အခန်း ၃၀၅

ပြိုင်ဘက်ကင်း အင်ပါယာ။ အပိုင်း ၃၀၅

ဘာသာပြန် - Ko YooHtoo

True Immortal Team

လင်းချန်၏ နည်းဗျူဟာမှာ ဝယ်ယူခြင်း၊ ဝယ်ယူခြင်းနှင့် ဝယ်ယူခြင်းသာ ဖြစ်၏။

ယခင်ဘဝက လင်းချန် ဂိမ်းကစားရန် တိုက်ရိုက်ထုတ်လွှင့်လိုက်သည်နှင့် တစ်ပြိုင်နက် ထိုအခန်းအတွင်း၌ လူများဖြင့် ချက်ချင်း ပြည့်နှက်သွားလေ့ရှိသည်။

အဘယ်ကြောင့်ဆိုသော် သူ ဂိမ်းထဲသို့ ဝင်သည်နှင့် ပထမဆုံး လုပ်ဆောင်သည့်အရာမှာ စစ်သူကြီးများကို ဆင့်ခေါ်ခြင်း၊ လိုအပ်သော ပစ္စည်းများကို အမြင့်ဆုံးအထိ ဝယ်ယူခြင်းနှင့် ငွေများကို အသုံးချကာ အရာအားလုံးကို ချက်ချင်း အပြီးသတ်လိုက်ခြင်းတို့ ဖြစ်သောကြောင့်ပင်။

ထို့နောက် တိုက်ခိုက်ခြင်းပင် ဖြစ်၏။

သူသည် အခြားကစားသမားများကို အပြင်းအထန် လိုက်လံစိန်ခေါ်ပြီး အင်ပါယာချင်း တိုက်ပွဲများကို ဆင်နွှဲလေ့ရှိသည်။ အခြားသူများက အင်ပါယာတစ်ခုချင်း တစ်ဦးချင်း တိုက်ခိုက်နေကြချိန်၌ ဟွာရှာအင်ပါယာ၏ လင်းချန်မှာမူ တစ်ယောက်တည်းနှင့် အင်ပါယာ အမြောက်အမြားကို ရင်ဆိုင်လေ့ရှိ၏။

လင်းချန်သည် သူ၏ ယခင်ဘဝ ဂိမ်းအတွင်း၌ နည်းပညာအားလုံးကို အပြီးသတ် သုတေသနပြုနိုင်သည့် ကစားသမား ဆယ်ဦးထဲမှ တစ်ဦးလည်း ဖြစ်သည်။ ကျန်ရှိသော ကိုးဦးမှာမူ သူ ကမ္ဘာခြားသို့ မရောက်ရှိမီ ဆာဗာအချင်းချင်း တိုက်ပွဲ၌ သူ၏ လက်အောက်၌ ရှုံးနိမ့်ကြသူများသာ ဖြစ်ကြ၏။

နည်းပညာအားလုံးကို အပြီးသတ် သုတေသနပြုထားသည့် အင်ပါယာကိုမူ အခြားကစားသမားများက ပြိုင်ဘက်ကင်း အင်ပါယာဟု ခေါ်ဆိုကြသည်။ အဘယ်ကြောင့်ဆိုသော် ဂိမ်းအတွင်း မြှင့်တင်နိုင်သော ကဏ္ဍတိုင်းကို အပြည့်အဝ လုပ်ဆောင်ထားသဖြင့် မည်သည့် ချို့ယွင်းချက်မျှ မရှိသောကြောင့်ပင် ဖြစ်၏။

လက်ရှိအချိန်၌ လင်းချန်သည် သူ၏ စွမ်းအားကို မြှင့်တင်လိုရုံသာမက သူ ဂုဏ်ယူရသည့် ဟွာရှာအင်ပါယာ၏ စစ်မှန်သော ပုံရိပ်ကို ဤလောကကြီးအား ပြသလို၏။ ထို့အပြင် ဤလောက၏ အသိပညာများကို အသုံးချကာ သူ၏ အင်ပါယာကို ပြီးပြည့်စုံပြီး ချို့ယွင်းချက်မရှိအောင် တည်ဆောက်ရန် ရည်မှန်းထားသည်။

