အခန်း ၇၃

အခန်း(၇၃) အကုန်အစင် ဖျက်ဆီးခြင်း

နောက်ထပ် တစ်စုံတစ်ခု ကျကျန်ခဲ့သေးသလား။

ဆေးဘုရင်၏ နတ်ဘုရားကျမ်း ၊ ဤသည်မှာ တောင်ပေါ်မှ 'အဆိပ်လက် ဆေးဘုရင်' ဝူချန် ရေးသားထားသော ကျမ်းစာဖြစ်ပေမလား

ဤကျမ်းစာမှာ အနည်းငယ် အသုံးဝင်တန်ရာသည်။

ယခုအခါ အဆင့်(၄) သိုင်းဆရာကြီး ဖြစ်နေသော်လည်း အဆိပ်အားလုံးကို ခုခံနိုင်စွမ်း မရှိသေးချေ။ ဆေးဘုရင်၏ နတ်ဘုရားကျမ်းထဲမှ အဆိပ်အတောက်များမှာ ကျွမ်းကျင်သူများအတွက် အသုံးမဝင်သော်လည်း ၎င်းအတွင်း၌ ပါဝင်သော ဆေးပညာမူဝါဒများမှာမူ အထောက်အကူ ဖြစ်စေဦးမည်။

ဆေးဘုရင်၏ နတ်ဘုရားကျမ်းကို ကျွမ်းကျင်အောင် သင်ယူပြီးနောက် ဤလောကထဲမှ ဆေးပညာနှင့် အဆိပ်အတောက်ဆိုင်ရာ ကျမ်းစာအချို့ကို ရှာဖွေရရှိပါက လျင်မြန်စွာပင် အစပြုနိုင်မည် ဖြစ်သည်။

"သူ သေပြီ"

"ဒုတိယခေါင်းဆောင် သေသွားပြီ"

ရွှေရောင်သဲ ဓားပြအဖွဲ့ဝင် တစ်ယောက်သည် ကျိုးဝူရွှင်း၏ ပြူးကျယ်နေသော မျက်လုံးများအနီးသို့ လက်ချောင်းကို ကပ်ကြည့်လိုက်ရာ အလွန်အမင်း ထိတ်လန့်သွားပြီး အကြိမ်ကြိမ် နောက်သို့ ဆုတ်ခွာသွား၏။ သူ၏ မျက်ဝန်းတို့မှာ ကြောက်ရွံ့မှုဖြင့် ပြည့်နှက်နေသည်။

သူတို့၏ ဒုတိယခေါင်းဆောင်မှာ အဆင့်(၅) ကျွမ်းကျင်သူ တစ်ယောက် ဖြစ်သည်။ ခေါင်းဆောင်ကြီး ကိုယ်တိုင်ပင်လျှင် ဒုတိယခေါင်းဆောင်ကို တစ်ချက်တည်းဖြင့် သတ်ဖြတ်နိုင်မည် မဟုတ်ချေ။

တည်းခိုခန်း၏ ပထမထပ်တွင် ရှိနေကြသော အခြားသူတို့မှာလည်း ထိုနည်းအတိုင်းပင် ဖြစ်ကြပြီး မယုံကြည်နိုင်စရာ ဖြစ်နေကြသည်။

ရွှေရောင်သဲ ဓားပြအဖွဲ့၏ ဒုတိယခေါင်းဆောင် 'ပျံလွှားဝံပုလွေ ဓားသမား' မှာ သဲကန္တာရတစ်လျှောက် နှစ်ပေါင်းများစွာ မွှေနှောက်နေခဲ့သူ ဖြစ်သော်လည်း ယခုတော့ ဤနေရာတွင်ပင် သေဆုံးသွားရပြီလား။

ဤလူကား မည်သူနည်း။

'သဲကန္တာရ လူသားဝံပုလွေ' တိန်းဟန်သည် သူ၏ သံတုတ်ကြီးကို တင်းတင်းဆုပ်ကိုင်ထားပြီး ရှောင်ပီလီကို စိုက်ကြည့်ကာ လေးနက်သော အသံဖြင့် ဆိုလိုက်သည်။

"မင်းက ဘယ်သူလဲ"

"ငါတို့ကြားမှာ ရန်ငြိုးရန်စ ရှိတာ မဟုတ်ဘူး မဟုတ်လား"

သူသည် ရှောင်ပီလီကို စိုက်ကြည့်ရင်း နဂါးနှင့်ကျားစာရင်းဝင် ပါရမီရှင်များကို စိတ်ထဲတွင် ပြန်လည် အမှတ်ရရန် ကြိုးစားနေသော်လည်း သူ၏ အရှေ့တွင် ရှိနေသူနှင့် ကိုက်ညီမှု တစ်စုံတစ်ရာ မရှိပေ။

