အခန်း ၁၃၈

အခန်း ၁၃၈

တိုက်ပွဲဖြစ်ပွားရာနေရာကို ရှင်းလင်းရခြင်းမှာ အလွန်လွယ်ကူလှသည်။ ကျန်းဟန်သည် ရရှိလာသော ပစ္စည်းများအားလုံးကို သိမ်းဆည်းပြီးနောက် ပိုင်လင်းသည် ပြင်းထန်သော မိုးကြိုးလျှပ်စီး အနည်းငယ်ကို ဆင့်ခေါ်ကာ အလောင်းများနှင့် တိုက်ပွဲဖြစ်ပွားခဲ့သည့် အမှတ်အသားများကို အစအနမကျန် လုံးဝ ချေဖျက်ပစ်လိုက်သည်။

“သွားကြစို့။”

ကျန်းဟန်သည် ရရှိလာသော ပစ္စည်းများကို ချက်ချင်း ထိုင်မစစ်ဆေးသေးဘဲ ပိုင်လင်းနှင့် ဟုတ်ဟုတ်တို့ကို ခေါ်ဆောင်ကာ ထိုနေရာမှ တိုက်ရိုက် ထွက်ခွာလာခဲ့တော့သည်။ မိုးကြိုးတောင်ပေါ်တွင် မည်သည့်ဖုန်းလိုင်းအချက်ပြမှုမျှ မရှိသဖြင့် ကမ္ဘာကြီးနှင့် လုံးဝ အဆက်ပြတ်ဖြစ်နေသော နေရာဟုပင် ဆိုနိုင်သည်။

နှစ်စဉ်နှစ်တိုင်း ဤတောင်ပေါ်တွင် ရေတွက်၍မရနိုင်သော သားရဲထိန်းချုပ်သူများ သေဆုံးလေ့ရှိကြသည်။ လူအများစုမှာ မိစ္ဆာသားရဲများ၏ လက်ချက်ဖြင့် သေဆုံးကြရခြင်းဖြစ်သော်လည်း ၎င်းတို့ထက် ပိုမိုများပြားသော အရေအတွက်မှာမူ မိမိတို့၏ လူသားအပေါင်းအဖော်များ၏ လက်ချက်ဖြင့် သေဆုံးကြရခြင်း ဖြစ်သည်။

ထို့ကြောင့် ကျန်းဟန် အမြန်ဆုံး ထွက်ခွာရန် လိုအပ်သည်။ အကယ်၍ သူသည် စွမ်းအားကြီးမားသော ကျွမ်းကျင်သူတစ်ဦးကို အမှန်တကယ် ဆွဲဆောင်မိသွားပြီး အဆင့် ၄ အရှင်သခင်အဆင့်သားရဲကို ပိုင်ဆိုင်ထားသူနှင့် ရင်ဆိုင်ရလျှင် သူ အနိုင်ရရှိနိုင်မည် မဟုတ်ပေ။

အရှင်သခင်အဆင့် အရှိန်အဝါရှိသော သားရဲတစ်ကောင်သည် ဝိဉာဉ်စွမ်းအင်များကို ကုန်ခမ်းသွားအောင်ပင် ပြုလုပ်နိုင်စွမ်းရှိရာ ပိုင်လင်းအနေဖြင့် သဘာဝဝိဉာဉ်စွမ်းအင်များကို စုပ်ယူနိုင်ခြင်း ရှိတော့မည်မဟုတ်ပေ။ ထို့ပြင် ၎င်းတို့၌ သဘာဝဝိဉာဉ်စွမ်းအင်များကို စိတ်ကြိုက်လှည့်ပတ် အသုံးပြုနိုင်သည့် နည်းလမ်းအချို့လည်း ရှိကြသည်။

ထိုကဲ့သို့သော တည်ရှိမှုများကို ရင်ဆိုင်ရသည့်အခါ ပိုင်လင်းအနေဖြင့် ခေါင်းဆောင်အဆင့်သို့ ရောက်ရှိပြီး မိုးကြိုးတောင်၏ ပထဝီဝင်အနေအထား အသာစီးရမှုကို အသုံးမချနိုင်သရွေ့ တိုက်ပွဲဝင်ရန် မဖြစ်နိုင်ချေ။ သို့မဟုတ်ပါက ရှုံးနိမ့်ခြင်းဟူသော ရလဒ်တစ်ခုသာ ရှိပေလိမ့်မည်။

