အခန်း ၃၄၃

အခန်း (၃၄၃)

အမျှော်အမြင်

ပင်းပြည်နယ်စစ်တပ် ဆုတ်ခွာသွားခြင်းနှင့်အတူ ကျန့်နန်စစ်တပ်ကို ဝိုင်းရံပိတ်ဆို့ထားသည့် ညှပ်ပူးညှပ်ပိတ်စစ်ဗျူဟာကြီးမှာ လုံးဝဥဿုံ ပြိုလဲပျက်စီးသွားခဲ့ပြီ ဖြစ်သည်။

သူတို့၏လမ်းကို ပိတ်ဆို့ထားမည့် ပင်းပြည်နယ်စစ်တပ် မရှိတော့သဖြင့် ကျန့်နန်စစ်တပ်သည် ကျူးမားမြစ်ကို ချောမွေ့စွာ ဖြတ်ကူးနိုင်ခဲ့ကြသည်။

ပင်းပြည်နယ်စစ်တပ် ထွက်ပြေးဆုတ်ခွာသွားသည်ကို မြင်သောအခါ လျောင်ပြည်နယ်စစ်တပ်နှင့် လျန်ပြည်နယ်စစ်တပ်တို့သည်လည်း နောက်သို့ လှည့်ပြန်ဆုတ်ခွာသွားကြတော့သည်။

မဟာမိတ်စစ်တပ်ကြီးသည် ကွမ်လင်စီရင်စု၊ လိုင်ယွမ်စီရင်စုနှင့် လင်ချိုးစီရင်စုတို့ဆီသို့ ဆုတ်ခွာသွားခဲ့ပြီး ကျူးမားမြစ်တစ်ခုလုံးကို ကျန့်နန်စစ်တပ်ထံ ကြံရာမရဘဲ လွှဲပြောင်းပေးအပ်လိုက်ရလေသည်။

သို့သော်လည်း ကျန့်နန်စစ်တပ်သည် ရန်သူနောက်သို့ ထပ်ချပ်မကွာ လိုက်လံတိုက်ခိုက်ခြင်း မပြုဘဲ မြစ်ကမ်းဘေး၌ စစ်စခန်းချကာ ကျူးမားမြစ်အတွင်းရှိ ကျန်ရှိနေသော အလောင်းကောင်များကို ရှင်းလင်းရေး ပြုလုပ်နေခဲ့သည်။

ထို့အပြင် သူတို့သည် မြစ်အထက်ပိုင်းတွင် အဆိပ်ခတ်ခြင်း ခံရပါက ကြီးမားသော ဘေးအန္တရာယ်နှင့် ရင်ဆိုင်ရနိုင်သဖြင့် မြစ်ကြောင်းတစ်လျှောက် ကင်းထောက်များ စေလွှတ်ကာ အထက်ပိုင်းရေစီးကြောင်းကို စိတ်ချရစေရန် အစောင့်အရှောက်ချထားခဲ့ကြသည်။

ညဉ့်နက်သန်းခေါင်ယံအချိန်တွင် ဝမ်ကျင်းသည် စစ်တပ်၏ အကျအဆုံးစာရင်းကို စစ်ဆေးပြီးနောက် အရည်အချင်းပြည့်မီသော ‘စနစ်’ စစ်သည်တော်အားလုံးကို ရာထူးတိုးမြှင့်ပေးခဲ့သည်။

အင်အားအမြောက်အမြား ဆုံးရှုံးသွားခဲ့သော ကျားသံချပ်ကာကိုယ်ရံတော်စစ်သည်များ၊ ကျားသစ်ကျားရဲမြင်းစီးစစ်သည်များ နှင့် အခြားသော အထူးရွေးချယ်ထားသည့် တပ်ဖွဲ့များကို လျင်မြန်စွာ ပြန်လည်ဖြည့်တင်းလိုက်သည်။

