အခန်း ၄၀၁

အခန်း ၄၀၁ ချောက်နက် စက်ယန္တရားကြီး

အမည်းနှင့် အဖြူရောင်။

စွမ်းအားမြောက်မြားစွာဖြင့် အဆင့်မြှင့်တင်ထားသော အရောင်နှစ်မျိုး ယှက်နွယ်နေသည့် သံချပ်ကာဖောက်ကျည်ဆန်သည် ၎င်း၏အထွတ်အထိပ်သို့ ရောက်ရှိနေချေပြီ။

ဒိုင်း—

ကြည်လင်ပြတ်သားကာ နားဝင်ပီယံရှိလှသော အသံတစ်ခု ထွက်ပေါ်လာ၏။

ပြင်ပဆူညံသံ ကင်းစင်နေသည့် သေနတ်ပစ်ခတ်သံ တစ်ချက်သာဖြစ်ပေသည်။

ကျည်ဆန်တစ်တောင့်တည်းနှင့်ပင် ဂေါ်ဘလင်နတ်ဘုရား၏ ဦးခေါင်းခွံကို ဖောက်ထွင်းသွားလေ၏။

ပုံပျက်ပန်းပျက်နှင့် ပြင်းထန်စွာ နာကျင်ခံစားနေရရင်း ၎င်း၏ပါးစပ်ကြီးကို ဟင်းလင်းဖွင့်ကာ အသံတိတ် ညည်းတွားယုတ်မာလိုက်လေတော့သည်။

အရေပြားအောက်မှ အမည်းနှင့် အဖြူရောင် အလင်းတန်းတို့သည် ဖြည်းညင်းစွာ အပြင်ဘက်သို့ ထိုးဖောက်ဆူပွက်လာချေ၏။

"အား"

နောက်ဆုံးတွင် ဂေါ်ဘလင်နတ်ဘုရားသည် ဘဝ၏နောက်ဆုံးအော်ဟစ်သံကို မြည်တမ်းသွားလေတော့သည်။

ဝုန်း—

သွေးရောင်လျှပ်စီးကြောင်းတို့ ကောင်းကင်ယံထက် ဖြတ်သန်းလက်ခနဲ ဖြစ်သွားချေ၏။

မြေပြင်ထက်မှ အလင်းတန်းတစ်ခု ထိုးတက်သွားကာ ကောင်းကင်ယံကို ဖုံးလွှမ်းထားသည့် မိုးကြိုးတိမ်တိုက်များကို ဖောက်ထွင်းသွားလေသည်။

ယင်းအခိုက်အတန့်တွင် ဥယျာဉ်ကြယ်၏ ထောင့်ကွက်တိုင်းသည် ထိုကောင်းကင်ထိုးခွဲသွားသော အလင်းတန်းကြီးကို မျက်မြင်ကိုယ်တွေ့ ကြုံလိုက်ကြရပေ၏။

"ဒီလောက်တောင် မြန်တာလား၊ နတ်ဘုရားတစ်ပါး ကျဆုံးသွားပြီပဲ"

"ဘယ်သူများလဲ"

"အင်ပါယာအမိန့်တော်အဖွဲ့အစည်းက နတ်ဆိုးနဂါး စက်ယန္တရားလား"

"ဒီလောက်တောင် မြန်နေတာလား၊ သူ ဘယ်လိုလုပ်လိုက်တာလဲ၊ အင်ပါယာအမိန့်တော်အဖွဲ့အစည်းရဲ့ ကောင်းကင်တမန်တွေတောင် သူတို့ရဲ့တိုက်ပွဲတွေကို မပြီးပြတ်သေးဘူးလေ၊ သူ့ရဲ့စွမ်းအားက ကောင်းကင်တမန်ထက်တောင် သာလွန်နေပြီလား"

လူအများက ကောင်းကင်ယံသို့ မော့ကြည့်လိုက်ကြသည်။

ကောင်းကင်ယံကို ဖောက်ထွင်းသွားသော ထိုအလင်းတန်းကြီးကို စိုက်ကြည့်နေကြပေ၏။

လက်ရှိတွင် နတ်ဘုရားတစ်ပါးနှင့် တိုက်ခိုက်နေသည့် ရှာယာပင်လျှင် တစ်ခဏမျှ ကြက်သေလွတ်သွားရလေသည်။

သူမက တီးတိုးရေရွတ်လိုက်၏။

"ဘုရားစူးကတ်ပြားတစ်ခုပဲ..."

