အခန်း ၁၀၉
Vol. 11 Ch. 109
အခန်း (၁၀၉) ပြည်နှင်ဒဏ်ပေးခြင်း ၊ နေရာလွတ်၏ အပြောင်းအလဲများ
ချန်ကျီသည် ခုနက စဉ်းစားထားသော အစီအစဉ်ကို ကျောက်လင်းအာနှင့် အတူတူ တိုင်ပင်ဆွေးနွေးလိုက်ပြီး လိုအပ်သည်များကို ဖြည့်စွက်ပြင်ဆင်ခိုင်းလိုက်သည်။
အစီအစဉ်တွင် ပြဿနာမရှိကြောင်း အခြေခံအားဖြင့် အတည်ပြုပြီးနောက် ချန်ကျီက ကျောက်လင်းအာကို အိမ်တွင် ဆက်လက် စောင့်ခိုင်းထားခဲ့သည်။
သူကိုယ်တိုင်ကမူ အတွေး ကို လှုပ်ရှားလိုက်ပြီး သံနက်ရိုင်း မိုင်းတွင်းထဲရှိ 'ယဲ့ကျန်းဖျင်' ၏ ခန္ဓာကိုယ်ထဲသို့ အသိစိတ် သက်ဆင်းစေလိုက်သည်။
ချန်ကျီ၏ အသိစိတ် သက်ဆင်းလာသည်နှင့်အမျှ သံနက်ရိုင်း မိုင်းတွင်းထဲရှိ ကိုယ်ပွားများ အားလုံးက စိတ်ထဲမှ ခံစားမိသွားကြပြီး လက်ထဲရှိ အလုပ်များကို ချကာ ချန်ကျီကို လာရောက် အရိုအသေပေး ကြသည်။
ချန်ကျီက ဝမ်းမြောက်ဝမ်းသာ လက်ခံလိုက်ပြီး သူတို့ကို လုပ်စရာရှိသည်များကို ဆက်လက် လုပ်ဆောင်ခိုင်းလိုက်သည်။
ယဲ့မိသားစု၏ အုတ်မြစ်ချခြင်းအဆင့် ကျင့်ကြံသူ သုံးဦးနေရာတွင် အစားထိုးမည့် ကိုယ်ပွား သုံးခုကိုသာ ချန်ထားခဲ့သည်၊ ဤကိုယ်ပွား သုံးခု၏ လက်ရှိ အမည်များမှာ 'ယဲ့ချင်ကန်း'၊ 'ယဲ့ဟွိုင်ရန်' နှင့် 'ယဲ့ဖန်ရှန်း' တို့ ဖြစ်ကြသည်။
ထို့နောက် ကိုယ်ပွားများက ချန်ကျီကို ယဲ့မိသားစုမှ အသစ်ရောက်ရှိလာသော အုတ်မြစ်ချခြင်းအဆင့် ကျင့်ကြံသူ သုံးဦးထံ ခေါ်ဆောင်သွားခဲ့သည်၊ ယခုအခါ ထိုသုံးဦးမှာ မြေပြင်ပေါ်တွင် လဲလျောင်းနေကြပြီး သတိမေ့မြောနေကာ ခန္ဓာကိုယ်ပေါ်တွင်လည်း ဒဏ်ရာဒဏ်ချက်များစွာ ရှိနေခဲ့သည်။
ချန်ကျီက ယဲ့ကျန်းဖျင်နှင့် တိုက်ရိုက် စိတ်ချင်း ဆက်သွယ်လိုက်သည်။ "ဒီသုံးယောက်က ဘယ်လိုအခြေအနေလဲ"
