အခန်း ၈၂၂

အခန်း ၈၂၂ - ရွေးချယ်ခံရသူမှ နတ်ဘုရားရတနာ လူသားအင်ပါယာဓားကို ရရှိခြင်း (အပိုင်း - ၂)

"ရေတွက်လို့မရနိုင်တဲ့ မိစ္ဆာတွေက ဟင်းလင်းပြင် နယ်ပယ် တစ်ခုလုံးကို တံမြက်လှည်းသလို ဝင်ရောက် တိုက်ခိုက်ခဲ့ကြတယ်။"

"ငါတို့ အစွမ်းကုန် ခုခံခဲ့ကြပေမယ့်၊ ဒီမိစ္ဆာတွေကို မအနိုင်ယူနိုင်ခဲ့ကြဘူး။"

"နောက်ဆုံးမှာတော့ ငါတို့ရဲ့ နည်းလမ်းတွေ အားလုံး ကုန်ခမ်းသွားတဲ့အထိ တိုက်ခိုက်ပြီးမှ အင်အားစုကြီးတွေက ဒီမိစ္ဆာစစ်တပ်ကို နောက်ဆုတ်သွားအောင် ပြုလုပ်နိုင်ခဲ့ကြတယ်။"

"ဒါပေမယ့် ဒါက ခါးသီးတဲ့ အောင်ပွဲတစ်ခု သက်သက်ပဲ။"

"အကယ်လို့ နတ်ဘုရားနယ်ပယ်က အဲဒီမိစ္ဆာတွေသာ ပြန်လည် အားကောင်းလာပြီး နောက်တစ်ကြိမ် ထပ်ရောက်လာခဲ့ရင်၊ ဟင်းလင်းပြင် နယ်ပယ်က နောက်ထပ် ကမ္ဘာပျက် ကပ်ဘေးကြီးတစ်ခုနဲ့ ရင်ဆိုင်ရတော့မှာပဲ။ အဲဒီအချိန်ကျရင် အစွမ်းထက် ပုဂ္ဂိုလ်ကြီးတွေ အများကြီး မရှိတော့တဲ့ ဟင်းလင်းပြင် နယ်ပယ်က သေချာပေါက် ပျက်စီးရတော့မှာပဲ။"

သက်ကြီးရွယ်အို တာအိုကျင့်ကြံသူ ယွမ်ချင်းက တိတ်ဆိတ်စွာ ပြောလိုက်သည်။

ရှေးဟောင်းခေတ် ကာလတွင် ဟင်းလင်းပြင် နယ်ပယ် ပျက်စီးသွားရခြင်းမှာ မိစ္ဆာကပ်ဘေးကြောင့် ဖြစ်ကြောင်း သူက ညွှန်ပြနေခြင်း ဖြစ်သည်။

တောက်ပခဲ့သော ကျင့်ကြံခြင်း ယဉ်ကျေးမှုကြီးမှာ နတ်ဘုရားနယ်ပယ်မှ ကြောက်မက်ဖွယ်ကောင်းသော မိစ္ဆာများ၏ လက်ချက်ဖြင့် ပျက်စီးသွားခဲ့ရသည်။

ကျင့်ကြံသူများ ရေတွက်၍မရနိုင်အောင် ကျဆုံးခဲ့ရ၏။

စစ်မှန်သော ဝိညာဉ်များပင်လျှင် မိစ္ဆာများ၏ လက်ချက်ဖြင့် လွတ်မြောက်နိုင်ခြင်း မရှိဘဲ စိတ်မကောင်းဖွယ်ကောင်းစွာ သေဆုံးခဲ့ကြရသည်။

သူတို့သည် ကြီးမားသော တန်ဖိုးများကို ပေးဆပ်ပြီး မိစ္ဆာ အမြောက်အမြားကို မောင်းထုတ်နိုင်ခဲ့သော်ငြား၊

ဤသည်မှာ ရှောင်လွှဲ၍မရနိုင်သော ကိစ္စရပ်ကို နှောင့်နှေးစေရုံ သက်သက်သာ ဖြစ်ပြီး၊ ကမ္ဘာပျက် ကပ်ဘေးကြီးကို အနာဂတ် တစ်နေ့ဆီသို့ ရွှေ့ဆိုင်းလိုက်ရုံသာ ဖြစ်ပေသည်။