ထိုသို့သော ငယ်ရွယ်သည့် ပါရမီရှင်တစ်ယောက်ကို သူ ဘယ်သောအခါကမှ မစော်ကားခဲ့ဖူးဟု သူ ယုံကြည်နေသည်။

ရန်ငြိုးရှိသည် ဖြစ်စေ၊ မရှိသည် ဖြစ်စေ အရေးမကြီးပေ။ ရှောင်ပီလီ ခေါင်းခါ၍ ရယ်မောလိုက်သည်။

ဒီကာလအတွင်း မင်းတို့ဟာ ကုန်သည်ယာဉ်တန်းတွေကို မကြာခဏ တိုက်ခိုက်ပြီး သူတို့ထဲက အမျိုးသမီးတွေနဲ့ ကလေးတွေကိုပါ သတ်ဖြတ်ခဲ့တယ်။ ဒါဟာ ကျောချင်းယွင် ချမှတ်ထားတဲ့ စည်းမျဉ်းတွေကို ဖောက်ဖျက်တာပဲ။ ငါ မလုပ်ရင်တောင် မင်းတို့ ဆက်ပြီး အသက်ရှင်နေနိုင်မှာ မဟုတ်ဘူး။

ငါ့လက်ချက်နဲ့ သေရတာကိုပဲ အလေအလွင့် မရှိဘူးလို့ သတ်မှတ်လိုက်တော့။

ယန်နယ်မြေမှာ မြေပြင်အများစုမှာ သဲကန္တာရ ဖြစ်ပြီး ကျောချင်းယွင်မှာ ယန်နယ်မြေ၏ သဲကန္တာရဘုရင် ဖြစ်သည်။ ကျောချင်းယွင်၏ စည်းမျဉ်းများကြောင့်သာ ကုန်သည်ယာဉ်တန်းများက အဆုံးမရှိသော သဲကန္တာရအတွင်း ကုန်သွယ်ရဲခြင်း ဖြစ်သည်။

ရွှေရောင်သဲ ဓားပြအဖွဲ့၏ လွန်ခဲ့သော နှစ်လအတွင်း ပြုမူချက်များမှာ ကျောချင်းယွင်၏ စည်းမျဉ်းများကို ချိုးဖောက်နေသည်မှာ ထင်ရှားသည်။

စကားပြောပြီးသည်နှင့် ရှောင်ပီလီ၏ ခန္ဓာကိုယ်မှာ လျှပ်စီးအလား ပြောင်းလဲသွားပြီး 'သဲကန္တာရ လူသားဝံပုလွေ' တိန်းဟန်ဆီသို့ ပြေးဝင်သွားသည်။

"ငါကို နူးညံ့တဲ့ အသားစလို့ ထင်နေတာလား"

တိန်းဟန်မှာ ဒေါသတကြီး ဟိန်းဟောက်လိုက်သည်။

သူသည် ခန္ဓာကိုယ်ကြံ့ခိုင်မှု ပညာရပ်ကို အစွမ်းကုန် ထုတ်သုံးလိုက်ရာ ကြွက်သားများ ဖောင်းကြွလာပြီး သွေးကြောများပင် ထောင်မတ်လာသည်။ ပေါင်ချိန်သုံးရာနီးပါး ရှိသော သံတုတ်ကြီးတွင် စစ်မှန်သော ချီစွမ်းအင်များ ဖုံးလွှမ်းသွားပြီး တောင်ကြီးပြိုကျလာသကဲ့သို့ ရှောင်ပီလီဆီသို့ အားပြင်းစွာဖြင့် ရိုက်ချလိုက်သည်။

သံတုတ် မရောက်မီကပင် ကြောက်မက်ဖွယ်ကောင်းသော ချီလှိုင်းများ ထွက်ပေါ်လာပြီး တည်းခိုခန်း ပထမထပ်ရှိ စားပွဲ၊ ကုလားထိုင်များကို အပိုင်းပိုင်း ဖြစ်စေသည်။

လူတိုင်းမှာ ထိုချီလှိုင်းများထဲသို့ ဆွဲသွင်းခံရမည်ကို စိုးရိမ်သဖြင့် အလိုအလျောက်ပင် နှစ်လှမ်းခန့် နောက်သို့ ဆုတ်လိုက်ကြသည်။

