အခန်း ၄၉၀
Vol. 25 Ch. 490
အခန်း ၄၉၀ - နံပါတ် ၂ တံဆိပ်ပြား
ထျန်းရွှမ်အကယ်ဒမီ၏ တစ်နေရာတွင် အကဲဖြတ်မှူး ရန်မင်သည် ရှေးဟောင်းစာအုပ်အချို့ကို လှန်လှော အကဲခတ်နေ၏။ သူ၏ စားပွဲပေါ်တွင်တော့ ပစ္စည်းတစ်ခုက အသင့် စောင့်ကြိုနေခဲ့သည်။
၎င်းမှာ ဟောင်းနွမ်းပြီး ရိုးရှင်းသော ပုံစံရှိသည့် သစ်သားပြားတစ်ခု ဖြစ်သော်လည်း အထူးဆန်းဆုံးအချက်မှာ ထိုအရာ၏ ကုန်ကြမ်းပစ္စည်းသည် သစ်သားနှင့် သတ္တုကို ပေါင်းစပ်ထားသည့် ပုံစံမျိုး ဖြစ်နေခြင်းပင်။ တကယ်လို့ လင်းကျင်းသာ ဤနေရာတွင် ရှိနေပါက ၎င်းသည် သူ၏ သားရဲပြတိုက် ဧည့်ခန်းမသို့ ဝင်ရောက်နိုင်မည့် တံဆိပ်ပြား ဖြစ်ကြောင်း ချက်ချင်း မှတ်မိသွားပေလိမ့်မည်။
၎င်းက ကျူရိပ်မြို့တော် ချောင်မိသားစု၏ မိသားစုအမွေအနှစ် တံဆိပ်ပြားနှင့် ဆင်တူလှ၏။
သို့သော်လည်း အနည်းငယ် ကွဲပြားခြားနားသည့် အချက်တစ်ခု ရှိနေသည်။ ၎င်းမှာ ထိုတံဆိပ်ပြားပေါ်တွင် ထုဆစ်ထားသည့် နံပါတ်ပင် ဖြစ်၏။ ချောင်မိသားစု၏ တံဆိပ်ပြားတွင် နံပါတ် ‘၃’ ဟု ထုဆစ်ထားသော်လည်း ရန်မင်၏ သစ်သားတံဆိပ်ပြားတွင်မူ နံပါတ် ‘၂’ ဖြစ်နေသည်။
အကဲဖြတ်မှူး ရန်မင်သည် မျက်မှောင်ကို တင်းကြပ်စွာ ကုတ်ထားမိ၏။ အချိန်အတော်ကြာပြီးနောက် သူက လက်ထဲမှ စာအုပ်ကို ချလိုက်သည်။
“ဒီသစ်သားတံဆိပ်ပြားထဲမှာ ဘယ်လို လျှို့ဝှက်ချက်တွေ ရှိနေတာလဲ”
အကဲဖြတ်မှူး ရန်မင်က မိမိကိုယ်ကိုယ် တိုးတိုးတိတ်တိတ် ရေရွတ်လိုက်မိ၏။ ထိုစဉ်မှာပင် အပြင်ဘက်မှ ခြေသံများ ကြားလိုက်ရပြီးနောက် အသံတစ်ခုက သတင်းပို့လာခဲ့သည်။
“ဆရာ... လင်းကျင်းက ဒီမနက် ဆရာ့ရဲ့ ကြေညာချက်ကို ဆုတ်ပစ်လိုက်တယ်”
အပြင်ဘက်တွင် စကားပြောနေသူမှာ ရန်မင်၏ သီးသန့်တပည့်များထဲမှ တစ်ဦး ဖြစ်၏။ သူသည် အကယ်ဒမီတွင် အတော်လေး လူသိများသည့် အဆင့် ၂ အကဲဖြတ်မှူးတစ်ဦး ဖြစ်ပြီး ယခုနှစ်တွင် အဆင့် ၃ စစ်ဆေးမှုကို အောင်မြင်ရန် ရေပန်းအစားဆုံးသူလည်း ဖြစ်သည်။
“သိပြီ... မင်း သွားလို့ရပြီ”
ရန်မင်က တည်ငြိမ်စွာ ညွှန်ကြားလိုက်၏။
