အခန်း (၂၆၃-၂၆၄)

အခန်း (၂၆၃) အရှေ့မြောက်ကျားကြီးပင် သူ့ရှေ့တွင် လိမ္မာစွာ နို့သောက်ရသည်ကို မမေ့ကြနှင့်

"ထပ်ကောက်လို့ မရတော့ဘူး... တကယ်ကို ထပ်ကောက်လို့ မရတော့တာ"

ရွှီယန်သည် ဂန်ပါမှိုခြောက်များ အပြည့်ပါသော အိတ်အကြီးကြီးတစ်လုံးကို ဆွဲမထားရင်း အနည်းငယ် နှမြောတသစွာဖြင့် ပြောလိုက်သည်။

တိုက်ရိုက်ထုတ်လွှင့်မှုထဲတွင် ပွက်လောညံနေပြီဖြစ်သည်။ ဒေသခံများက သူ ဂန်ပါမှိုခြောက်များ ကောက်ယူနေသည်ကို ကြည့်ကာ အားကျလွန်းသဖြင့် မျက်လုံးများပင် ပြူးထွက်နေကြ၏။ ဂန်ပါမှိုခြောက်များ၏ စျေးနှုန်းမှာ အလွန်မြင့်မားပြီး ဝယ်ယူရန်လည်း အလွန်ခက်ခဲလှပေသည်။ ၎င်းတို့သည် ထိပ်တန်းအဆင့်ရှိ မှိုအမျိုးအစားတွင် ပါဝင်သည်။ ရွှီယန်ကမူ အိတ်တစ်အိတ်အပြည့် ကောက်ယူနိုင်ခဲ့၏။ လူတစ်ယောက်နှင့်တစ်ယောက် ယှဉ်လာလျှင် ဒေါသထွက်သေချင်စရာပင် ဖြစ်သည်။

ရွှီယန်၏ စိတ်အခြေအနေက အလွန်ကောင်းမွန်နေသည်။ ဤတောအုပ်ထဲသို့ ရောက်လာသည်မှာ သိပ်မကြာသေးသော်လည်း တောထွက်ပစ္စည်းများကို အတော်လေး အများအပြား ခူးယူနိုင်ခဲ့ပြီဖြစ်သည်။ နောက်ပိုင်းတွင် ဂန်ပါမှိုခြောက်ထက် ပိုကောင်းသော မှိုမျိုးနှင့် တွေ့ရန်မှာ အလွန်ခဲယဉ်းသွားပြီ ဖြစ်၏။ ယခုအခါ သူ၏ အာရုံစိုက်မှုသည် တောထွက်ပစ္စည်းများ ရှာဖွေရေးတွင် မရှိတော့ဘဲ ရတနာရှာဖွေရေး တာဝန်များကိုသာ လုပ်ဆောင်ရန် ပြင်ဆင်နေတော့သည်။ ကျန်ရှိနေသည့် အကြိမ်အရေအတွက်များကို ရှင်းလင်းပစ်ရမည် ဖြစ်သည်။

ထိုအချိန်တွင် မလှမ်းမကမ်းရှိ တောနက်ထဲ၌ ဖြစ်သည်။ ဤတောအုပ်တွင် သစ်ပင်ပန်းမန်များ ထူထပ်စွာ ပေါက်ရောက်နေပြီး ချုံပုတ်များ၊ သစ်ပင်ကြီးများနှင့် နွယ်ပင်များ နေရာအနှံ့ ပြန့်ကျဲနေသဖြင့် တိရစ္ဆာန်များသာ သစ်ပင်ပေါ်တွင် ပုန်းကွယ်နေပါက ရှာဖွေတွေ့ရှိရန် အလွန်ခက်ခဲလှပေသည်။ အစက်အပြောက်ပုံစံ အမွေးအမြှင်များရှိသည့် ထူးခြားသော ကြောင်မျိုးရင်းဝင် တိရစ္ဆာန်တစ်ကောင်က ၎င်း၏ မျက်လုံးဝိုင်းကြီးများကို ပုတ်ခတ်ပုတ်ခတ်လုပ်ကာ ရွှီယန်အား သိချင်စိတ်ဖြင့် အကဲခတ်နေသည်ကို တွေ့လိုက်ရ၏။

'ထူးဆန်းတယ်... ဒီခြေနှစ်ချောင်းသတ္တဝါနားကို ဘာလို့ ကပ်သွားချင်နေရတာလဲ'

ကြောင်မျိုးရင်းဝင် တိရစ္ဆာန်များက အမြဲတမ်း သတိဝီရိယ ကြီးမားတတ်ကြပြီး အထူးသဖြင့် တောရိုင်း ကြောင်မျိုးရင်းဝင်များ ဆိုပါက ပို၍ပင် သတိကြီးလှပေသည်။ ဤတိမ်ကျားသစ်မှာလည်း ချွင်းချက် မဟုတ်ချေ။

ရွှီယန်က ယခင်က တိမ်ကျားသစ်၏ ချစ်ခင်မှု ဆိုသည့် ကျွမ်းကျင်မှုကို ရရှိထားခဲ့သဖြင့် တိမ်ကျားသစ်များက ရွှီယန်အား မွေးရာပါ ရင်းနှီးမှုကို ခံစားရစေသည်။ တိမ်ကျားသစ်များ အတွက်မူ ရွှီယန်သည် တောင်ပေါ်မှ သဘာဝတရားနှင့် တစ်သားတည်းဖြစ်နေသည့် သစ်တောစောင့်နတ် တစ်ယောက်နှင့် အလားသဏ္ဌာန်တူပြီး သဘာဝအလျောက် ချစ်ခင်ရင်းနှီးမှုကို ဖြစ်ပေါ်စေခြင်းပင်ဖြစ်သည်။ တိမ်ကျားသစ်ဆိုသည်မှာ နိုင်ငံတော် အဆင့်(၁) ကာကွယ်စောင့်ရှောက်ရမည့် တိရစ္ဆာန်ဖြစ်ပြီး အရေအတွက် အလွန်ရှားပါးလှသည်။ ဤကောင်လေးက အလွန် သတိဝီရိယ ကြီးမား၏။

ရွှီယန်သည် တိမ်ကျားသစ် ရှိနေသည်ကို လုံးဝ သတိမထားမိခဲ့ချေ။ မှိုများကို ခူးယူပြီးနောက် သူက အရှေ့သို့ ဆက်လျှောက်သွားကာ တောင်အောက်ဆင်းမည့်လမ်းကို ရှာဖွေရင်း တစ်ဖက်မှလည်း တာဝန်များကို လုပ်ဆောင်ကာ ရှုခင်းများကို ခံစားရန် ပြင်ဆင်လိုက်သည်။ တောင်အောက်ဆင်းသည့် အချိန်တွင် ကျောက်တောင်တက်ဆင်း၍ မရနိုင်ချေ။ အန္တရာယ် အလွန်များလွန်းလှသဖြင့် လမ်းလွှဲကာ သွားရမည် ဖြစ်သည်။ ခန့်မှန်းခြေအားဖြင့် တောင်ပေါ်လမ်းကို တွေ့ရန် ခုနစ်နာရီ ရှစ်နာရီခန့် လမ်းလျှောက်ရမည် ဖြစ်၏။ သာမန်လူများဆိုလျှင် တကယ်ပင် တောင့်ခံနိုင်မည် မဟုတ်ချေ။

တိမ်ကျားသစ်က ရွှီယန်၏ အနောက်မှ တိတ်တဆိတ် လိုက်ပါလာပြီး သိချင်စိတ်များ၊ သတိဝီရိယများနှင့် သံသယများဖြင့် ပြည့်နှက်နေသည်။ ခြေလှမ်းအနည်းငယ် လျှောက်လိုက်တိုင်း ရွှီယန်ကို ခိုး၍ အကဲခတ်နေတတ်၏။ အစပိုင်းတွင် ရွှီယန်က သတိမထားမိခဲ့သော်လည်း အကွာအဝေး အတော်အတန် လျှောက်လာပြီးနောက် တစ်ခုခု မှားယွင်းနေကြောင်းကို သူ တဖြည်းဖြည်း ခံစားလာရသည်။ ဤတစ်ကြိမ်တွင် အန္တရာယ် အာရုံခံနိုင်စွမ်းကို အားကိုးခြင်း မဟုတ်ဘဲ သူ၏ အလိုအလျောက် သိစိတ်ကြောင့်ပင် ဖြစ်သည်။

ရွှီယန်သည် ရပ်တန့်လိုက်ပြီး အနောက်သို့ လှည့်ကာ ပတ်ဝန်းကျင်ကို ဝေ့ကြည့်လိုက်သော်လည်း ဘာကိုမျှ မတွေ့ရသဖြင့် သူ၏ မျက်ဝန်းများထဲတွင် သံသယ အချို့ ဖြစ်ပေါ်လာခဲ့သည်။ သူ၏ပုံစံကို မြင်သောအခါ အင်တာနက်သုံးစွဲသူများလည်း ချက်ချင်းပင် သိချင်စိတ် ပြင်းပြလာကြတော့သည်။

[လောင်ရွှီ... မင်း ဘာထပ်တွေ့ပြန်ပြီလဲ]