ဤအကျအဆုံးစာရင်းများမှတစ်ဆင့် ဝမ်ကျင်းသည် မြောက်ပိုင်းဒေသ ပြည်နယ်သုံးခုမဟာမိတ်တပ်ဖွဲ့၏ ကြောက်မက်ဖွယ်ကောင်းသော စစ်အင်အားကို ကိုယ်တိုင်မျက်မြင် ကြုံတွေ့ခဲ့ရသည်။

သူတို့သည် ရန်ပြည်နယ်၊ ကျင့်ပြည်နယ်နှင့် ယွဲ့ပြည်နယ်စစ်တပ်များနှင့် လုံးဝနှိုင်းယှဉ်၍မရဘဲ အမှန်တကယ် တိုက်နိုင်ခိုက်နိုင်စွမ်းရှိသော စစ်တပ်ဖြစ်ပေသည်။

အကျအဆုံး စုစုပေါင်း တစ်သိန်းနီးပါးတွင် သေဆုံးသူထက် ဒဏ်ရာရရှိသူက ပိုများပြီး ပြင်းထန်ဒဏ်ရာထက် ဒဏ်ရာအနည်းငယ်ရသူက ပိုများသော်လည်း၊ ၎င်းသည် ပြည်နယ်သုံးခုမဟာမိတ်တပ်ဖွဲ့က အလွယ်တကူ ကိုင်တွယ်နိုင်သော ရန်သူမဟုတ်ကြောင်း သက်သေပြနေသည်။

အထူးသဖြင့် ပင်းပြည်နယ်စစ်တပ်သည် ကျန့်နန်စစ်တပ်နှင့် ရင်ဆိုင်ရာတွင် အကျအဆုံးအချိုးအစား ၁:၁.၅ ကို ရရှိအောင် စွမ်းဆောင်နိုင်ခဲ့သည်။

ဤသည်မှာ ရန်ပြည်နယ်စစ်တပ်ပင် လျှင် ရွှမ်းထိုင်မြို့တော်ကဲ့သို့ ကြီးမားလှသော မြို့ပြအကာအကွယ်ကို အသုံးချ၍ပင် မစွမ်းဆောင်နိုင်ခဲ့သောအရာ ဖြစ်သည်။

အကယ်၍ ဝမ်ကျင်းသာ ရှိမနေခဲ့ပါက ဤလောကကို အမှန်တကယ် သိမ်းပိုက်နိုင်မည့်သူမှာ မြောက်ပိုင်းပြည်နယ်သုံးခုမှ တစ်ခုခုသာဖြစ်ပြီး၊ အထူးသဖြင့် ပင်းပြည်နယ်စစ်တပ်ပင် ဖြစ်ပေလိမ့်မည်ဟု ဆိုနိုင်သည်။

ပိုမိုစိတ်ချသေချာစေရန်အတွက် ဝမ်ကျင်းသည် အဆင့် (၄) ခြေလျင်တပ်၊ မြင်းတပ်နှင့် လေးသည်တော်တပ်များသက်သက်ဖြင့် ဖွဲ့စည်းထားသော အင်အားငါးသောင်းရှိသည့် ‘ဝေ’ တပ်မကြီးတစ်ခုကို ထပ်မံလဲလှယ်လိုက်ပြီး သူတို့ကို နောက်တန်းတွင် နေရာချကာ ကျူးမားမြစ်စစ်စခန်းသို့ အမြန်ဆုံး ချီတက်ရန် အမိန့်ပေးလိုက်သည်။

“အာရန်... ဝမ်ယွမ်နဲ့ တခြားလူတွေကို ဆင့်ခေါ်လိုက်စမ်း။”

ဝမ်ကျင်းအတွက်မူ ကျူးမားမြစ်ကို သိမ်းပိုက်နိုင်ခြင်းက ပထမဆုံးခြေလှမ်းမျှသာရှိသေးပြီး စစ်မှန်သော ပြကွက်ကြီးက လာဦးမည်ဖြစ်သည်။

