သဲလွန်စ

ရွှမ်းအာတွင် ဓားသိုင်းပါရမီရှိကြောင်း ဆုရှင်း သိထားသော်လည်း သူမက ရှဲ့ကျစ်ယန်၏ ဤမျှထိတန်ဖိုးထားမှုကို ရရှိလိမ့်မည်ဟု ဘယ်သောအခါမျှ မမျှော်လင့်ထားခဲ့ချေ။

ယီဓားဂိုဏ်း တပည့်၏အကဲဖြတ်မှုမှာ သံသယဖြစ်စရာ မလိုပေ။ ရှဲ့ကျစ်ယန်က ရွှမ်းအာကို မွေးရာပါ ဓားနှလုံးသားပါလာသည်ဟု ပြောလျှင် သူမက မွေးရာပါဓားနှလုံးသား ပါလာရမည်မှာ သေချာသည်။

သို့သော် ဆုရှင်းက ခေါင်းယမ်းကာ ငြင်းဆိုလိုက်ဆဲပင်။ "သခင်မလေးရှဲ့ရဲ့ကြင်နာမှုအတွက် ကျေးဇူးတင်ပါတယ်။ ဒါပေမဲ့ ရွှမ်းအာကို တခြား ဂိုဏ်းတွေထဲ ဝင်ခွင့်မပြုနိုင်ပါဘူး။"

ယခု ဆုရှင်းတွင် မိသားစုဆို၍ရွှမ်းအာသာ ရှိတော့သည်။

သူ့တွင်လည်း ရွှမ်းအာကို ကာကွယ်နိုင်စွမ်းရှိသဖြင့် တစ်ဖက်လူမှာ ဓားဂိုဏ်းငါးဂိုဏ်းထဲမှ ယီဓားဂိုဏ်းဖြစ်နေလျှင်ပင် ပြင်ပလူများထံ သူမကို ဘယ်သောအခါမျှ အပ်နှံမည် မဟုတ်ချေ။

ရွှမ်းအာကလည်း ဆုရှင်း၏ လက်မောင်းကို ကိုင်ကာ ပြောလိုက်၏။ "ဟုတ်တယ် သမီးအစ်ကိုနဲ့ ဘယ်တော့မှ မခွဲဘူး။"

သူမ၏ရှေ့ရှိ အစ်မကြီးမှာ ကြင်နာပြီးလှပပုံပေါ်သော်လည်း ရွှမ်းအာက သူမ၏အစ်ကိုနှင့် မခွဲခွာချင်သေးပေ။

မောင်နှမ နှစ်ဦး၏သဘောထားကို မြင်သောအခါ ရှဲ့ကျစ်ယန်မပြောတော့ဘဲ သက်ပြင်းချကာ လက်လျှော့လိုက်ရုံသာ တတ်နိုင်တော့သည်။

လူတွေကို သူတို့ ဆန္ဒမပါဘဲ အတင်းအကျပ်ခိုင်းစေခြင်းကို သူမ မကြိုက်ပေ။ ထို့အပြင် တပည့် တစ်ယောက်ကို လက်ခံသည့်အချိန်တွင် တစ်ဖက်လူက ဆန္ဒမရှိဘူးလျှင် သူမရရှိလာမည့်သူက တပည့် တစ်ယောက်မဟုတ်ဘဲ ရန်သူ တစ်ယောက်သာဖြစ်လာလိမ့်မည်။

မွေးရာပါဓားနှလုံးသား ပါလာသော ရွှမ်းအာက ယီဓားဂိုဏ်းသို့ မဝင်ရောက်ခဲ့ခြင်းမှာ နှမြောစရာ ကောင်းသော်လည်း ဓားဂိုဏ်းငါးဂိုဏ်းထဲမှ တစ်ခုအနေဖြင့် ယီဓားဂိုဏ်းမမြင်ဖူးသော ပါရမီရှင် ဘယ်လိုမျိုး ရှိနိုင်မည်နည်း။ ရွှမ်းအာက မွေးရာပါ ဓားနှလုံးသားပါလာသော်လည်း ယီဓားဂိုဏ်း၏တိုက်ရိုက် မျိုးဆက်တစ်ဦးအနေဖြင့် သူမက အဆက်မပြတ်ဒုက္ခပေးနေရမည့် အခြေအနေအထိတော့ မဟုတ်ပေ။

