အခန်း ၁၀

အခန်း(၁၀)

ချန်ကောဟွားသည်လည်း လက်ထဲက ကျွဲကောသီးကို ချလိုက်သည်။

ချင်ကျင်းယွီကို ဤတိရစ္ဆာန်များအကြောင်း သေသေချာချာ ပြောပြရန် သူ ပြင်ဆင်လိုက်တော့သည်။

"ငါတို့ အခြားလူတွေကို အသာထားဦး၊ ဦးလေးကြီးရီကိုပဲ နမူနာထားပြီး ပြောရအောင်၊ သူက လူကောင်းတစ်ယောက်လား"

ထိုသို့ မေးမြန်းလာသဖြင့် ချင်ကျင်းယွီသည် ခေတ္တမျှ တွေးတောလိုက်ပြီးနောက် ပြောဆိုလိုက်သည်။

"ဘယ်လိုပြောရမလဲ... သူက တို့ဝန်းထဲမှာ အာဏာအရှိဆုံး ဦးလေးကြီးလေ၊ တို့ကို တမင်တကာ ဖယ်ကြဉ်ခဲ့တာမျိုး မရှိသလို၊ တို့ကို ကူညီခဲ့တာမျိုးလည်း မရှိဘူးဆိုတော့၊ မကောင်းမဆိုး သာမန်လူတစ်ယောက်လို့ပဲ ပြောရမှာပေါ့"

"မကောင်းမဆိုး သာမန်လူတစ်ယောက် ဟုတ်လား"

ချန်ကောဟွားက ပြုံးလျက် တစ်ခေါက် ပြန်လည်ရေရွတ်လိုက်ပြီးနောက် ဖြည့်စွက်ပြောကြားလိုက်သည်။

"ဇနီးလေး... မင်း ဒီလိုမျိုး တွေးနေမယ်ဆိုရင်တော့ တကယ့်ကို အကြီးအကျယ် မှားသွားလိမ့်မယ်"

"ဒီရီကျုံးဟိုင်ကို ကြည့်ရတာ လူကောင်းတစ်ယောက်လို ပုံစံမျိုး လူတွေကို ပြသထားပြီးတော့၊ ဘာမှမဆိုင်တဲ့ ဘေးလူတစ်ယောက်လို ပုံစံမျိုးလည်း ဖမ်းထားတတ်သေးတယ်"

"ဒါပေမဲ့ တကယ်တမ်းကျတော့ သူက လုံးဝကို အပေါ်ယံသူတော်ကောင်း ဟန်ဆောင်တတ်တဲ့လူစားမျိုးပဲ၊ သူ အလုပ်ချင်ဆုံးအရာကတော့ လူတွေကို အကျင့်စာရိတ္တနဲ့ ဖိနှိပ်တာပဲ"

"ငါ့အမြင်ပြောရရင်တော့ သူက ကိုယ်ကျိုးရှာတတ်တဲ့ အယုတ်တမာ သူတော်ကောင်းပဲ"

ချန်ကောဟွားသည် ရီကျုံးဟိုင်၏ သဘာဝအမှန်ကို ပြတ်ပြတ်သားသား တိုက်ရိုက်ပင် ပြောချလိုက်တော့သည်။

ပြောပြီးနောက်တွင် ချင်ကျင်းယွီက အံ့သြသွားသည်။

သူမသည် အိမ်ပြင် သိပ်မထွက်ဖူးသော မိန်းကလေးငယ်တစ်ဦး ဖြစ်သဖြင့် အခြားယောကျာ်းများကို အာရုံစိုက်လေ့မရှိရာ၊ ချန်ကောဟွား ဤသို့ ပြောဆိုလိုက်ခြင်းအပေါ် အနည်းနဲ့အများ နားမလည်နိုင် ဖြစ်နေခဲ့သည်။

ချင်ကျင်းယွီ၏ နားမလည်နိုင်သော မျက်နှာထားကို မြင်တွေ့လိုက်ရသော်လည်း ချန်ကောဟွားသည် စိတ်မရှည်ခြင်း အနည်းငယ်မျှ မရှိဘဲ၊ ဆက်လက်၍ ရှင်းပြပေးရန် ရွေးချယ်လိုက်သည်။