"သခင်... ဒီသုံးယောက် ရောက်လာပြီးတာနဲ့ မိုင်းတွင်းထဲကို ဝင်ပြီး လူလဲဖို့ တောင်းဆိုပါတယ်၊ မူလကတော့ ကျွန်တော်တို့က အချိန်ဆွဲဖို့ တွေးထားပေမဲ့ ဒီသုံးယောက်က တစ်ခုခုကို ရိပ်မိသွားပုံရပြီး လှည့်ထွက်ပြေးဖို့ လုပ်တာကြောင့် သူတို့ကို အရင်ဆုံး ဖမ်းဆီးလိုက်ရတာပါ"
"ကောင်းပြီ... မင်းတို့ လုပ်တာ တော်တယ်"
ထို့နောက် ချန်ကျီက ကျန်ရှိနေခဲ့သော ကိုယ်ပွား သုံးခုကို ကြည့်ကာ ဆက်ပြောလိုက်သည်။ "မင်းတို့ သုံးယောက်က အရင်က ယဲ့မိသားစုရဲ့ အုတ်မြစ်ချခြင်းအဆင့် သုံးယောက်ကို ဝိညာဉ်ရှာဖွေခြင်း နဲ့ စမ်းသပ်ထားပြီးပြီမလို့ သူတို့ရဲ့ မှတ်ဉာဏ်တွေကို ကောင်းကောင်း သိထားကြမှာပဲ"
"အခု ယဲ့မိသားစုက ဒီနေရာကို စောင့်ကြပ်ဖို့ လူလဲချင်နေမှတော့ မင်းတို့ သုံးယောက်ကပဲ ယဲ့မိသားစုဆီ အပ်ရမယ့် သံနက်ရိုင်းတွေကို သယ်ပြီး ပြန်သွားပြီး သတင်းပို့လိုက်ကြ၊ အဆင်ပြေတာက ငါ မင်းတို့ကို ယဲ့မိသားစုထဲမှာ သူလျှိုအဖြစ် ထားဖို့ အစီအစဉ် ရှိနေတာပဲ"
"တစ်ပါတည်းမှာပဲ မင်းတို့က တစ်ခါတရံမှာ ကျင့်ကြံခြင်းအဆင့်ကို အနည်းငယ် ထုတ်ပြပြီး ယဲ့မိသားစုထဲကနေ ကျင့်ကြံခြင်း အရင်းအမြစ်တွေ ပိုရအောင် ကြိုးစားလို့ ရသလို မမျှော်လင့်ထားတဲ့ ရလဒ်တွေလည်း ရနိုင်တယ်"
ယဲ့ချင်ကန်း၊ ယဲ့ဟွိုင်ရန်နှင့် ယဲ့ဖန်ရှန်း သုံးဦးစလုံးက တစ်ပြိုင်နက် ပြောလိုက်သည်။ "ဟုတ်ကဲ့ပါ သခင်"
"အင်း... ဒီနေရာကို မင်းတို့ ဂရုစိုက်နေစရာ မလိုတော့ဘူး၊ ကောင်းကင်ဝိညာဉ်ပေါက်တူး တွေကို အနန္တနေရာလွတ်ထဲ ပြန်ထည့်ပြီးရင် ထွက်သွားလို့ ရပြီ"
"ဟုတ်ကဲ့ပါ သခင်"
ယဲ့ချင်ကန်း၊ ယဲ့ဟွိုင်ရန်နှင့် ယဲ့ဖန်ရှန်း သုံးဦးစလုံး ပြောပြီးနောက် ချန်ကျီကို လက်သီးဆုပ် နှုတ်ဆက်ကာ သံနက်ရိုင်း မိုင်းတွင်းမှ ထွက်ခွာ၍ ဝမ်နန်မြို့ဘက်သို့ ဦးတည် သွားကြတော့သည်။
ကိစ္စများကို စီစဉ်ပြီးနောက် ချန်ကျီက ချက်ချင်း ထွက်သွားရန် မလောဘဲ ယဲ့ကျန်းဖျင်၏ ခန္ဓာကိုယ်ကို ထိန်းချုပ်ကာ သံနက်ရိုင်း မိုင်းတွင်းထဲတွင် လှည့်လည် ကြည့်နေခဲ့သည်။
