အခန်း ၄၀၇

အခန်း ၄၀၇ မရဏလောက၏ တီးတိုးစကားသံများ

ဝုန်း... ဝုန်း—

ဝီ—

လေဟာနယ်က သူ၏ရှေ့တွင် ပေါ်ထွက်လာစဉ် ရဲချီယန်က ရထားခေါင်းတွဲအရှေ့၌ ရပ်ကာ ပြတင်းပေါက်ပြင်ပရှိ ပုံပျက်ပန်းပျက် ဖြစ်နေသော လေဟာနယ်ပြင်ကို စိုက်ကြည့်နေလေ၏။ နောက်ဆုံးတွင်တော့ သူ ထွက်ခွာရတော့မည် ဖြစ်ပေသည်။

"စတင်ရွှေ့ပြောင်းမယ်"

ရွေးချယ်မှုကို နှိပ်လိုက်သည့် အခိုက်အတန့်၌ပင် ရထား၏ ဥဩဆွဲသံက ကျယ်လောင်စွာ မြည်ဟည်းသွားလေသည်။

သံလမ်းများက ဆန့်ထွက်သွားကာ လေဟာနယ်ကို ဖောက်ထွင်းသွားချေ၏။

ပြတင်းပေါက်ပြင်ပရှိ မြင်ကွင်းက ရင်းနှီးပြီးသားဖြစ်သော အဆုံးအစမရှိသည့် လွင်တီးခေါင်ပြင်ကြီးဆီသို့ နောက်တစ်ဖန် ပြန်လည် ရောက်ရှိသွားပေတော့သည်။

မကောင်းဆိုးဝါးများက ရထားနောက်သို့ လိုက်လံ ပြေးဆွဲနေကြ၏။

ကောင်းကင်ထက်တွင် ပူပြင်းကျက်လောင်နေသော နေမင်းကြီး တန်းလန်းချိတ်ဆွဲနေပြီး လေပြင်းများက လေထက်တွင် တိုက်ခတ်နေသည်။

သို့သော်လည်း ဤကြမ်းတမ်း ခက်ထန်လှသော ကမ္ဘာကြီးက ရဲချီယန်ကို ရှင်းပြမရနိုင်သည့် စိတ်အေးချမ်းမှုတစ်ခု ယူဆောင်လာပေးနေချေ၏။

"ဟူး... နောက်ဆုံးတော့ ငါ ပြန်ရောက်လာခဲ့ပြီပဲ၊ စဉ်းစားကြည့်တော့ မြို့တော်ဆီ သွားတဲ့ ငါ့ရဲ့ မူလရည်ရွယ်ချက်က အနားယူဖို့ မဟုတ်ဘူးလား၊ ဘာကြောင့်များ မြို့တော်တစ်ခုကို သွားတိုင်း ဘူတာရုံကမ္ဘာတွေမှာထက် ပြဿနာ ပိုပိုများလာသလို ခံစားနေရတာလဲ"

ရဲချီယန်က ခေါင်းကို ကုတ်လိုက်လေသည်။

ဒီအတိုင်းသာ ဆက်သွားနေမည်ဆိုလျှင် သူက မြို့တော်များကို ဖျက်ဆီးသူ ဟူသော ဂုဏ်ပုဒ်ကိုပင် ရရှိသွားလောက်ပေ၏။

နေသာသော အရုပ်လေးက လက်ရှိ ရာသီဥတု အခြေအနေကို ဖော်ပြလာသည်။ 【ဒီနေ့ ရာသီဥတု အပူလှိုင်းလေပြင်း နေ့】။

အပူချိန်ထိန်း ကိရိယာများ မရှိသော ရထားစက်ခေါင်းတွဲ အရှေ့ပိုင်းမှာ အလျင်အမြန်ပင် အတော်လေး ပူပြင်းလာခဲ့ချေပြီ။

ဒီနေ့တွင် နောက်ထပ် ဘူတာရုံတစ်ခုဆီ ဝင်ရောက်ရန် ရဲချီယန် မရည်ရွယ်ထားချေ။

အဘယ့်ကြောင့်ဆိုသော် ကောင်းကင်ယံဥယျာဉ်၌ သူ အများအပြား ရရှိခဲ့သဖြင့် အရာအားလုံးကို သေချာ စနစ်တကျ စီစဉ် သိုလှောင်ရန် လိုအပ်နေသောကြောင့် ပင်တည်း။

