အခန်း ၃၀၄

ပြိုင်ဘက်ကင်း အင်ပါယာ။ အပိုင်း ၃၀၄

ဘာသာပြန် - Ko Yoohtoo

True Immortal Team

ကိုယ်ယောင်ဖျောက်မျိုးနွယ်၏ လုပ်ရပ်များမှာ အလွန်ယုတ်မာလွန်းလှသဖြင့် လင်းချန် ထိုမျိုးနွယ်အပေါ် မည်သည့်စာနာစိတ်မျှ မရှိပေ။

အမှန်စင်စစ် ကိုယ်ယောင်ဖျောက်မျိုးနွယ်၏ အပြုအမူများမှာ သွေးနက်မျိုးနွယ်နှင့် များစွာ ဆင်တူလှသည်။

အကယ်၍သာ သူတို့သည် သူတို့၏ မွေးရာပါပါရမီများကို မှန်ကန်စွာ အသုံးချပြီး ဖြောင့်မတ်သည့် လမ်းစဉ်ကို လျှောက်လှမ်းကြမည်ဆိုလျှင် ယခုထက် ပိုမိုမြင့်မားသော အဆင့်အတန်းသို့ ရောက်ရှိနိုင်မည်မှာ သေချာလှ၏။

သို့သော် သူတို့သည် လွယ်ကူသက်သာသည့် လမ်းစဉ်ကိုသာ မျက်စိမှိတ် လိုက်စားကြပြီး အခြားမျိုးနွယ်စုဝင် အစွမ်းထက်ပုဂ္ဂိုလ်များ၏ ခန္ဓာကိုယ်များကို လုယူကာ ကိုယ့်ကိုယ်ကိုယ် မြှင့်တင်သော မှားယွင်းသည့်လမ်းစဉ်သို့ တဖြည်းဖြည်း နက်ရှိုင်းစွာ နစ်မွန်းသွားကြသည်။

ဤကဲ့သို့သော နည်းလမ်းမှာ လျင်မြန်စွာ တိုးတက်မှုရှိစေပြီး အတော်အသင့် တိုက်ခိုက်ရေးစွမ်းရည်ကို ပိုင်ဆိုင်စေနိုင်သည်မှာ မှန်သော်လည်း သူတို့၏ နယ်ပယ်မြင့်မားလာသည်နှင့်အမျှ ထိန်းချုပ်ရန် ပိုမိုခက်ခဲလာတတ်၏။

ထို့ပြင် သူတို့၏ နယ်ပယ်ဆိုင်ရာ အမြင့်ဆုံးကန့်သတ်ချက်မှာလည်း အခြားမျိုးနွယ်စုများထက် နိမ့်ပါးလှသဖြင့် ရှေ့ဆက်ရမည့် လမ်းခရီးမှာ ပိုမိုခက်ခဲလာပေလိမ့်မည်။

ကိုယ်ယောင်ဖျောက်မျိုးနွယ်သည်လည်း ဤနိယာမမှာ အတူတူပင်ဖြစ်၏။ သူတို့၏ ရုပ်ပိုင်းဆိုင်ရာ ခန္ဓာကိုယ်မှာ အားနည်းနေသဖြင့် ခန္ဓာကိုယ်ကို ပိုမိုလေ့ကျင့်ပြီး သန့်စင်သင့်သည်။

သို့မှသာ သူတို့၏ ရုပ်ပိုင်းဆိုင်ရာ ကြံ့ခိုင်မှုမှာ အားကောင်းလှသည့် စိတ်ဝိညာဉ်စွမ်းအားကို ဟန်ချက်ညီညီ တောင့်ခံထားနိုင်မည် မဟုတ်ပါလော။

လင်းချန်သည် သူ၏ အတွေးများကို ကျူးကော့မင်အား ဝေမျှလိုက်၏။ ကျူးကော့မင်၏ အဆိုအရ လူတစ်ယောက်အတွက် သူ၏ မူလခန္ဓာကိုယ်မှာသာ အလိုက်ဖက်ဆုံးနှင့် အသင့်တော်ဆုံး ဖြစ်သည်။

