အခန်း ၃၉၅

အခန်း (၃၉၅)

"အသုံးမကျလိုက်တာ"

ပထမမြောက် ဇုန်ရှိ အတိုင်းအတာတစ်ခု၏ ကြားခံနယ်မြေ တစ်နေရာတွင်။

ဂေါ်ဘလင် နတ်ဘုရား၏ မျက်နှာအမူအရာက သူ၏တမန်တော်ထံမှ သတင်းပို့ချက်ကို နားထောင်ရင်း အလွန်တရာ ခက်ထန်သွားလေ၏။

"ငါက သူ့ကို စက်ယန္တရားနဲ့ ပတ်သက်တဲ့ ပစ္စည်းတွေဝယ်ဖို့ပဲ ခိုင်းခဲ့တာကို သူ့ကိုယ်သူ ဘယ်လိုလုပ် တိုက်ရိုက်ကြီး ဖော်ထုတ်ပြလိုက်ရတာလဲ၊ ကျစ်၊ သောက်ကျိုးနည်းပဲ"

သူက ဒေါသတကြီးဖြင့် သူ၏ရာဇလှံတံကို မြေပြင်သို့ ရိုက်ချလိုက်ရာ ဘေးပတ်လည်ရှိ တမန်တော်များမှာ အသက်ပင် ပြင်းပြင်းမရှူရဲကြချေ။

"ချောက်နက် စက်ယန္တရား တည်ဆောက်မှုက ဘယ်လောက်တောင် ကျန်သေးလဲ"

"ကိုးဆယ့်ကိုး ရာခိုင်နှုန်း ပြီးစီးနေပါပြီ၊ အပြင်ဘက် ကိုယ်ထည်ပိုင်းကတော့ ပြီးပြည့်စုံသွားပါပြီ၊ အခုလိုနေတာက ကြီးမြတ်တဲ့ ဂေါ်ဘလင် နတ်ဘုရားဖြစ်တဲ့ အရှင်က နတ်ဘုရားစွမ်းအားတွေ သွင်းပေးဖို့နဲ့ နောက်ဆုံး စက်သွားတပ်ဆင်ဖို့ပဲ ကျန်ပါတော့တယ်"

သူ၏မျက်နှာအမူအရာက အနည်းငယ် ပြေလျော့သွားလေသည်။

သူက ပဲစေ့မည်းလေးများနှင့်တူသော မျက်လုံးများကို မော့ကာ အထက်သို့ ကြည့်လိုက်၏။

ထိုနေရာတွင် တစ်ဆယ့်ငါးမီတာခန့် မြင့်မားသော အနက်ရောင် လူသားပုံစံ စက်ယန္တရားကြီးတစ်ခု မတ်တတ်ရပ်နေလေသည်။

ထိုအနက်ရောင် စက်ယန္တရားကြီးကို ချည်နှောင်မှု အမြောက်အမြားနှင့် ဂေါ်ဘလင်တို့၏ နည်းပညာများဖြင့် ဖုံးအုပ်ထားပေသည်။

၎င်း၏ မူလရုပ်သွင်မှာ ထိုစက်ကိရိယာများအောက်တွင် လုံးဝ နစ်မြုပ်နေတော့၏။

အရောင်မလင်းသေးသော နီရဲသည့် မျက်လုံးတစ်စုံကိုသာ မြင်တွေ့ရလေသည်။

"ဟီးဟီး၊ မိုက်မဲလှတဲ့ လူသားတွေပဲ၊ သူတို့က ချောက်နက် စက်ယန္တရား ဘယ်လောက်တောင် အစွမ်းထက်လဲဆိုတာ နားမလည်ကြဘဲ ဒင်္ဂါးပြား ထောင်ဂဏန်းလောက်လေးနဲ့ ငါ့လက်ထဲကို လဲလှယ်ပေးလိုက်ကြတယ်"