ထို့အပြင် ရထား၏ အဆင့်။

ကျောက်လင်ထံမှ ရထားဒင်္ဂါး ခုနစ်ရာကျော် ရရှိခဲ့သောကြောင့် လက်ရှိတွင် သူ့၌ အတော်အတန် များပြားသော ဓနဥစ္စာ ပိုင်ဆိုင်နေပြီဖြစ်ရာ နောက်တစ်ကြိမ် ရထားကို အဆင့်မြင့် အသွင်ကူးပြောင်းခြင်း ပြုလုပ်ရန် လုံးဝ အဆင်ပြေနေပေပြီ။

"ပထမဆုံး... ဒီဟာကို အရင် ဖြေရှင်းရမယ်"

ရဲချီယန်သည် အပူချိန်ထိန်း ရထားတွဲဆီသို့ ပြန်သွားခဲ့၏။

လီဆက်၏ ရင်ခွင်ထဲတွင် ပိုက်ပွေ့ထားသော အဝတ်ထုပ်ထားသည့် ပစ္စည်းကို သူ လှမ်းယူလိုက်သည်။

ဤသည်မှာ ကျူရှင်းထူ ချန်ထားခဲ့သော ပစ္စည်းပင် ဖြစ်ပေသည်။ အစပိုင်းတွင် သူက သိပ်ပြီး မလိုချင်ခဲ့သော်ငြား စူးစမ်းလိုစိတ် တိုက်တွန်းမှုကြောင့် ကျီးကန်းနတ်ဆိုးကို ဆင့်ခေါ်ကာ အဝတ်စ၏ ထောင့်တစ်နေရာကို ဆွဲလှန်ခိုင်းလိုက်၏။

အတွင်း၌ ထုပ်ပိုးထားသော အရာဝတ္ထုကို မြင်လိုက်ရချိန်တွင်... "ဘာလို့ ဒီဟာကြီး ပြန်ဖြစ်နေရတာလဲ"

【ကွေ့ရှီး ဓား】

ဘယ်နှကြိမ်ရှိနေပြီနည်း။

အစပိုင်းတွင် ၎င်းကို ရောင်းချခဲ့ရာမှ နောက်ပိုင်း၌ မှောင်ခိုဈေးကွက် ဝန်ဆောင်မှု ကိုယ်စားလှယ်ကပင် သူ့ထံ ကိုယ်တိုင် ကိုယ်ကျ ပြန်လည် ပေးအပ်ခဲ့သည်အထိ ကြုံခဲ့ရသည်။

စိတ်စွမ်းအား ကန့်သတ်ချက်ကို စားသုံးတတ်သည့် ဤထူးဆန်းသော လက်နက်မှာ ရဲချီယန်၏ မျက်နှာသာပေးမှုကို ဘယ်သောအခါမှ မရရှိခဲ့ချေ။

သို့သော်လည်း... သူတို့ နောက်တစ်ဖန် ပြန်လည် ဆုံတွေ့ကြပြန်ချေပြီ။

ယခင်အကြိမ် ဆုံတွေ့ခဲ့စဉ်ကတည်းက သူ တွေးတောခဲ့ဖူးသည်။

အကယ်၍ နောက်တစ်ကြိမ်သာ ရှိဦးမည်ဆိုလျှင် ဤဓားကို အဆင့်မြင့် အသွင်ကူးပြောင်းရန် သူ ကြိုးစားကြည့်မည်ဟူ၍ပင်။

တစ်ကြိမ် ဆုံးဖြတ်ပြီးပါက နောင်တရနေစရာ မလိုတော့ချေ။

ရဲချီယန်က ၎င်းကို ကြည့်ကာ ခေါင်းကို ခပ်ဖွဖွ ခါယမ်းလိုက်၏။

"ထားလိုက်ပါတော့... သူက အဆင့် ၆ ပစ္စည်းတစ်ခုပါပဲ၊ အဆင့်မြင့် အသွင်ကူးပြောင်းဖို့လည်း ကုန်ကျစရိတ် သိပ်များမှာ မဟုတ်ဘူးဆိုတော့..."