သူသည် ပြည်နယ်သုံးခုမဟာမိတ်တပ်ဖွဲ့ အခြေစိုက်ထားသော စီရင်စုမြို့တော်များကို သွားရောက်တိုက်ခိုက်မည်မဟုတ်ချေ။ အကြောင်းမှာ ၎င်းသည် အဓိပ္ပာယ်မရှိသောကြောင့် ဖြစ်သည်။ အကယ်၍ သူတို့ မနိုင်ပါက ယခုကဲ့သို့ပင် ထွက်ပြေးကြပေလိမ့်မည်။ ကျူးမားမြစ်ကို မထိန်းသိမ်းနိုင်ပါကလည်း သူတို့သည် ရိုးရိုးရှင်းရှင်းပင် ဆုတ်ခွာသွားကြမည်သာဖြစ်သည်။

ဤလူများသည် လူမိုက်များမဟုတ်ကြချေ။ မိမိတို့၏ အဓိကအပြည်နယ်စီးပွားများနှင့် ထိပ်တိုက်တွေ့လာရပါက မည်သူမျှ ဝေဝေဝါးဝါးဖြစ်မနေဘဲ အကောင်းဆုံးနှင့် အမျှော်အမြင်အရှိဆုံး ရွေးချယ်မှုများကို ပြုလုပ်နိုင်ကြသူများ ဖြစ်သည်။

သူသည် မိမိ၏စစ်တပ်ကို ကျိပြည်နယ်မြို့တော်ဆီသို့ တိုက်ရိုက် ဦးတည်ချီတက်လိုခြင်း ဖြစ်သည်။

အသက်ဘေးအန္တရာယ်နှင့် ရင်ဆိုင်ရသောအခါ ကျိပြည်နယ်၏ အထက်တန်းလွှာ မျိုးနွယ်စုကြီးများသည် တောင်းပန်ခြင်း၊ ညှိနှိုင်းခြင်း သို့မဟုတ် အကျပ်ကိုင်ခြင်းနည်းလမ်းများဖြင့် ပြည်နယ်သုံးခုမဟာမိတ်တပ်ဖွဲ့ကို သူတို့အတွက် ဒိုင်းအဖြစ် အသုံးချရန် သူတို့၏ စွမ်းဆောင်ရည်နှင့် အင်အားအားလုံးကို ထုတ်သုံးလာလိမ့်မည်ဟု သူယုံကြည်နေသည်။

အကယ်၍ သူတို့ ထိုသို့လုပ်ဆောင်နိုင်ပါက ဝမ်ကျင်း၏ ရည်မှန်းချက် အောင်မြင်မည်ဖြစ်သည်။ သို့မဟုတ်ပါက ဝမ်ကျင်းသည် ကျိပြည်နယ်မြို့တော်ကို ထိုးဖောက်ဖျက်ဆီးပြီး သွေးချောင်းစီး သတ်ဖြတ်ခြင်းကို ဆင်နွှဲပေလိမ့်မည်။

မည်သို့ပင်ဖြစ်စေ ဝမ်ကျင်းသည် ထိုလူများကို အလွန်အမင်း အမြင်ကတ်နေမိရာ သူတို့သည် အနှေးနှင့်အမြန် သေရမည့်သူများသာ ဖြစ်သည်။

ကျိပြည်နယ်မြို့တော်ကြီး သွေးပင်လယ်ဝေသွားသည့်အခါ မည်သို့ပင်ဖြစ်စေ ပြည်နယ်သုံးခုမဟာမိတ်တပ်ဖွဲ့အတွက် ဆုတ်ခွာစရာ လမ်းကြောင်း ရှိတော့မည်မဟုတ်ချေ။

ကျိပြည်နယ်၌ အဆုံးအဖြတ်တိုက်ပွဲ ဆင်နွှဲရန်မှာ ရှောင်လွှဲ၍မရနိုင်တော့ပေ။

ဝမ်ကျင်းသည် ကြာမြင့်စွာ စောင့်ဆိုင်းစရာမလိုဘဲ ကျန်းလျောင်၊ မာချောင်နှင့် တခြားသူများသည် သူ၏ဆင့်ခေါ်မှုကြောင့် ရောက်ရှိလာခဲ့ကြသည်။

