အခန်း ၁၀၄
Vol. 11 Ch. 104
အခန်း (၁၀၄) သောက်ဖော်သောက်ဖက် အသစ်
အစီအရင် လေ့လာသည့်ကိစ္စကို စီစဉ်ပြီးနောက် ချန်ကျီက အနန္တ ဆိုင်ထဲသို့ ပြန်လည် ရောက်ရှိလာခဲ့သည်။
ချန်ကျီက ကျန်ရှိနေသော အမှတ်များဖြင့် ကိုယ်ပွားနှင့် ကောင်းကင်ဝိညာဉ်ပေါက်တူး မည်မျှအထိ ဝယ်ယူနိုင်မည်ကို တွက်ချက်ကြည့်လိုက်သည်။
ထို့နောက် ဝတ်ရုံစိမ်းနှင့် အမျိုးသမီးကို ပြောလိုက်သည်။ "ငါ ကိုယ်ပွား ၁၀ ခုနဲ့ ကောင်းကင်ဝိညာဉ်ပေါက်တူး ၈ လက် လဲလှယ်ချင်တယ်"
"ကိုယ်ပွား ၁၀ ခု၊ ကောင်းကင်ဝိညာဉ်ပေါက်တူး ၈ လက် လဲလှယ်ပါမယ်၊ စုစုပေါင်း အမှတ် ၄၉၅၀၀ ကုန်ကျမှာဖြစ်ပြီး လဲလှယ်ဖို့ သဘောတူ ပါသလား"
"သဘောတူ တယ်"
ပြောပြီးသည်နှင့် ချန်ကျီက အမှတ်များ သုည ဖြစ်သွားသည်ကို မြင်လိုက်ရပြီး အဆင့်နိမ့် ဝိညာဉ်ကျောက်တုံးထဲမှလည်း ၁၇၂၈၅ တုံး ထပ်မံ နှုတ်ယူသွားခဲ့သည်။
ချန်ကျီ ကြည့်လိုက်ရာ အဆင့်နိမ့် ဝိညာဉ်ကျောက်တုံးက ၁ သိန်း ၅ သောင်းကျော် မျှသာ ကျန်ရှိတော့သည်။
ခဏအကြာတွင် ကိုယ်ပွားပုံရိပ် ၁၀ ခုနှင့် ကောင်းကင်ဝိညာဉ်ပေါက်တူး ၈ လက် ပေါ်လာခဲ့သည်။
ချန်ကျီက ကိုယ်ပွားပုံရိပ်များ၏ ရုပ်အသွင်ကို စတင် ပုံဖော်လိုက်ရာ ကိုယ်ပွား ၈ ခုကိုမူ စိတ်ကူးထဲရှိရာ ရုပ်သွင်တစ်ခုကိုပဲ အလွယ်တကူ ပုံဖော်ပေးလိုက်ပြီး သိပ်ပြီး အာရုံမစိုက်ခဲ့ပေ။
ထို့နောက်တွင်မှ သူက အနာဂတ် ကျရင် အနန္တ နေရာလွတ်ထဲ၌ အတည်တကျ နေထိုင်မည့် ကိုယ်ပွားနှစ်ခု၏ ရုပ်သွင်ကို သေသေချာချာ ပုံဖော်ပေးလိုက်သည်။
ဤကိုယ်ပွားနှစ်ခု၏ ရုပ်သွင်ကို ချန်ကျီက သူ၏ ရုပ်သွင်အတိုင်း ပုံဖော်ထားခြင်း ဖြစ်သော်လည်း လုံးဝ တထေရာတည်း တူညီနေခြင်းမျိုး မဟုတ်ဘဲ သူ့အငွေ့အသက်နှင့် ဆင်တူရုံမျှသာ ဖြစ်သည်။
ကိုယ်ပွားနှစ်ခုကြားတွင်လည်း ချန်ကျီ ခွဲခြားရလွယ်ကူစေရန်အတွက် အနည်းငယ် ကွဲပြားမှု ရှိအောင် လုပ်ထားသည်။