[သူ ဒီလိုဖြစ်သွားတိုင်း အမြဲတမ်း တစ်ခုခု တွေ့တာချည်းပဲ... သူ့ရဲ့ အလိုအလျောက် သိစိတ်က တော်တော်လေး စွမ်းတယ်]

[သိုင်းပညာ နည်းနည်းပါးပါးတော့ တတ်ထားတဲ့ ပုံပဲ]

[ဒီမှာက ဘာမှမရှိတာ အသိသာကြီးကို]

ရွှီယန်က ရှင်းပြလိုက်သည်။

"တစ်ခုခု နောက်ကနေ လိုက်နေသလို ခံစားရတယ်... ဘာလဲဆိုတာတော့ သေချာ မပြောတတ်ဘူး... တစ်ခါတလေ အလိုအလျောက် သိစိတ်တွေက တော်တော်လေး မှန်တတ်တယ်လေ... ဥပမာပြောရရင် တစ်ခါတလေ ကျောနောက်ကနေ တစ်ယောက်ယောက် စိုက်ကြည့်နေသလို ခံစားရလို့ လှည့်ကြည့်လိုက်ရင် တကယ်ပဲ ဖြစ်နေတာမျိုးပေါ့... လူတွေရဲ့ ခန္ဓာကိုယ်မှာလည်း မွေးရာပါ တုံ့ပြန်နိုင်စွမ်းတွေ ရှိတယ်လေ"

ရွှီယန်သည် အရှေ့သို့ ဆက်လက် လျှောက်သွားပြီး ခြေလှမ်းအနည်းငယ် အကွာတွင် အနောက်သို့ ရုတ်တရက် လှည့်ကြည့်လိုက်သည်။ ထိုခဏမှာပင် တိမ်ကျားသစ်က လန့်သွားပြီး သစ်ပင်အနောက်သို့ အလျင်အမြန် ခုန်ဝင်ကာ ပုန်းကွယ်လိုက်တော့၏။ ၎င်း၏ အမြန်နှုန်းက မြန်ဆန်လှသော်လည်း ရွှီယန်၏ မျက်လုံးထဲတွင် တစ်ချက်တည်းနှင့်ပင် မြင်တွေ့သွားခဲ့ပြီ ဖြစ်သည်။

"ရှာတွေ့ပြီ... တကယ်ကြီး တစ်ခုခု ရှိနေတာပဲ... မဖြစ်နိုင်တာ... ဒီကောင်လေးက အရမ်းရှားပါးတာနော်... တကယ့်ကို နိုင်ငံတော် အဆင့် ၁ ကာကွယ်ရမယ့် တိရစ္ဆာန် အစစ်ပဲ"

ရွှီယန်သည် တိမ်ကျားသစ်မှန်း မှတ်မိသွားသောအခါ သူ၏ မျက်ဝန်းများထဲတွင် ဝမ်းသာပျော်ရွှင်မှု အရိပ်အယောင်များ ပေါ်လာခဲ့သည်။ တိမ်ကျားသစ်၏ ရုပ်ရည်က အလွန်ချောမောလှ၏။ ကျားသစ်နှင့် ကြောင်လေးများ ပေါင်းစပ်ထားသည့် ပုံစံမျိုး ဖြစ်သည်။ တိမ်ကျားသစ်၏ အပေါ်အောက် နှစ်ဖက်စလုံးတွင် အစွယ်များ ရှိနေသဖြင့် ဓားစွယ်ကျားငယ် ဟူသော နာမည်ပြောင်ပင် ရှိသေးသည်။

သူ၏စကားကို ကြားသောအခါ အင်တာနက်သုံးစွဲသူများလည်း စိတ်ဝင်စားသွားကြတော့သည်။

[အဆင့် ၁ ကာကွယ်ရမယ့် တိရစ္ဆာန်... ဘယ်မှာလဲဟ]

[ငါက ဘာလို့ ဘာမှမမြင်ရတာလဲ]

[လောင်ရွှီ... မင်း မျက်စိများ မှားနေတာလား]

အင်တာနက်သုံးစွဲသူများ၏ မြင်ကွင်းထဲတွင်တော့ စိမ်းလန်းစိုပြည်နေသော သစ်ပင်များကိုသာ မြင်တွေ့ရပြီး ဘာကိုမျှ မတွေ့ရချေ။

ရွှီယန်က သစ်ပင်ပေါ်သို့ လက်ညှိုးထိုးပြကာ ရှင်းပြလိုက်သည်။

"ဟိုသစ်ပင်ပေါ်မှာ ရှိတယ်... တိမ်ကျားသစ် တစ်ကောင်ပဲ... ဒီနေ့ ကံတော်တော်ကောင်းတာပဲ... တစ်ယောက်ယောက်သာ တိမ်ကျားသစ် ကို ဓာတ်ပုံရိုက်နိုင်ခဲ့ရင် အဲဒီဗီဒီယိုကို ကြည့်မယ့်သူ အများကြီးပဲ... ငါက လိုက်ဖ်လွှင့်နေရင်းတောင် တိုက်ရိုက် တွေ့လိုက်ရတာ"

တိမ်ကျားသစ်က သစ်ပင်၏ အနောက်ဘက်တွင် ပုန်းကွယ်နေသည်။ ၎င်းက ရွှီယန် တွေ့သွားပြီမှန်း သတိထားမိသော်လည်း သေချာတော့ မသိသေးချေ။ ထို့ကြောင့် တိမ်ကျားသစ်က သစ်ပင်အနောက်မှနေ၍ ခေါင်းကို သတိထားကာ ပြူထွက်လာပြီး ရွှီယန်၏ လှုပ်ရှားမှုများကို မျက်လုံးဖြင့် စောင့်ကြည့်နေတော့၏။ ဤမြင်ကွင်းကိုသာ ဓာတ်ပုံရိုက်ကူးလိုက်မည် ဆိုပါက 'အမှောင်ထဲမှ ခိုးကြည့်နေသည်' ဟူသော အင်တာနက်ဟာသပုံလေး တစ်ပုံ ဖြစ်သွားမည်မှာ သေချာပေသည်။ ကောင်လေးက ခိုးကြောင်ခိုးဝှက် ပုံစံလေးနှင့် အတော်လေး ချစ်စရာ ကောင်းနေ၏။

တိမ်ကျားသစ်က ရွှီယန် သူ့ကို ကြည့်နေသည်ကို တွေ့သောအခါ ခေါင်းကို ချက်ချင်း ပြန်ရုပ်သွားသည်။ သိပ်မကြာခင်မှာပင် ပြဿနာ မရှိနိုင်ဘူးဟု တွေးမိကာ သတ္တိမွေးပြီး ခန္ဓာကိုယ်ကို ထပ်မံ ပြူထွက်လာပြန်၏။ ရွှီယန်အပေါ် ရင်းနှီးမှု ရှိသည်ဆိုသော်လည်း ပထမဆုံးအကြိမ် တွေ့ဆုံခြင်း ဖြစ်သဖြင့် သတိဝီရိယ ထားရှိနေခြင်းကတော့ ရှောင်လွှဲ၍ မရနိုင်ချေ။

ရွှီယန်ကမူ အေးအေးဆေးဆေးပင် ဖြစ်သည်။ သူက တိမ်ကျားသစ်၏ ချစ်ခင်မှု ဆိုသည့် ကျွမ်းကျင်မှုကို ရရှိထားကြောင်း သိထားသဖြင့် တိမ်ကျားသစ်က သူ့ကို သေချာပေါက် စိတ်ဝင်စားနေမည်မှန်း သိရှိပေသည်။

"တိမ်ကျားသစ်ကို ကျွန်တော်လည်း ပထမဆုံး မြင်ဖူးတာပဲ... အရင်က ဗီဒီယိုတွေထဲမှာပဲ တွေ့ဖူးတာ... ဒီကောင်လေးက တကယ်ကို လှတာပဲ"

ရွှီယန်သည် တိမ်ကျားသစ်ကို ကြည့်ရင်း မနေနိုင်ဘဲ ရင်ထဲမှလှိုက်၍ အံ့ဩချီးကျူးလိုက်မိသည်။

ကြောင်မျိုးရင်းဝင် တိရစ္ဆာန်များက အမြဲတမ်း လှပကြပေသည်။ မာနူးကြောင် ကဲ့သို့ ရှုပ်ယှက်ခတ်နေသည့် ရုပ်ရည်မျိုးပင်လျှင် ခေါင်းလုံးလုံး မျက်လုံးပြူးပြူးလေးများကြောင့် ချစ်စရာကောင်းပြီး တုံးအအလေး ဖြစ်နေတတ်သည် မဟုတ်ပါလား။ ဤတစ်ကြိမ်တွင်တော့ အင်တာနက်သုံးစွဲသူများလည်း တိမ်ကျားသစ်၏ ပုံစံကို သေချာ မြင်တွေ့လိုက်ရပြီ ဖြစ်သည်။ ပြောင်လက်နေသော အမွေးအမြှင်များ၊ ကျားသစ်အကွက်များ၊ ကြောင်နှင့်လည်း တူသလို ကျားသစ်နှင့်လည်း တူနေသော ရုပ်ရည်သွင်ပြင်တို့ကြောင့် တကယ့်ကို အသည်းယားစရာ ကောင်လေးပင် ဖြစ်သည်။