ဝမ်ကျင်းသည် စစ်မြေပြင်မြေပုံကို ဖြန့်ခင်းစေပြီးနောက် သူတို့ကို မေးမြန်းလိုက်သည်။

“စစ်သူကြီးတို့... ငါက ကျိပြည်နယ်မြို့တော်ကို သိမ်းပိုက်ချင်တယ်။ မင်းတို့ဆီမှာ ကောင်းမွန်တဲ့ ဗျူဟာအကြံအစည် ရှိကြလား။”

၎င်းမှာ နဂိုမူလအခြေခံသဘောတရားအတိုင်းပင် ဖြစ်သည်။ ကျွမ်းကျင်သောအလုပ်ကို ကျွမ်းကျင်သူများထံသာ လွှဲအပ်ခြင်းပင်။

သူသည် ယေဘုယျဦးတည်ချက်ကို ထိန်းကျောင်းနိုင်သော်လည်း စစ်ပွဲဆင်နွှဲခြင်းနှင့် စစ်ဗျူဟာပိုင်းတွင်မူ မကျွမ်းကျင်ချေ။

ဝမ်ကျင်းသည် မကျွမ်းကျင်သူက ကျွမ်းကျင်သူကို လမ်းညွှန်ပြသခြင်းကြောင့် ဖြစ်ပေါ်လာရသော ရင်နင့်ဖွယ်ရာ သာဓကများကို မြင်တွေ့ဖူးထားသဖြင့် သူသည် ခေါင်းမာပြီး မိုက်မဲနေမည်မဟုတ်ပေ။

ကျန်းလျောင်နှင့် တခြားသူများသည် မြေပုံအနီးသို့ စုရုံးကာ အသေးစိတ်စစ်ဆေးပြီး ရန်သူကို ချေမှုန်းရန် ဗျူဟာတစ်ခုကို သေချာစွာ တိုင်ပင်ဆွေးနွေးကြတော့သည်။

အထူးသဖြင့် မာချောင်သည် ဝမ်ကျင်း၏လက်အောက်သို့ ဝင်ရောက်လာကတည်းက စစ်မှုထမ်းကောင်း ကိုယ်ပိုင်အောင်မြင်မှုများ အမြန်ဆုံး တည်ဆောက်လိုသောစိတ်ဖြင့် ဇွဲလုံ့လစိုက်ထုတ်နေခဲ့သည်။

ကျန်းလျောင်သည် စောစီးစွာ ရောက်ရှိလာခြင်းနှင့် ထူးချွန်ထက်မြက်သော အရည်အချင်းများကြောင့် ဝမ်ကျင်းစစ်တပ်အတွင်း၌ ထိပ်တန်းဦးဆောင်သူတစ်ဦး ဖြစ်နေခဲ့ပြီဖြစ်သည်။

သို့သော်လည်း မာချောင်က သူ၏သိုင်းပညာစွမ်းရည်နှင့် စစ်ဦးစီးနိုင်စွမ်းမှာ ကျန်းလျောင်ထက် မည်သို့မျှ မနိမ့်ကျကြောင်း ယုံကြည်ထားသည်။ ဤသည်မှာ စရိုက်သဘာဝ ကွာခြားမှုကြောင့်ဖြစ်ပြီး မာချောင်က အနည်းငယ် မာနဝင့်ကြွားတတ်သော်လည်း ယွဲ့ကျင်းကမူ ထိုကဲ့သို့ ပြိုင်ဆိုင်လိုစိတ်မျိုး မရှိချေ။

သူတို့တစ်စု တိုင်ပင်ဆွေးနွေးကာ ဗျူဟာချမှတ်နေစဉ် ဝမ်ကျင်းသည် ဘေးမှနေ၍ ဝင်ရောက်နှောင့်ယှက်ခြင်းမပြုဘဲ စောင့်ကြည့်နေခဲ့သည်။ သူသည် ရလဒ်ကောင်းကိုသာ လိုလားပြီး သူကိုယ်တိုင် ပါဝင်ပတ်သက်နေရန် မလိုအပ်ဟု ယူဆထားသည်။

