အခန်း ၂၄၈

အခန်း ၂၄၈ ကက်သရင်း ကို ကယ်တင်လိုက်ခြင်း

မည်သည့်ကိစ္စမှန်း မသိသော်လည်း ကျူးဝမ် က ထပ်မမေးတော့ပေ စီနီယာ ပြောသည့်စကားကို သေချာပေါက် နားထောင်ရမည် ဖြစ်သည်။ တွေဝေမနေဘဲ သူသည် အဖွဲ့ကို ခေါ်ဆောင်ကာ သစ်ပင်ကြီးတစ်ပင်ပေါ်သို့ တက်သွားလေသည်။

အခြေအနေ အသင့်ဖြစ်နေပြီကို မြင်သောအခါ ကျိုးဟန် သည်လည်း အချိန်ဆွဲမနေတော့ဘဲ ဝိညာဉ်ဖမ်းစား နံ့သာ (၇ ကြိမ်မြှင့်) ကို အသုံးပြုလိုက်လေသည်။

[အောင်မြင်စွာ အသုံးပြုနိုင်ခဲ့ပါသည် မိနစ် သုံးဆယ် အတွင်း မီတာ နှစ်ထောင် ပတ်လည်ရှိ တစ္ဆေဝိညာဉ် များ အားလုံးသည် သင့်ကို ပစ်မှတ်ထား၍ ပြေးလာကြမည် ဖြစ်ပါသည် ကျေးဇူးပြု၍ တိုက်ပွဲဝင်ရန် အသင့်ပြင်ထားပါ]

စနစ်၏ သတိပေးချက်နှင့်အတူ ပန်းရောင် မြူခိုးများ တဖြည်းဖြည်း ထွက်ပေါ်လာပြီး အလွန် ထူးဆန်းစွာပင် ကျိုးဟန် ၏ ခန္ဓာကိုယ်ပေါ်တွင် ကပ်တွယ်နေလေသည်။ သူ့အပေါ် မည်သည့် သက်ရောက်မှုမှ မရှိသလို မည်သည့် အနံ့မှလည်း မရပေ။ တစ္ဆေဝိညာဉ် များ၏ နှာခေါင်းသည် လူသားများနှင့် ကွာခြားမှု ရှိနိုင်လေသည်။

"ဝေါင်း"

"ဝုန်း"

ထိုအချိန်တွင် ယဇ်ပလ္လင် အတွင်း ကျန်ရှိနေသော သွေးတစ္ဆေဘုရင် နှစ်ကောင်သည် ရက်စက်စွာ ဟိန်းဟောက်လိုက်ပြီး ရှေ့ဆုံးမှ ပြေးထွက်လာကြလေသည်။

ကျိုးဟန် က ပြုံးလိုက်လေသည်

'လာတာ အချိန်ကိုက်ပဲ ဝိညာဉ်ဖမ်းစား နံ့သာ ရဲ့ အာနိသင်က အလုပ်လုပ်သွားပြီ'

မူလက ၎င်းတို့သည် အမှောင်ထဲတွင် ပုန်းအောင်းနေသဖြင့် ကျိုးဟန် အနေဖြင့် စုံစမ်းရန် အချိန်အတော်ကြာ ယူရမည် ဖြစ်သည်။ ယခုတော့ သူတို့ဘာသာ လာရောက် ပို့ပေးနေကြပြီဖြစ်ရာ ဤကဲ့သို့သော သတ်ဖြတ်ရသည့် အတွေ့အကြုံမျိုးကမှ အလွန် အရသာရှိလှပေသည်။

"စီနီယာ ပြောတဲ့ တစ္ဆေဘုရင် ရဲ့ တိုက်ခိုက်မှု ဆိုတာ ဒါကို ပြောတာကိုး"

ကျူးဝမ် သည် သစ်ပင်ပေါ်မှနေ၍ အားလုံးကို ရှင်းလင်းစွာ မြင်တွေ့နေရပြီး အံ့သြစွာဖြင့် ပြောလိုက်လေသည်။