[တွေ့ပြီ... တကယ်ကို လှတဲ့ ကြောင်လေးပဲ]

[ဒါကကော ဘာတိရစ္ဆာန်လဲ]

[ဒီမျက်လုံးဝိုင်းကြီးတွေက အရမ်းလှတာပဲ]

[လောင်ရွှီ့ လိုက်ဖ်ကမှ တကယ် ကြည့်ကောင်းတာ... ငါကတော့ တောရိုင်း ကြောင်ကြီးတွေကို ကြည့်ရတာ အရမ်း သဘောကျတာပဲ]

လိုက်ဖ်ထဲတွင် အလွန် စည်ကားနေသည်။

ရွှီယန်က တိမ်ကျားသစ်ကို လက်လှမ်းပြကာ နှုတ်ဆက်လိုက်၏။ တိမ်ကျားသစ်ကလည်း ရွှီယန်ကို ပို၍ပင် စိတ်ဝင်စားလာတော့သည်။ ၎င်းက သစ်ပင်ပေါ်မှ ခုန်ဆင်းလာပြီး မြေပြင်ပေါ်တွင် အနည်းငယ် ရှက်ရွံ့စွာဖြင့် ခြေလှမ်းအနည်းငယ် လျှောက်လာခဲ့သည်။ ခန္ဓာကိုယ်ကိုလည်း အောက်သို့ နှိမ့်ထားပြီး အချိန်မရွေး ထွက်ပြေးနိုင်သည့် အနေအထားမျိုး ပြင်ဆင်ထားသေး၏။

ရွှီယန်ကတော့ ယခင်အတိုင်းပင် ပေါ့ပေါ့ပါးပါးနှင့် အန္တရာယ်ကင်းမည့် ပုံစံမျိုး ဖြစ်နေသည်။ ကြောင်မျိုးရင်းဝင် တိရစ္ဆာန်များ၏ အာရုံခံနိုင်စွမ်းက အလွန် ထက်မြက်လှရာ ၎င်းက ရွှီယန်၏ အေးဆေးတည်ငြိမ်နေမှုကို ခံစားမိသွားသောအခါ တဖြည်းဖြည်းနှင့် ပိုမို သက်သောင့်သက်သာ ဖြစ်လာတော့၏။ ထို့နောက် တိမ်ကျားသစ်က ရွှီယန် ရှိရာဆီသို့ လျှောက်လာခဲ့သည်။

ရွှီယန်နှင့် လိုက်ဖ်ကြည့်ရှုသူ ပရိသတ်များ အားလုံးက ၎င်းကို စောင့်ကြည့်နေကြသည်။ အားလုံးက တိမ်ကျားသစ်၏ သိချင်စိတ်ကို မြင်တွေ့ရပြီး အလွန် စိတ်ဝင်စားစရာ ကောင်းသည်ဟု ခံစားနေကြရ၏။ ဤကောင်လေးက လူသားများကိုပင် စိတ်ဝင်စားနေသည်တဲ့လား။ ပုံမှန်အခြေအနေမျိုးတွင် တိမ်ကျားသစ်များက ဤသို့ သေချာပေါက် ပြုမူမည် မဟုတ်သော်လည်း ရွှီယန်ကတော့ ချွင်းချက် ဖြစ်နေပေသည်။

"သူက ကျွန်တော့်ကို တော်တော်လေး စိတ်ဝင်စားနေပုံရတယ်... ကျွန်တော့်ဆီမှာ ဘာစားစရာ ရှိလဲဆိုတာ စဉ်းစားကြည့်ဦးမယ်"

ရွှီယန်သည် အိတ်ကပ်ကို စမ်းကြည့်လိုက်ပြီး ကျောပိုးအိတ်ကိုလည်း စမ်းကြည့်လိုက်သည်။ ပရိသတ်ဟောင်းများ အားလုံးက ရွှီယန်သည် မျိုးစုံသော သရေစာများကို သယ်ဆောင်လာတတ်ကြောင်း သိရှိထားပြီး ဖြစ်ရာ သူ ဘာကို ထုတ်ယူလိုက်သည်ဖြစ်စေ အံ့ဩစရာ မရှိတော့ချေ။ ထို့နောက် ရွှီယန်က ကျောပိုးအိတ်၏ ဘေးဘက်မှ ဂျယ်လီ တစ်ထုပ်ကို ထုတ်ယူလိုက်သည်ကို မြင်တွေ့လိုက်ရ၏။

"တိမ်ကျားသစ် က အသားစားတာဆိုတော့ ဒီအရာက သူ့အတွက် သိပ်မကောင်းလောက်ဘူး"

ရွှီယန်က ခေါင်းခါလိုက်ပြီး ဆက်လက် စမ်းသပ် ရှာဖွေနေလိုက်သည်။ ထို့နောက် သူက ကြောင်အားဖြည့်မုန့် တစ်ချောင်းကို ထပ်မံ ထုတ်ယူလိုက်ပြန်၏။

"ကြောင်အားဖြည့်မုန့် ဆိုရင်တော့ ရလောက်တယ်... အဲဒီအထဲမှာ အသားတွေချည်းပဲ ပါတာဆိုတော့ နည်းနည်း ကျွေးကြည့်ရင် ဘာမှမဖြစ်လောက်ပါဘူး... ကျွန်တော် ဝယ်ထားတဲ့ အားဖြည့်မုန့် ကလည်း အကောင်းစားတွေချည်းပဲ"

တိမ်ကျားသစ်က ရွှီယန် ရှိရာဆီသို့ လျှောက်လာခဲ့သည်။ ရွှီယန်က ဤကောင်လေးကို သေချာ ကြည့်ရှုနေလိုက်၏။ တိမ်ကျားသစ်၏ ခြေတံလက်တံများက အတော်လေး ရှည်လျားပြီး လက်သည်းများနှင့် ခြေကျင်းဝတ် အဆစ်များက အထူး သွက်လက်လှပေသည်။ ဤကောင်လေးများက သစ်ပင်တက် အလွန် ကျွမ်းကျင်သဖြင့် သစ်ပင်တက် ဘုရင် ဟုပင် တင်စားခေါ်ဝေါ်ကြသည်။ တိမ်ကျားသစ်များ၏ အဓိက သားကောင်များထဲတွင် မျောက်လောင်းများနှင့် မျောက်လွှဲကျော်များပင် ပါဝင်ပေသည်။ ၎င်းတို့သည် ငှက်များ၊ ငါးများနှင့် မြွေများကို စားရုံသာမက မျောက်များကိုပါ ဖမ်းယူ စားသောက်တတ်ကြ၏။ ၎င်းတို့၏ သစ်ပင်တက် ကျွမ်းကျင်မှုမှာ မည်မျှလောက် အဆင့်မြင့်ကြောင်း တွေးကြည့်ရုံနှင့်ပင် သိရှိနိုင်ပေသည်။ ကြောင်မျိုးရင်းဝင် တိရစ္ဆာန်များက သဘာဝလောကကြီးတွင် တကယ်ကို ထူးခြားသည့် တည်ရှိမှု တစ်ခုပင် ဖြစ်သည်။

ရွှီယန်သည် ကျောပိုးအိတ်ကို မြေပြင်ပေါ်တွင် ချထားလိုက်ပြီး ထိုင်ချကာ အရှေ့မှ တိမ်ကျားသစ်ကို ကြည့်လိုက်သည်။ သူက ကြောင်အားဖြည့်မုန့်ကို ဖောက်ပြီး အထဲမှ အားဖြည့်အနှစ်များကို ညှစ်ထုတ်ကာ တိုးတိုးလေး ပြောလိုက်၏။

"မီမီ... လာလေ"

သူ၏စကားကို ကြားသောအခါ အင်တာနက်သုံးစွဲသူများ အားလုံး စကားဆွံ့အသွားကြတော့သည်။ ကြောင်တိုင်းကို မီမီ ဟု ခေါ်၍မရနိုင်ပေ။ သူက တိမ်ကျားသစ် တစ်ကောင် ဖြစ်နေသည်ကို ကျားသစ် တစ်ကောင်၏ ဂုဏ်သိက္ခာကို နည်းနည်းလောက်တော့ လေးစားပေး၍ မရနိုင်ဘူးလား။

သို့သော် တိမ်ကျားသစ်က အင်တာနက်သုံးစွဲသူများ တွေးထင်ထားသကဲ့သို့ မာနကြီးမနေချေ။ ၎င်းက ရွှီယန်ကို စက္ကန့်အနည်းငယ်ခန့် ကြည့်ပြီးနောက် ကြောင်အားဖြည့်မုန့် ရှိရာသို့ သတိထားကာ တိုးကပ်လာခဲ့သည်။ အနံ့ခံကြည့်ပြီးနောက် တစ်လုတ်ချင်းစီ စတင် စားသောက်နေတော့၏။ တကယ်ပင် စားနေပြီဖြစ်သည်။ အင်တာနက်သုံးစွဲသူများ၏ မျက်နှာပေါ်တွင် အံ့ဩမှုများ ပြည့်နှက်သွားတော့သည်။

[မဖြစ်နိုင်တာ... ဒါကြီးက တကယ် ရတယ်ပေါ့]

