အခန်း (၂၆၇-၂၆၈)

အခန်း (၂၆၇) အန္တရာယ်အများဆုံး အချိန်အခါ - အရှေ့မြောက်ကျား သုံးကောင်

နေ့ရက်များက အလွန်မြန်ဆန်စွာ ကုန်ဆုံးသွားခဲ့သည်။ နေ့စဉ် လယ်ယာခြံဝင်း အလုပ်များကို လုပ်ကိုင်ကာ တိရစ္ဆာန်လေးများကို လမ်းလျှောက်ထွက်ရင်းဖြင့် အချိန်များ ကုန်ဆုံးသွား၏။ ရွှီယန်၏ စီစဉ်မှုအောက်တွင် လယ်ယာခြံဝင်း၏ ဘဝမှာ တဖြည်းဖြည်း တည်ငြိမ်လာခဲ့သည်။

ဈေးသို့မသွားမီတိုင်း လူတိုင်းက ကြက်ဥနှင့် နွားနို့များကို စုဆောင်းကာ ဈေးတွင် လတ်လတ်ဆတ်ဆတ် ဖုတ်ထားသော ကိတ်မုန့်များကို ရောင်းချလေ့ရှိကြသည်။ ချန်ကျွမ်က မုန့်ဖုတ်ခြင်းကို အလွန်ကျွမ်းကျင်ပြီး လက်ဆွဲပေါင်မုန့်များကိုလည်း စတင် လေ့လာနေပြီ ဖြစ်၏။ လက်ဆွဲပေါင်မုန့်များလည်း အရောင်းသွက်ကာ လယ်ယာခြံဝင်းအတွက် ဝင်ငွေ အတော်များများ ရှာဖွေပေးနိုင်ခဲ့သည်။

မကြာမီမှာပင် ရတနာရှာဖွေရေး သံလိုက်အိမ်မြှောင်ကို အကြိမ်ဆယ်ကြိမ် အသုံးပြုနိုင်ရန် စုဆောင်းမိသွားသည်။ ရွှီယန်က အားလပ်နေသဖြင့် အရှေ့မြောက်ကျား တောင်တန်းနတ်ဘုရားလေးဆီသို့ သွားရောက်ကြည့်ရှုရန် ဆုံးဖြတ်လိုက်၏။

ကျားကတော့ ကျားပင်ဖြစ်သည်။ ကျားကို မြင်လိုက်ရသည့် အခိုက်အတန့်တွင် အခြားကြောင်မျိုးရင်းဝင် တိရစ္ဆာန်များ အားလုံးက ချက်ချင်းပင် အရောင်မှေးမှိန်သွားကြတော့သည်။ ခန္ဓာကိုယ် အရွယ်အစား၊ ခွန်အား၊ အရှိန်အဟုန်တို့တွင် အရှေ့မြောက်ကျားထက် ပို၍ကြမ်းတမ်းသည့် တိရစ္ဆာန် မရှိတော့ချေ။

တစ်ကိုယ်လုံး အကြောအခြင် ကြွက်သားများဖြင့် ပြည့်နှက်နေ၏။ အထူးသဖြင့် ကျားပြေးလာသည့်အခါ တစ်ကိုယ်လုံးရှိ ကြွက်သားလိုင်းများကို မြင်တွေ့ရပြီး အလွန် ကြောက်မက်ဖွယ်ကောင်းလှသည်။

'ကျားကို အတောင်ပံတပ်ပေးထားသလို' ဟူသော စကားပုံက ကျားပြေးလာသည့်ပုံစံကို မျက်မြင်ကိုယ်တွေ့ မြင်ရပါက ဘာကြောင့် ထိုသို့ပြောဆိုရကြောင်းကို နားလည်လာမည် ဖြစ်သည်။ ၎င်းက ကုန်းပေါ်တွင် အသန်မာဆုံးသော သားရဲတိရစ္ဆာန် ဖြစ်ကြောင်းကို ခံစားရစေ၏။

ရွှီယန်က တောင်တန်းနတ်ဘုရားလေးကို ရှာတွေ့ပြီး ၎င်း၏ဘေးတွင် ထိုင်လိုက်သည်။ ထိုစဉ် ကျားသစ် ထိန်းသိမ်းစောင့်ရှောက်ရေး စခန်းမှ ဝမ်ကျန်းဟိုင်က တိုက်ရိုက်ထုတ်လွှင့်မှုကို ကြည့်ရှုပြီးနောက် သူ့ထံ ဖုန်းဆက်လာ၏။

"လောင်ရွှီ... တောင်တန်းနတ်ဘုရားလေးဆီ ထပ်ရောက်နေပြန်ပြီလား"

ဝမ်ကျန်းဟိုင်က နှုတ်ဆက်လိုက်သည်။

"အင်း... ဒီဘက်ကို တစ်ခေါက် လာလည်တာပါ"

ရွှီယန်က ပြန်ဖြေလိုက်၏။

ထို့နောက် ဝမ်ကျန်းဟိုင်က ဆက်ပြောလာသည်။

"မင်း သတိထားတာတော့ ပိုကောင်းမယ်... လတ်တလောမှာ အရှေ့မြောက်ကျား နှစ်ကောင်က တောင်တန်းနတ်ဘုရားလေးရဲ့ နယ်မြေထဲ ဝင်လာတာကို ငါတို့ ခြေရာခံမိတယ်... တောင်တန်းနတ်ဘုရားလေးရဲ့ ညီအစ်ကို နှစ်ကောင်ပေါ့... သူတို့နှစ်ကောင်က အမြဲတမ်း အတူတူ လှုပ်ရှားကြတာ... သူတို့ရဲ့ လှုပ်ရှားမှု ဧရိယာထဲမှာ ဘယ်ပြိုင်ဘက်မှ မရှိဘူး... နိုင်ငံတော် သစ်တောဥယျာဉ်ထဲမှာတောင် သူတို့နှစ်ကောင်က အသန်မာဆုံးပဲ... တခြားကျားတွေက သူတို့ကို မရစ်ရဲကြဘူး... သူတို့ချင်း တွေ့သွားမှာကို ငါစိုးရိမ်နေတာ... တိုက်ခိုက်ရေးစွမ်းရည် အရဆိုရင် တောင်တန်းနတ်ဘုရားလေးက ရှန်းဝါ ၁ နဲ့ ရှန်းဝါ ၂ ကို ယှဉ်နိုင်မှာ မဟုတ်ဘူး"

ဝမ်ကျန်းဟိုင်၏ စကားကို ကြားသောအခါ ရွှီယန် ချက်ချင်းပင် မတ်မတ်ထိုင်လိုက်၏။

"အဲဒီ ညီအစ်ကို နှစ်ကောင် ထွက်လာတာလား... ဘယ်လိုဖြစ်တာလဲ"

ရွှီယန်၏ လေသံက အနည်းငယ် အံ့ဩနေပုံရသည်။

"ဟုတ်တယ် ထွက်လာတာ... သူတို့က တစ်ခါတလေ အပြင်ထွက်ပြီး ပတ်ဝန်းကျင်ကို လှည့်လည်ကြည့်ရှုလေ့ရှိတယ်... တခြားကျားတွေက သူတို့ကို တွေ့ရင် ရှောင်သွားကြတာပဲ... ယေဘုယျအားဖြင့် အရှေ့မြောက်ကျားတွေက အချင်းချင်း အန္တရာယ် မပေးကြဘူး... ဒါပေမယ့် ပြဿနာ တစ်ခုခု ဖြစ်လာမှာကို စိုးရိမ်ရတယ်... ပြီးတော့ မင်း သူတို့နဲ့ တွေ့သွားမှာကို ငါ ပိုစိုးရိမ်တာ"

ဝမ်ကျန်းဟိုင်က စိုးရိမ်တကြီးဖြင့် ပြောလာ၏။

ထိုစကားကို ကြားသောအခါ ရွှီယန်က ဖိအားအနည်းငယ်ကို တကယ်ပင် ခံစားလိုက်ရသည်။ ကျားနှစ်ကောင် အတူတူ လှုပ်ရှားပြီး ဤဘက်သို့ လာနေသည်ဆိုပါက တကယ်လို့များ တွေ့သွားလျှင် တကယ့်ကို အန္တရာယ်ရှိလှပေသည်။