"ထူးဆန်းတယ်နော် တစ္ဆေဘုရင် နှစ်ကောင်တည်းပဲကို စီနီယာ အတွက် ဓားတစ်ချက်တည်းနဲ့ ပြီးတဲ့ ကိစ္စလေ ဘာလို့ ငါတို့ကို ရှောင်ခိုင်းတာလဲ"

"မသိဘူးလေ စီနီယာ ဒီလိုပြောတာ သေချာပေါက် နောက်ကွယ်က အဓိပ္ပာယ် တစ်ခုခု ရှိလို့နေမှာပေါ့"

အဖွဲ့ဝင် က တစ်ယောက်က ဝင်ပြောလိုက်လေသည်။

"စီနီယာကလည်း နဂါးနိုင်ငံ က ဆိုတော့ ငါတို့ကို တော်တော်လေး ဂရုစိုက်ရှာပါတယ်"

အဖွဲ့ဝင် ခ က ထောက်ခံလိုက်လေသည်။

"ရှူး အရမ်း အေးလာပြီ လေအေးတွေ တိုက်နေသလိုပဲ အပူချိန်က ဘာလို့ ရုတ်တရက် ကျသွားတာလဲ"

"သောက်ကျိုးနည်း ဒါက..."

"သေစမ်း ယဇ်ပလ္လင် ထဲက တစ္ဆေတွေ အများကြီး ထွက်လာကြပြီပဲ"

သူတို့သည် မြင့်သောနေရာတွင် ရှိနေသဖြင့် ပုံမှန်မဟုတ်သော အခြေအနေများကို ချက်ချင်း သတိထားမိလိုက်ကြလေသည်။ အထူးသဖြင့် လေထုက ရုတ်တရက် အေးစက်လာပြီး ယခင်က ပုန်းအောင်းနေသော တစ္ဆေဝိညာဉ် များစွာသည် ယဇ်ပလ္လင် ၏ အရပ်မျက်နှာ အသီးသီးမှ စုဝေးရောက်ရှိလာကြလေသည်။

"ယဇ်ပလ္လင် ထဲမှာ တစ္ဆေ ထောင်ဂဏန်းလောက်ပဲ ရှိတာ စီနီယာ့ အတွက် လုံးဝ ဖိအားမရှိပါဘူး"

ကျူးဝမ် က ပြုံးကာ ပြောလိုက်လေသည် သူသည် ကျိုးဟန် ၏ စွမ်းအားအပေါ် အလွန် ယုံကြည်မှု ရှိနေလေသည်။

"အစ်ကိုဝမ် ယဇ်ပလ္လင် ထဲကတင် မကဘူး ဟိုမှာ ကြည့်ပါဦး..."

အဖွဲ့ဝင် တစ်ယောက်က ကျူးဝမ် ကို မြင်ကွင်းကျယ်ပြန့်သော နေရာသို့ လက်ညှိုးထိုး ပြလိုက်လေသည်။

"လခွမ်း ဒီအရေအတွက်က..."

"စီနီယာ ဘာတွေများ လုပ်လိုက်တာလဲ ဒီအရေအတွက်က သောင်းနဲ့ချီ ရှိမယ် ထင်တယ်"

ဤတစ်ချက် ကြည့်လိုက်ရုံဖြင့် အလွန် အံ့အားသင့်သွားရလေသည်။ ယဇ်ပလ္လင် အတွင်း၌သာမက မျက်စိဖြင့် မြင်နိုင်သော အကွာအဝေး ပတ်လည်တွင်ပါ တစ္ဆေဝိညာဉ် များ အပြည့်ရှိနေပြီး ကျိုးဟန် ကို ဝိုင်းရံလာကြလေသည်။

"အရမ်း ကြောက်စရာ ကောင်းတာပဲ ဒါတွေ အကုန်လုံးက ညအချိန် ရဲ့ အထောက်အကူ ရထားတဲ့ တစ္ဆေတွေချည်းပဲ"

"ဒါကြောင့် စီနီယာ က ငါတို့ကို ရှောင်ခိုင်းတာကိုး မတော်တဆ ဒီတစ္ဆေအုပ်ကြီး ထဲ ပါသွားရင် လုံးဝ အသက်ရှင်နိုင်မှာ မဟုတ်ဘူး"

