အခန်း ၁၀၃
Vol. 11 Ch. 103
အခန်း (၁၀၃) အဆင့်လေး အစီအရင်
ကျောက်လင်းအာက ဤသို့ ပြောလိုက်မှသာ ချန်ကျီသည်လည်း ဤဟင်းလျာများက ယခင်ကထက် တကယ်ပင် ကွာခြားနေကြောင်း သတိထားမိတော့သည်။
ဟင်းတစ်ခွက်ချင်းစီပေါ်တွင် သိပ်သည်းလှသော ဝိညာဉ်စွမ်းအားများ ကိန်းဝပ် နေပြီး ယခင်က စားသုံးခဲ့ဖူးသည့် ဟင်းအမယ်များထက် များစွာ သာလွန်ကောင်းမွန်နေကြောင်း အကဲခတ်ရုံနှင့်တင် သိသာလှပေသည်။
ချန်ကျီက အသားတစ်တုံးကို ညှပ်၍ ပါးစပ်ထဲသို့ ထည့်ကာ မြည်းစမ်းလိုက်သည်၊ သားရဲအသားတုံးက ပါးစပ်ထဲ ရောက်သည်နှင့် တစ်စက်ကလေးမျှ အီသွားခြင်းမရှိဘဲ လတ်ဆတ်နူးညံ့ကာ အနည်းငယ် ဝါးလို့ကောင်းလှသည်၊ စားပြီးနောက်တွင်လည်း ဝိညာဉ်စွမ်းအား အနည်းငယ်က ဒန်တျန်ထဲသို့ စီးဝင်သွားခဲ့သည်။
"အင်း... ဒီအရသာက တော်တော်ကောင်းတာပဲ၊ အရင်က အသားတွေထက် အများကြီး ပိုစားကောင်းတယ်"
ချန်ကျီက ချီးကျူးစကားဆိုလိုက်ပြီးနောက် တစ်ခါမျှ မမြင်ဖူးသေးသော ဝိညာဉ်အပင်ကိုပါ ထပ်မံ ညှပ်၍ မြည်းစမ်းကြည့်လိုက်သည်။
"ဒါလည်း မဆိုးဘူးပဲ၊ ကြွပ်ကြွပ်ရွရွနဲ့ ခံတွင်းရှင်းစေတယ်"
ချန်ကျီက ဟင်းလျာအားလုံးကို တစ်ခုစီ မြည်းစမ်းပြီးနောက် ပြောလိုက်သည်။ "ကောင်းတယ် လင်းအာ၊ မင်းကို အမှတ်ပြည့် ပေးတယ်၊ နောက်ခါကျရင်လည်း ဒီအတိုင်း ဆက်ပြီး ကြိုးစားပေါ့"
"ဟီးဟီး... သခင်က ကျွန်မ နားမလည်တဲ့ စကားတွေ ပြောပြန်ပြီ၊ သခင် ကြိုက်နှစ်သက်ရင် ပြီးတာပါပဲ၊ နောက်ခါကျရင်လည်း သခင့်အတွက် ထပ်ပြီး ချက်ပြုတ်ပေးပါ့မယ်"
ကျောက်လင်းအာက ချန်ကျီ၏ စကားအဓိပ္ပာယ်ကို အပြည့်အဝ နားမလည်သေးသော်လည်း ချန်ကျီ သူ့ကို ချီးမွမ်းနေခြင်း ဖြစ်ကြောင်း ရိပ်မိလှပေသည်။
"သခင်... အေးအေးဆေးဆေး သုံးဆောင်ပါဦး၊ အချိန်တွက်ချက်ကြည့်ရတာ ချန်ဖန် သတင်း လာပို့ဖို့ ပြန်လာတော့မှာမလို့ ကျွန်မ အနန္တ နေရာလွတ်ထဲကနေ သွားပြီး စောင့်နေလိုက်ပါဦးမယ်"
ချန်ကျီက ခေါင်းငြိမ့်ပြလိုက်သည်။ "အင်း... သွားလေ"
"ဟုတ်ကဲ့ပါ သခင်" ကျောက်လင်းအာက ခေါင်းငြိမ့်ပြီးနောက် အနန္တ နေရာလွတ်ထဲသို့ ဝင်ရောက်သွားခဲ့သည်။