ခါးသက်သက် အမူအရာတစ်ခု သူမ၏မျက်နှာထက် ပေါ်လာကာ ခေါင်းကို ခပ်ဖွဖွ ခါယမ်းလိုက်လေသည်။

"ရိုးရိုးသားသားပြောရရင် ငါ စိတ်ပူနေခဲ့တာတွေက အလကားဖြစ်သွားခဲ့တာပဲ..."

ရှာယာ၏တစ်ဖက်တွင် အမည်းရောင် သတ္တုတုံးများ ဖုံးလွှမ်းထားသည့် အော့ပ်ဆီဒီယန်နတ်ဘုရားက သူမ၏ဟာကွက်ကို မြင်လိုက်ရသဖြင့် ချက်ချင်း ဝမ်းသာအားရဖြစ်သွားကာ ရှာယာကို သတ်ဖြတ်ရန် စွမ်းအားအားလုံးကို စုစည်းလိုက်ချေ၏။

"လူသား... သေစမ်း"

"ဟက်"

ရှာယာက စိတ်ကို ပြန်လည်စုစည်းလိုက်ပြီး သူမ၏မျက်လုံးများထဲတွင် မာနတရားနှင့် ရူးသွပ်မှုတို့ ပြည့်နှက်သွားလေသည်။

ဒိုင်း—

သူမက ရှောင်တိမ်းခြင်းလည်း မရှိသလို တိမ်းရှောင်သွားခြင်းလည်း မရှိချေ။ သူမက ထိုးနှက်ချက်တစ်ခုကို ပစ်လွှတ်လိုက်ပေသည်။

သူမ၏ မြင့်မြတ်သော သံမဏိလက်အိတ်က လေထက်တွင် ဧရာမ ကြက်ခြေခတ်ကြီးတစ်ခု ရိုက်ခတ်သွားစေ၏။

လက်သီးတစ်ချက်တည်းနှင့်ပင် အော့ပ်ဆီဒီယန်နတ်ဘုရား၏ လက်တံတစ်ခုလုံးကို ဖုန်မှုန့်အဖြစ် ကြေမွသွားစေတော့သည်။

"လူငယ်တစ်ယောက်ရဲ့ ကျော်တက်တာကို ခံရတာ တော်တော် ရှက်စရာကောင်းတာပဲ၊ ငါ အခု အရမ်း ဒေါသထွက်နေပြီ"

ချက်ချင်းပင် သူမက မရပ်မနား ဖိအားပေး တိုက်ခိုက်တော့၏။ ရှေ့သို့ ပြေးဝင်သွားလေသည်။

လက်သီးတစ်ချက်၊ နှစ်ချက်၊ သုံးချက်... အော့ပ်ဆီဒီယန်နတ်ဘုရား၏ ခန္ဓာကိုယ်ကြီးသည် အတုံးအတစ် ကြေမွပျက်စီးသွားလေတော့သည်။

ရှာယာသာမက နတ်ဘုရားများနှင့် တိုက်ခိုက်နေကြသည့် အခြားသူများကလည်း ဤအရာအားလုံးကို မျက်မြင်ကြုံတွေ့ခဲ့ကြရသည်။

တိုက်ခိုက်ရေးအခြေအနေတွင် ရှိနေသည့် အာချွမ်း၌ အခြားတွေးတောမှု မရှိသော်လည်း ချိုင်မင်ကမူ ကွာခြားပေ၏။

သူ၏အမူအရာက သိပ်မကောင်းလှချေ။

"အင်ပါယာအမိန့်တော်က... အရမ်း အားကောင်းလွန်းတယ်..."