ဤတစ်ခေါက် သံနက်ရိုင်း မိုင်းတွင်းသို့ ထပ်မံ ရောက်ရှိလာချိန်တွင် ချန်ကျီက သံနက်ရိုင်း မိုင်းတွင်း၏ ဂူလမ်းကြောင်းက ပိုမို နက်ရှိုင်းလာကြောင်း သိသာစွာ ခံစားလိုက်ရသည်။
ဤအရာများအားလုံးက ကိုယ်ပွားများ နေ့ညမပြတ် မနားတမ်း ကြိုးစား အားထုတ်ခဲ့ကြခြင်းကြောင့် ဖြစ်သည်။
"ကြည့်ရတာ ဒီသံနက်ရိုင်း မိုင်းတွင်းက သိပ်မကြာခင်မှာပဲ တူးလို့ ကုန်တော့မှာပဲ" ချန်ကျီက သက်ပြင်းချရင်း တူးစရာ မိုင်းတွင်း မရှိတော့မည့်အရေးကို နှမြောတသ ဖြစ်မိသွားသည်။
မိုင်းတွင်း အောက်ခြေဘက်သို့ နောက်ထပ် အကွာအဝေးတစ်ခုအထိ ဆက်လျှောက်သွားရာ ချန်ကျီက ကိုယ်ပွားတစ်ခုက ယဲ့မိသားစုဝင်များ မိုင်းတူးနေသည်ကို စောင့်ကြည့်နေသည်ကို မြင်တွေ့လိုက်ရသည်။
ယဲ့မိသားစုဝင်များကို စောင့်ကြည့်နေသော ကိုယ်ပွားက ချန်ကျီ ရောက်လာသည်ကို မြင်သောအခါ ချက်ချင်း အနားသို့ လာကာ အရိုအသေပေး သည်။ "သခင်..."
"မင်းက နံပါတ် ၂၂ မဟုတ်လား"
"ဟုတ်ပါတယ် သခင်... ကျွန်တော်က နံပါတ် ၂၂ ပါ"
"ဒီယဲ့မိသားစုဝင်တွေက တစ်ရက်ကို သံနက်ရိုင်း ဘယ်လောက်တောင် တူးနိုင်ကြလဲ"
နံပါတ် ၂၂ ကိုယ်ပွား၏ မျက်နှာအမူအရာက အနည်းငယ် ညိုညင်သွားခဲ့သည်၊ သူင ဤယဲ့မိသားစုဝင်များကို ကြည့်ရသည်မှာ ကြာပြီဖြစ်၍ စိတ်မရှည်တော့ပေ။ "ဒီယဲ့မိသားစုဝင်တွေ အားလုံး ပေါင်းမှ တစ်ရက်ကို သံနက်ရိုင်း ကီလိုဂရမ် ၁၅၀၀ ပဲ တူးနိုင်ကြတာပါ၊ ကျွန်တော်တို့က သူတို့ကို စောင့်ကြည့်ဖို့ နေ့တိုင်း လူတစ်ယောက် သီးသန့် အချိန်ပေးနေရသေးတယ်"
"သခင်... သူတို့ကို အကုန် သတ်ပစ်လိုက်ရင် မကောင်းဘူးလား၊ ကျွန်တော် တစ်ယောက်တည်း တစ်ရက် တူးတာတင် သူတို့အားလုံး ပေါင်းတာထက် အဆပေါင်းများစွာ ပိုများသေး တယ်"