မည်သို့ပင်ဆိုစေ နတ်ဘုရားနယ်ပယ်မှ မိစ္ဆာများသည် နောက်ဆုံး တစ်နေ့တွင် သေချာပေါက် ပြန်လည် ရောက်ရှိလာကြမည် ဖြစ်သည်။

ထိုအချိန်သို့ ရောက်သောအခါ၊ ဟင်းလင်းပြင် နယ်ပယ်ရှိ မည်သူကမျှ ပြင်ပလောကမှ ဤမျှလောက် များပြားသော မိစ္ဆာများကို တောင့်ခံနိုင်စွမ်း ရှိမည် မဟုတ်ချေ။

"ရှေးဟောင်းခေတ် ကာလ ပျက်စီးသွားခဲ့ရတာက တကယ်ပဲ မိစ္ဆာကပ်ဘေးကြောင့်လား။"

ဤစကားကို ကြားလိုက်ရသောအခါ ကျန်းဖန်၏ ရင်တွင်း၌ ပိုမို ဇဝေဇဝါ ဖြစ်မသွားဘဲ မနေနိုင်တော့ချေ။ သို့သော် သူ၏ ရင်တွင်း၌ သံသယများ ပြည့်နှက်နေသော်ငြား မေးမြန်းခြင်း မပြုသေးဘဲ တစ်ဖက်လူ၏ စကားများ ပြီးဆုံးသွားမည့် အချိန်ကို တိတ်ဆိတ်စွာ စောင့်ဆိုင်းနေလိုက်သည်။

"ဒါပေမယ့် မင်း အရမ်းကြီး စိုးရိမ်နေစရာ မလိုပါဘူး။"

"ရှေ့မှာရှိတဲ့ ဓားကို မင်း မြင်လား။"

"ဒါက ငါတို့ ထိုက်ရွှိဂိုဏ်းက ချန်ရစ်ခဲ့တဲ့ အရန် အစီအစဉ်ပဲ။"

"ပြီးတော့ နောင်လာနောက်သားတွေ အတွက် ငါတို့ ချန်ရစ်ခဲ့တဲ့ နောက်ဆုံး လက်နက်တွေထဲက တစ်ခုလည်း ဖြစ်တယ်။"

"သူက နတ်ဘုရားနယ်ပယ်က ဆင်းသက်လာတဲ့ နတ်ဘုရားဓားတစ်လက် ဖြစ်ပြီး 'လူသားအင်ပါယာဓား' လို့ နာမည်ကြီးတယ်။"

တာအိုကျင့်ကြံသူ ယွမ်ချင်းက ရှေ့ရှိ ကြောက်မက်ဖွယ်ကောင်းသော ဓားကို လက်ညှိုးထိုးပြကာ ၎င်း၏ ဇာစ်မြစ်ကို ရှင်းပြလိုက်သည်။ ၎င်းမှာ ထိုက်ရွှိဂိုဏ်းက ကံကြမ္မာပါလာသူအတွက် ပြင်ဆင်ပေးခဲ့သော နောက်ဆုံး လက်နက် တစ်ခုလည်း ဖြစ်ပေသည်။

"နတ်ဘုရားရတနာ လူသားအင်ပါယာဓား ဟုတ်လား။"

"ဒါက တကယ်ကြီး နတ်ဘုရားရတနာ တစ်ခုလား။"

ကျန်းဖန်၏ သူငယ်အိမ်များ ကျုံ့ဝင်သွားပြီး ရင်တွင်း၌ အလွန်အမင်း တုန်လှုပ်သွားခဲ့သည်။

သူ့တွင်လည်း မှော်ရတနာ အများအပြား ရှိသော်ငြား၊ အားလုံးမှာ နတ်ဘုရားရတနာ အဆင့်အောက်တွင်သာ ရှိကြသည်။

ရိုးရိုးသားသား ပြောရလျှင် အသက်ဝင်နေသော နတ်ဘုရားရတနာ တစ်ခုကို မျက်မြင်ကိုယ်တွေ့ မြင်တွေ့ရလိမ့်မည်ဟု သူ တစ်ကြိမ်တစ်ခါမျှ မတွေးဖူးခဲ့ချေ။ တကယ်ကို ယုံကြည်နိုင်စရာ မရှိလောက်အောင် အံ့အားသင့်ဖွယ် ကောင်းလှသည်။