အလိုအလျောက် လည်ပတ်နေသော အနက်ရောင် စက်သွားတစ်ခုက ဂေါ်ဘလင် နတ်ဘုရား၏ လက်ထဲတွင် ရှိနေလေ၏။

သူက ၎င်းဆီသို့ တည့်မတ်စွာ လျှောက်သွားလိုက်ရာ သူ၏ခြေအောက်ရှိ အစိတ်အပိုင်းများက ဂျက်အင်ဂျင်သုံး ယန္တရားတစ်ခုအဖြစ် ပြောင်းလဲသွားပြီး သူ့ကို ချောက်နက် စက်ယန္တရားကြီး၏ နဖူးဆီသို့ ပျံသန်းသွားစေကာ ထိုစက်သွားကို သက်ဆိုင်ရာ အပေါက်ထဲသို့ ထည့်သွင်းလိုက်လေတော့သည်။

"မင်းက ကြီးမြတ်တဲ့ ဂေါ်ဘလင် နတ်ဘုရားရဲ့ စွမ်းအားတွေကို သယ်ဆောင်ပြီး ငါ့ရဲ့ခန္ဓာကိုယ် ဖြစ်လာရမယ်"

"မင်းရဲ့ဆန္ဒက အဓိပ္ပာယ်မရှိဘူး၊ မင်းနဲ့ပတ်သက်သမျှ အရာအားလုံးကို ငါကပဲ ထိန်းချုပ်မှာ"

ဂေါ်ဘလင် နတ်ဘုရား။

အဆင့် C နတ်ဘုရားများအနက် သူက အောက်ဆုံးအဆင့်ဟု သတ်မှတ်ခံရသူဖြစ်ပေသည်။

အခြားနတ်ဘုရားအားလုံးထက် သာလွန်သော ဉာဏ်ပညာကို ပိုင်ဆိုင်ထားသည်ဟု သူက သူ့ကိုယ်သူ ယုံကြည်ထားလေ၏။

သို့သော်လည်း ဂေါ်ဘလင်တစ်ကောင် ဖြစ်နေခြင်း၏ ကန့်သတ်ချက်များနှင့် တမင်တကာ ဖိနှိပ်မှုများကြောင့် သူ ရှေ့ဆက်တက်လှမ်းရန် မဖြစ်နိုင်ခဲ့ချေ။

သူ၏ လက်ရှိအခြေအနေမှ လွတ်မြောက်ရန်အတွက် သူ ရွေးချယ်ခဲ့သောလမ်းစဉ်မှာ ဂေါ်ဘလင် နည်းပညာမှတစ်ဆင့် အမျိုးမျိုးသော အစွမ်းထက် စက်ယန္တရားများကို ဖန်တီးကာ ထိုစက်ယန္တရားများအတွင်းသို့ ကိုယ်တိုင်ဝင်ရောက်၍ ၎င်းတို့၏ "အသားအရေ" အဖြစ် ခံယူရန်ပင် ဖြစ်ပေသည်။

ချောက်နက် စက်ယန္တရားက ၎င်း၏ ကိုယ်ပိုင်အသိဉာဏ် ပျောက်ကွယ်တော့မည်ကို အလိုအလျောက် ခံစားမိသွားကာ ၎င်း၏အမြုတေက ဂေါ်ဘလင် နတ်ဘုရားအား ဆန့်ကျင်ခုခံလိုနေလေသည်။

သို့သော် ၎င်းက အသက်မရှိသော အရာဝတ္ထုတစ်ခုသာ ဖြစ်လေ၏။ ဂေါ်ဘလင် နတ်ဘုရား၏ စွမ်းအားများနှင့် သူ၏ အရုပ်ဆိုးကာ သေးငယ်လှသော ခန္ဓာကိုယ်ကြီးက ၎င်းအတွင်းသို့ ပေါင်းစပ်သွားသည်နှင့်တစ်ပြိုင်နက် ထိုဗီဇစိတ်မှာ လုံးဝ ပျောက်ကွယ်သွားတော့သည်။

ဝုန်း။

"ဟားဟားဟားဟား"

