အခန်း ၅၂၁

အခန်း (၅၂၁)

" ဒါက ချင်အင်ပါယာရဲ့ ဂုဏ်ကျက်သရေကို အတူတူခံစားရမယ့် လမ်းကြောင်းပဲ။ ကျင့်ကြံဖို့ အရည်အချင်းနိမ့်တဲ့သူတွေအတွက်လည်း သင့်တော်တယ်။ " ကွေ့ကူကျိက ရယ်မောလိုက်ပြီး ရုတ်တရက် သူ၏ အမူအရာက လေးနက်သွားသည်။ " ကောင်လေးကျောက် မင်း နတ်ဘုရားခန့်အပ်ခြင်းအကြောင်း ဘယ်လိုသိတာလဲ။ ပြီးတော့ ကောင်းကင်ဘုံက နတ်ဘုရားတွေအကြောင်းရော ဘယ်လိုသိနေတာလဲ။ "

" ကံကောင်းလို့ သိခဲ့တာပါ။ " ကျောက်ဖုန်းက ပြုံး၍ ပြောလိုက်သည်။

" မင်းမှာ လျို့ဝှက်ချက်တွေ အများကြီး ရှိနေတာပဲ။ တစ်ခါမှ မကြားဖူးတဲ့ သိုင်းတာအိုလမ်းစဉ်၊ အခု အင်ပါယာကံကြမ္မာကို ကျင့်ကြံတဲ့ နည်းလမ်း။ ဒီထဲက တစ်ခုကတောင် မြေကြီးအင်မော်တယ်ဘုံကို လှုပ်ခတ်သွားစေနိုင်တယ်။ မင်းက တကယ်စိတ်ဝင်စားဖို့ ကောင်းတာပဲ။ " ကွေ့ကူကျိက စိတ်လှုပ်ရှားစွာဖြင့် ပြောလိုက်သည်။

" အကြီးအကဲ ဒီနေ့ ကျွန်တော် အကြီးအကဲဆီလာတာ အရင်က ပေးထားတဲ့ ကတိကို တည်ဖို့ပါ။ အကြီးအကဲအနေနဲ့ တောင်ပေါ်က ဆင်းလာပြီး ချင်အင်ပါယာကို ပံ့ပိုးပေးဖို့ ဆန္ဒရှိပါသလား။ " ကျောက်ဖုန်းက ကွေ့ကူကျိကို ကြည့်ပြီး မေးလိုက်သည်။

" ချင်အင်ပါယာကို ဝင်လာရင် ငါက ဘာရမှာလဲ။ " ကွေ့ကူကျိက ပြန်မေးလိုက်သည်။

ထိုမေးခွန်းကို ကြားသောအခါ ကျောက်ဖုန်းက ရယ်မောလိုက်သည်။ " ချင်အင်ပါယာထဲ ဝင်လာရင် လောကကြီးမှာ ဂုဏ်ယူစွာ ရပ်တည်ဖို့ အခွင့်အရေး ပေးမယ်။ ဒါ့အပြင် အရင်းအမြစ်တွေ အထောက်အပံ့တွေ ရပြီး ထာဝရအသက်ရှည်ခြင်းကို လျှောက်လှမ်းနိုင်လိမ့်မယ်။ "

" မင်း ဘယ်လိုအာမခံပေးမှာလဲ။ " ကွေ့ကူကျိက ရယ်မောလိုက်သည်။

ကျောက်ဖုန်းက ဘာမှမပြောတော့ဘဲ ကောင်းကင်သို့ ပျံတက်သွားပြီး ထျန်းဝမ်ဓားက သူ၏ လက်ထဲတွင် ပေါ်လာသည်။

" ကျုပ်ရဲ့ စွမ်းအားနဲ့ပေါ့။ အကြီးအကဲ ကြွပါ။ " ကျောက်ဖုန်းက ကျယ်လောင်စွာ ရယ်မောလိုက်ပြီး သူ၏ ခန္ဓာကိုယ်မှ ကြောက်စရာကောင်းသော အော်ရာတစ်ခု ထွက်ပေါ်လာသည်။

