အခန်း ၅၂၃

အခန်း (၅၂၃)

" အိမ်ရှေ့စံမင်းသား ကျွန်တော်မျိုး တပည့်တွေ အများစုက ချင်မှာ အမှုထမ်းခဲ့ကြတယ်။ ဒါပေမယ့် သူတို့က အကြောင်းအမျိုးမျိုးကြောင့် ကွေ့ကူကို ပြန်လာခဲ့ကြတယ်။ " ကွေ့ကူကျိက ပြုံး၍ ပြောလိုက်သည်။

" ဝန်ကြီးစွန်းဝူ " ကွေ့ကူကျိ၏ တပည့်တစ်ယောက်က ရှေ့ထွက်လာသည်။

" ဝန်ကြီးဖန်ကျွမ် "

" ဝန်ကြီးစုချင် "

" ဝန်ကြီးကျန်းယိ "

" ဝန်ကြီးကိုင်နီ "

ကွေ့ကူကျိ၏ တပည့်များက တစ်ယောက်ပြီး တစ်ယောက် ကျောက်ဖုန်းကို ဦးညွှတ်လိုက်ကြသည်။ အချို့က ရှန်းကျိုးနယ်မြေတွင် ကျော်ကြားသူများဖြစ်ပြီး အချို့က မကျော်ကြားကြပေ။ သို့သော် ကွေ့ကူကျိ၏ တပည့်ဖြစ်နိုင်ခြင်းမှာ သူတို့၏ ထူးချွန်သော အရည်အချင်းများကို ပြသနေသည်။ ယခုအချိန်တွင် ကွေ့ကူကျိက ချင်အင်ပါယာသို့ ရောက်လာပြီး အရည်အချင်းရှိသူဆယ်ယောက်ကျော်ကို ပေးအပ်ခြင်းက ချင်အတွက် ကောင်းချီးတစ်ခုပင် ဖြစ်သည်။

" မင်းတို့အားလုံးက ချင်အင်ပါယာကို ရောက်လာပြီဆိုတော့ မင်းတို့ကို မကောင်းဆက်ဆံမှာမဟုတ်ဘူး။ " ကျောက်ဖုန်းက ရယ်မောပြီး ပြောလိုက်သည်။

ကောင်းကင်ဘုံ၊ ကောင်းကင်နန်းတော်။

ခမ်းနားထည်ဝါမှုတို့အောက်တွင် သွေးချီများက တိတ်တဆိတ် ပုန်းကွယ်နေသည်။

" ဧကရာဇ်မင်းမြတ် ကောင်းကင်လျို့ဝှက်ချက်တွေက ရှုပ်ထွေးနေပြီး ကောင်းကင်ကျမ်းပေါ်မှာ အပြောင်းအလဲတွေ ဖြစ်ပေါ်နေပါတယ်။ ကောင်းကင်က သတ်မှတ်ပေးထားတဲ့ ကံကြမ္မာပိုင်ရှင်က သူ့ရဲ့ ကံကြမ္မာကို ဆုံးရှုံးသွားပေမယ့် မရဏဘုံကို ရောက်မလာသေးပါဘူး။ " မြင်းမြီးယပ်ကို ကိုင်ထားသော တာအိုပညာရှင်တစ်ယောက်က လေးနက်စွာ ပြောလိုက်သည်။

" ကောင်းကင်က စောင့်ရှောက်ထားတဲ့သူက သူ့ရဲ့ ကံကြမ္မာကို ဘယ်လိုလုပ်ဆုံးရှုံးနိုင်မှာလဲ။ အင်မော်တယ်တစ်ယောက် ဆင်းလာရင်တောင် ကောင်းကင်ကံကြမ္မာရဲ့ တန်ပြန်မှုကို ခံနိုင်မှာမဟုတ်ဘူး။ " ကောင်းကင်ဧကရာဇ်က မျက်မှောင်ကြုတ်ပြီး ပြောလိုက်သည်။