သူ ဤတစ်ကြိမ် ဝင်လာသည်မှာ ကံကောင်းသည်ဟု ဆိုရမည်ဖြစ်၏။

'ငါ့ဆီမှာ ယာယီ လူကောင်းကတ် တစ်ကတ်ပဲ ရှိတာ... ညီအစ်ကို နှစ်ကောင်နဲ့ တွေ့ရင် အများဆုံး တစ်ကောင်ကိုပဲ ထိန်းချုပ်နိုင်မှာ... နောက်တစ်ကောင်က ငါ့ကို တိုက်ခိုက်မလား မတိုက်ခိုက်ဘူးလား ဆိုတာ မပြောတတ်သေးဘူး'

ရွှီယန်က စိတ်ထဲမှ တွက်ဆနေလိုက်သည်။

ထို့နောက် တောင်တန်းနတ်ဘုရားလေးကို လှမ်းကြည့်လိုက်၏။ တောင်တန်းနတ်ဘုရားလေး အနည်းငယ် စိတ်မအေးဖြစ်နေပြီး ခေါင်းမော့ကာ ပတ်ဝန်းကျင်ကို အမြဲတမ်း အကဲခတ်နေသည်မှာ အံ့သြစရာ မဟုတ်တော့ပေ။ ၎င်းကလည်း တစ်ခုခုကို အာရုံခံမိနေပုံရသည်။

ရွှီယန်က အင်တာနက်သုံးစွဲသူများကို ပြောလိုက်၏။

"အခြေအနေက ထင်ထားတာထက် ပိုဆိုးနေတယ်... ခုနကပဲ ကျားသစ် ထိန်းသိမ်းစောင့်ရှောက်ရေး စခန်းက ကင်းလှည့်သူဆီက အကြောင်းကြားစာ ရလိုက်တယ်... အရှေ့မြောက်ကျား နှစ်ကောင်က နိုင်ငံတော် သစ်တောဥယျာဉ်ထဲကနေ ထွက်လာပြီး ဒီဘက်ကို ဦးတည်လာနေတယ်တဲ့... ကျားတွေရဲ့ နေ့စဉ်ဘဝကတော့ အမဲလိုက်တာ၊ အနားယူတာ၊ လမ်းလျှောက်တာပါပဲ... သူတို့ ဒီဘက်ကို လာနေတဲ့အချိန်မှာ တကယ်လို့များ တွေ့သွားရင် ဘာဖြစ်မလဲဆိုတာ သေချာ မပြောတတ်ဘူး"

ရွှီယန်၏ စကားကို ကြားသောအခါ အင်တာနက်သုံးစွဲသူများက ချက်ချင်းပင် စိုးရိမ်လာကြတော့သည်။

[ဟင်... အရှေ့မြောက်ကျား နှစ်ကောင် ဒီဘက်ကို လာနေတယ်... ဘုရားရေ... ငါ ရုတ်တရက် အရမ်း စိုးရိမ်လာပြီ]

[ကျားနှစ်ကောင်တောင်တဲ့လား... သေချာပေါက် အန္တရာယ်များတယ်]

[လောင်ရွှီ... မင်း အသက်ရှင်နိုင်ပါဦးမလား]

[ဒီတစ်ခါတော့ တကယ် အန္တရာယ်ရှိသွားပြီ]

တိုက်ရိုက်ထုတ်လွှင့်မှုထဲတွင် လေထုက အနည်းငယ် လေးလံသွားသည်။ ဒရုန်းကင်မရာ ရိုက်ကူးနေသည့် နေရာများမှ ကျားတစ်ကောင် ရုတ်တရက် ထွက်ပေါ်လာမည်ကို အမြဲတမ်း စိုးရိမ်နေရ၏။

ရွှီယန်က ပတ်ဝန်းကျင်ကို လှည့်ပတ်ကြည့်ရှုလိုက်သော်လည်း ကျား၏ အရိပ်အယောင်ကို မတွေ့ရသေးပေ။ သူက ဒရုန်းကို အပေါ်သို့ မြှင့်တင်ကာ ကင်းထောက်လေယာဉ်အဖြစ် အသုံးပြုပြီး ပတ်ဝန်းကျင် တစ်ဝိုက်ကို ရှာဖွေကြည့်သော်လည်း ဘာမျှမတွေ့ရချေ။ လောလောဆယ်တော့ ဘေးကင်းနေဆဲပင်။

"တောင်တန်းနတ်ဘုရားလေး... မင်းရဲ့ ညီအစ်ကို နှစ်ကောင် လာနေပြီ"

ရွှီယန်က ဘေးရှိ ကျားကို ပြောလိုက်သည်။ ကျားက မတ်တပ်ရပ်ကာ အနည်းငယ် သတိဝီရိယရှိစွာဖြင့် အဝေးသို့ လှမ်းကြည့်နေ၏။ ၎င်းက အန္တရာယ် အငွေ့အသက်ကို အာရုံခံမိနေပုံရသည်။

ယနေ့ တိုက်ရိုက်ထုတ်လွှင့်မှုက သေချာပေါက် စိတ်လှုပ်ရှားစရာ ကောင်းပေလိမ့်မည်။ ရွှီယန် ကိုယ်တိုင်ပင် အနည်းငယ် စိုးရိမ်နေမိ၏။ ကျားနှစ်ကောင် လာနေသည်မှာ တကယ်ကို နောက်ပြောင်စရာ ကိစ္စ မဟုတ်ပေ။

ထို့အပြင် ရွှီယန်က တောင်တန်းနတ်ဘုရားလေး၏ လုံခြုံရေးကိုလည်း စိုးရိမ်နေသည်။ တကယ်လို့ သူတို့ တွေ့သွားပြီး ရန်ဖြစ်ကြလျှင် ဘယ်လိုလုပ်မည်နည်း။

"အသက်အန္တရာယ်က အရေးကြီးတယ်... ဒီနေ့တော့ ဒီလောက်နဲ့ပဲ ပြန်ဖို့ အချိန်တန်ပြီ... ငါ့ကို ဒီသတင်းပေးတဲ့ ထိန်းသိမ်းစောင့်ရှောက်ရေး စခန်းကို ကျေးဇူးတင်ရမယ်... ဒီဘက်က တောင်တွေက တကယ် အန္တရာယ်များတယ်... အားလုံးပဲ လိုက်မလုပ်ကြဖို့ သတိပေးချင်ပါတယ်"

ရွှီယန်က အင်တာနက်သုံးစွဲသူများကို ဗဟုသုတ ဝေမျှပေးရန် မမေ့ခဲ့ပေ။ ထို့နောက် ကျောပိုးအိတ်ကို လွယ်ကာ ထွက်ခွာရန် ပြင်လိုက်၏။

ယနေ့အတွက် ရတနာရှာဖွေရေး တာဝန်များကို ပြီးမြောက်အောင် လုပ်ဆောင်ခဲ့ပြီး ဆုလာဘ်များက အသေးအဖွဲ ပစ္စည်းလေးများသာ ဖြစ်သည်။ တန်ဖိုး သိပ်မရှိလှချေ။

ရွှီယန်က တောင်တန်းနတ်ဘုရားလေးကို ပွတ်သပ်ကာ နှုတ်ဆက်ပြီးနောက် တည့်တည့် ထွက်ခွာလာခဲ့သည်။ သို့သော် ခြေလှမ်း ဆယ်လှမ်းခန့်သာ လျှောက်ရသေးသည်၊ ရုတ်တရက် ရွှီယန်၏ နှလုံးခုန်နှုန်းက ပြင်းထန်လာတော့၏။

'ဒုတ်... ဒုတ်... ဒုတ်...'