သို့သော်လည်း ပိုမိုတိကျသည့် အချက်အလက်များကို သိရှိနိုင်ရန်အတွက်မူ ကိုယ်ယောင်ဖျောက်မျိုးနွယ်ဝင် တစ်ဦးအား သုတေသနပြုလုပ်ရန် နမူနာအဖြစ် လိုအပ်ကြောင်း ကျူးကော့မင်က ဆိုသည်။

ထိုစကားကို ကြားလိုက်ရချိန်၌ ကျူးကော့မင်သည် သွေးနက်မျိုးနွယ်ဝင်များကို စမ်းသပ်ခဲ့သကဲ့သို့ပင် ကိုယ်ယောင်ဖျောက်မျိုးနွယ်ဝင် တစ်ဦးအား ဖမ်းဆီးကာ သုတေသနပြုလုပ်ရန် ရည်ရွယ်နေကြောင်း လင်းချန် သဘောပေါက်လိုက်၏။

ကျူးကော့မင်၏ အသံမှာ လင်းချန်၏ စိတ်ထဲ၌ ပဲ့တင်ထပ်သွားသည်။ "အရှင်မင်းကြီး..."

"ကိုယ်ယောင်ဖျောက်မျိုးနွယ်ရဲ့ ခန္ဓာကိုယ် လုယူနိုင်တဲ့ စွမ်းရည်က သူတို့ရဲ့ စိတ်ဝိညာဉ်တွေဟာ မွေးရာပါ အားကောင်းနေတယ်ဆိုတာကို ပြနေတာပါ။"

"ဒါဟာ ရိုးရိုးရှင်းရှင်း အားကောင်းတာမျိုး မဟုတ်ပါဘူး။ ဒါကြောင့် သူတို့ကို သုတေသနပြုဖို့ဆိုရင် အရှင်လတ်လတ် နမူနာတစ်ခုကို ဖမ်းဆီးရပါမယ်။ ဒီလို ရက်စက်ပြီး ကိုယ်ကျိုးရှာတဲ့ မျိုးနွယ်စုအတွက်တော့ စမ်းသပ်ခံရတာဟာ သူတို့အတွက် အကောင်းဆုံး ရလဒ်ဖြစ်မှာပါ။"

"သုတေသန လုပ်ငန်းစဉ်တွေ ပြီးသွားရင်တော့ ဒီမျိုးနွယ်စုကို ကျွန်ပြုပြီး သူတို့ရဲ့ ကျင့်ကြံခြင်း နည်းစနစ်တွေကို ပြုပြင်ပြောင်းလဲပေးသင့်တယ်လို့ ကျွန်တော်မျိုး ယုံပါတယ်။"

"ဒါဟာ ဟွာရှာအင်ပါယာအတွက် အားကိုးရတဲ့ တံတိုင်းကြီးတစ်ခု ဖြစ်လာစေရုံတင်မကဘဲ တခြားမျိုးနွယ်စုတွေအပေါ်မှာလည်း ကြီးမားတဲ့ ကျေးဇူးတရားကို ပြုရာ ရောက်ပါတယ်။"

ကျူးကော့မင်၏ စကားများကြောင့် လင်းချန်မှာ ရယ်ရမလို ငိုရမလို ဖြစ်သွားရသည်။

သူတစ်ပါးအပေါ် စမ်းသပ်မှု ပြုလုပ်ခြင်းကိုပင် ကမ္ဘာကြီးအတွက် ကြီးမားသည့် ကျေးဇူးပြုခြင်းအဖြစ် ပုံဖော်ပြောဆိုနေသော သူ၏ လက်အောက်ငယ်သား၏ လုပ်ရပ်အပေါ် လင်းချန်၌ အတွေးတစ်ခုသာ ရှိသည်။

"ကောင်းလိုက်တဲ့ စကားပဲ။"

အခြားမျိုးနွယ်ဝင်များ၏ ခန္ဓာကိုယ်မှာ ကိုယ်ယောင်ဖျောက်မျိုးနွယ်ထက် ပိုမိုအားကောင်းနေသည်မှာ အမှန်ပင်ဖြစ်၏။

