အခန်း ၁၀၁၇

အခန်း (၁၀၁၇) နတ်ဘုရားခန္ဓာကိုယ် ပျက်စီးခြင်း၊ သံအပိုင်းအစ။ (၂)

ယခုတွင် စူးချန်ခုန်း၏ ဆန်းကြယ်လိပ် ရွှေအမြုတေမှာ မူလဝိညာဉ်နှင့် ပေါင်းစပ်သွားပြီဖြစ်ရာ ၎င်းမှ ထုတ်လွှတ်လိုက်သော စွမ်းအားမှာ နတ်ဘုရားခန္ဓာကိုယ် ပိုင်ရှင်များကိုပင် အပေါ်စီးမှ ကြည့်နိုင်သည့် အဆင့်သို့ ရောက်ရှိသွားသည်။

"မကောင်းတော့ဘူး။"

ရွှယ်ယိထောင်မှာ အန္တရာယ်ရှိသည့် အရိပ်အယောင်ကို အနည်းငယ် ခံစားလိုက်ရသည်။ သူသည် နတ်ဘုရား စွမ်းရည်များကို အသက်သွင်းလိုက်ရာ ငရဲမြစ်ကဲ့သို့ သွေးရောင်မြစ်ကြီးမှာ လိမ်ယှက်ကာ သူ့ကို ဝန်းရံထားသော်လည်း မူလဝိညာဉ်၏ စွမ်းအားကို အနည်းငယ်မျှသာ လျှော့ချနိုင်ခဲ့သည်။ မူလဝိညာဉ်မှာ သွေးမြစ်ကို ဖောက်ထွက်ကာ ရွှယ်ယိထောင်ကို ဆက်တိုက် ခုတ်ပိုင်းနေသည်။

"ချွမ်း ချွမ်း ချွမ်း"

ထိခတ်မှုတိုင်းမှာ ရွှယ်ယိထောင်အတွက် အလွန်ပင် ပင်ပန်းနွမ်းနယ်စေသည်။ ကာကွယ်ရေးမှာ ကြာရှည်စွာ ဆက်လုပ်ပါက ပျက်စီးတတ်မြဲဖြစ်ပြီး စူးချန်ခုန်းမှာ မိုင်တစ်ထောင် ဝေးကွာသော နေရာတွင် ရှိနေသဖြင့် ရွှယ်ယိထောင်အနေဖြင့် စူးချန်ခုန်းကို တိုက်ရိုက် မတိုက်ခိုက်နိုင်ပေ။ သူ ထွက်ပြေးရန် စဉ်းစားသော်လည်း စူးချန်ခုန်း၏ ဝူချင်းရှီဖြင့် ထွက်ပြေးသည့် အရှိန်မှာလည်း သူ့ထက် မနှေးပေ။

"သေစမ်း၊ သေစမ်း။"

ရွှယ်ယိထောင် စိတ်ထဲမှ ကျိန်ဆဲလိုက်သည်။ နတ်ဘုရားမျိုးစေ့ သိုင်းဝိဇ္ဇာ သူတော်စင် တစ်ဦးကြောင့် ဤမျှ အခြေအနေဆိုးသို့ ရောက်လိမ့်မည်ဟု သူ တစ်ခါမျှ မတွေးခဲ့မိပေ။

"ချွမ်း"

မူလဝိညာဉ်မှာ ရွှေအမြုတေနှင့်အတူ သွေးစိမ်းခန်းမကို နောက်တစ်ကြိမ် ထပ်မံ ထိခတ်မိလိုက်သည်။ ရွှယ်ယိထောင်၏ နတ်ဘုရား စွမ်းရည်ဖြင့် ဖန်တီးထားသော ဓားမှာ မခံနိုင်တော့ဘဲ ကွဲအက် ပေါက်ကွဲသွားသည်။ မူလဝိညာဉ်မှာ တိုက်ရိုက် ဖောက်ထွက်သွားပြီး ရွှယ်ယိထောင်၏ လည်ပင်းကို ခုတ်ပိုင်းလိုက်သည်။

"အား"