အပြင်ဘက်တွင် ရှိနေသော သူ၏ တပည့်က ဆရာဖြစ်သူ၏ တုံ့ပြန်မှုကြောင့် အံ့ဩသွားခဲ့ရသည်။ ခဏမျှ တိတ်ဆိတ်သွားပြီးနောက် သူက တိုးတိုးတိတ်တိတ် ပြောလိုက်၏။
“ဒါပေမဲ့ ဆရာ... အဲဒီလင်းကျင်းက ဒီကို ရောက်ခါစပဲ ရှိသေးတာ... သူက သူ့နေရာသူ သိတဲ့ပုံမပေါ်ဘူး... ဆရာက သူ့ကို သည်းခံနိုင်ပေမဲ့ ကျွန်တော်တို့ကတော့ ဆရာ့အပေါ် ဒီလို မလေးမစား လုပ်တာကို ဒီအတိုင်း ကြည့်မနေနိုင်ဘူး... ကျွန်တော်တို့ နောက်တစ်ကြိမ် လင်းကျင်းရဲ့ အတန်းမှာ သွားပြီး လူရှေ့မှာ သူ့ကို မေးခွန်းတွေနဲ့ အရှက်ခွဲဖို့ စီစဉ်ထားပါတယ်”
ထိုသို့ ပြောခြင်းဖြင့် တပည့်ဖြစ်သူသည် သားရဲအကဲဖြတ်ခြင်း နည်းစနစ်များနှင့် ပတ်သက်၍ ဖြေဆိုရန် မဖြစ်နိုင်သော မေးခွန်းများကို မေးမြန်းရန် ရည်ရွယ်နေခြင်း ဖြစ်၏။ ဤသူက သူ၏ မေးခွန်းများသည် လင်းကျင်းကို အခက်တွေ့စေလိမ့်မည်ဟု မာနတထောင်ဖြင့် တွေးတောနေခြင်း ဖြစ်သည်။ သဘာဝကျစွာပင် မည်သည့်ဆရာမဆို တပည့်များ၏ မေးခွန်းကို မဖြေဆိုနိုင်ပါက အရှက်ရစေမည် မဟုတ်ပါလား။
ရန်မင်က ခေါင်းခါလိုက်၏။
“ငါက သူ ကျောက်စိမ်းနဂါးနိုင်ငံက လာတာမို့လို့ မနှစ်မြို့တာ မှန်ပေမဲ့... ဒီလင်းကျင်းက တကယ် စွမ်းရည်ရှိတဲ့သူပဲ... မဟုတ်ရင် သူက အဆင့် ၄ စစ်ဆေးမှုကို ဒီလောက် ချောချောမွေ့မေ့ အောင်မြင်နိုင်မှာ မဟုတ်ဘူး... မင်းက အခု အဆင့် ၃ အကဲဖြတ်မှူးတစ်ယောက်ရဲ့ စွမ်းရည်မျိုး ရှိနေပြီဆိုပေမဲ့... လင်းကျင်းနဲ့ ယှဉ်ရင်တော့ အများကြီး နိမ့်ကျနေသေးတယ်... ကိုယ့်ကိုယ်ကိုယ် အရှက်ကွဲအောင် သွားမလုပ်နဲ့... မင်း အရှက်ရရုံတင်မကဘူး... ငါ့မျက်နှာပါ ပျက်လိမ့်မယ်”
ဤစကားကို ကြားလိုက်ရသောအခါ အပြင်ဘက်ရှိ တပည့်ဖြစ်သူသည် တုန်လှုပ်သွားခဲ့ရပြီး ထိုအကြံကို ချက်ချင်း ဖျောက်ပစ်လိုက်တော့သည်။
“သူ့ကို မနှစ်သက်တာက တစ်ကိစ္စ... သူ့ရဲ့ စွမ်းရည်ကို အသိအမှတ်ပြုတာက တစ်ကိစ္စပဲ... ဒီမနက်က ဖြစ်ရပ်ကို ဒီအတိုင်းပဲ ထားလိုက်ပါတော့... ငါက တကယ်ပဲ အတန်းသင်ချင်လို့ လုပ်ခဲ့တာ ဖြစ်ပေမဲ့ နောက်ဆုံးတော့ အရေးကြီးကိစ္စတစ်ခုကြောင့် မလာနိုင်ခဲ့ဘူး... တကယ်လို့ ဒါက ပြဿနာအကြီးကြီး ဖြစ်သွားရင် ဆရာကြီးကျန့်နဲ့ တခြားဆရာတွေကို ငါ ရှင်းပြရ ခက်လိမ့်မယ်... ငါတို့ကြားက အငြင်းပွားမှုကို ဒီမှာတင် အဆုံးသတ်လိုက်ပါ”