ကိုယ်ပွား ၁၀ ခုစလုံး၏ ရုပ်သွင်ကို ပုံဖော်ပြီးစီးသွားခဲ့ပြီ ဖြစ်သည်။
ပုံရိပ်များ အသွင်သဏ္ဌာန် အသက်ဝင်လာမည့် အချိန်ကို စောင့်ဆိုင်းနေစဉ်အတွင်း ချန်ကျီက အားမနေဘဲ ဝတ်ရုံစိမ်းနှင့် အမျိုးသမီးထံမှ အခြား ကုန်ပစ္စည်းပုံကြီးကို ထပ်မံ လဲလှယ်လိုက်သည်။
အဆင့်တစ် ဆေးလုံးများကိုမူ ဤရက်ပိုင်းအတွင်း ရောင်းအားအပေါ် မူတည်၍ ချန်ကျီက ယခင်ထက် နှစ်ဆတိုးကာ လဲလှယ်လိုက်သည်။
အဆင့်နှစ် ဆေးလုံးများကိုလည်း အမျိုးအစားအားလုံးကို အလုံး ၅၀ စီ လဲလှယ်လိုက်သည်။
ထို့ပြင် အခြား ကျင့်ကြံခြင်း အရင်းအမြစ်များ အပါအဝင် အထွေထွေ ပစ္စည်းများ အားလုံး ပေါင်းလိုက်ရာ ချန်ကျီက အမှတ် ၅၀၀၀၀ ဖိုးခန့် ကုန်ပစ္စည်းများ အရန်သင့် ပြင်ဆင်လိုက်ခြင်း ဖြစ်သည်။
"ဒီလောက်ဆိုရင် ဆိုင်ရှင်ရှန်း တစ်ခါ ရောင်းဖို့ လောက်လောက်ငင ရှိမှာပဲ၊ နောက်ကျရင် ဆိုင်ရှင်ရှန်းကိုပဲ စာရင်းတစ်ခု လုပ်ခိုင်းပြီး ဘာလိုလဲဆိုတာကိုပဲ တိုက်ရိုက် လဲလှယ်ပေးတော့မယ်"
ချန်ကျီ ဤအရာအားလုံးကို လုပ်ပြီးသွားချိန်တွင် ကိုယ်ပွား ၁၀ ခုစလုံး၏ ပုံရိပ်များက အသက်ဝင်လာခဲ့ပြီး မျက်လုံးများကလည်း တဖြည်းဖြည်းနှင့် အသိဝင်လာကြသည်။
"နံပါတ် ၃၆ နဲ့ နံပါတ် ၃၇ က ဒီမှာပဲ နေခဲ့၊ ကျန်တဲ့ ကိုယ်ပွားတွေက ကောင်းကင်ဝိညာဉ်ပေါက်တူး တွေကို ယူပြီး လာ ခေါ် တာကို စောင့်ကြ"
"ဟုတ်ကဲ့ပါ သခင်"
ပြောပြီးနောက် ချန်ကျီက သံနက်မိုင်းတွင်းထဲမှ ကိုယ်ပွားများကို ဆက်သွယ်ကာ ကိုယ်ပွား ၈ ဉီးစလုံးကို လှမ်းခေါ်ခိုင်းလိုက်သည်။
ခဏအကြာတွင် ကောင်းကင်ဝိညာဉ်ပေါက်တူး များ ကိုင်ဆောင်ထားသည့် ကိုယ်ပွား ၈ ခုစလုံး ဆင့်ခေါ်ခြင်း ခံလိုက်ရပြီး ဖြစ်သည်။
"နံပါတ် ၃၆... မင်းကို အခုကစပြီး 'ရှောင်ဖျင်' လို့ ခေါ်မယ် ၊ နံပါတ် ၃၇... မင်းကို အခုကစပြီး 'ရှောင်အန်း' လို့ ခေါ်မယ် "
"ဟုတ်ကဲ့ပါ သခင်"
"အင်း... ငါနဲ့အတူ အပြင်ကို လိုက်ခဲ့ကြ"
