အခန်း ၉၄၆

အခန်း (၉၄၆) - ညတွင်းချင်း ချမ်းသာကြွယ်ဝလာခြင်း၊ အင်မော်တယ်သလင်းကျောက် သုံးသိန်း၊ သတ္တမအဆင့်အဆိပ် ကောင်းကင်မီးလောင်ကျွမ်းခြင်း (၃)

မိစ္ဆာအရှင်အဆင့်ရှိသော ကောင်းကင်မိစ္ဆာတစ်ဦး ဖြစ်သည့်တိုင် ဤလက်ဝါးရိုက်ချက်ကို ရင်ဆိုင်ရချိန်တွင်မူ မည်သို့မျှ ခုခံနိုင်စွမ်း မရှိခဲ့ပေ။

၎င်း၏ ခန္ဓာကိုယ်တစ်ခုလုံးမှ ပြင်းထန်သော နာကျင်မှုများ ထွက်ပေါ်လာသည်ကို ခံစားလိုက်ရပြီး မရေမတွက်နိုင်သော ပုရွက်ဆိတ်များ၏ ကိုက်ဖြတ်ခြင်းကို ခံနေရသည့်အလား ဖြစ်နေခဲ့၏။

ကောင်းကင်မိစ္ဆာမျိုးနွယ်စု၏ မိစ္ဆာအရှင်တစ်ဦးအနေဖြင့် ခန္ဓာကိုယ် ထိခိုက်ဒဏ်ရာရသွားလျှင်ပင် မူလဝိညာဉ်သာ အန္တရာယ်မဖြစ်ခဲ့ပါက အမှန်တကယ်တွင် ကြီးမားသော ပြဿနာ မရှိလှပေ။ အချိန်မရွေး ဒုတိယမြောက် ကိုယ်ခန္ဓာကို ရှာဖွေနိုင်မည်သာ ဖြစ်လေသည်။

သို့ရာတွင် ယခုမူကား မတူညီတော့ပေ။

အဘယ်ကြောင့်ဆိုသော် ဤတိုက်ခိုက်မှုမှာ ဝိညာဉ်ကို တိုက်ရိုက် ဦးတည်နေခြင်းဖြစ်ပြီး မူလဝိညာဉ်ကို တိုက်ရိုက် ရည်ရွယ်ထားရာ မိမိ၏ အသက်အန္တရာယ်ရှိသော နေရာကို အတိအကျ ချိန်ရွယ်ထားသည်ဟု ဆိုနိုင်သောကြောင့်ပင် ဖြစ်၏။

တစ်ကြိမ်သာ မူလဝိညာဉ် ပြိုကွဲပျက်စီးသွားပါက ၎င်းကိုယ်တိုင်လည်း သေချာပေါက် သေဆုံးရမည်ဖြစ်ပြီး ဒုတိယအကြိမ် ခန္ဓာကိုယ်လုယူရန် အခွင့်အရေး လုံးဝရှိတော့မည် မဟုတ်ပေ။

"အား... သာမန် လူသားကျင့်ကြံသူလေးက ငါ့ကို သတ်နိုင်တယ်ပေါ့လေ..."

ဇီယွင်မိစ္ဆာအရှင်မှာ မထိန်းချုပ်နိုင်တော့ဘဲ သနားစဖွယ် အော်ဟစ်သံကြီးကို ထုတ်ဖော်လိုက်ရတော့၏။

ထိုအသံကြီးမှာ တစ္ဆေသရဲတစ်သောင်း ငိုကြွေးနေသည့်အလား မိုင်သောင်းချီ ကျယ်ဝန်းသော ပင်လယ်ပြင်တစ်ခွင်သို့ ပျံ့နှံ့သွားခဲ့ပြီး ကြောက်မက်ဖွယ်ကောင်းသော အသံလှိုင်းစွမ်းအားများကို ဖြစ်ပေါ်စေကာ ဒြပ်ထည်ပေါ်လာပြီးနောက် ကြီးမားသော လှိုင်းလုံးကြီးများကို ဖြစ်တည်လာစေခဲ့သည်။

