အခန်း ၂၈၉

အခန်း (၂၈၉) အထူးတာဝန်နှင့် အထူးဆုလာဘ်

ရွှီယန်က တဲထဲတွင် လှဲလျောင်းနေသော်လည်း ချက်ချင်း အိပ်မပျော်သေးချေ။

ဒီနေ့ အတွေ့အကြုံများက တကယ်ကို စိတ်ဝင်စားဖို့ ကောင်းပေသည်။ ဝက်ဝံမည်းနှင့် မျောက်များကို တွေ့ရသည်ကို အသာထားလိုက်ဦးမည်။ ရတနာမြှုပ်နှံထားသည့် နေရာတစ်ခုကို ရှာတွေ့ရခြင်းကပင် သူ့ကို အတော်လေး စိတ်လှုပ်ရှားစေခဲ့သည်။

ချန်ပိုင်တောင်တန်း ခြေရင်းရှိ လယ်ယာခြံဝင်း ပိုင်ရှင်လေး တစ်ယောက်က အလွန် ဆန်းကြယ်သော အဖြစ်အပျက်များစွာကို ကြုံတွေ့ခဲ့ရသည်။

ရတနာရှာဖွေရေး သံလိုက်အိမ်မြှောင်နှင့် စနစ်တို့ ရှိလာပြီးနောက်ပိုင်း အရာအားလုံးက မတူညီတော့သလို ခံစားရသည်။

ယနေ့ တစ်နေကုန် တောင်ပေါ်တက်ခဲ့ရသဖြင့် အနည်းငယ် ပင်ပန်းနေသော ရွှီယန်က တဖြည်းဖြည်း တည်ငြိမ်သွားပြီးနောက် နှစ်နှစ်ခြိုက်ခြိုက် အိပ်ပျော်သွားတော့သည်။

နောက်တစ်နေ့တွင် ရွှီယန်က စောစောစီးစီး နိုးလာသည်။

သေချာ ပြင်ဆင်ပြီးနောက် သူက ရတနာရှာဖွေရေး တာဝန်ကို ဆက်လက် လုပ်ဆောင်ရန် ရည်ရွယ်လိုက်သည်။

မည်သို့ပင်ဆိုစေ ဤသည်က ထိုင်ဝမ် ကျွန်း၏ တောင်တန်းများဆီသို့ လာရခြင်း၏ အဓိက အကြောင်းရင်းပင် ဖြစ်၏။

တိုက်ရိုက်ထုတ်လွှင့်မှုကိုလည်း ပုံမှန်အတိုင်း ဖွင့်ထားလိုက်သည်။

အင်တာနက်သုံးစွဲသူများက တိုက်ရိုက်ထုတ်လွှင့်မှုထဲသို့ ဝင်ရောက်လာသည်နှင့် ပထမဆုံး စပြောကြသည်။

[လောင်ရွှီ... မင်း အသက်ရှင်နေတာ တွေ့ရလို့ တကယ်ကို ဝမ်းသာတယ်]

[အသက်ရှင်နေသေးတာပဲ... ငါတော့ ကိစ္စပြတ်ပြီ ထင်နေတာ]

ရွှီယန်က မှတ်ချက်များကို တစ်ချက် ကြည့်လိုက်ပြီး အင်တာနက်သုံးစွဲသူများ၏ စကားများကို မြင်သောအခါ အားကိုးရာမဲ့စွာ ပြုံးလိုက်ပြီး ပြောလိုက်သည်။

"အားလုံးပဲ စိတ်ပူပေးကြလို့ ကျေးဇူးတင်ပါတယ်ဗျာ... မနက်ခင်းပါ"

တိရစ္ဆာန်များ၏ နေထိုင်မှု ပုံစံက လူများနှင့် အလွန် ကွာခြားလှပေသည်။

ဤအချိန်တွင် လှုပ်ရှားသွားလာရန် ထွက်လာသော တိရစ္ဆာန် အချို့ ရှိနေသေးသည်။

ဥပမာအားဖြင့် ယုန်များ၊ ကြွက်များ ကဲ့သို့သော သတ္တဝါများက နေဝင်ချိန်နှင့် နံနက်စောစောပိုင်း အချိန်များတွင် လှုပ်ရှားသွားလာရသည်ကို အနှစ်သက်ဆုံး ဖြစ်သည်။ ထိုအချိန်များတွင် အပူချိန် အတော်လေး နိမ့်ကျပြီး အလွန်အမင်း မပူပြင်းသဖြင့် လှုပ်ရှားသွားလာရာတွင် ပိုမို သက်သောင့်သက်သာ ရှိသောကြောင့် ဖြစ်၏။