ချန်ကျီသည်လည်း ကိုယ်ပွား ပြောသည်က အကျိုးအကြောင်း ရှိသည်ဟု ခံစားလိုက်ရသည်၊ ယခုအခါ ဤယဲ့မိသားစုဝင်များကို ကျွေးမွေးထားရရုံသာမက စောင့်ကြည့်ရန် ကိုယ်ပွားတစ်ခုကိုပါ အလဟဿ အချိန်ဖြုန်းခိုင်းထားရသဖြင့် တကယ်ကို တွက်ခြေမကိုက်ပေ။
ချန်ကျီက ခပ်ဖွဖွ ရယ်မောလိုက်သည်။ "ဘာလို့ ဒီလောက်တောင် စိတ်တိုနေရတာလဲ၊ သူတို့ကို သတ်ပစ်လိုက်တာက သူတို့အတွက် သက်သာလွန်းရာ ကျလိမ့်မယ်၊ သူတို့ရဲ့ ကျင့်ကြံခြင်းအဆင့်တွေကို အကုန် ဖျက်ဆီးပစ်ပြီး ကျောက်ယွမ်ဆီ အကုန် လွှဲပေးလိုက်၊ ကျောက်ယွမ်ကို သူတို့ကို နယ်စပ်ဒေသဆီ ပြည်နှင်ဒဏ်ပေး ခိုင်းလိုက်"
ချန်ကျီ ဤသို့ ပြောသည်ကို ကြားသောအခါ နံပါတ် ၂၂ ကိုယ်ပွား၏ ညိုညင်နေသော မျက်နှာအမူအရာက ချက်ချင်း စိတ်လှုပ်ရှား တက်ကြွမှုအဖြစ် ပြောင်းလဲသွားခဲ့သည်။ "ကောင်းပါပြီ သခင်... ကျွန်တော် အခုပဲ သွားလုပ်လိုက်ပါ့မယ်"
"ခဏနေဦး" ချန်ကျီက စိတ်လှုပ်ရှားနေသော နံပါတ် ၂၂ ကိုယ်ပွားကို လှမ်းတားလိုက်သည်။ "ဘာလို့ လောနေတာလဲ၊ ငါ ထွက်သွားပြီးမှ သွားလုပ်၊ တစ်ပါတည်းမှာပဲ ခုနက ရောက်လာတဲ့ ယဲ့မိသားစုရဲ့ အုတ်မြစ်ချခြင်းအဆင့် သုံးယောက်ကိုပါ အတူတူ ပို့လိုက်"
"ဟုတ်ကဲ့ပါ သခင်" နံပါတ် ၂၂ ကိုယ်ပွားက ယခုအခါ ပို၍ပင် စိတ်လှုပ်ရှားသွားခဲ့သည်၊ နောက်ဆုံးတော့ သူ စွမ်းရည်ပြသရမည့် နေရာ ရှိလာခဲ့ပြီ ဖြစ်သည့်အပြင် ဤယဲ့မိသားစုဝင်များကို ဆက်လက် စောင့်ကြည့်နေစရာ မလိုတော့ပေ။
သူက အလုပ်လုပ်လျှင် ခိုချင်စိတ် ရှိပြီး သူ့လိုမျိုး အလုပ်အပေါ် စိတ်ရောကိုယ်ပါ မနှစ်မြှုပ်ကြသော ဤယဲ့မိသားစုဝင်များကို စိတ်ကုန်နေခဲ့သည်မှာ ကြာပြီ ဖြစ်သည်။
ချန်ကျီက သံနက်ရိုင်း မိုင်းတွင်းထဲတွင် နောက်ထပ် တစ်ပတ် လှည့်ပတ်ကြည့်လိုက်ပြီး "ယဲ့ကျန်းဖျင်... သံနက်ရိုင်း မိုင်းတွင်းဘက်ကို မင်းတို့ဆီပဲ အပ်ခဲ့မယ်၊ အမြန်ဆုံး နှုန်း နဲ့ ဒီနေရာကို အကုန် တူးပစ်လိုက်ကြ"
"ဟုတ်ကဲ့ပါ သခင်"