ဂေါ်ဘလင် နတ်ဘုရား၏ ရူးသွပ်စွာ ရယ်မောသံကြီးက ချောက်နက် စက်ယန္တရားကြီး အတွင်းမှ ပဲ့တင်ထပ် ထွက်ပေါ်လာလေ၏။

"ဒါက ငါ အလိုချင်ဆုံး စွမ်းအားပဲ၊ ဒီမြို့တော်က ရထားမောင်းနှင်သူတွေကို ငါ့ရဲ့ အာဟာရတွေအဖြစ် ပြောင်းလဲပစ်ပြီး ငါ့ရဲ့ နတ်ဘုရားနိုင်ငံတော်ကို တည်ထောင်နိုင်သရွေ့ တစ်နေ့ကျရင် ငါ အဆင့် C ကို သေချာပေါက် ကျော်ဖြတ်နိုင်လိမ့်မယ်"

ဂရုန်း ဂျုံး

မြေကြီးတစ်ခုလုံး တုန်ခါသွားလေသည်။

ဂေါ်ဘလင် တမန်တော်များအားလုံးက ဒူးထောက်ကာ ရှိခိုးပူဇော်လိုက်ကြတော့၏။

"ကြီးမြတ်တဲ့ ဂေါ်ဘလင် နတ်ဘုရားက နောက်ဆုံးမှာ အရာအားလုံးကို ပိုင်ဆိုင်ရလိမ့်မယ်"

အချိန် 【၁၀:၁၂:၀၅】

ရဲချီယန်က လဟာပြင် နို့လက်ဖက်ရည်ဆိုင် တစ်ဆိုင်၏ အပြင်ဘက်တွင် ထိုင်နေလေသည်။

သူ၏ သက်တောင့်သက်သာရှိလှသော အမူအရာက မကြာမီ ဖြစ်ပေါ်လာတော့မည့် အန္တရာယ်များနှင့် ပတ်သက်၍ လုံးဝ ဂရုမစိုက်ကြောင်းကို ဖော်ပြနေပေ၏။

ရွှီး။

သူ၏ မျက်နှာချင်းဆိုင်ရှိ ထိုင်ခုံကို တစ်စုံတစ်ယောက်က ဆွဲထုတ်လိုက်လေသည်။

"ကျေးဇူးပြုပြီး ကျွန်တော်... ဒီမှာ ထိုင်လို့ရမလား"

သူက ဘေးပတ်ဝန်းကျင်သို့ ဝေ့ကြည့်လိုက်၏။

အနီးနားတွင် ထိုင်ခုံများစွာ လွတ်နေဆဲပင်။

ရဲချီယန်က လက်ဖက်ရည်ခွက်ကို ချလိုက်ကာ သူ၏ရှေ့မှောက်ရှိ အနည်းငယ် ကြောက်ရွံ့တုန်လှုပ်နေပုံရပြီး ရှင်းပြ၍မရနိုင်သော စိတ်ဓာတ်ကျနေသည့် အငွေ့အသက်များကို ထုတ်လွှတ်နေသော လူငယ်လေးအား ကြည့်လိုက်လေသည်။

"ဒီဆိုင်မှာ ထိုင်ခုံတွေ အများကြီး လွတ်နေသေးတယ်လေ၊ ငါက သူစိမ်းတွေနဲ့ တစ်ဝိုင်းတည်း အတူတူထိုင်လေ့ရှိတဲ့ အကျင့်မရှိဘူးဆိုတော့"

"ကျွန်တော် ခင်ဗျားကို သိတယ်၊ ခင်ဗျားက အော် အော်တိုစ်"

"မဟုတ်ဘူး၊ မဟုတ်ဘူး၊ အဲဒါ မှားတယ်၊ ရဲ... ရဲချီယန်"