မည်သို့ပင်ဆိုစေ ဤသည်မှာ နတ်ဘုရားနယ်ပယ်မှ ရတနာ တစ်ပါးဖြစ်ပြီး ကမ္ဘာပျက်မတတ် စွမ်းအားများ သေချာပေါက် ပါဝင်နေမည် ဖြစ်သည်။

"ဒီမိစ္ဆာတွေ ဘာလို့ ဒီလောက် ကြောက်စရာ ကောင်းလဲ ဆိုတာ မင်း သိသင့်တယ်။ သူတို့ရဲ့ လွှမ်းမိုးနိုင်စွမ်းရှိတဲ့ မှော်ပညာရပ်တွေ အပြင်၊ အဓိက အကြောင်းရင်းကတော့ သူတို့မှာ သေမျိုးမဟုတ်တဲ့ ခန္ဓာကိုယ်တွေ ရှိနေလို့ပဲ။ အဲဒီအတွက် သူတို့ကို သတ်ဖို့ အရမ်း ခက်ခဲတယ်။"

"ရှေးဟောင်းခေတ် ကာလတုန်းက ငါတို့ဟာ ဒီသေမျိုးမဟုတ်တဲ့ မိစ္ဆာတွေကြောင့် အရမ်းကို ဒုက္ခရောက်ခဲ့ရပြီး၊ သူတို့ကို ဖြေရှင်းဖို့ နည်းလမ်း ရှာမတွေ့နိုင်လုနီးပါး ဖြစ်ခဲ့ရတယ်။ နောက်ဆုံးမှာတော့ ဘာမှမတတ်နိုင်တဲ့ အဆုံး သူတို့ကို ချိတ်ပိတ်ထားဖို့ ရွေးချယ်ခဲ့ရတာပဲ။"

"ဒါပေမယ့် အဲဒီလို လုပ်တာက ရေရှည်အတွက် ဖြေရှင်းနည်း တစ်ခုတော့ မဟုတ်ဘူး။ ဘာလို့လဲဆိုတော့ ချိတ်ပိတ်မှုတွေက တစ်နေ့နေ့ကျရင် အားနည်းသွားမှာဖြစ်ပြီး အကယ်လို့ ဒီသေမျိုးမဟုတ်တဲ့ မိစ္ဆာတွေသာ လွတ်မြောက်သွားခဲ့ရင် ကမ္ဘာကြီးက သေချာပေါက် ကပ်ဘေးကြီး တစ်ခုနဲ့ ကြုံတွေ့ရတော့မှာပဲ။"

"တကယ်တော့ အကောင်းဆုံး နည်းလမ်းကတော့ ဒီမိစ္ဆာတွေကို သတ်ဖြတ်ပြီး ထာဝရ ငြိမ်းချမ်းမှုကို ဖော်ဆောင်ဖို့ပဲ။"

တာအိုကျင့်ကြံသူ ယွမ်ချင်းက သတ်ဖြတ်လိုစိတ် အပြည့်ဖြင့် ပြောလိုက်သည်။

ရှင်းလင်းစွာပင် သူသည် မိစ္ဆာများကို အလွန်အမင်း ရွံရှာမုန်းတီးနေပြီး၊ ဤလောကရှိ မိစ္ဆာ တစ်ကောင်မကျန် အမြစ်ပြတ် သုတ်သင်ပစ်ချင်နေကြောင်း ထင်ရှားလှပေသည်။

မည်သို့ပင်ဆိုစေ သူ၏ သူငယ်ချင်းများနှင့် မိသားစုများမှာ မိစ္ဆာများ၏ လက်ချက်ဖြင့် သေဆုံးခဲ့ရသည် မဟုတ်ပါလော။

"လူသားအင်ပါယာဓားက မိစ္ဆာတွေကို သတ်ဖြတ်နိုင်တဲ့ စွမ်းအား ပိုင်ဆိုင်ထားတာလား။"

ကျန်းဖန်က မျက်ခုံး တစ်ချက်ပင့်ကာ မေးမြန်းလိုက်သည်။

"မိတ်ဆွေငယ်... မင်းက တကယ်ကို ပါးနပ်တာပဲ။"