သို့သော် ထိုအားအင်များကို သူတို့သည် ပင်ပန်းဆင်းရဲစွာ ကျင့်ကြံအားထုတ်ပြီးမှသာ ရရှိကြခြင်း ဖြစ်သည်။

ကိုယ်ယောင်ဖျောက်မျိုးနွယ်၏ အပြုအမူမှာ သူခိုးတစ်ယောက်၏ လုပ်ရပ်နှင့် မည်သို့ ကွာခြားပါသနည်း။

ထို့ပြင် သူတို့သည် ရန်သူများ၏ ခန္ဓာကိုယ်ကိုသာ လုယူခြင်း မဟုတ်ဘဲ အခြားမျိုးနွယ်စုများရှိ ပါရမီရှင် လူငယ်များကို ပစ်မှတ်ထားကာ ထိုခန္ဓာကိုယ်များကို အတင်းအဓမ္မ လုယူအသုံးပြုတတ်ကြသေးသည်။

သူတို့သည် အခြားမျိုးနွယ်ဝင်များကို ဖမ်းဆီးကာ သူတို့၏ နယ်မြေအတွင်း၌ ပိတ်လှောင်ထားလေ့ရှိပြီး သူတို့၏ မျိုးဆက်သစ်များ နိဗ္ဗာန်နယ်ပယ်သို့ ရောက်ရှိချိန်၌ လုယူအသုံးပြုရန် အဆင်သင့် စောင့်ဆိုင်းနေတတ်ကြ၏။

ဤသည်မှာ လင်းချန်အနေဖြင့် ကိုယ်ယောင်ဖျောက်မျိုးနွယ်ကို အလွန်အမင်း စက်ဆုပ်ရခြင်း၏ အကြောင်းရင်းပင် ဖြစ်သည်။

တစ်ချိန်တည်းမှာပင် လင်းချန်မှာ လေးနက်စွာ စိုးရိမ်ပူပန်နေမိသည်။ လက်ရှိ အခြေအနေမှာ သူတို့အတွက် သိပ်ပြီး အဆင်မပြေလှကြောင်း သဘောပေါက်ထား၏။

ဤကမ္ဘာငယ်လေး အတွင်းသို့ ဝင်ရောက်လာကြသည့် အရိုးဓားငါးမျိုးနွယ်စုဝင်များမှာ အားလုံး ကိုယ်ယောင်ဖျောက်မျိုးနွယ်ဝင်များ ဖြစ်ကြမည်မှာ သေချာသလောက်ပင်။

ပြန်လည်စဉ်းစားကြည့်လျှင် အရိုးဓားငါးမျိုးနွယ်စု၌ ပုံမှန်မဟုတ်သည့် အချက်အလက်များ ရှိနေသည်မှာ ကြာလှပြီ ဖြစ်သည်။

ဥပမာအားဖြင့် ထောက်လှမ်းရေးသားရဲများမှတစ်ဆင့် စောင့်ကြည့်ချက်များအရ ရှစ်ဆန်းကြယ်ခန်းမ တပည့်များနှင့် တိုက်ခိုက်ခဲ့သည့် လက်တစ်ဖက်ပြတ် အရိုးဓားငါးမျိုးနွယ်ဝင်မှာ သူတို့၏ အမှတ်အသားဖြစ်သော အရိုးဓားကို မသုံးဘဲ ဓားမြှောင်တို မူလလက်နက် ကိုသာ အသုံးပြုခဲ့သည်။

ထိုစဉ်က လင်းချန်၏ ခန့်မှန်းချက်မှာ ထိုသူသည် လက်တစ်ဖက် ပြတ်နေသဖြင့် ပုံမှန် အရိုးဓားငါးမျိုးနွယ်ဝင်များနှင့် တိုက်ခိုက်ပုံ ကွဲပြားနေခြင်းဖြစ်မည်ဟု ထင်မှတ်ခြင်း ဖြစ်သည်။