ရွှယ်ယိထောင် ကျယ်လောင်စွာ ဟိန်းဟောက်လိုက်သည်။ နတ်ဘုရား အမှတ်အသားများမှာ သူ၏ လက်ဝါးကို ရစ်ပတ်သွားပြီး ဝင်ရောက်လာသော မူလဝိညာဉ်ကို ဖမ်းဆုပ်ရန် ကြိုးစားသည်။

"ရွှီး"

သို့သော်လည်း ရွှယ်ယိထောင်၏ လက်ချောင်း ငါးချောင်းစလုံးမှာ ပြတ်တောက်သွားပြီး ဓားပုံစံ မူလဝိညာဉ်မှာ ရွှယ်ယိထောင်၏ လည်ပင်းကို ဖြတ်သွားသည်။ သူ၏ ခေါင်းမှာ ခန္ဓာကိုယ်မှ ပြုတ်ထွက်သွားပြီး လည်ပင်းမှ သွေးများ ပန်းထွက်လာသည်။

ရွှယ်ယိထောင်၏ မျက်နှာတွင် ကြောက်ရွံ့မှုနှင့် ရက်စက်မှုများ ပေါ်နေပြီး လည်ပင်းရှိ နတ်ဘုရား ပုံစံများမှာ တောက်ပကာ ခေါင်းကို ပြန်ဆက်ရန် ကြိုးစားနေသည်။ နတ်ဘုရားခန္ဓာကိုယ် ပိုင်ရှင်များ၏ အသက်စွမ်းအားမှာ အလွန် ခိုင်မာသဖြင့် ခေါင်းပြတ်ရုံမျှဖြင့် အသေမသေနိုင်ပေ။ သို့သော်လည်း ခေါင်းမှာ လည်ပင်းနှင့် ပြန်မဆက်နိုင်တော့ပေ။

စူးချန်ခုန်း၏ မူလဝိညာဉ်ဖြင့် ခုတ်ပိုင်းခံရခြင်းမှာ ခန္ဓာကိုယ်နှင့် သိစိတ်ပင်လယ်နှစ်ခုစလုံးကို တစ်ပြိုင်နက် ဖျက်ဆီးလိုက်ခြင်း ဖြစ်သည်။ မိစ္ဆာနတ်ဆိုးတစ်ကောင်၏ မသေနိုင်သော ခန္ဓာကိုယ်ပင်လျှင် ဤကဲ့သို့သော ဒဏ်ရာမျိုးကို ပြန်လည် ကုသနိုင်မည် မဟုတ်ပေ။

"မဖြစ်ဘူး"

ရွှယ်ယိထောင်မှာ မကျေနပ်စွာ ဟိန်းဟောက်လိုက်သော်လည်း သေခြင်းတရားကို မတားဆီးနိုင်တော့ပေ။ မူလဝိညာဉ်မှာ လည်ပတ်လျက် ရွှယ်ယိထောင်၏ ခေါင်းကို အပိုင်းပိုင်း ဖြစ်သွားစေသည်။

ရွှယ်ယိထောင် သေဆုံးသွားလေပြီ။ နတ်ဘုရားမျိုးစေ့ သူတော်စင်စစ်သည် တစ်ဦး၏ လက်ချက်ဖြင့် သေဆုံးရလိမ့်မည်ဟု သူ တစ်ခါမျှ မတွေးခဲ့မိပေ။

"ငါတို့ နိုင်ပြီ။"

စူးချန်ခုန်းမှာ သက်ပြင်းချလိုက်သည်။ ဆန်းကြယ်လိပ် ရွှေအမြုတေကို သယ်ဆောင်ထားသော သူ၏ မူလဝိညာဉ်မှာ ခန္ဓာကိုယ်ဆီသို့ လျင်မြန်စွာ ပြန်လည် ဝင်ရောက်သွားသည်။ စူးချန်ခုန်း အလွန် အားနည်းသွားသည်။ သူ၏ မူလဝိညာဉ်နှင့် ဆန်းကြယ်လိပ် ရွှေအမြုတေတို့မှာ မှိန်ဖျော့သွားသည်။ ဤကဲ့သို့ အလွန်အမင်း စွမ်းအားထုတ်သုံးခြင်းမှာ စွမ်းအင် အမြောက်အမြား ကုန်ဆုံးစေသဖြင့် သူ ဆက်လက် မလုပ်ဆောင်နိုင်တော့ပေ။