သူက လက်ဆန့်ထုတ်လိုက်ပြီး ကွေ့ရှီးဓားကို ထိတွေ့တော့မည့် အခိုက်အတန့်တွင်ပင် လောကီပြင်ပမှ လာသည့်အလား သာယာငြိမ့်ညောင်းသော တီးတိုးသံလေးတစ်ခုက သူ၏နားထဲ၌ ရုတ်တရက် ပဲ့တင်ထပ်လာခဲ့သည်။

အသံလာရာ အရင်းအမြစ်မှာ သူ၏ ရထားတွဲအတွင်းမှ ဖြစ်ပေ၏။

ထို့ပြင် တိကျသော တည်နေရာကိုလည်း ရဲချီယန် ရှင်းလင်းစွာ ခံစားသိရှိနိုင်ပေသည်။

စိုက်ပျိုးရေး ရထားတွဲလား။

သူက လက်ကို ပြန်ရုပ်လိုက်ရင်း မျက်မှောင် အနည်းငယ် ကြုတ်လိုက်၏။ ကွေ့ရှီးဓားကို အဆင့်မြင့် အသွင်ကူးပြောင်းခြင်းထက် စိုက်ပျိုးရေး ရထားတွဲထဲမှ အရာများက ပို၍ အရေးကြီးလှပေသည်။

အတုအယောင် စောင့်ကြည့်ရေးစက်ကို ဖွင့်ကြည့်လိုက်ရာ စိုက်ပျိုးရေး ရထားတွဲထဲရှိ မြေအောက်ကမ္ဘာ၏ အလှပဆုံး ပန်းပွင့်ဖြစ်သော မရဏလောက တီးတိုးသံ ပန်းပွင့်၏ ဝတ်ဆံတိုင်အတွင်း၌ သေးငယ်သော အတုအယောင် လက်ကလေး တစ်ဖက်က သိမ်မွေ့စွာ လှုပ်ရှားနေသည်ကို မြင်လိုက်ရသည်။

ထိုအရာက... 【ကပ်ဘေး ကတ်ပြား စိမ်းလန်းသော ကမ္ဘာသစ်】 ၏ စွမ်းရည်အောက်တွင် မွေးဖွားလာခဲ့သည့် နတ်သူငယ်လေး တစ်ပါးလော။

ရဲချီယန်သည် စိုက်ပျိုးရေး ရထားတွဲအတွင်းသို့ ဝင်ရောက်သွားခဲ့၏။

သူက ကိုယ်ကို ကိုင်းညွတ်လိုက်ရာ ဤတစ်ကြိမ်တွင်မူ ဝတ်ဆံတိုင်အတွင်း၌ သေးငယ်သော လူသားပုံသဏ္ဌာန် အတုအယောင် ပုံရိပ်လေးတစ်ခုကို ရှင်းလင်းစွာ မြင်တွေ့လိုက်ရသည်။

၎င်းက ဝတ်ဆံတိုင် အလယ်တွင် ဒူးထောက်ထိုင်နေပြီး မျက်လုံးလေးများကို တင်းကျပ်စွာ မှိတ်ထားလျက် ရဲချီယန်၏ တည်ရှိမှုကို ခံစားမိသွားသည့်အလား မျက်နှာလေးထက်၌ တောက်ပသော အပြုံးတစ်ခု ပေါ်ထွက်လာခဲ့ချေပြီ။

【ထာဝရ ချည်နှောင်ခြင်း သဘောတူညီချက် စတင်နေပြီဖြစ်ကြောင်း ထောက်လှမ်းတွေ့ရှိရပါသည်】

【နတ်သူငယ်လေး "(အမည်မရှိ)" နှင့် ထာဝရ ချည်နှောင်ခြင်း သဘောတူညီချက်ကို လက်မှတ်ရေးထိုးမည် မထိုးမည် ရွေးချယ်ပါ】

【သဘောတူညီချက် အသေးစိတ်မှာ အောက်ပါအတိုင်း ဖြစ်ပါသည်】

【နတ်သူငယ်လေး "(အမည်မရှိ)" သည် ဘယ်သောအခါမျှ သစ္စာဖောက်မည် မဟုတ်ဘဲ သစ္စာစောင့်သိကာ တည်ကြည်နေမည်ဖြစ်ပြီး ဤသဘောတူညီချက်ကို မည်သည့် နည်းလမ်းနှင့်မျှ ပြောင်းလဲ၍ မရနိုင်ပါ၊ သင့်အမိန့်များကိုသာ နာခံပါလိမ့်မည်】

