အခန်း ၈၂၅

အခန်း ၈၂၅ - ကောင်းကင်ဘုံ နိယာမမှ ပြုစုပျိုးထောင်ပေးသော နတ်ဘုရားရတနာ၊ လူသားအင်ပါယာဓား၏ ဓားဝိညာဉ်။

"သူတို့က တကယ်ကို မသေဆုံးကြသလို ထွက်လည်း မသွားကြဘူး။"

"အဲဒီ စစ်ပွဲတုန်းက ငါတို့ဟာ ပြိုင်ဘက်ဘက်ကို ပြင်းထန်စွာ ဒဏ်ရာရအောင် လုပ်နိုင်ခဲ့ပေမယ့် သူတို့ကို လုံးဝ အမြစ်ပြတ် မသတ်ဖြတ်နိုင်ခဲ့ဘူး။"

"တစ်ချိန်တည်းမှာပဲ သူတို့ဟာ ထာဝရအသက်စင်သစ်ပင်ရဲ့ ပတ်ဝန်းကျင်ကို စောင့်ကြပ်ရင်း ကမ္ဘာပျက် ကပ်ဘေးကြီးကိုလည်း စောင့်ကြည့်နေကြတာ။"

"ငါတို့ ဟင်းလင်းပြင် နယ်ပယ်ရဲ့ ကျင့်ကြံသူတွေ အဲဒါကို ဖျက်ဆီးပစ်မှာကို သူတို့ ကြောက်နေကြတာလေ။"

"ဘယ်လိုပဲဖြစ်ဖြစ် ထာဝရအသက်စင်သစ်ပင်ကို ဖျက်ဆီးဖို့ နည်းလမ်းမရှိသရွေ့ ငါတို့ ဟင်းလင်းပြင် နယ်ပယ်အနေနဲ့ ပျက်စီးခြင်း ကံကြမ္မာကနေ ရှောင်လွှဲနိုင်မှာ မဟုတ်ဘူး။"

တာအိုကျင့်ကြံသူ ယွမ်ချင်းက ဘာမှမတတ်နိုင်သည့်လေသံဖြင့် ဆို၏။

သူတို့သည် အဆုံးမရှိသော ကြိုးပမ်းအားထုတ်မှုများကို အသုံးပြုခဲ့ပြီး ကမ္ဘာတစ်ဝန်းလုံးမှ ကျင့်ကြံသူများ တစ်ယောက်ပြီး တစ်ယောက် စတေးခံကာ စစ်မြေပြင်တွင် ကျဆုံးခဲ့ရသော်ငြား၊ နောက်ဆုံး အောင်ပွဲကိုမူ ရရှိနိုင်ခြင်း မရှိခဲ့ကြချေ။

ရလဒ်မှာ အပြန်အလှန် ပျက်စီးခြင်းမျှသာ ဖြစ်၏။ မဟုတ်ပါ၊ ၎င်းကို အပြန်အလှန် ပျက်စီးခြင်းဟုပင် ခေါ်၍ မရဘဲ သေခြင်းကို ခဏတာ ရွှေ့ဆိုင်းလိုက်ရခြင်း သက်သက်သာ ဖြစ်ပေသည်။

"ဒါ..."

ကျန်းဖန် တိတ်ဆိတ်သွားတော့သည်။ ရန်သူမှာ အစွမ်းထက်လှကြောင်း သူ သိထားသော်ငြား ဤမျှလောက်အထိ အစွမ်းထက်နေလိမ့်မည်ဟု သူ မထင်မှတ်ထားခဲ့ပေ။

ရှေးဟောင်းခေတ်ကာလမှ ထိုအစွမ်းထက် ပုဂ္ဂိုလ်ကြီးများပင်လျှင် သူတို့ကို ရင်မဆိုင်နိုင်ခဲ့ခြင်းက သူတို့၏ ကြောက်မက်ဖွယ်ကောင်းသော စွမ်းအားကို သက်သေပြနေသည်။