ရွှီယန်က ခဏမျှ လမ်းလျှောက်ပြီးနောက် ရတနာရှာဖွေရေး တာဝန်ကို လဲလှယ်ရန် ရွေးချယ်လိုက်သည်။

[ရတနာရှာဖွေရေး တာဝန်ကို နှိုးဆွလိုက်ပါပြီ... ရှာဖွေခြင်း၊ ပျောက်ဆုံးနေသော အုံကျားသစ်]

[တာဝန် ဖော်ပြချက်... ထိုင်ဝမ်တွင် အုံကျားသစ်များ မျိုးတုံးသွားပြီဟု ယူဆထားကြပါသည်။ ကျေးဇူးပြု၍ ဇာတ်လိုက်က အုံကျားသစ်ကို ရှာဖွေပြီး အတူတကွ ဆဲလ်ဖီ ရိုက်ယူပါ]

[တာဝန် ဆုလာဘ်... အလိုအလျောက် သက်ဝင်စွမ်းရည် - အအေးဒဏ် ခံနိုင်ရည်]

[ဇာတ်လိုက်၏ အအေးဒဏ် ခံနိုင်ရည်ကို တိုးမြှင့်ပေးမည်ဖြစ်ပြီး လှုပ်ရှားမှု ပြုလုပ်ချိန်တွင် ပိုမို ထိရောက်မှု ရှိမည် ဖြစ်သည်။ သို့သော် စွမ်းအင် ကုန်ခမ်းမှုကို ပိုမို မြန်ဆန်စေမည် ဖြစ်သည်]

ထိုအချိန်တွင် တာဝန် မျက်နှာပြင် ပေါ်ထွက်လာသည်။

'အုံကျားသစ် ထပ်ဖြစ်နေပြန်ပြီ... တော်တော်လေး ရေစက်ပါတာပဲ'

ရွှီယန်က ပြုံးရင်း တွေးလိုက်သည်။

ထိုင်ဝမ်၏ နိုင်ငံတော်အဆင့် တစ် ကာကွယ်ရမည့် တိရစ္ဆာန်များ အားလုံးထဲတွင် အုံကျားသစ်က အရှားပါးဆုံး ဖြစ်ပြီး ဤဘက်ရှိ အုံကျားသစ်များက မျိုးစိတ်ကွဲ အသစ်တစ်ခု ဖြစ်ပေသည်။

သို့သော် သူတို့၏ သားမွေးများက အလွန် လှပလွန်းသဖြင့် လူများ၏ အလွန်အကျွံ အမဲလိုက်ခြင်းကို ခံခဲ့ရပြီး ဆယ်စုနှစ် အနည်းငယ် အတွင်းမှာပင် အုံကျားသစ် အရေအတွက်က အလွန်အမင်း လျော့ကျသွားခဲ့သည်။ ၂၀၁၃ ခုနှစ်တွင်တော့ ထိုင်ဝမ် အုံကျားသစ် မျိုးတုံးသွားပြီ ဖြစ်ကြောင်း ကြေညာခဲ့၏။

နောက်ပိုင်းတွင် အုံကျားသစ် ၏ လှုပ်ရှားမှုများကို တွေ့မြင်ခဲ့ရသူ အချို့ ရှိပြီး ဤဘက်တွင် အုံကျားသစ်များ ရှိနေသေးကြောင်း ညွှန်ပြနေသော်လည်း အတည်ပြုနိုင်ခြင်း မရှိခဲ့ချေ။

'ဒီကောင်လေးတွေ မျိုးမတုံးသေးဘူးပဲ... ဒါပေမဲ့ တိုက်ရိုက်ထုတ်လွှင့်မှုကြောင့် သူတို့ကို သွားမနှောင့်ယှက်ချင်ဘူး... ဒီတစ်ခေါက်တော့ လိုက်ဖ် မလွှင့်တော့ဘူး'