[တောရိုင်း ကြောင်မျိုးရင်းဝင် တွေက ဘယ်တုန်းက ဒီလောက် ယဉ်ကျေးသွားတာလဲ... တိမ်ကျားသစ် ဆိုတာ သနားညှာတာမှု ကင်းမဲ့တဲ့ တောအုပ်ထဲက လူသတ်သမားကြီးလေ]

[ဒီကောင်လေးက လောင်ရွှီ့ အရှေ့မှာမို့လို့ ဒီလောက် ယဉ်ကျေးနေတာ ဖြစ်ရမယ်]

[အရှေ့မြောက် ကျားကြီး တောင် လောင်ရွှီ့ အရှေ့မှာ လိမ္မာရေးခြားရှိရှိ နို့သောက်ရတယ်ဆိုတာ မင်းတို့တွေ မေ့မနေနဲ့ဦး... တိမ်ကျားသစ် လောက်ကတော့ ပြောစရာတောင် မလိုတော့ဘူး]

[အဲဒါတော့ အမှန်ပဲ... သူက အရှေ့မြောက် ကျားကြီး ကိုတောင် နို့တိုက်ခဲ့ဖူးတာလေ... ကြောင်မျိုးရင်းဝင် တွေအတွက် သီးသန့် ကလေးထိန်းကြီးပဲ]

ရွှီယန်သည် အနီးကပ် ရောက်ရှိနေသော တိမ်ကျားသစ်ကို မြင်သောအခါ ထုံးစံအတိုင်းပင် လက်လှမ်းကာ ပွတ်သပ်ပေးလိုက်သည်။ ရွှီယန်အတွက်မူ ဤကဲ့သို့သော ကိစ္စမျိုးက ရိုးအီနေပြီ ဖြစ်၏။ တိမ်ကျားသစ်ကလည်း မရုန်းကန်ချေ။ ဤတောအုပ်ထဲမှ အေးစက်သော လုပ်ကြံသတ်ဖြတ်သူကြီးမှာ နောက်ဆုံးတွင် ကြောင်အားဖြည့်မုန့် တစ်ချောင်း၏ အောက်တွင် အရှုံးပေးသွားရတော့သည်။ ပို၍ တိတိကျကျ ပြောရလျှင် ရွှီယန်၏ ရင်းနှီးကျွမ်းဝင်မှု အောက်တွင် အရှုံးပေးသွားရခြင်းပင် ဖြစ်သည်။

"တိမ်ကျားသစ်ကို ပွတ်သပ်ခွင့်ရတဲ့ မှတ်တိုင်တစ်ခု စိုက်ထူနိုင်သွားပြီ... ဒီကောင်လေးရဲ့ ခန္ဓာကိုယ်က တော်တော်လေး တောင့်တင်းတာပဲ... တစ်ကိုယ်လုံး ကြွက်သားတွေချည်းပဲ... ဒီလက်သည်းကြီးတွေကို ထပ်ကြည့်ဦး... အရမ်း ထက်မြက်ပြီး သစ်ပင်တက်နိုင်စွမ်းလည်း အရမ်း မြင့်မားတယ်... ခံစားချက်က တကယ် ကောင်းတာပဲ"

ရွှီယန်က ပြုံး၍ ညည်းတွားလိုက်သည်။

အင်တာနက်သုံးစွဲသူများ၏ မျက်လုံးများထဲတွင်တော့ အားကျမှုများသာ ပြည့်နှက်နေတော့၏။

[လောင်ရွှီ့ ရဲ့ ဘဝက တကယ် အားကျဖို့ ကောင်းတာပဲ]

[အဲဒီ တိမ်ကျားသစ်ကို လွှတ်လိုက်စမ်း... ငါ့ကို ပေးလုပ်]

[ဒီလို ကြောင်လေးမျိုးကို ငါ ပထမဆုံး မြင်ဖူးတာ... သူကတော့ ပွတ်တောင် ပွတ်နေပြီ]

[တောထဲက တိရစ္ဆာန် အကုန်လုံး မင်းအပွတ်ခံရတာချည်းပဲ]

ရွှီယန်သည် ပြည်တွင်းတွင် တစ်ဦးတည်းသော ပြင်ပ လိုက်ဖ်လွှင့်သူ ဟုပင် ဆိုရမည် ဖြစ်ပြီး မျိုးစုံသော တောရိုင်း တိရစ္ဆာန်များကို ပွတ်သပ်ခွင့် ရရှိထားသူ ဖြစ်သည်။ ဤသည်မှာ တကယ်ကို လွန်ကဲလွန်းလှ၏။ အင်တာနက် တစ်ခွင်လုံးတွင် သူတစ်ယောက်တည်းသာ ဤသို့ ပြုလုပ်နိုင်သဖြင့် ဤမျှလောက် နာမည်ကြီးလာသည်မှာလည်း ပုံမှန်ပင် ဖြစ်ပေသည်။ ယခုအခါ အားလုံးက ရွှီယန်၏ ခန္ဓာကိုယ်မှာ ထူးခြားသည်ဟူသော အချက်ကို လက်ခံထားကြပြီဖြစ်ပြီး လျှို့ဝှက်ဆန်းကြယ်သည့် ပညာရပ် တစ်ခုအဖြစ် သတ်မှတ်ထားကြပြီ ဖြစ်၏။

တိမ်ကျားသစ်လေးက ချစ်စရာကောင်းလှပေသည်။ ကြောင်အားဖြည့်မုန့် ကို အကုန်စားပြီးသွားသောအခါ ရွှီယန်၏ အရှေ့တွင် ရပ်လျက် သူ့ကို သိချင်စိတ်ဖြင့် အကဲခတ်နေ၏။ ရွှီယန်ကလည်း ဤကောင်လေးကို ထပ်မံ၍ ပွတ်သပ်ပေးလိုက်ပြန်သည်။

"ငါ့အိမ်ဘက်မှာလည်း ကျားသစ် နှစ်ကောင်နဲ့ သိတယ်... မင်းထက်တော့ နည်းနည်း ပိုကြီးတယ်... သူတို့ကလည်း အရမ်း ချစ်စရာ ကောင်းတာ"

ရွှီယန်က တိမ်ကျားသစ်ကို ကြည့်ကာ ပြောလိုက်သည်။ တိမ်ကျားသစ်ကလည်း နားလည်သလို နားမလည်သလိုဖြင့် ခေါင်းညိတ်ပြလိုက်၏။

ရွှီယန်သည် သူနှင့်အတူ ခဏမျှ ဆော့ကစားပြီးနောက် အချိန်အကြာကြီး နေ၍မရသဖြင့် မတ်တပ်ရပ်ကာ ဆက်လက် ခရီးဆက်ခဲ့သည်။ တိမ်ကျားသစ်ကလည်း သူ၏အနောက်မှ ခြေလှမ်းအနည်းငယ်ခန့် လိုက်ပါလာခဲ့၏။ နောက်ဆုံးတွင် ရပ်တန့်သွားပြီး တောအုပ်ထဲသို့ ဝင်ရောက် ပျောက်ကွယ်သွားကာ သူ၏ ဘဝကို ဆက်လက် အလုပ်ရှုပ်နေတော့သည်။

လမ်းခရီးတွင် ရွှီယန်က ရတနာရှာဖွေရေး တာဝန်ကို ဖွင့်ရန် ရွေးချယ်လိုက်သည်။

[ရတနာရှာဖွေရေး တာဝန်ကို နှိုးဆွလိုက်ပါပြီ - တိမ်ကျားသစ် နှင့် အတူတကွ ဓာတ်ပုံရိုက်ပါ]

[တာဝန် ဖော်ပြချက် - ကျေးဇူးပြု၍ တိမ်ကျားသစ် တစ်ကောင်နှင့် အတူတကွ ဓာတ်ပုံရိုက်ခြင်းကို ပြီးမြောက်အောင် လုပ်ဆောင်ပါ]

[တာဝန် ဆုလာဘ် - တောင်တက် ကျွမ်းကျင်မှု အဆင့်မြှင့်တင်ခြင်း]

စနစ်၏ သတိပေးသံ ထွက်ပေါ်လာခဲ့သည်။

စနစ်၏ တာဝန်ကို မြင်သောအခါ ရွှီယန် တစ်ယောက်လုံး စကားဆွံ့အသွားတော့၏။

'နေပါဦး... ဒီအချိန်ကြီးမှ လာရလား'

သူက စိတ်ထဲမှ ညည်းတွားလိုက်ပြီးနောက် အနောက်သို့ လှည့်ကာ တိမ်ကျားသစ်ကို အလျင်အမြန် ပြန်ရှာရတော့သည်။

"မီမီ... မီမီ"

ရွှီယန်သည် တောအုပ်ထဲသို့ အကျယ်ကြီး လှမ်းအော်လိုက်၏။ တိမ်ကျားသစ်က အဝေးသို့ မရောက်သေးသဖြင့် ရွှီယန်၏ အော်သံကို ကြားသောအခါ ချက်ချင်းပင် ခုန်ပေါက်ကာ ပြေးထွက်လာတော့သည်။

အခန်း (၂၆၄) ဂျယ်လီတွေထုတ်ပေးစမ်း ဂျယ်လီတွေထုတ်ပေးလို့ပြောနေတယ်လေ

တိမ်ကျားသစ်နှင့် လမ်းခွဲပြီးနောက် ရွှီယန်သည် တောအုပ်ထဲတွင် ဆက်လက် လမ်းလျှောက်နေခဲ့သည်။