နဂါးမြှုပ်နှံခြင်းချိုင့်ဝှမ်းမှ ထွက်ခွာလာပြီးနောက် ကျန်းဟန်သည် ခရမ်းရောင်လျှပ်စီးတောင်ထွတ်ဆီသို့ ဦးတည်လိုက်သည်။ လမ်းခရီးတွင် သူသည် ခေါင်းဆောင်အဆင့် အစောပိုင်း မိုးကြိုးစွယ်တောဝက် တစ်ကောင်ကို သတ်ဖြတ်လိုက်ပြီးနောက်မှသာ ယခင်ရရှိထားသော ပစ္စည်းများကို စစ်ဆေးရန်အတွက် ရပ်နားလိုက်သည်။

အများဆုံး ရရှိထားသော ပစ္စည်းများမှာ ထိုသားရဲထိန်းချုပ်သူများကို သတ်ဖြတ်ရာမှ ရရှိလာသည့် သားရဲအမြုတေများဖြစ်ပြီး ၎င်းတို့ကို ရောင်းချပါက နှစ်သောင်း သို့မဟုတ် သုံးသောင်းခန့် ရရှိနိုင်သည်။ တောရိုင်းသားရဲများ၏ သားရဲပမြုတေများနှင့် နှိုင်းယှဉ်ပါက သားရဲထိန်းချုပ်သူများ၏ သားရဲအမြုတေများက များစွာ ပိုမိုသန့်စင်ကြသည်။ အဘယ်ကြောင့်ဆိုသော် ၎င်းတို့ကို ဂရုတစိုက် မွေးမြူထားကြသောကြောင့် ဖြစ်သည်။ အမြုတေများ၏ သန့်စင်မှုနှုန်း အလွန်မြင့်မားသောကြောင့် ရောင်းဈေးမှာလည်း အလွန် မြင့်မားလှသည်။

သို့သော်လည်း မည်သူမျှ ထိုအရာများကို ဗြောင်ကျကျ ထွက်မရောင်းကြချေ။ ၎င်းတို့ကို အများအားဖြင့် မိမိ၏ သားရဲများကို ပြန်ကျွေးလေ့ရှိကြသည်၊ မှောင်ခိုဈေးကွက်တွင် ရောင်းချကြသည် သို့မဟုတ် တောတွင်းဈေးကွက်ရှိ အထူးပြု လက်ခံသည့် ပွဲစားများထံတွင် ရောင်းချကြသည်။

သားရဲအမြုတေများအပြင် ၎င်းတို့ သယ်ဆောင်လာသော ဆေးရည်များလည်း ရှိသေးသည်။ အမျိုးမျိုးသော ဒဏ်ရာများကို ကုသရန် ဆေးရည်များအပြင် သားရဲများ စွမ်းအင်ပြန်လည်ဖြည့်တင်းရန် ဆေးရည်အချို့လည်း ပါဝင်သည်။

ကျန်းဟန်သည် ထိုပစ္စည်းများကိုလည်း ထုတ်ရောင်းရန် အစီအစဉ်မရှိချေ။ အဘယ်ကြောင့်ဆိုသော် သူကိုယ်တိုင် အသုံးပြုနိုင်သောကြောင့် ဖြစ်သည်။ သူ အသုံးပြု၍မရသော ပစ္စည်းများကိုမူ နောက်ပိုင်းကျမှ အများအပြား စုပေါင်း၍ ရောင်းချရန် စဉ်းစားမည် ဖြစ်သည်။

အခြားသူများနှင့် နှိုင်းယှဉ်ပါက သူ့တွင် နောက်ထပ် အရောင်းအဝယ် လမ်းကြောင်းတစ်ခု ရှိနေသေးသည်။ ၎င်းမှာ မြူခိုးအဖွဲ့အစည်းပင် ဖြစ်သည်။ မြူခိုးအဖွဲ့အစည်းအတွင်း၌ ရောင်းချသောအရာ မည်သည့်အရာမဆို ပစ္စည်း၏ မူလအစကို လုံးဝ မေးမြန်းခြင်း မရှိချေ။ အခြားအဖွဲ့ဝင်များထံသို့ ဖြစ်စေ သို့မဟုတ် အဖွဲ့အစည်းထံသို့ဖြစ်စေ တိုက်ရိုက် ရောင်းချနိုင်သည်။