"ဇနီးလေး... ငါ မင်းကို မေးမယ်၊ ဒီရီကျုံးဟိုင်က ဝန်းတစ်ခုလုံး အစည်းအဝေးလုပ်ဖို့ဆိုရင် တအား စိတ်အားထက်သန်တယ် မဟုတ်လား၊ ပြီးတော့လည်း ဘာကို လုပ်ချင်နေလဲဆိုရင် ဒီလူ့ကို ကူညီလိုက်၊ ဟိုလူ့ကို ကူညီလိုက်နဲ့ ဘာလို့ လုပ်နေတာလဲ"

ချင်ကျင်းယွီက ခေါင်းညိတ်ပြလိုက်သည်။

"ဒါဆိုရင် မင်း ပြန်ပြီး စဉ်းစားကြည့်ဦး၊ ရီကျုံးဟိုင်က ဘယ်သူ့အိမ်ကို အကူအညီအပေးဆုံးလဲ"

ချန်ကောဟွားက ထပ်မံ၍ မေးခွန်းထုတ်လိုက်ပြန်သည်။

"ကျားကျန်းရှီတို့ မိသားစုပေါ့"

ချင်ကျင်းယွီက မဆိုင်းမတွပင် ပြန်လည်ဖြေကြားလိုက်သည်။

"ဒါဆိုရင် ငါ မင်းကို ထပ်မံ မေးဦးမယ်၊ တို့ဝန်းထဲမှာ အခြေအနေ ခက်ခဲတဲ့အိမ်က ကျားကျန်းရှီတို့ မိသားစုတစ်ခုတည်း မဟုတ်ဘူး၊ ကျားကျန်းရှီတို့ မိသားစုထက် ပိုပြီး ခက်ခဲတဲ့အိမ်တွေလည်း အများကြီး ရှိတာပဲ၊ ဒါဆိုရင် သူက ဘာဖြစ်လို့ ကျားကျန်းရှီတို့ မိသားစုကိုပဲ ကူညီနေရတာလဲ" ချန်ကောဟွားက အကွက်ချလျက် လမ်းညွှန်ပေးလိုက်သည်။

"ဟင်... ဒါကိုတော့ ငါ မသိဘူး..."

ချင်ကျင်းယွီက လက်ကလေးဖြင့် ခေါင်းကို ပွတ်သပ်ရင်း အနည်းငယ် စဉ်းစားမရ ဖြစ်သွားသည်။

ချင်ကျင်းယွီ၏ အူကြောင်ကြောင် မျက်နှာထားကို မြင်တွေ့လိုက်ရသဖြင့် ချန်ကောဟွားကလည်း တိုက်ရိုက်ပင် ပြောချလိုက်တော့သည်။

"ဒီရီကျုံးဟိုင်က သားသမီးမရှိတဲ့ လူအို မဟုတ်လား"

"သူ့မှာ ကလေးမရှိဘူးဆိုတော့ သဘာဝကျကျပဲ အသက်ကြီးပိုင်း လုပ်ကျွေးပြုစုမယ့်ကိစ္စက ပြဿနာ ဖြစ်လာတာပေါ့၊ ဒါဆိုရင် ပြဿနာက ဘာလဲဆိုတော့၊ သူ အလိုချင်ဆုံးအရာက သူ့ကို လုပ်ကျွေးပြုစုမယ့်သူ ရှိဖို့ပဲ၊ ဒါဆိုရင် တို့ဝန်းထဲမှာ ဘယ်သူက သူနဲ့ အနီးကပ်ဆုံး ရှိနေလဲ"

"ဟယ်ယွီကျူးပဲ မဟုတ်လား"