ကျောက်လင်းအာ ထွက်ခွာသွားပြီးနောက် ချန်ကျီက ရေရွတ်လိုက်သည်။ "ကြည့်ရတာ နောက်ကျရင် အနန္တ နေရာလွတ်ထဲမှာ ကိုယ်ပွားနှစ်ခုကို ရေရှည် နေခိုင်းထားမှ ဖြစ်မယ်၊ ခဏနေ ထမင်းစားပြီးရင် သွားပြီး စီစဉ်လိုက်တော့မယ်"
ချန်ကျီ စိတ်ထဲ၌ ဆုံးဖြတ်ချက် ချလိုက်ပြီးနောက် ထမင်းစားသောက်ပြီးသည်နှင့် သံနက်မိုင်းတွင်းထဲမှ နံပါတ် ၂၅ ကိုယ်ပွားကို လှမ်းခေါ်ကာ စားပွဲဝိုင်းကို သိမ်းဆည်းခိုင်းလိုက်သည်။
ထိုအချိန်တွင် ကျောက်လင်းအာသည်လည်း အနန္တ နေရာလွတ်ထဲမှ ပြန်လည် ထွက်လာခဲ့သည်။
ကျောက်လင်းအာက ချန်ဖန်ထံမှ သတင်းကိုလည်း တစ်ပါတည်း ယူဆောင်လာခဲ့သည်။
"သခင်... ချန်ဖန်ဘက်က သတင်း လှမ်းပို့တာကတော့ သူ ချင်းယွမ်ဂိုဏ်းထဲမှာ ဂိုဏ်းချုပ်ရဲ့ နာမည်က 'ချင်းစုန့်ယွမ်' လို့ စုံစမ်းရပါတယ်"
"ဒါပေမဲ့ ဒီဂိုဏ်းချုပ် ချင်းစုန့်ယွမ်က အမြဲတမ်း တံခါးပိတ် ကျင့်ကြံနေတာမလို့ ချင်းယွမ်ဂိုဏ်းရဲ့ ကိစ္စတွေကို စီမံခန့်ခွဲတာ သိပ်မရှိဘူးလို့ ပြောပါတယ်"
"သူ့ခန့်မှန်းချက်အရ ချင်းစုန့်ယွမ်က မကြာသေးခင်ကလည်း ဆေးလုံး ဖော်စပ်ဖို့အတွက် တံခါးပိတ် ကျင့်ကြံနေတာမလို့ လောလောဆယ် သူ့ဆီ သွားမတွေ့သေးဘူးလို့ ဆိုပါတယ်"
"အင်း... အခြား သတင်းကော ရှိသေးလား၊ ကျိုးချွမ်က ဘယ်လိုလဲ"
"ကျိုးချွမ်ရဲ့ အခြေအနေကိုလည်း သူ ပြောပြထားပါတယ်၊ အခု လောလောဆယ် ကျိုးချွမ်နဲ့ ရင်းနှီးမှု ရအောင် လုပ်နေတုန်းမလို့ ကျိုးချွမ်ကို ကျင့်ကြံခြင်း အရင်းအမြစ် ပိုင်းမှာ တိုက်ရိုက် ကူညီပေးတာမျိုး မလုပ်သေးပါဘူး၊ အဲ့လို ချက်ချင်း ကူညီပေးလိုက်ရင် နည်းနည်း ရုတ်တရက် ဆန်လွန်းရာ ကျမယ်လို့ သူ ယူဆပါတယ်"
ကျောက်လင်းအာ စကားပြောပြီးနောက် ချန်ကျီက ခေါင်းငြိမ့်ပြကာ ခေတ္တ တွေးမိသွားသည်။
သူက ထို အလယ်ပလတ် အဆင့် ရွှမ်ယန်ချင်းလင်ဆေးလုံးကို ကျိုးချွမ်အား ပေးသင့်၊ မပေးသင့်၊ တကယ်လို့ ကျိုးချွမ်ကို ပေးလိုက်ရင်ကော ကျိုးချွမ်အတွက် ဘေးဒုက္ခ တစ်ခုခု သယ်ဆောင်လာပေးမလားဆိုသည်ကို စဉ်းစားနေခြင်း ဖြစ်သည်။