ဒီတစ်ခေါက် ယဲ့မိသားစုက ရုတ်တရက် သံနက်ရိုင်း မိုင်းတွင်းသို့ လူလဲရန် စေလွှတ်လိုက်ခြင်း ဖြစ်ရာ နောက်တစ်ကြိမ်တွင် ယဲ့မိသားစုက မည်သည့် ပြဿနာများ ထပ်ရှာဦးမည်ကို မသိနိုင်ပေ။
တကယ်ကို အလုပ်ရှုပ်လှသဖြင့် သံနက်ရိုင်း မိုင်းတွင်းကို စောစောစီးစီး အကုန် တူးပစ်လိုက်ခြင်းက အကောင်းဆုံး ဖြစ်ပေသည်။
ချန်ကျီ၏ အသိစိတ်က ယဲ့ကျန်းဖျင်၏ ခန္ဓာကိုယ်ထဲမှ ထွက်ခွာသွားခဲ့သည်။
သံနက်ရိုင်း မိုင်းတွင်းထဲရှိ ကိုယ်ပွားများက ချန်ကျီ ပေးအပ်ခဲ့သော တာဝန်ကို ပြီးမြောက်အောင်မြင်ရန်အတွက် လက်ထဲရှိ အလုပ်များကို ချလိုက်ကြသည်။
ချက်ချင်းပင် သံနက်ရိုင်း မိုင်းတွင်းထဲတွင် အော်ဟစ်သံများနှင့် အသနားခံသံများ အဆက်မပြတ် ထွက်ပေါ်လာခဲ့သည်။
ဤအော်ဟစ်သံများကို မကြားလိုသဖြင့် ကိုယ်ပွားများက ယဲ့မိသားစုဝင်များ၏ ကျင့်ကြံခြင်းအဆင့်ကို ဖျက်ဆီးကာ နာကျင်မှုကို ခံစားစေပြီးနောက် သူတို့ကို ချက်ချင်းပင် သတိမေ့မြောအောင် ရိုက်နှက်လိုက်ကြသည်။
သံနက်ရိုင်း မိုင်းတွင်းထဲတွင် မကြာခင်မှာပင် ပြန်လည် တိတ်ဆိတ်သွားခဲ့ပြီး သတိမေ့မြောနေသော ယဲ့မိသားစုဝင် ၃၂ ဦးကို တစ်နေရာတည်းတွင် စုစည်းထားလိုက်ကာ ကျောက်ယွမ်နှင့် ဆက်သွယ်မိသည်နှင့် သူတို့အားလုံးကို ပို့ဆောင်ရန် စောင့်ဆိုင်းနေကြသည်။
ဤအရာများကို လုပ်ဆောင်ပြီးနောက် ကိုယ်ပွားများ၏ မျက်နှာပေါ်တွင် မည်သည့် ဝမ်းသာပီတိဖြစ်မှုမျှ မရှိဘဲ သူတို့၏ တာဝန်ဖြစ်သော ဤနေရာကို အကုန်တူးရန် ကိစ္စကို ဆက်လက် လုပ်ဆောင်နေကြသည်။
....
ချန်ကျီ၏ အသိစိတ်က သူ့ ခန္ဓာကိုယ်ထဲသို့ ပြန်လည် ရောက်ရှိလာချိန်တွင် စနစ်၏ သတိပေးချက် က ထွက်ပေါ်လာခဲ့သည်။
သတိပေးချက် : 'ကြိုးကြာပျံ ခြေလှမ်း' ကျင့်စဉ်သည် ဒဏ္ဍာရီအဆင့် သို့ တက်လှမ်းသွားပြီ ဖြစ်၍ အခြား သိုင်းပညာ ပြောင်းလဲ လေ့ ကျင့်နိုင်ပါပြီ။