"ပြီးတော့ ဟယ်ယွီကျူးက ချင်ဟွိုင်ယွီအပေါ် ဘယ်လို သဘောထားလဲဆိုတာ အများကြီး ပြောနေဖို့ မလိုတော့ဘူး၊ ကျားတုန်းရွှီကို အမြန်ဆုံး သေစေချင်နေတာ၊ ဒါမှ သူမကို လက်ထပ်ယူလို့ ရမှာလေ"

"ရီကျုံးဟိုင်က အသက်ကြီးပြီး မြေခွေးလို လည်တဲ့လူပဲ၊ ဟယ်ယွီကျူးရဲ့ ဒီစိတ်ကူးကို သူက မြင်အောင် မကြည့်နိုင်ဘဲ နေပါ့မလား"

"ဒါကြောင့် သူက သူ့ကို လုပ်ကျွေးပြုစုမယ့်သူ ရှိစေဖို့အတွက် သဘာဝအတိုင်းပဲ ကျားကျန်းရှီတို့ မိသားစုကို ကူညီဖို့ ရွေးချယ်ခဲ့တာပေါ့"

"ဒါပေမဲ့ ဝန်းတစ်ခုလုံးရဲ့ ခွန်အားကို အသုံးချပြီး သူတစ်ယောက်တည်းရဲ့ ရည်ရွယ်ချက်ကို အောင်မြင်အောင် လုပ်တာဆိုတော့၊ မင်း ပြောကြည့်ဦး... ဒီလူက အစအဆုံး အယုတ်တမာ သူတော်ကောင်း မဟုတ်ဘူးလား"

ချန်ကောဟွားက ဤစကားများကို ရှင်းလင်းစွာ ပြောကြားလိုက်သည်နှင့်ချင်ကျင်းယွီသည် ချက်ချင်းပင် အရာအားလုံးကို နားလည်သဘောပေါက်သွားသည့် အသွင် ဖြစ်သွားသည်။

"ဩော်... ဒါကြောင့်မို့ကိုး၊ သူ လုပ်သမျှ အရာအားလုံးက သူရဲ့ ရည်ရွယ်ချက်ကို ပြည့်ဖို့အတွက်ပဲ ဖြစ်နေတာပဲ"

ချန်ကောဟွားသည် လမုန့်တစ်လုပ် စားလိုက်ပြီး၊ ရေနွေးကြမ်းတစ်ခွက်ကိုလည်း သောက်လိုက်ကာ၊ ဆက်လက်ပြောဆိုလိုက်ပြန်သည်။

"ဒီအချက်က အော့နှလုံးအနာဆုံး မဟုတ်သေးဘူး၊ အော့နှလုံးအနာဆုံးအချက်ကတော့ သူက ခန္ဓာကိုယ်တစ်ဝက် မြေကြီးထဲ ရောက်နေပြီ ဖြစ်ပါလျက်နဲ့ ပုံမှန်အချိန်တွေမှာ ကူညီစောင့်ရှောက်တယ်ဆိုတဲ့ ခေါင်းစဉ်ကို သုံးပြီးတော့ ညဉ့်နက်ပိုင်းကျရင် တစ်ယောက်တည်း သူမဆီ သွားရှာတတ်တာပဲ၊ ဒီလိုမျိုး ချင်ဟွိုင်ယွီနဲ့ မပြတ်မသား ရှုပ်ရှုပ်ထွေးထွေး ဖြစ်နေတာက တကယ်ပဲ ကျားကျန်းရှီနဲ့ ဟယ်ယွီကျူးတို့အတွက် ကောင်းမွန်အောင် လုပ်ပေးနေတာ ဟုတ်လို့လား"

ချန်ကောဟွား ဤနေရာအထိ ပြောဆိုလိုက်သော အခါချင်ကျင်းယွီက အလွန် ရွံရှာစက်ဆုပ်သော မျက်နှာထား ဖြစ်ပေါ်လာသည်။ ဦးနှောက်ထဲတွင် စကားလုံးလေးလုံးသာ ရှိနေခဲ့တော့သည်၊ ၎င်းမှာ "အသက်ကြီးပြီး အရှက်မရှိ" ဟူ၍ ဖြစ်သည်။

