အခန်း ၄၇

ငါးဆားနယ် ကိုယ်လုပ်တော်

အပိုင်း ၄၇

"ဟွေ့ဖေးကလဲ ဒီကိစ္စကြောင့် ကျန်းကို အထင်လွဲပြီး သူမရဲ့ စွမ်းဆောင်ရည်တွေကို သုံးလို့တောင် မိဖုရားခေါင်ကြီးကို ကာကွယ်ဖို့ ကြိုးစားခဲ့သေးတယ်။ သူမမှာ ကံကောင်းခြင်းတွေ ရှိတယ်—အဲဒီနေ့မှာတင်ပဲ သူမက ရိုက်နှိပ်စနစ်ထက် မနည်းတဲ့ အခြား စွမ်းဆောင်ရည်တစ်ခုကို ထပ်ပြီး ရရှိခဲ့ပြန်တယ်။ သူမက မိဖုရားခေါင်ကြီးကို အဲဒီလောက်အထိ ချစ်ခင်တွယ်တာပြီး သူမရဲ့ စွမ်းဆောင်ရည်တွေကို လိုလိုလားလား ပေးအပ်ချင်လိမ့်မယ်လို့ ငါ မထင်ထားခဲ့ဘူး" ဖေးလင်ယွဲ့က စကားလမ်းကြောင်းကို အမြန်လွှဲလိုက်ရင်း၊ သားဖြစ်သူရှေ့တွင် ဟွေ့ဖေးအား ချီးမွမ်းရန် အခွင့်အရေးကို အရယူလိုက်၏။

အကယ်၍ ဟွေ့ဖေးသာ အိမ်ရှေ့မင်းသားကို သူမ၏ တာဝန်ပစ်မှတ်အဖြစ် ရွေးချယ်ခဲ့လျှင်၊ သူ၏ နှစ်သက်မှုအဆင့် မြင့်မားသရွေ့ သူမသည် သက်ဆိုင်ရာ ဆုလာဘ်များကို ရရှိလိမ့်မည် ဖြစ်ပေသည်။

ဟွေ့ဖေး၏ အမည်ကို ကြားလိုက်ရသောအခါ ဖေးချီယန်မှာ အငိုက်မိသွားရပြီး မျက်နှာတွင် စိတ်မသက်မသာ ဖြစ်ရသော အမူအရာတစ်ခု ဖြတ်ပြေးသွားခဲ့သည်။

ဘာပဲဖြစ်ဖြစ်... သူမက သူ့ ခမည်းတော်၏ ကိုယ်လုပ်တော်တစ်ဦး ဖြစ်သည်။ အိမ်ရှေ့မင်းသားတစ်ဦးအနေဖြင့် သူသည် သူမနှင့် သင့်တော်သော အကွာအဝေးတစ်ခုတွင် နေထိုင်သင့်သည် မဟုတ်ပါလား။

သူ ပြောနိုင်သည်မှာ "ဟွေ့ဖေးက လူကောင်းတစ်ယောက်ပါ" ဟူ၍ပင်။

ဖေးလင်ယွဲ့သည် ခေါင်းညိတ်လိုက်ပြီး ဖေးချီယန် ရှေ့တွင် သူမအား ဆက်၍ ချီးကျူးစကား ဆိုနေခဲ့ရာ၊ နောက်ဆုံးတွင် အိမ်ရှေ့မင်းသားသည် မယ်တော် မိဖုရားခေါင်ကြီးထံသို့ သွားရောက်တွေ့ဆုံရန် အကြောင်းပြချက်ဖြင့် ခွင့်ပန်ကာ ထွက်ခွာခဲ့တော့သည်။

သူ ဖုန့်ယီ နန်းဆောင်သို့ ရောက်ရှိသောအခါ မိဖုရားခေါင်ကြီးမှာ စိတ်ရွှင်လန်းနေသည်ကို တွေ့လိုက်ရပြီး၊ သူမသည် နန်းတွင်းအစေခံများအား ဘဏ္ဍာတိုက်ထဲမှ ပိတ်စများကို ယူဆောင်လာခိုင်းကာ စိတ်အေးလက်အေး ရွေးချယ်နေခဲ့၏။

"...ဒီကျားသစ်ရေနဲ့ ကျားရေတွေကို နောက်မှ ရုန်အန်း နန်းဆောင်ကို ပို့ပေးလိုက်ပါ—ယန်ဖေးက ဒါတွေကို သေချာပေါက် သဘောကျလိမ့်မယ်"

"ဒီမြွေပါဖြူသားရေနဲ့ မြေခွေးနီသားရေတွေကိုတော့ ဟွေ့ဖေးအတွက် ချန်ထားလိုက်။ ဥဒေါင်းပုံစံ ပိုးသားနဲ့ ကတ္တီပါတွေက သူမနဲ့ လိုက်ဖက်တယ်—ဒါတွေကိုလဲ သူမဆီ ပို့ပေးလိုက်ပါအုံး"