" ဧကရာဇ်မင်းမြတ် ချင်အင်ပါယာက ရှန်းကျိုးကို ပေါင်းစည်းလိုက်တဲ့အတွက် ရှန်းကျိုးနယ်မြေရဲ့ ကံကြမ္မာစွမ်းအားက စုစည်းသွားပါပြီ။ လူသားဘုံမှာ အပြောင်းအလဲတွေ ဖြစ်နေပါတယ်။ ဧကရာဇ်မင်းမြတ်အနေနဲ့ အမြန်ဆုံး ဆုံးဖြတ်ချက်ချစေချင်ပါတယ်။ ရှန်းကျိုးနယ်မြေရဲ့ ကံကြမ္မာစွမ်းအားက ​ဗုဒ္ဓနယ်မြေရဲ့ လက်ထဲ ရောက်သွားလို့ မဖြစ်ပါဘူး။ လူသားဘုံမှာ နတ်ဆိုးတွေ သောင်းကျန်းနေတယ်လို့ ကျွန်တော်မျိုး သံသယရှိပါတယ်။ " စေတီတစ်ခုကို ကိုင်ထားသော အင်မော်တယ်က ရုတ်တရက် ပြောလိုက်သည်။

" နတ်ဆိုးတွေ သောင်းကျန်းနေတာလား။ " ကောင်းကင်ဧကရာဇ်က မျက်နှာပျက်သွားသည်။

သွေးချီများပြည့်နှက်နေပြီး အပြစ်မဲ့ဝိညာဉ်များ၏ ငိုကြွေးသံများကြားနေရသော ကောင်းကင်နန်းတော်၌ နတ်ဆိုးများအကြောင်း ပြောနေခြင်းမှာ အမှန်ပင် ရယ်စရာကောင်းလှသည်။

" လူသားဘုံမှာ အပြောင်းအလဲတွေ ဖြစ်နေတယ်။ တကယ်ပဲ လှုပ်ရှားရမယ့်အချိန် ရောက်လာပြီ။ အနောက်ဘက်နယ်မြေက ရှန်းကျိုးရဲ့ ကံကြမ္မာစွမ်းအားကို သိမ်းပိုက်လိုက်ရင် ငါတို့ ကောင်းကင်ဘုံအတွက် မကောင်းဘူး။ " ကောင်းကင်ဧကရာဇ်က ဖြည်းညင်းစွာ ပြောလိုက်သည်။ သူ၏ အမူအရာက အေးစက်နေပြီး ကြောက်စရာကောင်းသော ဖိအားက ခန်းမတစ်ခုလုံး ဖုံးလွှမ်းသွားသည်။

" ဧကရာဇ်မင်းမြတ် ရှန်းကျိုးနယ်မြေကို အင်မော်တယ်ဘုံထဲ ပြန်ထည့်ဖို့ဆိုရင် ရှန်းကျိုးကို ရှုပ်ထွေးအောင်လုပ်ပြီး စုစည်းနေတဲ့ ကံကြမ္မာစွမ်းအားကို ဖျက်ဆီးရပါမယ်။ မဟုတ်ရင် ဧကရာဇ်မင်းမြတ်ကိုယ်တိုင် လှုပ်ရှားရင်တောင် ရှန်းကျိုးနယ်မြေကို အင်တယ်ဘုံထဲ ပြန်ခေါ်ဖို့က မဖြစ်နိုင်ပါဘူး။ " စေတီကို ကိုင်ထားသော အင်မော်တယ်က ထပ်ပြောလိုက်သည်။

" အမိန့်တော် ရှန်းကျိုးနယ်မြေမှာ ချင်ဧကရာဇ် သေဆုံးပြီး လောကကြီး ကွဲပြားသွားရမယ်။ ချင်အင်ပါယာက ရှုပ်ထွေးသွားပြီး အဆုံးမရှိတဲ့ ဘေးဒုက္ခတွေ ကြုံတွေ့ရမယ်။ ကောင်းကင်ကံကြမ္မာကို ပိုင်ဆိုင်တဲ့သူက ရှန်းကျိုးနယ်မြေကို သိမ်းပိုက်နိုင်လိမ့်မယ်။ " ကောင်းကင်ဧကရာဇ်က ခဏစဉ်းစားပြီးနောက် အမိန့်တော် ထုတ်ပြန်လိုက်သည်။

သူ၏ အသံဆုံးသွားသည်နှင့် ကောင်းကင်နန်းတော်တစ်ခုလုံးက တုန်ခါသွားသည်။ ကောင်းကင်ထက်တွင် ကြယ်များ ရွေ့လျားသွားပြီး မမြင်ရသော စည်းမျဉ်းများ၏ စွမ်းအားတစ်ခုက လူသားဘုံသို့ ဆင်းသက်သွားသည်။