"ဟုတ်ကဲ့ပါ သခင်"
ထို့နောက် ချန်ကျီက ရှောင်ဖျင်နှင့် ရှောင်အန်းကို ခေါ်ဆောင်ကာ အနန္တ ဆိုင်ထဲမှ ထွက်လာခဲ့သည်။
"မင်းတို့ နောင်ကျရင် ဒီနေရာမှာပဲ နေပြီး ဝိညာဉ်စိုက်ခင်းကို ထိန်းသိမ်းဖို့နဲ့ ပို့ဆောင်ထားတဲ့ ပစ္စည်းတွေကို စနစ်တကျ စီစစ်သိမ်းဆည်းဖို့၊ ပြီးတော့ သတင်းတွေကို အချိန်မှီ ပေးပို့ဖို့ တာဝန်ယူရမယ်"
"မင်းတို့ သီးသန့်အနေနဲ့ ငါ့ဆီကို အချိန်မရွေး တိုက်ရိုက် ဆက်သွယ်ခွင့် ပေးတယ်၊ ဒါပေမဲ့ သိပ်ပြီး အရေးမကြီးတဲ့ ကိစ္စဆိုရင်တော့ ငါ့ဆီ မပို့ကြနဲ့"
"ဟုတ်ကဲ့ပါ သခင်"
"အင်း... မင်းတို့ အရင်ဆုံး ဒီက ပတ်ဝန်းကျင်ကို အသားကျအောင် လုပ်လိုက်ဦး၊ ပြီးရင် ဟိုဘက်က ကျင့်ကြံခြင်း အရင်းအမြစ် ပစ္စည်းပုံကြီးကို သေသေချာချာ စီစစ်ပြီး ပစ္စည်းအားလုံးကို စာရင်း သေချာ မှတ်ထားလိုက်"
ချန်ကျီက ပြောရင်းနှင့် သူ ခုနကမှ ဝိညာဉ်ကျောက်တုံး ၅ သောင်းဖိုး လဲလှယ်ထားသည့် ပစ္စည်းပုံကြီးကို ညွှန်ပြလိုက်သည်။
"ဟုတ်ကဲ့ပါ သခင်"
ရှောင်ဖျင်နှင့် ရှောင်အန်းတို့ အလုပ်စတင် လုပ်ဆောင်နေသည်ကို မြင်တွေ့ရပြီးနောက် ချန်ကျီက ခေတ္တမျှသာ ရပ်တန့်ကာ လိုအပ်ချက် တစ်စုံတစ်ရာ မရှိကြောင်း အတည်ပြုပြီးသည်နှင့် အနန္တ နေရာလွတ်ထဲမှ ပြန်ထွက်လာခဲ့သည်။
ချန်ကျီ၏ အသိစိတ်က ခန္ဓာကိုယ်ထဲသို့ ပြန်ရောက်လာပြီးနောက် ကျောက်လင်းအာက အနားသို့ ချဉ်းကပ်ကာ မေးလိုက်သည်။ "သခင်... ဒီနေ့ အမြတ် ရ ရဲ့လား"
"အင်း... မဆိုးပါဘူး၊ အုတ်မြစ်ချခြင်း ဆေးလုံးတွေကို မရေတွက်ရင်တောင် ဒီနေ့ အမြတ် ၂ သောင်း ရှိတယ်"
"ဟီးဟီး... သခင်၊ ဒီအမြတ်က မနေ့ကထက်စာရင် နှစ်ဆတောင် ပိုများလာတာပဲ"
ချန်ကျီက ခေတ္တ တွန့်ဆုတ်ပြီးနောက် ပြောလိုက်သည်။ "မနေ့ကထက် နှစ်ဆ ပိုများလာတာ မှန်ပေမဲ့ အမြတ်က နည်းနေတုန်းပဲ"