ဟွေ့ဖေးပင်။

ဖေးချီယန်သည် ဖုန့်ယီ နန်းဆောင်တွင်ပင် သူမ၏ အမည်ကို ထပ်မံကြားရလိမ့်မည်ဟု မထင်ထားခဲ့ချေ။ သူမ၏ တည်ရှိမှုက သူ့နောက်သို့ နေရာအနှံ့ လိုက်ပါနေသကဲ့သို့ ရှောင်လွှဲ၍ မရနိုင်ပုံရပေသည်။

သူ ရောက်ရှိလာသည်ကို သတိပြုမိသောအခါ မိဖုရားခေါင်ကြီးက ပြုံးလိုက်ပြီး အခြား အစေခံများကို ထွက်ခွာခိုင်းလိုက်၏။

"မင်း အမေ့အတွက် စိုးရိမ်လို့ လာခဲ့တာမလား။ စိုးရိမ်မနေပါနဲ့—အမေ တကယ်ကို နေကောင်းပါတယ်။ တကယ်တော့ ဒီရက်အနည်းငယ်အတွင်းမှာ အမေ သေချာ အနားယူနေတာပါ"

နှစ်သစ်ကူး အလှူပွဲဟူသည် အမြဲတမ်း ပင်ပန်းဆင်းရဲလှသော ကိစ္စတစ်ခု ဖြစ်သည် မဟုတ်ပါလား။

ဖေးချီယန်ကမူ အဓိပ္ပာယ်ပါပါ ပြောလိုက်သည်။ "ပြင်ပမှာတော့ ကောလာဟလတွေ တော်တော်လေး ထွက်နေပါတယ်"

မိဖုရားခေါင်ကြီးမှာ မျက်မှောင်ကြုတ်လိုက်မိ၏။ "တစ်စုံတစ်ယောက်က ဟွေ့ဖေးရဲ့ ဂုဏ်သတင်းကို ထပ်ပြီး ဖျက်ဆီးဖို့ ကြိုးစားနေတာ ဖြစ်မှာ စိုးရိမ်မိတယ်"

သူမ နောက်ပိုင်းတွင် ပြဿနာရှာသူအချို့ကို စံပြအဖြစ် အပြစ်ပေးရန် ဆုံးဖြတ်လိုက်သည်။

ဖေးချီယန် ယခုအခါ သေချာသွားခဲ့ပြီ ဖြစ်သည်—သူ၏ မယ်တော် နန်းဆောင်ပိတ်ခံရခြင်းမှာ ဟွေ့ဖေးနှင့် မည်သို့မျှ မသက်ဆိုင်ချေ။ သူ၏ ခမည်းတော်သည် သူ့အား လိမ်ညာခဲ့ခြင်း မဟုတ်ပေ။

မိဖုရားခေါင်ကြီးက ထပ်၍မိန့်ကြားလိုက်၏။ "မနက်ဖြန်က မင်းရဲ့ အနားယူရက်ပဲ။ မြို့စားချင်ရဲ့ အိမ်တော်ဆီကို သွားကြည့်တာက ပိုကောင်းလိမ့်မယ်"

အိမ်ရှေ့မင်းသား၏ မျက်နှာထားမှာ တည်ကြည်သွားခဲ့သည်။ "နားလည်ပါပြီ "

ဧကရာဇ်ကဲ့သို့ပင် မိဖုရားခေါင်ကြီးသည်လည်း သူမ၏ သားဖြစ်သူက ယွီမြောင်ဟွာအပေါ် အထင်လွဲသွားမည်ကို စိုးရိမ်နေသဖြင့် ပြုံးလျက် ပြောလိုက်သည်။ "ဒီကိစ္စအတွင်းမှာ အမေ့ကို အံဩဆုံးဖြစ်စေတာက ဟွေ့ဖေးပဲ။ သူမက အမေ့အတွက် မားမားမတ်မတ် ရပ်တည်ပေးလိမ့်မယ်လို့ အမေ တစ်ခါမှ မထင်ထားခဲ့ဘူး"

"အရှင်မင်းကြီးကိုယ်တိုင်တောင် အနည်းငယ် မနာလိုဖြစ်သွားတယ်လို့ အမေ ထင်တယ်"

နောက်တစ်ကြိမ်တွင်လည်း ဖေးချီယန်သည် ဟွေ့ဖေးအကြောင်း ပြောဆိုမှုများအကြား ဝန်းရံခံလိုက်ရပြန်သည်။