အရိပ်မဲ့မျိုးနွယ်စုမှ အမြွှာညီအစ်ကိုနှစ်ဦးသည် အသက်ဘေးမှ လွတ်မြောက်လာသည့် မျိုးနွယ်စုဝင်များနှင့်အတူ သူတို့ဘိုးဘေးများ၏ ခံတပ်ကြီးအတွင်းမှ ထွက်ခွာလာကြ၏။

ဤစမ်းသပ်မှုနယ်မြေအဖြစ် အသုံးပြုသော ကမ္ဘာငယ်လေးမှာ မူလကပင် သူတို့၏ မျိုးနွယ်စုကြီးလေးခုက ပူးတွဲထိန်းချုပ်ထားခြင်းဖြစ်ရာ သူတို့၌ ကမ္ဘာငယ်လေးအတွင်းသို့ ဝင်ရောက်နိုင်သည့် ကိုယ်ပိုင်လမ်းကြောင်းများ ရှိနေကြသည်။

လင်းချန်သည် အမှန်တရားဖော်ထုတ်ဆေးရည်ကို အသုံးပြု၍ ထိုအချက်အလက်များကို အမြွှာညီအစ်ကိုများထံမှ ရရှိထားပြီးဖြစ်၏။ သို့သော် သူတို့၏ တံခါးပေါက် တည်ရှိရာနေရာကို သိထားသော်လည်း ထိုသည်က အသုံးမဝင်ချေ။

အဘယ်ကြောင့်ဆိုသော် ထိုတံခါးပေါက်မှတစ်ဆင့် အပြင်သို့ ထွက်လိုက်ပါက အရိပ်မဲ့မျိုးနွယ်စု၏ အခြေစိုက်စခန်းသို့ တိုက်ရိုက်ရောက်ရှိသွားမည်ဖြစ်ရာ ထိုသို့သွားခြင်းမှာ ကိုယ့်ကိုယ်ကိုယ် သေတွင်းထဲသို့ ဆင်းခြင်းနှင့် မခြားနားသောကြောင့်ပင်။

အမြွှာညီအစ်ကိုထဲမှ အစ်ကိုဖြစ်သူက သူ၏လည်ပင်းအနောက်ဘက်ကို ရုတ်တရက် လှမ်းအုပ်လိုက်သည်။

“ဟမ်… ဒါက ဘာလဲ။”

တစ်စုံတစ်ခုက သူ့ကို ကိုက်လိုက်သကဲ့သို့ ခံစားလိုက်ရသော်လည်း လက်ဖြင့် စမ်းကြည့်လိုက်သည့်အခါ၌မူ မည်သည့်အရာမျှ ရှိမနေချေ။

လမ်းတစ်လျှောက်၌ သူတစ်ယောက်တည်းသာမကဘဲ အခြားသူအမြောက်အမြားမှာလည်း တစ်စုံတစ်ခုက ကိုက်လိုက်သကဲ့သို့ ခံစားရသဖြင့် သူတို့၏ ခန္ဓာကိုယ်ကို မသိစိတ်ဖြင့် ပြန်လည်စမ်းသပ်ကြည့်နေကြ၏။

သို့သော် ထိုခံစားချက်မှာ ခဏချင်းမှာပင် ပျောက်ကွယ်သွားသဖြင့် ပြောပလောက်သည့်အရာမဟုတ်ဟု ထင်မှတ်ကာ မည်သူမျှ ထုတ်မပြောကြပေ။

ထို့နောက် သူတို့သည် ခံတပ်အတွင်းမှ အမြန်ထွက်ခွာလာကြပြီး ဖန်သားကမ္ဘာ အစီအရင်ရှိရာ ပုန်းခိုရာနေရာသို့ ဦးတည်လိုက်ကြသည်။

သူတို့ ကြုံတွေ့ရသမျှကို သခင်လေးအား အစီရင်ခံရန် အလွန်အမင်း အလျင်လိုနေကြ၏။ လင်းချန်၏ အစွမ်းထက်မှုမှာ သခင်လေး၏ အစီအစဉ်များကို ကြီးမားစွာ အကျိုးသက်ရောက်နိုင်သဖြင့် အမြန်ဆုံး အသိပေးရပေလိမ့်မည်။