ချိုင်မင်က အင်ပါယာအမိန့်တော်ကို ကြောက်ရွံ့နေခြင်း မဟုတ်သလို မနာလိုဖြစ်နေခြင်းလည်း မဟုတ်ပေ။

သူက အင်ပါယာအမိန့်တော်အဖွဲ့အစည်းထဲ၌ ရှိနေသည့် သူ၏မိတ်ဆွေ ဖန်ဟော့ ဒီကိစ္စကြောင့် သေဆုံးသွားမည်ကို အလွန် စိုးရိမ်ပူပန်နေခြင်းသာ ဖြစ်သည်။

အခြားသူများ ဘာတွေးနေမှန်း ရဲချီယန် မသိခဲ့ချေ။

ဤအခိုက်အတန့်တွင် သူ၏စစ်မြေပြင်ထက်၌မူကား။

တိုက်ခိုက်နေဆဲ ဂေါ်ဘလင်များ အားလုံးသည် ကြီးမားလှသော ဝမ်းနည်းမှုနှင့် နာကျင်မှုကို ခံစားလိုက်ကြရပေ၏။

အဘယ့်ကြောင့်ဆိုသော်။

သူတို့၏နတ်ဘုရား။

တကယ်ကြီး သေဆုံးသွားခဲ့ပြီ ဖြစ်သောကြောင့်ပေတည်း။

【ဒင်း... ဒင်းဒေါင်—】

【နတ်ဘုရား ID — C၉၅ — ဂေါ်ဘလင်၊ ခန္ဓာကိုယ်နှင့် ဝိညာဉ်အသိ အပြည့်အဝ ကျဆုံးသွားပါပြီ】

【နတ်ဘုရားကို သတ်ဖြတ်သူ】

【ရထားမောင်းနှင်သူ ID: E၃၁၁၀၂ ရဲချီယန်】

【ပါဝင်ကူညီမှု: ၁၀၀%】

【သင်သည် အတုအယောင် နတ်ဘုရားတစ်ပါးကို သတ်ဖြတ်နိုင်သည့် စွမ်းဆောင်ရည်ကို အောင်မြင်စွာ လုပ်ဆောင်နိုင်ခဲ့ပါပြီ၊ သင်၏လက်ရှိတွင် 【ဘုရားသခင်ကို ပြစ်မှားစော်ကားသူ】 ဂုဏ်ပုဒ် ပိုင်ဆိုင်ထားပြီးဖြစ်ကြောင်း စနစ်က ထောက်လှမ်းတွေ့ရှိရပါသည်၊ ထို့ကြောင့် ဤဂုဏ်ပုဒ်၏ စွမ်းရည်များအပေါ် ထပ်ဆောင်း အဆင့်မြှင့်တင်မှုတစ်ခု သက်ရောက်သွားပါမည်】

【ဘုရားသခင်ကို ပြစ်မှားစော်ကားသူ】

【နတ်ဘုရားအငွေ့အသက် ရှိသော မည်သည့် သက်ရှိကိုမဆို ထပ်ဆောင်း ပျက်စီးဆုံးရှုံးမှု ၄၀၀% မှ ၅၀၀% သို့ တိုးမြှင့်ပေးသည်】

【ဒင်း ဒင်း၊ သင်၏ရထားအဆင့် နိမ့်လွန်းနေပါသည်၊ လုပ်ငန်းစဉ်ခုံက နတ်ဘုရား၏ ရုပ်အလောင်းကို ပြန်လည်သိမ်းဆည်း၍ မရနိုင်ပါ】

【ထို့ကြောင့် စနစ်က ဤအတုအယောင် နတ်ဘုရား၏ စွမ်းအားကို သင့်အတွက် ပြန်လည်သိမ်းဆည်းပေးပါမည်၊ ဒင်း ဒင်း—】

【ပြန်လည်သိမ်းဆည်းမှု ပြီးစီးပါပြီ】

【ကျေးဇူးပြု၍ သင်၏စာတိုက်ပုံးကို စစ်ဆေးပါ၊ နတ်ဘုရားကို သတ်ဖြတ်သူအဖြစ် သင်၏ဆုလာဘ်ကို ထုတ်ပေးလိုက်ပါပြီ】

ရဲချီယန်က အနည်းငယ် ညောင်းညာနေသည့် သူ၏လက်ကောက်ဝတ်နှင့် တုန်ရီနေသော လက်မနှင့် လက်ညှိုးကြားနေရာကို ပွတ်သပ်လိုက်ရင်း သူ၏မျက်နှာထက်တွင် စိတ်လှုပ်ရှားမှုတို့ ပြည့်နှက်နေပေ၏။

သူ အောင်မြင်ခဲ့ပြီပေတည်း။

သူ၏စွမ်းအားအပြည့်နှင့် ပြည့်စုံသည့် နတ်ဘုရားတစ်ပါးကို ကိုယ်တိုင် ကိုယ်ကျ သတ်ဖြတ်နိုင်ခဲ့ချေပြီ။