" အရင်တိုက်ပွဲတုန်းက မင်းက အစွမ်းကုန်မထုတ်ခဲ့သလို ငါ့လည်း မထုတ်ခဲ့ဘူး။ ဒီနေ့တိုက်ပွဲမှာ မင်းငါ့ကို စိတ်မပျက်စေဖို့ မျှော်လင့်ပါတယ်။ " ကွေ့ကူကျိက တိုက်ခိုက်လိုစိတ်အပြည့်ဖြင့် ကောင်းကင်သို့ ပျံတက်သွားပြီး သူ၏ လက်ထဲတွင် ဓားတစ်လက် ပေါ်လာသည်။ ၎င်းက သာမန်လက်နက်တစ်ခုမဟုတ်ဘဲ အင်မော်တယ်အဆင့် လက်နက်တစ်ခုဖြစ်သည်။

" တိုက်ကြတာပေါ့။ " ကျောက်ဖုန်းက ရှေ့သို့ တစ်လှမ်းလှမ်းကာ ပျောက်ကွယ်သွားပြီး သူ၏ ပုံရိပ်က နောက်တွင် ကျန်နေခဲ့သည်။ သူက ကွေ့ကူကျိ၏ အထက်သို့ ရောက်လာပြီး သူ၏ ဓားကို အောက်သို့ ခုတ်ချလိုက်သည်။ ဟင်းလင်းပြင်က ထိုဓားချက်ကြောင့် အက်ကွဲသွားပြီး ဟင်းလင်းပြင်အက်ကြောင်းများ ပေါ်လာသည်။

ကွေ့ကူကျိက ပြုံးပြီး ကျောက်ဖုန်းကို ရင်ဆိုင်ရန် ဓားချက်တစ်ချက် ထုတ်ဖော်လိုက်သည်။

ဝုန်း ဝုန်း...

ဓားအလင်းတန်းနှစ်ခုက လျင်မြန်စွာ ရင်ဆိုင်မိသွားသည်။ ကြီးမားသော စွမ်းအားများက ဟင်းလင်းပြင်တစ်လျှောက် ပေါက်ကွဲသွားသည်။ နောက်ခဏတွင် သူတို့နှစ်ယောက်၏ ပုံရိပ်က နောက်တစ်ကြိမ် ချဉ်းကပ်သွားသည်။

ကွေ့ကူကျိက သူ၏ အင်မော်တယ်စွမ်းအားကို အစွမ်းကုန် ထုတ်လွှတ်ထားသည်။ ကျောက်ဖုန်းကလည်း သူ၏ သိုင်းတာအိုစွမ်းအားကို အပြည့်အဝ ထုတ်ဖော်ထားသည်။ သူတို့နှစ်ယောက် ရင်ဆိုင်မိတိုင်း ဟင်းလင်းပြင်က ပေါက်ကွဲသွားသည်။ ဓားချက်တစ်ခုစီတိုင်းက မြို့ကြီးတစ်မြို့ကို ဖျက်ဆီးပစ်နိုင်စွမ်းရှိသည်။ ၎င်းမှာ စစ်မှန်သော ကျင့်ကြံသူတို့၏ စွမ်းအားဖြစ်သည်။

" သိုင်းတာအိုနတ်စွမ်းရည် သတ်ဖြတ်ခြင်းနယ်ပယ်။ " ကျောက်ဖုန်းက အော်ဟစ်လိုက်ပြီး သူ၏ နတ်စွမ်းရည်ကို ထုတ်ဖော်လိုက်သည်။

သွေးရောင်အော်ရာတစ်ခုက လျင်မြန်စွာ ထွက်ပေါ်လာပြီး ကြောက်စရာကောင်းသော စွမ်းအားတစ်ခုက မိုင်ပေါင်းထောင်ချီသောင်းချီ လွှမ်းခြုံသွားသည်။ ကွေ့ကူကျိက တုန့်ပြန်ရန်ပင် အချိန်မရလိုက်ဘဲ သတ်ဖြတ်ခြင်းနယ်ပယ်၏ ဖုံးလွှမ်းခြင်းခံလိုက်ရသည်။

" ဒါက ဘာလဲ။ " ကွေ့ကူကျိက ပတ်ဝန်းကျင်ကို လေးနက်စွာ ကြည့်လိုက်သည်။

ပတ်ဝန်းကျင်မှ ဟင်းလင်းပြင်တစ်ခုလုံးကို သွေးရောင်များ ဖုံးလွှမ်းသွားသည်။ တစ်ချိန်တည်းတွင် ကျောက်ဖုန်း၏ ပုံရိပ်က သူ၏ အမြင်အာရုံမှ ပျောက်ကွယ်သွားသည်။ သို့သော် သူ၏ နတ်ဘုရားအာရုံထဲတွင် ကျောက်ဖုန်းက ဟင်းလင်းထဲရှိ နေရာတိုင်းတွင် ရှိနေသကဲ့သို့ ခံစားလိုက်ရသည်။