နောက်ဆုံးနာမည်ကို အလွန်တိုးညင်းစွာ ပြောလိုက်ခြင်းဖြစ်ပြီး ထိုစိတ်ဓာတ်ကျနေသော လူငယ်လေးနှင့် ရဲချီယန် နှစ်ယောက်သာ ကြားနိုင်လောက်အောင် တိုးညင်းလွန်းလှပေသည်။

ဟင်။

ရဲချီယန်၏ မျက်လုံးများက အနည်းငယ် ကျဉ်းမြောင်းသွားကာ အခြေအနေကို စစ်ဆေးကြည့်လိုက်လေ၏။

မာနတရား ကတ်ပြားက အနိမ့်ဆုံး အဆင့်ဖြင့် အသက်ဝင်နေဆဲဖြစ်ရာ သူ မသိကျွမ်းသော တစ်စုံတစ်ယောက်အနေဖြင့် သူ့ကိုရှာတွေ့ပြီး သူ၏နာမည်ကို ပြောနိုင်ရန်မှာ လုံးဝ မဖြစ်နိုင်ချေ။

သို့သော် ဒီကောင်က ဘယ်သူလဲ။ သူ့ကို သိခဲ့ဖူးကြောင်း သူ မမှတ်မိပေ။

လီဆက်က ဘေးတွင် တိတ်ဆိတ်စွာ ရပ်နေပြီး သူမ၏ နောက်ကျောဘက်တွင် လွင့်မျောနေသော ဆူးချွန်များက အချိန်မရွေး အချိန်စက်ယန္တရား လက်နက်ကိရိယာ အဖြစ်သို့ ပြောင်းလဲရန် အသင့်ဖြစ်နေလေပြီ။

"အာ၊ အထင် အထင်မလွဲပါနဲ့၊ အင်း၊ အို ခဏလေး၊ ခဏလေး စောင့်ပါဦး"

ထိုစိတ်ဓာတ်ကျနေသော လူငယ်လေးက သူ၏ စနစ် အလင်းမျက်နှာပြင်ကို ယက်ကန်ယက်ကန်ဖြင့် ဖွင့်လိုက်လေသည်။ ခေတ္တမျှ ကလိလိုက်ပြီးနောက် သူက ပြန်လည်မော့ကြည့်ကာ တိုးညင်းစွာ ပြောလိုက်၏။

"ကျွန်တော် ခင်ဗျားဆီကို သူငယ်ချင်းဖွဲ့ဖို့ တောင်းဆိုချက် ပို့ထားတယ်... အဲဒါကို လက်ခံပေးလို့ ရနိုင်မလား"

ရဲချီယန်က လီဆက်၏ လှုပ်ရှားမှုများကို တားဆီးလိုက်ကာ သူ၏စနစ် အလင်းမျက်နှာပြင်ကို တိတ်ဆိတ်စွာ ဖွင့်လိုက်လေသည်။ ထိုနေရာတွင် သူငယ်ချင်းဖွဲ့ရန် တောင်းဆိုချက်အသစ် တစ်ခုကို အမှန်တကယ် တွေ့လိုက်ရပေသည်။

ထိုတောင်းဆိုချက်၏ ရင်းမြစ်မှာမူ... 【အာချွမ်း မှ သင့်အား သူငယ်ချင်းအဖြစ် လက်ခံရန် တောင်းဆိုထားပါသည်။ လက်ခံမည်လား။ လက်ခံမည် / လက်မခံပါ】

【ရင်းမြစ် အင်ပါယာအမိန့်တော် အဖွဲ့အစည်း အများသုံး ချက်ဘောက်စ်】

သူက အင်ပါယာအမိန့်တော် အဖွဲ့အစည်းမှ ဖြစ်ပေသည်။

မကြာမီက ရှာယာ ပြောပြခဲ့ဖူးသည်ကို ရဲချီယန် သတိရလိုက်လေ၏။ ဤတစ်ကြိမ် ကောင်းကင်ယံဥယျာဉ် သို့ သူ မသိသော အင်ပါယာအမိန့်တော် အဖွဲ့အစည်း မှ အခြားအဖွဲ့ဝင် နှစ်ဦး ရောက်ရှိနေကြောင်းကိုပင်။