"ယောက်ျား... နင် ပြောတဲ့အတိုင်းဆိုရင်တော့ ဒီရီကျုံးဟိုင်က တကယ်ကို လူယုတ်မာကြီးပဲနော်"

ချန်ကောဟွားသည် ဤသည်ကို မြင်သောအခါ ခပ်တိုးတိုး တစ်ချက် ပြုံးလိုက်ရုံသာ ပြုလုပ်သည်။

"ဇနီးလေး... ဒါက ခုမှ စတာပဲ ရှိသေးတယ်၊ ဒီလောက်လေးနဲ့တင် ရွံရှာစက်ဆုပ်တဲ့ ခံစားချက်မျိုး ဖြစ်ပေါ်နေပြီလား"

ပြောပြီးနောက် သူသည် ဆက်လက်၍ ဝေဖန်ပြန်သည်။

"အကယ်၍ ရီကျုံးဟိုင်ကို အယုတ်တမာ သူတော်ကောင်းလို့ ပြောမယ်ဆိုရင်၊ ရွှီတမောင်းဆိုတဲ့ ကောင်ကတော့ တကယ့်ကို လူယုတ်မာအစစ်ပဲ"

"လူယုတ်မာအစစ် ဟုတ်လား"

ချင်ကျင်းယွီက ထိုသို့ကြားရသောအခါ မရည်ရွယ်ဘဲ တစ်ခေါက် ပြန်လည်ရေရွတ်မိသည်။

"မှန်တယ်"

ချန်ကောဟွားက ပြတ်သားစွာ ပြောဆိုလိုက်သည်။

"မင်းက ဒီရွှီတမောင်းဆိုတဲ့ ကောင်လေးကို ကြည့်ရတာ သန့်သန့်ရှင်းရှင်း ပုံစံမျိုးလို့ ထင်နေမလား မသိဘူး၊ ဒါပေမဲ့ သူက အရိုးထဲအသည်းထဲအထိ လုံးဝကို ရက်စက်ယုတ်မာတဲ့ကောင်ပဲ"

" ဥပမာပြောရရင် သူနဲ့ ဟယ်ယွီကျူးတို့ ပဋိပက္ခ ဖြစ်ကြပြီဆိုရင်၊ သူက တကယ် ရက်ရက်စက်စက် လက်ရဲဇက်ရဲ လုပ်တတ်တာ၊ ဟယ်ယွီကျူးကို သေအောင် လုပ်မယ့် အပြုအမူမျိုးအထိတောင် ရှိခဲ့ဖူးတယ်"

ချန်ကောဟွားက အဖိုးတန် ပစ္စည်းများကို တစ်ခုပြီးတစ်ခု ထုတ်ပြနေသကဲ့သို့ အေးအေးလူလူပင် ပြောပြနေခဲ့သည်။

ဒါက ချန်ကောဟွားက သူ့ကို တမင်တကာ မဟုတ်မမှန် စွပ်စွဲပြောဆိုနေခြင်း မဟုတ်ဘဲ၊ ရွှီတမောင်းဟူသော လူက အမှန်တကယ်ပင် ဤသို့ ဖြစ်သောကြောင့် ဖြစ်သည်။

ရုပ်သံဇာတ်လမ်းတွဲထဲတွင် ရွှီတမောင်းသည် အရိုးထဲအသည်းထဲအထိ ဆိုးသွမ်းလှသော ကောင်တစ်ကောင် ဖြစ်သည်ဟု ဆိုနိုင်သည်။

အခြားလူများကို အသာထားဦး၊ သူ လုံရှောင်းအဲ့အပေါ် ပြုမူခဲ့ပုံကို ကြည့်ရုံနှင့် သိနိုင်သည်။

ရွှီတမောင်း၏ မိခင်က လုံမိသားစု၏ အိမ်စေ ဖြစ်ခဲ့ဖူးပြီး၊ လုံမိသားစုက အရင်းရှင်နောက်ခံ ရှိနေခဲ့သဖြင့် လုံရှောင်းအဲ့က သူ့ထံသို့ နှိမ့်ချလျက် လက်ထပ်ဝင်ရောက်လာခဲ့ခြင်း ဖြစ်သည်။

