ဘူး။

ရုတ်တရက် ယွမ်ဟွေ့ရုန်သည် အံကြိတ်ကာ မတ်တပ်ရပ်လိုက်ပြီး ဆိုလိုက်၏။ "ကွမ်ကျွီ နန်းဆောင်ကို သွားကြမယ်"

သူမ ခြေလှမ်းအနည်းငယ် လှမ်းလိုက်ပြီးမှ ပြန်ရပ်လိုက်သည်။ "ယွီမြောင်ဟွာ အရင်က ပေးထားတဲ့ လက်ဆောင်တွေအားလုံးကို ထုတ်ခဲ့"

ပွဲတော်များအတွင်း နန်းဆောင်နှစ်ခုသည် လက်ဆောင်များ အပြန်အလှန် လဲလှယ်လေ့ရှိကြသည်။

အစားအသောက်များမှာ ကုန်သွားပြီဖြစ်ကာ ပိုးထည်အချို့မှာလည်း အသုံးပြုပြီးသား ဖြစ်သော်လည်း ရတနာများမှာမူ ကျန်ရှိနေဆဲပင်။

ယွီမြောင်ဟွာသည် ကွေ့ဖေး၏ တစ်ဦးတည်းသော သမီးအတွက်ပင် လက်ဆောင်များ ပို့ပေးခဲ့ဖူးသည်။

ယွမ်ဟွေ့ရုန်သည် လူကြီးများ၏ ကိစ္စများတွင် သူမ၏ သမီးကို မပတ်သက်စေလိုပေ။

ပစ္စည်းများကို စုစည်းပြီးနောက် သူမသည် ပြင်းထန်သော စိတ်ဓာတ်ဖြင့် ကွမ်ကျွီ နန်းဆောင်အတွင်းသို့ ဝင်ရောက်လာခဲ့တော့၏။

ကွမ်ကျွီ နန်းဆောင်မှ အစေခံများက သူမကို အရှေ့ခန်းမဆောင်ဆီသို့ ဦးဆောင်ခေါ်သွားကာ လက်ဖက်ရည်နှင့် မုန့်များကို ယဉ်ကျေးစွာ တည်ခင်းပေးခဲ့ကြသည်။

ယွမ်ဟွေ့ရုန်မှာမူ မလှုပ်မယှက်ဖြင့် သူမ၏မျက်နှာမှာ ထုတ်ထားသော ဓားတစ်လက်ကဲ့သို့ စူးရှပြတ်သားနေခဲ့၏။ "အခမ်းအနားတွေ လုပ်မနေပါနဲ့။ ငါက ကွမ်ကျွီ နန်းဆောင်က လက်ဖက်ရည်ကို မသောက်ဝံ့ပါဘူး။ ဟွေ့ဖေး ဘယ်မှာလဲ"

သူမ ပြောပြီးသည်နှင့် တပြိုင်နက် ယွီမြောင်ဟွာက ပေါ်လာခဲ့၏။

သူမ၏ အကြည့်များမှာ ယွမ်ဟွေ့ရုန် ယူဆောင်လာသော သေတ္တာကြီးနှစ်လုံးပေါ်သို့ ကျရောက်သွားပြီး ဇဝေဇဝါ ဖြစ်သွားရသည်။ "အစ်မ... ဒါက ဘာဖြစ်တာလဲ"

ယွမ်ဟွေ့ရုန်မှာမူ သူမ၏ ဟန်ဆောင်မျက်နှာထားကို မြင်ရသည့်အခါ အလွန်ပင် စိတ်အနှောင့်အယှက် ဖြစ်ရ၏။ "ဘာမှ မဟုတ်ပါဘူး။ နင် အရင်က ပေးထားတဲ့ ပစ္စည်းအချို့ကို ပြန်ပေးမလို့ပါ"

"ကျန်တာတွေကတော့ ကိစ္စမရှိပေမဲ့၊ နင်ရထားတဲ့ ပိုးကြာပန်းလေးတွေကတော့ ငါကိုယ်တိုင် လုပ်ထားတာမို့လို့ အဲဒါတွေကို ပြန်ပေးရမယ်"