ထိုသို့ ပြောပြီးနောက် ရန်မင်က သူ၏ တပည့်ကို ထွက်ခွာခွင့် ပြုလိုက်ပြီး စားပွဲပေါ်ရှိ သစ်သားတံဆိပ်ပြားဆီသို့ အာရုံ ပြန်လည် ရွှေ့လိုက်တော့၏။
ဤတံဆိပ်ပြားကို လွန်ခဲ့သည့် ညက သူ၏ မိတ်ဆွေကောင်းတစ်ဦးက လာရောက် ပေးအပ်ခဲ့ခြင်း ဖြစ်သည်။ ရန်မင်သည် အဆင့် ၄ သားရဲအကဲဖြတ်မှူးတစ်ဦး ဖြစ်သဖြင့် သူ၏ ဂုဏ်သိက္ခာကြောင့် ကျယ်ပြန့်သော လူမှုကွန်ရက်တစ်ခု ရှိနေပေသည်။ ကမ္ဘာပေါ်ရှိ မည်သည့်ကျင့်ကြံသူကမဆို မိမိတို့၏ သားရဲများ ဘယ်တော့မှ ဖျားနာခြင်း သို့မဟုတ် ဒဏ်ရာရခြင်း မရှိပါဘူးဟု အာမခံနိုင်ပါမည်နည်း။
ထို့ကြောင့် လူအများအပြားက အတွေ့အကြုံရှိသော အကဲဖြတ်မှူးတစ်ဦးနှင့် မိတ်ဆွေဖြစ်ရန် မျှော်လင့်ကြသည်မှာ ပြောနေရန်ပင် မလိုတော့ပေ။ ထျန်းရွှမ်မြို့တော်တွင် နှစ်ပေါင်းများစွာ တာဝန်ထမ်းဆောင်ခဲ့ပြီးနောက် ရန်မင်တွင် သူငယ်ချင်း မြောက်မြားစွာ ရှိလာခဲ့သည်။
ထိုမိတ်ဆွေကောင်းမှာ ခရီးသွားလာရသည်ကို နှစ်သက်ပြီး ရတနာများကို ရှာဖွေဖော်ထုတ်ရာတွင် ထူးချွန်သော ကျော်ကြားသည့် ကျင့်ကြံသူတစ်ဦး ဖြစ်၏။ အလွယ်ပြောရလျှင် သူက ဂူသင်္ချိုင်းတူးဖော်သူတစ်ဦး ဖြစ်သည်။ တစ်ကြိမ်တွင် ထိုသူသည် နတ်ဘုရားတစ်ပါး၏ ဂူသင်္ချိုင်းတွင် ပြင်းထန်စွာ ဒဏ်ရာရရှိခဲ့ပြီး သူ၏ သားရဲလည်း သေလုနီးပါး ဖြစ်ခဲ့ရဖူး၏။ ထိုစဉ်က ရန်မင်ကပင် သူ၏ သားရဲကို ကယ်တင်ပေးခဲ့ခြင်း ဖြစ်သည်။ ထိုဖြစ်ရပ်နောက်ပိုင်းတွင် သူတို့နှစ်ဦးက မိတ်ဆွေကောင်းများ ဖြစ်လာခဲ့ကြ၏။ လွန်ခဲ့သည့် ညက ရန်မင်က သူ၏ တပည့်ကို စာသင်ခန်း ကြေညာချက် ကပ်ခိုင်းပြီးနောက် ထိုသူငယ်ချင်းက သူ့ထံသို့ ရုတ်တရက် ရောက်ရှိလာခဲ့ခြင်း ဖြစ်သည်။
သူက ရန်မင်၏ ရှေ့သို့ ရောက်လာသောအခါ သိသိသာသာကို စိုးရိမ်ပူပန်နေပုံရ၏။ သူက ရန်မင်အား ပစ္စည်းတစ်ခုကို လောလောဆယ် ကူညီထိန်းသိမ်းပေးထားရန် ပြောခဲ့သည်။