သူသည် မိုင်ပေါင်းထောင်ချီဝေးကွာသော နေရာမှနေ၍ သေးနုပ်သောအရာများအထိ လိုက်လံညွှန်ကြားနေမည့် စစ်သေနာပတိမျိုး မဟုတ်ပေ။

ဆွေးနွေးပြီးနောက် နောက်ဆုံးတွင် မာချောင်က စစ်တပ်တစ်ခုကို ဦးဆောင်ကာ ကျိပြည်နယ်မြို့တော်သို့ အလစ်အငိုက် အင်အားသုံး စီးနင်းတိုက်ခိုက်ရန် ဆုံးဖြတ်ခဲ့ကြပြီး ပင်မစစ်တပ်ကြီးမှာမူ သူတို့၏ ဆုတ်ခွာရာလမ်းကြောင်း အပိတ်မခံရစေရန် ကျူးမားမြစ်၌ ဆက်လက်တပ်စွဲထားရန် သဘောတူလိုက်ကြသည်။

မည်သို့ပင်ဖြစ်‌စေ သူတို့ မည်မျှပင် ယုံကြည်ချက်ရှိနေပါစေ ပြည်နယ်သုံးခုမဟာမိတ်တပ်ဖွဲ့ကို သစ်သားတုံးကဲ့သို့ အထင်သေး၍မရချေ။

အကယ်၍ စစ်တပ်တစ်ခုလုံးက ကျူးမားမြစ်ကို စောင့်ကြပ်မည့် စစ်သည်တော်များ မချန်ထားဘဲ ကျိပြည်နယ်မြို့တော်ကို သွားရောက်တိုက်ခိုက်မည်ဆိုပါက မြင်းတပ်အင်အား မနည်းလှသော ပြည်နယ်သုံးခုမဟာမိတ်တပ်ဖွဲ့သည် ကျန့်နန်စစ်တပ်၏ ရိက္ခာထောက်ပံ့ရေးလမ်းကြောင်းကို အသေအချာ ဖြတ်တောက်စီးနင်းပေလိမ့်မည်။

ဝမ်ကျင်းအနေဖြင့် စနစ်၏ ရန်ပုံငွေများဖြင့် ရိက္ခာများကို ဝယ်ယူနိုင်သော်လည်း မြေကြီးမှ စိုက်ပျိုးထွက်ရှိသော ရိက္ခာနှင့် ရန်ပုံငွေဖြင့် ဝယ်ယူရသော ရိက္ခာမှာ လုံးဝကွာခြားလှသဖြင့် စစ်ပွဲ၏ကုန်ကျစရိတ်ကို အလဟဿ မတိုးပွားစေလိုတော့ချေ။

ဝမ်ကျင်းသည် ရန်ပုံငွေကို တတ်နိုင်သမျှ ချွေတာသုံးစွဲလေ့ရှိသည်။ အကြောင်းမှာ စနစ်ရန်ပုံငွေ ဖြည့်တင်းရန် လိုအပ်သော ရွှေ၊ ငွေနှင့် တခြားသော အဖိုးတန်ပစ္စည်းများသည် ပြန်လည်ပြည့်ဖြိုးမြဲမဟုတ်သော အရင်းအမြစ်များဖြစ်ပြီး သူသည် နောင်တစ်ချိန် နိုင်ငံတော်ဘဏ္ဍာတိုက်၏ အရန်အင်အားအတွက်ပါ ထည့်သွင်းစဉ်းစားရမည် ဖြစ်သောကြောင့်ပင်ဖြစ်သည်။