သူတို့ တွေ့ဆုံခဲ့သည့် အရိုးဓားငါးမျိုးနွယ်စု၏ ခေါင်းဆောင်မှာလည်း အစစ်အမှန် မဟုတ်ဘဲ ကိုယ်ယောင်ဖျောက်မျိုးနွယ်မှ အစွမ်းထက် ပုဂ္ဂိုလ်တစ်ဦးသာ ဖြစ်ပေလိမ့်မည်။

ယုတ္တိဗေဒအရ ကမ္ဘာငယ်လေးတစ်ခုအတွင်း၌ သေခြင်းရှင်ခြင်းနယ်ပယ် ထက် မြင့်မားသည့် မည်သည့်ပုဂ္ဂိုလ်မျှ ပေါ်ထွက်လာခြင်း မရှိနိုင်ပေ။

ယခုအခါ ထိုကဲ့သို့သော အစွမ်းထက် ပုဂ္ဂိုလ်ကြီးတစ်ဦးက သူတို့၏ ဆန့်ကျင်ဘက်၌ ရှိနေပြီဖြစ်ရာ လင်းချန်အနေဖြင့် အလွန်အမင်း သတိထားရန် လိုအပ်လှသည်။

အဘယ်ကြောင့်ဆိုသော် လက်ရှိအချိန်၌ လင်းချန် ဆင့်ခေါ်နိုင်သည့် ဟွာရှာအင်ပါယာ၏ အလယ်အလတ်အဆင့်နှင့် အောက်ခြေအဆင့် စစ်သည်အမျိုးအစားများထဲ၌ သေခြင်းရှင်ခြင်းနယ်ပယ်ကို ကျော်လွန်သော မည်သူမျှ မရှိသေးသောကြောင့်ပင်။

ဟွာရှာအင်ပါယာ၏ အလယ်အလတ်အဆင့် စစ်သည်များသည် အောက်ခြေအဆင့် စစ်သည်များထက် များစွာ ပိုမိုအားကောင်းကြသော်လည်း ထိုအချက်မှာ မြင့်မားသည့် နယ်ပယ်ကြောင့် မဟုတ်ချေ။

အလယ်အလတ်အဆင့် စစ်သည်များ၏ အမြင့်ဆုံး ကျင့်ကြံခြင်းနယ်ပယ်မှာလည်း သေခြင်းရှင်ခြင်း နှလုံးသားနယ်ပယ် သာ ဖြစ်သည်။

သို့သော်လည်း ထိုအလယ်အလတ်အဆင့် စစ်သည်များသည် ဆင့်ကဲပြောင်းလဲထားသည့် စစ်သည်များ ဖြစ်ကြသည်။

အောက်ခြေအဆင့် စစ်သည်များမှာ ဟွာရှာအင်ပါယာ တော်ဝင်တပ်မတော်၏ အခြေခံအကျဆုံး အစိတ်အပိုင်းများ ဖြစ်ကြ၏။

ပိုမိုမြင့်မားသည့် စစ်သည်အမျိုးအစားများကို ဟွာရှာအင်ပါယာရှိ စစ်တပ်အဆောက်အအုံများမှ တိုက်ရိုက် ဖန်တီး၍ မရနိုင်ချေ။

ဟွာရှာအင်ပါယာမှ စစ်သည်များသည် လက်ရှိ၌ သက်ရှိတစ်ပိုင်း လက္ခဏာများကိုသာ ပိုင်ဆိုင်ထားကြသော်လည်း ဤစစ်မှန်သည့် ကမ္ဘာခြား၌ စစ်တပ်စခန်းများမှ စစ်သည်များ ဖန်တီးပုံမှာ သူ၏ ယခင်ဘဝမှ နည်းလမ်းအတိုင်းပင် ဖြစ်သည်။

စစ်တပ်စခန်းများမှ အခြေခံ စစ်သည်အမျိုးအစား ၆ မျိုး ကိုသာ ထုတ်လုပ်နိုင်သည်။

၁။ ဓားစစ်သည် - သူတို့၏ အတတ်ပညာ၌ ကျွမ်းကျင်ကြပြီး ရေရှည်တိုက်ပွဲများကို ခနိုင်ရည် ရှိကြသည်။