သူ၏ ခန္ဓာကိုယ်က ထူးဆန်းသော အခြေအနေ တစ်ခုသို့ ရောက်ရှိသွားသကဲ့သို့ ခံစားလိုက်ရသည်။ ခန္ဓာကိုယ်ရှိ ဆဲလ်တိုင်းက နိုးကြားလာသကဲ့သို့ပင်။

သူ၏ အန္တရာယ် အာရုံခံနိုင်စွမ်း ကျွမ်းကျင်မှု လှုပ်ရှားလာပြီ ဖြစ်၏။ ထို့အပြင် ခန္ဓာကိုယ်၏ တုံ့ပြန်မှုအရ ဤတစ်ကြိမ် တုံ့ပြန်မှုက အပြင်းထန်ဆုံး ဖြစ်ပေသည်။

"မဖြစ်နိုင်တာ..."

ရွှီယန်၏ မျက်လုံးများ အနည်းငယ် ပြောင်းလဲသွား၏။

"ငါ့ကို ပစ်မှတ်ထားခံရတာလား"

ရွှီယန်က ပတ်ဝန်းကျင်ကို လှည့်ပတ်ကြည့်ရှုလိုက်သော်လည်း ကျား ဘယ်မှာရှိနေသည်ကို လောလောဆယ် မတွေ့ရသေးပေ။ သို့သော် ခန္ဓာကိုယ်၏ တုံ့ပြန်မှုအရ အရှေ့မြောက်ကျား ဖြစ်ကြောင်း သေချာပေါက် သိနေ၏။

"အရှေ့မြောက်ကျား နှစ်ကောင်... ငါ့မှာ ယာယီ လူကောင်းကတ် တစ်ကတ်ပဲ ရှိတယ်... သူတို့နှစ်ကောင်နဲ့ တွေ့ရင် ငါ သေချာပေါက် မနိုင်နိုင်ဘူး... အခု တောင်တန်းနတ်ဘုရားလေး ဘေးမှာပဲ အလုံခြုံဆုံး ဖြစ်မယ်... သူ တကယ်ပဲ ငါ့ကိုယ်ရံတော် ဖြစ်ရတော့မယ် ထင်တယ်"

ရွှီယန်က စိတ်ထဲမှ အလျင်အမြန် တွက်ဆနေလိုက်သည်။ သူက အမြဲတမ်း အမှန်ကန်ဆုံး ဆုံးဖြတ်ချက်ကို ချမှတ်နိုင်စွမ်း ရှိ၏။

ထို့နောက် ရွှီယန်က တောင်တန်းနတ်ဘုရားလေး၏ ဘေးသို့ အလျင်အမြန် ပြန်သွားခဲ့သည်။ ဤမြင်ကွင်းကို ကြည့်နေသော အင်တာနက်သုံးစွဲသူများလည်း အံ့ဩသွားကြတော့သည်။

[ဘာဖြစ်တာလဲ]

အားလုံး သံသယဖြစ်နေစဉ်မှာပင် တောင်တန်းနတ်ဘုရားလေးကလည်း မတ်တပ်ရပ်ကာ အဝေးသို့ သတိကြီးစွာဖြင့် လှမ်းကြည့်နေသည်ကို တွေ့လိုက်ရ၏။ ၎င်း၏ ကိုယ်ဟန်အနေအထားအရ အပြည့်အဝ သတိထားနေသည့် အနေအထားသို့ ရောက်ရှိနေပြီ ဖြစ်သည်။

ကျားတစ်ကောင် သတိထားနေသည့် အချိန်တွင် လူသတ်ငွေ့များက မျက်နှာပေါ်သို့ ဖြတ်သန်းလာသကဲ့သို့ ခံစားရပေသည်။ ရွှီယန်နှင့် ကျား၏ အခြေအနေကို မြင်သောအခါ အင်တာနက်သုံးစွဲသူများလည်း မကောင်းသည့် အခြေအနေကို သတိထားမိသွားကြ၏။

[မဖြစ်နိုင်တာ... အဲဒီကျား နှစ်ကောင် ပေါ်လာတာလား]

[တကယ်ကြီးလား... ဒီလောက် စိတ်လှုပ်ရှားစရာ ကောင်းတာလား]

အင်တာနက်သုံးစွဲသူများ၏ နှလုံးခုန်နှုန်းများ မြန်လာပြီး လက်ဝါးများပင် ချွေးထွက်လာကြတော့သည်။

ရွှီယန်၏ မျက်နှာက တင်းမာနေ၏။

"ဒီတစ်ခါတော့ တကယ် အန္တရာယ်များတယ်... အဲဒီကျား နှစ်ကောင်က ဒီအနီးအနားမှာ ရှိနေလောက်တယ်... သူတို့ ဘာလုပ်မလဲဆိုတာ မသိရသေးဘူး"

ရွှီယန်က ပြောလိုက်သည်။

သူ၏ စကားသံ အဆုံးတွင် အရှေ့မြောက်ကျား နှစ်ကောင်က တောအုပ်ထဲမှ ဖြည်းဖြည်းချင်း ထွက်လာသည်ကို တွေ့လိုက်ရ၏။ ခုနက သူတို့က တောအုပ်ထဲတွင် လမ်းလျှောက်နေသဖြင့် ဒရုန်းက မတွေ့လိုက်ရခြင်း ဖြစ်သည်။

အရှေ့မြောက်ကျား နှစ်ကောင် ပေါ်လာသည်ကို မြင်သောအခါ အင်တာနက်သုံးစွဲသူများ၏ နှလုံးခုန်ရပ်သွားမတတ် ဖြစ်သွားပြီး ဦးနှောက်များ ဗလာဖြစ်သွားကြတော့သည်။

'တကယ် ပေါ်လာတာပဲ... နောက်ထပ် အရှေ့မြောက်ကျား နှစ်ကောင်... ဒီလိုဆိုရင် တိုက်ရိုက်ထုတ်လွှင့်မှု မြင်ကွင်းထဲမှာ အရှေ့မြောက်ကျား သုံးကောင် ရှိနေပြီ... တစ်ကောင်က လောင်ရွှီ့ ဘေးမှာ ရပ်နေပြီး နောက်နှစ်ကောင်က မျက်နှာချင်းဆိုင်မှာ... ဒီမြင်ကွင်းက ရုပ်ရှင်ထဲကထက်တောင် ပိုပြီး စိတ်လှုပ်ရှားစရာ ကောင်းသေးတယ်'

အပြင်ထွက်၍ လမ်းလျှောက်လာသော အရှေ့မြောက်ကျား နှစ်ကောင်လည်း အံ့ဩသွားကြ၏။ သူတို့က တကယ်တော့ အပြင်ထွက် ဆော့ကစားရန် ထွက်လာခြင်း ဖြစ်ပြီး ခရီးထွက်သကဲ့သို့ပင် ဖြစ်သည်။ အပြင်ဘက်တွင် လှည့်လည် သွားလာနေခြင်း ဖြစ်၏။

အမည်မသိ တောင်ကြီးပေါ်သို့ ရောက်လာချိန်တွင် နောက်ထပ် ကျားတစ်ကောင်နှင့် တွေ့ရလိမ့်မည်ဟု မထင်မှတ်ထားခဲ့ချေ။ ထို့အပြင် ထိုကျား၏ ဘေးတွင် ခြေနှစ်ချောင်းသတ္တဝါ တစ်ကောင်ပါ ရပ်နေသေး၏။

'ဒါက ဘယ်လို ပေါင်းစပ်မှုမျိုးလဲ... လူနဲ့ သဘာဝတရားလား'

တောင်တန်းနတ်ဘုရားလေးက အပြည့်အဝ သတိထားနေ၏။ ဤနေရာက ၎င်း၏ နယ်မြေ ဖြစ်သည်။

အကယ်၍ ဤအရှေ့မြောက်ကျား နှစ်ကောင်က သူ၏ နယ်မြေထဲသို့ အတင်းအကျပ် ဝင်ရောက်လာပါက သူ ပြေးရန်သာ ရှိတော့သည်။ သဘာဝလောကကြီးတွင် အားနည်းသူက အားကြီးသူ၏ အစာသာ ဖြစ်ပြီး တစ်ကောင်ချင်း ယှဉ်လျှင် တိုက်ခိုက်နိုင်သော်လည်း နှစ်ကောင်ကို တစ်ကောင် ယှဉ်ရပါက ပြေးရန်သာ ရှိတော့၏။