ရွှီယန်က စိတ်ထဲတွင် တွေးလိုက်သည်။

အုံကျားသစ် ကိုတော့ ရှာရမည်သာ ဖြစ်သည်။

ထို့အပြင် နောက်ဆက်တွဲ ဘာတွေ ဆက်ဖြစ်လာမည်ကိုလည်း ရွှီယန် သိသည်။

သူက မျိုးတုံးသွားပြီ ဖြစ်သော အုံကျားသစ် ကို ရှာတွေ့ပါက သေချာပေါက် ထိုင်ဝမ်တွင် ရေပန်းစားသွားမည် ဖြစ်ပြီး သတင်းများက နေရာအနှံ့ ပျံ့နှံ့သွားမည် ဖြစ်၏။ ထို့နောက် သက်ဆိုင်ရာ ဌာနများက အုံကျားသစ် ကို လာရောက် ရှာဖွေကြမည် ဖြစ်ပြီး တစ်ဖက်တွင် သုတေသန ပြုလုပ်ရန်နှင့် အခြား တစ်ဖက်တွင် ကာကွယ်ပေးရန် ဖြစ်ပေလိမ့်မည်။

သို့သော် ဤသည်က အုံကျားသစ် အတွက်တော့ သတင်းကောင်း ဖြစ်မည် မဟုတ်ချေ။

ယူနန် ဘက်တွင် ရှိစဉ်က အုံကျားသစ် ကို ရိုက်ကူးပြသခြင်းက ပြဿနာ မရှိပေ။ အကြောင်းရင်းမှာ ထိုနေရာတွင် အုံကျားသစ် များ ရှိနေကြောင်း လူတိုင်း သိထားကြပြီး နိုင်ငံတော်ကလည်း သူတို့ကို ကာကွယ်ပေးထားပြီး ဖြစ်သောကြောင့်ပင်။

သို့သော် ဤဘက်တွင်တော့ မျိုးတုံးသွားပြီ ဖြစ်သော တိရစ္ဆာန်များ ပြန်လည် ထွက်ပေါ်လာခြင်းက အလွန် ကြီးမားသော အဓိပ္ပာယ် ရှိပြီး လူအများ၏ အာရုံစိုက်မှုကလည်း ပိုမို မြင့်မားလာမည် ဖြစ်၏။

'သူတို့လည်း အာရုံစိုက် ခံရတာကို သဘောကျမှာ မဟုတ်ဘူး... ဒီအာရုံစိုက်မှုတွေကို ယူစရာ မလိုပါဘူး'

ရွှီယန်က စိတ်ထဲတွင် ဆုံးဖြတ်ချက် ချလိုက်သည်။

စနစ်က အုံကျားသစ် လှုပ်ရှားသွားလာသည့် အကြမ်းဖျင်း ဧရိယာကို ပြသပေးထားသည်။

ယခုအခါ အုံကျားသစ် များက မျိုးဆက် တစ်ခုပြီး တစ်ခု လက်ဆင့်ကမ်းလာကြရာ အလွန် သတိကြီးလာကြပြီး လူသားများ အပေါ် အမြင့်ဆုံး သတိထားမှုကို ထိန်းသိမ်းထားကြပေသည်။

ပုံမှန်အားဖြင့် လူများက သူတို့ကို မြင်တွေ့နိုင်မည် မဟုတ်ချေ။

သို့သော် ရွှီယန်တွင် "အုံကျားသစ်၏ နှစ်သက်မှု" ဟူသော စွမ်းရည် ရှိသဖြင့် သူက အုံကျားသစ် များကို ထွက်ပေါ်လာစေနိုင်သည့် လက်တစ်ဆုပ်စာ လူများထဲမှ တစ်ယောက် ဖြစ်နိုင်ပေသည်။

သို့သော် ဤကဲ့သို့သော စွမ်းရည်က ဆိုးရွားသော အကျိုးဆက်များကို ဖြစ်ပေါ်စေနိုင်၏။

"ဒရုန်းက နည်းနည်း ပြဿနာ ရှိနေတယ်... ကျွန်တော် တစ်ချက် စစ်ဆေးလိုက်ဦးမယ်... ခဏနေမှ အားလုံးကို ပြန်ပြီး လိုက်ဖ်လွှင့်ပေးမယ်နော်... သိပ်မငြိမ်သလို ဖြစ်နေလို့ပါ"

ထိုအချိန်တွင် ရွှီယန်က ဒရုန်း ကင်မရာကို မော့ကြည့်ကာ အင်တာနက်သုံးစွဲသူများကို ပြောလိုက်သည်။

ကင်မရာက မငြိမ်မသက် ဖြစ်နေသည်ကို အားလုံး သတိမထားမိကြသော်လည်း ရွှီယန်က လိုက်ဖ် ပိတ်လိုက်ပြီ ဖြစ်ရာ အားလုံးလည်း အခြား ဗီဒီယိုများကိုသာ ဆက်လက် ကြည့်ရှုနေလိုက်ကြတော့၏။