သူ့ကို အံ့အားသင့်စေခဲ့သည့်အရာမှာ အပြာရောင် သလင်းကျောက်မြေခွေး၏ ပိုင်ရှင် လျူလဲ့နှင့် ဒုခေါင်းဆောင် ပိုင်ပင်းတို့၏ ကျောပိုးအိတ်များ ဖြစ်ကြသည်။ ၎င်းတို့ နှစ်ယောက်လုံး၏ ကျောပိုးအိတ်များထဲတွင် ကောင်းမွန်သော ပစ္စည်းများ ပါရှိနေသည်။

လျူလဲ့၏ ကျောပိုးအိတ်ထဲတွင် သွေးဝိဉာဉ်ပုံဆောင်ခဲရှစ်တုံးတိတိ ပါဝင်နေပြီး မိုးကြိုးမီးတောက်ရွှေ သုံးတုံးလည်း ပါရှိသည်။ သွေးဝိဉာဉ်သလင်းကျောက်ဟူသည်မှာ ဝိဉာဉ်ပုံဆောင်ခဲ အမျိုးအစားတစ်မျိုး ဖြစ်သော်လည်း လေ သို့မဟုတ် မိုးကြိုးကဲ့သို့သော ရှားပါးဒြပ်စင် ဝိဉာဉ်ပုံဆောင်ခဲများထက် ပိုမို အဖိုးတန်လှသည်။ အဘယ်ကြောင့်ဆိုသော် ၎င်းတို့သည် သဘာဝတရားထဲတွင် သက်ရှိအမြောက်အမြား သေဆုံးပျက်စီးခဲ့သည့် နေရာမျိုး၌သာ တည်ရှိနိုင်သောကြောင့် ဖြစ်သည်။ ထိုကဲ့သို့သော နေရာမျိုးမှာ ရှားပါးပြီး အများစုမှာ လူတို့ ဖန်တီးထားခြင်း ဖြစ်သည်။

သွေးဒြပ်စင် သားရဲများသည် အမျိုးမျိုးသော သားရဲများ၏ သွေးကို စားသုံးနိုင်သောကြောင့် အလွန် ရေပန်းစားကြသည်။ ထိုသွေးများသည် မတူညီသော ဒြပ်စင်ရှိသည့် သားရဲများ၏ သွေးဖြစ်နေပါစေ စိုးရိမ်စရာမရှိချေ။ ၎င်းတို့၏ ထူးခြားသော စွမ်းရည်က သွေးထဲမှ အနှစ်သာရများကို သီးသန့် ထုတ်ယူနိုင်စွမ်း ရှိခြင်းဖြစ်သည်။

ထို့ပြင် သွေးဒြပ်စင် သားရဲများအတွက် လိုအပ်သော ကုန်ကြမ်းပစ္စည်း အများစုကို သတ်ဖြတ်ခြင်းဖြင့်သော်လည်းကောင်း သို့မဟုတ် သွေးဖြင့် မွေးမြူခြင်းဖြင့် သော်လည်းကောင်း ရရှိနိုင်သည်။ သွေးဝိဉာဉ်ပုံဆောင်ခဲများကို လူလုပ်၍ ရနိုင်သည်။ ဝိဉာဉ်စွမ်းအင် ကြွယ်ဝသော မြေအောက်စွမ်းအင်ကြောတစ်ခုကို ရှာဖွေပြီးနောက် မိစ္ဆာသားရဲများကို အမဲလိုက်ကာ သားရဲတစ်သောင်းတွင်းတစ်ခုကို တည်ဆောက်ရသည်။ ဆယ်စုနှစ်တစ်ခု သို့မဟုတ် ထိုထက်မက ကြာမြင့်ပြီးနောက်တွင် သွေးဝိဉာဉ်ပုံဆောင်ခဲများ တဖြည်းဖြည်း ထွက်ပေါ်လာမည် ဖြစ်သည်။

ကျန်းဟိးန် ရရှိခဲ့သော သွေးဝိဉာဉ်သလင်းကျောက်များမှာ အဆင့် ၃ မျှသာ ဖြစ်သော်လည်း တစ်တုံးလျှင် ယွမ်တစ်သောင်းခန့် ရောင်းချနိုင်သည်။ ၎င်းမှာ အဆင့် ၃ ဝိဉာဉ်အပင်များထက် များစွာ ပိုမိုဈေးကြီးသည်။ အဘယ်ကြောင့်ဆိုသော် ၎င်းတို့သည် သားရဲတစ်သောင်းတွင်းမှသာ ထွက်ရှိနိုင်ပြီး ကုန်ကျစရိတ် အလွန်မြင့်မားသောကြောင့် ဖြစ်သည်။