【သဘောတူညီချက် လက်မှတ်ရေးထိုးပြီးသည်နှင့် ၎င်းသည် သင့်တစ်ဦးတည်း ပိုင်ဆိုင်မှုအဖြစ် ထာဝရ တည်ရှိနေပါမည်】

【ဤသည်မှာ နတ်သူငယ်လေး ဖြစ်သည်၊ ဤသည်မှာ ပန်းပွင့်လေး ဖြစ်သည်၊ ဤသည်မှာ အံ့ဩဖွယ်ရာ အံ့မခန်း အရာတစ်ခုပင် ဖြစ်ပေသည်】

【မှတ်ချက် "ဤပန်းပွင့်ကို မရဏလောက ဘုရင်က တမ်းတလိုချင်နေပါသည်၊ အကယ်၍ ချည်နှောင်လိုက်ပါက မရဏလောက ဘုရင် ခံစားမိသွားပါလိမ့်မည်"】

"မင်းမှာ နာမည်တောင် မရှိသေးဘူးပဲ..."

ရဲချီယန်က သူ၏ လက်ညှိုးကို ဆန့်ထုတ်လိုက်ပြီး သေးငယ်သော ပန်းနတ်သူငယ်လေး၏ ခေါင်းထိပ်ကို သိမ်မွေ့စွာ တို့ထိလိုက်သည်။

"ငါနဲ့ သဘောတူညီချက် လက်မှတ်ထိုးချင်တာလား"

ပန်းပွင့်လေးထဲရှိ နတ်သူငယ်လေးက ဆန့်ထုတ်လာသော ရဲချီယန်၏ လက်ညှိုးကို ၎င်း၏ လက်ကလေးဖြင့် ဆုပ်ကိုင်လိုက်၏။

မျက်လုံးလေးများကို ဆံနွယ်များက ဖုံးအုပ်ထားပြီး မျက်နှာ သေးသေးလေးက လူငယ်လေး၏ လက်ညှိုးထိပ်ဖျားကို တိုးဝှေ့ ပွတ်သပ်နေလေသည်။

"ဒင်း... ဒေါင်—"

လောကီပြင်ပကဲ့သို့ သာယာ ငြိမ့်ညောင်းသော အသံလေးတစ်ခုက ရဲချီယန်၏ နားထဲ၌ ပဲ့တင်ထပ်လာခဲ့ရာ ပျော်ရွှင်မှုနှင့် မျှော်လင့်စောင့်စားမှုတို့ ရောယှက်နေပေ၏။

၎င်းက ဤသဘောတူညီချက်ကို ပြီးမြောက်အောင်မြင်ချင်နေခြင်း ဖြစ်သည်။

"ဒါဆိုရင်လည်း..."

ရဲချီယန်၏ လက်ညှိုးထိပ်မှ မိုးပြာရောင် အလင်းတန်းလေး တစ်ခုက သေးငယ်သော နတ်သူငယ်လေးကို ထိတွေ့လိုက်သည့် အခိုက်အတန့်၌။

【သဘောတူညီချက် အောင်မြင်ပါပြီ】

【ထာဝရ ချည်နှောင်မှု ပြီးမြောက်ပါပြီ】

【ကျေးဇူးပြု၍ အမည် ပေးပါ】

သေးငယ်သော နတ်သူငယ်လေးမှာ မရဏလောက တီးတိုးသံ ပန်းပွင့်မှ မွေးဖွားလာခဲ့ခြင်း ဖြစ်၏။

သို့ဆိုလျှင်... "မရဏ လို့ ပေးရင်ရော ဘယ်လိုလဲ"

"ဒင်း... ဒေါင်—"

နောက်တစ်ကြိမ် ထပ်မံ ထွက်ပေါ်လာသော သာယာ ငြိမ့်ညောင်းသည့် အသံလေးပင်။

၎င်းက... သို့တည်းမဟုတ် မရဏလေးက ဤအမည်ကို သဘောကျ နှစ်သက်နေခြင်း ဖြစ်ပေသည်။

သေးငယ်သော နတ်သူငယ်လေးသည် ရဲချီယန်၏ လက်ချောင်းအတိုင်း တွယ်တက်လာခဲ့ကာ သူ၏ ပုခုံးပေါ်သို့ ရောက်ရှိသွား၏။