စကားမစပ်... သူကဲ့သို့သော ဂူသင်္ချိုင်းတူးဖော်သူများသည် အန္တရာယ်များသော အလုပ်ကို လုပ်ကိုင်ကြသဖြင့် သူတို့တွင် ယုံကြည်စိတ်ချရသော သူငယ်ချင်း အနည်းငယ်သာ ရှိတတ်သည်။ ရန်မင်က မာနကြီးသူတစ်ဦး ဖြစ်သော်လည်း သူ၏ စစ်မှန်သော မိတ်ဆွေများအပေါ်တွင်တော့ အမြဲတမ်း ရိုးသားဖြောင့်မတ်သူ ဖြစ်၏။ ထို့ကြောင့် ထိုဂူသင်္ချိုင်းတူးဖော်သူသည် အခက်အခဲ ကြုံတွေ့ရချိန်တွင် ရန်မင်ကို လာရောက် အားကိုးခြင်း ဖြစ်သည်။
ထိုသူ၏ ပြောပြချက်အရ သူသည် ဤထူးဆန်းသော တံဆိပ်ပြားကို ရရှိကတည်းက လျှို့ဝှက်ဆန်းပြားသော အင်အားစုများ၏ နောက်ယောင်ခံ လိုက်ခြင်းနှင့် လိုက်လံ သတ်ဖြတ်ခြင်းကို ခံခဲ့ရသည်ဟု ဆို၏။ သူသည် လမ်းခရီးတွင် တိုက်ပွဲပေါင်းများစွာကို ကြုံတွေ့ခဲ့ရပြီးနောက် နောက်ဆုံးတွင်တော့ ဤထျန်းရွှမ်မြို့တော်သို့ ရောက်ရှိလာခဲ့ခြင်း ဖြစ်သည်။ ယုံကြည်ရမည့်သူ မရှိသဖြင့် သူက ဤတံဆိပ်ပြားကို ရန်မင်ထံတွင် ချန်ထားခဲ့ခြင်း ဖြစ်ရပေသည်။ တစ်ချိန်တည်းမှာပင် သူက သူ၏ သားရဲအကဲဖြတ်မှူး သူငယ်ချင်းဖြစ်သူအနေဖြင့် ဤရိုးရှင်းသော ပစ္စည်း၏ နောက်ကွယ်မှ လျှို့ဝှက်ချက်ကို ဖော်ထုတ်နိုင်လိမ့်မည်ဟု မျှော်လင့်နေမိသည်။
“အကဲဖြတ်မှူး ရန်... ဒီတံဆိပ်ပြားက လွန်ခဲ့တဲ့ နှစ်ငါးရာက ကမ္ဘာ့အင်အားအကြီးဆုံးဖြစ်တဲ့ ‘တာအိုအရှင်’ နဲ့ သက်ဆိုင်နေတာ... အဲဒီရဲ့ လျှို့ဝှက်ချက်ကို ဖော်ထုတ်နိုင်တဲ့သူက တာအိုအရှင်ရဲ့ အမွေအနှစ်ကို ရရှိလိမ့်မယ်လို့ ကောလာဟလတွေ ရှိတယ်... ဒါကြောင့်ပဲ ငါ့ဆီကို ပြဿနာတွေ ရောက်လာတာ ဖြစ်နိုင်တယ်... ငါက စာမတတ်ပေမတတ်ဆိုတော့ ဒီတံဆိပ်ပြားပေါ်က ဘာကိုမှ ရှာဖွေနိုင်မှာ မဟုတ်ဘူး... ဒါကြောင့် မင်းပဲ ကူညီပြီး ကြည့်ပေးပါဦး... တကယ်လို့ တစ်ခုခု တွေ့ခဲ့ရင် ငါတို့ လျှို့ဝှက်ချက်ကို အတူတူ မျှဝေကြတာပေါ့”
၎င်းက ထိုဂူသင်္ချိုင်းတူးဖော်သူ မထွက်ခွာမီ ရန်မင်အား ပြောကြားခဲ့သည့် စကား ဖြစ်၏။
သူက ရန်မင်ကို အပြည့်အဝ ယုံကြည်ကြောင်း ထင်ရှားလှပေသည်။ မဟုတ်ပါက သူသည် ဤကဲ့သို့ တန်ဖိုးရှိသော ပစ္စည်းကို ရန်မင်၏ လက်ထဲတွင် ချန်ထားခဲ့မည် မဟုတ်ပေ။