ရွှီယန်က ဒရုန်းကို သိမ်းဆည်းလိုက်ပြီး အထဲသို့ ဆက်လက် ဝင်ရောက်သွားခဲ့သည်။

ယခုတစ်ကြိမ်တွင်တော့ သူ တစ်ယောက်တည်းသာ တောအုပ်ထဲတွင် လမ်းလျှောက်နေပြီး သူ ဘယ်နေရာ ရောက်နေကြောင်းကို ဘယ်သူမှ မသိနိုင်တော့ချေ။

တကယ်တမ်းတွင် တောနက်ထဲ၌ လိုက်ဖ်လွှင့်ခြင်းက ပို၍ စိတ်ဝင်စားဖို့ ကောင်းပြီး စည်ကားနေသည့် ခံစားချက်ကို ရရှိစေသည်။ တောနက်ထဲတွင် တစ်ယောက်တည်း လမ်းလျှောက်နေရပါက အနည်းငယ်တော့ အထီးကျန်ဆန်ပေလိမ့်မည်။

ရွှီယန်က အထဲသို့ ဆက်လက် ဝင်ရောက်သွားခဲ့သည်။

သူက အုံကျားသစ် များ လှုပ်ရှားသွားလာသည့် ဧရိယာသို့ ရောက်ရှိလာခဲ့ပြီ ဖြစ်၏။

ထိုင်ဝမ် အုံကျားသစ် ကို ထိုင်ဝမ်၏ အဖိုးတန်ဆုံး တောရိုင်း တိရစ္ဆာန် အဖြစ် သတ်မှတ်ထားပြီး အဆင့် တစ် နေရာတွင် အမြဲတမ်း ရပ်တည်နေခဲ့သည်။

သို့သော် ယခုအခါ မျိုးတုံးသွားပြီ ဖြစ်ကြောင်း ကြေညာထားခဲ့ပြီး ဖြစ်၏။

ရွှီယန်က နေရာတွင် ရပ်ကာ ပတ်ဝန်းကျင်ကို လှည့်ပတ် ကြည့်ရှုလိုက်သည်။

ထိုအချိန်မှာပင် သစ်ပင်ပေါ်တွင် ပုန်းအောင်းနေသော ကောင်လေး တစ်ကောင်က ရွှီယန်ကို သတိထားမိသွား၏။

၎င်းက အနည်းငယ် တွန့်ဆုတ်နေသလို သိချင်စိတ်လည်း ပြည့်နေသည်။

ရွှီယန်၏ ခန္ဓာကိုယ်မှ ပြောပြ၍မရသော ရင်းနှီးမှု တစ်ခု ထွက်ပေါ်နေပေသည်။

နောက်ဆုံးတွင် အုံကျားသစ်လေးက သိချင်စိတ်ကို မထိန်းချုပ်နိုင်တော့ဘဲ သစ်ပင်ပေါ်မှ သတိကြီးစွာဖြင့် တဖြည်းဖြည်း ဆင်းလာခဲ့သည်။

ရွှီယန်ကလည်း ၎င်းကို သတိထားမိသွား၏။

သူက အုံကျားသစ်လေးကို လက်ခုပ်တီးပြကာ အနားသို့ လာရန် အချက်ပြလိုက်သည်။

ရွှီယန်၏ မျက်ဝန်းများထဲတွင် စိတ်လှုပ်ရှားမှုများ ပေါ်လွင်နေ၏။

တကယ်ပဲ အသက်ရှင်နေတဲ့ အုံကျားသစ် ရှိနေတာပဲ...

ဤကျွန်းပေါ်တွင် အုံကျားသစ်များ မျိုးတုံးသွားပြီ ဟူသော သတင်းကို ကြားရချိန်တိုင်း စိတ်ထဲတွင် အမြဲတမ်း ဖိစီးမှုများ ခံစားခဲ့ရသည်။

သို့သော် စနစ်က အုံကျားသစ်များ အသက်ရှင်နေသေးကြောင်း သတိပေးလာသည့် သတင်းက အလွန် စိတ်လှုပ်ရှား တက်ကြွဖွယ် ကောင်းလှပေသည်။

ယခုအခါ ရွှီယန် ကိုယ်တိုင် မျက်မြင်ကိုယ်တွေ့ မြင်တွေ့လိုက်ရသောအခါ ထိုခံစားချက်က ပို၍ပင် ထူးခြားဆန်းကြယ်နေတော့၏။