သူ၏ မယ်တော်သည်လည်း… သူ၏ ခမည်းတော်နှင့် မယ်တော်မိဖုရားကြီးတို့၏ ခြေရာအတိုင်း လိုက်နေပုံရပြီး၊ စကားနှစ်ခွန်းပြောတိုင်းတွင် ဟွေ့ဖေးအကြောင်းကို ထည့်သွင်းပြောဆိုနေခဲ့၏။

သူသည် တည်ငြိမ်သော နားထောင်ခြင်း အမူအရာကို ဆက်၍ထိန်းသိမ်းထားသော်လည်း သူ၏ အကြည့်များမှာ အနည်းငယ် ဝေးကွာသွားခဲ့သည်။

သူမ၏ စကားပြောဆိုမှု အလယ်တွင် မိဖုရားခေါင်ကြီးသည် သားဖြစ်သူ စိတ်လွတ်နေသည်ကို သတိပြုမိလိုက်၏။

သူ၏ အတွေးများ လွင့်ပျံနေသည့်တိုင် သူ၏ အမူအရာမှာ အပြစ်ပြောစရာမရှိဘဲ—ဝါးပင်တစ်ပင်ကဲ့သို့ပင် ပြေပြစ်ပြီး ခန့်ညားလွန်းလှပေသည်။

ပုံမှန်အခြေအနေအရဆိုလျှင် သူ၏ လက်ထပ်ထိမ်းမြားမှု ကိစ္စရပ်များကို ယခုအချိန်တွင် အခြေချပြီး ဖြစ်ရမည်။

သို့သော် လက်ရှိ နိုင်ငံတော်၏ အရေးကြီးသော ကိစ္စရပ်များကြောင့် လျာထားသူကို အတည်မပြုမီ သူ၏ ထိမ်းမြားမှုကို ဆောင်ရွက်ရန် မဖြစ်နိုင်သကဲ့သို့၊ သူ့အား အမျိုးသမီးများနှင့် ရင်းနှီးကျွမ်းဝင်စေရန် နန်းတွင်းအစေခံများ ခွဲဝေပေးခြင်းလည်း ရှိလိမ့်မည် မဟုတ်ချေ။

သို့သော်လည်း ဧကရာဇ်ပြောပြချက်အရ ထန်ဟွာ ဖြစ်သော ရှန်စုရုန့်သည် ယွီမြောင်ဟွာကြိုက်တတ်သော အမျိုးအစား ဖြစ်ပုံရသည်။ သို့သော် သူမ၏ သားဖြစ်သူက ပို၍ သာလွန်သည်မှာ ထင်ရှားလှပေသည်မဟုတ်ပါလား။

မိဖုရားခေါင်ကြီးသည် ရှန်စုရုန့်နှင့် ယခင်က တွေ့ဆုံဖူးသည်—သူသည် တူညီသော ဝတ်စုံပြာများကို ဝတ်ဆင်ထားသည့် အခြားသော ပညာရှင်များကြားတွင်ပင် ထင်ရှားလှပသော ခန့်ညားသူတစ်ဦး ဖြစ်၏။ သူ၏ ထူးခြားသော ရုပ်ရည်နှင့် ပါရမီကြောင့် ဧကရာဇ်၏ မျက်နှာသာပေးမှုကို ရရှိကာ ထန်ဟွာဘွဲ့ကို ဆွတ်ခူးနိုင်ခဲ့ခြင်း ဖြစ်သည်။

အတွေးတစ်ခု ရရှိသွားပြီးနောက် သူမသည် နီလာပြာရောင် တိမ်တိုက်ပုံစံ ပိုးထည်ကို ပုတ်ပြလိုက်၏။ "မင်းရဲ့ နန်းဆောင်က အပ်ချုပ်သမားတွေကို နှစ်သစ်ကူးအတွက် ဒါနဲ့ ဝတ်စုံတစ်စုံ ချုပ်ခိုင်းလိုက်ပါ။ ဒီအရောင်က မင်းနဲ့ အလွန် လိုက်ဖက်လိမ့်မယ်"

ဖေးချီယန်မှာ ဇဝေဇဝါ ဖြစ်သွားရသည်။

သူ၏ မယ်တော်သည် တစ်ချိန်က စိမ်းရောင်က သူ့အတွက် အသင့်တော်ဆုံးဟု အမြဲပြောခဲ့ဖူးသော်လည်း ယခုအခါ အပြာရောင်သို့ ပြောင်းလဲလိုက်ပြန်၏။

ထို့အပြင် သူ၏ နှစ်သစ်ကူး ဝတ်စုံမှာလည်း ကြိုတင်ပြင်ဆင်ပြီးသား ဖြစ်ပေသည်။

သို့သော်လည်း ဒါက သူမ၏ ဂရုစိုက်မှုကို ပြသခြင်း ဖြစ်သဖြင့် ငြင်းပယ်ရန် အကြောင်းပြချက် မရှိခဲ့ချေ။

......