" အကြီးအကဲကွေ့ကူကျိ ဒါက ကျုပ်ရဲ့ နတ်စွမ်းရည် သတ်ဖြတ်ခြင်းနယ်ပယ်ပဲ။ ကျုပ်က စစ်မြေပြင်မှာ ရန်သူတွေကို သတ်ဖြတ်ဖို့ မွေးဖွားလာတာပဲ။ ဒီနတ်စွမ်းရည်က ကျုပ်ရဲ့ နားလည်မှုတစ်ခုပါ။ " ကျောက်ဖုန်း၏ အသံက သတ်ဖြတ်ခြင်းနယ်ပယ်ထဲတွင် ပဲ့တင်ထပ်နေသည်။

" ဓားတစ်သောင်းမူလသို့ပြန်ခြင်း..." ကျောက်ဖုန်းက ကျယ်လောင်စွာ အော်ဟစ်လိုက်သည်။

နယ်ပယ်တစ်ခုလုံးရှိ သွေးရောင်သတ်ဖြတ်ခြင်းအော်ရာများက စုစည်းသွားပြီး အဆုံးမရှိသော သွေးရောင်ဓားများ ပေါ်လာသည်။ ဓားတစ်လက်စီတွင် ကြောက်စရာကောင်းသော စွမ်းအားများ ပါဝင်နေပြီး ဓားပုံရိပ်ပေါင်းသောင်းချီက ကွေ့ကူကျိကို ထိုးစိုက်လာသည်။

" ကောင်းလိုက်တဲ့ နတ်စွမ်းရည်။ မင်းက အရင်ထက် ပိုသန်မာလာတာပဲ။ " ကွေ့ကူကျိက ရယ်မောလိုက်သည်။ သူက အင်မော်တယ်စွမ်းအားများကို အပြည့်အဝ ထုတ်ဖော်ပြီး အကာအကွယ်အလွှာများစွာကို တည်ဆောက်လိုက်သည်။ ထို့နောက် သူ၏ လက်ထဲမှ အင်မော်တယ်ဓားက ပျံထွက်သွားပြီး ဓားပုံရိပ်ဆယ်ခုအဖြစ် ပြောင်းလဲကာ သူ့ကို ဝန်းရံသွားသည်။ မရေတွက်နိုင်သော သွေးရောင်ဓားများက ကွေ့ကူကျိဆီသို့ ရူးသွပ်စွာ ကျဆင်းလာသည်။

ဝုန်း ဝုန်း ဝုန်း....

ပြင်းထန်သော စွမ်းအားများက ပေါက်ကွဲလာပြီး သွေးရောင်ဓားများကလည်း အက်ကွဲလာသည်။

" စုစည်းစမ်း။ " ကောင်းကင်ထက်တွင် ကျောက်ဖုန်းက အော်ဟစ်လိုက်သည်။ ဓားအရိပ်ပေါင်းသောင်းချီက စုစည်းသွားပြီး သွေးရောင် ဓားကြီးတစ်လက်အဖြစ် ပေါင်းစပ်သွားကာ ကွေ့ကူကျိကို ခုတ်ပိုင်းလိုက်သည်။

" မကောင်းတော့ဘူး။ " ကွေ့ကူကျိ၏ အမူအရာက ပြောင်းလဲသွားသည်။

သွေးရောင်ဓားကြီးက အောက်သို့ ဆင်းသက်လာသည်နှင့် သူ၏ ပတ်ပတ်လည်မှ ဓားပုံရိပ်များက ချက်ချင်း ကွဲအက်သွားပြီး သူထိန်းချုပ်ထားသော အင်မော်တယ်ဓားကလည်း မှိန်ဖျော့သွားသည်။

ဝုန်း...