ရရှိခဲ့သော ကျွမ်းကျင်မှုကလည်း မဆိုးလှပေ။ တောင်တက်ကျွမ်းကျင်မှု အဆင့်မြှင့်တင်ခြင်းသည် တောင်ထဲတွင် လှုပ်ရှားသွားလာရန် ပိုမို သင့်တော်လှသည်။

တိုက်ရိုက်ထုတ်လွှင့်မှုထဲတွင် လူအရေအတွက်က အလွန် များပြားလှ၏။ ရွှီယန်သည် တစ်ရက်သာ လိုက်ဖ်လွှင့်ရသေးသော်လည်း မှိုထွက်သည့် နေရာကို ရှာတွေ့ခြင်းနှင့် တိမ်ကျားသစ်နှင့် တွေ့ဆုံခြင်းတို့က လူအများ၏ အာရုံကို ဆွဲဆောင်ရန် လုံလောက်နေပြီ ဖြစ်သည်။

ထို့အပြင် သူကိုယ်တိုင်ကလည်း နာမည်ကြီး လိုက်ဖ်လွှင့်သူ တစ်ယောက်ဖြစ်ရာ ရေပန်းစားမှုက သဘာဝကျကျပင် မြင့်မားနေသည်။ ဤသည်မှာ သူ ရက်အတော်ကြာမှ တစ်ခါ လိုက်ဖ်လွှင့်ခြင်းကြောင့် ဖြစ်ပေသည်။ ရွှီယန်က ဤစည်းချက်အတိုင်းသာ ဆက်လက် ထိန်းသိမ်းထားရန် ရည်ရွယ်ထား၏။ ရရှိထားသော နာမည်ကျော်ကြားမှု ရမှတ်များကလည်း လုံလောက်နေပြီ ဖြစ်သည်။

သူသည် တောထဲတွင် တစ်လျှောက်လုံး ရှာဖွေနေလိုက်သည်။ ဤဘက်ရှိ တောင်များက ပို၍ ပူအိုက်ပြီး ခြင်နှင့် ပိုးမွှားများလည်း ပိုများသည်။ စာအုပ်များထဲတွင် ပါဝင်လေ့ရှိသည့် အဆိပ်ပိုးမွေးမြူခြင်းကဲ့သို့သော ဇာတ်လမ်းများမှာ အများအားဖြင့် ဤဒေသတွင်သာ ဖြစ်ပျက်လေ့ရှိကြ၏။

လမ်းခရီးတွင် တစ်ခါတရံ ထူးဆန်းသော ပန်းမန်များကို မြင်တွေ့ရပြီး ကြည့်ရသည်မှာပင် ထူးဆန်းနေပေသည်။ ရွှီယန်က နေရာအနှံ့ ကြည့်ရှုကာ တောင်ပေါ်မှ ရှုခင်းများကို ခံစားနေလိုက်သည်။

သူသည် ငယ်ငယ်ကတည်းက ချန်ပိုင်တောင်တန်းတွင် ကြီးပြင်းလာခဲ့သဖြင့် မတူညီသော ဒေသများရှိ တောင်တန်းများကြားမှ ကွာခြားချက်များကို ပို၍ သေချာစွာ ခွဲခြားနိုင်စွမ်း ရှိပေသည်။ အတင်းအကြပ် ပြောရမည်ဆိုလျှင် သူသည် တောင်တန်း၏ နတ်ဝိညာဉ်ကို ခံစားသိရှိနိုင်ခြင်းပင် ဖြစ်၏။ ဤကဲ့သို့သော ခံစားချက်က အတော်လေး ထူးဆန်းလှသည်။

နောက်ထပ် နှစ်နာရီခန့် လမ်းလျှောက်ပြီးနောက် တောင်ဆင်းလမ်းသည် အဆက်မပြတ် အောက်သို့ ဆင်းသွားပြီး လမ်းလျှောက်သည့် အမြန်နှုန်းကလည်း မြန်ဆန်လာခဲ့သည်။

လမ်းတစ်ဝက်သို့ ရောက်သောအခါ ရွှီယန်က ရတနာရှာဖွေရေး တာဝန်ကို နောက်တစ်ကြိမ် ထပ်မံ ဖွင့်ရန် ရွေးချယ်လိုက်၏။ သူက ဤတာဝန်အတွက် မျှော်လင့်ချက်များ အပြည့် ရှိနေသည်။

'မပြန်ခင်လေးမှာ စိတ်ဝင်စားစရာကောင်းတဲ့ တာဝန်လေး ဖြစ်ပါစေလို့ မျှော်လင့်ပါတယ်... ရှားပါးတိရစ္ဆာန်တွေနဲ့ ပတ်သက်တာဆိုရင် အကောင်းဆုံးပဲ'

ထိုစဉ် တာဝန် သတိပေးသံ ထွက်ပေါ်လာခဲ့သည်။

[ရတနာရှာဖွေရေး တာဝန်ကို နှိုးဆွလိုက်ပါပြီ။ ချစ်စရာ ကောင်လေး တောကြောင်ဝက်ဝံ]

[တာဝန် လိုအပ်ချက်။ တောကြောင်ဝက်ဝံကို အစာကျွေးပြီး ကျေနပ်အောင် လုပ်ဆောင်ပါ]

[တာဝန် ဆုလာဘ်။ တောကြောင်ဝက်ဝံ အရုပ် ငါးခု]

[တာဝန် အထောက်အကူပြု ပစ္စည်း။ လတ်ဆတ်သော ပန်းသီး တစ်လုံး။ လဲလှယ်ရန်အတွက် နာမည်ကျော်ကြားမှု ရမှတ် နှစ်ရာ လိုအပ်ပါသည်]

တာဝန် သတိပေးချက်ကို မြင်သောအခါ ရွှီယန်သည် ချက်ချင်းပင် ဝမ်းသာသွားတော့၏။ တာဝန် ဆုလာဘ်မှာ အရုပ် အနည်းငယ်သာ ဖြစ်ပြီး အလွန် ညံ့ဖျင်းသော်လည်း တာဝန်၏ ပစ်မှတ်ကိုမူ ရွှီယန်က အလွန် သဘောကျနေမိသည်။ တောကြောင်ဝက်ဝံပင် ဖြစ်သည်။

"အခု တောရိုင်း တောကြောင်ဝက်ဝံ အရေအတွက်က တော်တော်လေး နည်းသွားပြီ... ဟိမဝန္တာတောင်တန်းဘက်မှာပဲ ရှိတော့တယ်လို့ မှတ်မိနေတယ်... ဒီဘက်က ဟိမဝန္တာတောင်တန်းနဲ့ သိပ်မဝေးတော့ဘူးလေ... ဒီမှာက နေရာတိုင်း တောင်တွေချည်းပဲဆိုတော့ တောရိုင်း တောကြောင်ဝက်ဝံတွေ ရှိနေတာလည်း ယုတ္တိရှိပါတယ်"

ရွှီယန်သည် အနည်းငယ် လက်ယားလာခဲ့၏။ တောကြောင်ဝက်ဝံမှာ အမှန်တကယ်ကို ချစ်စရာကောင်းသော ကောင်လေးများ ဖြစ်သည်။ တိရစ္ဆာန်ရုံတွင် အချစ်စရာအကောင်းဆုံး တိရစ္ဆာန်များဟုပင် ဆိုရမည် ဖြစ်၏။

ဤကောင်လေးများက မွေးရာပါ ချစ်စရာကောင်းပြီး သစ်သီးစားရသည်ကို ကြိုက်နှစ်သက်ကြကာ ကိုယ့်ကိုယ်ကိုယ် ကာကွယ်နိုင်စွမ်း သိပ်မရှိကြချေ။ ရန်သူနှင့် တွေ့လျှင် လက်နှစ်ဖက်ကို မြှောက်ထားတတ်ကြပြီး အကြောင်းရင်းမှာ ဤသို့လုပ်ခြင်းက သူတို့ကို ပိုမို ကြီးမားပုံ ပေါက်စေသည်ဟု ထင်မှတ်ထားသောကြောင့် ဖြစ်သည်။

ရွှီယန်က ပန်းသီး နှစ်လုံး လဲလှယ်လိုက်ပြီး ဒရုန်းကင်မရာက အဝေးသို့ ရိုက်ကူးနေချိန်ကို အခွင့်ကောင်းယူကာ ပန်းသီးများကို ကျောပိုးအိတ်ထဲသို့ ထည့်ဝှက်ထားလိုက်သည်။ နောက်ပိုင်းကျမှ ထုတ်ယူရန် လွယ်ကူစေရန် ဖြစ်၏။ ထိုအရာများကို လုပ်ဆောင်ပြီးနောက် ရွှီယန်သည် အရှိန်မြှင့်ကာ တောကြောင်ဝက်ဝံ ရှိရာ အရပ်သို့ တန်းတန်းမတ်မတ် လျှောက်သွားခဲ့သည်။

တောကြောင်ဝက်ဝံကို သူ လက်တွေ့တွင် ဘယ်တုန်းကမှ မမြင်ဖူးခဲ့ချေ။ ဗီဒီယိုများထဲတွင်သာ မြင်ဖူးခဲ့ပြီး သေးသေးကွေးကွေးလေးနှင့် အလွန် ချစ်စရာကောင်းကြောင်း သိရှိထား၏။ ထို့ကြောင့် သူက အလွန် တွေ့ချင်နေမိသည်။