" ဧကရာဇ်မင်းမြတ် ရှန်းကျိုးနယ်မြေရဲ့ ကံကြမ္မာစွမ်းအားကို ကျင့်ကြံမှုမရှိတဲ့သူက စုစည်းလို့မရပါဘူး။ အင်အားကြီးတဲ့ ကျင့်ကြံသူတစ်ယောက် ဖြစ်ပါလိမ့်မယ်။ ရှန်းကျိုးနယ်မြေထဲမှ ကျင့်ကြံသူတွေ ရှိနေနိုင်တယ်လို့ ကျွန်တော်မျိုး သံသယဝင်မိပါတယ်။ " အင်မော်တယ်တစ်ယောက်က ပြောလိုက်သည်။

" ဝမ်လင်းကွမ်း မင်းစကားက မှားနေပြီ။ ရှေးခေတ်တုန်းက ကျွမ်းရွှီက ကောင်းကင်နဲ့ မြေကြီးရဲ့ ဆက်သွယ်မှုကို ဖြတ်တောက်ခဲ့တယ်။ တောင်ပိုင်းတိုက်ကြီးရဲ့ အစိတ်အပိုင်းတစ်ခုကို ဖြတ်တောက်ပြီး လူသားဘုံအဖြစ် ပြောင်းလဲလိုက်တည်းက အင်မော်တယ်တွေနဲ့ နတ်ဘုရားတွေက လူသားဘုံထဲကို မဝင်နိုင်တော့ဘူး။ ရှေးခေတ်က သူတော်စင်တွေ မဟုတ်ရင် ဘယ်သူက လူသားဘုံကို ဆင်းသက်နိုင်မှာလဲ။ ပြီးတော့ မူလရင်းမြစ်ကို ထိခိုက်ခံပြီး ဘယ်သူက ဆင်းသက်မှာလဲ။ " အခြားအင်မော်တယ်တစ်ယောက်က ပြောလိုက်သည်။

" ဘာမှမသေချာဘူး။ သူတော်စင်တွေ ကျဆုံးပြီးကတည်းက ကောင်းကင်လျို့ဝှက်ချက်တွေ ရှုပ်ထွေးနေတာ။ အင်အားကြီးသူတစ်ယောက် ဆင်းသက်လာတာမလာတာ ဘယ်သူက သေချာပြောနိုင်မှာလဲ။ ဧကရာဇ်မင်းမြတ်က လူသားဘုံမှာ ဝှက်ဖဲတွေ ချန်ထားခဲ့တယ်။ ရှန်းကျိုးနယ်မြေမှာ ကောင်းကင်ဘုံကို တားဆီးနေတဲ့သူတွေရှိရင် အခု အဲ့ဒီဝှက်ဖဲတွေကို သုံးဖို့ အချိန်ကျပြီ။ ဗုဒ္ဓဂိုဏ်းကို အခွင့်အရေးပေးလို့မဖြစ်ဘူး။ "

" ရှန်းကျိုးနယ်မြေရဲ့ ကံကြမ္မာစွမ်းအားနဲ့ သက်ရှိတွေအားလုံးကို ကျွန်တော်မျိုးတို့ ကောင်းကင်ဘုံက ပိုင်ဆိုင်ရမယ်။ နတ်ဆိုးတွေရဲ့ ဝိညာဉ်အနှစ်သာရတွေက ကျွန်တော်မျိုးတို့ရဲ့ သက်တမ်းကို ရှည်စေဖို့ မလုံလောက်ဘူး။ " ဝမ်လင်းကွမ်းက ဂရုမစိုက်ဘဲ ပြောလိုက်သည်။

အနောက်ဘက်၊ ဗုဒ္ဓနယ်မြေ။

" ရှန်းကျိုးမှာ အပြောင်းအလဲတွေ ဖြစ်နေတယ်။ ကောင်းကင်ကံကြမ္မာက ကျဆင်းသွားပြီ။ ရှန်းကျိုးနယ်မြေရဲ့ အပြင်ဘက်က အင်အားစုတွေကို လှုပ်ရှားခိုင်းလိုက်။ ရှန်းကျိုးနယ်မြေက ကောင်းကင်ဘုံလက်ထဲ ရောက်သွားလို့မဖြစ်ဘူး။ " ရွှေကြာပန်းပေါ်တွင် ထိုင်နေသော တထာဂတက ဖြည်းညင်းစွာ ပြောလိုက်ပြီး သူ၏ အသံက ခမ်းနားထည်ဝါမှုများဖြင့် ပြည့်နှက်နေသည်။