"ရွှမ်းအာကို ဓားသိုင်းသေချာသင်ပေးပါ။ သူမရဲ့ပါရမီကို အလဟဿမဖြစ်စေနဲ့။ သူမကို မမျှော်လင့်တဲ့ အရာတစ်ခုခုမဖြစ်သရွေ့ သူမရဲ့ပါရမီနဲ့ဆိုရင် နောက်ဆယ်နှစ်အတွင်း လူသား အဆင့်သတ်မှတ်ချက်မှာ နေရာတစ်ခု သေချာပေါက် ရလိမ့်မယ်" ရှဲ့ကျစ်ယန်က မှာကြားလိုက်၏။

ဆုရှင်း ခေါင်းညိတ်လိုက်သည်။ သူမ ယီဓားဂိုဏ်းသို့ မဝင်ရောက်လျှင်ပင် ကိစ္စမရှိပေ။ သူ့တွင် ဗီလိန်စနစ်ရှိပြီး ၎င်းတွင် ယီဓားဂိုဏ်း၏ဓားသိုင်းများထက် မလျော့နည်းသော စွမ်းအားကြီးသည့် ဓားသိုင်းများစွာရရှိနိုင်သည်။

ဤအချိန်တွင် ရှန်းလုံ စားသောက်ဆိုင်၏တာဝန်ခံလျိုက ဟင်းပွဲများကို လာချပေးနေလေပြီ။ ဆုရှင်းက ရှဲ့ကျစ်ယန်နှင့် သူမ၏အဖွဲ့ စားသောက်ပြီးသည်အထိ စောင့်ဆိုင်းပြီးမှကိစ္စရပ်များကို ထပ်မံဆွေးနွေးရန် လင်းယုန်ပျံဂိုဏ်း ဌာနချုပ်သို့ ပြန်သွားခဲ့သည်။

ရှဲ့ကျစ်ယန်နှင့် သူမ၏အဖွဲ့က ဗဟိုလွင်ပြင်မှ ခရီးထွက်လာခဲ့ပြီး ကျန်းနန်ပြည်နယ်မှ ချန်နင်စီရင်စုသို့ ရောက်ရှိရန် သုံးလတိတိ အချိန်ယူခဲ့ရ၏။

ရှဲ့ကျစ်ယန်မှာ အဆင်ပြေသည်။ သူမက ရှန်းထျန်းသိုင်းပညာရှင် တစ်ဦးဖြစ်ပြီး သိုင်းလောကတွင် လှည့်လည်လေ့ကျင့်နေသည်မှာ တစ်နှစ်ကျော်ပြီ ဖြစ်သဖြင့် ဤအခက်အခဲမှာ သူမအတွက် ပြဿနာ မဟုတ်ပေ။

သို့သော် သူမ၏ညီအစ်ကို မောင်နှမများမှာမူ မတူညီကြပေ။ ၎င်းမှာ သိုင်းလောကတွင် သူတို့ ပထမဆုံးတောင်တက်ခြင်းဖြစ်ပြီး လမ်းတစ်လျှောက်တွင် စိတ်ဝင်စားစရာဘာမှမရှိဘဲ သူတို့ကို ဒုက္ခရောက်စေခဲ့သည့် ခြောက်သွေ့ပြီး ငြီးငွေ့ဖွယ်ကောင်းသော ခရီးစဉ်တစ်ခုသာ ဖြစ်သည်။

ထို့ကြောင့် ကျင်းယွဲ့ရပ်ကွက်သို့ ပြန်ရောက်သည်နှင့် ဆုရှင်းက သူတို့ကိုတည်းခိုခန်းတွင် အနားယူရန် စီစဉ်ပေးလိုက်ရာ ၎င်းက လူငယ်များကို ဝမ်းသာအားရ အော်ဟစ်သွားစေခဲ့၏။

လူတိုင်း ထွက်သွားပြီးနောက် ဆုရှင်းက ရှဲ့ကျစ်ယန်ကို မေးလိုက်သည်။ "သခင်မလေးရှဲ့ ကျွန်တော့်ကို သဲလွန်စရှာဖို့ကူညီစေချင်တယ်ဆိုတော့ ခင်ဗျားမှာရှိတဲ့ သဲလွန်စအားလုံးကို အရင် ပြောပြရလိမ့်မယ်။"

"ဗဟိုလွင်ပြင်က ထိပ်တန်းဂိုဏ်းသုံးဂိုဏ်းနဲ့ ရှန်းနန်က မိသားစုကြီးသုံးစု ချန်နင်စီရင်စုကို ရောက်လာကြတယ်။ ပြီးတော့ ခင်ဗျားတို့ အားလုံးက လူငယ် အကဲဖြတ်ရေးအဖွဲ့ဝင်တွေကို လွှတ်လိုက်ပေမဲ့ သတင်းလေး နည်းနည်းကြားရုံနဲ့ ခင်ဗျားတို့ လာခဲ့မယ်ဆိုတာ ကျွန်တော်မယုံဘူး။ အရေးကြီးတဲ့ အရာတစ်ခုခု ပါဝင်ပတ်သက်နေရမယ်။"