သတိပေးချက်ကို ဖတ်ရှုပြီးနောက် ချန်ကျီက စိတ်ထဲ၌ တွေးလိုက်သည်။ "'ကြိုးကြာပျံ ခြေလှမ်း' ရဲ့ ကျွမ်းကျင်မှုကလည်း ဒဏ္ဍာရီအဆင့်ကို ရောက်သွားပြီဆိုတော့ အခု ဝိညာဉ်ရှာဖွေခြင်း နဲ့ နှလုံးဖောက် တိုက်ခိုက်မှု ပဲ ဒဏ္ဍာရီအဆင့် ရောက်ဖို့ ကျန်တော့တာပဲ"
"အခု အနန္တစတိုးဆိုင်ထဲမှာ မြေကြီး အဆင့် အဆင့်မြင့် မန္တန် တွေ လဲလှယ်လို့ ရနေပြီဆိုတော့ အရင်ဆုံး မြေကြီး အဆင့် အဆင့်မြင့် မန္တန် စာအုပ်အချို့ သွားရွေးပြီး ပြင်ဆင်ထားရမယ်"
စိတ်ထဲမှ တွေးရင်း ချန်ကျီက သူ့ခန္ဓာကိုယ်ထဲသို့ ပြန်ရောက်ခါစ အသိစိတ်ကို အနန္တနေရာလွတ်ထဲသို့ ချက်ချင်း ပြန်လည် ဝင်ရောက်စေလိုက်သည်။
ချန်ကျီက အလိုအလျောက် ကျင့်ကြံခန်း သို့ သွားကာ ဝိညာဉ်ရှာဖွေခြင်း ကို အစားထိုး ထည့်သွင်းလိုက်ပြီးနောက် အသိစိတ်က သူ့ ခန္ဓာကိုယ်ထဲသို့ ပြန်ဝင်လာခဲ့သည်။
"နေ့တိုင်း တကယ် အလုပ်ရှုပ်တာပဲ၊ ဘာလို့ ကိစ္စတွေ ဒီလောက်တောင် များနေရတာလဲ၊ လင်းအာ သီချင်းဆိုတာ နားထောင်ဖို့တောင် အချိန်မရှိဘူး"
ချန်ကျီက ကျောက်လင်းအာကို ခေါ်ပြီး သီချင်းနှစ်ပုဒ်လောက် ဆိုခိုင်းရန် တွေးလိုက်မိသော်လည်း ရုတ်တရက် တစ်ခုခုကို သတိရသွားခဲ့သည်။ "မဖြစ်ဘူး... ဒီလိုမျိုး ပျက်စီးလို့ မဖြစ်သေးဘူး၊ စာအုပ်တွေ အများကြီး ဖတ်ဖို့ ကျန်သေးတယ်၊ ချန်ကျီ... မင်းက တကယ်ကို ကိုယ့်ကိုယ်ကိုယ် မထိန်းချုပ်နိုင်ဘူးပဲ၊ နောက်ထပ် တစ်နာရီလောက် စာ ဆက်ဖတ်ဦး"
စိတ်ထဲ၌ သူ့ကိုယ်သူ သတိပေးစကား ပြောပြီးနောက် ချန်ကျီက သူ ချထားခဲ့သော ကျင့်ကြံခြင်း အထွေထွေမှတ်တမ်း စာအုပ်ကို ပြန်လည် ကောက်ကိုင်လိုက်သည်။
အချိန်များက အလွန် လျင်မြန်စွာ ကုန်ဆုံးသွားခဲ့ပြီး ချန်ကျီက သတိမထားမိဘဲ စာအုပ်ထဲတွင် နစ်မျောနေခဲ့ရာ သုံးနာရီနီးပါးပင် ရှိသွားခဲ့ပြီ ဖြစ်သည်။
မှန်ပေသည်၊ စာဖတ်ခြင်းက လူကို ပျော်ရွှင်စေပြီး ကိုယ့်ကိုယ်ကိုယ် ထိန်းချုပ်ခြင်းက လူကို တိုးတက်စေသည်။
......