"လူသားအင်ပါယာဓားက မိစ္ဆာတွေကို သတ်ဖြတ်နိုင်တဲ့ စွမ်းအားကို တကယ်ပဲ ပိုင်ဆိုင်ထားတယ်။"

"သူက မိစ္ဆာတွေရဲ့ သေမျိုးမဟုတ်တဲ့ ခန္ဓာကိုယ်ကို အလွယ်တကူ ဖျက်ဆီးပစ်နိုင်တယ်။"

"တစ်စုံတစ်ယောက်ကသာ လူသားအင်ပါယာဓားကို ကိုင်ဆောင်ထားနိုင်သရွေ့ သေမျိုးမဟုတ်တဲ့ မိစ္ဆာတွေကို တစ်ကောင်ပြီး တစ်ကောင် သတ်ဖြတ်ပစ်နိုင်လိမ့်မယ်။"

"ဒါက ငါတို့ ထိုက်ရွှိဂိုဏ်းက နောင်လာနောက်သားတွေ အတွက် ချန်ရစ်ခဲ့တဲ့ နောက်ဆုံး လက်နက် တစ်ခုပဲ။"

"အကယ်လို့ မင်းသာ ဒီနတ်ဘုရားရတနာကို ကျွမ်းကျင်ပိုင်နိုင်သွားမယ် ဆိုရင် ကမ္ဘာပျက် ကပ်ဘေးကြီးကို ဖြေရှင်းဖို့ နောက်ထပ် နည်းလမ်းတစ်ခု ရှိလာပြီပေါ့။"

"ဒါပေမယ့် လူသားအင်ပါယာဓားက လောလောဆယ်မှာ အသွားမသွေးရသေးတဲ့ အခြေအနေမှာ ရှိနေပြီး၊ အသုံးပြုနိုင်ဖို့အတွက် အသွားသွေးပေးဖို့ လိုအပ်တယ်။"

"ဒါကြောင့် နောက်တစ်ဆင့် အနေနဲ့ လူသားအင်ပါယာဓားကို ထက်မြက်လာအောင် မင်း လုပ်ပေးဖို့ လိုအပ်တယ်။"

တာအိုကျင့်ကြံသူ ယွမ်ချင်းက လေးနက်သော လေသံဖြင့် ပြောလိုက်သည်။

ရှင်းလင်းစွာပင် ဤနတ်ဘုရားရတနာမှာ ထိုက်ရွှိဂိုဏ်းက ကံကြမ္မာပါလာသူအတွက် ချန်ရစ်ခဲ့ခြင်း ဖြစ်သည်။

အကယ်၍ ကံကြမ္မာပါလာသူသာ ဤနတ်ဘုရားရတနာကို ကျွမ်းကျင်ပိုင်နိုင်သွားပါက ကျားသစ် အတောင်ပံ တပ်လိုက်သကဲ့သို့ ဖြစ်သွားပေမည်။

ထိုသေမျိုးမဟုတ်သော မိစ္ဆာများကို ဖြေရှင်းရန်မှာ ခက်ခဲသော အလုပ်တစ်ခု ဖြစ်တော့မည် မဟုတ်ချေ။

ကံကြမ္မာပါလာသူ အနေဖြင့် လူသားအင်ပါယာဓားကို ကိုင်ဆောင်ကာ ချိတ်ပိတ်ခံထားရသော သေမျိုးမဟုတ်သည့် မိစ္ဆာများကို တစ်ကောင်ပြီး တစ်ကောင် သတ်ဖြတ်ပစ်နိုင်ပေမည်။

ထိုအချိန်သို့ ရောက်သောအခါ သေမျိုးလောကရှိ ဖုံးကွယ်နေသော အန္တရာယ် အများအပြားကို အမြစ်ပြတ် ရှင်းလင်းပစ်နိုင်ပေမည်။

"လူသားအင်ပါယာဓား ထက်မြက်လာအောင် ဘယ်လို လုပ်ရမလဲဆိုတာ သိချင်ပါတယ်။"

ကျန်းဖန်က မေးမြန်းလိုက်သည်။

သူသည် ဤနတ်ဘုရားရတနာ လူသားအင်ပါယာဓားအတွက် သဘာဝကျကျပင် အလွန်အမင်း မျှော်လင့်နေမိသည်။ အကယ်၍ ဤနတ်ဘုရားရတနာကိုသာ သူ ကျွမ်းကျင်ပိုင်နိုင်သွားပါက၊ သူ၏ လက်ထဲသို့ နောက်ထပ် အစွမ်းထက် လက်နက် တစ်ခု ထပ်တိုးလာမည် ဖြစ်သည်။