ရှောင်ပီလီ၏ မျက်နှာအမူအရာမှာ ပြောင်းလဲခြင်း မရှိပေ။ သံတုတ်ကြီး ကျရောက်လာချိန်တွင် ဝဇီရလက်ချောင်းပညာကို လျှပ်စီးကဲ့သို့ ထိုးထုတ်လိုက်သည်။

သံတုတ်နှင့် ဝဇီရလက်ချောင်း ထိမိသွားသည်။

တိုးဝင်သော အသံတစ်ခု ထွက်ပေါ်လာသည်။

တိန်းဟန်မှာ မတွန်းလှန်နိုင်သော ကြီးမားသည့် စွမ်းအားကိုသာ ခံစားလိုက်ရသည်။ သံတုတ်ကြီးမှာ လက်ထဲမှ လွတ်ထွက်သွားပြီး နောက်သို့ လွင့်စဉ်သွားသည်။

တိန်းဟန်၏ နောက်တွင် ရပ်နေသော ရွှေရောင်သဲ ဓားပြအဖွဲ့ဝင် အချို့မှာ လွင့်လာသော သံတုတ်ကြီးနှင့် ထိမိကာ အရိုးများ ကျိုး၊ အကြောများ ပြတ်သွားကြသည်။ သူတို့၏ ခန္ဓာကိုယ်များမှာ နောက်သို့ လွင့်စဉ်သွားပြီး မေ့မြောခြင်း မဖြစ်ခင်မှာပင် အလင်းရောင်များ ပျောက်ကွယ်သွားသည်ဟု ခံစားလိုက်ရသည်။

ကျင့်ကြံမှုအမှတ် + 1000

ကျင့်ကြံမှုအမှတ် + 500

---

ယှဉ်ပြိုင်လို့ မရဘူး။

တိန်းဟန်၏ စိတ်ထဲတွင် အတွေးတစ်ခု ပေါ်လာသော်လည်း နောက်သို့ မဆုတ်ရသေးမီမှာပင် လက်ချောင်းတစ်ခုမှာ သူ၏ ရင်ဘတ်ပေါ်သို့ ကျရောက်သွားသည်။

တိန်းဟန်မှာ လတ်ဆတ်သော သွေးများကို အန်ထုတ်လိုက်ပြီး ကျောဘက်မှလည်း သွေးများ စီးကျလာသည်။

လက်ချောင်း၏ စွမ်းအားမှာ သူ၏ ခန္ဓာကိုယ်ကြံ့ခိုင်မှု ပညာရပ်ကို ကျော်လွန်ကာ ရင်ဘတ်ကို ထိုးဖောက်သွားခဲ့သည်။

တိန်းဟန်မှာ မကျေနပ်မှုများစွာဖြင့် နောက်သို့ ဖြည်းညှင်းစွာ လဲကျသွားသည်။

[ကျင့်ကြံမှုအမှတ် + 4000]

ပြေးကြ။

ကျန်ရှိနေသော ရွှေရောင်သဲ ဓားပြအဖွဲ့ဝင်များထဲမှ တစ်ယောက်က အော်ဟစ်လိုက်ရာ အားလုံးမှာ တည်းခိုခန်း၏ ပင်မတံခါးဝသို့ ရူးသွပ်စွာဖြင့် တိုးဝင်သွားကြသည်။

လမ်းဖယ်ပေးကြ၊ ငါ့ကို မပိတ်နဲ့။

တည်းခိုခန်းပိုင်ရှင်က အော်ဟစ်လိုက်သည်။ သူသည် တိန်းဟန်၏ ဘေးတွင် ရပ်နေခဲ့သည်။ တိန်းဟန် သေဆုံးသွားချိန်တွင် အပြင်သို့ ထွက်ပြေးရန် ကြိုးစားခဲ့သော်လည်း ပင်မတံခါးမှာ ထွက်ပြေးနေသည့် ဓားပြများကြောင့် ပိတ်ဆို့နေသည်။

သူ၏ မျက်လုံးများထဲတွင် ရက်စက်သော အကြည့်တစ်ခု ဖြတ်ပြေးသွားသည်။ သူသည် စစ်မှန်သော ချီစွမ်းအင်ကို စုစည်းကာ လမ်းပိတ်နေသူအား လက်ဝါးဖြင့် ရိုက်ထုတ်လိုက်သည်။

"မင်း"

ရှေ့တွင် ရှိနေသူမှာ ပြင်းထန်သော လေတိုးသံကိုသာ ခံစားလိုက်ရသည်။ သူသည် ခေါင်းလှည့်ကြည့်လိုက်ရာ တည်းခိုခန်းပိုင်ရှင် ဖြည်းညှင်းစွာ လဲကျသွားသည်ကို မြင်လိုက်ရသည်။ ပိုင်ရှင် လဲကျသွားစဉ်တွင် ခေါင်းဆောင်ကြီးကို သတ်ဖြတ်သည့် သူ၏ မျက်နှာကို မြင်လိုက်ရသည်။