တောင်တန်းနတ်ဘုရားလေးက ကျားနှစ်ကောင်ကို ခပ်နှိမ့်နှိမ့် ဟိန်းဟောက်လိုက်သည်။ ကျားနှစ်ကောင်က မကျေနပ်တော့ဘဲ တိုက်ခိုက်မည့် အနေအထားမျိုး ပြင်ဆင်ကာ သွားများဖြဲပြီး ခြိမ်းခြောက်သည့် အသံဖြင့် ဟိန်းဟောက်လိုက်ကြ၏။

ဤတောင်တန်းတွင် သူတို့အချင်းချင်းပင် ဤသို့ မစိန်ခေါ်ရဲကြချေ။ အခြေအနေက ပို၍ အန္တရာယ် များလာသည်။

တိုက်ရိုက်ထုတ်လွှင့်မှုထဲမှ အင်တာနက်သုံးစွဲသူများက ပါးစပ်ကို ပိတ်ထားပြီး ဆက်မကြည့်ရဲတော့ချေ။ ဤအခြေအနေမျိုးတွင် ရွှီယန် အလယ်မှာ ညပ်နေပါက အသက်ရှင်နိုင်ခြေ လုံးဝ မရှိတော့ပေ။

ရွှီယန်လည်း အခြေအနေ မကောင်းကြောင်း သတိထားမိသွား၏။ တကယ်ပင် ရန်ဖြစ်တော့မည် ထင်သည်။

မတော်တဆမှုများကို ရှောင်ရှားနိုင်ရန်အတွက် သူက လူကောင်းကတ်ကို အသုံးပြုရန် ဆုံးဖြတ်လိုက်သည်။ ရွှီယန်က ကိုယ်လုံးပိုကြီးသည့် အရှေ့မြောက်ကျားဘက်သို့ လူကောင်းကတ်ကို အသုံးပြုလိုက်၏။

တစ်ခဏချင်းမှာပင် ထိုအရှေ့မြောက်ကျား၏ အကြည့်များ ချက်ချင်း ပြောင်းလဲသွားတော့သည်။

'ဘာဖြစ်တာလဲ... ရုတ်တရက်ကြီး တိုက်ခိုက်ချင်စိတ် ပျောက်သွားတာလား'

၎င်း၏ မျက်လုံးများထဲတွင် အနည်းငယ် တွေဝေမှုများ ဖြစ်ပေါ်နေ၏။

ဘေးရှိ ရှန်းဝါ ၂ က ရှန်းဝါ ၁ မဟောက်တော့သည်ကို မြင်သောအခါ သူ့ကို ကြည့်ကာ အနည်းငယ် သံသယ ဖြစ်သွားသည်။

"အစ်ကို... ဘာဖြစ်တာလဲ... သူတို့ကို တိုက်မယ်လေ"

ရှန်းဝါ ၁ က စိတ်ခံစားမှု တည်ငြိမ်နေပြီး အေးဆေးစွာ ပြောလိုက်၏။

"ညီလေး... အဲဒီ ခြေနှစ်ချောင်းသတ္တဝါက တော်တော်လေး သဘောကောင်းတယ်... ငါတို့ သူတို့နဲ့ မတိုက်တော့ဘူး"

တစ်ခဏချင်းမှာပင် အခြေအနေက ရှုပ်ထွေးသွားတော့၏။ ကျားညီလေးက ကျားအစ်ကို တိုက်ခိုက်ချင်စိတ် မရှိတော့သည်ကို ခံစားမိသွားသောအခါ သူလည်း တိုက်ခိုက်လိုစိတ် ပျောက်သွားတော့သည်။

သူတို့နှစ်ကောင်က ရွှီယန်နှင့် တောင်တန်းနတ်ဘုရားလေးကို တစ်ချက်ကြည့်ကာ အချင်းချင်း စကားအနည်းငယ် ပြောပြီးနောက် လှည့်၍ ပြေးထွက်သွားကြတော့၏။

အန္တရာယ် ကင်းရှင်းသွားပြီ ဖြစ်သည်။

ရွှီယန်က သက်ပြင်းရှည်ကြီး တစ်ချက် ချလိုက်၏။

'တော်သေးတာပေါ့... ဘာမှ မဖြစ်လို့... ကျားနှစ်ကောင်က ငါ့ဘက်မှာ ရှိနေရင်လည်း အန္တရာယ် ကြီးကြီးမားမား မရှိနိုင်ပါဘူး'

ကျားနှစ်ကောင် ပြေးသွားသည်ကို မြင်သောအခါ တောင်တန်းနတ်ဘုရားလေးလည်း သိသာစွာ စိတ်သက်သာရာ ရသွားပုံရ၏။

တိုက်ရိုက်ထုတ်လွှင့်မှုထဲတွင် ကွန်မန့်များက ပွက်လောညံသွားတော့သည်။

[သူတို့ ထွက်သွားပြီ... လခွမ်း... အရမ်း လန့်စရာကောင်းတာပဲ]

[လောင်ရွှီ နောက်ထပ် တစ်ရက် အသက်ရှင်သွားတဲ့အတွက် ဂုဏ်ပြုပါတယ်]

[တောင်ထဲက အရမ်း အန္တရာယ်များတယ်... ကြည့်ရတာ ကြောက်စရာ ကောင်းတယ်]

[လောင်ရွှီ အခုထိ အသက်ရှင်နေတာ တကယ့် အံ့ဖွယ်ပဲ]

[ဒီလိုက်ဖ်လွှင့်သူက အရမ်း မိုက်တယ်]

ရွှီယန်က ကွန်မန့်များကို တစ်ချက် ကြည့်လိုက်ပြီး သူလည်း ချွေးအေးများပင် ထွက်သွားခဲ့၏။

"ဒီတစ်ခါတော့ တကယ် လန့်သွားတာ... အရှေ့မြောက်ကျား သုံးကောင်လေ... တကယ်လို့များ ချကြမယ်ဆိုရင် ကျွန်တော်က ပြန်ခုခံနိုင်မယ့် အခွင့်အရေးတောင် ရှိမှာ မဟုတ်ဘူး... အရမ်း လန့်စရာ ကောင်းတယ်... တောထဲမှာ ဒီလို အခြေအနေမျိုး ကြုံရလိမ့်မယ်လို့ မထင်ထားဘူး... နောက်ပိုင်းဆိုရင်တော့ ထိန်းသိမ်းစောင့်ရှောက်ရေး စခန်းက လူတွေနဲ့ ကြိုတင် ဆက်သွယ်ထားမှ ရတော့မယ်"

ရွှီယန်က ရင်ထဲမှ လှိုက်၍ ပြောလိုက်သည်။

အသက်ရှင်နေသရွေ့တော့ တန်ဖိုးထားရမည်သာ။

ရွှီယန်က ခဏမျှ ထပ်စောင့်နေပြီးနောက် တောင်တန်းနတ်ဘုရားလေးကို နှုတ်ဆက်ကာ အခြား တစ်ဖက်သို့ ထွက်ခွာလာခဲ့၏။ ယခုအချိန်တွင် အရင်ထွက်သွားခြင်းက အကောင်းဆုံး ဖြစ်သည်။

အကယ်၍ လူကောင်းကတ်၏ သက်တမ်း ကုန်သွားပြီး ဤညီအစ်ကို နှစ်ကောင်နှင့် ထပ်တွေ့ပါက ဘာဖြစ်လာမည်ကို သေချာ မပြောနိုင်တော့ချေ။