အမှန်တကယ် သူတို့ကို တုန်လှုပ်စေသည်မှာ လင်းချန်၏ ခွန်အားထက် သူတို့မျိုးနွယ်၏ အမွေအနှစ်ရတနာကို ဖိနှိပ်လိုက်ချိန်၌ ထွက်ပေါ်လာသော အတိုင်းအဆမရှိသည့် အရှိန်အဝါကြီးပင် ဖြစ်၏။

ထိုအရှိန်အဝါမှာ လူတစ်ယောက်ကို အလိုအလျောက် ဒူးထောက်အရှုံးပေးချင်စိတ် ဖြစ်ပေါ်လာစေရန် လုံလောက်သည်။

ထို့ပြင် ရန်သူက သူတို့၏ ခြေရာများကို အချိန်မရွေး ခြေရာခံနိုင်နေခြင်းမှာ မျိုးနွယ်စုအတွင်း၌ သစ္စာဖောက်တစ်ဦး ရှိနေနိုင်သည်ဟု သံသယဝင်စေ၏။ ဤသည်မှာ အလွန်လေးနက်သည့် ပြဿနာဖြစ်သဖြင့် မျိုးနွယ်စုအတွင်းရှိ အဆိပ်အတောက်များကို ဖယ်ရှားနိုင်ရန် သခင်လေးထံ ချက်ချင်း သတင်းပို့ရမည် ဖြစ်သည်။

စိတ်ဓာတ်ကျနေသည့် အရိပ်မဲ့မျိုးနွယ်ဝင် အားလုံးမှာ အမြွှာညီအစ်ကိုများ၏ နောက်မှ လိုက်ပါလာကြ၏။ အဘယ်ကြောင့်ဆိုသော် ပိုင်လင်လီ သေဆုံးပြီးနောက် ထိုညီအစ်ကိုနှစ်ဦးမှာ အဖွဲ့အတွင်း အစွမ်းအထက်ဆုံး ပုဂ္ဂိုလ်များ ဖြစ်နေသောကြောင့်ပင်။

ဖန်သားကမ္ဘာ အစီအရင်သို့ ရောက်ရှိသည့်အခါ အမြွှာညီအစ်ကိုများသည် လေးနက်သော အမူအရာများဖြင့် အစီအရင်အတွင်းသို့ စတင်ခြေလှမ်းလိုက်ကြသည်။ သူတို့ အစီအရင်အတွင်းသို့ ဝင်လိုက်သည်နှင့် ပတ်ဝန်းကျင် ရှုခင်းများမှာ ရုတ်တရက် ပြောင်းလဲသွား၏။

“ဝိန်းးး ဝိန်းးး ဝိန်းးး”

ထိုအသံက သူတို့၏ နားစည်ထဲသို့ တိုးဝင်လာသည်နှင့်တစ်ပြိုင်နက် အမြွှာညီအစ်ကိုနှစ်ဦးအပါအဝင် ကျန်ရှိသည့် မျိုးနွယ်ဝင်များ၏ မျက်နှာပေါ်၌ ထိတ်လန့်တုန်လှုပ်ရိပ်များ ထင်ဟပ်သွားသည်။

သူတို့သည် ဤအသံနှင့် အလွန်တရာ ရင်းနှီးနေကြ၏။ ဤသည်မှာ အစီအရင် စတင်လှုပ်ရှားသည့် အသံပင် ဖြစ်သည်။

အစီအရင်အတွင်းမှ ဓားသွားအလင်းတန်းများ ပေါ်ထွက်လာပြီး သူတို့ထံသို့ ဝှေ့ယမ်းလာသည်ကို မြင်သည့်အခါ အစ်ကိုဖြစ်သူက ရင်ထဲမှ ဒေါသတကြီးဖြင့် အော်ဟစ်လိုက်၏။

“ဒါက ဘယ်လိုဖြစ်နိုင်မှာလဲ။ ဘာလို့ အစီအရင်က အလိုအလျောက် အလုပ်လုပ်နေရတာလဲ။”

သူ၏ ညီဖြစ်သူမှာမူ လုံးဝ ထိတ်လန့်တုန်လှုပ်နေသည်။

ပတ်ဝန်းကျင်ကို ကြောက်ရွံ့စွာ ကြည့်နေမိစဉ် သူ၏ကိုယ်ပေါ်၌ အပြာရောင် စိတ်ဝိညာဉ်စွမ်းအားများမှာ လေဝဲမုန်တိုင်းအလား လှည့်ပတ်လာပြီး စိတ်ဝိညာဉ်ဓားသွားများက သူ့ကို အစိတ်စိတ်အမြွှာမြွှာ မဖြတ်တောက်နိုင်ရန် အသည်းအသန် ကာကွယ်လိုက်၏။