"အဓိကကတော့ ဝမ်နန်မြို့က ကျင့်ကြံသူတွေရဲ့ အဆင့်က နိမ့်လွန်းနေတော့ အမြတ် နည်းတဲ့ ပစ္စည်းတွေကိုပဲ ဝယ်ယူနိုင်ကြလို့ပဲ"
ကျောက်လင်းအာက ခေတ္တ တွေးတောပြီးနောက် မေးလိုက်သည်။ "သခင်က တခြား မြို့တွေမှာပါ အနန္တ ကုန်စုံဆိုင် နောက်တစ်ခု ထပ်ပြီး ဖွင့်ချင်လို့လား"
ချန်ကျီက ခေတ္တ မျှ စဉ်းစားမိသွားသည်။ "အင်း... ဒီလို အတွေးတော့ ရှိပါတယ်၊ ဒါပေမဲ့ အခုက အချိန်မတန်သေးဘူး"
"အနည်းဆုံးတော့ ယဲ့မိသားစု ကိစ္စကို ရှင်းလင်းပြီးသွားမှ ပြီးတော့ ငါ့ရဲ့ ကျင့်ကြံခြင်းအဆင့်က ရွှေအူတိုင်အဆင့် ကို ရောက်လို့ ကိုယ့်ကိုယ်ကိုယ် ကာကွယ်နိုင်စွမ်း အတိုင်းအတာတစ်ခုအထိ ရှိလာမှပဲ အပြင်ထွက်ရမယ်"
"သခင်က တခြား မြို့တွေမှာ ဆိုင်ဖွင့်ဖို့အတွက် ကိုယ်ပွားတွေကို စေလွှတ်လို့ ရတာပဲ မဟုတ်ဘူးလား" ကျောက်လင်းအာက ဝေခွဲမရစွာဖြင့် မေးမြန်းလိုက်သည်။
သို့သော်လည်း ချန်ကျီက ခေါင်းယမ်းပြလိုက်သည်။ "မရသေးဘူး၊ ကိုယ်ပွားတွေရဲ့ လက်ရှိ ကျင့်ကြံခြင်းအဆင့်က နိမ့်လွန်းနေသေးတော့ တခြား မြို့တွေ သွားဖွင့်လည်း အခြေအနေကို ထိန်းချုပ်နိုင်မှာ မဟုတ်ဘူး"
"အနန္တ ကုန်စုံဆိုင်က ဘယ်မြို့မှာပဲ သွားဖွင့်ဖွင့် သေချာပေါက် တခြားလူတွေရဲ့ စီးပွားရေးကို လုယူမိသလို ဖြစ်သွားလိမ့်မယ်"
"ဝမ်နန်မြို့မှာမလို့ အခြေတည်အဆင့် က အမြင့်ဆုံး တိုက်ခိုက်ရေးစွမ်းအားလို့ သတ်မှတ်လို့ရပြီး လူတော်တော်များများကို ဟန့်တားထားနိုင်လို့ ဘယ်သူမှ လွယ်လွယ်နဲ့ လက်ရဲဇက်ရဲ မလုပ်ရဲကြတာ"
"ဒါပေမဲ့ အဲ့ဒီ ကျင့်ကြံခြင်း မြို့ကြီးတွေကို ရောက်သွားရင်တော့ အခြေတည်အဆင့် ဆိုတာ အောက်ခြေအကျဆုံး လူတန်းစားသာ ဖြစ်နေလို့ မျက်နှာပန်း လှမှာ မဟုတ်ဘူး"
ဝမ်နန်မြို့မှာပင် ချန်ကျီက ကျားအရေခွံခြုံ၍ ဝံပုလွေကို ခြောက်လှန့်နေခြင်း ဖြစ်ပြီး သူ့ ခွန်အားက မည်မျှအထိ နက်နဲကြီးမားကြောင်း သူတစ်ပါးကို သံသယဝင်အောင် လုပ်ဆောင်ကာ အနန္တ ကုန်စုံဆိုင်ကို လွယ်လွယ်နှင့် မတိုက်ခိုက် ရဲအောင် ဟန့်တားထားခြင်း ဖြစ်ပေသည်။