သူ့တွင် နည်းလမ်း အများအပြား ရှိနေပြီး ဖြစ်သော်ငြား၊ ရတနာတွေ များလွန်းလို့ဟု မည်သူကမျှ ညည်းညူမည် မဟုတ်ချေ။

ထို့အပြင် ဤသည်မှာ သေမျိုးမဟုတ်သော မိစ္ဆာများကို ရင်ဆိုင်ရာတွင် အလွန် အရေးပါသော လက်နက် တစ်ခုလည်း ဖြစ်ပေသည်။

"လူသားအင်ပါယာဓားကို အသွားသွေးဖို့အတွက် သော့ချက်က သွေးနဲ့ ဝိညာဉ်တွေပဲ။"

"သူက သက်ရှိ ဘီလီယံ တစ်ရာကို သတ်ဖြတ်ဖို့ လိုအပ်ပြီး၊ သူတို့ရဲ့ သွေးနဲ့ ဝိညာဉ်တွေကို အသုံးပြုပြီးတော့မှ နတ်ဘုရားဓားရဲ့ အသွားသွေးခြင်း လုပ်ငန်းစဉ် ပြီးမြောက်မှာ ဖြစ်တယ်။"

တာအိုကျင့်ကြံသူ ယွမ်ချင်းက သတ်ဖြတ်လိုစိတ် အပြည့်ဖြင့် ပြောလိုက်သည်။

အသွားသွေးခြင်း လုပ်ငန်းစဉ် ပြီးမြောက်ရန် သက်ရှိ ဘီလီယံ တစ်ရာကို သတ်ဖြတ်ရန် လိုအပ်သည် ဟုတ်လား။

ဤစကားကို ကြားလိုက်ရသောအခါ ကျန်းဖန်မှာ အလွန်အမင်း တုန်လှုပ်သွားခဲ့သည်။ ၎င်းမှာ သန့်ရှင်းသော ဓားတစ်လက်ထက် မိစ္ဆာဓား တစ်လက် နှင့် ပိုတူနေ၏။ ကြောက်မက်ဖွယ်ကောင်းသော မိစ္ဆာချီများနှင့် သတ်ဖြတ်လိုစိတ်များလည်း ပါဝင်နေသည်။ ဤသည်က လူသားအင်ပါယာဓား ဟုတ်ပါလေစ။

"သေချာတာပေါ့။ အသွားသွေးဖို့ လိုအပ်တဲ့ အခြေအနေတွေကို မင်းအတွက် ငါ ပြင်ဆင်ပေးထားပြီးသားပါ။"

"လူသားမျိုးနွယ်ဝင် တစ်ယောက် အနေနဲ့၊ သဘာဝကျကျပဲ လူသားတွေကို သတ်ဖြတ်လို့ မရဘူး၊ မဟုတ်ရင် ကိုယ့်လူမျိုးကို ကိုယ်တိုင် ပြန်သတ်သလို ဖြစ်သွားလိမ့်မယ်။"

"ဒါပေမယ့် တခြား မိစ္ဆာမျိုးနွယ်တွေကို သတ်ဖြတ်တာကျတော့ ပြဿနာ မရှိပါဘူး။"

"လောလောဆယ် ဟင်းလင်းပြင် လျှို့ဝှက်နယ်မြေမှာ ရေတွက်လို့မရနိုင်တဲ့ မိစ္ဆာသားရဲတွေ နေထိုင်နေကြတယ်။"

"သူတို့ လျှို့ဝှက်နယ်မြေ ထဲကို ဝင်လာခဲ့တာ အကြောင်းပြချက် မရှိဘဲ ဝင်လာတာ မဟုတ်ဘူး၊ ငါက တမင်သက်သက် သူတို့ကို ပေးဝင်ခဲ့တာ။"

"ရည်ရွယ်ချက်ကတော့ သူတို့ကို လူသားအင်ပါယာဓား အတွက် ယဇ်ကောင်တွေ ဖြစ်လာစေဖို့ပဲ။"