တိုက်ရိုက်ထုတ်လွှင့်မှုထဲတွင် ယခင်အတိုင်းပင် အားလုံးက တောင်ပေါ်မှ ရှုခင်းများကို ခံစားရင်း ထိုအထဲမှ ထွက်ပေါ်လာသော အန္တရာယ် အငွေ့အသက်များကို ခံစားနေကြ၏။ တောနက်ထဲတွင် ဖြစ်ရာ အချိန်မရွေး ကြမ်းတမ်းသော သားရဲများ ထွက်ပေါ်လာနိုင်သဖြင့် အားလုံးက အလိုအလျောက် စိုးရိမ်စိတ်များ ဖြစ်ပေါ်နေတတ်ကြသည်။ ဤကဲ့သို့သော ခံစားချက်မျိုးမှာ အခြား လိုက်ဖ်များတွင် မရနိုင်ချေ။

နာရီဝက်ခန့် အကြာတွင် ရွှီယန်သည် နောက်ဆုံး၌ ခရီးဆုံးသို့ ရောက်ရှိသွားခဲ့သည်။ သူသည် ထိုတောကြောင်ဝက်ဝံကို မြင်တွေ့လိုက်ရ၏။ ချစ်စရာကောင်းသော ကောင်လေးက တုတ်ခိုင်သော သစ်ကိုင်း တစ်ကိုင်းပေါ်တွင် မှောက်လျက် မျက်လုံးများ မှိတ်ကာ နှစ်နှစ်ခြိုက်ခြိုက် အိပ်မောကျနေသည်။

အိပ်မက်လှလှလေးများ မက်နေသည်လား မသိနိုင်ပေ။ တောကြောင်ဝက်ဝံ၏ မျက်နှာပေါ်တွင် အပြုံးလေး အနည်းငယ်ပင် ရှိနေသေး၏။

"ဟိုမှာ ကြည့်... မထင်မှတ်တဲ့ အရာလေး တွေ့ပြီ... ဒီနေရာမှာ တောကြောင်ဝက်ဝံတွေ ရှိနေတာပဲ... တကယ်ကို အံ့ဩစရာပဲ... တောကြောင်ဝက်ဝံက ကျွန်တော်တို့ နိုင်ငံရဲ့ အဆင့် ၂ ကာကွယ်ရမယ့် တိရစ္ဆာန်လေ... အခု တိရစ္ဆာန်ရုံတွေမှာ အရမ်း နာမည်ကြီးနေတာ... တောကြောင်ဝက်ဝံတွေနဲ့ အတူတူ အိပ်လို့ရတဲ့ ဟိုတယ်တွေတောင် ရှိသေးတယ်... ကျွန်တော် အပြင်မှာ ပထမဆုံး မြင်ဖူးတာပဲ... အပြင်မှာက ပိုတောင် ချစ်စရာ ကောင်းသေးတယ်"

ရွှီယန်က အရှေ့သို့ လက်ညှိုးထိုးပြကာ ပြုံးရင်း ရှင်းပြလိုက်သည်။

တောကြောင်ဝက်ဝံ၏ ပုံစံက လိုက်ဖ် မြင်ကွင်းထဲတွင် ပေါ်လာ၏။ အားလုံးက အိပ်မောကျနေသော အူကြောင်ကြောင် ပုံစံလေးနှင့် တောကြောင်ဝက်ဝံကို မြင်သောအခါ ချက်ချင်းပင် အသည်းယားသွားကြတော့သည်။

[ဘုရားရေ... တကယ်ကို ချစ်စရာလေးပဲ]

[ဒီကောင်လေးတွေက အရမ်း ချစ်စရာကောင်းတာပဲ... တကယ်လို့များ အိမ်မွေး တိရစ္ဆာန်အဖြစ် မွေးခွင့်ရမယ်ဆိုရင် ဘယ်လောက်တောင် ကောင်းလိုက်မလဲ]

[ဟုတ်တယ်... ပန်ဒါတွေရော တောကြောင်ဝက်ဝံတွေရော ကြောင်တွေ ခွေးတွေလိုမျိုး လူတိုင်း မွေးခွင့်ရမယ်ဆိုရင် သိပ်ကောင်းမှာပဲ]

[တိရစ္ဆာန် အမျိုးအစား အားလုံးကို အိမ်မွေး တိရစ္ဆာန်အဖြစ် မွေးလို့ရရင် တကယ် ကောင်းမှာပဲ... ကာတွန်းဇာတ်လမ်းထဲက ကမ္ဘာကြီးလိုမျိုး လူတိုင်းက မတူညီတဲ့ ချစ်စရာ အကောင်လေးတွေကို မွေးထားကြတာ... တွေးကြည့်ရုံနဲ့တင် အရမ်း လှပနေပြီ]

[အဲဒါဆို ငါက ခြင်္သေ့ကြီး တစ်ကောင် မွေးချင်တယ်]

[ငါကတော့ ပန်ဒါ မွေးမယ်... အများကြီး မွေးမှာ]

တိုက်ရိုက်ထုတ်လွှင့်မှုထဲမှ ကြည့်ရှုသူများက လူတိုင်းတွင် အိမ်မွေး တိရစ္ဆာန်များ ရှိနေမည့် ကမ္ဘာကြီးအကြောင်းကို စိတ်ကူးယဉ်နေကြပြီး သူတို့ မွေးချင်သော တိရစ္ဆာန်များကိုပါ စိတ်ကူးယဉ်နေကြ၏။ အားလုံးက စကားစမြည် ပြောဆိုနေကြပြီး လေထုက အလွန် ပေါ့ပါးပျော်ရွှင်စရာ ကောင်းနေသည်။

တကယ်တမ်း ပြောရလျှင် တောကြောင်ဝက်ဝံ၊ ပန်ဒါ၊ ကျားသစ် စသည်တို့ကို တကယ်သာ အိမ်မွေး တိရစ္ဆာန်အဖြစ် မွေးခွင့်ရပါက တကယ်ကို ပို၍ စိတ်ဝင်စားစရာ ကောင်းပေလိမ့်မည်။ သို့သော် ဤတိရစ္ဆာန်များ၏ အရေအတွက်က အလွန် ရှားပါးလှပြီး ကာကွယ်စောင့်ရှောက်ရန်ပင် အချိန်မရနိုင်သဖြင့် အများပြည်သူ မွေးမြူခွင့်ပြုရန်ဆိုသည်မှာ လုံးဝ မဖြစ်နိုင်ချေ။

ထိုအချိန်မှာပင် တောကြောင်ဝက်ဝံက သူ့ကို လူတွေ ကြည့်နေမှန်း သတိထားမိသွားပုံရ၏။ သူ နိုးလာပြီး ဘေးဘက်သို့ ကြည့်လိုက်ရာ ရွှီယန်ကို အတိအကျပင် မြင်တွေ့လိုက်ရသည်။ ရွှီယန်ကို မြင်သောအခါ ကောင်လေးက လန့်သွားပြီး သစ်ကိုင်းပေါ်မှ ချက်ချင်း ပြုတ်ကျသွားတော့၏။

သူ၏ ရှေ့လက်သည်း နှစ်ဖက်ဖြင့် သစ်ကိုင်းကို အလျင်အမြန် ဖက်ထားလိုက်သည်။ ဤကောင်လေးများ၏ သစ်ပင်တက်နိုင်စွမ်းက အတော်လေး ကောင်းမွန်ပြီး သစ်ပင်များပေါ်တွင် တွယ်တက်ရသည်ကို ကျွမ်းကျင်ကြပေသည်။ သူက ရှေ့လက်သည်းများဖြင့် သစ်ကိုင်းကို ဖက်ထားရင်း နောက်ခြေထောက်များကို အားကုန်ဆန့်ထုတ်ကာ သစ်ကိုင်းကို နောက်လက်သည်းများဖြင့် ချိတ်ရန် ကြိုးစားနေ၏။ လက်သည်းလေးများက ဖောင်းဖောင်းလေးများ ဖြစ်နေပြီး ကြည့်ရသည်မှာ အတော်လေး ထူထပ်သည့် ပုံပေါ်သည်။

သို့သော် နှစ်ကြိမ်ခန့် ကြိုးစားကြည့်သော်လည်း နောက်လက်သည်းများက သစ်ကိုင်းကို ချိတ်မိခြင်း မရှိချေ။ ထို့နောက် ရှေ့လက်သည်းများကလည်း ဆက်လက် တောင့်ခံမထားနိုင်တော့သဖြင့် ခန္ဓာကိုယ်က သစ်ပင်ပေါ်မှ တိုက်ရိုက် ပြုတ်ကျသွားတော့၏။ မြေပြင်ပေါ်သို့ ကျသွားသည်နှင့် ချက်ချင်းပင် ရွှီယန် ရှိရာဘက်သို့ လက်နှစ်ဖက်ကို မြှောက်ကာ တိုက်ခိုက်မည့် အနေအထားမျိုး ပြင်ဆင်ပြီး ရွှီယန်ကို ခြောက်လှန့်ရန် ကြိုးစားနေတော့သည်။