အနန္တနေရာလွတ်အတွင်း
ကျောက်ယွမ်က အချိန်လုကာ တစ်ယောက်တည်း ထွက်လာပြီး အနန္တနေရာလွတ်ထဲသို့ ဝင်ရောက်ရန် အခွင့်အရေး ရရှိခဲ့သည်။
သို့သော်လည်း သူ အနန္တနေရာလွတ်ထဲရှိ အပြောင်းအလဲများကို မြင်တွေ့လိုက်ရချိန်တွင် သူ့အနေနှင့် အရာများစွာကို လွတ်သွားခဲ့ပြီဟု ခံစားလိုက်ရသည်။
ကျောက်ယွမ် စိတ်ထဲ၌ သံသယ ဖြစ်နေစဉ်မှာပင် အနန္တနေရာလွတ်ထဲ၌ ရေရှည် စောင့်ကြပ်ရန် စီစဉ်ထားခြင်း ခံရသော ရှောင်ဖျင်နှင့် ရှောင်အန်းတို့က အနားသို့ လျှောက်လာခဲ့ကြသည်။
"မင်းက ဘယ်သူလဲ"
"ငါ့အမည်က ကျောက်ယွမ် လို့ ခေါ်ပါတယ်၊ မင်းတို့က သခင်က နောင်ကျရင် အနန္တနေရာလွတ်ထဲမှာ ရေရှည် စောင့်ကြပ်ဖို့ စီစဉ်ထားတဲ့ ကိုယ်ပွားတွေလား"
"ဟုတ်ပါတယ်... ကျွန်တော့်နာမည်က ရှောင်ဖျင် ပါ"
"ကျွန်တော့်နာမည်က ရှောင်အန်း ပါ"
"မင်းက အရင်းအမြစ်တွေ လာလဲတာ မဟုတ်လား"
ကျောက်ယွမ်က ခေါင်းညိတ်ပြလိုက်သည်။ "အင်း..."
"ကောင်းပါပြီ... သခင်က ကျွန်တော်တို့ကို ပြောပြထားပြီးသားပါ၊ မင်း ဘာပစ္စည်း လဲချင်လဲဆိုတာ ကိုယ့်ဘာသာ ယူသွားလို့ ရပါတယ်၊ ဒါပေမဲ့ ကျွန်တော်တို့က စာရင်းတော့ မှတ်ထားဖို့ လိုအပ်ပါတယ်"
ရှောင်ဖျင်က စကားပြောနေစဉ်မှာပင် ရှောင်အန်းက စာရင်းစာအုပ်တစ်အုပ်ကို ထုတ်ယူလိုက်ပြီ ဖြစ်သည်။
ကျောက်ယွမ်က သိုလှောင်လက်စွပ် တစ်ကွင်းကို ထုတ်ပေးလိုက်သည်။ "မင်းတို့ ကြည့်ပါ၊ ဒီပစ္စည်းတွေနဲ့ဆိုရင် ပထမအဆင့် ဆေးလုံး ဘယ်လောက် လဲလို့ရမလဲ"
ရှောင်ဖျင်က သိုလှောင်လက်စွပ်ကို အုပ်ကိုင်ကာ စာရင်းစစ်ဆေးလိုက်ပြီး ရှောင်အန်းက စာရင်းမှတ်တမ်း တင်နေခဲ့သည်။
မကြာခင်မှာပင် သိုလှောင်လက်စွပ်ထဲရှိ ပစ္စည်းများကို စစ်ဆေးပြီးစီးသွားခဲ့သည်။
"စစ်ဆေးပြီးပြီ၊ မင်း ဘာဆေးလုံးတွေ လဲချင်လဲ" ရှောင်ဖျင်က မေးလိုက်သည်။
ကျောက်ယွမ်က အသုံးအများဆုံး ဖြစ်သည့် ပထမအဆင့် ဆေးလုံးအမည်အချို့ကို ပြောပြလိုက်သည်။
"ကောင်းပါပြီ"
မကြာခင်မှာပင် ရှောင်ဖျင်နှင့် ရှောင်အန်းတို့က ကျောက်ယွမ် လိုချင်သည့် ဆေးလုံးများကို စာရင်းတွက်ချက် ထုတ်ပေးလိုက်သည်။
"မင်း လိုချင်တဲ့ ဆေးလုံးတွေ အားလုံးကို သိုလှောင်လက်စွပ်ထဲ ထည့်ပေးထားပြီးပါပြီ"
"ကောင်းပါပြီ... ကျေးဇူးတင်ပါတယ်"