တစ်ချက်လေး ပေါ့ဆလိုက်ရုံနှင့်ပင် သူသည် ရန်သူ၏ လက်ချက်ဖြင့် သေဆုံးသွားနိုင်ပေမည်။

အပြင်ဘက်တွင် မသေမျိုး မျိုးနွယ်စု အကြောင်းကို ပြောဆိုခြင်းမှာ တားမြစ်ထားခြင်းမှာ အံ့ဩစရာ မဟုတ်တော့ပေ။

မသေမျိုး တစ်ဦးအနေဖြင့် ကောင်းကင်နှင့် မြေကြီးအကြားမှ အရာအားလုံးကို မြင်တွေ့နိုင်စွမ်း၊ ကြားနိုင်စွမ်း ရှိကြမှာ အသေအချာပင်။

ဤအသုံးအနှုန်းကို တစ်ကြိမ် ပြောဆိုလိုက်သည်နှင့် တစ်ပြိုင်နက် သူတို့၏ စောင့်ကြည့်မှုအောက်သို့ ရောက်ရှိသွားတော့မည် ဖြစ်၏။

ထိုအချိန်သို့ ရောက်သောအခါ မည်မျှပင် မြင့်မားနက်ရှိုင်းသည့် နေရာ၌ ပုန်းကွယ်နေပါစေ လွတ်မြောက်နိုင်ရန်မှာ မဖြစ်နိုင်တော့ချေ။

"စီနီယာ... လူသားအင်ပါယာဓားက သက်ရှိ ဘီလီယံ တစ်ရာကို သွေးယဇ်ပူဇော်မှ အသွားသွေးလို့ ရတာ တကယ်ပဲလား။"

ကျန်းဖန်က မေးမြန်းလိုက်သည်။

"သေချာပေါက် မဟုတ်ဘူးပေါ့။"

"အရင်က ငါ့ရဲ့ မှတ်ဉာဏ်တွေကို ပြုပြင်ပြောင်းလဲခံထားရလို့ အဲဒီလို ပြောမိသွားတာပါ။"

"လူသားအင်ပါယာဓားကို အသုံးပြုရမယ့် နည်းလမ်းက ရိုးရှင်းပါတယ်။ သူက လူသားတို့ရဲ့ ကြီးမားတဲ့ ကံကြမ္မာအမှတ်တွေကို စားသုံးဖို့ လိုအပ်တယ်။"

"မင်းအနေနဲ့ ဂိုဏ်းတစ်ခုရဲ့ ခေါင်းဆောင် ဖြစ်လာရမယ်၊ ဒါမှမဟုတ် လူသားမျိုးနွယ် တစ်ခုလုံးရဲ့ ခေါင်းဆောင် ဖြစ်လာမှသာ ဒီနတ်ဘုရားဓားကို လွတ်လပ်စွာ အသုံးပြုနိုင်မှာ။"

"ဒါကြောင့် ကံကြမ္မာပါလာသူ တစ်ဦးသာ လူသားအင်ပါယာဓားကို ကိုင်ဆောင်နိုင်တာ။"

"အတိတ်တုန်းကတော့ ထိုက်ရွှိဂိုဏ်းရဲ့ ဘိုးဘေးဖြစ်တဲ့ တာအိုကျင့်ကြံသူ ထိုက်ရွှိ တစ်ယောက်တည်းပဲ ဘာကန့်သတ်ချက်မှမရှိဘဲ သုံးနိုင်ခဲ့တာ။"

"အကယ်၍သာ ငါတို့ ရှေးဟောင်းခေတ် ကာလတုန်းက ဒီနတ်ဘုရားဓားကို ကျွမ်းကျင်ပိုင်နိုင်ခဲ့မယ် ဆိုရင် စစ်ပွဲရဲ့ ရလဒ်တွေက ကွဲပြားခြားနားသွားနိုင်ပါတယ်။"