လွန်ခဲ့သည့် ညကတည်းက ရန်မင်သည် ဤတံဆိပ်ပြား၏ မူလအစနှင့် လျှို့ဝှက်ချက်များကို ရှာဖွေရန် မျှော်လင့်ချက်ဖြင့် ရှေးဟောင်းကျမ်းစာများကို ရှာဖွေနေခဲ့ခြင်း ဖြစ်သည်။ တစ်ညလုံး သုတေသနပြုပြီးနောက် သူက သဲလွန်စအချို့ကို တကယ်ပဲ ရှာဖွေတွေ့ရှိခဲ့ပြီး ဤတံဆိပ်ပြားသည် တာအိုအရှင်နှင့် အမှန်တကယ် ပတ်သက်နေပေသည်။
စာအုပ်အချို့တွင် ၎င်းနှင့် ပတ်သက်သည့် မှတ်တမ်းများ ရှိနေပြီး သက်ဆိုင်ရာ အချက်အလက်များသည် စာအုပ်တစ်အုပ်မက ထွက်ပေါ်နေခဲ့၏။
ရန်မင်အနေဖြင့် တာအိုအရှင်က ဘယ်သူလဲဆိုသည်ကို သေချာပေါက် သိရှိပေသည်။ တာအိုအရှင်၏ နာမည်သည် ထျန်းရွှမ်အကယ်ဒမီတွင်ပင် ကျော်ကြားလှ၏။ ကောလာဟလများအရ တာအိုအရှင်သည် လွန်ခဲ့သော နှစ်ငါးရာက နံပါတ်တစ် လူဆိုးကြီး ဖြစ်ရုံတင်မကဘဲ လူသားတို့ သိရှိသမျှတွင် အင်အားအကောင်းဆုံး ကျွမ်းကျင်သူလည်း ဖြစ်သည်။ ထို့အပြင် သူသည် နံပါတ်တစ် သားရဲအကဲဖြတ်မှူး ဖြစ်ခဲ့ပြီး သားရဲအကဲဖြတ်ခြင်း ပညာရပ်များကို စတင် လမ်းဖောက်ခဲ့သူလည်း ဖြစ်ပေသည်။
ဤအချက်ကြောင့်ပင် ရန်မင်သည် တံဆိပ်ပြား၏ လျှို့ဝှက်ချက်ကို ဖော်ထုတ်ရန် အလွန်အမင်း စိတ်အားထက်သန်နေခြင်း ဖြစ်၏။
မည်သို့ပင်ဆိုစေကာမူ ရန်မင်သည် ရှေးဟောင်းကျမ်းစာတစ်အုပ်တွင် ဖော်ပြချက်တစ်ခုကို ရှာဖွေတွေ့ရှိခဲ့သည်။ ဤစာအုပ်ကို လွန်ခဲ့သော နှစ်ပေါင်းများစွာက သားရဲအကဲဖြတ်မှူးတစ်ဦးက ရေးသားချန်ထားခဲ့ခြင်း ဖြစ်ပြီး သူ၏ သူငယ်ချင်းနှင့် တွေ့ဆုံစဉ်က ဖြစ်ရပ်တစ်ခုကို ပြောပြထားခြင်း ဖြစ်၏။ သူ၏ မှတ်တမ်းအရ ‘နံပါတ်ပါတဲ့ သစ်သားတံဆိပ်ပြားက သော့တစ်ခုလိုပဲ... ငါ့သူငယ်ချင်းက တံခါးတစ်ခုကနေတစ်ဆင့် ပျောက်ကွယ်သွားခဲ့တယ်... သူ ပြန်ရောက်လာတဲ့အခါမှာတော့ စိတ်ကြည်လင်နေပြီး အသိပညာတွေ သိသိသာသာ တိုးတက်လာခဲ့တယ်’ ဟု ဆိုသည်။
နံပါတ်ပါသော သစ်သားတံဆိပ်ပြားဆိုသည်မှာ နံပါတ်တစ်ခု ထုဆစ်ထားသည့် သစ်သားပြားတစ်ခု ဖြစ်၏။ ၎င်းက ယခုအချိန်တွင် ရန်မင် ကိုင်ဆောင်ထားသည့် ပစ္စည်းနှင့် ကွက်တိ တူညီနေပေသည်။
သို့သော်လည်း ‘တံခါးကနေတစ်ဆင့် ပျောက်ကွယ်သွားခြင်း’ ဆိုသည့် အပိုင်းကတော့ အလွန်အမင်း ဇဝေဇဝါ ဖြစ်စရာ ကောင်းလှ၏။ ထိုတံခါးက ဘယ်မှာ ရှိနေတာလဲ...