သွေးရောင်ဓားကြီးက နောက်တစ်ကြိမ် ခုတ်ပိုင်းလာပြီး ၎င်းမှာ ကွေ့ကူကျိ၏ ခေါင်းပေါ်တွင် ရပ်တန့်သွားသည်။ ၎င်းကို မြင်သောအခါ ကွေ့ကူကျိက ပြုံးလိုက်သည်။

"ဒီလောက် တိုတောင်းတဲ့ အချိန်အတွင်းမှာ မင်းရဲ့ စွမ်းအားက ငါ့ကို ကျော်လွန်သွားပြီပဲ။ ငါ ရှုံးနိမ့်တာကို ဝန်ခံပါတယ်။ "

ကွေ့ကူကျိက ရှုံးနိမ့်ကြောင်း ဝန်ခံလိုက်သည်နှင့် သတ်ဖြတ်ခြင်းနယ်ပယ်နှင့် သွေးရောင်ဓားကြီးတို့က ပျောက်ကွယ်သွားပြီး စွမ်းအားများအဖြစ် ပြန့်ကျဲသွားသည်။ ဟင်းလင်းပြင်တွင် ကွဲအက်နေသော လှိုင်းများသာမရှိလျှင် ထိုပြင်းထန်သော တိုက်ပွဲက လုံးဝမဖြစ်သကဲ့သို့ ဖြစ်နေသည်။

ကျောက်ဖုန်းက ဟင်းလင်းပြင်တွင် ပြန်ပေါ်လာသည်။

" အကြီးအကဲက နောက်ဆုံးတော့ အစွမ်းကုန် မသုံးခဲ့ပါဘူး။ ဒီလောက်နှစ်ပေါင်းများစွာကြာတာတောင် အကြီးအကဲရဲ့ ဒဏ်ရာတွေက မပျောက်သေးပါလား။ "

" အခြေခံအုတ်မြစ်က ဒဏ်ရာတွေက ဒီလောက်လွယ်လွယ်နဲ့ ဘယ်ပျောက်နိုင်မလဲ။ " ကွေ့ကူကျိက သက်ပြင်းချလိုက်သည်။

" ကံကြမ္မာစွမ်းအားရဲ့ အကူအညီနဲ့ဆို ပျောက်ကင်းနိုင်ပါတယ်။ " ကျောက်ဖုန်းက ပြုံး၍ ပြောလိုက်သည်။

" မင်းက ကံကြမ္မာစွမ်းအားကို အဲ့လောက်တောင် ကျွမ်းကျင်နေပြီလား။ " ကွေ့ကူကျိက အံ့ဩသွားသည်။

" အောက်မှာ ဆက်ပြောကြတာပေါ့။ " ကျောက်ဖုန်းက ပြုံးလိုက်ပြီး ကွေ့ကူတောင်ထိပ်သို့ ဆင်းသက်သွားသည်။ ကွေ့ကူကျိက နောက်မှ လိုက်သွားသည်။

တောင်ထိပ်ပေါ်တွင် ယွီလျောင်က လုံးဝမှင်သက်နေသည်။ ယခု တိုက်ပွဲက သူ့ကို အလွန်တုန်လှုပ်သွားစေသည်မှာ ထင်ရှားသည်။

" ဒါက အင်မော်တယ်တွေရဲ့ တိုက်ပွဲလား။ ဆရာနဲ့ အိမ်ရှေ့စံမင်းသားတို့က အင်မော်တယ်တွေ ဖြစ်ရမယ်။ " ယွီလျောင်က အံ့ဩစွာ ပြောလိုက်သည်။

" ကံကြမ္မာစွမ်းအားဆိုတာ အင်မော်တယ်ဘုံက အင်မော်တယ်တိုင်းနဲ့ နတ်ဘုရားတိုင်း လိုချင်နေတဲ့အရာပဲ။ သာမန်အင်မော်တယ်ဖြစ်ဖြစ် တလောရွှေအင်မော်တယ်ဖြစ်ဖြစ် ဒါက ကိုယ်ပိုင်ကျင့်ကြံမှုအတွက် အများကြီး အထောက်အကူဖြစ်စေတယ်။ ဒါပေမယ့် ကံကြမ္မာစွမ်းအားက နားလည်ရခက်ခဲတယ်။ သာမန်အင်မော်တယ်တွေ လက်လှမ်းမမီနိုင်တဲ့အရာပဲ။ " ကွေ့ကူကျိက ဖြည်းညင်းစွာ ပြောလိုက်သည်။

" ကံကြမ္မာစွမ်းအားက တကယ်ကို လျို့ဝှက်ဆန်းကြယ်တယ်။ ဒါပေမယ့် ကျုပ်ကတော့ အဲ့ဒါကို ကျွမ်းကျင်ပြီးသားပါ။ " ကျောက်ဖုန်းက ပြုံး၍ လက်ဝေ့ရမ်းလိုက်သောအခါ တော်ဝင်အမိန့်တော်တစ်ခုပေါ်လာသည်။