"ထားလိုက်ပါတော့၊ နောက်မှပဲ ကြည့်တာပေါ့၊ တကယ်လို့ ကျိုးချွမ် စိတ်ထဲက စွဲလမ်းမှုက အရမ်း ပြင်းထန်နေမယ်ဆိုရင် ဝိညာဉ်အမြစ် ပြောင်းလဲမှုကြောင့် ဖြစ်လာမယ့် ကောလာဟလတွေကို ဂရုစိုက်နေမှာ မဟုတ်ပါဘူး၊ အဲ့ဒီအချိန်ကျရင် ချင်းစုန့်ယွမ် ဘာတွေးမလဲဆိုတာပဲ မသိတာ"
ချန်ကျီက စိတ်ထဲ၌ ခဏမျှ တွေးပြီးနောက် ကျောက်လင်းအာကို ပြောလိုက်သည်။ "လင်းအာ... ငါ အနန္တ နေရာလွတ်ထဲ သွားပြီး ဒီနေ့ရဲ့ အမြတ်တွေကို သွားသိမ်းလိုက်ဦးမယ်၊ မင်း အိမ်မှာပဲ စောင့်နေပါ"
"ဟုတ်ကဲ့ပါ သခင်"
ချန်ကျီက အသိစိတ်ဖြင့် အနန္တ နေရာလွတ်ထဲသို့ ဝင်ရောက်သည့် အချိန်တိုင်းတွင် ခန္ဓာကိုယ်က သတိမေ့မြောနေသည့် အခြေအနေမျိုး ဖြစ်နေသဖြင့် ဘေးအန္တရာယ် တစ်စုံတစ်ရာ ဖြစ်ပွားခြင်းမှ ကာကွယ်ရန် ကျောက်လင်းအာကို အပြင်၌ အမြဲ စောင့်ခိုင်းထားရခြင်း ဖြစ်သည်။
"ကြည့်ရတာ ဒီအိမ်တော်မှာ အဆင့်မြင့် အစီအရင် အချို့ကို ထပ်ပြီး ခင်းကျင်းထားမှ ဖြစ်မယ်၊ မဟုတ်ရင် နည်းနည်းလေးမှ လုံခြုံမှု မရှိသလိုပဲ"
"တော်သေးတာက အစီအရင် လေ့လာခန်းက အလွတ် ဖြစ်နေတုန်းပဲ၊ ခဏနေရင် အဆင့်လေး အစီအရင် အချို့ကို သွားပြီး လဲလှယ် စမ်းသပ်ကြည့်ရမယ်"
ချန်ကျီ အနန္တ နေရာလွတ်ထဲသို့ ဝင်ရောက်လိုက်သောအခါ ပစ္စည်းပုံကြီးများနှင့် တောင်ငယ်လေးသဖွယ် စုပုံနေသော သံနက်ရိုင်းများကို မြင်တွေ့လိုက်ရသည်၊ ထို့ပြင် စောင့်ဆိုင်းနေသည်မှာ ကြာပြီဖြစ်သော ဆိုင်ရှင်ရှန်းလည်း ရှိနေသည်။
"အိုး... အမြဲတမ်း ရှုပ်ပွနေသလိုပဲ" ချန်ကျီက သက်ပြင်းတစ်ချက် ချလိုက်သည်။
ထိုအချိန်တွင် ဆိုင်ရှင်ရှန်းက ယနေ့ ရရှိသော အမြတ်များကို လာရောက် အစီရင်ခံတင်ပြသည်။
"သခင်..." ဆိုင်ရှင်ရှန်းက လက်သီးဆုပ် ကာ ဂါရဝပြုလိုက်သည်။
"အင်း... ဒီနေ့ အမြတ် ဘယ်လိုရှိလဲ"
"အုတ်မြစ်ချခြင်း ဆေးလုံး အလုံး ၅၀ စလုံး ရောင်းချပြီးပါပြီ၊ အဲ့ဒီထဲက ၄၅ လုံးကို တစ်လုံးကို အဆင့်နိမ့် ဝိညာဉ်ကျောက်တုံး ၅ ထောင် နှုန်းနဲ့ မိသားစုအသီးသီးဆီ ရောင်းချခဲ့တာပါ"