အုံကျားသစ်လေးက ရွှီယန်ကို တစ်ချက် ကြည့်လိုက်ပြီးနောက် ဖြည်းဖြည်းချင်း တစ်လှမ်းချင်းစီ လျှောက်လာသည်ကို တွေ့လိုက်ရသည်။

ဤမြင်ကွင်းကို ဘယ်သူမှ မမြင်တွေ့ခဲ့ရချေ။

အကယ်၍ တစ်ယောက်ယောက်ကသာ တွေ့သွားပါက သေချာပေါက် ရေပန်းစားသွားမည့် မြင်ကွင်းမျိုးပင် ဖြစ်၏။

ထိုင်ဝမ်တွင် မျိုးတုံးသွားပြီ ဖြစ်သော တန်ဖိုးကြီး အုံကျားသစ် ကို တွေ့ရှိရခြင်းက အလွန် အမှတ်တရ ဖြစ်စေမည့် အရာပင် ဖြစ်သည်။

သို့သော် ဤသည်က လူသားများ အတွက်သာ အဓိပ္ပာယ် ရှိပြီး အုံကျားသစ် အတွက်တော့ သေချာပေါက် သတင်းဆိုး တစ်ခုပင် ဖြစ်ပေလိမ့်မည်။

အုံကျားသစ်က ရွှီယန်၏ အနားသို့ ရောက်လာပြီး ရွှီယန်၏ လက်ပေါ်တွင် ပွတ်သီးပွတ်သပ် လုပ်နေတော့သည်။

ရွှီယန်ကလည်း ၎င်းကို အလိုက်သင့် ပွတ်သပ်ပေးလိုက်ရာ အလွန် ချောမွေ့နေကြောင်း ခံစားလိုက်ရ၏။

သူတို့၏ သားမွေးများက တကယ်ကို ကောင်းမွန်လှသည်။ အရောင်အသွေးက လှပပြီး အလွန် နူးညံ့ကာ အနွေးဓာတ်လည်း အပြည့်အဝ ပေးစွမ်းနိုင်ပေသည်။

ထိုအကြောင်းရင်းကြောင့်ပင် သူတို့က အလွန်အကျွံ အမဲလိုက် ခံခဲ့ရခြင်း ဖြစ်၏။

"ကြောင်မျိုးရင်းဝင် တိရစ္ဆာန်လေးတွေက ချစ်စရာ ကောင်းတာပဲ"

ရွှီယန်က အုံကျားသစ် ကို ကြည့်ကာ မနေနိုင်ဘဲ ချီးကျူးလိုက်မိသည်။

"မင်း သေချာ အသက်ရှင်အောင် နေပါ... ဒီနေရာမှာ ဘယ်သူမှ လာမနှောင့်ယှက်ဘူးဆိုတော့ အေးအေးချမ်းချမ်း နေလို့ ရပါတယ်"

ရွှီယန်က ၎င်းကို ပွတ်သပ်ပေးရင်း ပြောလိုက်သည်။

အုံကျားသစ် က နားလည်လား မလည်ဘူးလား မသိသော်လည်း ရွှီယန်၏ ပွတ်သပ်ပေးမှုကိုတော့ သာယာနေပုံ ရ၏။

အချိန်အကြာကြီး ထိတ်လန့်တကြား အသက်ရှင် နေထိုင်ခဲ့ရသော်လည်း ရွှီယန်၏ အနားတွင်တော့ သူက လုံခြုံသည်ဟု ရှားရှားပါးပါး ခံစားလိုက်ရသည်။

အကြီးအကဲ တစ်ယောက်၏ ကာကွယ်ပေးမှုကို ခံရသည့် ခံစားချက်မျိုးပင်။

ရွှီယန်ကလည်း ခရီးဆက်ရန် မလောသေးဘဲ ၎င်းနှင့်အတူ ခဏမျှ ဆော့ကစားနေလိုက်သည်။

စနစ်က သူ တာဝန် ပြီးဆုံးသွားပြီ ဖြစ်ကြောင်း သတိပေးလာပြီး ရွှီယန်လည်း အအေးဒဏ် ခံနိုင်ရည် စွမ်းရည်ကို ရရှိသွားခဲ့၏။