သို့သော်ငြား ပတ်ဝန်းကျင်ရှိ အစီအရင်၏ စွမ်းအားများက ထိုအရာကို လွယ်ကူစွာပင် ဟန့်တားလိုက်သောကြောင့် ဤနေရာမှ လုံးဝ ထွက်ခွာသွားနိုင်ခြင်း မရှိခဲ့ချေ။

ယခုအချိန်တွင် သူသည် ဒေါသအထွတ်အထိပ်သို့ ရောက်ရှိနေခဲ့ချေပြီ။

၎င်းမှာ မိစ္ဆာအရှင်အဆင့်ရှိသော တည်ရှိမှုတစ်ခု ဖြစ်ပြီး ခန္ဓာကိုယ်ပေါ်တွင် အစွမ်းထက်သော နည်းလမ်းများစွာ ရှိနေသေးကာ အသုံးမပြုရသေးချေ။

သို့ရာတွင် ယခုမူ မိမိအနေဖြင့် ရန်သူ၏ ပုံပန်းသဏ္ဌာန်ကိုပင် မမြင်တွေ့လိုက်ရဘဲ လက်ဝါးတစ်ချက်တည်းဖြင့် ရိုက်သတ်ခံလိုက်ရလေတော့သည်။

ဤကဲ့သို့သော သေဆုံးရမှုမျိုးမှာ အလွန်တရာ မကျေမချမ်းဖြစ်စရာ ကောင်းလွန်းလှပေသည်။

နှမြောစရာကောင်းသည်မှာ ၎င်းအနေဖြင့် မည်မျှပင် နာကြည်း၊ ဒေါသထွက်နေသည်ဖြစ်စေ မည်သည့် အဓိပ္ပာယ်မှ ရှိမနေတော့ခြင်းပင်။

ပြတ်သားသော စွမ်းအားရှေ့မှောက်တွင် အရာအားလုံးမှာ အဓိပ္ပာယ်မဲ့သွားခဲ့ချေပြီ။

ဝုန်း...

ချက်ချင်းဆိုသလိုပင် ဇီယွင်မိစ္ဆာအရှင်၏ ကြီးမားလှသော ခန္ဓာကိုယ်ကြီးမှာ ကောင်းကင်ယံမှ ပြုတ်ကျလာပြီး ပင်လယ်ပြင်ထက်သို့ ပြင်းထန်စွာ ရိုက်ခတ်သွားလေရာ ချက်ချင်းပင် ရေလှိုင်းအမြောက်အမြားကို လွင့်စဉ်သွားစေခဲ့သည်။ ၎င်း၏ မျက်လုံးများမှာ ပြူးကျယ်နေပြီး မျက်စိမမှိတ်ဘဲ သေဆုံးသွားသည့်ဟန် ပေါ်နေခဲ့သည်။

ဇီယွင်မိစ္ဆာအရှင်တစ်ယောက် သေဆုံးသွားခဲ့ချေပြီ။

"မဆိုးဘူးပဲ... သတ္တမအဆင့် ‘အိပ်မက်ဝိညာဉ်ကူ’ဆိုတဲ့အတိုင်း... တကယ်ကို အစွမ်းထက်လွန်းတယ်..."

"ခန္ဓာပေါင်းစည်းခြင်းအဆင့်က ကောင်းကင်မိစ္ဆာမျိုးနွယ်စု ကျင့်ကြံသူကိုတောင်မှ တစ်ချက်တည်းနဲ့ သတ်နိုင်ပြီး အားစိုက်ထုတ်စရာတောင် မလိုဘူး..."