ကွမ်ကျွီ နန်းဆောင်၌။

"အဟွတ်... ဟွတ်... အဟွတ်..." ယွီမြောင်ဟွာသည် တစ်ကိုယ်လုံး တုန်ခါသွားသည်အထိ ပြင်းထန်စွာ ချောင်းဆိုးနေပြီး အားစိုက်လိုက်ရသဖြင့် သူမ၏ မျက်နှာတစ်ခုလုံးလည်း နီမြန်းနေခဲ့သည်။

သူမ တကယ်ကို စိတ်ပျက်ဒေါသထွက်မိသည်—အဘယ်ကြောင့်ဆိုသော် ယခုတစ်ကြိမ် ပြင်ပတွင် ထွက်ပေါ်နေသော ကောလာဟလများမှာ အလွန်အကျွံ ဖြစ်လွန်းနေသောကြောင့်ပင်။ သူတို့က သူမတွင် ကိုယ်ဝန်ရှိနေသဖြင့် မိဖုရားခေါင်ကြီးကို မဟုတ်မမှန် စွပ်စွဲကာ ထောင်ချောက်ဆင်ခဲ့ခြင်းဖြစ်သည်ဟုပင် ပြောဆိုနေကြလေသည်။

သူမက သူတို့မျက်လုံးထဲမှာ အဲဒီလောက်အထိ ဦးနှောက်မရှိတဲ့ပုံ ပေါက်နေတာလား။

သူမတွင် ကိုယ်ဝန်ရှိနေခဲ့လျှင်ပင် ထိုကလေးကို လစေ့သည်အထိ လွယ်ထားနိုင်ပါ့မလားနှင့် ကျန်းကျန်းမာမာ မွေးနိုင်ပါ့မလားဟူသည်မှာ လုံးဝ မတူညီ‌သော ကိစ္စရပ်တစ်ခုပင် ဖြစ်ပေသည်။ ဤခေတ်ကာလတွင် ကလေးငယ်များမှာ အသက်ငယ်ငယ်ဖြင့် သေဆုံးနိုင်ခြေ အလွန်များပြားလှပြီး၊ တော်ဝင်မိသားစုတွင်ပင် ထိုသို့သော အဖြစ်အပျက်မျိုး ရှိတတ်လေ၏။

ထို့ကြောင့် ဤကောလာဟလများကို ဖြန့်ဝေသူသည် မိုက်မဲရုံတင်မကဘဲ စိတ်ပုပ်စိတ်ယုတ်ရှိသူလည်း ဖြစ်ရမည်။

ချွေ့ဝေက ဒေါသတကြီးဖြင့် ပြောလိုက်၏။ "သူတို့က ဘာဖြစ်လို့ သခင်မကိုပဲ အမြဲတမ်း ပစ်မှတ်ထားနေကြတာလဲ မသိဘူး"

ယွီမြောင်ဟွာကမူ သူမ၏ လက်ဖက်ရည်ခွက်ကို အသာအယာ ချလိုက်သည်။ "မျက်နှာသာပေးခံရတဲ့ ကိုယ်လုပ်တော်တစ်ယောက်ရဲ့ ဘဝက ဒီလိုပါပဲ"

ပြစ်တင်ဝေဖန်မှု အားလုံးသည် သူမဆီသို့သာ ပုံကျလာတတ်သည် မဟုတ်ပါလား။

သူမ ထပ်‌၍ပြောကြားလိုက်၏။ "ငါ့ အမေနဲ့ မြောင်ပင်းတို့ကိုတော့ ဒီအကြောင်းတွေ လုံးဝ မကြားမိစေနဲ့"

သူမ၏ အမေနှင့် မြောင်ပင်းတို့သည် ညဘက်တွင် ရုန်ရှို့ နန်းဆောင်၌ အနားယူကြပြီး နေ့ဘက်တွင်မူ သူမနှင့်အတူ အချိန်ကုန်ဆုံးကြသည်။ အေးစက်သော ရာသီဥတုနှင့် အပြင်ဘက်တွင် ဆီးနှင်းများ ကျဆင်းနေခြင်းကြောင့် သူတို့သည် မကြာသေးမီက တော်ဝင်ဥယျာဉ်ဆီသို့ပင် သွားရောက်ခြင်း မရှိခဲ့ချေ။ ပုံမှန်အခြေအနေအရဆိုလျှင် ထိုကဲ့သို့သော ကောလာဟလများမှာ သူတို့၏ နားထဲသို့ ရောက်ရှိနိုင်မည် မဟုတ်ပေ။