အခန်း (၂၆၈) အလုပ်လုပ်တတ်တဲ့ ယွမ်ပေါင် နဲ့ အပျင်းထူတဲ့ ရှောင်ဟေး

ရွှီယန်က လယ်ယာခြံဝင်းသို့ အန္တရာယ်ကင်းစွာ ပြန်လည်ရောက်ရှိလာခဲ့သည်။

ကျားကို သွားပွတ်သပ်ရခြင်းက အသက်အန္တရာယ်ပင် ရှိနေ၏။

ကြည့်ရသည်မှာ နောက်ပိုင်းတွင် လူကောင်းကတ် တစ်ကတ်လောက် မဲဖောက်ရပြီးမှသာ သွားသင့်တော့မည် ထင်သည်။

အသက်ရှင်နေဖို့က ပိုအရေးကြီးသည် မဟုတ်ပါလား။

ထိုညမှာပင် ရွှီယန်က အင်တာနက်တွင် နာမည်ကြီးသွားခဲ့ပြန်သည်။

နာမည်ကြီး လိုက်ဖ်လွှင့်သူ တောရိုင်း အရှေ့မြောက်ကျား သုံးကောင်နဲ့ တွေ့ဆုံခြင်း

ထိုခေါင်းစဉ်ကို မြင်သူတိုင်း ဝင်မကြည့်ဘဲ မနေနိုင်ကြချေ။

လူအများအပြားက ထိုခေါင်းစဉ်ကို မြင်လိုက်သည်နှင့် ပထမဆုံး တွေးမိသည်မှာ -

'ဒီနာမည်ကြီး လိုက်ဖ်လွှင့်သူက ရွှီယန် တော့ မဟုတ်ပါဘူးနော်' ဟူ၍ ဖြစ်သည်။

မတတ်နိုင်ပေ... တောရိုင်း အရှေ့မြောက်ကျားနှင့် တွေ့ဆုံနိုင်သူမှာ အင်တာနက် တစ်ခွင်လုံးတွင် သူတစ်ယောက်တည်းသာ ရှိသည်ကိုး။

ဗီဒီယိုထဲသို့ ဝင်ကြည့်လိုက်သောအခါ တကယ်ပင် ရွှီယန် ဖြစ်နေကြောင်း တွေ့လိုက်ရ၏။

"သူ ဘာတွေ လုပ်နေပြန်ပြီလဲ"

"သေမှာကို တကယ် မကြောက်တာပဲ"

"တကယ် စွမ်းတာပဲ... အရှေ့မြောက်ကျား သုံးကောင်ကြီးတောင်နော်"

ဗီဒီယိုထဲတွင် ရွှီယန်က အရှေ့မြောက်ကျား တစ်ကောင်နှင့် အတူတူ ရပ်နေပြီး နောက်ထပ် အရှေ့မြောက်ကျား နှစ်ကောင်က သူတို့၏ မျက်နှာချင်းဆိုင်တွင် ရှိနေသည်။

အန္တရာယ်အများဆုံး မြင်ကွင်းမှာ အရှေ့မြောက်ကျား သုံးကောင် တစ်ပြိုင်နက်တည်း သွားဖြဲပြနေသည့် အချိန်ပင် ဖြစ်၏။

မြင်ကွင်းက အရမ်း လန့်စရာကောင်းလှသည်။

အရှေ့မြောက်ကျား သုံးကောင် ရင်ဆိုင်နေရချိန်တွင် လူတစ်ယောက်က အလယ်မှာ ဝင်ပြီး ဘာလုပ်နေတာလဲ။

အင်တာနက်သုံးစွဲသူများက ရလဒ်ကို သိပြီးဖြစ်ရာ ဗီဒီယိုကို ကြည့်ရင်း နောက်ပြောင်ရန် အချိန်ရနေကြသည်။

ဗီဒီယိုအပေါ်တွင် ကွန်မန့်များ တက်လာ၏။

[လောင်ရွှီ... မင်းလည်း သွားဖြဲပြလိုက်လေ... ဘာလို့ ကြောင်ကြည့်နေတာလဲ]

[လောင်ရွှီ... မင်း လုပ်စရာရှိတာ လုပ်လေ... တောင်တန်းနတ်ဘုရားလေး ကို ဒုက္ခမပေးနဲ့]

[၂ ယောက် ၂ ယောက်တောင်နော်... မင်းက ဝင်မချဘူးလား]

[တောင်တန်းနတ်ဘုရားလေး - ဘယ်ဘက်က ကောင်ကို ငါတာဝန်ယူမယ်... ညာဘက်က ကောင်ကို မင်းတာဝန်ယူ... လောင်ရွှီ - ဟင်... ငါက]

အင်တာနက်သုံးစွဲသူများက တကယ်ကို အရည်အချင်း ရှိကြပေသည်။

ဗီဒီယိုနှင့် ကွန်မန့်များကို တွဲကြည့်ရသည်မှာ အလွန် စိတ်ဝင်စားစရာ ကောင်းလှ၏။

ရွှီယန် ထပ်ပြီး နာမည်ကြီးသွားပြန်သည်။

ဗီဒီယိုထဲမှ မြင်ကွင်းက အလွန် အန္တရာယ်များသော်လည်း ကံကောင်းစွာဖြင့် နောက်ဆုံးတွင် ကျားနှစ်ကောင်က တိုက်ခိုက်ရန် မဆုံးဖြတ်ဘဲ ပေါ့ပေါ့ပါးပါးပင် ထွက်ခွာသွားခဲ့ကြသည်။

ထို့ကြောင့်သာ ရင်တမမ ဖြစ်ရသည့် တိုက်ပွဲကြီးကို ရှောင်ရှားနိုင်ခဲ့ခြင်း ဖြစ်၏။

မဟုတ်လျှင် ဘာတွေ ဆက်ဖြစ်လာမည်ဆိုတာ သေချာပေါက် မပြောနိုင်ချေ။

လက်ဗလာဖြင့် လူသားတစ်ယောက်က တောရိုင်း အရှေ့မြောက်ကျားကို ဘယ်လိုမှ မယှဉ်နိုင်ပေ။

တိုက်ဆန် ၏ အထွတ်အထိပ် အချိန်တွင်ပင် ကျားတစ်ကောင်ကို ဗိုက်တစ်ဝက်လောက်သာ ပြည့်အောင် ကျွေးနိုင်မည် ဖြစ်သည်။

ထို့ကြောင့် ဤကိစ္စမျိုးတွင် ရွှီယန်လည်း ဘာမှ ကူညီနိုင်မည် မဟုတ်ချေ။

လူအတော်များများက ဤဗီဒီယိုကို မြင်ပြီးနောက် ရွှီယန်ကို ပို၍ပင် လေးစားသွားကြတော့၏။

ဒီလူကို သာမန် တွေးခေါ်မှုတွေနဲ့ တွက်ဆလို့ မရနိုင်ဘူး။

ရွှီယန်၏ အတွေးကတော့ ရိုးရှင်းလှပေသည်။

'ငါက ဒီလို ဖြစ်ချင်တယ်လို့ ထင်နေတာလား... အခြေအနေ ကြုံလာလို့ပါကွာ'

သို့သော် အပြင်ထွက်ပါက အန္တရာယ် တစ်ခုမဟုတ် တစ်ခုတော့ အမြဲတမ်း ကြုံရတတ်သည်သာ ဖြစ်၏။

အသက်ရှင်နေသရွေ့တော့ ဆက်လက် ဖြတ်သန်းရမည် မဟုတ်ပါလား။

နောက်တစ်နေ့

ရွှီယန်က လယ်ယာခြံဝင်းတွင် အနားယူနေ၏။

နေကြာပန်းခင်း ဘေးတွင် မြေခွေးလေးများကို ပွတ်သပ်ရင်း အာလူးများ၏ ကြီးထွားမှု အခြေအနေကို စစ်ဆေးနေလိုက်သည်။

အပန်းဖြေစခန်း ဘက်မှ သူ၏ အာလူးများကို အမြန် ပို့ပေးရန် တောင်းဆိုနေပြီ ဖြစ်၏။

အကြောင်းမှာ ရွှီယန် စိုက်ပျိုးထားသော ရောင်စုံ အာလူးများက သူတို့ဆီတွင် နာမည်ကောင်း အလွန် ရရှိနေသောကြောင့် ဖြစ်သည်။