ရှစ်တုံးဆိုပါက ငွေ ရှစ်သောင်းခန့် တန်ကြေးရှိပြီး ဝယ်လိုအား အလွန်များပြားသော ပစ္စည်း ဖြစ်သည်။ သဘာဝအတိုင်းပင် ကျန်းဟန်သည် ထိုအရာများကို ရောင်းချရန် အစီအစဉ်မရှိချေ။ ထိုပစ္စည်းများသည် ဟုတ်ဟုတ်အတွက် အလွန် အသုံးဝင်သည်။ သွေးဝိဉာဉ်ပုံဆောင်ခဲများထဲတွင် သားရဲတစ်သောင်း၏ သွေးအနှစ်သာရများ ကိန်းအောင်းနေသဖြင့် သွေးဒြပ်စင် သားရဲများအတွက် အလွန်ကြီးမားသော အထောက်အပံ့ကို ဖြစ်စေသည်။ ကျန်းဟန် ထိုအရာများကို ထုတ်လိုက်သည်နှင့် ဟုတ်ဟုတ်က ချက်ချင်း လှမ်းကြည့်လာခဲ့သည်။

“ဒါတွေအားလုံး မင်းအတွက်ပဲ...။ ငါ ဒါတွေကို မရောင်းဘူး။”

ကျန်းဟန်က ပြောလိုက်သည်။

“ဂူးးး”

ထိုစကားကို ကြားသောအခါ ဟုတ်ဟုတ်သည် ခေါင်းပြန်ငုံ့သွားပြီး ၎င်း၏ မိုးကြိုးစွယ်တောဝက် နှလုံးသားကို ဆက်လက်စားသုံးနေတော့သည်။

မိုးကြိုးမီးတောက်ရွှေ သုံးတုံးမှာ သတ္တုအမျိုးအစားတစ်မျိုး ဖြစ်ပြီး အတော်အတန် တန်ဖိုးရှိလှသည်။ စုစုပေါင်းဆိုလျှင် ငါးထောင် သို့မဟုတ် ခြောက်ထောင်ခန့်ဖြင့် ရောင်းချနိုင်ပြီး အချို့သော သတ္တုဒြပ်စင်သားရဲများအတွက် အစာအာဟာရ ဖြစ်စေသည်။

ဒုခေါင်းဆောင် ပိုင်ပင်း၏ ကျောပိုးအိတ်ထဲတွင်မူ ‘ရေဓာတ်က သက်ရှိခပ်သိမ်းကို ပျိုးထောင်ပေးသည်’ ဟု အမည်ရသော ရေဒြပ်စင် စွမ်းရည်ကျောက်ပြားတစ်ပြား ပါရှိသည်။ ၎င်းသည် ကုသခြင်းနှင့် ဝိဉာဉ်အပင်များကို ပြုစုပျိုးထောင်ခြင်းတို့တွင် အသုံးပြုသည့် ရေဒြပ်စင် စွမ်းရည်တစ်ခု ဖြစ်သည်။ ၎င်းသည် အထောက်အကူပြုအမျိုးအစားတွင် ပါဝင်ပြီး အသုံးပြုပြီးနောက် ဝိဉာဉ်အပင်များ၏ ကြီးထွားနှုန်းကို မြန်ဆန်စေကာ ကုသရာတွင် အသုံးပြုပါက သစ်သားဒြပ်စင်၏ ကုသခြင်းနည်းလမ်းများနှင့် ထပ်ဆင့်ပေါင်းစပ်နိုင်သဖြင့် ကုသမှုအာနိသင်ကို 150% အထိ ရောက်ရှိစေနိုင်သည်။

စွမ်းရည်ကျောက်ပြားဟူသည်မှာ သဘာဝတရားကြီးမှ မြစ်ဖျားခံလာသော ထူးခြားသည့် ရတနာတစ်မျိုး ဖြစ်သည်။ ၎င်းတို့သည် အများအားဖြင့် ဝိဉာဉ်ပုံဆောင််ခဲ မိုင်းများအတွင်း၌ အတူတကွ တည်ရှိနေလေ့ရှိပြီး အရေအတွက်အားဖြင့် ရှားပါးလှသည်။ ၎င်း၏ လုပ်ဆောင်ချက်မှာ စွမ်းရည်များကို ပုံနှိပ်မှတ်တမ်းတင်ရန် ဖြစ်သည်။