သူ့ရှေ့ရှိ အာချွမ်း ဆိုသူမှာ သူတို့အထဲမှ တစ်ယောက် ဖြစ်လေသည်။

"ငါ့ကို ဘယ်လို ရှာတွေ့သွားတာလဲ"

ရဲချီယန်က ငြင်းဆန်ခြင်းမရှိဘဲ အာချွမ်းကို သူငယ်ချင်းအဖြစ် လက်ခံလိုက်လေ၏။

"အာချွမ်း... မင်းနာမည်က အဲဒီလိုခေါ်တာလား"

အာချွမ်းက အနည်းငယ် စိုးရိမ်တုန်လှုပ်နေပုံရပြီး သူ၏တောင်းဆိုချက်ကို လက်ခံလိုက်သည်ကို မြင်ပြီးမှသာ အနည်းငယ် စိတ်အေးသွားတော့သည်။

သူက စကားပြောရသည်ကို သိပ်နှစ်သက်ပုံမရချေ။ ထို့ကြောင့် သူငယ်ချင်း ချက်ဘောက်စ် မျက်နှာပြင်ကို အသုံးပြုကာ စာရိုက်ပြီး ရဲချီယန်ဘက်သို့ လှည့်ပြလိုက်လေ၏။

【"ဟုတ်ကဲ့၊ အာချွမ်း လို့ပဲ ခေါ်ပါတယ်။ အင်း... ခင်ဗျားကို ရှာတွေ့ခဲ့တာ ကျွန်တော်မဟုတ်ဘူး၊ ကျွန်တော့်ရဲ့ တစ္ဆေဝိညာဉ်လေးပါ"】

အာချွမ်းက လက်လှမ်း၍ သူ၏ပခုံးကို ပုတ်လိုက်လေသည်။

ကာတွန်းရုပ်လေးကဲ့သို့ ချစ်စရာကောင်းသော တစ္ဆေဝိညာဉ်လေးတစ်ကောင်က ထိုနေရာတွင် ပေါ်လာကာ ရဲချီယန်ကို လက်ပြနှုတ်ဆက်ပြီးနောက် ပျောက်ကွယ်သွားတော့သည်။

【"ဪ ဟုတ်သားပဲ၊ ကျွန်တော့်ရဲ့ ကတ်ပြား အစီအစဉ် က တစ္ဆေဝိညာဉ် ကတ်ပြား ပါ။ အကယ်၍ ခင်ဗျား အဲဒီကမ္ဘာမှာ ရှာတွေ့ခဲ့မယ်ဆိုရင် ကျွန်တော့်ကို ရောင်းပေးလို့ရပါတယ်။ အစွမ်းကုန် ရိုးသားမှုအပြည့်နဲ့ ကျွန်တော် ဝယ်ယူပါ့မယ်။"】

【"သေချာတာပေါ့၊ အကယ်၍ ကျွန်တော် နတ်ဆိုး ကတ်ပြား ကို ရှာတွေ့ခဲ့ရင်လည်း ခင်ဗျားကို ချက်ချင်း အသိပေးပြီး ရောင်းပေးပါ့မယ်။"】

【"အစ်မကြီး ကျူရှင်းထူက ဒါက အဖွဲ့အစည်းအတွင်းက အပြန်အလှန် အကူအညီပေးရေးပဲလို့ ပြောခဲ့တယ်လေ..."】

တစ္ဆေဝိညာဉ် ကတ်ပြား။

သူ တစ်ခါမှ မကြားဖူးသော နောက်ထပ် ကတ်ပြား အစီအစဉ် တစ်ခုပင်။

သူက စကားမပြောသဖြင့် ရဲချီယန်ကလည်း စနစ် မျက်နှာပြင်၏ သီးသန့် ချက်ဘောက်စ် ကိုသာ အသုံးပြုလိုက်လေ၏။