ကျောက်လင်းအာက ခေတ္တ တွေးတောလိုက်ပြီးမှ သဘောပေါက်သွားကာ အနည်းငယ် နှမြောတသဟန်ဖြင့် ပြောလိုက်သည်။ "သခင် ပြောတာ တကယ်မှန်ပါတယ်၊ ထပ်ပြီး စောင့်ရဦးမှာပေါ့"
ချန်ကျီက အသာအယာ ပြုံးလိုက်သည်။ "ကောင်းပြီ၊ ငါ သွားနားတော့မယ်၊ အခုချိန်မှာ အများကြီး တွေးနေလည်း အပိုပဲ၊ ခွန်အားကသာ အရာအားလုံးကို ဆုံးဖြတ်ပေးတာ"
ချန်ကျီ ယခုအချိန်တွင် ဤအရာများကို တွေးတောနေရခြင်းမှာလည်း အနန္တ နေရာလွတ် အဆင့်မြှင့်ရန် လိုအပ်သော အမှတ်များက ပို၍ ပို၍ များပြားလာသောကြောင့် ဖြစ်သည်။
ယခုအခါ အဆင့်ငါး သို့ မြှင့်တင်ရန် အမှတ် ၁ သန်း လိုအပ်နေပြီ ဖြစ်ရာ အဆင့်ခြောက်၊ အဆင့်ခုနစ် ဆိုလျှင်ကော မည်မျှအထိ လိုအပ်လာမည်နည်း။
အနန္တ နေရာလွတ် စနစ်၏ ပုံစံအတိုင်းဆိုလျှင် အဆင့်ခြောက် သို့ မြှင့်တင်ရန် အမှတ် ၁၀ သန်း လိုအပ်မည်ဖြစ်ပြီး အဆင့်ခုနစ် ဆိုလျှင်မူ အမှတ် သန်း ၁၀၀ အထိ ဖြစ်လာပေလိမ့်မည်။
နောက်ကျရင် ပို၍ ပို၍သာ များပြားလာတော့မည် ဖြစ်သည်။
သူ့အနေနှင့် ယခုကတည်းက အမှတ်ကိစ္စကို စတင်ပြီး စိတ်မပူ၍ မရတော့ပေ။
အနာဂတ် ကျရင် အနန္တ နေရာလွတ် အဆင့်မမြှင့်တင်နိုင်ဘဲ ကန့်သတ်ချက် ဖြစ်နေမည်ဆိုပါက သူ လုပ်သမျှ ကိစ္စတိုင်းတွင် လက်တွန့်ခြေတွန့် ဖြစ်လာရပေလိမ့်မည်။
ကျင့်ကြံခြင်းအဆင့်ကိုမူ အလိုအလျောက် ကျင့်ကြံခြင်းအခန်းဖြင့် အဆက်မပြတ် မြှင့်တင်နိုင်သော်လည်း ပိုမို အဆင့်မြင့်သော ကျင့်ကြံခြင်း အရင်းအမြစ်များကို လဲလှယ်၍ မရပါက သူ့ထက် ကျင့်ကြံခြင်းအဆင့် မြင့်မားသူနှင့် ကြုံတွေ့ရလျှင် ချန်ကျီအနေနှင့် မတတ်သာဘဲ ရှိနေပေလိမ့်မည်။
အနာဂတ် ကျရင် အနန္တ နေရာလွတ် အဆင့်မြှင့်တင်မည့် ကိစ္စများကို တွေးတောရင်းနှင့် ချန်ကျီသည် တဖြည်းဖြည်းနှင့် အိပ်မောကျသွားခဲ့တော့သည်။
....