တာအိုကျင့်ကြံသူ ယွမ်ချင်းက ဘာမှမတတ်နိုင်သည့် လေသံဖြင့် ပြောလိုက်သည်။

ဤနတ်ဘုရားဓားမှာ ကြီးမားသော စွမ်းအားကို ပိုင်ဆိုင်ထားသော်ငြား၊ ကံကြမ္မာပါလာသူ မဟုတ်ပါက အသုံးပြုရာတွင် မိမိ၏ သက်တမ်းကို စားသုံးရပေလိမ့်မည်။ အသုံးပြုတိုင်းမှာ သက်တမ်း လျော့နည်းသွားမည်ဖြစ်ပြီး နောက်ဆုံးတွင် သေဆုံးသွားမည်မှာ သေချာလှသည်။

ကံကြမ္မာပါလာသူသာလျှင် ဤနတ်ဘုရားဓားကို သက်တမ်း ကုန်ဆုံးမှု မရှိဘဲ အသုံးပြုနိုင်ပေသည်။

ထို့အပြင် ၎င်းကို ဟင်းလင်းပြင် နယ်ပယ်မှ အပြင်သို့ ယူဆောင်သွား၍ မရနိုင်ချေ။

အဘယ်ကြောင့်ဆိုသော် ၎င်းမှာ ဟင်းလင်းပြင် နယ်ပယ်၏ ကောင်းကင်ဘုံ နိယာမက ပြုစုပျိုးထောင်ပေးထားသော နတ်ဘုရားရတနာ တစ်ပါးဖြစ်ပြီး၊ ဟင်းလင်းပြင် နယ်ပယ်၏ အဆုံးမရှိသော ကံကြမ္မာကို စောင့်ရှောက်ပေးထားသည့် အစွမ်းထက် ရတနာ တစ်ပါး ဖြစ်သောကြောင့်ပင်။

"ထူးဆန်းလိုက်တာ"

ကျန်းဖန်သည် သူ၏ မျက်လုံးများကို ကျဉ်းလိုက်လေသည်။

ဤသည်မှာ နတ်ဘုရားနယ်ပယ်မှ ဆင်းသက်လာသော နတ်ဘုရားရတနာ မဟုတ်ဘဲ ဟင်းလင်းပြင် နယ်ပယ်ကိုယ်တိုင်က ပြုစုပျိုးထောင်ပေးထားသည့် ရတနာ တစ်ပါး ဖြစ်လေသည်။

ထို့ကြောင့် ၎င်းတွင် အဆုံးအစမဲ့သော စွမ်းအားများ ပါဝင်နေခြင်း ဖြစ်ပေသည်။

အတိတ်ကာလတွင် တာအိုကျင့်ကြံသူ ထိုက်ရွှိသည် လူသားအင်ပါယာဓားကို ကိုင်ဆောင်ထားသဖြင့် ကမ္ဘာပေါ်တွင် ပြိုင်ဘက်ကင်း ဖြစ်လာခဲ့ပြီး၊ လူသားမျိုးနွယ်၏ အခြေခံ အုတ်မြစ်ကို တည်ဆောက်နိုင်ခဲ့ကာ ထိုက်ရွှိဂိုဏ်းကို အစွမ်းထက်ဆုံး ဂိုဏ်း ဖြစ်လာစေခဲ့ပြီး စစ်မှန်သော ဝိညာဉ်များကိုပင် ဦးညွှတ်စေခဲ့သည်။

အကယ်၍သာ သက်တမ်းရှည် ကပ်ဘေးသာ မရှိခဲ့ပါက ထိုက်ရွှိဂိုဏ်းသည် ယနေ့တိုင် ကျဆင်းသွားမည် မဟုတ်ချေ။

"ဒါပေမယ့် ဒီနတ်ဘုရားဓားကို ရန်သူတွေက စွက်ဖက်ထားပုံပဲ။"

ကျန်းဖန်က လေးနက်သော လေသံဖြင့် ဆိုလိုက်သည်။

အကယ်၍ သူသာ ကံကြမ္မာ၏ အရိပ်အယောင်ကို မရရှိခဲ့ပါက၊ သူသည် လူသားအင်ပါယာဓားကို အသုံးပြုမိပြီး သက်ရှိ ဘီလီယံ တစ်ရာကို သတ်ဖြတ်ကာ အနက်ရောင် သွေးကျိန်စာကြောင့် အလောင်းပင် မကျန်တော့ဘဲ သေဆုံးသွားရပေလိမ့်မည်။