ကျိုးစွေ့က ဤမြင်ကွင်းကို မြင်လိုက်ရသောအခါ ချက်ချင်းပင် အလွန်တရာ ကျေနပ်သွားမိလေသည်။

သိထားရမည်မှာ သမိုင်းမှတ်တမ်းများအရ ခန္ဓာပေါင်းစည်းခြင်းအဆင့် ကောင်းကင်မိစ္ဆာမျိုးနွယ်စု ကျင့်ကြံသူများကို သတ်ဖြတ်ရန် အလွန်ခက်ခဲလှ‌သည်။

အဘယ်ကြောင့်ဆိုသော် ၎င်းတို့သည် အချိန်ကြာမြင့်စွာ အသက်ရှင်နေထိုင်ခဲ့ကြပြီး အမျိုးမျိုးသော ထူးကဲစွမ်းရည် ပညာရပ်များနှင့် အမျိုးမျိုးသော အသက်ကယ် လျှို့ဝှက်ပညာရပ်များကို ကျွမ်းကျင်ကြသောကြောင့်ပင်။

တစ်ချက်လေး အခြေအနေမဟန်သည်ကို တွေ့လိုက်ရပါက မျက်စိတစ်မှိတ်အတွင်း ထွက်ပြေးလွတ်မြောက်သွားကြမည်သာ ဖြစ်လေသည်။

၎င်းတို့၏ မူလဝိညာဉ်ကို သတ်ဖြတ်နိုင်ခြင်း မရှိသရွေ့ ၎င်းတို့သည် မျက်စိတစ်မှိတ်အတွင်း ကီလိုမီတာတစ်သန်းအထိ ဝေးကွာသောနေရာသို့ ထွက်ပြေးနိုင်ပြီး ဤနယ်မြေမှ လုံးဝ ထွက်ပြေးလွတ်မြောက်သွားနိုင်ပေသည်။

ထို့ကြောင့် ၎င်းတို့ကို အနိုင်ယူရန် လွယ်ကူသော်လည်း သတ်ဖြတ်ရန်မူ အမှန်တကယ်ပင် ခက်ခဲလွန်းလှသည်။

မဟာယာနအဆင့် ကျင့်ကြံသူတစ်ဦးကိုယ်တိုင် ပါဝင်လှုပ်ရှားလာခြင်း သို့မဟုတ် ထောင်ချောက်များ ဆင်ထားခြင်း၊ လွတ်လမ်းမရှိသော ပိုက်ကွန်ကြီးတစ်ခု ဖြန့်ကြက်ထားခြင်းများမှလွဲ၍ ခန္ဓာပေါင်းစည်းခြင်းအဆင့် ကောင်းကင်မိစ္ဆာတစ်ဦးကို သတ်ဖြတ်လိုခြင်းမှာ သံသယဖြစ်ဖွယ်မရှိ အချည်းနှီးသာ ဖြစ်ပေမည်။

သို့သော်လည်း ယခုမူ ကျိုးစွေ့မှာ ဤခန္ဓာပေါင်းစည်းခြင်းအဆင့် ကောင်းကင်မိစ္ဆာကို တစ်ချက်တည်းဖြင့် သတ်ဖြတ်လိုက်နိုင်ပြီး တစ်ဖက်လူအား ထွက်ပြေးရန် အခွင့်အရေးပင် မပေးခဲ့ပေ။

အကယ်၍ ဤကိစ္စသာ ပြင်ပသို့ သတင်းပေါက်ကြားသွားပါက ခွန်ဖန်ပင်လယ်ဒေသ တစ်ခုလုံးကို သေချာပေါက် တုန်လှုပ်သွားစေပေမည်။

မှန်ပေ၏၊ ဤသည်မှာလည်း ‘အိပ်မက်ဝိညာဉ်ကူ’၏ ကျေးဇူးကြောင့်ပင် ဖြစ်လေသည်။

သတ္တမအဆင့် အောက်ခြေအဆင့်သို့ တက်လှမ်းသွားပြီးနောက် ‘အိပ်မက်ဝိညာဉ်ကူ’၏ စွမ်းအားမှာ အဆမည်မျှအထိ တိုးတက်သွားခဲ့မှန်းပင် မသိနိုင်တော့ချေ။