ရွှယ်ယိထောင်သာ အနည်းငယ် ပိုတောင့်ခံနိုင်ခဲ့ပါက စူးချန်ခုန်းမှာ မောပန်းနွမ်းနယ်၍ လိုက်လံ တိုက်ခိုက်ခြင်းကို ရပ်တန့်ရလိမ့်မည် ဖြစ်သည်။

"ကံကောင်းလို့ပဲ… ရွှယ်ယွိထောင်က နတ်ဘုရားခန္ဓာကိုယ်ကို ဖော်ဆောင်နိုင်ခဲ့ပေမဲ့ သူရဲ့ အခြေခံက မခိုင်မာဘူး။ ကုမင်နဲ့ ယှဉ်ရင် ကွာခြားချက်က သိသာတယ်။"

နတ်ဘုရားခန္ဓာကိုယ် ပိုင်ရှင်တစ်ဦးကို သတ်ဖြတ်ပြီးနောက် စူးချန်ခုန်းမှာ မောက်မာခြင်း မရှိပေ။ ကုမင်ကဲ့သို့ နက်နဲသော အခြေခံရှိသူနှင့်သာဆိုလျှင် သူ အစွမ်းကုန် ကြိုးစားသော်လည်း အနိုင်ရရန် မဖြစ်နိုင်ကြောင်း သူ သိရှိသည်။

သို့သော် သူသည်လည်း မိမိကိုယ်ကို နှိမ့်ချမနေပေ။ သူသည် သိုင်းဝိဇ္ဇာ သူတော်စင် ဒုတိယကောင်းကင်ဘုံအဆင့်သို့ အခုမှ ရောက်ရှိလာပြီး နတ်ဘုရား အမှတ်အသားများလည်း မရှိသေးချိန်တွင် ရွှယ်ယိထောင်ကို အနိုင်ယူနိုင်ခဲ့ခြင်းမှာ သာမန်လူတို့ မတွေးနိုင်သော အစွမ်းအစပင် ဖြစ်သည်။

သိုင်းဝိဇ္ဇာ သူတော်စင် တတိယနယ်ပယ်သို့ ရောက်ရှိပြီး နတ်ဘုရား အမှတ်အသားများကို အများဆုံး ရရှိပါက စူးချန်ခုန်း၏ စွမ်းအားမှာ ပိုမိုကြီးထွားလာမည် ဖြစ်သည်။

ကျန်းမိသားစု၏ ထိပ်တန်း တပည့် ကျန်းယောင်ကဲ့သို့သော သူများကို အနိုင်ယူရန်မှာလည်း ဖြစ်နိုင်ချေ ရှိသည်။

သူသည် လက်ကို ဝှေ့ယမ်းလိုက်ပြီး ရွှယ်ယိထောင်၏ အလောင်းကို စာပေရနံ့အိတ်ထဲသို့ သိမ်းလိုက်သည်။

"ဟင်…ရွှယ်ယွိထောင်ရဲ့ အရှိန်အဝါ ပျောက်သွားပြီလား။ သူ… သူ သေသွားပြီလား။"

ယခုအချိန်တွင် ကျန်းယောင်နှင့် တိုက်ခိုက်နေသော ကုမင်မှာ ချက်ချင်းပင် အမူအရာ ပြောင်းလဲသွားသည်။ ကျန်းယောင်နှင့် တိုက်ခိုက်ခြင်းမှာ ကုမင်အတွက် လွယ်ကူသည်။ သူသည် ကျန်းယောင်ကို ထိန်းထားနိုင်သရွေ့ ရွှယ်ယိထောင်မှာ အလွယ်တကူ ထွက်ပြေးနိုင်မည် ဖြစ်သည်။

သို့သော် မိုင်ထောင်ချီ ဝေးသော နေရာမှ ရွှယ်ယိထောင်၏ အရှိန်အဝါမှာ ရုတ်တရက် တောက်ပလာပြီးနောက် မှိန်ဖျော့ကာ လုံးဝ ပျောက်ကွယ်သွားသည်ကို ကုမင်ခ ခံစားလိုက်ရသည်။ ၎င်းမှာ ရွှယ်ယိထောင် ကျဆုံးသွားခြင်း ဖြစ်သည်။