သို့သော်လည်း ဤရွှီတမောင်းက အကျိုးအမြတ်ကို ရယူထားခဲ့ရုံမျှမကသေးဘဲ၊ မိမိကိုယ်တိုင် ကလေးမမွေးနိုင်ခြင်းကို အကြောင်းပြု၍ လုံရှောင်းအဲ့ကို အိမ်ပေါ်ကနေ ကန်ချခဲ့သေးသည်။

ထို့ပြင် ဇာတ်လမ်းအရ လုံရှောင်းအဲ့သည် ဟယ်ယွီကျူးနှင့် ပေါင်းဖက်သည့် အချိန်သို့ ရောက်ရှိလာသောအခါ၊ ရလဒ်အနေဖြင့် သူ၏ ရင်ထဲတွင် မနာလို မရှုစိမ့် ဖြစ်လာခဲ့ပြန်သည်။

အမျိုးမျိုး နှိမ့်ချ ကဲ့ရဲ့လှောင်ပြောင်ခဲ့ရုံမျှမက၊ နောက်ဆုံးတွင် အဖွဲ့ခေါင်းဆောင်တစ်ဦးအဖြစ် တာဝန်ယူရသောအခါ လူများကို ခေါ်ဆောင်လျက် မိမိ ဇနီးဟောင်း၏ မိသားစုကိုပါ လိုက်လံဖျက်ဆီးခဲ့သေးသည်။

ဘာမဟုတ်ဘဲ ရင်ထဲတွင် မကျေမနပ် ဖြစ်ရုံမျှဖြင့်၊ မိမိနှင့်အတူ တစ်အိပ်ရာတည်း အတူအိပ်ခဲ့ဖူးသောသူအပေါ် ဤမျှလောက်အထိ ရက်စက်နိုင်ခြင်း ဖြစ်သည်။

ရွှီတမောင်းသည် လုံရှောင်းအဲ့နှင့် မဆုံတွေ့ရသေးသော်လည်း၊ ချန်ကောဟွား၏ အမြင်အရ ရွှီတမောင်း၏ သဘာဝအမှန်က ဘယ်တုန်းကမှ ပြောင်းလဲခြင်း မရှိခဲ့ပေ၊ သူ့ကို တိရစ္ဆာန်ဟု ပြောဆိုခြင်းမှာ လုံးဝ လွန်ကဲခြင်း မရှိပေ။

ဤအချက်က အော့နှလုံးအနာဆုံး မဟုတ်သေးပေ။

အော့နှလုံးအနာဆုံးအချက်ကမူ သူသည် ဟယ်ယွီကျူး မိမိအတွက် ငွေပြန်ဆပ်ပေးစေရန်အတွက်၊ ဟယ်ယွီကျူး၏ ဖခင်ကို တိုက်ရိုက်ပင် ဒေါသထွက်၍ သေဆုံးသွားစေခဲ့ခြင်း ဖြစ်သည်။

သူ့ကို တိရစ္ဆာန်ဟု ပြောဆိုခြင်းကပင် တိရစ္ဆာန်ကို စော်ကားလိုက်သကဲ့သို့ ဖြစ်နေခဲ့ပြီ ဖြစ်သည်။

ရွှီတမောင်းအကြောင်း ပြောပြီးနောက်၊ သူသည် လျိုဟိုင်ကျုံးအကြောင်းကိုလည်း စတင်ပြောဆိုလိုက်ပြန်သည်။ ထိုကောင်သည်လည်း ဘယ်လိုမှ လူကောင်းတစ်ယောက် မဟုတ်ပေ။

သူက ဖခင်တစ်ယောက်အနေဖြင့် မိမိ၏ ကလေးများအပေါ် မည်သို့ ပြုမူခဲ့ပုံကိုပဲ ပြောပြရအောင်….