ဝမ်ကျင်းသည်လည်း မာချောင်အား စစ်တပ်ကို ဦးဆောင်စေရန် သဘောတူခွင့်ပြုခဲ့သည်။ လက်ရှိအချိန်တွင် သူ၏လက်အောက်၌ ထူးချွန်ထက်မြက်သော စစ်သူကြီးနှစ်ဦးရှိနေသည်။ ကျန်းလျောင်နှင့် မာချောင် ဖြစ်သည်။ မည်သူတစ်ဦးက သွားရောက်သည်ဖြစ်စေ တပ်စွဲထားသော စစ်တပ်ကြီးမှာ မည်သည့် မတော်တဆမှုမျိုးနှင့်မျှ ရင်ဆိုင်ရမည်မဟုတ်ချေ။

တစ်ချိန်တည်းမှာပင် စစ်တပ်ကို ခွဲထုတ်၍ ပြည်နယ်မြို့တော်ကို တိုက်ခိုက်ခြင်းမှာ ရန်သူကို မျှားခေါ်သည့် ဗျူဟာတစ်ခုလည်း ဖြစ်ပေသည်။

ကျန့်နန်စစ်တပ်သည်လည်း ကျူးမားမြစ်တိုက်ပွဲတွင် အကျအဆုံးအချို့ ရှိခဲ့သည်။ အကယ်၍ နောက်ထပ် အထူးရွေးချယ်ထားသော စစ်သည်တစ်သိန်းကိုပါ ထပ်မံခွဲထုတ် စေလွှတ်လိုက်မည်ဆိုပါက ပြည်နယ်သုံးခုမဟာမိတ်တပ်ဖွဲ့သည် ဧကန်မုချ တွေးတောလာပေလိမ့်မည်။

သူတို့၏ အင်အားသုံးသိန်းရှိသော စစ်တပ်ကြီးထဲတွင် စစ်သည် မည်မျှကျန်ရှိပါသေးသနည်း။ သူတို့ကို ချေမှုန်းပစ်ရန် အခွင့်အရေး ရှိနိုင်ပါသည်လား။

မဟာမိတ်စစ်တပ်၏ လက်ရှိ ကြောက်ရွံ့ပြီး တိုက်ပွဲဝင်ရန် ဝန်လေးနေသော အမူအရာကို အထင်သေးရန်မရှိဘဲ ၎င်းမှာ သူတို့ဘက်မှ ကြီးမားသော ပေးဆပ်မှုကို မပြုလုပ်လိုကြသောကြောင့်သာ ဖြစ်သည်။

တစ်ချိန်တည်းမှာပင် သူတို့သည် ကျန့်နန်စစ်တပ်ကို အမြစ်ပြတ်ချေမှုန်းနိုင်မည့် မျှော်လင့်ချက် မရှိသည်ကို မြင်တွေ့ရသဖြင့် အလဟဿ အသက်မစွန့်လိုကြခြင်း ဖြစ်သည်။

သို့သော်လည်း အကယ်၍ သူတို့သည် ကျန့်နန်စစ်တပ်ကို ထောင်ချောက်ဆင် ပိတ်ဆို့နိုင်မည့် အခွင့်အရေးကို မြင်တွေ့လိုက်ရပါက အသေအချာပေါက် လက်လွတ်ခံမည် မဟုတ်ချေ။

ကျန့်နန်စစ်တပ်သည် အလွန်အမင်း အင်အားတောင့်တင်းလှသဖြင့် သူတို့အားလုံးက ကျန့်နန်စစ်တပ်ကို တတ်နိုင်သမျှ အမြန်ဆုံး ရှင်းလင်းပစ်ချင်နေကြသည်။

ငါးရက်ခန့် ကြာမြင့်ပြီးနောက် စစ်မြေပြင်ကို ရှင်းလင်းပြီးစီးသွားပြီး နောက်ထပ်လဲလှယ်ထားသော စစ်သည်ငါးသောင်း ရောက်ရှိပူးပေါင်းလာချိန်တွင် ဝမ်ကျင်းသည် စစ်သည်တစ်သိန်းကို မာချောင်ထံသို့ ပြတ်ပြတ်သားသား လွှဲအပ်ပေးလိုက်လေသည်။