ထို့နောက် အိပ်မောကျနေခဲ့သော အိပ်မက်စားသုံးသူ လောက်ကောင်လေးကလည်း တစ်စုံတစ်ခုကို ခံစားမိသွားသည့်အလား ရဲချီယန်၏ ရင်ဘတ် အရေပြားအောက်မှ ဖြည်းညင်းစွာ တွားသွား ထွက်ပေါ်လာခဲ့သည်။

၎င်းက တစ်စုံတစ်ခုကို အတည်ပြုနေသည့်အလား မရဏလေးကို အေးအေးဆေးဆေး နှစ်ပတ် လှည့်ပတ် ကြည့်ရှုလိုက်၏။

ပြီးနောက် လက်တံတစ်ခုကို ဆန့်ထုတ်ကာ ရဲချီယန်၏ အခြား ပုခုံးတစ်ဖက်ပေါ်တွင် တင်ထားလိုက်လေသည်။

ကောင်လေး နှစ်ကောင်လုံး အသံမထွက်ဘဲ ငြိမ်သက်နေကြပြီး နောက်ဆုံးတွင်တော့ အိပ်မက်စားသုံးသူလေးမှာ အိပ်ငိုက်လာပုံရကာ ယိမ်းထိုးသွားပြီး ကြာကြာ မနေတော့ဘဲ ရဲချီယန်၏ ရင်ဘတ်ထဲသို့ ပြန်လည် တိုးဝင် ပုန်းအောင်းသွားတော့သည်။

မရဏလေးမှာလည်း မွေးဖွားလာခဲ့သည်မှာ မကြာသေးသဖြင့် ပင်မ ပန်းပွင့်ကြီးနှင့် အချိန်ကြာမြင့်စွာ သို့မဟုတ် အကွာအဝေး ဝေးလံစွာ ခွဲခွာနေရပါက ပင်ပန်းနွမ်းနယ်မှုကို ခံစားရစေပေသည်။

သို့သော်လည်း မထွက်ခွာမီလေးတွင် သူမက ထို သာယာငြိမ့်ညောင်းသော အသံလေးကို နောက်တစ်ကြိမ် ထုတ်ဖော်လိုက်ပြန်၏။

"ဒင်း... ဒေါင်—"

"ဟင်"

ရဲချီယန်သည် သူမ၏ စကားများကို နားမလည်နိုင်သော်ငြား စိတ်အစဉ်၏ အနက်ရှိုင်းဆုံးဆီ၌မူ သူမ အသံ၏ အဓိက အဓိပ္ပာယ်ကို ရှင်းပြမရနိုင်လောက်အောင် နားလည် သဘောပေါက်နေပေသည်။

ဤအခြေအနေမှာ သူ၏ အကန့်အသတ်ကျော်လွန်သော စွမ်းရည်များကို ဖွင့်လှစ်ပြီးနောက် ကြားရသည့် တီးတိုးသံများနှင့် အတော်လေး ဆင်တူနေချေသည်။

"မင်းက... အဲဒီဓားကို လိုချင်တာလား"

မရဏလေးက သန်းဝေလိုက်ပြီး ခေါင်းကို တရစပ် ညိတ်ပြလေ၏။

သူမ ပြောသော ဓားဆိုသည်မှာ ကွေ့ရှီးဓားပင် ဖြစ်ပေသည်။

စဉ်းစားကြည့်မည်ဆိုလျှင် မရဏလေး ရုတ်တရက် ပေါ်ထွက်လာခြင်းမှာ ကွေ့ရှီးဓားကို သူ အဆင့်မြင့် အသွင်ကူးပြောင်းတော့မည့် အခိုက်အတန့်နှင့် တိုက်ဆိုင်နေပုံရသည်။