ယခင်က သူ၌ နတ်ဘုရားသတ်ဖြတ်သည့် မှတ်တမ်း ရှိခဲ့သော်လည်း ၎င်းက ပုန်ကန်မှု၏ ပြည်နှင်ဒဏ်ပေးခြင်း အကျိုးသက်ရောက်မှုကြောင့် ဖြစ်ဖြစ်၊ သို့မဟုတ် သူက ပြည့်စုံသော နတ်ဘုရားတစ်ပါးကို ရှင်းလင်းခဲ့ခြင်း မဟုတ်သည့်အတွက်ကြောင့် ဖြစ်ဖြစ်သာ ဖြစ်ပေသည်။

သို့သော် ယခုတွင်မူ သူ၏စွမ်းအားအပြည့်ဖြင့် လုပ်ဆောင်နိုင်ခဲ့ပြီ ဖြစ်၏။

အရာအားလုံးကို ကုန်ခမ်းသွားစေသည့် ထိုးနှက်ချက်တစ်ခုဖြင့် နတ်ဘုရားသတ်ဖြတ်ခြင်းကို အမှန်တကယ် အောင်မြင်ခဲ့ခြင်းပေတည်း။

ဤဂေါ်ဘလင်နတ်ဘုရားက နတ်ဘုရားများထဲတွင် အနိမ့်ဆုံးဖြစ်နေပါစေ၊ သို့မဟုတ် ဤကောင်က မည်မျှပင် အားနည်းနေပါစေ ဂရုစိုက်နေစရာ မလိုချေ။

အနိုင်ရသူက ဘုရင်ဖြစ်ပြီး အနိုင်ရသူက အားလုံးကို သိမ်းပိုက်ရပေမည်။

နောက်ဆုံးတွင် သူ အသုံးပြုနေသည့် ချောက်နက်စက်ယန္တရားကြီးသာ မရှိခဲ့လျှင် ရဲချီယန်က ဤကောင်ကို အစကတည်းက အနီးကပ်ဝင်ရောက်ခွင့် ပေးခဲ့မည် မဟုတ်ပေ။ နေရာရွှေ့ပြောင်းအမှတ်အသား၏ ပြည်နှင်ဒဏ်ပေးခြင်းကို အသုံးပြုလိုက်တာက ပိုမကောင်းပေဘူးလား။

အကယ်၍ သူက ၎င်းကို လွင်တီးခေါင်ပြင်ဆီ ပြည်နှင်ဒဏ်ပေးလိုက်မည် ဆိုလျှင်တောင် သူက နတ်ဘုရားသတ်ဖြတ်ခြင်းကို ပြီးမြောက်သည်ဟု သတ်မှတ်ခံရမည် မဟုတ်ပါလော။

ရဲချီယန်က အထောက်အကူပြု စွမ်းရည်များ၏ အခန်းကဏ္ဍကို ပစ်ပယ်တတ်သည့် လူမိုက်မျိုး မဟုတ်ခဲ့ချေ။

"ဟူး... တော်တော် ပင်ပန်းသွားတာပဲ"

"ငါ့မှာ ပုံမှန် တိုက်ခိုက်ရေး နည်းလမ်းတွေ လိုအပ်နေသေးတယ်... အခုဟာတွေက စွမ်းအင် စားသုံးမှု အရမ်း များလွန်းတယ်"

ရဲချီယန်၏ စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ခွန်အားတို့က အလွန်နိမ့်ကျသည့် အခြေအနေသို့ ကျဆင်းသွားခဲ့ပြီး အထူးသဖြင့် သူ၏ရုပ်ပိုင်းဆိုင်ရာ ကိုယ်ခံစွမ်းအားပင် ဖြစ်ပေသည်။

အကန့်အသတ်ကျော်လွန်သူအဖြစ် ပြောင်းလဲကာ တရားသူကြီး၏ စွမ်းအားကို အသုံးပြုခြင်းက သူ့ကို အလွန်အမင်း ကုန်ခမ်းနွမ်းနယ်သည့် အခြေအနေဆီသို့ နောက်တစ်ဖန် ကျရောက်သွားစေခဲ့ချေပြီ။