ဝိညာဉ်စွမ်းအားကို ပြောရမည်ဆိုပါက မည်သူက ‘အိပ်မက်ဝိညာဉ်ကူ’နှင့် နှိုင်းယှဉ်နိုင်မည်နည်း။

အဘယ်ကြောင့်ဆိုသော် ၎င်းသည် သက်ရှိမည်မျှ၏ ဝိညာဉ်များကို ဝါးမျိုခဲ့သည်ကို မသိနိုင်သောကြောင့် ဖြစ်ပြီး၊ ၎င်းကိုယ်တိုင်ကပင် မရေတွက်နိုင်သော ဝိညာဉ်များ၏ ပေါင်းစပ်မှုတစ်ခု ဖြစ်နေသောကြောင့်ပင်။

သာမန် ကောင်းကင်မိစ္ဆာလောက်မျှအား ၎င်းနှင့် နှိုင်းယှဉ်ပါက ပိုးစုန်းကြူးအလင်းရောင်နှင့် နေ၊ လ အရောင်အဝါတို့ကဲ့သို့ ကွာခြားလှပေသည်။

ဤဝိညာဉ်ရေဘဝဲလက်တံ ပညာရပ်ကို အသုံးပြုလိုက်သည်နှင့် ‘အိပ်မက်ဝိညာဉ်ကူ’ ၏ ခန္ဓာကိုယ်အတွင်းရှိ ကြီးမားလှသော ဝိညာဉ်စွမ်းအားများကို ဆင့်ခေါ်လိုက်ခြင်းနှင့် အတူတူပင် ဖြစ်သောကြောင့် တူညီသောအဆင့်ရှိ ကျင့်ကြံသူများထဲတွင် မည်သူမျှ မခုခံနိုင်ပေ။

သနားစရာကောင်းသော ဇီယွင်မိစ္ဆာအရှင်မှာ သူ၏ခန္ဓာကိုယ်၌ ပညာရပ်များစွာနှင့် အသက်ကယ် လျှို့ဝှက်ပညာရပ်များစွာ ရှိနေသော်ငြား၊ ဤဝိညာဉ်ပညာရပ်၏ အောက်တွင် အရာအားလုံးက အချည်းနှီးသာ ဖြစ်သွားခဲ့ပြီး ချက်ချင်းပင် သတ်ဖြတ်ခြင်းကို ခံလိုက်ရလေသည်။

ပညာရပ်စွမ်းရည် အားလုံးက ဤအချိန်တွင် ပျောက်ကွယ်သွားခဲ့ချေပြီ။

"ဒါကမှ ခန္ဓာပေါင်းစည်းခြင်းအဆင့် အရှင်သခင်တွေရဲ့ တိုက်ပွဲဆိုတာပဲ..."

"မင်းနဲ့ အချီသုံးရာလောက် တိုက်ခိုက်နေစရာမှ မလိုတာ..."

"အသာစီးရနေပြီဆိုရင်တော့ ပြိုင်ဘက်ကို ချက်ချင်း သတ်ပစ်လိုက်ရုံပဲ၊ ရန်သူကို ဘယ်လိုအခွင့်အရေးမှ ပေးမှာမဟုတ်ဘူး..."

"ခန္ဓာပေါင်းစည်းခြင်းအဆင့်ရဲ့ ဝိညာဉ်ပညာရပ်ကို မကာကွယ်နိုင်ရင်တော့ သေရုံပဲ..."

ကျိုးစွေ့က လက်ဝှေ့ယမ်းလိုက်သည်။

ဝုန်း...