ချွေ့ဝေ ခေါင်းညိတ်လိုက်သည်။ "ဒီအစေခံက သေချာ အမိန့်ပေးထားပါတယ်။ သခင်မ.. ကျွန်မတို့ ကောလာဟလတွေကို ရှင်းလင်းချက် ထုတ်သင့်လား "

ယွီမြောင်ဟွာ မျက်မှောင်ကြုတ်လိုက်မိ၏။ "ဒီအတိုင်း လွှတ်ထားလိုက်ပါ"

သူမအနေဖြင့် ရှေ့သို့ထွက်ကာ မိမိတွင် ကိုယ်ဝန်မရှိကြောင်း အော်ဟစ်ငြင်းဆိုနေ၍ မရနိုင်ပေ—ထိုသို့ပြုလုပ်ခြင်းက သူမအား လူပြက်တစ်ယောက် ဖြစ်လာစေရုံသာ ရှိလိမ့်မည်။

အကယ်၍ အခြေအနေက တကယ်ကို ဆိုးဝါးလာလျှင်မူ သူမသည် မယ်တော်ကြီးရှေ့မှောက်သို့ သွားရောက်ကာ ငိုယိုပြ၍ ရသေးသည်။

အစောပိုင်းက သူမ၏ လှည့်ကွက်များ အောင်မြင်ခဲ့ခြင်းကြောင့် ယခုအခါ သူမသည် မိမိ၏ သရုပ်ဆောင်မှု စွမ်းရည်အပေါ် ယခင်ကနှင့်မတူအောင် ယုံကြည်မှု တိုးပွားနေခဲ့ပြီ ဖြစ်၏။

သို့သော် ယွီမြောင်ဟွာဘက်မှ မည်သည့်အရာမျှ မလုပ်ဆောင်ရသေးမီမှာပင် မိဖုရားခေါင်ကြီးဘက်မှ စတင်၍ အရေးယူဆောင်ရွက်ခဲ့သည်။

အဒေါ်ဖန့် ကိုယ်တိုင် လူတစ်စုကို ဦးဆောင်ကာ ကောလာဟလများ ဖြန့်ဝေခဲ့သည့် နန်းတွင်းအစေခံများကို အတန်းလိုက် ဆွဲခေါ်သွားပြီး၊ ဧကရာဇ်စီရင်ဆုံးဖြတ်နိုင်ရန် ချမ့်ယွမ် ခန်းမဆောင်သို့ ပို့ဆောင်လိုက်၏။

ထိုအထဲတွင် လီကျောက်ယွမ်၏ နန်းဆောင်မှ အစေခံမလေးတစ်ဦးလည်း ပါဝင်နေခဲ့သည်။

ထို့ကြောင့် လီကျောက်ယွမ် ကိုယ်တိုင် တောင်းပန်ရန်အတွက် ကွမ်ကျွီ နန်းဆောင်ဆီသို့ ရောက်ရှိလာခဲ့ရတော့သည်။

ယွီမြောင်ဟွာ ပြတ်ပြတ်သားသားပင် ပြောလိုက်၏။ "ကောလာဟလတွေကြောင့် ငါ ခေါင်းကိုက်ပြီး အနားယူနေတယ်လို့၊ ဒါကြောင့် သူမကို မတွေ့နိုင်ဘူးလို့ သွားပြောလိုက်။ ပြီးတော့ သူမ ယူလာတဲ့ ဘယ်လက်ဆောင်ကိုမှလဲ ငါ လက်မခံဘူးလို့ ပြောလိုက်ပါ"

ဖေး ရာထူးသို့ တိုးမြှင့်ခံရပြီးကတည်းက ယွီမြောင်ဟွာသည် ပို၍ ယုံကြည်မှု ရှိလာခဲ့ပြီး စိတ်တိုင်းကျ ပြုမူနေထိုင်နိုင်ခဲ့သည်။

သူမသည် ဤမျှအထိ ကြိုးစားအားထုတ်ခဲ့ရသည် ဖြစ်ရာ—အကယ်၍ သူမ မနှစ်သက်သော လူများနှင့် အပေါ်ယံ သဟဇာတဖြစ်အောင် ဟန်ဆောင်ပြီး ဆက်ဆံနေရဦးမည်ဆိုပါက၊ စိတ်မွန်းကြပ်မှုကြောင့် သေဆုံးသွားနိုင်ပေသည်။ သူမကို မုန်းတီးသူများသည် သူမက မည်မျှပင် ရင်းနှီးဖော်ရွေစွာ ဆက်ဆံပါစေ စိတ်ပြောင်းလဲကြမည် မဟုတ်ချေ။ အဆိုးဆုံးအနေဖြင့် ၎င်းတို့သည် သူမအား အားနည်းပြီး အနိုင်ကျင့်ရလွယ်ကူသူဟုပင် ထင်မှတ်သွားကြလိမ့်မည်။