ထိုခဏ၌ အစ်ကိုဖြစ်သူက ကျန်သူများကို အော်ဟစ်သတိပေးကာ သူတို့ ဝင်လာသည့် နောက်ဘက်လမ်းကြောင်းဆီသို့ အရှိန်အဟုန်ဖြင့် ပြန်လည်ပြေးထွက်လိုက်သည်။

“အမြန်ပြေးကြ။”

အခြားသူများမှာလည်း အခြေအနေကို သဘောပေါက်သွားကြပြီး သူ၏နောက်မှ ထွက်ပေါက်ဆီသို့ လိုက်ပါလာကြ၏။

သို့သော်လည်း ဖန်သားကမ္ဘာ အစီအရင် လှုပ်ရှားနေပြီဖြစ်ရာ နောက်ကွယ်ရှိ ထွက်ပေါက်မှာ ပျောက်ကွယ်သွားလေပြီ။ သူတို့မှာ ခေါင်းမပါသည့် ယင်ကောင်များကဲ့သို့ အစီအရင်အတွင်း၌ ထိတ်လန့်တကြား ပြေးလွှားနေကြရသည်။

သူတို့အဖွဲ့မှ အရိပ်မဲ့မျိုးနွယ်ဝင်များသည် ထက်မြက်လှသော ဓားသွားများ၏ ဖြတ်တောက်ခြင်းကို ခံလိုက်ရပြီး တစ်ဦးပြီးတစ်ဦး လဲကျကုန်ကြ၏။

အစ်ကိုဖြစ်သူက သူ၏ ညီဖြစ်သူ၏ ရုပ်ကြွင်းကို ပွေ့ပိုက်ထားလျက် ဝမ်းနည်းခြင်းနှင့် ဒေါသတို့ ပေါင်းစပ်ကာ အော်ဟစ်လိုက်သည်။

“ဘာလို့လဲ… ဘာလို့ ဒီလိုတွေ ဖြစ်နေရတာလဲ။”

ထိုစဉ် သူ၏ နောက်ကျောဘက်မှနေ၍ အစီအရင်အတွင်းရှိ အလင်းဓားသွားတစ်ခုက သူ၏လည်ပင်းဆီသို့ တိုးဝင်လာ၏။ ဤမြင်ကွင်းမှာ ဖန်သားကမ္ဘာ အစီအရင်အတွင်းသို့ ဝင်ရောက်ခဲ့သည့် ထောက်လှမ်းရေးသားရဲ ကြုံတွေ့ရသော ကံကြမ္မာနှင့် ထပ်တူပင် ဖြစ်သည်။

လင်းချန်သည် မျက်မှောင်ကြုတ်လျက် သူ၏ မျက်လုံးအတွင်းမှ စိတ်ဝိညာဉ်စွမ်းအားများကို ပြန်လည်ရုပ်သိမ်းလိုက်၏။

“ဒီဖန်သားကမ္ဘာ အစီအရင်က တကယ်ကို အစွမ်းထက်တာပဲ။ သူ့ရဲ့ အာရုံခံနိုင်စွမ်းကလည်း မဆိုးဘူး။”

အရိပ်မဲ့မျိုးနွယ်စု၏ ရည်ရွယ်ချက်မှာ သူ့ကို သတ်ဖြတ်ရန်ဖြစ်ရာ လင်းချန်မှာလည်း မိုက်မဲသူမဟုတ်ပေ။ သူ့ကို သတ်ရန် ကြိုးစားသူများကို မည်သည့်အကျိုးဆက်မျှ မရှိဘဲ လွှတ်ပေးရန် အဘယ်ကြောင့် စေတနာထားရမည်နည်း။

အရိပ်မဲ့မျိုးနွယ်ဝင်များ ထွက်ခွာသွားချိန်၌ သူတို့၏ အရိပ်များအတွင်း၌ ပုန်းကွယ်နေသည့် ညအရိပ်စစ်သည်များသည် ထက်မြက်သော အပ်များကို အသုံးပြု၍ သွေးကြောအတွင်းသို့ အဆိပ်တစ်မျိုးကို ထည့်သွင်းပေးလိုက်ခြင်း ဖြစ်၏။