၎င်းမှာ အလစ်အငိုက်စီးနင်းတိုက်ခိုက်ရမည့် စစ်ဆင်ရေးဖြစ်သဖြင့် လျင်မြန်မှုမှာ အဓိကဖြစ်ရာ သူတို့သည် ကြီးမားလှသော မြို့သိမ်းလက်နက်ယန္တရားများကို အမြောက်အမြား သယ်ဆောင်သွားခြင်း မပြုခဲ့ကြချေ။

ဝမ်ကျင်းက မာချောင်အား ပေးအပ်လိုက်သော တာဝန်မှာ ကျိပြည်နယ်မြို့တော်ကို မဖြစ်မနေ ထိုးဖောက်ဖျက်ဆီးရန် မဟုတ်ဘဲ အဓိကအားဖြင့် ဝိုင်းရံပိတ်ဆို့ထားရန်သာ ဖြစ်သည်။ ၎င်းမှာ ပြ်နဉ်တစ်ခုလုံး၏ ဗဟိုမြို့တော်ဖြစ်ပြီး မဟာဗျူဟာမြောက် ကောင်းမွန်သော တည်နေရာအကာအကွယ် ရှိနေသဖြင့် အတွေ့အကြုံမရှိသော စစ်သားအသစ်များသာ စောင့်ကြပ်နေလျှင်တောင်မှ ကြီးမားသော ပေးဆပ်မှုမရှိဘဲ အလွယ်တကူ သိမ်းပိုက်နိုင်မည်မဟုတ်ချေ။

သူသည် ကျိပြည်နယ်၏ အထက်တန်းလွှာ မျိုးနွယ်စုကြီးများမှတစ်ဆင့် မဟာမိတ်စစ်တပ်အပေါ် ဖိအားပေးနိုင်ရန် စစ်ကူများ တောင်းခံနိုင်မည့် လမ်းကြောင်းတစ်ခုကိုပင် ရည်ရွယ်ချက်ရှိရှိ ချန်လှပ်ပေးထားခဲ့သည်။

သူ၏ အရေးကြီးဆုံးသော ဗျူဟာမှာ ကျိပြည်နယ်မြို့တော်ကို ဗဟိုချက်အဖြစ် အသုံးချကာ ရောက်ရှိလာမည့် စစ်ကူတပ်ဖွဲ့အားလုံးကို ကြားဖြတ်ချေမှုန်းရန် ဖြစ်ပြီး ၎င်းမှာ ‘မြို့ကို ဝိုင်းရံ၍ စစ်ကူကို တိုက်ခိုက်ခြင်း’ ပင် ဖြစ်သည်။

သို့သော်လည်း အကယ်၍ မဟာမိတ်စစ်တပ်က ဘေးမှနေ၍ ဘာမှမလုပ်ဘဲ စောင့်ကြည့်နေမည်ဆိုပါက သို့မဟုတ် ကျိပြည်နယ် အထက်တန်းလွှာ မျိုးနွယ်စုကြီးများ ခေါ်ဆောင်လာသော စစ်ကူများက အလွန်အမင်း အသုံးမကျပါက သူ၏ဗျူဟာသည် မြို့ကို တိုက်ခိုက်သိမ်းပိုက်ခြင်းသို့ ပြောင်းလဲသွားပေလိမ့်မည်။

မြို့ကို ဖောက်ထွက်ပြီးနောက် သာမန်အရပ်သားပြည်သူများကို စိုးစဉ်းမျှ မနှောင့်ယှက်စေရဘဲ အထက်တန်းလွှာ မျိုးနွယ်စုကြီးများကိုမူ အမြစ်ပြတ် သုတ်သင်ရှင်းလင်းပစ်ရမည် ဖြစ်သည်။