၂။ လက်ရုံးစစ်သည် - အဓိကအားဖြင့် ခွန်အားကို အသုံးချကြပြီး အခြေခံ ၆ မျိုးထဲ၌ အသက်အန္တရာယ် အပေးနိုင်ဆုံး ဖြစ်ကြသည်။

၃။ ဒိုင်းစစ်သည် - ကာကွယ်ရေးကို အဓိကထားကြပြီး ခိုင်ခံ့သည့် ခံစစ်ကို တည်ဆောက်နိုင်ကြသည်။

၄။ လေဟုန်စစ်သည် - လျင်မြန်သည့် အရှိန်ရှိကြပြီး ထောက်လှမ်းရေး၊ သူလျှိုလုပ်ငန်းနှင့် လုပ်ကြံသတ်ဖြတ်ရေး တာဝန်များကို ထမ်းဆောင်ကြသည်။

၅။ လေးသည်တော် - အဝေးပစ် စွမ်းရည်ရှိကြပြီး အဝေးမှနေ၍ ရန်သူကို စုပြုံပစ်ခတ် ချေမှုန်းရာ၌ အဓိက ဇာတ်ဆောင်များ ဖြစ်ကြသည်။

၆။ လှံကိုင်စစ်သည် - တပ်ဖွဲ့စနစ်ကို ကျွမ်းကျင်ကြပြီး ရန်သူ့တပ်ဦးကို ထိုးဖောက် ချေမှုန်းရာ၌ အဓိက အင်အားစု ဖြစ်ကြသည်။

အောက်ခြေအဆင့် စစ်သည်များမှာ အိမ်တစ်လုံး၏ အခြေခံအုတ်မြစ်ကဲ့သို့သော ဤ ၆ မျိုးဖြင့် ဖွဲ့စည်းထားခြင်း ဖြစ်၏။ အခြေခံစစ်သည်များမှာ စစ်တပ်စခန်းများသို့ ပြန်လည်ဝင်ရောက်ပြီး အသွင်ပြောင်းလဲမှုများ ပြုလုပ်လိုက်သည့်အခါ သူတို့သည် အလယ်အလတ်အဆင့် စစ်သည်များ အဖြစ်သို့ ဆင့်ကဲပြောင်းလဲသွားကြသည်။

အလယ်အလတ်အဆင့် စစ်သည်များသည် အခြေခံစစ်သည်များ၏ ဆင့်ကဲဖြစ်စဉ်များ ဖြစ်ကြပြီး သူတို့၏ မူလအစပေါ် မူတည်၍ ပိုမိုထူးခြားသည့် လက္ခဏာများနှင့် ကျွမ်းကျင်သော စွမ်းရည်များကို ပိုင်ဆိုင်လာကြ၏။

ဥပမာ - ညအရိပ်စစ်သည် များမှာ လေဟုန်စစ်သည်များမှ ဆင့်ကဲပြောင်းလဲလာသည့် အလယ်အလတ်အဆင့် စစ်သည်များ ဖြစ်ကြသည်။

သူတို့၌ ကာကွယ်ရေးစွမ်းရည် အားနည်းပြီး တိုက်ပွဲ၌ ရေရှည်ခံနိုင်ရည် မရှိသော်လည်း ခြေရာလက်ရာ ဖျောက်ခြင်းနှင့် လုပ်ကြံသတ်ဖြတ်ခြင်းတို့၌မူ အလွန်တရာ ထူးချွန်ကြသည်။

လင်းချန်၏ ယခင်ဘဝ ဂိမ်းအတွင်း၌မူ နည်းပညာကဏ္ဍ၌ သက်ဆိုင်ရာ သုတေသနများကို ပြုလုပ်ပြီးမှသာ အောက်ခြေစစ်သည်များကို ဆင့်ကဲပြောင်းလဲခွင့် ရရှိခြင်း ဖြစ်သည်။