"သတ်"

ရှောင်ပီလီ၏ မျက်ဝန်းတို့မှာ ဝမ်းနည်းခြင်း၊ ပျော်ရွှင်ခြင်း ကင်းမဲ့နေပြီး ပြင်းထန်သော လက်ချောင်းစွမ်းအင်ကို ထုတ်လွှတ်လိုက်သည်။

[ကျင့်ကြံမှုအမှတ် + 1000]

ရှောင်ပီလီ လက်ချောင်း ထိုးထုတ်တိုင်းတွင် ကြောက်မက်ဖွယ်ကောင်းသော စွမ်းအားမှာ လူအများ၏ ခန္ဓာကိုယ်ကို တိုက်ရိုက် ထိုးဖောက်သွားသည်။

အသက်ရှူချိန် သုံးကြိမ်အတွင်း တိန်းဟန်နှင့်အတူ ပါလာသော ဓားပြတစ်ဒါဇင်ခန့်မှာ အလောင်းများ ဖြစ်သွားကြသည်။ အဝေးဆုံး ပြေးနိုင်သူပင် တံခါးဝမှ နှစ်မီတာခန့်သာ လွတ်မြောက်ခဲ့ပြီး အလောင်း ဖြစ်သွားရသည်။

သေသွားပြီ။

'သဲကန္တာရ လူသားဝံပုလွေ' တိန်းဟန် သေသွားပြီလား။

တည်းခိုခန်းထဲမှ လူတို့မှာ မယုံကြည်နိုင်စွာဖြင့် ကြည့်နေကြသည်။

အခုလေးတင် ဖြစ်ပျက်ခဲ့သမျှမှာ အိပ်မက်တစ်ခုနှင့် တူနေသည်။ ဤလူငယ် သူရဲကောင်း လှုပ်ရှားလိုက်သည့်အချိန်မှစ၍ တည်းခိုခန်းအတွင်းမှ ဓားပြများ အကုန်အစင် ဖျက်ဆီးခံလိုက်ရသည်အထိမှာ အသက်ရှူချိန် အနည်းငယ်မျှသာ ကြာမြင့်သည်။

လှုပ်ရှားသူမှာ အသက်နှစ်ဆယ်ကျော်အရွယ်သာ ရှိပုံရသည်။

ထိုသို့သော စွမ်းအားမျိုးမှာ နဂါးနှင့်ကျားစာရင်းတွင် မပါဝင်နိုင်ပါကလည်း အလွန်နီးစပ်နေမည်မှာ သေချာသည်။

သို့သော်လည်း သူတို့မှာ ယခုအခါ ဆူးပေါ်တွင် ထိုင်နေရသကဲ့သို့ မတည်မငြိမ် ဖြစ်နေကြသည်။

ဤသူသည် ရွှေရောင်သဲ ဓားပြအဖွဲ့ဝင် အများအပြားကို သတ်ဖြတ်ပြီးပြီ ဖြစ်ရာ သူတို့အပေါ် တိုက်ခိုက်လာပါကလည်း အံ့ဩစရာ မရှိပေ။

ရန်ငြိုးမရှိသော်လည်းပဲ။

ထွက်သွားကြ။

ရှောင်ပီလီ တည်းခိုခန်းထဲမှ လူများကို တစ်ချက်ကြည့်ကာ တည်ငြိမ်စွာ ဆိုလိုက်သည်။

လူတိုင်းမှာ သက်ပြင်းချနိုင်သွားကြသည်။ သူတို့သည် ရှောင်ပီလီကို လက်ယှက်ကာ အရိုအသေပြုပြီးနောက် ပင်မတံခါးမှတစ်ဆင့် လျင်မြန်စွာ ထွက်ခွာသွားကြသည်။

သို့သော် ရှန်ဟွိုက်နှင့် ရှန်ယွမ်တို့မှာ မထွက်ခွာကြပေ။

အခုလေးတင် ဤလူက သူတို့အတွက် ရောက်လာခြင်း ဖြစ်ကြောင်း ပြောခဲ့ပြီး ရွှေရောင်သဲ ဓားပြအဖွဲ့ကို ဖျက်ဆီးခြင်းမှာ ဘေးထွက်အကျိုးကျေးဇူးသာ ဖြစ်သည်။