" တထာဂတအရှင်မြတ်ရဲ့ အမိန့်တော်ကို လိုက်နာပါမယ်။ " အောက်မှ ဗုဒ္ဓအရှင်များက ပြန်လည်လျှောက်တင်လိုက်ကြသည်။ ဗုဒ္ဓအရှင်တိုင်းက ဗုဒ္ဓရောင်ခြည်များ တောက်ပနေသော်လည်း ထိုရောင်ခြည်အောက်တွင် ပုန်းကွယ်နေသော သွေးရောင်သတ်ဖြတ်လိုစိတ်နှင့် နတ်ဆိုးအရှိန်အဝါများ ရှိနေသည်။

ရှန်းယန်၊ နံနက်ခင်းညီလာခံခန်းမ။

" ဧကရာဇ်မင်းမြတ် မြောက်ဘက်နယ်စပ်က သတင်းကောင်းရောက်လာပါတယ်။ စစ်သူကြီးလီမုက ဂိုဂူလျောမြို့တော်ကို သိမ်းပိုက်ပြီး ဂိုဂူလျောဘုရင်ရဲ့ တော်ဝင်မိသားစုတစ်ခုလုံးကို ဖမ်းဆီးထားပြီးပါပြီ။ တုအန်းစစ်သူကြီး ကျင်းဖုန်းက ခုခံခဲ့ပေမယ့် စစ်သူကြီး လီမုလက်ချက်နဲ့ နေရာမှာတင် ကွပ်မျက်ခံလိုက်ရပါတယ်။ တုအန်းနဲ့ ဂိုဂူလျောက အခု ချင်နယ်မြေရဲ့ တစ်စိတ်တစ်ပိုင်းဖြစ်သွားပါပြီ။ " ယွီလျောင်က စိတ်လှုပ်ရှားစွာ ပြောလိုက်သည်။

" ကောင်းတယ်။ " ပလ္လင်ပေါ်မှ ရင်ကျန့်ကလည်း ဝမ်းသာသွားသည်။

နယ်မြေချဲ့ထွင်နိုင်ခြင်းက ဧကရာဇ်တစ်ပါးအတွက် အကြီးမားဆုံး ဂုဏ်ယူမှုဖြစ်သည်။ တုအန်းနှင့် ဂိုဂူလျောက နိုင်ငံငယ်လေးများ ဖြစ်သော်လည်း ချင်နယ်မြေကို မိုင်ပေါင်းထောင်ချီ ချဲ့ထွင်နိုင်ပြီး လူဦးရေ ရှစ်သန်းနီးပါးကိုလည်း ရရှိခဲ့သည်။

" ငါ့ရဲ့ အမိန့်တော်ကို ထုတ်ပြန်လိုက်။ စစ်သူကြီးလီမုကို စစ်သေနာပတိချုပ်အဖြစ် ရာထူးတိုးပေးလိုက်တယ်။ မြောက်ဘက်နယ်စပ်တပ်ဖွဲ့ကို မြောက်ဘက်ကာကွယ်ရေးစခန်းအဖြစ် အမည်ပြောင်းလဲလိုက်တယ်။ ဟန်ရှင်းကို စစ်သူကြီးအဖြစ် ရာထူးတိုးပေးလိုက်တယ်။ စစ်သေနာပတိချုပ်လီမုကိက နိုင်ငံနှစ်ခုရဲ့ နယ်မြေကို စောင့်ရှောက်ဖို့ အမိန့်ပေးလိုက်။ ပုန်ကန်တဲ့ ဘယ်သူမဆို ကွပ်မျက်ရမယ်။ " ရင်ကျန့်က အမိန့်တော်ကို ထုတ်ပြန်လိုက်သည်။ အမိန့်တော်ထုတ်ပြန်လိုက်သည်နှင့် ရွှေရောင်စာလုံးများက အင်ပါယာကံကြမ္မာစွမ်းအားများနှင့်အတူ ထွက်ပေါ်လာသည်။