"ကျန်တဲ့ ၅ လုံးကိုတော့ တစ်ကိုယ်တော် ကျင့်ကြံသူတွေဆီ ရောင်းချခဲ့တာဖြစ်ပြီး ဈေးနှုန်းကတော့ တစ်လုံးကို အဆင့်နိမ့် ဝိညာဉ်ကျောက်တုံး ၂ ထောင် နှုန်းနဲ့ ရောင်းချခဲ့တာပါ"
"အုတ်မြစ်ချခြင်း ဆေးလုံးကနေ စုစုပေါင်း အဆင့်နိမ့် ဝိညာဉ်ကျောက်တုံး ၂ သိန်း ၃ သောင်း ၅ ထောင် ရရှိပါတယ်"
ချန်ကျီက ခေတ္တ တွေးပြီးနောက် ပြောလိုက်သည်။ "အင်း... ဒီနေ့ အုတ်မြစ်ချခြင်း ဆေးလုံးရဲ့ အမြတ်က တကယ်မဆိုးဘူးပဲ၊ ဒါပေမဲ့ နောက်ပိုင်းကျရင် အုတ်မြစ်ချခြင်း ဆေးလုံးရဲ့ ရောင်းအားက တော်တော်လေး လျော့နည်းသွားလိမ့်မယ်"
"မိသားစုအသီးသီးမှာ အခုဆိုရင် အုတ်မြစ်ချခြင်း ဆေးလုံးတွေ အရန်သင့် စုဆောင်းထားပြီးပြီဆိုတော့ လောလောဆယ် ထပ်ဝယ်မှာ မဟုတ်တော့ဘူး၊ မနက်ဖြန်ကျရင် ငါ အုတ်မြစ်ချခြင်း ဆေးလုံး အလုံး ၅၀ ထပ်ပြီး ပြင်ဆင်ပေးထားမယ်၊ လိုအပ်ရင် မင်း လာယူလိုက်"
"ဟုတ်ကဲ့ပါ သခင်၊ ပြီးတော့ အုတ်မြစ်ချခြင်း ဆေးလုံး ဝယ်ယူသွားတဲ့ တစ်ကိုယ်တော် ကျင့်ကြံသူတွေကိုလည်း အုတ်မြစ်ချခြင်း ဆေးလုံးရဲ့ စျေးနှုန်းကို လျှို့ဝှက်ထားဖို့ သတိပေးထားပါတယ်"
ဆိုင်ရှင်ရှန်း ဤသို့ ပြောသည်ကို ကြားသောအခါ ချန်ကျီက အသာအယာ ပြုံးလိုက်သည်။ "ဒီကိစ္စကိုတော့ အများကြီး စိတ်ပူစရာမလိုပါဘူး၊ အဲ့ဒီ တစ်ကိုယ်တော် ကျင့်ကြံသူတွေကလည်း သူတို့ဆီမှာ အုတ်မြစ်ချခြင်း ဆေးလုံး ရှိနေတာကို အလွယ်တကူ ထုတ်ပြောရဲမှာ မဟုတ်ပါဘူး၊ သူတစ်ပါးရဲ့ လောဘစိတ်ကို ဆွဲဆောင်မိမှာကို သူတို့လည်း စိုးရိမ်ကြမှာပဲ"
"ဒါပေမဲ့ မင်း လုပ်တာ တော်တော်ကောင်းပါတယ်၊ သူတို့ကို သတိပေးထားတာလည်း ရတာပေါ့"
"ဟုတ်ကဲ့ပါ သခင်" ဆိုင်ရှင်ရှန်းက ပြန်ဖြေ ပြီးနောက် စာရင်းစာအုပ်ကို ထုတ်ယူကာ ချန်ကျီထံသို့ ကမ်းပေးလိုက်သည်။
"သခင်... အခြား ကုန်ပစ္စည်း အဝင်အထွက် စာရင်းတွေ အကုန်လုံး ဒီမှာပါ"
ချန်ကျီက အကြမ်းဖျင်း တစ်ချက် ကြည့်လိုက်ရာ လျိုထိုင်နှင့် ယဲ့မိသားစု၏ စရန်ငွေများကိုလည်း စာရင်းသွင်းထားကြောင်း တွေ့ရသည်။