ရှဲ့ကျစ်ယန် ခေါင်းညိတ်လိုက်၏။ "မှန်ပါတယ်။ ကျွန်မတို့အရေးကြီးတဲ့ သဲလွန်စတချို့ တကယ် ရထားတယ်။ ခြင်္သေ့ရူးတုယွမ်ရှန့်ရဲ့ ဘဝအကြောင်း ရှင်သိသင့်တယ် မဟုတ်လား။"

ဆုရှင်း ခေါင်းညိတ်လိုက်သည်။ ထျဲဝူချင် သူ့ကို အသေးစိတ် ရှင်းပြခဲ့သည်ကို သူ ခုနလေးတင် ကြားခဲ့ရ၏။

ရှဲ့ကျစ်ယန်က ပြောသည်။ "ခြင်္သေ့ရူးတုယွမ်ရှန့်က တာ့ကျိူးကို ထိပ်တန်းမင်းဆက်တစ်ခုအဖြစ် တည်ထောင်ရာမှာ ကူညီပေးခဲ့ပေမဲ့ သူ တည်ထောင်ခဲ့တဲ့ ရှန်းနန်သိုင်းလောကမဟာမိတ်က လွတ်လပ်တဲ့ မဟာမိတ်တစ်ခုဖြစ်ပြီး တာ့ကျိူးမင်းဆက်နဲ့ သူရဲ့ဆက်ဆံရေးက ပူးပေါင်းဆောင်ရွက်တဲ့ ဆက်ဆံရေးလို့ သတ်မှတ်နိုင်တယ်။"

"အခု သိုင်းလောကမှာ အများဆုံးခန့်မှန်းနေကြတာက တာ့ကျိူးဧကရာဇ်က တုယွမ်ရှန့်ရဲ့အာဏာကို သတိထားပြီး တောင်ပိုင်းထန်မင်းဆက်ကို ကြောက်ရွံ့ခဲ့တယ်ဆိုတာပဲ။ သိုင်းလောကကြီး ဖယ်ရှားလို့ မရလောက်အောင် အရမ်းအင်အားကြီးလာတော့ သူတို့ကိုလျှို့ဝှက်စွာ ဖယ်ရှားလိုက်တာ။"

"ဒါပေမဲ့ တုယွမ်ရှန့်က တာ့ကျိူးဧကရာဇ်ကို အမြဲတမ်း သတိထားနေခဲ့တယ်။ အရှေ့ပိုင်းကျင်မင်းဆက်ကိုတိုက်ခိုက်စဉ်က သူ လုယက်ခဲ့တဲ့ တိုက်ပွဲဝင် ပစ္စည်းတွေအားလုံးကို လျှို့ဝှက် သိမ်းဆည်းထားခဲ့တယ်။ အဲဒီဧရိယာရဲ့ ကိုးဆယ်ရာခိုင်နှုန်းက တာ့ကျိူးမင်းဆက်ရဲ့နဂါးမျိုးနွယ်စုတွေ မွေးဖွားရာချန်နင်စီရင်စုဖြစ်တယ်။"

ရှဲ့ကျစ်ယန်က ထူးဆန်းသော ပုံသဏ္ဍာန်ရှိသည့် အမှတ်အသားပြားတစ်ခုကို ထုတ်ယူကာ စားပွဲပေါ်တွင် တင်လိုက်၏။

"တုယွမ်ရှန့်သေဆုံးပြီးနောက်။ ရှန်းနန်သိုင်းလောက မဟာမိတ်ပြိုကွဲသွားပြီး တုယွမ်ရှန့်ရဲ့ယခင် ယုံကြည်ရသူတွေဆီက ရရှိခဲ့တဲ့ ဒီအမှတ်အသားပြားတွေဟာ ရတနာသိုက်ကို ဖွင့်ဖို့ သော့ချက်တွေပဲ။"

"ဒါပေမဲ့ သော့ငါးချောင်းရှိ‌မယ်။ ယီဓားဂိုဏ်း၊ ချင်းချန်ဓားဂိုဏ်းနဲ့ နျန်ဂိုဏ်း။ ရှန်းနန်က ကျန်းလင် မိသားစုနဲ့ တစ်ချောင်းစီရှိတယ်။"