အာလူးက သိမ်းဆည်းရ လွယ်ကူသဖြင့် သူတို့၏ အော်ဒါ ပမာဏက အလွန် ကြီးမားလှပေသည်။

အခြေခံအားဖြင့် ရွှီယန် ဘယ်လောက် စိုက်စိုက် သူတို့က အကုန် ယူမည်သာ ဖြစ်၏။

အော်ဒါများ ရှိနေသဖြင့် စိတ်ထဲတွင် ယုံကြည်မှု ရှိနေပေသည်။

ဝန်ထမ်း အချို့က ဤဘက်တွင် အလုပ်လုပ်နေကြ၏။

ထိုအချိန်တွင် ဝမ်ဝူ က ရွှီယန်ကို မေးလိုက်သည်။

"ခြံပိုင်ရှင်... ကျွန်တော် သိုးတစ်ကောင်လောက် မွေးချင်လို့ပါ... စားဖို့ မဟုတ်ဘဲ အိမ်မွေးတိရစ္ဆာန် အဖြစ် မွေးချင်တာပါ"

"ကြီးလာတဲ့အထိ မွေးထားပြီး မစားဘူးပေါ့"

"ဘယ်လို ထင်လဲ"

ဝမ်ဝူ ၏ စကားကို ကြားသောအခါ ဘေးနားရှိ မာဝန် က အရင်ဆုံး ရယ်မောလိုက်၏။

မာဝန် က လယ်ယာခြံဝင်း ဖွင့်ဖူးပြီး အတွေ့အကြုံ ရှိသဖြင့် သိုးများ၏ စရိုက်ကို ကောင်းကောင်း သိထားပေသည်။

ရွှီယန်ကလည်း ပြန်ဖြေလိုက်၏။

"အမှန်တိုင်း ပြောရမလား"

"ဒါပေါ့" ဝမ်ဝူ က ချက်ချင်း ပြန်ဖြေလိုက်သည်။

ရွှီယန်က ရှင်းပြလိုက်၏။

"တကယ်လို့ မင်းပြောတဲ့ သိုးက သာမန် ဆိတ် တွေ သိုး တွေ ဆိုရင်တော့ အိမ်မွေးတိရစ္ဆာန် အဖြစ် မွေးဖို့ သိပ်မသင့်တော်ဘူး... ဘာလို့လဲဆိုတော့ သူတို့က လုံးဝ ဉာဏ်မရှိလို့ပဲ... ပြီးတော့ သူတို့ရဲ့ ဦးနှောက် အလုပ်လုပ်ပုံကိုလည်း မင်း နားလည်နိုင်မှာ မဟုတ်ဘူး"

"မင်း သိုးတစ်ကောင်ကို နှစ်အတော်ကြာ မွေးထားရင်တောင် သူက ခွေ့ချင်ရင် ခွေ့လိုက်တာပဲ... ဘာကြိုတင် သတိပေးချက်မှ မရှိဘူး"

"အရင်းနှီး မဖြစ်နိုင်ဘူး... မင်း သုံးနှစ်မွေးတာနဲ့ တခြားလူ မွေးတာ သူတို့အတွက်တော့ အတူတူပဲ"

"အိမ်မွေးတိရစ္ဆာန် အဖြစ် သီးသန့် မွေးတဲ့ သိုးတွေတော့ ရှိနိုင်တယ်... ဥပမာ မီနီသိုး တွေပေါ့... ဒါပေမယ့် နိုင်ငံခြားကနေ ဝယ်ရမှာ... တစ်ကောင်ကို တော်တော် ဈေးကြီးတယ်... ယွမ် သောင်းဂဏန်းလောက် ရှိမယ်"

ရွှီယန်၏ စကားကို ကြားသောအခါ ဝမ်ဝူ က သေချာ စဉ်းစားကြည့်လိုက်၏။

အိမ်မွေးတိရစ္ဆာန် မွေးရာတွင် ပိုင်ရှင်ကို မမှတ်မိပါက မွေးရသည်မှာ တကယ်ကို အဓိပ္ပာယ် မရှိချေ။

လူတိုင်းက ကိုယ်မွေးထားသည့် အိမ်မွေးတိရစ္ဆာန်များကို ကိုယ့်ကို ခင်တွယ်စေချင်ကြသည် မဟုတ်ပါလား။

"အဲဒီလိုဆိုရင် သူတို့ကို အသားကင် လုပ်စားလိုက်တာက ပိုသင့်တော်တယ်"

"အဲဒါဆိုလည်း မမွေးတော့ပါဘူး"

ဝမ်ဝူ က လက်ကာပြလိုက်သည်။

ရွှီယန်က ထပ်၍ ပြုံးကာ ပြောလိုက်၏။

"အိမ်မွေးတိရစ္ဆာန် အဖြစ် မမွေးရင် ရပါတယ်... သိုးပေါက်လေးတွေက တော်တော်လေး ချစ်စရာ ကောင်းတယ်... လူနားမှာလည်း နေချင်ကြတယ်လေ"

"ငါ သိုးဆယ်ကောင်လောက် မွေးဖို့ ပြင်ထားတယ်... အရင်က မာဝန် ကိုလည်း မှာထားပြီးပြီ"

"နောက်ကျရင် သူတို့ကို သဘာဝအတိုင်း မျိုးပွားခိုင်းပြီး သိုးပေါက်လေးတွေ ရလာရင် ဆက်မွေးထားကြတာပေါ့"

သိုးမွေးမြူသူ အများအပြားက ဤသို့ပင် လုပ်ဆောင်လေ့ ရှိကြ၏။

သိုးပေါက်လေးများကို ယူလာပြီး အနားတွင် ထားကြသည်။

အဘယ်ကြောင့်ဆိုသော် သိုးပေါက်လေးများက စကားနားထောင်ပြီး လူနောက် လိုက်ချင်ကြသောကြောင့် ဖြစ်၏။

အိမ်မွေးတိရစ္ဆာန် နှင့် မကွာခြားလှချေ။

သို့သော် သိုးများ ကြီးလာသောအခါ ဉာဏ်မရှိသည့် အားနည်းချက်က ပေါ်လာတော့၏။

ပထမ အချက်က ဘာမဆို အကုန်စားတတ်ပြီး ဒုတိယ အချက်ကတော့ ဦးနှောက် အလုပ်လုပ်ပုံ အလွန် ထူးဆန်းခြင်းပင် ဖြစ်သည်။

ခွေ့ချင်ရင် ချက်ချင်း ခွေ့လိုက်ခြင်းပင်။

"ခြံပိုင်ရှင်... ခင်ဗျား တော်တော်များများ သိတာပဲ... အရင်က မွေးဖူးလို့လား"

ဝမ်ဝူ က ထပ်မေးလိုက်ပြန်သည်။

ထိုစကားကို ကြားသောအခါ ရွှီယန်က ပြုံးလိုက်ပြီး ရှင်းပြလိုက်၏။

"အဲဒီလို မဟုတ်ပါဘူး... ငယ်ငယ်တုန်းက ငါ့အဘိုး အိမ်မှာ သိုးမွေးတယ်လေ... ငါက သိုးတွေနဲ့ သိပ်ခင်တာ"

"တစ်နေ့ကျတော့ အဘိုးက သိုးကို ရောင်းမလို့ လုပ်ရော... ငါက မရောင်းစေချင်တော့ သိုးကို ဖက်ပြီး ငိုနေတာပေါ့"

"အဲဒါကို အဲဒီသိုးက ငါ့ကို ခွေ့လိုက်လို့ လွင့်သွားရော"

"နောက်တော့ အဲဒီသိုးကို အဘိုးက သိုးသားပြုတ် လုပ်ပစ်လိုက်တယ်"

"သိုးက အရင်းနှီး မဖြစ်နိုင်ပေမယ့် ပြုတ်လို့တော့ နူးပါတယ်"