ကွေ့ရှီးကြောင့် သူမ စောစီးစွာ နိုးထလာခဲ့ခြင်းများ ဖြစ်နေမည်လား။

အမိန့် ပေးလိုက်သည်။

အပူချိန်ထိန်း ရထားတွဲထဲရှိ လီဆက်က ကွေ့ရှီးဓားကို ယူဆောင်လာခဲ့၏။

သူမကလည်း ဝတ်ဆံတိုင်အတွင်းရှိ သေးငယ်သော ပုံရိပ်လေးကို မြင်တွေ့သွားခဲ့သည်။

မရဏလေးက မော့ကြည့်လိုက်ရာ ဆံနွယ်များအောက်တွင် ဖုံးကွယ်နေသော သူမ၏ ပန်းရောင် ဖျော့ဖျော့ မျက်လုံးလေးများ ပေါ်ထွက်လာခဲ့သည်။

တစ်ယောက်က ကြီးမားပြီး တစ်ယောက်က သေးငယ်သော စက်ရုပ် အိမ်စေမလေးနှင့် ပန်းနတ်သူငယ်လေးတို့သည် အချင်းချင်း တိတ်ဆိတ်စွာ အကဲခတ် ကြည့်ရှုလိုက်ကြ၏။

သူတို့နှစ်ဦး၌ တူညီသော တူညီချက်တစ်ခု ရှိနေပေသည်။

၎င်းမှာ ရဲချီယန်နှင့် ချိုးဖျက်၍ မရနိုင်လောက်အောင် ခိုင်မြဲသော ထာဝရ ချည်နှောင်မှု ရှိနေခြင်းဖြစ်ပြီး မည်သို့မျှ ဖယ်ရှား၍ မရနိုင်သကဲ့သို့ တားဆီး ဟန့်တား၍လည်း မရနိုင်သည့် အကြွင်းမဲ့ သစ္စာစောင့်သိမှု ပင်တည်း။

"မင်း လိုချင်တဲ့ဓားက ဒါလား"

"ဒင်း... ဒေါင်—"

ကွေ့ရှီးဓားကို မြေအောက်ကမ္ဘာ မြေဆီလွှာထဲသို့ ထိုးစိုက်လိုက်ရာ ၎င်း၏ မနာလို မရဏာစိတ်နှင့် နိမိတ်မကောင်းသော စွမ်းအားတို့က အလိုအလျောက် ပေါ်ထွက်လာပြီး မရဏလေးဆီသို့ ဦးတည် ပြေးဝင်သွားခဲ့သည်။

သို့သော်လည်း ဤစွမ်းအား မရောက်လာမီလေးတွင်ပင်...

လောကပြင်ပမှ လာသည့်အလား သာယာငြိမ့်ညောင်းသော အသံလေးက နောက်တစ်ကြိမ် ထပ်မံ ပဲ့တင်ထပ်လာခဲ့၏။

ချက်ချင်းဆိုသလိုပင် အလင်းမျက်နှာပြင်တစ်ခု ထွက်ပေါ်လာချေပြီ။

【ကွေ့ရှီး ဓား (အဆင့် ၇)】

【မြေအောက်ကမ္ဘာ၏ အလှပဆုံး ပန်းပွင့်ဖြစ်သော မရဏလောက တီးတိုးသံ၏ စွမ်းအားဖြင့် ဝင်ရောက် စွက်ဖက်ခြင်း ခံလိုက်ရပါသည်】

【သခင်ကို ရှာဖွေနေသော ဤလက်နက်သည် အထူး မရဏလောက တီးတိုးသံ အဆင့်မြှင့်တင်မှုကို ခံယူလိုက်ရပါပြီ】

【အကျိုးသက်ရောက်မှု ကိုယ်ခံစွမ်းအား ၁၀၀ မှတ်ကို စားသုံး၍ စိတ်စွမ်းအား ၁၀၀ မှတ်ကို ရရှိပါမည်】

【မှတ်ချက် မြေအောက်ကမ္ဘာ မြေဆီလွှာထဲသို့ ထိုးစိုက်ထားခြင်းဖြင့် ချည်နှောင်ထားသော ရထားမောင်းနှင်သူသည် ၎င်းကို သယ်ဆောင်ထားစရာ မလိုဘဲ ဤစွမ်းရည်ကို အသုံးပြုနိုင်ပါသည်】

【မှတ်ချက် ၂ ဤဓား၏ မွေးရာပါ အားနည်းချက် ဟာကွက်ကို ပြုပြင်ပြောင်းလဲလိုက်ပါပြီ】