ထိုရှုပ်ထွေးလှသော မှတ်တမ်းများကို သူက ဆက်ပြီး ကြည့်မနေတော့ဘဲ စာရင်းစာအုပ်၏ နောက်ဆုံး စာမျက်နှာရှိ အနှစ်ချုပ်ထားသော နေရာသို့ တိုက်ရိုက် လှန်လှောလိုက်သည်၊ သူက ယနေ့ အမြတ် မည်မျှ ရရှိသည်ကိုသာ စိတ်ဝင်စားခြင်း ဖြစ်သည်။
"အနန္တ ဆိုင်ထဲမှာ အရင်းအမြစ်တွေ လဲလှယ်လို့ ကုန်ဆုံးသွားတဲ့ အမှတ်တွေနဲ့ အရင်းအမြစ်တွေ ပြန်ဝယ်လို့ ပေးလိုက်ရတဲ့ ဝိညာဉ်ကျောက်တုံးတွေကို နှုတ်လိုက်ရင် ဒီနေ့ အသားတင် အမြတ်က အဆင့်နိမ့် ဝိညာဉ်ကျောက်တုံး ၂ သိန်း ၉ သောင်း ရတယ်"
"တကယ်လို့ အုတ်မြစ်ချခြင်း ဆေးလုံးနဲ့ ရတနာလက်နက် နှစ်ခုကို မရေတွက်ဘူး၊ ပြီးတော့ လျိုထိုင် ဝယ်ယူသွားတဲ့ အဆင့်တက်ဆေးလုံးရဲ့ အမြတ်ကိုပါ ပေါင်းထည့်လိုက်ရင် အခြား ကုန်ပစ္စည်းတွေကနေ အမြတ် ၂ သောင်းပဲ ရှိတာပဲ"
"ဝမ်နန်မြို့လိုမျိုး မြို့အသေးလေးမှာ တစ်ရက်ကို ဒီလို အမြတ်မျိုး ရရှိနိုင်တာက တော်တော်လေးကို ကောင်းမွန်လှပါပြီ"
တစ်ရက်ကို အဆင့်နိမ့် ဝိညာဉ်ကျောက်တုံး ၂ သောင်းသာ ရရှိသည့် အခြေအနေအပေါ် ချန်ကျီအနေနှင့် တော်တော်လေး လက်ခံနိုင်ပါသည်၊ သိုးမွေး ရိတ်ရမယ့် သူဌေးကြီးဆိုတာ နေ့တိုင်း ရှိနေသည်မှ မဟုတ်ဘဲ။
ခြုံငုံပြောရလျှင် ဝမ်နန်မြို့က သေး လွန်းလှသဖြင့် အားလုံးက ချီသန့်စင်ခြင်းအဆင့် ကျင့်ကြံသူများသာ ဖြစ်ကြပြီး ဝယ်ယူသည့် အရာများကလည်း အမြတ်အစွန်း နည်းပါးလှသော အရင်းအမြစ်များသာ ဖြစ်ကြသည်။
ချန်ကျီ စကားပြောပြီးနောက် စာရင်းစာအုပ်ကို ဆိုင်ရှင်ရှန်းထံ ပြန်ပေးလိုက်သည်။ "ခဏနေရင် ငါ အနန္တ နေရာလွတ်ထဲမှာ ကိုယ်ပွားနှစ်ခုကို ရေရှည် နေခိုင်းထားမယ်၊ သူတို့က အနန္တ နေရာလွတ်ကို ထိန်းသိမ်းပြီး ပစ္စည်းအားလုံးကို စနစ်တကျ စီစစ်ပေးလိမ့်မယ်"
"မင်း နောင်ကျရင် သူတို့နဲ့ တိုက်ရိုက် ချိတ်ဆက်လို့ ရပြီ၊ ဒီမှာ ငါ့ကို အမြဲတမ်း စောင့်နေစရာ မလိုတော့ဘူး"
"ဟုတ်ကဲ့ပါ သခင်"
"အင်း... မင်း ပြန်တော့လေ"
"ဟုတ်ကဲ့"
ဆိုင်ရှင်ရှန်း ထွက်ခွာသွားပြီးနောက် ချန်ကျီက တွန့်ဆုတ်မနေတော့ဘဲ အနန္တ ဆိုင်ထဲသို့ တိုက်ရိုက် ဝင်ရောက်လိုက်သည်။