ရွှီယန်၏ စကားကို ကြားသောအခါ အားလုံးက ဝိုင်းရယ်လိုက်ကြတော့၏။

လယ်ယာခြံဝင်း၏ ဘဝမှာ တဖြည်းဖြည်း တည်ငြိမ်လာခဲ့သည်။

အချိန်ကြာလာသည်နှင့်အမျှ လုပ်စရာ ကိစ္စများလည်း ပိုများလာ၏။

အာလူးများ ရိတ်သိမ်းချိန် နီးလာပြီဖြစ်ရာ ထွန်စက်ဖြင့် အာလူးရိတ်သိမ်းစက်ကို ဆွဲကာ အာလူးများကို ရိတ်သိမ်းရမည် ဖြစ်သည်။

ဟင်းခင်းကိုလည်း ဂရုစိုက်ရဦးမည်။

တိရစ္ဆာန်လေးများ အများအပြား ရှိနေသဖြင့် နေ့တိုင်း အစာကျွေးရဦးမည် ဖြစ်၏။

ထို့အပြင် ရွှီယန်က သိုးခြံ တစ်ခုကို ရှင်းလင်းပြီး သိုးပေါက်လေး အကောင် နှစ်ဆယ်ခန့် ဝယ်လာခဲ့သဖြင့် သေချာ ဂရုစိုက် စောင့်ရှောက်ရဦးမည် ဖြစ်သည်။

သိုးပေါက်လေးများ ရောက်လာပြီဖြစ်ရာ ရွှီယန်က သိုးကျောင်းထွက်ရန် စဉ်းစားလိုက်၏။

သိုးကျောင်းခြင်း ဆိုသည်မှာ ဦးနှောက် သုံးရန် လုံးဝ မလိုအပ်ဘဲ သိုးအုပ်နောက်သို့ လိုက်သွားရုံသာ ဖြစ်သည်။

တစ်ခါတရံ ဤခံစားချက်မျိုးကို ခံစားကြည့်ခြင်းက အလွန် ကောင်းမွန်ပေသည်။

ထို့ကြောင့် နေရောင်ခြည် သာယာသော မွန်းလွဲပိုင်းတွင် ရွှီယန်က ကြာပွတ် တစ်ချောင်းကို ကိုင်ကာ သိုးအုပ်ကို မောင်းနှင်ပြီး အပြင်သို့ ထွက်လာခဲ့၏။

သူက လယ်ယာခြံဝင်း အပြင်ဘက်ကို တစ်ပတ်ခန့် ပတ်ပြီး သိုးများကို မြက်စားခိုင်းရန် ရည်ရွယ်ထားသည်။

ရွှီယန်က ခွေးသုံးကောင်ကိုပါ ခေါ်လာခဲ့သေး၏။

အနက်ရောင် တောခွေးလေး တစ်ကောင်... သွက်လက်သော မာလီနွိုက်ခွေး တစ်ကောင် နှင့် အူကြောင်ကြောင် ဟက်စကီ တစ်ကောင်တို့ ဖြစ်ကြသည်။

သူတို့ကို ခေါ်လာရသည့် အကြောင်းရင်းမှာ သိုးကျောင်းခိုင်းရန် ဖြစ်၏။

သိုးအုပ်က ရွှီယန်၏ မောင်းနှင်မှုအောက်တွင် တစ်ကောင်ပြီးတစ်ကောင် အရှေ့သို့ တောက်လျှောက် လျှောက်သွားနေကြသည်။

လမ်းလျှောက်ရင်း မြက်များကိုလည်း ရှာစားနေကြ၏။

သူတို့က အဖြူရောင် ဝါဂွမ်းလုံးလေးများ နှင့်ပင် တူနေတော့သည်။

ကြည့်ရသည်မှာလည်း အတော်လေး စိတ်အပန်းပြေစေ၏။

ရွှီယန်က ပထမဆုံးအကြိမ် သိုးကျောင်းထွက်ခြင်း ဖြစ်သဖြင့် သိပ်တော့ မကျွမ်းကျင်သေးချေ။

တစ်ခါတရံ သိုးအနည်းငယ်က ဟိုဘက်ဒီဘက် လျှောက်ပြေးတတ်ရာ ရွှီယန်က သူတို့ကို အုပ်စုထဲ ပြန်ရောက်အောင် မောင်းနှင်ရပေသည်။

ကိုယ်တိုင် မလုပ်နိုင်ပါက ခွေးများကို ခိုင်းရတော့၏။

"ရှောင်ဟေး... ဟိုတစ်ကောင်ကို ပြန်မောင်းလာခဲ့"

ရွှီယန်က အုပ်စုကွဲနေသော သိုးကို လက်ညှိုးထိုးပြကာ ရှောင်ဟေး ကို ခိုင်းလိုက်သည်။

ရှောင်ဟေး က အမြီးလေး လှုပ်ကာ တုံ့ပြန်လိုက်ပြီးနောက် ဖြည်းဖြည်းချင်း ပြေးသွားကာ သိုးလေး၏ ဘေးသို့ ရောက်သောအခါ အနောက်သို့ လှည့်၍ ရွှီယန်ကို ကြည့်လိုက်၏။

"ပြန်မောင်းလာခဲ့လေ... သူက ဉာဏ်မရှိဘူး"

ရွှီယန်က ထပ်မံ အမိန့်ပေးလိုက်သည်။

ရှောင်ဟေး က အကြမ်းဖျင်း နားလည်သွားပြီး သိုးလေးကို နှစ်ခွန်းခန့် လှမ်းဟောင်လိုက်ရာ သိုးလေးလည်း လန့်ပြီး အုပ်စုထဲသို့ အမြန် ပြန်ပြေးဝင်သွားတော့၏။

ထို့နောက် ရွှီယန်က မာလီနွိုက်ခွေး ကို အမိန့်ပေးလိုက်ပြန်သည်။

"ယွမ်ပေါင်... ဟိုတစ်ကောင်ကို ပြန်မောင်းလာခဲ့"

ယွမ်ပေါင် ကတော့ အများကြီး ပို၍ ဉာဏ်ကောင်း၏။ ပို၍ တိတိကျကျ ပြောရလျှင် သူက အမိန့်နာခံရန်အတွက် မွေးဖွားလာခြင်းပင် ဖြစ်သည်။

သူက အလျင်အမြန် ခုန်ထွက်သွားပြီး သိုးလေး၏ ဘေးသို့ ရောက်သည်အထိ တောက်လျှောက် ပြေးသွားကာ ခြိမ်းခြောက်သည့် အသံဖြင့် ဟိန်းဟောက်လိုက်ရာ သိုးလေးလည်း ပြန်ရောက်လာတော့သည်။

ဤအပိုင်းတွင်တော့ မာလီနွိုက်ခွေး ကို ပြောစရာ မလိုချေ။

တကယ်ကို စွမ်းလှပေသည်။

ထိုအချိန်တွင် နောက်ထပ် သိုးပေါက်လေး တစ်ကောင်က အဝေးသို့ ပြေးထွက်သွားရာ ရွှီယန်က ဟက်စကီ ကို အမိန့်ပေးလိုက်ပြန်၏။

"ရှောင်ဟား... မင်းသွား... ဟိုသိုးပေါက်လေးကို ပြန်မောင်းလာခဲ့"

ရွှီယန်က သိုးလေးကို လက်ညှိုးထိုးပြကာ သူ့ကို ပြောလိုက်သည်။

ဟက်စကီ က ခေါင်းကို စောင်းကာ ကြည်လင်သော မျက်လုံးများထဲတွင် အူကြောင်ကြောင် နိုင်မှု အချို့ ထင်ဟပ်နေပြီး...