"ပျောက်နေသေးတဲ့ နောက်ထပ် သော့တစ်ချောင်း ရှိသေးတယ်၊ ဒါပေမဲ့ အဲဒါကို ချန်နင်စီရင်စုမှာ တစ်ခါ မြင်ဖူးတယ်လို့ မကြာသေးခင်က သတင်းရခဲ့လို့ ငါတို့ ဒီကိုအမြန်လာခဲ့ကြတာ။"

ဆုရှင်း မျက်မှောင်ကြုတ်ကာ ခဏတာစဉ်းစားပြီးနောက် ပြောလိုက်၏။ "ဒီနေရာမှာ တစ်ခုခု မှားနေတယ်။ နောက်ဆုံး သော့က ချန်နင်စီရင်စုမှာ ပေါ်လာတယ်ဆိုတဲ့သတင်းကို ကြားတော့ ခင်ဗျားတို့ အားလုံးဒီကိုအမြန်လာခဲ့ကြပေမဲ့ ဒီနေ့မှ ခင်ဗျားတို့ အားလုံးမြို့ထဲကို ဝင်လာတာလား။"

ရှဲ့ကျစ်ယန် ခေါင်းညိတ်လိုက်သည်။ "တစ်နာရီ နှစ်နာရီလောက်ကွာခြားနိုင်ပေမဲ့ ဒီနေ့ချန်နင်စီရင်စုကို ရောက်လာတာတော့ သေချာပါတယ်။"

ဆုရှင်း စားပွဲကို ပုတ်ကာ ပြောလိုက်၏။ "ပြဿနာက ဒီမှာပဲ။"

"ခင်ဗျားတို့ရဲ့ယီဓားဂိုဏ်းက ကျန်းနန်ပြည်နယ်မှာ ရှိပြီး ချင်းချန်ဂိုဏ်းက ချွမ်းနန်ပြည်နယ်မှာ ရှိတယ်။ နျန်ဂိုဏ်းက ကျန်းနန်ပြည်နယ်မှာရှိတယ်။"

"အင်အားစုသုံးခုက မိုင်ထောင်ချီကွာဝေးတဲ့ နေရာတွေမှာ တည်ရှိနေတော့ သတင်းရပြီးတာနဲ့ မင်းတို့ အားလုံးချန်နင်စီရင်စုကို တစ်ပြိုင်နက်တည်း ရောက်လာဖို့ဆိုတာ မဖြစ်နိုင်ဘူး။"

"ပြီးတော့ ရှန်းနန်က မိသားစုကြီးသုံးစုက ချန်နင်စီရင်စုနဲ့ အနီးဆုံးပဲ။ သူတို့ ချန်နင်စီရင်စုကို လာရင် ဆယ်ရက်လောက်နဲ့ ရောက်နိုင်တယ်။ ဒါပေမဲ့ အဲဒီအစား သူတို့က ခင်ဗျားတို့နဲ့ အတူလာကြတယ်။"

ဆုရှင်း ဤသို့ ပြောသည်ကို ကြားသောအခါ ရှဲ့ကျစ်ယန်ကလည်း သံသယဖြစ်ဖွယ် အချက်များကို ခံစားလိုက်ရ၏။

"တစ်ယောက်ယောက်က ကျွန်မတို့ဆီကို သတင်းစကား တမင်တကာ ပေးပို့ခဲ့တာ။ ချန်နင်စီရင်စုမှာ ကျွန်မတို့သုံးဖွဲ့ တစ်ပြိုင်နက်တည်း စုစည်းမိဖို့အတွက် အချိန်ကိုက်အောင် ကျွန်မတို့ဆီ သတင်းယိုစိမ့်စေပြီး တွက်ချက်ထားတာများလား။"

ဆုရှင်း ခေါင်းညိတ်လိုက်သည်။ "မှန်ပါတယ် အဲဒီလို ဖြစ်ဖို့ အရမ်း များပါတယ်။ ဒါပေမဲ့ တကယ်ပဲ အဲဒီလို အကြံအစည်ရှိတဲ့သူ ရှိတယ်ဆိုရင်။ သူက တုယွမ်ရှန့်ရဲ့ ရတနာသိုက်ကို လိုချင်နေတာ သေချာတယ်။ ရတနာသိုက် ပေါ်လာတာနဲ့ သူ ပေါ်လာလိမ့်မယ်လို့ ထင်တယ်။"