ယွီမြောင်ဟွာ မျက်မှောင်ကြုတ်လိုက်၏။ "ညီမ အစ်မကို ဘယ်လိုများ စိတ်အနှောင့်အယှက် ပေးမိလို့လဲ"

ဘာကြောင့် ကွေ့ဖေးက သူမအပေါ် ဤမျှ မကျေမနပ် ဖြစ်နေရပါသနည်း။ အစကတည်းက ပစ္စည်းများ ပြန်တောင်းနေပြီး သူတို့၏ ဆက်ဆံရေးမှာ ထာဝရ ပြီးဆုံးသွားတော့မည့်ပုံစံမျိုး လုပ်ဆောင်နေခဲ့၏။ ဤအချက်က ယွီမြောင်ဟွာအား သူမ၏ အတိတ်ဘဝ မူလတန်းကျောင်းသားဘဝတုန်းက ထိုင်ခုံဖော်နှင့် စကားများခဲ့သည့် မြင်ကွင်းကို ချက်ချင်းပင် ပြန်လည်သတိရသွားစေခဲ့သည်။ သူမ လုံးဝကို စိတ်ရှုပ်ထွေးသွားရ၏။

ယွမ်ဟွေ့ရုန်က အေးစက်စွာ လှောင်ပြောင်လိုက်သည်။ "ဒီကစားပွဲတွေ ကစားနေတာက အဓိပ္ပာယ်မရှိဘူး။ ဧကရာဇ်လဲ ဒီမှာ မရှိဘူးဆိုတော့ နင် ဘယ်သူ့ကို လှည့်စားဖို့ ကြိုးစားနေတာလဲ။ လူတိုင်းက နင့်ရဲ့ ဟန်ဆောင်မှုတွေအောက်မှာ အယုံလွယ်နေမှာ မဟုတ်ဘူး"

ယွီမြောင်ဟွာမှာ မျက်မှောင်ကြုတ်လိုက်မိ၏။ "အစ်မ ဘယ်လိုကောလာဟလတွေကို နားထောင်လာတာလဲဆိုတာ ညီမ တကယ် မသိဘူး—"

ယွမ်ဟွေ့ရုန်က သူမ၏စကားကို ဖြတ်ပြောလိုက်၏။ "မိဖုရားခေါင်ကြီး နင့်အပေါ် ပြခဲ့တဲ့ ဂရုစိုက်မှုတွေနဲ့ နင်က ထိုက်တန်တယ်လို့ ထင်နေတာလား"

[ဟာ... Host! သူမက တကယ်ကြီး မှားနေတာပဲ။ Host က မိဖုရားခေါင်ကြီးကို လုပ်ကြံပြီး အကျဉ်းချခိုင်းတယ်လို့ သူမက ထင်နေတာ။ တစ်ခုခု ရှင်းပြဖို့အတွက် 'ညီမ ပြောစရာ စကားတောင် မရှိတော့ပါဘူး' ဆိုတဲ့ အမူအရာမျိုး လုပ်ကြည့်ပါလား]

ယွီမြောင်ဟွာမှာ Dou E ထက်ပင် ပို၍ မတရားခံရသကဲ့သို့ ခံစားလိုက်ရသည်။ ကွေ့ဖေးက သူမကို အစကတည်းက ဤမျှ ရိုင်းပျစွာ ဆက်ဆံလိမ့်မည်ဟု သူမ မထင်ထားခဲ့ပေ။ သူမက ပွင့်လင်းတတ်မှန်း သိသော်လည်း ဤမျှအထိ ဖြစ်လိမ့်မည်ဟု မထင်ထားခဲ့ခြင်းပင်။

"အစ်မ... အစ်မ လုံးဝ မှားနေပါပြီ။ မိဖုရားခေါင်ကြီးက ကျန်းမာရေး မကောင်းရုံတင်ပါ၊ သူ့ရဲ့ အခြေအနေက အပြင်လူတွေနဲ့ တွေ့ဖို့ မသင့်တော်သေးလို့ပါ"

ယွမ်ဟွေ့ရုန်၏ လေသံက မြင့်တက်လာခဲ့၏။ "ငါ့ကို အဲဒီလို လှပတဲ့စကားတွေနဲ့ လာမပြောနဲ့။ ငါက အဲဒါတွေကို ယုံလောက်တဲ့ လူအလို့ ထင်နေတာလား"