လူတိုင်းသည် ထိတ်လန့်သွားကြပြီး ဤကဲ့သို့သော မြင်ကွင်းကို ကြည့်ရုံဖြင့်ပင် ကြောက်ရွံ့လာကာ တစ်ချိန်တည်းမှာပင် စိုးရိမ်ပူပန်လာကြလေသည်။

"ဒီလောက်များတဲ့ အကောင်တွေ ဝိုင်းတိုက်တာကို တကယ် ခံနိုင်ပါ့မလား"

"ခံနိုင်မှာပါ..."

သူတို့ အနည်းငယ် ယုံကြည်မှု ကင်းမဲ့လာကြလေသည် အဘယ်ကြောင့်ဆိုသော် အရေအတွက်က များလွန်းနေသောကြောင့် ဖြစ်သည်။ သူတို့သည် ကျိုးဟန် ၏ စွမ်းအားကို တွေ့ဖူးသော်လည်း ဆယ်ကောင်ကို တိုက်ခိုက်ခြင်းနှင့် သောင်းနှင့်ချီသော အကောင်များကို တိုက်ခိုက်ခြင်းမှာ လုံးဝ မတူညီသော ကိစ္စများ ဖြစ်သည်။ ထို့ကြောင့် သူတို့၏ စိုးရိမ်မှုမှာလည်း ဖြစ်သင့်ဖြစ်ထိုက်ပေသည်။

မျက်စိတစ်မှိတ်အတွင်း ထူးဆန်းသော ဖြစ်ရပ်များ ဖြစ်ပေါ်လာပြီး လေထုက အလွန် ဖိအားများလာလေသည်။

နေရာတစ်ခုလုံးတွင် လေအေးများ တိုက်ခတ်နေပြီး ဖုန်မှုန့်များနှင့် မှုန်မှိုင်းနေသော မြူခိုးများ ရောနှောကာ ကမ္ဘာပျက်မည့်နေ့ ကျရောက်လာသကဲ့သို့ ဖြစ်နေလေသည်။ မြင်ကွင်းကို ကြည့်ရုံဖြင့်ပင် အလွန် ကြောက်မက်ဖွယ် ကောင်းနေလေသည်။ ထို့အပြင် အရပ်မျက်နှာ အသီးသီးမှ အော်ဟစ်သံများ ညည်းညူသံများ ပြည့်နှက်နေပြီး လူကို ကြက်သီးမွေးညင်း ထစေကာ ကြောက်ရွံ့မှုများကို ခံစားရစေလေသည်။

"လခွမ်း ငေးမကြည့်နေကြနဲ့ မြန်မြန် ထွက်ပြေးကြ"

"တစ္ဆေအုပ်ကြီး ထဲ ပါသွားရင်တော့ တကယ် ဂိမ်းအိုဗာ ပြီပဲ"

"တစ္ဆေတွေ အရမ်း များတယ် အနင်းမခံရအောင် အမြင့်ပိုင်းကို မြန်မြန် ပြေးကြ"

"အိုး ဂျက် ကတော့ အရမ်း ကံဆိုးတာပဲ တစ္ဆေတွေ နင်းတာ ခံလိုက်ရပြီ"

"ကံဆိုးလိုက်တာ ရို့စ် လည်း သေသွားပြီ အလကားနေရင်း ဒုက္ခရောက်တာပဲ"

"ဒါက တကယ်ကို ကံဆိုးတဲ့ သတင်းပဲ ဘာတွေ ဖြစ်ကုန်တာလဲ"