ထိုခဏတွင်ပင် ‘အိပ်မက်ဝိညာဉ်ကူ’ က ပါးစပ်ကြီးကို ဟလိုက်ပြီး ဝေလငါးတစ်ကောင်ကဲ့သို့ အငမ်းမရ ဝါးမျိုလိုက်ကာ သေဆုံးသွားသော ကောင်းကင်မိစ္ဆာမျိုးနွယ်စု ကျင့်ကြံသူများ၏ ဝိညာဉ်အပိုင်းအစများကို ချက်ချင်းပင် တစ်စမကျန် ဝါးမျိုလိုက်ပြီး ၎င်း၏ ဝမ်းဗိုက်အတွင်းသို့ အားလုံး ဝင်ရောက်သွားလေတော့သည်။

ထိုအချိန်၌ပင် ဤကောင်းကင်မိစ္ဆာမျိုးနွယ်စုများနှင့် ပတ်သက်သော ဝိညာဉ်မှတ်ဉာဏ်များစွာကို ‘အိပ်မက်ဝိညာဉ်ကူ’ က ရရှိသွားခဲ့၏။

တစ်ချိန်တည်းမှာပင် ‘အိပ်မက်ဝိညာဉ်ကူ’ သည် အရသာရှိသော အစားအသောက်ကြီးကို စားသုံးလိုက်ရသကဲ့သို့ အလွန်ကျေနပ်သွားကာ ဗိုက်ပြည့်သွားသော လေချဉ်တစ်ချက်ကိုပါ တက်လိုက်သေးသည်။

အဘယ်ကြောင့်ဆိုသော် ဤကောင်းကင်မိစ္ဆာမျိုးနွယ်စု ကျင့်ကြံသူများ၏ ဝိညာဉ်စွမ်းအားများမှာ အတော်လေးကို ကြီးမားလှသောကြောင့်ပင် ဖြစ်၏။

‘အိပ်မက်ဝိညာဉ်ကူ’ အတွက်မူ ဤသည်မှာ စားသောက်ပွဲကြီးတစ်ခု ဖြစ်နေခဲ့ပြီး ၎င်းကို အလွန်စိတ်လှုပ်ရှားသွားစေကာ ခန္ဓာကိုယ်အတွင်းရှိ စွမ်းအားများလည်း များစွာ တိုးပွားလာခဲ့လေသည်။

ဤသည်ကပင် ၎င်း၏ ခန္ဓာကိုယ်အတွင်းရှိ နေရာလွတ်ကို တစ်ဆင့်ပို၍ ကျယ်ပြန့်သွားစေခဲ့သည်။

'သြော်... ဒီလိုကိုး၊ ဒီတစ်ကြိမ် ငရဲမိစ္ဆာကမ္ဘာရဲ့ ကျူးကျော်မှုက ကြိုတင်ပြင်ဆင်ထားတာပဲ...'

'မိစ္ဆာမျိုးနွယ်စု ကျင့်ကြံသူတွေနဲ့ ငရဲမျိုးနွယ်စု ကျင့်ကြံသူတွေ အချင်းချင်းကြားမှာလည်း အဆက်အသွယ်တွေ ရှိနေကြတယ်...'

'တစ်ဖက်က သေဆုံးသွားတာနဲ့ တခြား ငရဲမိစ္ဆာကမ္ဘာက ကျင့်ကြံသူတွေက ချက်ချင်း သိသွားကြမှာပဲ...'

'ဒါပေမဲ့ ငရဲမိစ္ဆာကမ္ဘာ ကျင့်ကြံသူတွေရဲ့ အေးစက်တဲ့ စိတ်နေသဘောထားအရဆိုရင် သူတို့က ဇီယွင်မိစ္ဆာအရှင်အတွက် လက်စားချေပေးမှာ မဟုတ်လောက်ဘူး...'

'ဘာလို့လဲဆိုတော့ ငရဲမိစ္ဆာကမ္ဘာမှာက အင်အားကြီးတဲ့သူမှသာ လေးစားကြောက်ရွံ့မှုကို ခံရမှာဖြစ်ပြီး သေသွားရင်တော့ ဘာမှမဟုတ်တော့ဘူးလေ...'

'အင်အားကြီးမားတဲ့ စွမ်းရည်ကို ပြသနိုင်မှသာ ငရဲမိစ္ဆာကမ္ဘာက ကျင့်ကြံသူတွေကို အဆုံးမရှိ အကြောက်တရားတွေ ဖြစ်စေနိုင်မှာပဲ...'