ဤနတ်ဘုရားရတနာကို ရန်သူများက ကြာမြင့်စွာကတည်းက စွက်ဖက်ထားခဲ့ကြောင်းမှာ ထင်ရှားလှပေသည်။

"အဲဒါက အနက်ရောင် သွေးကျိန်စာ ပဲ။"

"မသေမျိုး မျိုးနွယ်စု ကျွမ်းကျင်တဲ့ ကြောက်မက်ဖွယ်ကောင်းတဲ့ ကျိန်စာတွေထဲက တစ်ခုပေါ့။"

"ဒီကျိန်စာက သွေးတွေထဲကို ပေါင်းစပ်ဝင်ရောက်နိုင်ပြီး ကပ်ရောဂါ တစ်ခုအလား ပျံ့နှံ့သွားနိုင်တယ်။"

"ရှေးဟောင်းခေတ် ကာလတုန်းက ဟင်းလင်းပြင် နယ်ပယ်ရဲ့ ကျင့်ကြံသူတွေက ဒါကို မသိရှိခဲ့ကြလို့ ထောင်ချောက်ထဲကို ကျရောက်ခဲ့ကြရတာ။"

"အစွမ်းထက် ပုဂ္ဂိုလ်ကြီး အများအပြားလည်း ဒါကြောင့်ပဲ သေဆုံးခဲ့ရတယ်။"

"ဒါပေမယ့် ကြိုတင် သိရှိထားမယ်ဆိုရင်တော့ အနက်ရောင် သွေးကျိန်စာကို စင်ကြယ်အောင် ပြုလုပ်နိုင်ပါတယ်။"

"ပြီးတော့ လူသားအင်ပါယာဓားမှာ အနက်ရောင် သွေးကျိန်စာကို စင်ကြယ်အောင် ပြုလုပ်နိုင်တဲ့ စွမ်းအား ရှိနေတယ်။"

"ကံကောင်းထောက်မစွာနဲ့ မိတ်ဆွေငယ်... မင်း ဒီအချက်ကို အရင်ဆုံး သိရှိသွားတာပဲ၊ မဟုတ်ရင် မင်း တကယ်ပဲ ရန်သူရဲ့ ထောင်ချောက်ထဲကို ကျရောက်သွားလိမ့်မယ်။"

တာအိုကျင့်ကြံသူ ယွမ်ချင်းက ပြန်လည် ဆင်ခြင်ရင်း ပြောလိုက်သည်။

သူ့ရှေ့တွင် ရှိနေသော ဤမျိုးဆက်သစ် ကျင့်ကြံသူလေးသည် ဘာမှမသိရှိဘဲနှင့် ထူးဆန်းသော အကြံအစည်များကို ကြိုတင် အာရုံခံနိုင်လောက်အောင် အစွမ်းထက်နေလိမ့်မည်ဟု သူ တစ်ကြိမ်တစ်ခါမျှ မတွေးဖူးခဲ့ချေ။

ဤသည်မှာ ကံကြမ္မာ၏ သားတော် တစ်ယောက်၏ စွမ်းရည်ပေလော။

ရိုးရိုးသားသား ပြောရလျှင် ကံကြမ္မာ၏ သားတော်တိုင်းတွင် မတူညီသော ပါရမီများ ရှိကြကြောင်း သူ သိရှိထားသည်။

တာအိုကျင့်ကြံသူ ထိုက်ရွှိ ပိုင်ဆိုင်ထားသော ပါရမီမှာ 'ဟင်းလင်းပြင် ခန္ဓာကိုယ်' ဖြစ်ပြီး မွေးရာပါ ဓားနတ်ဘုရား တစ်ပါးပင် ဖြစ်သည်။

ထိုအကြောင်းကြောင့် သူသည် မွေးကင်းစကတည်းက ပြိုင်ဘက်ကင်းသော ကျင့်ကြံခြင်း ပါရမီကို ပိုင်ဆိုင်ထားပြီး အစွမ်းထက်သော ရန်သူအားလုံးကို ရှင်းလင်းကာ ထိုခေတ်အခါက ပြိုင်ဘက်ကင်း ဓားနတ်ဘုရား ဖြစ်လာခဲ့ခြင်း ဖြစ်၏။