ဤစွမ်းရည်က သူ့ကို သာမန်လူများထက် အအေးဒဏ် ပိုမို ခံနိုင်ရည် ရှိစေရုံသာ ဖြစ်ပြီး အရမ်းကြီး လွန်ကဲလွန်းမည် မဟုတ်သဖြင့် ချမ်းသင့်လျှင်တော့ ချမ်းနေမည်သာ ဖြစ်သည်။

ရွှီယန်က အုံကျားသစ် နှင့် အချိန်အကြာကြီး ဆော့ကစားနေလိုက်သည်။

အချိန် တော်တော်လေး ရသွားပြီဟု ထင်သောအခါမှ ရွှီယန်က ဆက်လက် ထွက်ခွာရန် ပြင်ဆင်လိုက်၏။

"ကဲ... ငါ သွားတော့မယ်... ရေစက်ရှိရင် ပြန်တွေ့ကြတာပေါ့... သေချာ အသက်ရှင်အောင် နေနော်"

သူက အုံကျားသစ် ကို အသားခြောက် အနည်းငယ် ကျွေးလိုက်ပြီးနောက် ၎င်း၏ ခေါင်းလေးကို ပွတ်သပ်ပေးကာ ထထွက်လာခဲ့သည်။

အုံကျားသစ်က ရွှီယန်၏ ကျောပြင်ကို ငေးကြည့်နေပြီးနောက် ပတ်ဝန်းကျင်ကို သတိကြီးစွာဖြင့် ထပ်မံ အကဲခတ်လိုက်ကာ သစ်ပင်ပေါ်သို့ အလျင်အမြန် ပြေးတက်သွားပြီး မိမိကိုယ်ကို ပြန်လည် ပုန်းကွယ်လိုက်တော့၏။

လူတစ်ယောက်နှင့် ကျားသစ် တစ်ကောင်တို့၏ အဖြစ်အပျက်ကို သစ်တောကြီး တစ်ခုတည်းကသာ မျက်မြင်သက်သေ အဖြစ် ရှိနေတော့သည်။

နာရီဝက်ခန့် လမ်းလျှောက်ပြီးသော အခါမှသာ ရွှီယန်က တိုက်ရိုက်ထုတ်လွှင့်မှုကို ပြန်လည် ဖွင့်လိုက်သည်။

အရာအားလုံးက ပုံမှန်အတိုင်းပင် ဖြစ်ပြီး ဘာတွေ ဖြစ်ပျက်သွားခဲ့သည်ကို အားလုံးက ရှင်းရှင်းလင်းလင်း မသိကြချေ။

ဤသစ်တောကြီးက ယခင်အတိုင်းပင် ထူထပ်နေဆဲဖြစ်ပြီး တောရိုင်းပန်း အများအပြား ပွင့်လန်းနေကာ ခြင်နှင့် ပိုးကောင်များလည်း အလွန် ပေါများပြီး တစ်ခါတရံ အဆိပ်ရှိသော မြွေများပင် ပတ်ဝန်းကျင်တွင် ပြေးလွှားသွားတတ်ကြသည်။

မွန်းတည့်ချိန်သို့ ရောက်လုနီးပါး ဖြစ်လာပြီ ဖြစ်ရာ ရွှီယန်က ခေါင်းပေါ်မှ ချွေးများကို သုတ်ကာ ပြောလိုက်၏။

"ဒီနေရာက နွေးနွေးစိုစို ရှိတော့ အပင်တွေက ပိုပြီး ထူထပ်တယ်... ဒါပေမဲ့ ကပ်ပါးကောင်တွေ... ခြင်တွေ ပိုးကောင်တွေလည်း ပိုများတယ်... အဲဒါကြောင့် သစ်တောထဲမှာ အချိန်အကြာကြီး နေရင် ကပ်ပါးကောင်တွေ ကူးစက်ခံရဖို့ အရမ်း လွယ်တယ်..."

"ဒါက အတော်လေး အန္တရာယ် များတယ်နော်..."

"တချို့ သစ်တောတွေကျတော့ လေဝင်လေထွက် ကောင်းပြီး ခြောက်သွေ့တော့ အဲဒီထဲမှာ အချိန်အတော်ကြာ နေရင်တောင် ဘာမှမဖြစ်ဘူး... ဘာဆိုးကျိုးမှ မရှိဘူး..."

"ဥပမာ ဆိုက်ဘေးရီးယား လို နေရာမျိုးမှာဆိုရင် လယ်ယာခြံဝင်းတွေက သစ်တောထဲမှာ ရှိပြီး တောင်သူတွေက ကောင်းကောင်းမွန်မွန် နေထိုင်နိုင်ကြတယ်လေ..."