ခန့်မှန်းနေရခြင်းမှာ အလဟဿသာဖြစ်သဖြင့် ဆုရှင်းက စက္ကူတစ်ရွက်ကို ယူကာ သော့၏ ပုံသဏ္ဍာန်ကို ရေးဆွဲလိုက်ပြီး သူ၏ဂိုဏ်းဝင်များကို ၎င်းအကြောင်း စုံစမ်းမေးမြန်းခိုင်းရန် ရည်ရွယ်လိုက်၏။

"ဒါ့အပြင် တုယွမ်ရှန့်ရဲ့ ဘဝအကြောင်း အသေးစိတ် အချက်အလက်တချို့ကိုလည်း စုံစမ်းသင့်တယ်။ ဒါတွေက ရတနာသိုက်ရဲ့တည်နေရာကို မှန်းဆဖို့ ကူညီပေးနိုင်ပါတယ်။"

"တုယွမ်ရှန့် သေဆုံးသွားတာ ဆယ်နှစ်ကျော်ပြီဖြစ်ပေမဲ့ ချန်နင်စီရင်စုက သက်ကြီးရွယ်အိုတချို့ သူနဲ့ ပတ်သက်တဲ့ သတင်း ဒါမှမဟုတ် ဒဏ္ဍာရီ တချို့ကို ကြားဖူးကြမှာ သေချာတယ်၊။ အဲဒီအထဲမှာ အသုံးဝင်တဲ့ အရာ တစ်ခုခု ရှိနိုင်တယ်။"

ဆုရှင်းက အရာအားလုံးကို အလွန် ကောင်းမွန်စွာ စီစဉ်ထားသည်ကို မြင်သောအခါ ရှဲ့ကျစ်ယန် စိတ်သက်သာရာ ရသွားပြီး ဆုရှင်းနှင့် ဆက်လက် စကားပြောနေခဲ့၏။

ထို့နောက် နှုတ်ဆက်ပြီး သူမက တည်းခိုခန်းသို့ ပြန်လည် အနားယူရန် ထွက်ခွာသွားသည်။

ထိုအချိန်တွင် အခြားဂိုဏ်းများသည်လည်း အားလပ်မနေကြဘဲ အခြား အဓိက အင်အားစုများမှ အဖွဲ့ဝင်များကလည်း သူတို့ကို ချဉ်းကပ်လာကြ၏။

သူရဲကောင်းသုံးဖော်အသင်း..

မန်ချန်ဟယ်နှင့် အခြားနှစ်ဦးတို့က လူငယ် သုံးဦးကို လေးစားမှုအပြည့်ဖြင့် ကိုယ်တိုင် ကြိုဆိုခဲ့ကြသည်။

သူတို့မှာ ရှန်းနန်မှ မိသားစုကြီးသုံးစုဖြစ်သော ရွမ်၊ ကျန်းနှင့် ကျန့်တို့မှ ရွမ်မင်ယွဲ့၊ ကျန်းချင်းဖန်နှင့် ကျန့်ယွမ်တုန်းတို့ ဖြစ်ကြ၏။

ရှန်းနန်မှ မိသားစုကြီးသုံးစုက တောင်ပိုင်း လူရိုင်း နယ်မြေများတွင် အစွမ်းထက်ဆုံး အင်အားစုများထဲတွင် ပါဝင်သည်။ ချန်နင်စီရင်စုတွင် အသန်မာဆုံးဂိုဏ်းဖြစ်သော သူရဲကောင်းသုံးဖော်အသင်းကလည်း သူတို့နှင့် ဆက်ဆံခဲ့ဖူးပြီး ဤမိသားစုကြီး သုံးစု မည်မျှကြောက်မက်ဖွယ် ကောင်းကြောင်း သိထားကြ၏။

အလားတူပင် ဤစွမ်းအားကြီးမားသော မိသားစု သုံးစုက ချန်နင်စီရင်စုအတွင်းရှိ အင်အားစုများနှင့် အလွန် ရင်းနှီးကျွမ်းဝင်သဖြင့် သူတို့က သူတို့၏မဟာမိတ် ဖြစ်ရန် အသန်မာဆုံးဖြစ်သော သူရဲကောင်းသုံးဖော်အသင်းကို ချက်ချင်း ရွေးချယ်ခဲ့ကြသည်။

ချန်နင်စီရင်စုသို့ ဝင်ရောက်ပြီးနောက် နျန်ဂိုဏ်းမှ ကျန်းလင်က သံမဏိဓားအဖွဲ့မှ အဖွဲ့ဝင်များနှင့် တိုက်ဆိုင်စွာ တွေ့ဆုံခဲ့သဖြင့် သံမဏိဓားအဖွဲ့၏အကူအညီကို ရယူရန် ချက်ချင်း ရွေးချယ်ခဲ့၏။