ထို့နောက် နည်းပညာများကို ထပ်မံလေ့လာပြီးနောက် အလယ်အလတ်အဆင့် စစ်သည်များကို စစ်တပ်စခန်းများ၌ အဆင့်မြင့် စစ်သည်များ အဖြစ်သို့ ထပ်မံ ဆင့်ကဲပြောင်းလဲနိုင်ပြီး ပိုမိုထူးခြားသည့် စွမ်းရည်များကို ရရှိစေနိုင်သည်။

နည်းပညာ သုတေသန ပြုလုပ်ရန်အတွက် အချိန်လိုအပ်လှသည်။

လင်းချန်၏ ယခင်ဘဝက လေဟုန်စစ်သည်များကို ညအရိပ်စစ်သည်များအဖြစ် ဆင့်ကဲပြောင်းလဲရန်အတွက် ကစားသမားများသည် လိုအပ်သော ပစ္စည်းများနှင့် စစ်ရေးကျွမ်းကျင်မှုစာအုပ်များကို စုဆောင်းရသည့်အပြင် ဂိမ်းငွေကြေး များကို အသုံးပြုကာ သုတေသနပြုလုပ်ရပြီး လက်တွေ့ဘဝ ၃ ရက်ခန့် ကြာမြင့်လေ့ရှိသည်။

အကယ်၍ သုတေသနကို ချက်ချင်း အပြီးသတ်လိုပါက နည်းလမ်းမှာ ရိုးရှင်းလှ၏။

ထိုနည်းလမ်းမှာ ငွေဖြည့်သွင်းပြီး စိန်များနှင့် လဲလှယ်ကာ ဝယ်ယူခြင်းပင် ဖြစ်သည်။ ကစားသမား အများအပြားမှာ သူတို့၏ ငွေသုံးစွဲနိုင်မှု ကန့်သတ်ချက်ပေါ် မူတည်၍ ဥပမာ - လေဟုန်စစ်သည်များကိုသာ အထူးပြုပြီး လုပ်ကြံသတ်ဖြတ်ရေး နည်းဗျူဟာကို အသုံးပြုခြင်းမျိုးကို ရွေးချယ်တတ်ကြသည်။

အချို့မှာမူ ဒိုင်းနှင့် လှံ နည်းဗျူဟာကို အသုံးပြုကာ ဒိုင်းစစ်သည်များဖြင့် ရန်သူကို ထိန်းထားပြီး လှံစစ်သည်များဖြင့် လျင်မြန်စွာ ထိုးစစ်ဆင်သည့် နည်းလမ်းကို သုံးကြသည်။

နည်းဗျူဟာ အမျိုးမျိုးကို ဖော်ထုတ်နိုင်သည့် ကစားသမားများမှာ အလွန်ကျော်ကြားကြပြီး သူတို့၏ တိုက်ရိုက်ထုတ်လွှင့်မှု များမှာလည်း လူကြိုက်များလှသည်။

သို့သော်လည်း အကျော်ကြားဆုံး တိုက်ရိုက်ထုတ်လွှင့်သူမှာမူ စိတ်အလိုကျ နည်းဗျူဟာ ကို တီထွင်သူ လင်းချန်ပင် ဖြစ်သည်။

စိတ်အလိုကျ နည်းဗျူဟာ ဆိုသည်မှာ မည်သည်နည်း။

လိုအပ်သော ပစ္စည်းများနှင့် ငွေများကို ဂိမ်းကစားခြင်းဖြင့် ကြိုးစားစုဆောင်းရမည် ဖြစ်သော်လည်း စစ်သူကြီးများ၊ ဂိမ်းပစ္စည်းများနှင့် အချိန်မြှင့်တင်မှုများ အားလုံးကိုမူ လက်တွေ့ဘဝ ငွေကြေးဖြစ်သည့် ဟွာရှာငွေကြေး ဖြင့် ဝယ်ယူနိုင်သည်။

ပြိုင်ဘက်ကင်း အင်ပါယာ။ အပိုင်း ၃၀၄ ပြီး။

ဘာသာပြန် - Ko Yoohtoo

True Immortal Team