"ဒါပေမဲ့ ဒီလိုနေရာမျိုးမှာ လယ်ယာခြံဝင်း တစ်ခု ရှိမယ် ဆိုရင်တော့ မကြာခင်မှာ လူတွေရော တိရစ္ဆာန်တွေပါ ဖျားနာကြတော့မှာ သေချာတယ်..."

"ကပ်ပါးကောင်တွေက တကယ်ကို ကြောက်စရာ ကောင်းလွန်းလို့ပါ..."

ရွှီယန်က ပန်းပွင့် တစ်ပွင့်ပေါ်တွင် ဝပ်နေသော ဧရာမ ခူကောင်ကြီး တစ်ကောင်ကို မြင်သောအခါ မျက်မှောင်ကြုတ်လိုက်ပြီး အခြား တစ်ဖက်မှ ရည်ရွယ်ချက် ရှိရှိ ရှောင်ကွင်း သွားလိုက်သည်။

အင်တာနက်သုံးစွဲသူများက သစ်တော၏ မမြင်ရသော အန္တရာယ်များကို သတိပြုမိသွားသောအခါ ရွှီယန်ကို ပို၍ လေးစားသွားကြတော့၏။

[လောင်ရွှီ... မင်းမို့လို့သာ ဒီလို ဝင်ရဲတာ... သာမန်လူဆိုရင် ဘယ်သူက ဝင်ရဲမှာလဲ]

[နွေးနွေးစိုစို ရှိတဲ့ သစ်တောတွေထဲမှာ သတိထားရမယ်... နည်းနည်းလေး မှားတာနဲ့ ဒုက္ခရောက်နိုင်တယ်]

[ရှုခင်းကတော့ တကယ် လှတယ်... ဒါပေမဲ့ ငါသာ အထဲရောက်နေရင် စိတ်ထဲမှာ သေချာပေါက် ကြောက်နေမိမှာ]

[သာမန်လူဆိုရင် ကြောက်လို့ ဒူးတောင် ညွတ်သွားလောက်ပြီ]

ရွှီယန်က မြေပုံကို တစ်ချက် ကြည့်လိုက်ရာ သူက တောင်နက် ဧရိယာထဲတွင် ရှိနေဆဲ ဖြစ်ကြောင်း တွေ့လိုက်ရသည်။

သူက အတော်လေး ညီညာသော လမ်းကြောင်း တစ်ခုကို ရှာတွေ့ပြီး တောင်ပေါ်လမ်း အတိုင်း အပြင်သို့ ထွက်ရန် ရည်ရွယ်လိုက်၏။

ထို့နောက် ရွှီယန်က နောက်ဆုံး အကြိမ် ရတနာရှာဖွေရေး တာဝန်ကို လဲလှယ်ရန် ရွေးချယ်လိုက်သည်။

[ရတနာရှာဖွေရေး တာဝန် နှိုးဆွလိုက်ပါပြီ... အတူ ဓာတ်ပုံရိုက်သည့် တာဝန် - ထိုင်ဝမ် သစ်ပင်ဖား]

[တာဝန် ဖော်ပြချက်... မြစ်ကမ်းဘေးတွင် ထိုင်ဝမ် သစ်ပင်ဖားကို ရှာဖွေပြီး သစ်ပင်ဖား ၅ ကောင်နှင့် အတူတကွ ဓာတ်ပုံရိုက်ပါ]

[တာဝန် ဆုလာဘ်... ဖားသား ဟင်းလျာ ချက်ပြုတ်နည်း နှင့် အခြောက်ခံထားသော ဆီးနှင်းဖား ၅၀ ကောင်]

ရွှီယန်က ရတနာရှာဖွေရေး တာဝန်ကို မြင်သောအခါ မနေနိုင်ဘဲ ပြုံးလိုက်မိသည်။

တာဝန်က အတော်လေး စိတ်ဝင်စားဖို့ ကောင်းပေသည်။ ထိုင်ပေ သစ်ပင်ဖားနှင့် အတူတကွ ဓာတ်ပုံရိုက်ရမည်ဖြစ်ပြီး ဆုလာဘ်ကတော့ အရှေ့မြောက်ဒေသမှ ဆီးနှင်းဖားများ ဖြစ်၏။

ဘာပဲဖြစ်ဖြစ် အကုန်လုံးက ဖားတွေချည်းပါပဲလေ...