သားရဲတစ်ကောင်သည် မိမိ၏ စွမ်းရည်တစ်ခုခုကို စိတ်ကြိုက် ချက်ချင်းထုတ်ဖော်နိုင်သည့် အဆင့်အထိ လေ့ကျင့်ကျွမ်းကျင်သွားသောအခါ ထိုစွမ်းရည်ကို စွမ်းရည်ကျောက်ပြားပေါ်သို့ ပုံနှိပ်မှတ်တမ်းတင်ထားနိုင်သည်။ ထိုအခါ အခြားသော သားရဲများအနေဖြင့် ထိုစွမ်းရည်ကျောက်ပြားမှတစ်ဆင့် လေ့လာနိုင်မည်ဖြစ်သော်လည်း အောင်မြင်မှုနှုန်းမှာ 100% မရှိချေ။

အကယ်၍ ၎င်းကို စိတ်စွမ်းအင်ပါရမီနှင့် ပေါင်းစပ်၍ လေ့လာနိုင်မည်ဆိုပါက အောင်မြင်မှုနှုန်းမှာ သိသိသာသာ မြင့်တက်လာမည် ဖြစ်သည်။ ဤအရာမှာ ချမ်းသာကြွယ်ဝပြီး အာဏာရှိသော သားရဲထိန်းချုပ်သူများသာ တတ်နိုင်မည့် အရာဖြစ်သည်။ စွမ်းရည်ကျောက်ပြားများသည် အလွန်တရာ ဈေးကြီးပြီး ဈေးချိုဆုံး တစ်ပြားပင်လျှင် တစ်သိန်းမှ စတင်သည်။ စွမ်းရည် ပိုမိုကောင်းမွန်လေလေ ပိုမိုဈေးကြီးလေလေ ဖြစ်ပြီး အချို့သော အစွမ်းထက် စွမ်းရည်များမှာ ဆယ်သိန်းအထိ အလွယ်တကူ အရောင်းအဝယ် ဖြစ်ကြသည်။

ထို့အတူပင် စွမ်းရည် ပိုမိုအစွမ်းထက်လေလေ လေ့လာရန် ပိုမိုခက်ခဲလေလေ ဖြစ်သဖြင့် ထပ်ခါတလဲလဲ ဝယ်ယူရန် လိုအပ်တတ်သည်။ တစ်ခါတစ်ရံတွင် အစွမ်းထက် စွမ်းရည်တစ်ခုကို လေ့လာနိုင်ရန်အတွက် ငွေကျပ် သန်းပေါင်းများစွာ ကုန်ကျနိုင်ရာ ဤအရာမှာ သူဌေးသားသမီးများသာ တတ်နိုင်သည့် ကိစ္စမျိုး ဖြစ်သည်။

ထိုစဉ်က ပိုင်လင်းအား ဖိအားစွမ်းရည်ကို စွမ်းရည်ကျောက်ပြားမှတစ်ဆင့် မလေ့လာခိုင်းခဲ့ခြင်းမှာ သူ မတတ်နိုင်၍သာ ဖြစ်သည်။ ထို့ပြင် အံ့ဖွယ် ဆင့်ကဲပြောင်းလဲခြင်းသည် ကိုယ်တိုင်နားလည်သဘောပေါက်ရန် လိုအပ်သဖြင့် လူလုပ်စွမ်းရည်ကျောက်ပြားမှတစ်ဆင့် လေ့လာခြင်းက အသုံးမဝင်မှာကိုလည်း သူ စိုးရိမ်ခဲ့မိသည်။

စွမ်းရည်ကျောက်ပြားများ အဖိုးတန်ရခြင်းမှာ ၎င်းတို့ကို ပြန်လည်အသုံးပြုနိုင်ခြင်းကြောင့် ဖြစ်ပြီး ယေဘုယျအားဖြင့် ဆယ်ကြိမ်ခန့် အသုံးပြုနိုင်ကာ ၎င်း၏ ကန့်သတ်ချက်သို့ ရောက်ရှိသွားသည့်အခါ အပိုင်းပိုင်းအစစ ကွဲအက်ပျက်စီးသွားတတ်သည်။