【"ဒါနဲ့ မင်းက ငါ့ကို တစ်ခုခုအတွက် လာရှာတာလား။ ရှင်းရှင်းလင်းလင်း ပြောရရင် ငါက ကျူရှင်းထူရဲ့ အစီအစဉ်တွေကို လုံးဝ စိတ်မဝင်စားဘူး။ ပြီးတော့ ငါ ဒီကိုရောက်နေတာကလည်း သူမနဲ့ ဘာမှမဆိုင်ဘူး"】

အာချွမ်းက ခေတ္တမျှ ရပ်တန့်သွားလေသည်။

【"မဟုတ်ပါဘူး... အစ်မကြီး ကျူရှင်းထူက အဖွဲ့အစည်းထဲက တစ်ယောက်ယောက်နဲ့ တွေ့ရင် သွားနှုတ်ဆက်သင့်တယ်၊ ပြီးတော့ သူငယ်ချင်းအဖြစ် လက်ခံခိုင်းလို့ ရနိုင်လောက်တယ်လို့ ပြောခဲ့လို့ပါ။ ဒါကြောင့် ကျွန်တော် ရောက်လာတာပါ"】

【"ဒါပေမဲ့ ခင်ဗျားက တကယ်ကို အံ့မခန်းပဲ..."】

သူ၏ မျက်လုံးများထဲတွင် မနာလိုမှု ကင်းမဲ့သော အားကျခြင်းများ ပြည့်နှက်နေလေ၏။

【"အဆင့်မြင့် ဘူတာရုံကမ္ဘာတစ်ခုကို ဖြတ်ကျော်ပြီးတဲ့နောက်မှာ ကျွန်တော် အင်ပါယာအမိန့်တော် ရဲ့ ချက်ဘောက်စ် မှတ်တမ်းတွေကို အကြမ်းဖျင်း ကြည့်လိုက်သေးတယ်။ ဘယ်သူကမှ ကျွန်တော့်အကြောင်း မပြောကြပေမဲ့... ခင်ဗျား အဖွဲ့အစည်းထဲ ဝင်လာတဲ့ အချက်အလက်တွေကို ကျွန်တော် တွေ့လိုက်ရတယ်..."】

【"ခင်ဗျားက တကယ်တော့ ဒီအသုတ်က လူသစ် ရထားမောင်းနှင်သူ တစ်ယောက်ပဲကို... အခုဆို ကတ်ပြား အစီအစဉ် ခြောက်ခု၊ ခုနစ်ခုလောက်တောင် ရှိနေပြီ။ ကျွန်တော်က လွန်ခဲ့တဲ့ သုံးနှစ်က အသုတ်ကပါ၊ ဒီနှစ်တွေအကုန်လုံး ကြာပြီးတဲ့အထိကို ကျွန်တော့်ဆီမှာ ခြောက်ခုပဲ ရှိသေးတာ..."】

【"အာ၊ ကျွန်တော် စကားတွေ နည်းနည်း များသွားပြီ။ တကယ်တော့ ကျွန်တော် ပြောချင်တာက..."】

အာချွမ်းက သူ၏လှုပ်ရှားမှုများကို ရပ်တန့်လိုက်ကာ ခေါင်းမော့လာပြီး ရဲချီယန်အား သူ၏ စိတ်ဓာတ်ကျနေသော မျက်လုံးများဖြင့် စိုက်ကြည့်ရင်း ပြောလိုက်လေသည်။

"ဒီကမ္ဘာမှာ နတ်ဘုရားတွေ ရှိနေတယ်။ ခင်ဗျား၊ ခင်ဗျား သတိထားဖို့ လိုတယ်။ ကျွန်တော် နတ်ဘုရားတစ်ပါးကို သွားသတ်မလို့။ အဲဒါက၊ အဲဒါက ခင်ဗျားကိုပါ ထိခိုက်လာနိုင်တယ်။ ခင်ဗျားဆီမှာ အဲဒီနဂါးကြီး ရှိနေရင်တောင်မှ အတူတူပဲ..."