ထိုအပ်ဖျား၌ အဆိပ်တစ်မျိုးကို သုတ်လိမ်းထားပြီး ဤသည်မှာ အရိပ်မဲ့မျိုးနွယ်ဝင်များကို ထောက်လှမ်းရေးသားရဲများကဲ့သို့ စွမ်းဆောင်နိုင်စေရန် ပြုလုပ်ပေးသည့် ဆေးရည်ပင် ဖြစ်သည်။

ထိုအဆိပ်ကြောင့် သူတို့၏ မျက်လုံးများမှာ အဆိပ်သင့်ကာ သူတို့ မြင်သမျှနှင့် ကြားသမျှ အရာအားလုံးမှာ ဟွာရှာအင်ပါယာသို့ တိုက်ရိုက် ရောက်ရှိလာခြင်း ဖြစ်၏။

သို့သော် ဤဖန်သားကမ္ဘာ အစီအရင်မှာ အလွန်တရာ အာရုံခံနိုင်စွမ်း မြင့်မားလှသဖြင့် ခန္ဓာကိုယ်အတွင်းရှိ အနည်းငယ်သော ပြောင်းလဲမှုကိုပင် လွယ်ကူစွာ သိရှိသွားခြင်း ဖြစ်သည်။

အစီအရင်သည် ရုတ်တရက် လှုပ်ရှားလာပြီး အရိပ်မဲ့မျိုးနွယ်စုဝင် တစ်ဖွဲ့လုံးကို ရက်ရက်စက်စက် သတ်ဖြတ်လိုက်ခြင်းမှာလည်း သူတို့၏ ခန္ဓာကိုယ်အတွင်းရှိ ပုံမှန်မဟုတ်သည့် အဆိပ်များကို ရှာဖွေတွေ့ရှိသွားသောကြောင့်ပင် ဖြစ်၏။

လင်းချန်သည် မျက်လုံးများကို ခေတ္တမှိတ်ကာ စဉ်းစားပြီးနောက် ခေါင်းကို အကူအညီမဲ့စွာ ခါယမ်းလိုက်သည်။

“တကယ်ကို ရက်စက်တာပဲ။ ကိုယ့်လူမျိုးကိုတောင် ပြန်သတ်တာလား။”

ထို့နောက် ခံတပ်အတွင်းရှိ ကုတင်ပေါ်မှ ထရပ်ကာ အပြင်ဘက်၌ ရပ်နားထားသည့် တော်ဝင်ရထားလုံးဆီသို့ လျှောက်လှမ်းလိုက်၏။

“ဘုန်းးး။”

အစီအရင်ဖြင့် လွှမ်းခြုံထားသည့် ရင်ပြင်တစ်ခုအတွင်း၌ အရိပ်မဲ့မျိုးနွယ်စု၏ သခင်လေးတစ်ဦးက စိတ်ဝိညာဉ်ဝိုင်များ ပြည့်နှက်နေသော ကျောက်စိမ်းပုလင်းကို မြေပြင်ပေါ်သို့ ဒေါသတကြီး ရိုက်ခွဲလိုက်သည်။

ကျောက်စိမ်းကွဲများနှင့် တန်ဖိုးကြီးလှသော ဝိုင်များမှာ အရပ်မျက်နှာ အနှံ့အပြားသို့ လွင့်စင်သွား၏။ ထိုအရိပ်မဲ့မျိုးနွယ်စု လူငယ်၏ မျက်နှာမှာ ဒေါသကြောင့် မှောင်မည်းနေသည်။

သူ၏ လက်အောက်ငယ်သားများက အစီရင်ခံရာ၌ ပြန်လည်ရောက်ရှိလာသည့် အရိပ်မဲ့မျိုးနွယ်စုဝင် တစ်ဖွဲ့ကြောင့် ဖန်သားကမ္ဘာ စိတ်ဝိညာဉ်ဓားသွား အစီအရင်မှာ လှုပ်ရှားလာပြီး သူတို့ကို ရန်သူအဖြစ် သတ်မှတ်ကာ တိုက်ခိုက်သတ်ဖြတ်ခြင်း ဖြစ်ကြောင်း ပြောကြားကြ၏။