"အဲဒီနောက်မှာ၊ မင်းက လူသားအင်ပါယာဓားကို ကိုင်ဆောင်ထားနိုင်သရွေ့ အပြင်ကို ထွက်ပြီး ဒီမိစ္ဆာသားရဲတွေကို သတ်ဖြတ်ပစ်လို့ ရတယ်။"

"ဒီမိစ္ဆာသားရဲတွေရဲ့ ဝိညာဉ်တွေနဲ့ သွေးတွေကို မျိုချလိုက်တာနဲ့၊ လူသားအင်ပါယာဓားကို အသွားသွေးတဲ့ လုပ်ငန်းစဉ် ပြီးမြောက်သွားလိမ့်မယ်။"

"ဒါ့အပြင် ဒီဝိညာဉ်အသွင်ပြောင်းအဆင့် မိစ္ဆာသားရဲတွေ အတွက် မင်း စိတ်ပူနေစရာ မလိုပါဘူး။"

"နောက်ပိုင်းကျရင် အဲဒီ ဝိညာဉ်အသွင်ပြောင်းအဆင့် မိစ္ဆာသားရဲတွေကို သတ်ဖြတ်ဖို့ မင်းကို ငါ ကူညီပေးမယ်၊ သူတို့ကို လူသားအင်ပါယာဓား အတွက် အာဟာရတွေ အဖြစ် ပြောင်းလဲပစ်လိုက်မယ်။"

တာအိုကျင့်ကြံသူ ယွမ်ချင်းက အနည်းငယ် ပြုံးလျက် ပြောလိုက်သည်။

"ဒါ..."

ဤစကားကို ကြားလိုက်ရသောအခါ ကျန်းဖန်၏ သူငယ်အိမ်များ ကျုံ့ဝင်သွားခဲ့သည်။

ယခင်က သူသည် အလွန်အမင်း ဇဝေဇဝါ ဖြစ်နေခဲ့၏။ အကယ်၍ တာအိုကျင့်ကြံသူ ယွမ်ချင်းသာ အသက်ရှင်နေသေးပါက အဘယ်ကြောင့် ထိုမိစ္ဆာသားရဲများကို ဟင်းလင်းပြင် လျှို့ဝှက်နယ်မြေ အတွင်းသို့ ဝင်ရောက်ခွင့် ပြုခဲ့သနည်း။ မျှော်လင့်မထားဘဲ ဤသည်မှာ သူ၏ တမင်သက်သက် လုပ်ရပ်တစ်ခု ဖြစ်နေခဲ့သည်။

ရည်ရွယ်ချက်မှာ ဤမိစ္ဆာသားရဲများကို ဟင်းလင်းပြင် လျှို့ဝှက်နယ်မြေ အတွင်း၌ လျင်မြန်စွာ မျိုးပွားစေရန် ဖြစ်သည်။

ထိုမိစ္ဆာသားရဲများက ဤသည်မှာ ဧရာမ အခွင့်အရေးကြီး တစ်ရပ်ဟု ထင်မှတ်ထားခဲ့ကြသော်ငြား၊ တာအိုကျင့်ကြံသူ ယွမ်ချင်းက သူတို့ကို ယဇ်ကောင်များအဖြစ် အသုံးပြုရန် ရည်ရွယ်ထားကြောင်းကိုမူ သူတို့ မသိရှိခဲ့ကြချေ။ ရည်ရွယ်ချက်မှာ လူသားအင်ပါယာဓားကို အပြည့်အဝ သွေးရန်ပင် ဖြစ်သည်။

ဤလူသား အမွေအနှစ်မှာ တကယ်ကို ရက်စက်ကြမ်းကြုတ်လွန်းလှသည်ဟုသာ ဆိုနိုင်ပေသည်။

သူ၏ ရည်မှန်းချက်များကို အောင်မြင်ရန်အတွက် သက်ရှိ ဘီလီယံ တစ်ရာကို သွေးယဇ်ပူဇော်ရာတွင် သူ အနည်းငယ်မျှ တွေဝေနေမည် မဟုတ်ချေ။

"မိတ်ဆွေငယ်... ဒါကို အရမ်း ရက်စက်လွန်းတယ်လို့ မင်း ခံစားနေဖို့ မလိုပါဘူး။"