ဟယ်ထျန်းက မာနကြီးသော်လည်း မြေအောက်ဂိုဏ်းခုနစ်ဂိုဏ်းတွင် နျန်ဂိုဏ်း၏ဂုဏ်သတင်းကို ကြားဖူးသဖြင့် အနည်းငယ်မျှပင် ပေါ့ဆရန် မရဲခဲ့ချေ။

ဤလူများထဲတွင် ချင်းချန်ဓားဂိုဏ်းမှ ဖန့်တုန်းထင်မှာ အနောက်ကျဆုံးပင်။ သူ ချန်နင်စီရင်စုသို့ ရောက်ရှိချိန်တွင် အခြားဂိုဏ်းများ အားလုံးကို ရွေးချယ်ပြီးဖြစ်ရာ သွေးစွန်းဝတ်ရုံအဖွဲ့နှင့် နတ်လေပြေအဖွဲ့သာ ကျန်ရှိတော့သည်။

တကယ်တမ်းတွင် ဖန့်တုန်းထင်က ဆုရှင်း၏လင်းယုန်ပျံဂိုဏ်းကို အစပိုင်းတွင် ရွေးချယ်ချင်ခဲ့၏။

လင်းယုန်ပျံဂိုဏ်းက ယခုအခါ ချန်နင်စီရင်စုတွင် အထွတ်အထိပ် သို့ ရောက်ရှိနေသည်။ ချန်နင်စီရင်စုတွင် အသန်မာဆုံးဂိုဏ်းမှာ သူရဲကောင်းသုံးဖော်အသင်းဖြစ်ကြောင်း အပြင်လူအများစုက သိထားကြ၏။

လင်းယုန်ပျံဂိုဏ်းက နာမည်အကြီးဆုံး ဖြစ်ပြီး ဆုရှင်းမှာ ချန်နင်စီရင်စုဂိုဏ်း မဟာမိတ်အဖွဲ့၏ခေါင်းဆောင် ဖြစ်သည်။

သူသည် သတင်းအချက်အလက် စုဆောင်းရန် လိုအပ်သဖြင့် ဖန့်တုန်းထင်က သဘာဝကျကျ အစွမ်းထက်ဆုံးကို ရွေးချယ်လိုသော်လည်း ကံမကောင်းစွာဖြင့် ရှဲ့ကျစ်ယန်က အခွင့်အရေး ရသွားခဲ့၏။

တိုက်ဆိုင်စွာပင် ဖန့်တုန်းထင်က ရှန်းလုံ စားသောက်ဆိုင်တွင် ဆုရှင်းကို တွေ့ဆုံခဲ့သည်။ ဖန့်တုန်းထင်သည် ခြေတစ်လှမ်း နောက်ကျသွားသဖြင့် သူ၏ရင်ထဲတွင် နာကြည်းမှုကိုသာ ခံစားနေတော့သည်။

ချင်းချန်ဓားဂိုဏ်းနှင့် ယီဓားဂိုဏ်းတို့၏ ဆက်ဆံရေးမှာ မကောင်းလှပေ။ သူတို့က ဓားဂိုဏ်းငါးဂိုဏ်း၏အဖွဲ့ဝင်များ ဖြစ်ကြသဖြင့် သူတို့၏ ဆက်ဆံရေးမှာ သိပ်မကောင်းလှဟု ဆိုရပေမည်။

စကားပုံတစ်ခု ရှိသကဲ့သို့ စာပေတွင် ပထမနေရာ မရှိသော်လည်း သိုင်းပညာတွင် ဒုတိယနေရာရှိသည်။

ကမ္ဘာပေါ်တွင် နံပါတ်တစ်ဓားဂိုဏ်း ဟူသော ခေါင်းစဉ်မှာ လူတိုင်းလိုချင်သော အရာပင်။

ရွေးချယ်စရာ နှစ်ခုသာ ကျန်ရှိတော့သဖြင့် ဖန်တုန်းထင်သည် နတ်လေပြေအဖွဲ့ကို ချက်ချင်း ရွေးချယ်လိုက်၏။

သွေးစွန်းဝတ်ရုံအဖွဲ့က နတ်လေပြေအဖွဲ့ထက် ပိုသန်မာသော်လည်း သွေးစွန်းဝတ်ရုံအဖွဲ့ကို ဘယ်ဘက်လမ်းစဉ်တံခါးရှစ်ပေါက်ထဲမှ တစ်ခုဖြစ်သော သွေးစွန်းဝတ်ရုံမျှော်စင်က ကျောထောက်နောက်ခံ ပြုထားသဖြင့် ဖန့်တုန်းထင်က ၎င်းကို ရွေးချယ်မည် မဟုတ်ပေ။