ဝတ်ရုံစိမ်းနှင့် အမျိုးသမီးက ထိုနေရာ၌ ငြိမ်သက်စွာ ရပ်နေဆဲ ဖြစ်သည်။
"ငါ သံနက် ရိုင်းတွေ အားလုံးကို ပြန်ပြီး ရောင်းချချင်တယ်"
"သံနက်ရိုင်း ကီလိုဂရမ် ၁၉၇၅၀၀ ကို ပြန်လည် ဝယ်ယူပါမယ်၊ စုစုပေါင်း အမှတ် ၃၉၅၀၀ နဲ့ လဲလှယ်ပေးမှာဖြစ်ပြီး ပြန်လည်ရောင်းချဖို့ သဘောတူ ပါသလား"
"သဘောတူ တယ်"
သံနက်ရိုင်းများ ရောင်းချ၍ ရရှိသော အမှတ်များ ရောက်ရှိလာပြီးနောက် ချန်ကျီက အမှတ်မျက်နှာပြင်ပေါ်တွင် အမှတ် ၃၉၇၆၅ ပြသနေသည်ကို မြင်တွေ့လိုက်ရသည်။
"ငါ အခြား အရင်းအမြစ်တွေ အားလုံးကိုလည်း ပြန်ပြီး ရောင်းချချင်တယ်"
"အမျိုးမျိုးသော အရင်းအမြစ်များကို ပြန်လည် ဝယ်ယူပါမယ်၊ စုစုပေါင်း အမှတ် ၉၈၅၀ နဲ့ လဲလှယ်ပေးမှာဖြစ်ပြီး ပြန်လည်ရောင်းချဖို့ သဘောတူ ပါသလား"
"သဘောတူ တယ်"
အနန္တ ကုန်စုံဆိုင်က ပြန်လည် ဝယ်ယူထားသော အမျိုးမျိုးသော အရင်းအမြစ်များ၏ အမှတ်များ ရောက်ရှိလာပြီးနောက် အမှတ်မျက်နှာပြင်ပေါ်တွင် စုစုပေါင်း အမှတ် ၄၉၆၁၅ ပြသနေသည်။
"အဆင့်နိမ့် ဝိညာဉ်ကျောက်တုံးတွေရဲ့ အမြတ်ကိုပါ ပေါင်းလိုက်ရင်တော့ စုစုပေါင်း အမှတ် ၂၁၇၁၆၅ နဲ့ ညီမျှတာပေါ့"
"ဒီလို တွက်ချက်ကြည့်ရင် ဒီနေ့ တစ်ရက်တည်းရဲ့ အမြတ်အားလုံးက ၃ သိန်းကျော် ရှိတာပဲ"
ချန်ကျီ ခေတ္တ တွေးတောလိုက်သည်။ "အရင်ဆုံး အစီအရင် နှစ်ခု သွားရွေးလိုက်ဦးမယ်"
အိမ်တော်အတွက် ခုခံမှု အစီအရင်တစ်ခု ခင်းကျင်းရန်မှာ ချန်ကျီ ခုနကမှ ဆုံးဖြတ်လိုက်သည့် အစီအစဉ် ဖြစ်သည်။
အနန္တ နေရာလွတ်က ယခုအခါ အဆင့်မြင့် သွားပြီ ဖြစ်သဖြင့် အထဲ၌ အဆင့်လေး အစီအရင်များ ရှိနေပြီ ဖြစ်ရာ အခြေတည်ဝိညာဉ် အဆင့် အဖိုးကြီးများ လာရောက်လျှင်တောင် အဆင့်လေး အစီအရင်၏ ခုခံမှု ကို ဖျက်ဆီးနိုင်လိမ့်မည် မဟုတ်ပေ။
အဆင့်လေး အစီအရင် လဲလှယ်သည့် ကဏ္ဍကို ချန်ကျီ ပထမဆုံးအကြိမ် ကြည့်ခြင်း ဖြစ်ပြီး အထဲက အစီအရင်များကိုလည်း သိပ်ပြီး မရင်းနှီးသေးသဖြင့် ယခုအချိန်တွင် သေသေချာချာ အချိန်ပေး ကြည့်မနေတော့ပေ။