"ကိုယ့်လူမျိုး မဟုတ်တဲ့ သတ္တဝါတွေမှာ ကွဲပြားတဲ့ စိတ်နေသဘောထားတွေ သေချာပေါက် ရှိကြတာပဲ။"

"ရှေးဟောင်းခေတ် ကာလတုန်းက ငါတို့ လူသားမျိုးနွယ်တွေနဲ့ တခြား မိစ္ဆာမျိုးနွယ်တွေ ကြားထဲမှာ စစ်ပွဲတွေ ဖြစ်ပွားခဲ့တုန်းကဆိုရင်၊ သေဆုံးခဲ့ရတဲ့ သက်ရှိ အရေအတွက်က ထရီလီယံ ဆယ်ဂဏန်းမကဘူး၊ ထရီလီယံ ရာဂဏန်းတောင် ကျော်လွန်ပြီး ရေတွက်လို့မရနိုင်အောင် များပြားခဲ့တာ။"

"သက်ရှိ ဘီလီယံ တစ်ရာ ဆိုတာလေးက ဘာများ အရေးပါလို့လဲ။"

"ဒါ့အပြင် ဒီအရာအားလုံးက ထိုက်တန်ပါတယ်။ သက်ရှိ ဘီလီယံ တစ်ရာကို ယဇ်ပူဇော်လိုက်ရုံနဲ့ ဟင်းလင်းပြင် နယ်ပယ်ကို ကယ်တင်နိုင်မယ် ဆိုရင်၊ အဲဒါက ဆိုးရွားတဲ့ ကိစ္စရပ်တစ်ခု မဟုတ်ပါဘူး။ မည်သို့ပင်ဆိုစေ ယဇ်ပူဇော်မှုတွေကတော့ ရှိရမှာပဲ။"

တာအိုကျင့်ကြံသူ ယွမ်ချင်းက တိတ်ဆိတ်စွာ ပြောလိုက်သည်။

သူသည် ရှေးဟောင်းခေတ် ကာလ၏ သံမဏိနှင့် မီးတောက်များကို ဖြတ်သန်းခဲ့ရဖူးသူ ဖြစ်ရာ အလွန်တရာ ရက်စက်ကြမ်းကြုတ်သူ တစ်ဦး ဖြစ်နေခဲ့သည်မှာ ကြာမြင့်နေပြီ ဖြစ်သည်။

သက်ရှိများ ဆိုသည်မှာ သူ့အတွက် ပေါင်းပင်များထက် ပိုမို အရေးမပါချေ။

နောက်ဆုံး အောင်ပွဲကို ရရှိနိုင်သရွေ့ အရာအားလုံးမှာ ထိုက်တန်ပေသည်။

ဝုန်း~~~

ထိုအခိုက်အတန့်တွင် ကျန်းဖန်သည် သူ၏ အသိစိတ်ပင်လယ် နက်ရှိုင်းရာအရပ်သို့ သတင်းအချက်အလက် တစ်ခု ချက်ချင်း ဝင်ရောက်လာသည်ကို အာရုံခံမိလိုက်သည်။

"သင်သည် ထိုက်ရွှိ နန်းဆောင် အတွင်းသို့ နောက်ဆုံးတော့ ဝင်ရောက်နိုင်ခဲ့ပြီဖြစ်ပြီး၊ ရှေးဟောင်းခေတ် ကာလမှ ရှေးဟောင်း ဘီလူးကြီး တစ်ကောင်ဖြစ်သော တာအိုကျင့်ကြံသူ ယွမ်ချင်းနှင့် တွေ့ဆုံခဲ့လေပြီ။ ဤပုဂ္ဂိုလ်မှာ တစ်ချိန်က မဟာယာနအဆင့် ကျင့်ကြံသူ တစ်ဦးဖြစ်ပြီး ကမ္ဘာပျက်မတတ် ကျင့်ကြံခြင်း စွမ်းအားများကို ပိုင်ဆိုင်ထားသူ ဖြစ်သည်။