ရှောင်ပီလီ ခြေလှမ်းလိုက်ပြီး ဓားပြတစ်ယောက်၏ သံမဏိဓားကို ကောက်ယူကာ တိန်းဟန်နှင့် ကျိုးဝူရွှင်းတို့၏ ခေါင်းများကို ဖြတ်ထုတ်လိုက်ပြီး သူယူလာသော အနက်ရောင်အထည်ဖြင့် ထုပ်ပိုးလိုက်သည်။

ဤသည်တို့မှာ ငွေများ ဖြစ်သည်။

ထိုအလုပ်များကို လုပ်ပြီးနောက် ရှောင်ပီလီ ရှန်ဟွိုက်နှင့် ရှန်ယွမ်တို့ကို ကြည့်ကာ တည်ငြိမ်စွာ ဆိုလိုက်သည်။

စကားအရ ပြောရရင် ငါက မင်းတို့ရဲ့ ကျေးဇူးရှင်ပဲ။ ရွှေရောင်သဲ ဓားပြအဖွဲ့ကို မသတ်ခဲ့ရင် မင်းတို့ ဒီနေ့ လွတ်မြောက်နိုင်မှာ မဟုတ်ဘူး။

ငါက ကွေ့ယွမ်ကျမ်း အတွက် ရောက်လာတာ။

ပေးအပ်လိုက်ရင် ငါတို့ အသီးသီး လမ်းခွဲကြမယ်၊ အကုန်လုံး အဆင်ပြေသွားလိမ့်မယ်။

ရှန်ဟွိုက်သည် ရှန်ယွမ်ကို သူ၏ နောက်သို့ ကွယ်ပေးထားပြီး ရှောင်ပီလီကို လက်ယှက်ကာ ဆိုလိုက်သည်။

ကွေ့ယွမ်ကျမ်း ကျွန်တော်တို့ဆီမှာ မရှိပါဘူး။

ရှောင်ပီလီ မျက်မှောင်ကြုတ်လိုက်ရာ ရှန်ဟွိုက်မှာ အလိုအလျောက်ပင် တစ်ဝက်မျှ နောက်သို့ ဆုတ်လိုက်သည်။

ဦးလေးဟွိုက်။

ရှန်ယွမ်မှာ ရှန်ဟွိုက်၏ နောက်မှ ထွက်လာပြီး ခါးသီးစွာ ပြုံးလိုက်သည်။

"ဦးလေးဟွိုက်၊ ဒီလို လုပ်စရာ မလိုပါဘူး။"

"ကွေ့ယွမ်ကျမ်းက ဖုန်းယင်းစံအိမ်ထဲမှာပဲ ရှိသေးတာပါ။ ကျွန်တော်တို့ မပြောပြရင်တောင် အနာဂတ်မှာ ရဖို့ အခွင့်အရေး ရှိမှာ မဟုတ်ဘူး"

"အဲဒီ ရေသူ ယင်းထောင် လက်ထဲ ရောက်သွားတာထက်စာရင် ဒီအစ်ကိုကြီး လက်ထဲ ရောက်သွားတာက ပိုကောင်းပါတယ်။"

"လျှို့ဝှက်ကျမ်းက ဖုန်းယင်းစံအိမ်ရဲ့ ဘိုး‌ဘေးခန်းမ ရဲ့တိုင်ကန့်လန့်ကြီး‌ ပေါ်၌ ရှိပါတယ်။ အဖေတစ်ယောက်တည်း သိတဲ့ လျှို့ဝှက်သေတ္တာ တစ်ခု ရှိတယ်။ အဖေ အဆိပ်ခတ်ခံရပြီးနောက် ကျွန်တော့်ကို ပြောပြခဲ့ပေမဲ့ ကွေ့ယွမ်ကျမ်းကို မထိန်းသိမ်းနိုင်မှန်း သိလို့ မယူခဲ့တာပါ။

အခု ဖုန်းယင်းစံအိမ်က ယင်းထောင် လက်ထဲ ရောက်နေပြီ၊ ကွေ့ယွမ်ကျမ်းကို သူတို့ ရှာတွေ့မတွေ့တော့ မသိဘူး။

ရှိသည် ဖြစ်စေ၊ မရှိသည် ဖြစ်စေ သွားကြည့်ရင် သိရမှာပေါ့။ ရှောင်ပီလီ တည်ငြိမ်စွာ ဆိုလိုက်သည်။

မင်းတို့ ငါ့နဲ့ လိုက်ခဲ့၊ ကွေ့ယွမ်ကျမ်းကို တွေ့တာနဲ့ မင်းတို့ကို လွှတ်ပေးမယ်။