သို့သော်လည်း ချန်ကျီတွင် နည်းလမ်း ရှိပါသည်၊ သူက တိုက်ရိုက်ပင် အမြန် လှန်လှောကြည့်ကာ အမှတ်အများဆုံး ဖြစ်သည့် အစီအရင်များကိုသာ ရှာဖွေလိုက်သည်။
မကြာမီမှာပင် ချန်ကျီက အဆင့်လေး အစီအရင်များထဲတွင် စျေးအကြီးဆုံး အစီအရင် သုံးမျိုးကို ရွေးချယ်လိုက်သည်။
ထိုအစီအရင် သုံးမျိုးမှာ တိုက်ခိုက်မှု အစီအရင် တစ်မျိုး၊ ခုခံမှာ အစီအရင် တစ်မျိုးနှင့် ဖုံးကွယ်ခြင်းအစီအရင် တစ်မျိုးတို့ ဖြစ်ကြသည်။
ဖုံးကွယ်ခြင်းအစီအရင်ကိုမူ တိုက်ခိုက်မှု အစီအရင်နှင့် ခုခံမှု အစီအရင်တို့ကို ဖုံးကွယ်ထားရန်အတွက် လဲလှယ်လိုက်ခြင်း ဖြစ်သည်။
ထိုအစီအရင် သုံးမျိုး၏ မိတ်ဆက်ကိုမူ ချန်ကျီ သေသေချာချာ မဖတ်တော့ပေ၊ ဤအစီအရင် သုံးမျိုး၏ စျေးနှုန်းကို ကြည့်ရုံနှင့်တင် သေချာပေါက် အသုံးဝင်မည်ကို သူ သိရှိသည်။
အစီအရင် သုံးမျိုးစလုံးက တစ်မျိုးလျှင် အမှတ် ၅၀၀၀ စီ ဖြစ်ရာ ချန်ကျီက တွန့်ဆုတ်မနေတော့ဘဲ အမှတ် ၁၅၀၀၀ သုံးစွဲ၍ တိုက်ရိုက် ဝယ်ယူလိုက်သည်။
ထို့နောက်တွင် ချန်ကျီက အစီအရင် သုံးမျိုး၏ အစီအရင်ပုံကြမ်း များကို ယူဆောင်ကာ အစီအရင် လေ့လာခန်းသို့ ရောက်ရှိလာခဲ့သည်။
ချန်ကျီက မည်သည့်အရာကို အရင်ဆုံး လေ့လာရမည်ကို ဇဝေဇဝါ မဖြစ်နေတော့ပေ၊ ဘာပဲဖြစ်ဖြစ် သူ့တွင် အစီအရင် ထိုးထွင်းသိမြင်မှုမျိုး မရှိသဖြင့် ပုံမှန် အတွေးအတိုင်းပင် ဖုံးကွယ်ခြင်းအစီအရင်ကို အရင်ဆုံး လေ့လာလိုက်သည်။
ဖုံးကွယ်ခြင်းအစီအရင်၏ အစီအရင်ပုံကြမ်း ကို တင်ပျဉ်ခွေထိုင်နေသော ဝိညာဉ်ပုံရိပ်၏ လက်ပေါ်သို့ တင်လိုက်သောအခါ ဝိညာဉ်ပုံရိပ်၏ ဘေးနားတွင် ချက်ချင်းပင် သတိပေးစာတစ်ခု ပေါ်လာခဲ့သည်။
"အဆင့်လေး အစီအရင် 'အရိပ်မဲ့ အစီအရင်' ကို လေ့လာရန် ၂၄ နာရီ ကြာမြင့်မည်ဖြစ်ပြီး အမှတ် ၂၄၀၀ ကုန်ဆုံးပါမည်၊ သဘောတူ ပါသလား"
ချန်ကျီအနေနှင့် ဤကုန်ဆုံးမှုက အနည်းငယ် များပြားသည်ဟု ခံစားရသော်လည်း လက်ရှိတွင် သူ့ထံ၌ အမှတ်ရော ဝိညာဉ်ကျောက်တုံးပါ ရှိနေသဖြင့် တွန့်ဆုတ်မှု လုံးဝမရှိဘဲ သဘောတူသည် ကို ရွေးချယ်လိုက်တော့သည်။