ချွေ့ဝေသည် သွက်လက်စွာဖြင့် လီကျောက်ယွမ်အား ရင်ဆိုင်ရန် အပြင်သို့ ထွက်လာခဲ့သည်။

သူမက အားနာရသော အမူအရာဖြင့် ပြောလိုက်သည်။ "ကိုယ်လုပ်တော်လီ... ကျွန်မတို့ မယ်မယ်က ကောလာဟလတွေကြောင့် ခေါင်းကိုက်ဝေဒနာ ခံစားနေရလို့၊ အိပ်ရာကနေထပြီး သခင်မကို လက်ခံမတွေ့ဆုံနိုင်ပါဘူး "

လီကျောက်ယွမ်က နောင်တရသည့် မျက်နှာထားဖြင့် ပြောလိုက်သည်။ "ဒါက ယွီဖေးကို လာနှောင့်ယှက်မိတဲ့ ငါ့အမှားပါပဲ။ ချွမ်ထောင်က ကွယ်ရာမှာ အခုလို အတင်းအဖျင်းတွေ လျှောက်ပြောလိမ့်မယ်လို့ ငါ လုံးဝ မထင်ထားခဲ့ဘူး။ ငါ လူရွေးမှားသွားတာပါ"

"ငါ ဆေးဖက်ဝင် အပင်အချို့ ယူလာခဲ့တယ်၊ ဒါကို ယွီဖေး အနေနဲ့ ငါ့ရဲ့ ရိုးသားတဲ့ စေတနာ အနည်းငယ်အဖြစ် လက်ခံပေးလိမ့်မယ်လို့ မျှော်လင့်ပါတယ်"

ချွေ့ဝေ ပြန်‌၍ပြောလိုက်သည်။ "မယ်မယ်က လက်ရှိမှာ နာလန်ထစ ပြုပြင်နေတာမို့၊ ခွင့်ပြုချက်မရှိဘဲ ဘယ်အားဆေးကိုမှ သုံးစွဲလို့ မရပါဘူး။ ဒီအစေခံက မယ်မယ်ကိုယ်စား ကျေးဇူးတင်ပါတယ်"

‌လီကျောက်ယွမ်သည် ကွမ်ကျွီ နန်းဆောင်က သူမအား ဤမျှအထိ ပြတ်ပြတ်သားသား ငြင်းပယ်လိမ့်မည်ဟု မမျှော်လင့်ထားခဲ့ချေ။ ယွီဖေးသည် သူမအား တွေ့ဆုံရန် ငြင်းဆိုရုံတင်မကဘဲ၊ သူမကို နှင်လွှတ်ရန် အစေခံတစ်ဦးကိုသာ စေလွှတ်ခဲ့သည့်အပြင်၊ သူမ၏ တောင်းပန်သည့် လက်ဆောင်များကိုပင် လက်မခံခဲ့ပေ။ သူမ စိတ်နာသွားသည်မှာ ထင်ရှားလှ၏။

သူမ၏ စိတ်ထဲတွင် မကျေနပ်မှုများ တောက်လောင်လာခဲ့သည်—ရာထူးတိုးပြီးကတည်းက ယွီဖေးသည် တကယ့်ကို မောက်မာလာပြီး၊ သူမအတွက် ဤမျှလောက်သော မျက်နှာကိုပင် ချန်မထားပေးချေ။

သို့သော်လည်း သူမသည် သူမနှင့် မထိပ်တိုက်တွေ့ဝံ့ချေ—အဆင့်အတန်းရော မျက်နှာသာပေးခံရမှုတွင်ပါ သူမက များစွာ နိမ့်ကျလွန်းနေသောကြောင့် ဖြစ်၏။ ဥပမာအားဖြင့်၊ သူမသည် ယွီဖေးထက် ဆယ်စုနှစ်တစ်ခုကျော် စောစီးစွာ နန်းတော်သို့ ရောက်ရှိခဲ့သော်လည်း၊ သူမသည် အံကြိတ်ကာ သူမအား "အစ်မတော်" ဟု ခေါ်ဆိုနေရဆဲ ဖြစ်ပေသည်။

ပြီးခဲ့သည့်နှစ်က ယွီဖေးကို ကိုယ်လုပ်တော် အဖြစ် ပထမဆုံး စတင်ခန့်အပ်စဉ်က သူမ၏ အဆင့်အတန်းမှာ လီကျောက်ယွမ် အောက်တွင်သာ ရှိသေးသည်။ မျှော်လင့်မထားဘဲ တစ်လအတွင်းမှာတင် သူမသည် သဲ့ဖေး၊ ရှန်ဖေးတို့နှင့် ရင်ဘောင်တန်းနိုင်သည့် အဆင့်အထိ တဟုန်ထိုး မြင့်တက်သွားလိမ့်မည်ဟု မည်သူ သိနိုင်ပါအံ့နည်း။