သူသည် လုံးဝ ပျက်စီးသွားသင့်ပြီ ဖြစ်သော်ငြား၊ နတ်ဘုရားရတနာ လူသားအင်ပါယာဓားကို စောင့်ကြပ်ရန်အတွက် ယနေ့အချိန်ထိ အသက်ကို ဖက်တွယ်ထားခဲ့ခြင်း ဖြစ်သည်။ သို့သော် တာအိုကျင့်ကြံသူ ယွမ်ချင်း ကိုယ်တိုင်ပင်လျှင် သူ၏ မှတ်ဉာဏ်များမှာ ရန်သူများ၏ ပြုပြင်ပြောင်းလဲခြင်းကို ခံထားရသည်မှာ ကြာမြင့်နေပြီ ဖြစ်ကြောင်းကို မသိရှိခဲ့ချေ။

သူ၏ လုပ်ရပ်များက ကမ္ဘာကြီးကို ကယ်တင်နေသည်ဟု သူ ယုံကြည်ထားသော်ငြား၊ အမှန်တကယ်တွင် သူသည် ပျက်စီးခြင်း တွင်းနက်ကြီးထဲသို့ ပိုမို နက်ရှိုင်းစွာ လျှောကျနေခြင်းသာ ဖြစ်သည်။ သူ၏ အစီအစဉ်အတိုင်း လိုက်နာလုပ်ဆောင်ခြင်းက သင့်ကို ရန်သူများ၏ ထောင်ချောက်အတွင်းသို့ ဝင်ရောက်သွားစေမည်ဖြစ်ပြီး အောင်မြင်ရန် မျှော်လင့်ချက် လုံးဝ ရှိမည်မဟုတ်ချေ။"

"ကံကြမ္မာ လမ်းညွှန် ၁ - တာအိုကျင့်ကြံသူ ယွမ်ချင်း၏ စကားများကို သင် ယုံကြည်လိုက်ပြီး နတ်ဘုရားရတနာ လူသားအင်ပါယာဓားကို ဆွဲထုတ်လိုက်ရာ ၎င်း၏ ကြောက်မက်ဖွယ်ကောင်းသော စွမ်းအားများကို ရရှိသွားခဲ့သည်။ ထို့နောက် သင်သည် ထိုက်ရွှိ နန်းဆောင်မှ ထွက်ခွာသွားပြီး ဟင်းလင်းပြင် လျှို့ဝှက်နယ်မြေ အတွင်းရှိ မိစ္ဆာသားရဲ အားလုံးကို စတင် သတ်ဖြတ်တော့သည်။

တစ်လတာ အချိန်အတွင်းမှာပင်၊ သင်သည် ဟင်းလင်းပြင် လျှို့ဝှက်နယ်မြေတွင် နေထိုင်နေသော မိစ္ဆာသားရဲ အားလုံးကို အမြစ်ပြတ် သုတ်သင်ပစ်ခဲ့ပြီး သက်ရှိ ဘီလီယံ တစ်ရာကို သွေးယဇ်ပူဇော်ကာ လူသားအင်ပါယာဓား၏ ထက်မြက်မှုကို နောက်ဆုံးတွင် အပြည့်အဝ အသက်သွင်းလိုက်လေသည်။

သို့သော် သင် မသိရှိသည်မှာ ဤမိစ္ဆာသားရဲများ အတွင်း၌ ကြောက်မက်ဖွယ်ကောင်းသော အနက်ရောင် သွေးကျိန်စာ တစ်ခု ပါဝင်နေခြင်းပင် ဖြစ်သည်။ သင် မိစ္ဆာများများကို သတ်ဖြတ်လေလေ၊ စုဆောင်းမိလာသော ကျိန်စာများက ပိုမို ကြောက်မက်ဖွယ် ကောင်းလာလေလေပင် ဖြစ်သည်။

ရှေးဟောင်းခေတ် ကာလက အစွမ်းထက် ပုဂ္ဂိုလ်ကြီး အများအပြားမှာ ဤအချက်ကို မသိရှိခဲ့ကြသဖြင့် အနက်ရောင် သွေးကျိန်စာကြောင့် သေဆုံးခဲ့ကြရပြီး သင်လည်း ထိုနည်းတူပင် ဖြစ်သည်။ သွေးယဇ်ပူဇော်ခြင်း လုပ်ငန်းစဉ် ပြီးမြောက်သွားသောအခါ၊ သင်သည်လည်း ကျိန်စာကြောင့် သေဆုံးရမည်ဖြစ်ပြီး ဘယ်သောအခါမှ ပြန်လည် ရှင်သန်နိုင်တော့မည် မဟုတ်ချေ။”

…………..