"မိဖုရားခေါင်ကြီး ဒုက္ခရောက်နေတာကို မြင်ရတော့ နင် ပျော်နေမှာပေါ့ ဟုတ်လား"

ယွီမြောင်ဟွာမှာ စိတ်ကို ထိန်းလိုက်ရသည်။ သူမကိုယ်သူမ ဇာတ်လမ်းတွဲ ၁၈ ပိုင်းစာလောက် အထင်လွဲခံရမည့် အခြေအနေမျိုး အဖြစ်မခံနိုင်ပေ။ "အခုအချိန်မှာ ညီမ ဘာပြောပြော အစ်မ ယုံမှာ မဟုတ်ဘူးဆိုတာ သိပါတယ်..."

ယွမ်ဟွေ့ရုန်၏ အပြုံးက ပို၍ အေးစက်သွားခဲ့၏။ "အနည်းဆုံးတော့ နင်က နင့်နေရာကို နင် သိသားပဲ"

နောက်တစ်ခဏတွင် ယွီမြောင်ဟွာက ပြောလိုက်သည်။ "ဒါကြောင့်လဲ အစ်မတ ယုံကြည်ရတဲ့သူတစ်ယောက်ကို ခေါ်ပြီး ရှင်းပြခိုင်းမလို့ပါ။ လာပါ... ဖုန့်ယီ နန်းဆောင်ကို သွားကြမယ်။ မိဖုရားခေါင်ကြီးရဲ့ စကားကိုတော့ အစ်မ ယုံမှာ မဟုတ်လား"

ယွမ်ဟွေ့ရုန် ခဏမျှ ဆွံ့အသွားရ၏။ "ဖုန့်ယီ နန်းဆောင်ကို သွားမယ် ဟုတ်လား"

"နင့်ကျေးဇူးကြောင့် ဖုန့်ယီ နန်းဆောင်က ပိတ်ထားတာလေ။ ငါတောင်မှ မိဖုရားခေါင်ကြီးကို အဲဒီမှာ တွေ့ခွင့်မရတော့ဘူး"

ယွီမြောင်ဟွာမှာ ထပ်ပြောချင်သော်လည်း ရုတ်တရက် သူမ၏စိတ်ထဲတွင် တာဝန်ပေးချက် အသိပေးသံ ပေါ်လာခဲ့သည်။

[နန်းတွင်းရဲ့ ဘုရင်မတစ်ပါး ဖြစ်လာဖို့အတွက် သိမ်မွေ့စွာ ကိုင်တွယ်တတ်တဲ့ အတတ်ပညာကို တတ်မြောက်ထားရမယ်။ 'လက်ဖက်စိမ်း' ကစားပွဲကို ကျွမ်းကျင်စွာ ကစားနိုင်မှသာ တကယ့် လက်ဖက်စိမ်း တွေကို ထွက်ပေါက်မရှိအောင် လုပ်နိုင်မှာပါ။ Host သည် ပင်မတာဝန် ၃.၁ ကို စတင်လိုက်ပါပြီ—မိဖုရားခေါင်ကြီးရဲ့ ရှေ့မှာ ကွေ့ဖေးအပေါ် 'မျက်စိဆေး' (မနာလိုဖြစ်အောင် သိမ်မွေ့စွာ ကုန်းချောခြင်း) ခပ်ပေးလိုက်ပါ၊ သူမက ဖိတ်ခေါ်မခံရတဲ့သူဖြစ်မှန်း သိသွားပါစေ။ တာဝန်ဆုလာဘ်—တချီတိုင်းပြည်ရဲ့ လာမဲ့နှစ်အတွက် ဘေးအန္တရာယ် ကြိုတင်ခန့်မှန်းချက်]

ဟင်?

အဲဒီဆုလာဘ်က တော်တော်လေး ကောင်းပုံရတယ်!