ကျန်းဟန် ရရှိခဲ့သော ကျောက်ပြားမှာ နောက်ထပ် သုံးကြိမ်ခန့် ဆက်လက်အသုံးပြုနိုင်ဦးမည် ဖြစ်ရာ ထွက်ရောင်းမည်ဆိုပါက သုံးသိန်းခန့် ရရှိနိုင်သဖြင့် ၎င်းမှာလည်း သူ့အတွက် အလွန် တန်ဖိုးရှိလှသည်။

သို့သော်လည်း ယခုအခါ သူ့တွင် မကောင်းသော အာရုံအချို့ ရှိနေသည်။ စွမ်းရည်ကျောက်ပြားဟူသည်မှာ သာမန်ပစ္စည်းမျိုး မဟုတ်ချေ။ ဤစွန့်စားသူအဖွဲ့ထဲမှ တစ်စုံတစ်ဦးက ဤအရာကို အမှန်တကယ် ဝယ်ယူနိုင်စွမ်းရှိနေခြင်းက ထိုလူ၏ နောက်ကွယ်တွင် စွမ်းအားကြီးသော ပုဂ္ဂိုလ်တစ်ယောက်ယောက် ရှိနေလေမလားဟု သူ့ကို တွေးတောမိစေခဲ့သည်။

သို့သော်လည်း ကျန်းဟန် ထိုသို့ဖြစ်ရန် မလွယ်ကူဟု ခံစားရသည်။ ၎င်းတို့ဘာသာ ပိုက်ဆံစုပြီး ဝယ်ယူထားခြင်းလည်း ဖြစ်နိုင်သည်။ ‘ရေဓာတ်က သက်ရှိခပ်သိမ်းကို ပျိုးထောင်ပေးသည်’ ဟူသော စွမ်းရည်မှာ တိုက်ပွဲတွင် ထင်ရှားသော အကျိုးကျေးဇူး မရှိဘဲ ဝိဉာဉ်အပင်များကို ပြုစုပျိုးထောင်ခြင်းအပေါ်၌သာ အဓိက အာရုံစိုက်ထားသည်။

ထိုကျောက်ပြားပိုင်ရှင်သည် ဝိဉာဉ်အပင်များ ပျိုးထောင်သည့်ဘက်သို့ ကူးပြောင်းပြီး စွန့်စားရခက်ခဲသော ဘဝကို ရပ်တန့်ချင်နေ၍ ဖြစ်နိုင်သည်ဟု သူ ခံစားမိသည်။ ဤသည်မှာ အချို့သော သားရဲထိန်းချုပ်သူများ၏ နောက်ဆုံး ပန်းတိုင်ပင် ဖြစ်သည်။

သို့သော် ၎င်းတို့နောက်ကွယ်တွင် အမှန်တကယ် လူရှိနေလျှင်ပင်...စိုးရိမ်စရာမရှိချေ။ ထိုအချိန်က သူသည် မျက်နှာဖုံးကို အသုံးပြုထားခဲ့ခြင်း ဖြစ်ပြီး ပိုင်လင်းတွင်လည်း ဖုံးကွယ်ရန် ကူညီပေးသည့် မြူခိုးမျက်နှာဖုံး ရှိနေခဲ့သည်။ ထို့ပြင် မိုးကြိုးတောင်ပေါ်မှ သတင်းများသည် ပြင်ပသို့ မပေါက်ကြားနိုင်သဖြင့် လူသိရှင်ကြား ဖြစ်သွားရန် အလားအလာ အလွန်နည်းပါးသည်။

ချက်ချင်းပင် သူသည် ကျောပိုးအိတ်အားလုံးကို ဂရုတစိုက် ထပ်မံရှာဖွေလိုက်သည်။ အခြားဘာမျှမရှိတော့ကြောင်း အတည်ပြုပြီးနောက် သူသည် အခြားကိုယ်ရေးကိုယ်တာ ပစ္စည်းအားလုံးကို ကျောပိုးအိတ်များနှင့်အတူ မီးရှို့ဖျက်ဆီးပစ်လိုက်ပြီး ကျန်ရှိသောအရာများကိုမူ သူ၏ သိုလှောင်သေတ္တာထဲသို့ ထည့်လိုက်သည်။

“သွားကြစို့... ခရမ်းရောင်မိုးကြိုးတောင်ထွတ်ကို သွားကြည့်ရအောင်။”