ကျိုးစွေ့က မျက်လုံးများကို မှေးကျဉ်းလိုက်သည်။

သူ၏သိစိတ်ပင်လယ် နက်ရှိုင်းသောနေရာတွင် ကောင်းကင်မိစ္ဆာမျိုးနွယ်စု ကျင့်ကြံသူများနှင့် ပတ်သက်သော မှတ်ဉာဏ်များစွာက စီးဆင်းနေခဲ့၏။

မူလက ဇီယွင်မိစ္ဆာအရှင်ကို သတ်ဖြတ်ပြီးနောက် အခြားသော မိစ္ဆာမျိုးနွယ်စု ကျင့်ကြံသူများကို ဆွဲဆောင်မိမည်လား ဆိုသည်ကို သူ စိုးရိမ်နေခဲ့မိသည်။

သို့သော်ငြား ယခု ကြည့်လိုက်ရသောအခါ သူ အပိုတွေးပူနေခဲ့မိခြင်းသာ ဖြစ်ပေသည်။

မိစ္ဆာမျိုးနွယ်စုများ၏ တစ်ကိုယ်ကောင်းဆန်မှုက ထင်ထားသည်ထက်ပင် ပို၍ ဆိုးရွားလှ၏။

၎င်းတို့က ဤကိစ္စကို သိသွားပြီးနောက်တွင် အုပ်စုဖွဲ့၍ လက်စားချေရန် မလာကြမည့်အပြင် အဝေးဆုံးသို့ပင် ထွက်ပြေးကြမည် ဖြစ်လေသည်။

ဤနေရာကို တားမြစ်နယ်မြေအဖြစ် သတ်မှတ်လိုက်ကြမည်ဖြစ်ကာ အချိန်တိုအတွင်း ထပ်မံ ကျူးကျော်လာကြတော့မည် မဟုတ်ပေ။

အဘယ်ကြောင့်ဆိုသော် ဤငရဲမိစ္ဆာကမ္ဘာ ကျင့်ကြံသူများ ဝိညာဉ်ကမ္ဘာသို့ ခိုးဝင်လာကြခြင်းမှာ ကျင့်ကြံမှုကို တိုးမြှင့်ရန်အတွက်သာ ဖြစ်ပြီး ဝိညာဉ်ကမ္ဘာမှ ကျင့်ကြံသူများနှင့် သေသည်အထိ တိုက်ခိုက်ရန် မဟုတ်သောကြောင့်ပင်။ ယင်းက မည်သည့်အဓိပ္ပာယ်မှ ရှိမည်မဟုတ်ပေ။

ထို့ကြောင့် ၎င်းတို့သည် အားကောင်းသော စွမ်းအားများရှိသည့် နေရာတိုင်းကို ရှောင်ကွင်းသွားကြမည်ဖြစ်ပြီး အစစ်အမှန်ဝိညာဉ်မျိုးနွယ်စုကို အနှောင့်အယှက်ပေးရန် မည်သည့်အခါမှ သွားကြမည် မဟုတ်ချေ။

အကယ်၍ အချို့သောနေရာများတွင် အင်အားကြီးသူများ ရှိနေပြီး ငရဲမိစ္ဆာကမ္ဘာ ကျင့်ကြံသူများကို သတ်ဖြတ်လိုက်ပါက ၎င်းတို့က ထိုနေရာကို အမှတ်အသား ပြုလုပ်ထားကြမည်ဖြစ်ကာ အန္တရာယ်ရှိသော နေရာတစ်ခုအဖြစ် သတ်မှတ်၍ မည်သည့်အခါမှ ကျူးကျော်ဝင်ရောက်သွားကြမည် မဟုတ်ပေ။

သို့မဟုတ်ပါက ၎င်းတို့လည်း ထိုနေရာ၌ပင် သေဆုံးသွားနိုင်ပြီး ဤသို့ဆိုလျှင် အကျိုးထက် အပြစ်က ပိုများသွားမည် မဟုတ်ပါလော။