လီကျောက်ယွမ်က အတင်းအကျပ် ပြုံးရင်း ပြောလိုက်သည်။ "ဒါဆိုရင်တော့ ငါ ယွီဖေးကို ဆက်ပြီး မနှောင့်ယှက်တော့ပါဘူး"

မထွက်ခွာမီတွင် သူမသည် လှည့်ကွက်အသေးစားလေးတစ်ခု သုံးခဲ့သည်—သူမ၏ လက်ဆောင်များကို ထားခဲ့ရန် မေ့လျော့နေသကဲ့သို့ ဟန်ဆောင်လိုက်ခြင်း ဖြစ်သည်။

သူမ ကွမ်ကျွဌ နန်းဆောင်အပြင်ဘက်သို့ လှမ်းထွက်လိုက်စဉ်တွင် သူမ၏ နှုတ်ခမ်းထောင့်၌ သရော်ပြုံးတစ်ခု ယှက်သန်းသွားခဲ့သည်။

သို့သော် ခဏမျှပင် မကြာလိုက်ဘဲ သူမ၏ နောက်မှ ကပျာကယာ လျှောက်လှမ်းလာသော ခြေသံများကို ကြားလိုက်ရ၏။

နန်းတော်အတွင်းတွင် အခြေအနေ အရေးမကြီးပါက အစေခံများကို ခြေသံလုံလုံဖြင့် လျှောက်လှမ်းရန် လေ့ကျင့်ပေးထားသည်။ မည်သူက ဤမျှအထိ စည်းကမ်းမဲ့ဝံ့သနည်း။

နောက်တစ်စက္ကန့်တွင် တစ်စုံတစ်ယောက်က အော်ဟစ်ခေါ်ဆိုလိုက်သည်။ "ကိုယ်လုပ်တော်လီ"

ထိုအသံမှာ—ယွီဖေး၏ အနီးကပ် အစေခံမလေး မဟုတ်ပါလား။

လီကျောက်ယွမ်၏ စိတ်ထဲတွင် မကောင်းသော အငွေ့အသက်တစ်ခု ခံစားလိုက်ရသည်။ သူမသည် တောင့်တောင့်ကြီး လှည့်ကြည့်လိုက်ရာ၊ ချွေ့ဝေနှင့် သူမ မသိသော အခြား အစေခံမလေးတစ်ဦးတို့သည် သူမ "ထားခဲ့မိသော" လက်ဆောင်များကို ကိုင်ဆောင်ကာ သူမနောက်သို့ ပြေးလိုက်လာသည်ကို မြင်လိုက်ရ၏။

ချွေ့ဝေက ဘေးပတ်ဝန်းကျင်မှ လူများ ကြားနိုင်လောက်သည့် အသံဖြင့် ပြောလိုက်သည်။ "ကိုယ်လုပ်တော်လီ... မယ်မယ် ဒါတွေကို ထားခဲ့မိလို့ပါ။ ဒီအစေခံက အရာအားလုံးကို မယ်မယ်ဆီ ပြန်ပြီး ယူဆောင်လာပေးတာပါ"

သူမသည် အရိုအသေပြုလိုက်ပြီးနောက် ဟုန်ရှင်းနှင့်အတူ ရှေ့သို့ လှမ်းလာကာ၊ ထိုလက်ဆောင်များကို လီကျောက်ယွမ်၏ အစေခံများ လက်ထဲသို့ အတင်းထိုးထည့်ပေးလိုက်၏။

လီကျောက်ယွမ်မှာ ဆွံ့အသွားရပြီး၊ ဒေါသထွက်လွန်းသဖြင့် သွေးပင် အန်မတတ် ခံစားလိုက်ရသည်။ ဤမျှအထိ ရက်စက်သော တန်ပြန်တိုက်စစ်မျိုး ရှိလိမ့်မည်ဟု သူမ လုံးဝ မထင်ထားခဲ့မိချေ။

ကွမ်ကျွီ နန်းဆောင်သည် တကယ့်ကို ညစ်ပတ်စွာ တိုက်ခိုက်တတ်ပေသည်။

သူမသည် မိမိအပေါ်သို့ ကျရောက်နေသော မရေမတွက်နိုင်သော အကြည့်များကို ခံစားနေရသည်—ယနေ့ညနေ ရောက်လျှင်မူ၊ သူမ၏ တောင်းပန်မှုကို လူပုံအလယ်တွင် ငြင်းပယ်ခြင်းခံရကြောင်း နန်းတွင်းတစ်ခုလုံး သိရှိသွားကြပေလိမ့်မည်။