ကျန်းဟန် အရာအားလုံးကို သိမ်းဆည်းပြီးနောက် မလှမ်းမကမ်းတွင် ရှိနေသော ခရမ်းရောင်မိုးကြိုးတောင်ထွတ်ကို လှမ်းကြည့်ရင်း ပြောလိုက်သည်။

ခရမ်းရောင်မိုးကြိုးတောင်ထွတ်မှာ အလွန် အန္တရာယ်များလှသည်။ မိုးကြိုးလျှပ်စီးများနှင့် အဆင့်မြင့် မိစ္ဆာသားရဲများကြောင့်သာမက အဆင့်မြင့် သားရဲထိန်းချုပ်သူများကြောင့်လည်း ဖြစ်သည်။ ကျန်းဟန်သည် လမ်းခရီးတစ်လျှောက်လုံး သတိကြီးစွာ ထားခဲ့ပြီး သုံးနာရီခန့် အချိန်ယူခဲ့ရပြီးနောက် နောက်ဆုံးတွင် ခရမ်းရောင်မိုးကြိုးတောင်ထွတ်၏ ပတ်ဝန်းကျင် ဧရိယာအတွင်းသို့ ရောက်ရှိလာခဲ့တော့သည်။

ဂျိန်း... ဂျိန်း...။

နေရာမှနေ၍ အထက်သို့ မော့ကြည့်လိုက်ရာ ကောင်းကင်၌ လှည့်ပတ်နေသော မိုးတိမ်မည်းကြီးများသည် လက်ဖြင့်ပင် လှမ်းထိနိုင်တော့မည့်အလား အောက်သို့ နိမ့်ဆင်းဖိစီးနေသဖြင့် လူကို အသက်ရှူရကျပ်တည်းသော ခံစားချက်မျိုး ပေးစွမ်းနေသည်။

မိုးကြိုးများနှင့် လျှပ်စီးကြောင်းများသည် မိုးတိမ်မည်းကြီးများထဲမှ အဆက်မပြတ် ကျရောက်နေပြီး ၎င်း၏ ကျရောက်နှုန်းမှာ အခြားနေရာများထက် များစွာ ပိုမိုမြင့်မားသည်။ ကျန်းဟန် ဤနေရာသို့ ဝင်ရောက်လာသည်မှာ ဆယ်မိနစ်မျှသာ ရှိသေးသော်လည်း သူ့ထံသို့ မိုးကြိုးလျှပ်စီး သုံးကြောင်းတိတိ ပစ်ခတ်ခဲ့ပြီး ဖြစ်သည်။ ဟုတ်ဟုတ်မှာမူ အပြင်တွင် လုံးဝမနေဝံ့တော့သဖြင့် သားရဲထိန်းချုပ်ခြင်း ဟင်းလင်းပြင်ထဲသို့ ပြန်လည်ဝင်ရောက်သွားခဲ့ရသည်။

မိုးကြိုးလျှပ်စီးများအပြင် ဤနေရာတွင် အကျော်ကြားဆုံးအရာမှာ မိုးကြိုးလျှပ်စီးတောအုပ်ပင် ဖြစ်သည်။ သစ်ပင်အားလုံးမှာ လင်းထိန်တောက်ပနေပြီး လက်အိတ်များ စွပ်ထားသည့်တိုင် ထိုအပင်များကို သွားရောက်ထိတွေ့မိပါက ထုံကျင်သော ခံစားချက်ကို ရရှိစေနိုင်သည်။ ဤနေရာတွင် အခြားဒြပ်စင်များ လုံးဝမရှိချေ။ လွတ်လပ်သော ဝိဉာဉ်စွမ်းအင်များပင်လျှင် မောင်းထုတ်ခြင်း ခံထားရပြီး မိုးကြိုးဝိဉာဉ်စွမ်းအင် တစ်မျိုးတည်းသာ ကျန်ရှိတော့သည်။

သစ်ပင်များနှင့် ကျောက်ဆောင်များပင်လျှင် နှစ်ပေါင်းများစွာ ရေတွက်၍မရနိုင်အောင် မိုးကြိုးအဆက်မပြတ် ပစ်ခတ်ခံရမှုအောက်တွင် ၎င်းတို့၏ မူလဒြပ်စင်များမှာ လုံးဝပြောင်းလဲသွားခဲ့ပြီး မိုးကြိုးအခြေခံ သက်ရှိသတ္တဝါများအသွင်သို့ ရောက်ရှိနေကြပြီ ဖြစ်သည်။