အစီအရင်အတွင်းရှိ အလောင်းများထဲ၌ ပိုင်လင်လီကို မတွေ့ရသဖြင့် အပြင်ဘက်၌ သေဆုံးသွားပြီဟု ယူဆရသည်။

ဤအစီအရင်ကို မစီရင်မီကပင် အရိပ်မဲ့မျိုးနွယ်စုဝင်များ၏ အရှိန်အဝါကို မှတ်တမ်းတင်ထားပြီး ဖြစ်ရာ သူတို့ ဖြတ်သန်းသွားချိန်၌ အလိုအလျောက် အသိအမှတ်ပြုပေးရမည် ဖြစ်ပြီး ရန်သူအဖြစ် တိုက်ခိုက်မည် မဟုတ်ပေ။

သို့သော် အစီအရင် လှုပ်ရှားလာရခြင်း၏ တစ်ခုတည်းသော ဖြစ်နိုင်ခြေမှာ သူတို့၏ ကိုယ်သင်းနံ့ ပြောင်းလဲသွားခြင်းကြောင့်သာ ဖြစ်ပေလိမ့်မည်။ သူတို့၏ နာကျင်ခံပြင်းသည့် မျက်နှာထားများကို ကြည့်ရုံဖြင့်ပင် အဘယ်အရာ ဖြစ်ပျက်သည်ကို သူတို့ကိုယ်တိုင်ပင် မသိရှိကြကြောင်း ခန့်မှန်းနိုင်၏။

သို့သော် သခင်လေးကမူ ရန်သူမှာ သူ၏လူများ၏ ခန္ဓာကိုယ်အတွင်း တစ်စုံတစ်ခုကို ကြံစည်လုပ်ဆောင်ထားကြောင်း ရိပ်မိနေပြီ ဖြစ်သည်။

မျိုးနွယ်စု၏ ဆေးဆရာများက အလောင်းများကို စစ်ဆေးကြည့်ပြီးနောက် အစီအရင်၏ သတ်ဖြတ်ခြင်းကို ခံလိုက်ရသူများ၏ သွေးအတွင်း၌ အဆိပ်တစ်မျိုး ရှိနေကြောင်း ကောက်ချက်ချလိုက်ကြ၏။

ထိုအဆိပ်၏ အသေးစိတ် အချက်အလက်များကိုမူ မသိရှိကြချေ။ သို့သော် ထိုသွေးအတွင်းရှိ အဆိပ်သည်ပင် သေဆုံးရခြင်း၏ အဓိက အကြောင်းရင်းဖြစ်ကြောင်းမှာ အသေအချာပင် ဖြစ်သည်။

လက်တစ်ဖက်ပြတ် အရိုးဓားငါးမျိုးနွယ်ဝင်၏ ပုံသဏ္ဌာန်ကို ယူထားသည့် ကိုယ်ယောင်ဖျောက်မျိုးနွယ်ဝင် တစ်ဦးက ရယ်မောလိုက်၏။

“ဟားဟား… အဖွဲ့နှစ်ဖွဲ့တောင် သေသွားပြီပေါ့။ ကြည့်ရတာ မင်းက မင်းနဲ့ ထိုက်တန်တဲ့ ပြိုင်ဘက်နဲ့ တွေ့နေပြီထင်တယ်။”

ထိုအရိပ်မဲ့မျိုးနွယ် လူငယ်မှာမူ တစ်ဖက်လူ၏ လှောင်ပြောင်မှုကို မကြားသယောင် ပြုထားပြီး ရက်စက်ကြမ်းကြုတ်စွာ ရှေ့ဘက်သို့ စိုက်ကြည့်လိုက်သည်။

“ငါ သူ့ကို ဒီကမ္ဘာပေါ် ရောက်လာတဲ့အတွက် နောင်တရသွားအောင် လုပ်ပေးမယ်။ ငါ့လူတွေကို ထိဝံ့တဲ့သူ တစ်ယောက်မှ အသက်ရှင်လျက်နဲ့ သတင်းစကား ပြန်ပြောခွင့် မရစေရဘူး။”

ပြိုင်ဘက်ကင်း အင်ပါယာ။ အပိုင်း ၃၀၅ ပြီး။

ဘာသာပြန် - Ko Yoohtoo

True Immortal Team