" ကျုပ်ရဲ့ ခမည်းတော်က ချင်အင်ပါယာရဲ့ ကံကြမ္မာနဲ့ ပေါင်းစပ်ထားတယ်။ ဒါက ခမည်းတော်ရဲ့ အမိန့်တော်ပု။ အကြီးအကဲက အမိန့်တော်ကို လက်ခံလိုက်တာနဲ့ ချင်အင်ပါယာရဲ့ ကံကြမ္မာစွမ်းအားက ကောင်းချီးပေးမှာပါ။ လက်ခံမလား လက်မခံဘူးလားဆိုတာကတော့ အကြီးအကဲရဲ့ ဆန္ဒအတိုင်းပါပဲ။ " ကျောက်ဖုန်းက ပြုံး၍ ပြောလိုက်သည်။

ကွေ့ကူကျိက အမိန့်တော်ကို ကြည့်လိုက်သည်။ သာမန်လူများမမြင်နိုင်သော်လည်း သူက အမိန့်တော်မှ အင်ပါယာကံကြမ္မာစွမ်းအားကို ခံစားမိနေသည်။

" ဆရာ ချင်က သာမန်အင်ပါယာတစ်ခု မဟုတ်တော့ပါဘူး။ ဆရာ ဒီအခွင့်အရေးကို ဆုပ်ကိုင်လိုက်ရင် ဒဏ်ရာတွေ သက်သာသွားမယ့်အပြင် အနာဂတ်မှာ ကျင့်ကြံမှုအတွက် အများကြီး အထောက်အကူဖြစ်မှာပါ။ " ယွီလျောင်ကလည်း ဝင်ရောက်တိုက်တွန်းလိုက်သည်။

" ဒီအမိန့်တော်ကို ငါလက်ခံလိုက်ရင် ရှန်းကျိုးနယ်မြေရဲ့ ကံကြမ္မာစွမ်းအားက ငါ့ကို ငြင်းဆန်ဦးမှာလား။ " ကွေ့ကူကျိက တောင်ထိပ်မှ အောက်သို့ ငုံ့ကြည့်လိုက်သည်။ သူက ရှန်းကျိုးနယ်မြေတစ်ခုလုံးကို ကြည့်နေသကဲ့သို့ ဖြစ်သည်။

" သဘာဝအတိုင်းပါပဲ။ " ကျောက်ဖုန်းက ပြုံးလိုက်သည်။

" ကောင်းပြီ။ ငါလက်ခံပါတယ်။ " ကွေ့ကူကျိက ပြုံး၍ အမိန့်တော်ကို ဆုပ်ကိုင်လိုက်သည်။ " ဒီအချိန်ကစပြီး ငါက ချင်အင်ပါယာရဲ့ ဝန်ကြီးအဖြစ် အမှုထမ်းဖို့ ဆန္ဒရှိပါတယ်။ "

ကွေ့ကူကျိ၏ လက်ထဲမှ အမိန့်တော်က ပွင့်သွားပြီး အင်ပါယာကံကြမ္မာစွမ်းအားဖြင့် ပေါင်းစပ်ထားသော ရွှေရောင်စာလုံးများက ဟင်းလင်းပြင်ထက်တွင် ပေါ်လာသည်။

" ငါ့ရဲ့ အမိန့်တော်အရ စွမ်းအားနဲ့ ဉာဏ်ပညာပါ ပြည့်စုံတဲ့ ကွေ့ကူကျိကို ချင်အင်ပါယာရဲ့ အင်ပါယာဆရာအဖြစ် ခန့်အပ်ပြီး အင်ပါယာကံကြမ္မာရဲ့ ကောင်းချီးကို ပေးအပ်လိုက်တယ်။ " ဟင်းလင်းပြင်ထက်တွင် အမိန့်တော် ထွက်ပေါ်လာသည်နှင့် ရင်ကျန့်၏ တည်ကြည်သော အသံက ထွက်ပေါ်လာသည်။

" ကျွန်တော်မျိုး အမိန့်တော်ကို လက်ခံပါတယ်။ " ကွေ့ကူကျိက ရိုသေစွာ ဦးညွှတ်လိုက်သည်။

စစ်မြေပြင်မှ ထာဝရရှင်သန်ခြင်းဆီသို့