မိမိ၏ သားဖြစ်သူက တစ်နေ့လုံး ပင်ပန်းလာခဲ့သဖြင့် အိမ်ပြန်ရောက်သောအခါ သူ စားကြွင်းစားကျန် ထားခဲ့သော ကြက်ဥကို စားချင်မိရုံမျှဖြင့်၊ သူသည် တူဖြင့် တိုက်ရိုက်ပင် ရိုက်ချလိုက်ပြီး၊ သားဖြစ်သူကို သူတစ်ယောက်တည်း စားနေသည်ကို ထိုင်ကြည့်ခိုင်းခဲ့သည်။

ဤမျှလောက်အထိ စရိုက်ညံ့ဖျင်းလှသော လူတစ်ယောက်က မည်သို့ လူကောင်းတစ်ယောက် ဖြစ်နိုင်ပါမည်နည်း။

မူရင်းဇာတ်လမ်းထဲတွင် သူ၏ သားနှစ်ယောက်စလုံးမှာ အိမ်တစ်လုံးစီ ရရှိပြီးသည်နှင့်တစ်ပြိုင်နက် အလျင်အမြန်ပင် အပြင်သို့ ထွက်ခွာ၍ သီးခြားစီ နေထိုင်ခဲ့ကြတော့သည်။

လျိုဟိုင်ကျုံး အသက်ကြီးလာသည့် အချိန်အထိ သူ့ကို လာရောက်ပြုစုစောင့်ရှောက်မည့် သားသမီးတစ်ယောက်မျှ မရှိခဲ့သလို၊ သူ့အတွက် ငွေကြေးလာရောက် ပေးကမ်းမည့်သူလည်း တစ်ယောက်မျှ မရှိခဲ့ပေ။

မိဘနှစ်ပါးစလုံး စောစောစီးစီး သေဆုံးသွားခဲ့သကဲ့သို့ပင် ဖြစ်နေခဲ့သည်။

မိဘတစ်ယောက်အနေဖြင့် ဤမျှလောက်အထိ ကျရှုံးရခြင်းက လျိုဟိုင်ကျုံး၏ လူမှုဆက်ဆံရေး ညံ့ဖျင်းမှုကို လုံလောက်စွာ မြင်တွေ့နိုင်သည်။

ဝန်းတစ်ခုလုံးတွင် ကြည့်ပြီးကြင်နာတတ်ပုံရသော လုံရှောင်းအဲ့အကြောင်းကို ပြောရလျှင်…..

နားလေးသောအဖွားကြီးက ပိုမို၍ ကျေးဇူးကန်းသော သူဖြစ်သည်။

ဖြစ်နိုင်သည်မှာ သူမသည် ဟယ်ယွီကျူးအတွက်တော့ လူကောင်းတစ်ယောက် ဖြစ်ပေလိမ့်မည်၊ သို့သော်လည်း သူမသာ မရှိခဲ့လျှင် ဟယ်ယွီကျူးသည် သေချာပေါက် မျိုးဆက်ပြတ်သွားပေလိမ့်မည်။

သို့သော်လည်း သူမ၏ အပြုအမူများက လုံရှောင်းအဲ့၏ ခံစားချက်ကို ထည့်သွင်းစဉ်းစားခဲ့ဖူးပါသလား။

မိမိသဘောဖြင့် ဟယ်ယွီကျူးနှင့် လုံရှောင်းအဲ့တို့ကို အခန်းထဲတွင် အတူတူ ပိတ်လှောင်ထားခဲ့ပြီး၊ သူတို့နှစ်ဦးကို အတင်းအဓမ္မ ကလေးမွေးဖွားစေခဲ့ခြင်း ဖြစ်သည်။

၁၉၆၀ကာလတွင် ယခုကဲ့သို့သောအပြုအမူက ဘာကို ဆိုလို‌နေသနည်း။

ဤခေတ်ကာလတွင် အကယ်၍ အခြားလူများ သိရှိသွားခဲ့မည်ဆိုပါက အခြားလူများ၏ တံတွေးခွက်ပက်ရုံမျှဖြင့်ပင် လုံရှောင်းအဲ့ကို ရေနစ်သေဆုံးစေရန် လုံလောက်လှသည်။