ပိုပြီး အရေးကြီးတာက၊ အရင်က အကျဉ်းချတာ ဒါမှမဟုတ် ပစ္စည်းသိမ်းတာတွေ ပါတဲ့ တာဝန်တွေနဲ့ ယှဉ်ရင်... ဒါက ပိုပြီးတော့ သဘောကောင်းပုံရသည်။

အထင်လွဲခံရသူတစ်ဦးအနေဖြင့် သူမ စိတ်မကောင်းဖြစ်ရသည်။ ထို့ကြောင့် တစ်ဖက်လူကိုလည်း ထိုအရသာမျိုး အနည်းငယ် ပေးကြည့်လျှင် ဘာဖြစ်မည်နည်း။ မိဖုရားခေါင်ကြီးက သေချာပေါက် နားလည်ပေးမှာဖြစ်ပြီး ကွေ့ဖေးသာ သူမ၏ အမှားကို သိသွားရင် သူမကို ပြန်တောင်းပန်လိမ့်မည် မဟုတ်ပါလား။

ယွီမြောင်ဟွာသည် ထိုတာဝန်ကို လုပ်ဆောင်ရန် ဆုံးဖြတ်လိုက်၏။

သူမသည် 'လက်ဖက်စိမ်း' အခန်းကဏ္ဍကို တစ်ခါမှ မကစားဖူးသော်လည်း နန်းတော်ထဲတွင် အားလပ်ချိန်များစွာ ရှိသဖြင့် ဝတ္ထုများနှင့် ဇာတ်လမ်းတွဲများကို ကြည့်ရှုလေ့ရှိရာ—ဒါကို အလွယ်တကူ ကိုင်တွယ်နိုင်ပေသည်။

သူမက သိမ်မွေ့စွာ လှောင်ပြောင်သော လေသံဖြင့် ပြောလိုက်၏။ "ဖြစ်နိုင်တာက မိဖုရားခေါင်ကြီးက အစ်မကို မြင်တိုင်း ခေါင်းကိုက်နေလို့ တွေ့ခွင့်မပေးတာ ဖြစ်မှာပါ။ ဒါပေမဲ့ ညီမကတော့ မတူဘူးလေ။ ညီမက အရမ်း ချစ်ဖို့ကောင်းတော့ မိဖုရားခေါင်ကြီးက သေချာပေါက် တွေ့ချင်မှာပဲ။ မယုံဘူးလား... လိုက်လာခဲ့လေ၊ အစ်မဘာသာ ကိုယ်တိုင်ကြည့်လိုက်ပေါ့"

ကွေ့ဖေးသည် အချိန်မှားပြီး ရောက်သွားခြင်း ဖြစ်မည်ဟု သူမ ခန့်မှန်းလိုက်သည်။ ထိုစဉ်က မိဖုရားခေါင်ကြီးသည် ချမ့်ယွမ် နန်းဆောင်တွင် ရှိနေနိုင်သဖြင့် သဘာဝကျစွာပင် တွေ့ခွင့်မရခဲ့ခြင်း ဖြစ်ပေမည်။

ယွမ်ဟွေ့ရုန်၏ မျက်လုံးများမှာ ဒေါသကြောင့် မီးတောက်မတတ် ဖြစ်နေခဲ့၏။ ဒါဆို အမှန်ပဲပေါ့—ဟွေ့ဖေးက အစကတည်းက ဟန်ဆောင်နေခဲ့တာပဲ။ အခုတော့ သူမရဲ့ မြေခွေးလို သဘာဝအစစ်က နောက်ဆုံးတော့ ပေါ်လာပြီ။ သူမက လူတိုင်းကို လှည့်စားနိုင်ခဲ့တဲ့ လှည့်စားမှုရဲ့ ဆရာတစ်ဆူပဲ။

သူမ၏ မိဖုရားခေါင်ကြီးနှင့် နှစ်ပေါင်းများစွာ ခင်မင်ခဲ့မှုမှာ ဤမျှလွယ်လွယ်နှင့် ပျက်စီးသွားမည် မဟုတ်ပေ။

သူမက အေးစက်စွာ နှာခေါင်းရှုံ့လိုက်၏။ "ကောင်းပြီလေ။ အခုပဲ ဖုန့်ယီ နန်းဆောင်ကို အတူတူ သွားကြတာပေါ့"