အမှန်တကယ်တွင် အဆင့်မြင့်အသွင်ကူးပြောင်းခြင်းနှင့် အမျိုးမျိုးသော အဖြစ်အပျက်များကြောင့် သူ ပိုင်ဆိုင်ထားသည့် အရာများမှာ အနည်းငယ် အဆင့်မြင့်လွန်းနေခဲ့သည်။

ကတ်ပြားအစီအစဉ်မှသည် သူ သောက်သုံးခဲ့သည့် ဆေးရည်၊ အမျိုးမျိုးသော အထူးစွမ်းရည်များအပြင် ပစ္စည်းများနှင့် ဆင့်ခေါ်ကောင်များအထိ... ရဲချီယန် ပိုင်ဆိုင်ထားသည့် ကျိန်စာသင့်နတ်ဆိုးမျက်လုံး တစ်ခုတည်းကပင် ရထားမောင်းနှင်သူ အများစု တစ်သက်လုံး မြင်တွေ့ဖူးမည် မဟုတ်သော အရာတစ်ခု ဖြစ်ပေ၏။

ယခုအခိုက်အတန့်၌ ပေါက်ကွဲထွက်လာသည့် စွမ်းအားကိုသာ ထည့်တွက်မည်ဆိုလျှင် ရဲချီယန်ကို ထိပ်တန်းအဆင့်ဟု ခေါ်ဆိုနိုင်ပေသည်။

ရေရှည် တောင့်ခံနိုင်စွမ်းနှင့် ပတ်သက်၍မူ။

ရဲချီယန်၏ အမျိုးမျိုးသော စွမ်းရည်များက အလွန်တရာ အားကောင်းလှသည်။ ယခု သူ့အတွက် အလိုအပ်ဆုံးအရာမှာ အခြေခံအကျဆုံး ကိန်းဂဏန်း တန်ဖိုးများသာ ဖြစ်ချေ၏။

ပုန်ကန်မှု၏ ပေါင်းစည်းခြင်းမှ ထွက်ခွာလိုက်သည်။

မျက်ရည်နီက သူ၏အနီးတွင် ပြန်လည်ပေါ်လာကာ ကောင်းကင်ယံမှ မိုးရေများကို ကြည့်လိုက်ပြီးနောက် ဘယ်ကမှန်းမသိ ရောက်လာသည့် အနီရောင်ထီးလေးကို ထုတ်၍ ရဲချီယန်အား လေနှင့် မိုးဒဏ်မှ ကာကွယ်ပေးလိုက်လေသည်။

အောက်ဘက်ရှိ တိုက်ပွဲက ဆက်လက် ဖြစ်ပွားနေဆဲပေတည်း။ ကျန်ရစ်နေသည့် ဂေါ်ဘလင်များသည် သူတို့၏နတ်ဘုရား ကျဆုံးပြီးနောက် ရူးသွပ်သည့် အခြေအနေသို့ ရောက်ရှိသွားကာ ငိုကြွေးရင်း ဂေါ်ဘလင်နတ်ဘုရားအတွက် ကလဲ့စားချေရန် အသေအလဲ ကြိုးပမ်းနေကြတော့၏။

သို့သော်လည်း သူတို့က စက်ရုပ်များနှင့် နတ်ဆိုးများ ဖွဲ့စည်းထားသည့် ခံစစ်ခံတပ်ကို မဖောက်ထွင်းနိုင်ခဲ့ကြချေ။ သူတို့၏နောက်ဆုံး ကံကြမ္မာမှာ သေဆုံးခြင်း တစ်ခုတည်းသာ ဖြစ်ပေတော့သည်။

ဤတစ်ကြိမ်တွင် လောဘတကြီးစားသောက်ခြင်းနှင့် ကျီးကန်းနတ်ဆိုးတို့ ပျော်ရွှင်စွာ ဝါးမျိုစားသောက်ခဲ့ကြပေ၏။

စာတိုက်ပုံးက ပွင့်လာသည်။

လက်ခနဲ လင်းလက်နေသည့် အိုင်ကွန်က ရဲချီယန်၏ နတ်ဘုရားသတ်ဖြတ်မှု စွမ်းဆောင်ရည်ကို ချီးကျူးနေသည့်အလား ထင်မှတ်ရပေသည်။