အဆုံးစွန်အထိ ပြောရလျှင် သူမသည် မိမိ၏ မြေးဖြစ်သူ ဟယ်ယွီကျူးအပေါ်တွင်သာ ကောင်းမွန်ခြင်း ဖြစ်သည်။

အကယ်၍ လူတိုင်းတွင် ကိုယ်ပိုင်အတ္တ ရှိကြသည်မှာ သဘာဝကျသည်ဟု ချန်ကောဟွားလည်း နားလည်ပေးနိုင်သည်။

သို့သော်လည်း မိမိ၏ အတ္တအတွက် အကျင့်စာရိတ္တ စည်းကမ်းချက်များကို လုံးဝ လျစ်လျူရှုခြင်း၊ ထို့ပြင် မိမိ၏ အပြုအမူက အခြားလူများအပေါ် သက်ရောက်မှုရှိစေခြင်းကိုပါ လျစ်လျူရှုခြင်း ဖြစ်သဖြင့်၊ ဤကဲ့သို့သော လူမျိုးကိုတော့ သေချာပေါက် အော့နှလုံးနာစရာကောင်းသည်ဟု ပြောဆိုနိုင်သည်။

သေချာတာပေါ့

ချန်ကောဟွားနှင့် ထိုအဘွားကြီးတို့ကြားတွင်လည်း မည်သည့် ရန်ငြိုးရန်စမှ မရှိခဲ့ပေ၊ သို့သော်လည်း ဤမိန်းမကြီးက အကယ်၍ အကြံအစည်များကို သူ၏ ခေါင်းပေါ်သို့ လာရောက် ပုံချမည်ဆိုပါက၊ သူသည်လည်း ဤအိုမင်းရင့်ရော်နေသောမိန်းမကို အချိန်မတိုင်မီ စောစောစီးစီး ဘဝနိဂုံးချုပ်သွားစေရန် လုပ်ဆောင်ဖို့ ဝန်လေးနေမည် မဟုတ်ပေ။

...

ချန်ကောဟွားသည် ဆယ်မိနစ်ကျော်ခန့် တရစပ် ပြောပြနေခဲ့ပြီး၊ ဝန်းအတွင်းရှိ လူအမြောက်အမြားကို တစ်ခေါက်စီ ဝေဖန်ဆန်းစစ်ပြခဲ့သည်။

သူ ရေသောက်နေသည့် အချိန်အတောအတွင်းတွင်လည်း ချင်ကျင်းယွီသည် ရင်ထဲ၌ စူးစမ်းလိုစိတ်ဖြင့် ထပ်မံ၍ မေးမြန်းလိုက်ပြန်သည်။

"ယောက်ျား... ဒါဆိုရင် ဟယ်ယွီကျူးကော၊ သူက ပုံမှန်အချိန်တွေမှာ အမြဲတမ်း အခြားလူတွေကို ကူညီနေတာဆိုတော့ လူဆိုးတော့ မဖြစ်နိုင်ပါဘူးနော်"

ဇနီးဖြစ်သူ၏ မေးမြန်းမှုကို ရင်ဆိုင်လိုက်ရသောအခါ ချန်ကောဟွားသည် သက်ပြင်းပြင်းတစ်ချက် ချလိုက်ပြီးနောက် အထင်အမြင်သေးသော အသံဖြင့် ပြောဆိုလိုက်တော့သည်။

"ဟယ်ယွီကျူး ဟုတ်လား... အကယ်၍ ဒီဟယ်ယွီကျူးကသာ လူဆိုးမဟုတ်ဘူးဆိုရင် တို့ဝန်းထဲမှာ လူဆိုးဆိုတာ ရှိတော့မှာ မဟုတ်ဘူး"

"ဟမ်"

ဤတစ်ကြိမ်တွင်တော့ ချင်ကျင်းယွီ တကယ်ပင် အူကြောင်ကြောင် ဖြစ်သွားခဲ့ရတော့သည်။