ချင်းချန်ဓားဂိုဏ်းက ဂုဏ်သိက္ခာရှိပြီး ဖြောင့်မတ်သော ဂိုဏ်းတစ်ခုအဖြစ် ဂုဏ်ယူဝင့်ကြွားပြီး သွေးစွန်းဝတ်ရုံမျှော်စင် ကဲ့သို့သော လုပ်ကြံသတ်ဖြတ်ရေး အဖွဲ့အစည်းများနှင့် ပတ်သက်လိုစိတ် သဘာဝကျကျ မရှိချေ။

ထို့အပြင် သွေးစွန်းဝတ်ရုံမျှော်စင်နှင့် သူ၏ချင်းချန်ဓားဂိုဏ်းတို့သည် ကမ္ဘာပေါ်တွင် အစွမ်းထက်ဆုံး အင်အားစုများထဲတွင် ပါဝင်၏။ အကယ်၍ သူက သူတို့ကို အမိန့်ပေးချင်လျှင် သူတို့ နားထောင်မည် မဟုတ်ပေ။

ထို့ကြောင့် ဖန့်တုန်းထင်က နောက်ဆုံးတွင် နတ်လေပြေအဖွဲ့ကို ရွေးချယ်ရုံမှလွဲ၍ အခြား ရွေးချယ်စရာ မရှိတော့ချေ။

ဖန့်တုန်းထင်က အပြာနုရောင် ဝတ်စုံကို ဝတ်ဆင်ထားပြီး အရပ်ရှည်ကာ ချောမောသော အသွင်အပြင် ရှိ၏။ ဓားကို သူ၏ကိုယ်ပေါ်တွင် သိမ်းထားမည့်အစား နောက်လိုက် တစ်ဦးထံ ပေးအပ်ထားသည်။

ကုန်းချင်းဖုန်းက သူ့ကို အလွန်ဂရုစိုက်စွာ ဝန်ဆောင်မှု ပေးခဲ့ပြီး အနည်းငယ်မျှပင် ပေါ့ဆရန် မရဲခဲ့ချေ။

ကုန်းချင်းဖုန်းကို ချန်နင်စီရင်စုတွင် ဒေသခံ အာဏာရှင်တစ်ဦးအဖြစ် သတ်မှတ်နိုင်ပြီး ဆုရှင်းမှလွဲ၍ အငယ်ဆုံးဂိုဏ်းခေါင်းဆောင် ဖြစ်ပေသည်။

သို့သော် ရှန်းထျန်းအဆင့်သို့ ရောက်ရှိပြီး အသက် နှစ်ဆယ်ကျော်အရွယ်တွင် လူသားအဆင့်သတ်မှတ်ချက်တွင် ပါဝင်လာခဲ့သော ချင်းချန်ဓားဂိုဏ်းအကြီးအကဲသား ဖန့်တုန်းထင်နှင့် နှိုင်းယှဉ်ပါက သူတို့က မိုးနှင့်မြေကဲ့သို့ကွာခြားလှပေသည်။

ဖန့်တုန်းထင်က တည်ငြိမ်စွာပြောလိုက်၏။ "ခေါင်းဆောင်ကုန်း ချန်နင်စီရင်စုတစ်ခုလုံးကိုရှာဖွေနိုင်ဖို့ ငါမင်းကိုခိုင်းထားတဲ့ သော့ပုံစံရေးဆွဲခိုင်းတဲ့ကိစ္စ မင်းလုပ်ပြီးပြီလား။"

ကုန်းချင်းဖုန်းက အလျင်အမြန် ပြန်ဖြေလိုက်သည်။ "စိတ်မပူပါနဲ့ သခင်လေးဖန့်။ သော့ပုံစံ မိတ္တူသောင်းချီထွင်းပြီးပါပြီ။ ကျွန်တော့်လူတိုင်းဆီမှာ မိတ္တူတစ်ခုစီရှိပြီး သူတို့ အားလုံး အပြင်မှာ စုံစမ်းနေကြပါတယ်။"

"ချန်နင်စီရင်စု တစ်ခုလုံးကို ရှာဖို့ အချိန် ဘယ်လောက် ကြာမလဲ။"

ကုန်းချင်းဖုန်း ခဏတာ စဉ်းစားပြီး ပြောလိုက်၏။ "အနည်းဆုံး ခုနစ်ရက် ကြာပါလိမ့်မယ်။"