သူမ၏ လက်သီးများမှာ အင်္ကျီလက်စ ကွယ်ရာတွင် တင်းတင်းဆုပ်ထားလျက် ရှိပြီး၊ အရှက်ရမှုကြောင့် မျက်နှာတစ်ခုလုံးလည်း ပူထူနေခဲ့သည်။ ကွမ်ကျွီ နန်းဆောင်သည် တကယ်ကို လွန်လွန်းလှ၏။

သို့သော် သူမအနေဖြင့် မည်သို့မျှ သွားရောက်တိုင်တန်း၍ မရနိုင်ချေ။ ပြင်ပလူများအတွက်မူ၊ သူမ အစေခံ၏ လုပ်ရပ်သည် သူမကိုယ်တိုင်၏ လုပ်ရပ်သာ ဖြစ်ပေသည်။

ချွမ်ထောင်သည် ဂရုတစိုက် ပြုမူခဲ့သော်လည်း၊ နောက်ဆုံးတွင် ဖမ်းမိသွားခဲ့ရသည် မဟုတ်ပါလား။

ထို့အပြင် ဤဖြစ်ရပ်က အခြားသော အမှန်တရားတစ်ခုကိုလည်း ဖော်ပြနေသည်—မိဖုရားခေါင်ကြီးသည် အရှင်မင်းကြီး၏ မျက်နှာသာပေးမှု လျော့နည်းသွားခြင်း မရှိပေ။ သို့မဟုတ်ပါက အဒေါ်ဖန့်သည် ကောလာဟလ ဖြန့်သူများကို ထိုကဲ့သို့ လူသိရှင်ကြား အပြစ်ပေးဝံ့မည် မဟုတ်ချေ။ ၎င်းက အခြားသူများအတွက် ပြတ်သားသော သတိပေးချက်တစ်ခု ဖြစ်၏။

လောလောဆယ်တွင်မူ သူမအနေဖြင့် ငြိမ်ငြိမ်သက်သက်သာ နေထိုင်ရတော့မည် ဖြစ်သည်။

လီကျောက်ယွမ်သည် သက်ပြင်းအရှည်ကြီးတစ်ချက် ချလိုက်ပြီးနောက်၊ လှည့်ပြန်ကာ သူမ၏ နန်းဆောင်ဆီသို့ ခပ်သွက်သွက် လျှောက်လှမ်းသွားခဲ့တော့သည်။

လက်ဆောင်များကို အောင်မြင်စွာ ပြန်လည်ပေးအပ်ပြီးနောက်၊ ချွေ့ဝေသည် ထိုမြင်ကွင်းကို ယွီမြောင်ဟွာအား ဝမ်းသာအားရ ပြန်လည်ပြောပြခဲ့သည်။

"ကောင်းတယ်" ယွီမြောင်ဟွာက ထိုသို့ဆိုကာ သူမအား ချီးကျူးသော အကြည့်တစ်ချက် ပေးလိုက်၏။

ချွေ့ဝေ ရှင်းပြလိုက်သည်။ "ဒီအစေခံက အစတုန်းကတော့ သူမကို သတိပေးဖို့ စီစဉ်ထားတာပါ၊ ဒါပေမဲ့ အဲဒါက သူတို့ကို လွယ်လွယ်နဲ့ လွှတ်ပေးလိုက်သလို ဖြစ်သွားမယ်လို့ တွေးမိလို့ပါ။ သူတို့က သေချာပေါက် အမှားလုပ်ထားတာကို တန်ဖိုးကြီး လက်ဆောင်တွေနဲ့ ဖုံးကွယ်ဖို့ ကြိုးစားနေကြတာ—လက်ဆောင်တွေ ထားခဲ့တာက သူတို့ တကယ် နောင်တမရကြောင်း ပြသနေတာပဲ။ ဒါကြောင့် သူတို့ ဝေးဝေးကို ရောက်သွားတဲ့အထိ စောင့်ပြီးမှ နောက်ကနေ လိုက်သွားခဲ့တာပါ"

ယခုတော့ နန်းတွင်းတစ်ခုလုံး ဤအကြောင်းကို သိရှိသွားခဲ့ကြပြီ ဖြစ်၏။

စိတ်အခြေအနေ အလွန်ကောင်းမွန်နေသဖြင့် ယွီမြောင်ဟွာသည် ထိုနေ့ညနေတွင် သူမ၏ အမေနှင့် ညီမဖြစ်သူတို့အား နောက်ထပ် စားသောက်ပွဲကြီးတစ်ခုဖြင့် တည်ခင်းဧည့်ခံရန် ဆုံးဖြတ်လိုက်သည်။