အချိန်တူညီစွာပင် ချင်းယွမ်ဂိုဏ်း၏ အတွင်းစည်းတပည့်များ နေထိုင်ရာ နယ်မြေ ၌
လင်းယွမ်တောင်ထိပ်၊ နံပါတ် ၂၃ ဂူ အတွင်း၌ ဤအချိန်တွင် ကျင့်ကြံသူ သုံးဦးက အနားယူခြင်းလည်း မရှိ၊ ကျင့်ကြံခြင်းလည်း မလုပ်ဘဲ ရှိနေကြသည်။
ဤကျင့်ကြံသူ သုံးဦးထဲတွင် တစ်ဦးမှာ ချင်းယွမ်ဂိုဏ်း၏ အတွင်းစည်းတပည့် ချန်ဖန် ဖြစ်ပြီး ဤဂူမှာ သူ၏ နေအိမ် ဖြစ်ပေသည်။
ချန်ဖန်နှင့်အတူ ထိုင်နေကြသော အခြား ကျင့်ကြံသူနှစ်ဦးထဲမှ တစ်ဦးမှာ ချီသန့်စင်ခြင်းအဆင့် ၇ ရှိသော အပြင်စည်းတပည့် 'ယွီရှင်းစစ်' ဖြစ်သည်။
အခြားတစ်ဦးမှာလည်း အပြင်စည်းတပည့်ပင် ဖြစ်သော်လည်း ကျင့်ကြံခြင်းအဆင့်က ချီသန့်စင်ခြင်းအဆင့် ၅ မျှသာ ရှိသော 'ကျိုးချွမ်' ဖြစ်သည်။
သူတို့နှစ်ဦးစလုံးမှာ ချန်ဖန်၏ ဖိတ်ကြားမှုကြောင့် ရောက်ရှိလာကြခြင်း ဖြစ်ပြီး ချန်ဖန်က သူတို့ကို ဆွေးနွေးစရာ အရေးကြီးကိစ္စ ရှိသည်ဟု အကြောင်းကြားထားခြင်း ဖြစ်သည်။
ချန်ဖန်က ကျိုးချွမ်အား ချန်ကျီ ဆိုသည်မှာ သူ ယခင်က အသုံးပြုခဲ့ဖူးသော အမည်ဝှက်တစ်ခုမျှသာ ဖြစ်ကြောင်း ရှင်းပြထားပြီး ဖြစ်သည်။
ကျိုးချွမ်ကလည်း နားလည်ပေးနိုင်ကြောင်း ပြောကြားခဲ့သည်၊ အပြင်လောကသို့ ရောက်ရှိနေချိန်တွင် သတိကြီးစွာ ထိန်းသိမ်းထားခြင်းက ပုံမှန်ပင် ဖြစ်ပေသည်။
ထိုအချိန်တွင် ချန်ဖန်က စားပွဲပေါ်သို့ ဝိညာဉ်ဝိုင် သုံးအိုး ထုတ်ပြလိုက်ပြီးနောက် သူ့ ခွက်ထဲသို့ အရင်ဆုံး အပြည့် လောင်းထည့်လိုက်သည်။
ဤအရက်သုံးအိုးမှာ ချန်ဖန် ပြီးခဲ့သည့်အကြိမ်က ဝမ်နန်မြို့သို့ သွားရောက်၍ ချန်ကျီနှင့် တွေ့ဆုံစဉ်က တိတ်တဆိတ် ဝယ်ယူလာခဲ့ခြင်း ဖြစ်သည်။
ယွီရှင်းစစ်နှင့် ကျိုးချွမ်တို့သည် ချန်ဖန်က ဝိုင်ထုတ်ယူလိုက်ပြီးနောက် သူ့ကိုယ်သူ ခွက်တစ်ခွက် လောင်းထည့်သည်ကို မြင်တွေ့လိုက်ရသည်။