ယခုအခါ ဆီးနှင်းဖား များကို အရှေ့မြောက်ဒေသတွင် အကြီးအကျယ် မွေးမြူနေကြပြီး တန်ဖိုးကလည်း အလွန် ကြီးမားလှသည်။ အထူးသဖြင့် တောင်ပိုင်းမှ သူဌေးများက အလွန် ဝယ်ယူလိုကြသဖြင့် စီးပွားရေးက အမြဲတမ်း ကောင်းမွန်နေခဲ့၏။

ရွှီယန် ကိုယ်တိုင်ကတော့ ဆီးနှင်းဖားများကို မွေးမြူရန် မရည်ရွယ်ထားချေ။ မည်သို့ပင်ဆိုစေ သူက ချစ်စရာ ကောင်းသော တိရစ္ဆာန်များကိုသာ နှစ်သက်သည် မဟုတ်ပါလော။

မည်သို့ပင်ဖြစ်စေ တာဝန်ကိုတော့ ပြီးဆုံးအောင် လုပ်ရမည်သာ ဖြစ်သည်။

ရွှီယန်က သစ်ပင်ဖားများကို ထပ်မံ ရှာဖွေလိုက်ပြန်၏။

ထိုင်ဝမ် သစ်ပင်ဖား ကလည်း အကာအကွယ်ပေးထားသော မျိုးစိတ်များ ဖြစ်ပြီး ဖားလောကတွင် ရုပ်ရည် မဆိုးလှသဖြင့် အတူတကွ ဆဲလ်ဖီ ရိုက်ခြင်းကလည်း အဆင်ပြေလှပေသည်။

တာဝန်က သိပ်မခက်ခဲလှသဖြင့် ရွှီယန်က အလွန် လွယ်ကူစွာပင် ပြီးမြောက်သွားခဲ့သည်။

ယခုအချိန်တွင်တော့ ရတနာရှာဖွေရေး သံလိုက်အိမ်မြှောင် ၏ အကြိမ်ရေများက ယနေ့ အသစ် ထပ်တိုးလာသော တစ်ကြိမ်သာ ကျန်ရှိတော့၏။

ရွှီယန်က ရတနာရှာဖွေရေး သံလိုက်အိမ်မြှောင် ကို အသုံးပြု၍ ရတနာများကို ထပ်မံ နေရာရှာဖွေလိုက်ရာ တောရိုင်း နွားချိုမှိုပင် အပေါ်မှ ဧရာမ နွားချိုမှို နှစ်ပွင့်ကို ရှာတွေ့ခဲ့သည်။

နွားချိုမှို က ထိုင်ဝမ်၏ သီးသန့် မှိုတစ်မျိုး ဖြစ်ပြီး ဈေးနှုန်း အလွန် ကြီးမားလှပေသည်။

ရွှီယန်က နွားချိုမှိုများကို ရှာတွေ့သည်ကို မြင်သောအခါ မှတ်ချက်များက ထပ်မံ ပွက်လောညံသွားပြန်၏။

[တကယ့် တောတောင်ရှာဖွေသူ ပါလား... ထိုင်ဝမ် မှာတောင် တောထွက်ပစ္စည်းတွေ ရှာတွေ့နိုင်တာပဲ]

[ဝါး... တောရိုင်း နွားချိုမှို တွေပဲ... ဒါက အရမ်း ကောင်းတဲ့ ပစ္စည်းတွေနော်]

[လောင်ရွှီ ရဲ့ ဒီရတနာရှာတဲ့ စွမ်းရည်က တကယ်ကို နောက်နေတာ မဟုတ်ဘူးပဲ]

[ဒီနေ့လည်း ရသလောက် ယူလာပြန်ပြီ]

တိုက်ရိုက်ထုတ်လွှင့်မှု လေထုက ယခင်အတိုင်းပင် ကောင်းမွန်နေဆဲ ဖြစ်သည်။

အရင်ကလိုပင် ရွှီယန်က တောင်ကြီးများထဲတွင် ရှားပါး ရတနာများကို အမြဲတမ်း ရှာတွေ့နိုင်စွမ်း ရှိပေသည်။

ရွှီယန်က တည်ငြိမ်စွာပင် လက်ပြလိုက်ပြီး ပြုံးကာ ပြောလိုက်၏။

"ကံကောင်းလို့ပါ... အကုန်လုံးက ကံကောင်းလို့ပါ..."

"အားလုံး သိကြတဲ့အတိုင်းပဲ... ကျွန်တော့် ကံက အမြဲတမ်း ကောင်းတတ်တယ်လေ…”