ရွှီယန်က သူ၏ ပြဇာတ်ကို အေးဆေးစွာ ရပ်ကြည့်နေလိုက်၏။ ဤကောင်လေးက မတ်တပ်ရပ်လိုက်လျှင်တောင် ရွှီယန်၏ ဒူးလောက်ပင် မရှိဘဲ သတ္တိကတော့ တော်တော်လေး ကောင်းနေသေးသည်။ တကယ်ပင် ချစ်စရာကောင်းလွန်းသဖြင့် ခြောက်လှန့်နေလျှင်ပင် ချစ်စရာကောင်းသည်ဟု ထင်ရစေ၏။ ဤသည်က အင်အား ကွာဟချက်ပင် ဖြစ်သည်။

လိုက်ဖ်ထဲမှ အင်တာနက်သုံးစွဲသူများမှာ ရယ်မောလွန်း၍ ခွေခေါက်နေကြပြီ ဖြစ်သည်။

[ဟားဟားဟား... သူက အရမ်း ချစ်စရာကောင်းတာပဲ]

[အပေါ်ရောက်လာတာနဲ့ မျက်လှည့် အရင်ပြပြီး တစ်ဖက်လူကို ခြောက်လှန့်ဖို့ ကြိုးစားနေတာပေါ့]

[ဒီကောင်လေးက ဘယ်လိုဖြစ်လို့ အူကြောင်ကြောင် ဖြစ်နေရတာလဲ]

[အရမ်း ချစ်စရာကောင်းတာပဲ... ဟားဟားဟား]

ရွှီယန်၏ မျက်နှာပေါ်တွင် အပြုံးတစ်ခု ပေါ်လာခဲ့၏။ သူက ဤကောင်လေးကို မခြောက်လှန့်ချင်တော့သဖြင့် ကျောပိုးအိတ်၏ ဘေးဘက်မှ ပန်းသီး တစ်လုံးကို အမြန် ထုတ်ယူလိုက်သည်။ တိရစ္ဆာန်ရုံမှ တောကြောင်ဝက်ဝံများကို မွေးမြူသည့် အတွေ့အကြုံများအရ ဤကောင်လေးများ အကြိုက်ဆုံးမှာ ပန်းသီးပင် ဖြစ်၏။

ရွှီယန်က အနည်းငယ် အားစိုက်ပြီး ချိုးလိုက်ရာ ပန်းသီးက ချက်ချင်းပင် နှစ်ခြမ်း ကွဲသွားတော့သည်။ ထို့နောက် ရွှီယန်က ပန်းသီးကို မြေပြင်ပေါ်တွင် ချထားလိုက်ပြီး ခုနစ်မီတာ ရှစ်မီတာခန့် အကွာအဝေးသို့ ဖြည်းဖြည်းချင်း နောက်ဆုတ်သွားခဲ့၏။

သူက တောကြောင်ဝက်ဝံနှင့် လုံခြုံသော အကွာအဝေး တစ်ခုကို ဖန်တီးလိုက်သည်။ တောကြောင်ဝက်ဝံက သူ့အပေါ် သိသာစွာ သတိထားနေ၏။ ထို့အပြင် ရွှီယန်တွင် တောကြောင်ဝက်ဝံ၏ ချစ်ခင်မှု ဆိုသည့် ကျွမ်းကျင်မှု မရှိသဖြင့် တောရိုင်း တောကြောင်ဝက်ဝံက သူ့အနားသို့ ကပ်လာမည် မဟုတ်ချေ။

ရွှီယန်က တောရိုင်း တိရစ္ဆာန်များကို အမြဲတမ်း အတင်းအကြပ် မလုပ်တတ်ချေ။ သူ၏ အကြိုက်ကို တိရစ္ဆာန်များအပေါ် အတင်းအကြပ် မလုပ်တတ်ခြင်း ဖြစ်၏။ တိရစ္ဆာန်လေးများက သူ၏ အနားတွင် နေချင်လျှင် သူက ပွတ်သပ်ပေးမည်။ တိရစ္ဆာန်လေးများက မနှစ်သက်လျှင် သူက ဘာကိုမှ အတင်းအကြပ် လုပ်မည် မဟုတ်ပေ။

သူက အမြဲတမ်း ဤသို့ပင် ဖြစ်၏။ ဘယ်တော့မှ အတင်းအကြပ် မလုပ်ချေ။

တောကြောင်ဝက်ဝံက ရွှီယန် နောက်ဆုတ်သွားသည်ကို မြင်သောအခါ သူ၏ ခြောက်လှန့်မှုက အလုပ်ဖြစ်သွားပြီဟု ထင်မှတ်သွား၏။ သူက မြေပြင်ပေါ်မှ ပန်းသီးကို ကြည့်လိုက်ရာ ချက်ချင်းပင် ဆွဲဆောင်ခံလိုက်ရတော့သည်။ ထို့နောက် တောကြောင်ဝက်ဝံက ပန်းသီး ရှိရာသို့ ဖြည်းဖြည်းချင်း လျှောက်သွားခဲ့၏။ သူက ခေါင်းငုံ့ကာ အနံ့ခံကြည့်လိုက်ပြီးနောက် ပန်းသီး တစ်ခြမ်းကို ယူကာ စမ်းသပ်သည့် အနေဖြင့် တစ်ကိုက် ကိုက်စားကြည့်လိုက်သည်။

ချိုမြိန်သော ပန်းသီးအရည်များက သူ၏ ပါးစပ်မှတစ်ဆင့် ဗိုက်ထဲသို့ စီးဝင်သွားရာ တစ်ခဏအတွင်းမှာပင် ချိုမြိန်သော ခံစားချက်ကြောင့် တောကြောင်ဝက်ဝံလေးမှာ ဝမ်းသာလွန်း၍ ပျံတက်မတတ် ဖြစ်သွားတော့၏။ ပန်းသီးက ဤမျှလောက် အရသာရှိလိမ့်မည်ဟု သူ မထင်မှတ်ထားခဲ့သဖြင့် တစ်ကောင်လုံး စိတ်လှုပ်ရှားသွားတော့သည်။ ထို့နောက် သူက ပျော်ရွှင်စွာဖြင့် ပန်းသီးကို စတင် စားသောက်တော့၏။

သူ ပန်းသီးစားသည့် ပုံစံကလည်း ချစ်စရာ ကောင်းလှသည်။ နောက်စွယ်သွားဖြင့် ပန်းသီးကို ကိုက်ဖြတ်ပြီးနောက် ပါးစောင်ဖြင့် အားကုန် ဝါးစားနေကာ တစ်ကိုယ်လုံး အားစိုက်နေရသည့် အလားပင်။ နှစ်လုတ်ခန့် စားပြီးနောက် ပို၍ ပျော်ရွှင်လာကာ သစ်ပင်ပေါ်သို့ လှမ်း၍ နှစ်ခွန်းခန့်ပင် အော်လိုက်သေး၏။

ရွှီယန်က သူ ဘာအော်နေသလဲ ဆိုသည်ကို သိချင်နေစဉ်မှာပင် သစ်ပင်ပေါ်မှ နောက်ထပ် တောကြောင်ဝက်ဝံ တစ်ကောင် ဆင်းလာသည်ကို တွေ့လိုက်ရသည်။ ဤတောကြောင်ဝက်ဝံ၏ အရွယ်အစားက ပို၍ သေးငယ်ပြီး သေချာပေါက် သားပေါက်လေးပင် ဖြစ်၏။

"နောက်တစ်ကောင် ရှိသေးတာပဲ... မထင်မှတ်ထားတဲ့ အမြတ်ပဲ"

ရွှီယန်၏ မျက်ဝန်းများထဲတွင် အံ့ဩချီးကျူးမှု အရိပ်အယောင်များ ပေါ်လာခဲ့သည်။

တောကြောင်ဝက်ဝံ သားပေါက်လေးက ပို၍ ချစ်စရာကောင်းပြီး ဤကောင်လေးက မွေးရာပါ အသည်းယားစရာ ကောင်လေးပင် ဖြစ်၏။ သူ၏ ဂုဏ်သတ္တိများ အားလုံးကို ချစ်စရာကောင်းခြင်း တွင်သာ ထည့်သွင်းထားသကဲ့သို့ပင်။

တောကြောင်ဝက်ဝံ သားပေါက်လေးက ကျန်ရှိနေသော ပန်းသီး တစ်ခြမ်းကို ရရှိသွား၏။ လိုက်ဖ်ထဲမှ အင်တာနက်သုံးစွဲသူများလည်း ပွက်လောညံသွားကြတော့သည်။ ဤမြင်ကွင်းက အလွန် လှပလှ၏။

ရွှီယန်က သူတို့ ဤသို့ ဖြစ်နေသည်ကို မြင်သောအခါ ဒုတိယမြောက် ပန်းသီးကို ထပ်ထုတ်လိုက်ပြီး ချိုးပြီးနောက် အရှေ့သို့ ခြေလှမ်းအနည်းငယ် တိုးသွားလိုက်သည်။ သူ အနားသို့ ရောက်သွားသည်နှင့် တောကြောင်ဝက်ဝံက ချက်ချင်း မတ်တပ်ရပ်ကာ လက်နှစ်ဖက်ကို မြှောက်ပြီး ခြောက်လှန့်သည့် အနေအထားမျိုး လုပ်ပြတော့၏။