ယွီရှင်းစစ်ကမူ တွန့်ဆုတ်ခြင်း လုံးဝမရှိဘဲ ဝိုင်သောက်ရမည်ကို မြင်သည်နှင့် စိတ်လှုပ်ရှားသွားခဲ့သည်၊ ထို့ပြင် ဝိုင်ရနံ့ကို အနံ့ခံရုံနှင့်တင် ဤဝိုင်က သေချာပေါက် ကောင်းမွန်လှကြောင်း သိရှိနိုင်သည်။
သူသည်လည်း ချက်ချင်း ခွက်အပြည့် လောင်းထည့်လိုက်ပြီး ဝိုင်ခွက်ကို ကိုင်ကာ ဝိုင်ရနံ့ကို ပြင်းပြင်းရှုလိုက်သည်။
"ဝိုင်ကောင်းပဲ"
သို့သော်လည်း ကျိုးချွမ်ကမူ အနည်းငယ် ဝေခွဲမရ ဖြစ်နေသည်၊ သူက ပုံမှန်အားဖြင့် ဝိုင်ကို သိပ်ပြီး မသောက်ဖူးသလို အဓိကကတော့ မည်သို့သော အရသာရှိကြောင်းလည်း ခွဲခြားမပြနိုင်ပေ။
ထို့ပြင် ဤနေရာတွင် ထိုင်နေကြသော သုံးဦးထဲတွင် သူက ချန်ဖန်တစ်ဦးတည်းကိုသာ သိရှိပြီး ယနေ့သည်လည်း ပြီးခဲ့သည့်အကြိမ်က ချန်ဖန်နှင့် မတော်တဆ ဆုံတွေ့ခဲ့ပြီးနောက် ချန်ဖန်နှင့် ဒုတိယအကြိမ်မြောက် တွေ့ဆုံခြင်း ဖြစ်သည်။
သူနှင့် ချန်ဖန် ပထမဆုံးအကြိမ် တွေ့ဆုံစဉ်ကလည်း အများကြီး အပြန်အလှန် စကားမပြောဖြစ်ခဲ့ဘဲ ချင်းယွမ်ဂိုဏ်းအတွင်းရှိ လက်ရှိ အခြေအနေတချို့ကိုသာ မေးမြန်းဖြစ်ခဲ့ပြီး ထို့နောက်တွင်မူ သာမန် နှုတ်ဆက်စကားများသာ ပြောဖြစ်ခဲ့ခြင်း ဖြစ်သည်။
၎င်းအပြင် ယခု ထိုင်နေကြသော သုံးဦးထဲတွင် သူ၏ ကျင့်ကြံခြင်းအဆင့်က အနိမ့်ဆုံး ဖြစ်နေသဖြင့် သူက အနည်းငယ် စိတ်အကျပ်ရိုက်ကာ ရှိန်နေမိသည်။
ချန်ဖန်က ကျိုးချွမ်၏ ရှိန်နေမှုကို စောစောစီးစီး ရိပ်မိထားသဖြင့် အသာအယာ ပြုံးလိုက်ပြီး ကျိုးချွမ်၏ ရှေ့တွင် ရှိသော ဝိုင်အိုးကို ယူကာ ကျိုးချွမ်၏ ခွက်ထဲသို့ တိုက်ရိုက် အပြည့် လောင်းထည့်ပေးလိုက်သည်။
"ဂျူနီယာညီလေးကျိုး... ဘာလို့ ဒီလောက်တောင် ရှိန်နေရတာလဲ၊ လာ... ဒီ ဝိညာဉ်ဝိုင်ရဲ့ အရသာကို မြည်းစမ်းကြည့်စမ်းပါ၊ မင်း တစ်ခွက် သောက်ပြီးရင် နောက်ထပ် နှစ်ခွက် ထပ်သောက်ချင်လာစေရမယ်လို့ ငါ အာမခံတယ်"