သူသည် ကျိပြည်နယ် အထက်တန်းလွှာ မျိုးနွယ်စုကြီးများ၏ သွေးကို အသုံးချကာ လောကကမ္ဘာရှိ အထက်တန်းလွှာ မျိုးနွယ်စု အားလုံးကို သတိပေးချက် ထုတ်ပြန်လိုခြင်း ဖြစ်သည်။ သူတို့အနေဖြင့် မည်သူပင်ဖြစ်စေကာမူ တော်လှန်ပုန်ကန်ဝံ့ပါက သေဒဏ်သာ စောင့်ကြိုနေပေလိမ့်မည်။

သူသည် သွေးချောင်းစီး သတ်ဖြတ်ခြင်းများမှတစ်ဆင့် သူတို့၏ စိတ်နှလုံးအတွင်း၌ ကြောက်ရွံ့ခြင်း၊ တုန်လှုပ်ခြင်းနှင့် သွေးပျက်ခြင်းတို့ကို စွဲထင်ကျန်ရစ်စေကာ နောင်တွင် သူ့ကို ဆန့်ကျင်ရန် လုံးဝ မဝံ့ရဲတော့အောင် ပြုလုပ်လိုခြင်း ဖြစ်သည်။

ဤကမ္ဘာလောက၏ သမိုင်းကြောင်းမှာ ဝမ်ကျင်း ယခင်ဘဝက မြင်တွေ့ခဲ့ရသော သမိုင်းမှတ်တမ်းများထက် များစွာ ပိုမိုညင်သာ နူးညံ့လှပေသည်။

သူတို့တွင် ‘မင်းဆက်ငါးခုနှင့် တိုင်းပြည်ဆယ်ခု’ ခေတ်၏ မှောင်မိုက်မှုမျိုး၊ ‘တောင်ပိုင်းနှင့် မြောက်ပိုင်းမင်းဆက်များ’ ခေတ်၏ သွေးချောင်းစီးမှုမျိုး မရှိခဲ့သလို၊ ‘ရိုင်းစိုင်းသော လူမျိုးစုငါးစု၏ သောင်းကျန်းမှု’ ကဲ့သို့သော အော်ဂါလီစရာ သမိုင်းဆိုးမျိုးလည်း မရှိခဲ့ဖူးချေ။

သူတို့သည်

"ဆောင်းဦးရာသီ ရောက်ရှိ၍ ကိုးလပိုင်း ရှစ်ရက်မြောက်နေ့တွင် ငါ၏ပန်းများ ပွင့်လန်းလာသောအခါ၊ အခြားသော ပန်းပွင့်အပေါင်းတို့သည် ကွယ်ပျောက်ပျက်စီးခြင်းသို့ ဆိုက်ရောက်ရလိမ့်မည်။ မွှေးပျံ့လှသော ရနံ့သည် ချန်အန်းမြို့တော်တစ်ခုလုံးကို ထိုးဖောက်လျှံထွက်သွားပြီး၊ မြို့တော်ကြီးတစ်ခုလုံး ရွှေရောင်ချပ်ဝတ်တန်ဆာများ ဆင်မြန်းထားသကဲ့သို့ ဖြစ်သွားစေမည်။"

ဟူသော ကဗျာစာသား၏ စစ်မှန်သော သွေးစွန်းသည့်အဓိပ္ပာယ်ကို တစ်ခါမျှ ကိုယ်တွေ့ မကြုံဖူးကြချေ။

ဤလောကကမ္ဘာတွင် ဓားလှံလက်နက်များဖြင့် မဖြတ်တောက်နိုင်သော မာကျောသော အရိုးဟူ၍ မရှိကြောင်းကို သူတို့ သိရှိကြလိမ့်မည် မဟုတ်ပေ။

မည်မျှပင် မြင့်မြတ်လှပါသည်ဟု ပြောနေလျှင်တောင်မှ သူတို့သည်လည်း ပခုံးနှစ်ဖက်ပေါ်တွင် ဦးခေါင်းတစ်ခု တင်ထားသော လူသားများသာဖြစ်ပြီး သတ်လျှင် သေရမည့်သူများသာ ဖြစ်ပေသည်။