စိတ်မကောင်းစရာမှာ ရှေးဟောင်းကျမ်းစာ၏ သက်ဆိုင်ရာ အပိုင်းတွင် ဤမျှလောက်သာ အချက်အလက် ပေးထားခြင်း ဖြစ်သည်။ အခြား သဲလွန်စများ မရှိတော့ပေ။ ရန်မင်သည် ဤကိစ္စအပေါ် ပို၍ ပို၍ စူးစမ်းချင်စိတ် ပြင်းထန်လာခဲ့ရသည်။ သို့သော်လည်း သူ၏ ခေါင်းမာမှုနှင့် မာနကြီးမှုကြောင့် ရန်မင်သည် အခြားသူများထံမှ အကူအညီ တောင်းလေ့မရှိသဖြင့် ခေတ္တ တွေးတောပြီးနောက် သူ၏ ဂူသင်္ချိုင်းတူးဖော်သူ သူငယ်ချင်း ပြန်လာသည့်အခါမှသာ အသေးစိတ် ထပ်မံ မေးမြန်းရန် ဆုံးဖြတ်လိုက်တော့၏။ သူ၏ သူငယ်ချင်းက ဤပစ္စည်းအကြောင်းကို ပိုမို သိရှိထားရပေမည်။
ရုတ်တရက် သူ၏ အတွေးများကို ပျော်ရွှင်စရာ အသံတစ်ခုက နှောင့်ယှက်လိုက်သည်။
“အကဲဖြတ်မှူး ရန်မင်... ငါတို့ ကြိုတင် အကြောင်းမကြားဘဲ ရောက်လာတာ မင်းကို နှောင့်ယှက်မိသွားလား”
ထိုအသံနှင့်အတူ အကယ်ဒမီမှ ဆရာနှစ်ဦး ဝင်ရောက်လာခဲ့ကြပြီး သူတို့နှစ်ဦးစလုံးက ရန်မင်ကဲ့သို့ပင် အဆင့် ၄ သားရဲအကဲဖြတ်မှူးများ ဖြစ်ကြ၏။
“အို... အကဲဖြတ်မှူး ယန် နဲ့ အကဲဖြတ်မှူး အုန်းယန် ပါလား... ဘာကိစ္စရှိလို့ ရုတ်တရက် ရောက်လာကြတာလဲ”
ရန်မင်က သူတို့ကို ကြိုဆိုရန် မတ်တတ်ရပ်လိုက်၏။ အကယ်ဒမီတွင် အကဲဖြတ်မှူး ယန်နှင့် အကဲဖြတ်မှူး အုန်းယန်တို့သည် ဆရာအားလုံးနှင့် ပြေပြေလည်လည် ဆက်ဆံတတ်သည့် နွေးထွေးသော လူစားမျိုးများ ဖြစ်ကြသည်။ ရန်မင်၏ ထူးဆန်းသော စိတ်နေသဘောထားကြောင့် သူက အခြားသူများနှင့် ထိပ်တိုက်တွေ့ရန် လွယ်ကူသော်လည်း ထိုဆရာနှစ်ဦးကတော့ သူနှင့် လုံးဝ ဆန့်ကျင်ဘက် ဖြစ်၏။ ပြဿနာတစ်ခုခု ဖြစ်ပွားတိုင်း သူတို့က ပထမဆုံး ဝင်ရောက် စေ့စပ်ပေးလေ့ ရှိကြသည်။
အကဲဖြတ်မှူး ယန်က ပတ်ဝန်းကျင်ကို အကဲခတ်လိုက်ပြီးနောက် ပြုံးလျက် စကားစတင်လိုက်၏။
“အမှန်တော့ ငါတို့ လာရတဲ့ အကြောင်းရင်းနဲနဲရှိတယ်... အကဲဖြတ်မှူး ရန်မင်က ဒီကို ရောက်ခါစ အကဲဖြတ်မှူး လင်းကျင်းနဲ့ ပထမစာသင်ခန်းမကိစ္စကြောင့် အငြင်းပွားမှု အနည်းငယ် ရှိခဲ့တယ်လို့ ကြားလို့ပါ”
ရန်မင်၏ မျက်နှာက ညိုမှောင်သွားခဲ့ပြီး သူက နှုတ်ဆိတ်နေခဲ့၏။