'မင်း ဘာလို့ မသွားတာလဲ' ဟု မေးနေသည့် အလားပင်။

ဤကောင်လေးက ဤသို့ပင် ဖြစ်၏။ တစ်ခါတရံ အလွန် ဉာဏ်ကောင်းပြီး တစ်ခါတရံကျတော့လည်း အူကြောင်ကြောင် ဖြစ်နေတတ်သည်။

"အေးပါ... မင်းက လိုက်သာ လိုက်လာခဲ့တော့"

ရွှီယန်က ပြုံးလိုက်ပြီး သူ့ကို အများကြီး ထပ်မခိုင်းတော့ချေ။

အဓိကအားဖြင့် ယွမ်ပေါင် က သိုးကျောင်းရသည်ကို သဘောကျနေသောကြောင့် ဖြစ်၏။

စောစောက ရွှီယန် အမိန့်ပေးခဲ့ပြီးနောက်ပိုင်းတွင် ယခုတော့ သူ ဘာလုပ်ရမည်ကို သူ့ဘာသာ သိနေပြီ ဖြစ်သည်။

သိုးများ အုပ်စုကွဲသွားသည်ကို မြင်သည်နှင့် ချက်ချင်း ပြေးသွားကာ မောင်းနှင်တော့၏။

သူ၏ အပြုအမူက ရွှီယန်ကိုပင် အံ့ဩသွားစေသည်။

ထင်သည့်အတိုင်းပင် အဖွဲ့အစည်းထဲတွင် အလုပ်လုပ်နိုင်သူ တစ်ယောက်တော့ ရှိသင့်ပေသည်။

အလုပ်လုပ်နိုင်ရုံသာမက အလုပ်လုပ်ချင်စိတ်လည်း ရှိပြီး ကိုယ်တိုင် ဦးဆောင်၍ လုပ်ကိုင်ချင်သူမျိုး ဖြစ်၏။

ရှောင်ဟေး နှင့် ရှောင်ဟား တို့ကို ကြည့်လိုက်ပါဦး။

ရှောင်ဟေး ကတော့ အလုပ်ခိုနေခြင်း ဖြစ်၏... ခိုင်းမှ သွားပြီး မခိုင်းရင် အနားယူနေသည်။

ရှောင်ဟား ကတော့ လုံးဝ နားမလည်ခြင်း ဖြစ်၏... ငါ မတတ်ဘူး... ငါ့ကို မခိုင်းနဲ့ ဆိုသည့် ပုံစံမျိုးပင်။

လုပ်ငန်းခွင် တွင်လည်း ဤသို့ပင် ဖြစ်တတ်ပေသည်။

သိုးအုပ်က ဖြည်းဖြည်းချင်း အရှေ့သို့ လျှောက်သွားနေကြ၏။

ရွှီယန်ကလည်း သူတို့နောက်မှ လိုက်ပါသွားသည်။

မာလီနွိုက်ခွေး က အုပ်စုကွဲနေသော သိုးများ ရှိမရှိ ဟိုဟိုဒီဒီ လိုက်လံ ကြည့်ရှုနေ၏။

ရှောင်ဟေး က သူ့ကို ကူညီပြီး တစ်ခါတရံ ဝင်လုပ်ပေးသည်။

အုပ်စုထဲတွင် ခေါင်းဆောင်သိုး တစ်ကောင် ရှိပြီး ၎င်းက ဘယ်သွားသွား ကျန်သော သိုးပေါက်လေးများက နောက်မှ လိုက်သွားကြ၏။

သူတို့ အားလုံး ပေါင်းစပ်ပြီး အဖွဲ့အစည်း တစ်ခု ဖြစ်လာခဲ့သည်။

ရွှီယန်က အားလုံးကို လွှတ်ထားပြီး သိုးအုပ်ကိုသာ စောင့်ကြည့်နေရင်း စိတ်အပန်းပြေနေလိုက်၏။

တစ်ခါတရံ သာယာငြိမ့်ညောင်းသော ရိုးရာ သီချင်း အချို့ကိုပင် ညည်းဆိုနေသေးသည်။

ပထမဆုံးအကြိမ် သိုးကျောင်းထွက်ရသည်က အတော်လေး သက်သောင့်သက်သာ ရှိသည်ဟု ခံစားရပေသည်။

ယနေ့ အချိန်လည်း သိပ်မရှိသဖြင့် သိုးအုပ်ကို ခေါ်ကာ အပြင်တွင် တစ်ပတ်ခန့် လှည့်ပတ်ပြီး ပြန်လာခဲ့၏။

နောက်ပိုင်း အချိန်ရလျှင် နံနက်ပိုင်းတွင် သိုးကျောင်းထွက်ကာ တောင်ကုန်း တစ်ခုကို ရှာပြီး သိုးများ မြက်စားသည်ကို ထိုင်ကြည့်နေမည် ဖြစ်သည်။

မြက်စားလေ ဝလာလေပင်။

တဖြည်းဖြည်းနှင့် ကြီးလာတော့မည် ဖြစ်၏။

သို့သော် သိုး တစ်ကောင်ချင်းစီ၏ အကျိုးအမြတ်က မများလှသဖြင့် ဤမျှလောက်သာ မွေးထားပါက ငွေအများကြီး ရနိုင်မည် မဟုတ်ချေ။

ရွှီယန်က စိုက်ပျိုးရေး လုပ်ငန်းရှင်ကြီး တစ်ယောက်ဖြစ်ရာ ဤသိုးများကို အပျော်သဘော မွေးမြူထားခြင်းသာ ဖြစ်၏။

ယနေ့ကလည်း ပေါ့ပေါ့ပါးပါး နေ့တစ်နေ့ပင် ဖြစ်သည်။

အပြင်တွင် တစ်ပတ်ခန့် လှည့်ပတ်ပြီးနောက် ရွှီယန်က ပြန်လာပြီး အနားယူလိုက်၏။

ညဘက်တွင် ဝမ်ဝူ က နွားကို အိမ်မွေးတိရစ္ဆာန် အဖြစ် မွေးမြူ၍ ရမရ လာရောက် မေးမြန်းပြန်သည်။

ဤအချက်ကိုတော့ ရွှီယန်က သဘောတူပေသည်။

နွားများတွင် သံယောဇဉ် ရှိပြီး သံယောဇဉ်လည်း ကြီးမားလှ၏။

ယခင်က ပိုင်ရှင် တစ်ယောက်က နွားကို ရောင်းရန် လုပ်ရာ နွားက မျက်ရည်များပင် ကျလာသဖြင့် နောက်ပိုင်းတွင် ပိုင်ရှင်လည်း နွားကို မရောင်းတော့ချေ။

ထို့အပြင် နွားများက လယ်ယာခြံဝင်း၏ နွေးထွေးသော ကောင်လေးများ ဖြစ်ပြီး စရိုက်ကလည်း အလွန် ကောင်းမွန်ကာ တိရစ္ဆာန်လေး အများအပြားက နွားများနှင့် ဆော့ကစားရသည်ကို နှစ်သက်ကြပေသည်။

သိုးများ၏ ဉာဏ်နည်းမှု၊ မြင်းများ၏ ကြမ်းတမ်းမှု တို့နှင့် နှိုင်းယှဉ်ပါက နွားများက အများကြီး ပို၍ ပေါင်းသင်းဆက်ဆံရ လွယ်ကူ၏။

ငယ်ငယ်ကတည်းက မွေးလာပါက ပိုင်ရှင်၏ အနားတွင်ပင် ချွဲနွဲ့တတ်သေးသည်။

"အဲဒါဆိုလည်း ပြီးတာပါပဲ ခြံပိုင်ရှင်... ကျွန်တော် နွားတစ်ကောင် မွေးမယ်"

"ဒါပေမယ့် ကြိုပြောထားမယ်နော်... ကျွန်တော် အိမ်မွေးတိရစ္ဆာန် အဖြစ် မွေးတာ... စားလို့ မရဘူး"

ဝမ်ဝူ က အနည်းငယ် စိတ်မချသဖြင့် သေချာ မှာကြားလိုက်သည်။

"စိတ်ချပါ... အမဲသား စားချင်ရင် အပြင်မှာ သွားဝယ်စားမယ်... မင်းရဲ့ နွားကို ဘယ်သူမှ မထိပါဘူး"

"မွေးထားတာ ကောင်းပါတယ်... စည်ကားတာပေါ့"

ရွှီယန်က ပြုံး၍ ပြန်ဖြေလိုက်၏။