တောကြောင်ဝက်ဝံ သားပေါက်လေးကတော့ လန့်သွားပြီး သစ်ပင် အနောက်သို့ ပြေးပုန်းသွားသည်။ ရွှီယန်က ပန်းသီးကို မြေပြင်ပေါ်တွင် ချထားလိုက်ပြီး နောက်ဆုတ်သွားသည်ကိုသာ တွေ့လိုက်ရ၏။

"သူတို့က တော်တော်လေး သတိထားနေကြတယ်... အနားမကပ်တော့ဘူး... သူတို့ကို သွားမလန့်စေနဲ့... ဒီအတိုင်း ကြည့်နေရတာပဲ ကောင်းပါတယ်"

ရွှီယန်က အင်တာနက်သုံးစွဲသူများကို ပြောလိုက်သည်။ သူ၏စကားကို ကြားသောအခါ အားလုံးက အသီးသီး ချီးကျူးလိုက်ကြ၏။ ဤသို့လုပ်ခြင်းက တကယ်ကို ပိုကောင်းပေသည်။

ပန်းသီး ထပ်ရှိသေးသည်ကို မြင်သောအခါ တောကြောင်ဝက်ဝံ နှစ်ကောင်လုံး ပြေးလာပြီး ပန်းသီး အရသာကို ထပ်မံ မြည်းစမ်းကြပြန်၏။ သူတို့က အလွန် ပျော်ရွှင်စွာ စားသောက်နေကြပြီး မျက်နှာပေါ်တွင်လည်း အပြုံးများ အပြည့်ပင်။ အလွန်ကို စိတ်အပန်းပြေစေသည့် ခံစားချက်မျိုး ပေးစွမ်းနေပေသည်။

သူတို့၏ ပျော်ရွှင်နေသော မြင်ကွင်းကို ကြည့်ရင်း အင်တာနက်သုံးစွဲသူ အများအပြားမှာလည်း ကြည်နူးသွားကြတော့၏။

[လောင်ရွှီ... မိုက်တယ်ကွာ]

[ပန်းသီး ထပ်ရှိသေးလား... အများကြီး ထပ်ကျွေးလိုက်လေ]

[ပန်းသီး မရှိတော့ဘူးလား... ဂျယ်လီတွေ ရှိသေးတယ် မဟုတ်လား... ဂျယ်လီတွေ ထုတ်ပေးစမ်း... ဂျယ်လီတွေ ထုတ်ပေးလို့ ပြောနေတယ်လေ]

[ဟုတ်တယ်... ဂျယ်လီတွေ ရှိသေးတယ်... ဂျယ်လီတွေ ထုတ်ပေးစမ်း]

လိုက်ဖ်ထဲမှ အင်တာနက်သုံးစွဲသူများက ဆူညံနေကြသည်။

ရွှီယန်က ကွန်မန့်များကို မြင်သောအခါ ငိုရခက် ရယ်ရခက် ဖြစ်သွားတော့၏။ ဤဂျယ်လီများကို သူတို့ စား၍ရမည်လား။ သို့သော် နည်းနည်းလောက် ကျွေးလျှင်တော့ သိပ်ပြဿနာ မရှိနိုင်ဟု ထင်မိ၏။

ရွှီယန်က ကျောပိုးအိတ်ထဲမှ ဂျယ်လီများကို ထုတ်ယူလိုက်ပြီး အခွံများကို တစ်ခုချင်းစီ ဖောက်ကာ သန့်ရှင်းသော သစ်ရွက်ကြီး တစ်ရွက်ကို ရှာ၍ ဂျယ်လီများ အားလုံးကို ထိုသစ်ရွက်ပေါ်တွင် တင်ပေးလိုက်သည်။ သူက ယခင်အတိုင်းပင် ဂျယ်လီများကို တောကြောင်ဝက်ဝံများထံသို့ သွားပို့ပေးလိုက်၏။

ထို့နောက် ရွှီယန်က တောကြောင်ဝက်ဝံများ အစာစားနေသည်ကို ခဏခန့် ထပ်ကြည့်နေလိုက်ပြီး သူတို့ စား၍ ပြီးလုနီးပါး ဖြစ်သောအခါ အနောက်သို့ လှည့်၍ ထွက်ခွာလာခဲ့သည်။ နာရီဝက်ခန့် ကြည့်ရှုခဲ့ပြီဖြစ်ရာ ခရီးဆက်ရမည် ဖြစ်၏။

လိုက်ဖ်ထဲတွင် အလွန် စည်ကားနေပြီး အင်တာနက်သုံးစွဲသူများက ဤကောင်လေး နှစ်ကောင်ကြောင့် အသည်းယားနေကြကာ ကွန်မန့်များနှင့် လက်ဆောင်များကလည်း အဆက်မပြတ် တက်လာနေသည်။

ရွှီယန်က သိပ်မကြာခင်မှာပင် တောအုပ်ထဲတွင် ပျောက်ကွယ်သွားတော့၏။ တောကြောင်ဝက်ဝံ နှစ်ကောင်မှာ ဗိုက်ဝသွားကြပြီဖြစ်ပြီး သူတို့က ယှဉ်တွဲကာ သစ်ပင်ပေါ်သို့ အတူတကွ တွယ်တက်သွားကြသည်။

တောကြောင်ဝက်ဝံ သားပေါက်လေးက အလွန် စိတ်လှုပ်ရှားနေပြီး သူ့အမေက တကယ်ကို စွမ်းသည်ဟု ပြောနေသည့် အလား လေးစားအားကျသည့် အမူအရာများ ပြသနေ၏။ အရွယ်ရောက်ပြီးသော တောကြောင်ဝက်ဝံကတော့ ဂုဏ်ယူဝင့်ကြွားနေပြီး ထိုမျက်နှာအမူအရာက ငါက အဲဒီ ခြေနှစ်ချောင်းသတ္တဝါကို ခြောက်လှန့်လိုက်တာ... သူ အနားတောင် မကပ်ရဲတော့ဘဲ ပစ္စည်းတွေကို လိမ္မာရေးခြားရှိရှိ ထုတ်ပေးသွားတာလေ ဟု ပြောနေသည့် အလားပင်။

သားပေါက်လေးကလည်း ခေါင်းညိတ် ထောက်ခံကာ အလွန် ပျော်ရွှင်နေ၏။ ဤအခိုက်အတန့်တွင် တောကြောင်ဝက်ဝံ နှစ်ကောင်လုံး အလွန် ပျော်ရွှင်နေကြပေသည်။

ရွှီယန်က တောင်အောက်ဆင်းသည့် လမ်းတွင် ဆက်လက် လမ်းလျှောက်နေ၏။ တောကြောင်ဝက်ဝံများ ဤဘက်တွင် ရှိနေသဖြင့် ဤတောင်ပေါ် ဒေသက သေချာပေါက် လုံခြုံမည်ဖြစ်ပြီး ကြမ်းတမ်းသော သားရဲများ မရှိနိုင်ကြောင်း သူ သိရှိထားသည်။ မည်သို့ပင်ဆိုစေ တောကြောင်ဝက်ဝံများက အစာကွင်းဆက်၏ အောက်ခြေတွင် ရှိနေပြီး သူတို့တွင် ခုခံကာကွယ်နိုင်စွမ်း ဘာမျှမရှိချေ။

အသက်ရှင်သန်နိုင်သည့် အကြောင်းရင်းမှာ ပတ်ဝန်းကျင် အခြေအနေ ကောင်းမွန်သောကြောင့်သာ ဖြစ်၏။ ဤသို့မှသာ သူတို့ အသက်ရှင်သန်နိုင်မည် ဖြစ်သည်။

'ဒီနေရာက တကယ်ကို ပုန်းကွယ်နေတာပဲ... ဆင်းရတာ မလွယ်ဘူး... ငါလည်း မတ်စောက်တဲ့ ကုန်းအဆင်း တစ်ခုကို ဆင်းပြီးမှ ဒီကို ရောက်လာတာ... တောကြောင်ဝက်ဝံတွေ ရှင်သန်ဖို့ အရမ်း သင့်တော်ပါတယ်... သူတို့ ကောင်းကောင်းမွန်မွန် အသက်ရှင်နိုင်ပါစေလို့ မျှော်လင့်ပါတယ်'

ရွှီယန်က စိတ်ထဲမှ တွေးလိုက်ပြီးနောက် တောင်အောက်သို့ တောက်လျှောက် လျှောက်သွားခဲ့၏။

ယနေ့ကလည်း ရလာဒ်ကောင်းများ ပြည့်နှက်နေသည့် နေ့တစ်နေ့ပင် ဖြစ်သည်။ တန်ဖိုးကြီး မှိုများ အပြည့်ပါသော ကျောပိုးအိတ် တစ်လုံးအပြင် အလွန် ချစ်စရာကောင်းသော တောရိုင်း တိရစ္ဆာန် နှစ်ကောင်နှင့်လည်း တွေ့ဆုံခဲ့ရ၏။ အတွေ့အကြုံက အပြည့်အဝပင် ဖြစ်သည်။

ဤနေ့လေးက သေချာပေါက် သူ့ကို အမှတ်ရစေမည့် နေ့တစ်နေ့ ဖြစ်ပေမည်။