"ဘယ်လိုလုပ် ဖြစ်နိုင်မှာလဲ။ ရွှယ်ယိထောင် သေသွားပြီလား။ အဲဒီ လူငယ်လေး လက်ချက်နဲ့ သေတာလား။"

ကုမင် အံ့အားသင့်သွားပြီး မယုံကြည်နိုင် ဖြစ်နေသည်။ စူးချန်ခုန်း၏ နတ်ဘုရား စွမ်းရည်များဖြင့် ရွှယ်ယိထောင်ကို ထွက်ပြေးအောင် ဖိအားပေးနိုင်ခြင်းမှာ ခက်ခဲလှသည်။ သို့သော် ရွှယ်ယိထောင်က ထွက်ပြေးရန် ဆုံးဖြတ်လိုက်ပါက သူ့ကို သတ်ရန်မှာ မဖြစ်နိုင်ပေ။

"အဲဒီ ကောင်လေး ဘာနည်းလမ်းသုံးတာလဲ။ သူက ကျန်းမိသားစုရဲ့ နောက်ထပ် ထူးချွန်တဲ့ ပညာရှင်လား။"

ကုမင် မျက်နှာပျက်သွားသည်။ သူသည် ကျန်းယောင်နှင့် ဆက်လက် တိုက်ခိုက်ခြင်း မပြုတော့ဘဲ ချက်ချင်း ထွက်ခွာသွားသည်။

ကုမင်က ကျန်းယောင်ကို တစ်ချက်ကြည့်လိုက်ပြီး "အကြီးအကဲကျန်း၊ ဘယ်ဆိုးလို့လဲ… ငါ ဒီကနေပဲ ထွက်သွားတော့မယ်။" ဟု ပြောလိုက်သည်။

ယမမင်းငရဲခန်းဂိုဏ်း၏ ထောက်ခံမှု ရှိသဖြင့် ကျန်းယောင်ကို ကြောက်ရွံ့ခြင်း မရှိသော်လည်း ကျန်းမိသားစုကို ရန်မစလိုသောကြောင့် သတိထားရမည် ဖြစ်သည်။ ယခု ရွှယ်ယိထောင် သေဆုံးသွားပြီဖြစ်ရာ သူ ဆက်နေရန် မလိုတော့ပေ။

ကုမင်၏ ပုံရိပ်မှာ ပျောက်ကွယ်သွားသည်။ ကျန်းယောင်မှာမူ လိုက်လံ တိုက်ခိုက်ခြင်း မပြုတော့ပေ။ သူသည် အံ့အားသင့်လျက် "အကြီးအကဲစူးက ရွှယ်ယိထောင်ကို တကယ်ပဲ သတ်လိုက်တာလား။ မူလဝိညာဉ်… တကယ်ကို ထူးခြားတာပဲ။" ဟု ဆိုကာ စူးချန်ခုန်း၏ မူလဝိညာဉ်မှာ သိုင်းဝိဇ္ဇာ သူတော်စင် တစ်ဦး၏ စွမ်းအားထက် သာလွန်နေကြောင်း သိလိုက်ရသည်။

"ဂိုဏ်းချုပ်… သေသွားပြီလား။"

တစ်ဖက်တွင် သွေးမြစ်ဂိုဏ်းမှ တပည့်များမှာ ကြောက်ရွံ့နေကြသည်။ ယခု ရွှယ်ယိထောင် သေဆုံးသွားပြီကို သိလိုက်ရသောအခါ သူတို့၏ တိုက်ခိုက်လိုစိတ်မှာ ချက်ချင်းပင် ပျက်ပြားသွားသည်။

"ပြေး၊ ပြေးကြ။"

သူတို့မှာ တိုက်ခိုက်လိုစိတ် မရှိတော့ဘဲ လေးမျက်နှာသို့ အရပ်ရပ်သို့ ထွက်ပြေးကြသည်။ သို့သော်လည်း ကောင်းကင် သူတော်စင် စစ်သည်များ၏ လိုက်လံ သတ်ဖြတ်မှုကိုမူ ရှောင်လွှဲနိုင်မည် မဟုတ်ပေ။