" ဧကရာဇ်မင်းမြတ်က အမြော်အမြင် ကြီးမားလှပါတယ်။ " အရာရှိများအားလုံးက တစ်ညီတစ်ညွှတ်တည်း ပြောလိုက်ကြသည်။

" ဧကရာဇ်မင်းမြတ် တုအန်းနဲ့ ဂိုဂူလျောတို့က နိုင်ငံငယ်လေးတွေဖြစ်ပေမယ့် လူဦးရေရှစ်သိန်းနီးပါး ရှိပါတယ်။ တိုင်းတစ်ပါးသားတွေကို အုပ်ချုပ်ခွင့်ပေးတဲ့အပြင် သူတို့ကို ကြီးကြပ်ဖို့ အရာရှိတွေကို စေလွှတ်ရပါမယ်။ " ဟန်ဖေးက ကျယ်လောင်စွာ ပြောလိုက်သည်။

" ဒီကိစ္စကို ဝန်ကြီးချုပ်ဟန်ပဲ ဆောင်ရွက်လိုက်ပါ။ " ရင်ကျန့်က သိပ်ဂရုမစိုက်ဘဲ ပြောလိုက်သည်။

" မြောက်ဘက်နယ်စပ်ကို သိမ်းပိုက်ပြီးပြီဆိုတော့ နောက်ထပ်ခြေလှမ်းက ပိုင်ယွဲ့ပါပဲ။ " လွီပုဝေက ရှေ့ဆုံးမှ ပြောလိုက်သည်။

" ပိုင်ယွဲ့က တောရိုင်းနယ်မြေဖြစ်ပြီး အဆိပ်ငွေ့တွေ ပြည့်နှက်နေတယ်။ စစ်ဦးစီးချုပ်ဝမ်ကျန်က အဲ့ဒီမှာ ရှိနေတာ ကြာပြီ။ အခု ထျန်းရွှမ်ကြေးမုံရှိနေပြီဆိုတော့ ရိက္ခါပို့ဆောင်ရေးအတွက် စိုးရိမ်စရာမလိုတော့ဘူး။ "

" စစ်ဦးစီးချုပ်ဝမ်ကျန့်ကို ပိုင်ယွဲ့ကို တိုက်ခိုက်ဖို့ အမိန့်ပေးလိုက်။ ပိုင်ယွဲ့မှာ အစုလိုက်အပြုံလိုက် သတ်ဖြတ်တာမျိုးမလုပ်ရဘူး။ ပိုင်ယွဲ့က ချင်နယ်မြေရဲ့ အစိတ်အပိုင်းတစ်ခုဖြစ်လို့ သူတို့ကို ချင်ပြည်သူတွေလို ဆက်ဆံမယ်။ " ရင်ကျန့်က အမိန့်ပေးလိုက်သည်။

" ဧကရာဇ်မင်းမြတ်က အမြော်အမြင် ကြီးမားလှပါတယ်။ " လွီပုဝေက ပြန်ပြောလိုက်သည်။

ပိုင်ယွဲ့က မူလက ရှန်းကျိုး၏ အစိတ်အပိုင်းတစ်ခုဖြစ်ခဲ့သည်။ ပိုင်ယွဲ့လူမျိုးများက ဧကရာဇ်နှင့် ချီယိုလူများ၏ စစ်ပွဲများနှင့် ဆက်စပ်နေသည်။ ချီယိုရှုံးနိမ့်ပြီးနောက် ရှန်းကျိုးနယ်မြေ၏ အပြင်ဘက်သို့ ထွက်ပြေးပြီး ယခု ပိုင်ယွဲ့နယ်မြေ​ဖြစ်လာခဲ့သည်။ ထို့ကြောင့် ရင်ကျန့်က ထိုနေရာတွင် နေထိုင်သော ကျူးလီလူမျိုးများကို တန်ဖိုးထားခြင်းဖြစ်သည်။ အကြောင်းမှာ သူတို့က ဟွာရှ၏ အစိတ်အပိုင်းတစ်ခု ဖြစ်ခဲ့သောကြောင့်ဖြစ်သည်။

စစ်မြေပြင်မှ ထာဝရရှင်သန်ခြင်းဆီသို့