သို့သော် ဤမျိုးဆက်၏ ကံကြမ္မာပါလာသူတွင် မည်သည့် ပါရမီ ရှိနေသနည်း ဆိုသည်ကိုမူ မည်သူမျှ မသိရှိကြချေ။

သူသည် အလွန်တရာ သိချင်စိတ် ပြင်းပြနေသော်ငြား မေးမြန်းရန် ရည်ရွယ်ချက် မရှိပေ။

ထူးဆန်းသော ကြောက်မက်ဖွယ် ကိစ္စရပ်များကို သူ နားလည်ထားပြီး ဖြစ်၏။

တစ်ကြိမ် ပြောဆိုလိုက်သည်နှင့် တစ်ပြိုင်နက် သူတို့ (ရန်သူများ) သိရှိသွားနိုင်သည်။

သူတို့၏ မှတ်ဉာဏ်များကိုပင် ရန်သူများက ခိုးယူသွားနိုင်ပေမည်။

သိရှိထားခြင်းမှာပင် အလွန်တရာ အန္တရာယ် များလှပေသည်။

ဤကဲ့သို့သော လျှို့ဝှက်ချက်များကို လုံးဝ ထုတ်ဖော် ပြောဆို၍ မဖြစ်သင့်ဘဲ ကံကြမ္မာပါလာသူ တစ်ဦးတည်းသာ သိရှိသင့်ပေသည်။ ထိုသို့မှသာလျှင် ရန်သူကို အနိုင်ယူနိုင်မည့် မျှော်လင့်ချက် ရှိလာပေလိမ့်မည်။

"ဒါဆိုရင်တော့ နားလည်ပါပြီ။"

ကျန်းဖန်က ခေါင်းညိတ်လိုက်သည်။

ဝုန်း~~

ထိုအခိုက်အတန့်တွင် သူ၏ အသိစိတ်ပင်လယ် နက်ရှိုင်းရာအရပ်မှ သတင်းစကား တစ်ခု ရောက်ရှိလာခဲ့၏။

"သင်သည် ရန်သူ၏ အကြံအစည်များကို ဖော်ထုတ်နိုင်ခဲ့ပြီး ထူးဆန်းသော သတ္တဝါ တစ်ကောင်ကို သတ်ဖြတ်ကာ အသက်နှင့် သေခြင်းကြားမှ ကပ်ဘေးကြီး တစ်ခုမှ အသက်ရှင် လွတ်မြောက်လာနိုင်ခဲ့သည့်အတွက် 'ပထမတန်းစား အခွင့်အရေး' နှင့် ကံကောင်းခြင်းအမှတ် ၅ သန်းကို ရရှိခဲ့ပါသည်။"

ဤသတင်းစကားကို အာရုံခံမိလိုက်သောအခါ ကျန်းဖန်သည် မျက်ခုံး တစ်ချက် ပင့်လိုက်မိသည်။ သေချာသည်မှာ သူသည် နောက်ဆုံးတော့ ကပ်ဘေးကြီးမှ အသက်ရှင် လွတ်မြောက်လာခဲ့ခြင်း ဖြစ်သော်ငြား ကံကောင်းခြင်းအမှတ် ၅ သန်း ရရှိလိမ့်မည်ဟု လုံးဝ မမျှော်လင့်ထားခဲ့ချေ။

၎င်းမှာ ဤကပ်ဘေးကြီး မည်မျှလောက် အန္တရာယ်များကြောင်း ပြသနေခြင်းပင် ဖြစ်သည်။

အကယ်၍သာ ကြိုတင် မမြင်တွေ့ခဲ့ပါက သူသည် ထူးဆန်းသော သတ္တဝါ၏ လက်ချက်ဖြင့် ကြာမြင့်စွာကတည်းက သေဆုံးသွားခဲ့ရမည်မှာ အသေအချာပင်။

…………….