အလင်းမျက်နှာပြင်တစ်ခု ပေါ်လာကာ မေးလ်ထဲတွင် နတ်ဘုရားသတ်ဖြတ်ခြင်းအတွက် လက်ဆောင်များ ရှိနေလေ၏။

【ဂေါ်ဘလင်စက်ယန္တရား အမြုတေ】

【ဂေါ်ဘလင်နတ်ဘုရား၏ သေဆုံးမှုမှ ပြောင်းလဲလာသည့် အထူး အမြုတေတစ်ခုဖြစ်ပြီး နတ်ဘုရားကို သတ်ဖြတ်သူ၏ စွမ်းရည်များအပေါ် မူတည်၍ စနစ်က အကဲဖြတ်ပေးထားပါသည်】

【မည်သည့် စက်ယန္တရားသက်ရှိအတွက်မဆို တပ်ဆင်သည့်အခါ ၎င်းစက်ယန္တရားသက်ရှိနှင့် သင့်လျော်သော အထူးပစ္စည်းတစ်ခုအဖြစ် ပြောင်းလဲသွားနိုင်ပါသည်】

【မှတ်ချက် နတ်ဘုရားအမြုတေ ပိုင်ဆိုင်ထားပြီးသော စက်ယန္တရားသက်ရှိများအပေါ် အသုံးပြုရန် အကြံပြုအပ်ပါသည်၊ အသုံးပြုပြီးနောက် နတ်ဘုရားအမြုတေ ပဲ့တင်ထပ်မှု ဖြစ်ပေါ်လာပြီး ၎င်းစက်ယန္တရားသက်ရှိ၏ အရည်အသွေးများကို တိုးမြှင့်ပေးပါလိမ့်မည်】

ထုံးစံအတိုင်း အမြုတေ ဆုလာဘ်တစ်ခုသာ ဖြစ်ပေ၏။

ထူးထူးခြားခြားတော့ မရှိလှချေ။

သေချာပေါက် ဤအရာက ဗီလိန်အတွက် နောက်တစ်ကြိမ် အသုံးပြုရမည့်အရာ ဖြစ်ပေသည်။

ဂေါ်ဘလင်တစ်ကောင်က ဘယ်လို ပစ္စည်းမျိုးအဖြစ် ပြောင်းလဲသွားနိုင်မလဲ ဆိုတာကိုတော့... ကောင်းပြီလေ။

အစကတည်းက ရဲချီယန်က ဂေါ်ဘလင်နတ်ဘုရား၏ အမြုတေကို သိပ်ပြီး မမက်မောခဲ့ပေ။

သူ အမှန်တကယ် လိုချင်ခဲ့သည့်အရာက ယခု အမဲလိုက်စက်ယန္တရားနဂါး၏ ရှေ့တွင် ရပ်တည်နေပေပြီ။

【ချောက်နက်စက်ယန္တရားကြီး (အိပ်မောကျနေသော အခြေအနေ) (အမည်ပြောင်းလဲနိုင်သည်)】

【မျိုးစိတ် လွင်တီးခေါင်ပြင် မျိုးစိတ်】

【လက်ရှိ အခြေအနေ ဝန်ပိပြီး ပျက်စီးနေသည်】

【တပ်ဆင်ထားမှု ဂေါ်ဘလင် နည်းပညာ... (အားလုံး အသုံးမဝင်တော့ပါ)】

【ကိုင်ဆောင်ထားသော အထူးပစ္စည်း ချောက်နက်စက်သွား】

【မှတ်ချက် ၎င်းသည် လွင်တီးခေါင်ပြင်မှ လာသည်】

【မှတ်ချက် ၂ ၎င်းနှင့် ချိတ်ဆက်ရန် ချောက်နက်စက်သွားကို အသုံးပြုပါ】

【မှတ်ချက် ၃ ကျေးဇူးပြု၍ သတိပြုပါ၊ သင်က ချောက်နက်ကြီးထဲသို့ စူးစိုက်ကြည့်နေသည့်အခါ သူတို့က သင့်ကို မကြည့်ရဲတာမျိုး မဟုတ်ခဲ့ရင် ချောက်နက်ကြီးကလည်း သင့်ကို ပြန်လည် စူးစိုက်ကြည့်နေပါလိမ့်မည်】

【ချောက်နက်စက်သွား ချိတ်ဆက်မှု အခြေအနေ မရှိပါ】