"ခုနစ်ရက်" ဖန့်တုန်းထင် ချက်ချင်း မျက်မှောင်ကြုတ်သွားသည်။ "ခုနစ်ရက်က များလွန်းတယ်။ သုံးရက်က ပိုအဆင်ပြေမယ်။"

ကုန်းချင်းဖုန်းက လေးနက်သော မျက်နှာဖြင့် ပြောလိုက်၏။ "သခင်လေးဖန့်။ သုံးရက်အတွင်း လုပ်ဖို့က တကယ် မဖြစ်နိုင်ပါဘူး။ ကျွန်တော့်ဆီမှာ နောက်လိုက် ၁၀,၀၀၀ ပဲ ရှိတယ်။ သူတို့နေ့ရောညပါ အလုပ်လုပ်ရင်တောင် သုံးရက်အတွင်း ချန်နင်စီရင်စု တစ်ခုလုံးကို ရှာဖို့ မဖြစ်နိုင်ပါဘူး။"

ဖန်တုန်းထင် အေးစက်စွာ နှာခေါင်းရှုံ့လိုက်သည်။ "ကုန်းချင်းဖုန်း။ မင်း ငါ့ကို လာကစားနေတာလား။ ငါတို့ ချင်းချန်ဓားဂိုဏ်းရဲ့လေကိုလိုက်ဖမ်းတဲ့ဓားခုနစ်လက်ထဲက ပထမသုံးကွက်ကို မင်းကို ဆုကြေးအနေနဲ့ ပေးထားတာ။ အခု မင်းက မလုပ်နိုင်ဘူးလို့ ငါ့ကိုပြောနေတာလား။"

"ယီဓားဂိုဏ်းကလည်း ဒီသော့ကို ရှာနေတယ်၊ နျန်ဂိုဏ်းကလည်း ရှာနေတယ်။ ခုနစ်ရက်ဆိုတာ အချိန်အကြာကြီးပဲ။ အဲဒီအချိန်ကျရင် ရတနာသိုက် သူတို့လက်ထဲရောက်နေလောက်ပြီ။"

ကုန်းချင်းဖုန်း၏မျက်လုံးများက ဟိုဟိုဒီဒီကြည့်လိုက်၏။ "သခင်လေးဖန့်။ သုံးရက်ဆိုတာ တကယ်ကို မဖြစ်နိုင်ပါဘူး။ ဒီလိုလုပ်ရင်ကော ချန်နင်စီရင်စုက တခြားဂိုဏ်းတွေဆီက လူတချို့ငှားဖို့ သခင်လေးတောင်းဆိုလိုက်လေ။ သခင်လေးဖန့်ရဲ့ မျက်နှာနဲ့ဆိုရင် သူတို့သေချာပေါက် စော်ကားရဲမှာမဟုတ်ပါဘူး။"

ဖန့်တုန်းထင်က သူ့ကိုအေးစက်စွာ တစ်ချက် ကြည့်လိုက်သည်။ "ချန်နင်စီရင်စုမှာ ဘယ်ဂိုဏ်းက လူအများဆုံးလဲ။"

"လင်းယုန်ပျံဂိုဏ်း။ ဆုရှင်းရဲ့လင်းယုန်ပျံဂိုဏ်းမှာ အဖွဲ့ဝင်အများဆုံးရှိပါတယ်၊ ၃၀,၀၀၀ ကျော်ပါတယ်။ အဲဒါက ကျွန်တော်ရဲ့နတ်လေပြေအဖွဲ့ထက် သုံးဆ ပိုကြီးတယ်။ပြီးတော့ ဆုရှင်းက ကျွန်တော်တို့ ချန်နင်စီရင်စု ဂိုဏ်းမဟာမိတ်အဖွဲ့ရဲ့ခေါင်းဆောင်လည်း ဖြစ်တယ်။"

ကုန်းချင်းဖုန်း၏မျက်လုံးများတွင် အလင်းတန်း တစ်ခု တောက်ပသွားခဲ့၏။ သူရဲကောင်းသုံးဖော်အသင်းတွင် အဖွဲ့ဝင် ၅၀,၀၀၀ ကျော် ရှိကြောင်း သူ ရှင်းရှင်းလင်းလင်း သိထားသော်လည်း ဤအချိန်မှာတော့ လင်းယုန်ပျံဂိုဏ်းတွင် အဖွဲ့ဝင် အရေအတွက် အများဆုံးဖြစ်ကြောင်း သူ ပြောလိုက်သည်။