ဟွေ့ဖေးတစ်ယောက် တွေ့ခွင့်မရဘဲ အငြင်းခံရပြီးနောက် ဘာပြောမလဲဆိုတာကို သူမ မြင်ချင်နေခဲ့သည်။

……

မိနစ်နှစ်ဆယ်ခန့်အကြာတွင် ယွီမြောင်ဟွာနှင့် ယွမ်ဟွေ့ရုန်တို့သည် ဖုန့်ယီ နန်းဆောင်၏ အရှေ့သို့ ရောက်ရှိလာခဲ့ကြ၏။

တံခါးကြီးများမှာ တင်းတင်းကြပ်ကြပ် ပိတ်ထားဆဲဖြစ်ပြီး အစေခံတစ်ဦးသာ စောင့်ကြပ်နေခဲ့သည်။

ယွမ်ဟွေ့ရုန်၏ အေးစက်သော အကြည့်များအောက်တွင် ယွီမြောင်ဟွာက ရှေ့သို့ လှမ်းထွက်လိုက်ပြီး ပြောလိုက်၏။ "ညီမယွီပါ၊ မိဖုရားခေါင်ကြီးနဲ့ တွေ့ဖို့ အရေးကြီးကိစ္စ ရှိလို့ပါ"

အစေခံက ထိုအမျိုးသမီးနှစ်ဦးကို ရိုသေစွာ ဦးညွှတ်လိုက်သည်။ "ခဏလောက် စောင့်ပေးပါအုံး သခင်မတို့။ ကျွန်တော်မျိုးမ အခုချက်ချင်း အကြောင်းကြားပေးပါ့မယ်"

ယွမ်ဟွေ့ရုန်ကမူ လှောင်ပြောင်လိုက်၏—မိဖုရားခေါင်ကြီးက သူတို့ကို တွေ့မှာ မဟုတ်ဘူး။ ငါ့ကိုတောင် မတွေ့တာ—ဒုက္ခအားလုံးရဲ့ အစဖြစ်တဲ့ ယွီမြောင်ဟွာကိုဆိုရင် ပိုတောင် မတွေ့နိုင်ဘူး။

ခဏမျှ စောင့်ဆိုင်းပြီးနောက် မိဖုရားခေါင်ကြီး၏ အနီးကပ်အစေခံ အဒေါ်ဖန့် ကိုယ်တိုင် ထွက်လာခဲ့သည်။ သူမက ယဉ်ကျေးစွာ ဦးညွှတ်လိုက်၏။ "စောင့်ရတာ စိတ်မရှိပါနဲ့ သခင်မတို့။ ကျေးဇူးပြုပြီး အတွင်းကို ကြွပါ"

ဖုန့်ယီ နန်းဆောင်၏ တံခါးကြီးများ ပွင့်သွားခဲ့လေပြီ။

ယွမ်ဟွေ့ရုန်သည် မိုးကြိုးပစ်ခံလိုက်ရသကဲ့သို့ ခံစားလိုက်ရသည်—လွန်ခဲ့သော တစ်နာရီကတင် သူမကို တွေ့ခွင့်မပေးဘဲ ငြင်းဆိုခဲ့သည် မဟုတ်ပါလား။ အခု ယွီမြောင်ဟွာနဲ့ကျမှ မိဖုရားခေါင်ကြီးက ဘာလို့ တွေ့ခွင့်ပေးရတာလဲ။

ယွမ်ဟွေ့ရုန်၏ နှလုံးသားမှာ ကြေကွဲသွားရ၏။

......

ယွီမြောင်ဟွာ - ဘယ်သူက ဖိတ်ခေါ်မခံရတဲ့သူလဲဆိုတာ ခန့်မှန်းကြည့်ပါအုံး။

ယွမ်ဟွေ့ရုန် - ငါ အရင်ရောက်နေတာ ထင်ရှားပါတယ်... မိဖုရားခေါင်ကြီးနဲ့ ပိုသိတာပဲဖြစ်ဖြစ်၊ ညီအစ်မတွေ ဖြစ်လာတာပဲဖြစ်ဖြစ်၊ ဘာလို့ ဒီလိုတွေ ဖြစ်နေရတာလဲ။