အကဲဖြတ်မှူး အုန်းယန်ကလည်း ပြုံးလျက် ဝင်ပြောလိုက်သည်။
“ကျောင်းသားတွေ ဒါကို ပြောနေကြတာ ငါလည်း ကြားတယ်... တကယ်တော့ ဒါက ပြဿနာအကြီးကြီး မဟုတ်ပါဘူး... ငါတို့အားလုံးက အကယ်ဒမီတစ်ခုတည်းက ဆရာတွေ ဖြစ်ပြီး နေရာတိုင်းမှာ ဆုံတွေ့နေကြရမှာဆိုတော့ သေးငယ်တဲ့ ကိစ္စတွေအပေါ်မှာ မငြင်းခုံသင့်ဘူး... အကဲဖြတ်မှူး လင်းက ဒီကို ရောက်ခါစဆိုတော့ တကယ်လို့ သူက မှားယွင်းတာမျိုး ရှိခဲ့ရင်လည်း အကဲဖြတ်မှူး ရန် အနေနဲ့ သည်းခံပေးလိုက်ပါဦး”
ရန်မင်က မည်သည့် ခံစားချက်မျှ မရှိဘဲ အေးစက်စွာ တုံ့ပြန်လိုက်၏။
“ငါက အကဲဖြတ်မှူး လင်းနဲ့ ဘာရန်ငြိုးမှ မရှိပါဘူး... ငါ မနေ့က ပထမစာသင်ခန်းမကို သုံးချင်ခဲ့တာကလည်း အမှန်ပဲ... ဒါပေမဲ့ အရေးပေါ်ကိစ္စကြောင့် မလာနိုင်ခဲ့တာ... ပြီးတော့ ငါ့တပည့်ကို ငါ့ကိုယ်စား ကြေညာချက် သွားကပ်ခိုင်းခဲ့တယ်... သူက အခြေအနေကို မသိလို့ လုပ်မိတာကို ငါ ခွင့်လွှတ်နိုင်ပေမဲ့... အကဲဖြတ်မှူး လင်းကိုယ်တိုင်က ငါ့ရဲ့ ကြေညာချက်ကို ဆုတ်ပစ်လိုက်တာလေ... သူကော အခြေအနေကို မသိလို့ပဲလား”
ဤစကားကြောင့် အကဲဖြတ်မှူး ယန်နှင့် အကဲဖြတ်မှူး အုန်းယန်တို့သည် ဆွံ့အသွားခဲ့ရ၏။
အမှန်တော့ ရန်မင်သည် ထူးဆန်းသော စရိုက်ရှိသူ ဖြစ်သဖြင့် ဤအငြင်းပွားမှုသည် အလွယ်တကူ ပြီးဆုံးမည့် ပုံမပေါ်ပေ။
“လုပ်ဖော်ကိုင်ဖက်တို့... ငါ ထပ်ပြောမယ်... ငါ့မှာ လင်းကျင်းနဲ့ ပုဂ္ဂလိက ရန်ငြိုးမရှိဘူး... တကယ်လို့ သူက ငါ့ကို ထပ်ပြီး ဆန့်ကျင်တာမျိုး မလုပ်ဘူးဆိုရင် ငါက အကြောင်းမဲ့ ပြဿနာရှာမယ့် လူစားမျိုး မဟုတ်ပါဘူး... ငါ အလုပ်ရှုပ်နေလို့ တခြားကိစ္စမရှိရင် ပြန်နိုင်ပါပြီ”
ရန်မင်က လက်နှစ်ဖက်ကို မြှောက်ကာ ဧည့်သည်များကို နှုတ်ဆက်လိုက်၏။
အကဲဖြတ်မှူး ယန်နှင့် အကဲဖြတ်မှူး အုန်းယန်တို့သည် တစ်ဦးကိုတစ်ဦး ကြည့်လိုက်ကြပြီးနောက် ပြုံးလျက် ထွက်ခွာသွားကြတော့သည်။
ထိုအခါမှ ရန်မင်သည် စားပွဲပေါ်ရှိ တံဆိပ်ပြားကို သတိရသွားခဲ့၏။ သူက လှည့်လိုက်ပြီး ၎င်းကို လှမ်းယူကာ ဝတ်စုံအင်္ကျီလက်ထဲသို့ သေသေချာချာ ထည့်သွင်း သိမ်းဆည်းလိုက်တော့သည်။