ထိုအချိန်တွင် နိုင်ငံခြား ကစားသမား များသည် မျှော်လင့်မထားဘဲ အလျင်အမြန် ပြေးလာသော တစ္ဆေဝိညာဉ် များနှင့် တိုက်မိသွားကြလေသည်။ ညအချိန်၏ အထောက်အကူ ရထားသော များပြားလှသည့် တစ္ဆေဝိညာဉ် များကို ရင်ဆိုင်ရချိန်တွင် မည်သို့သော အကျိုးဆက်မျိုး ကြုံတွေ့ရမည်ကို ခန့်မှန်းကြည့်၍ ရနိုင်လေသည်။ ကံဆိုးသူ အချို့မှာ တုံ့ပြန်ရန် နှေးကွေးသွားသဖြင့် အတိုက်ခံရပြီး အစိတ်စိတ်အမွှာမွှာ ဖြစ်သွားခြင်း သို့မဟုတ် အနင်းခံရပြီး သေဆုံးသွားခြင်းများ ဖြစ်ပေါ်ခဲ့လေသည်။

ကျိုးဟန် ၏ ဝိညာဉ်ဖမ်းစား နံ့သာ အသုံးပြုမှုသည် အခြားသော နေရာများစွာအပေါ် ကြီးမားသော သက်ရောက်မှုများကို ဖြစ်ပေါ်စေခဲ့လေသည်။

တောအုပ်တစ်ခု အတွင်းတွင်

ကက်သရင်း အယ်လီဇဘက် သည် သူမ၏ ဆင့်ခေါ်ထားသော သတ္တဝါများနှင့်အတူ ရှိနေလေသည်။ သူမ၏ မျက်နှာပေါ်ရှိ မောက်မာမှုများ ပျောက်ကွယ်သွားပြီး လှပသော မျက်နှာလေးမှာ အနည်းငယ် ပင်ပန်းနွမ်းနယ်နေကာ လေးနက်နေလေသည်။ ကံကြမ္မာ ဤမျှဆိုးရွားလိမ့်မည်ဟု သူမ မထင်ထားခဲ့ပေ။ အဖွဲ့သည် စူးစမ်းရှာဖွေနေစဉ် အစွမ်းထက်သော သွေးရောင် သတ်ဖြတ်ခြင်း တစ္ဆေအရှင်သခင် တစ်ကောင်နှင့် ကြုံတွေ့ခဲ့ရလေသည်။

ညအချိန်၏ အထောက်အကူကြောင့် ၎င်း၏ အဆင့်မှာ ဧကရာဇ်အဆင့် သို့ ရောက်ရှိနေပြီး ၎င်း၏ နောက်လိုက်များနှင့်အတူ ရှိနေသဖြင့် ပို၍ ရင်ဆိုင်ရန် ခက်ခဲနေလေသည်။ သူမသည် သူမ၏ အစွမ်းအကုန် ထုတ်သုံးလျှင်ပင် အနိုင်ရရန် သေချာမှု မရှိပေ။

"ဧကရာဇ်အဆင့် က အရမ်း အစွမ်းထက်တယ် လုံးဝ ရင်ဆိုင်နိုင်မှာ မဟုတ်ဘူး"

"ဒုက္ခပါပဲ ဒီနေ့တော့ ဒီမှာတင် သေရတော့မယ် ထင်တယ်"

"ခေါင်းဆောင် ငါတို့ ဘယ်လို လုပ်ကြမလဲ"

အဖွဲ့ဝင် ရှာဘီ က အနည်းငယ် စိုးရိမ်တကြီးဖြင့် မေးလိုက်လေသည်။

လနတ်ဘုရားမ မဟာမိတ်အဖွဲ့ ၏ အဖွဲ့ဝင်များသည် မျက်နှာများ ဖြူဖျော့ကာ တီးတိုးရေရွတ်နေကြပြီး မျှော်လင့်ချက်မဲ့မှုများ ဖုံးလွှမ်းလာလေသည်။ ဧကရာဇ်အဆင့် ကို ရင်ဆိုင်ရချိန်တွင် ထွက်ပြေးရန်ပင် မဖြစ်နိုင်ပေ။

"ဧကရာဇ်အဆင့် အစွမ်းထက်သူ ဆိုတော့လည်း ဘာဖြစ်လဲ အနိုင်မယူနိုင်ဘူး လို့ ဘယ်သူ ပြောလဲ"

မောက်မာသော ကက်သရင်း သည် အလွယ်တကူ လက်မြှောက်အရှုံးပေးလိုခြင်း မရှိဘဲ နောက်ဆုံး အကြိမ်အဖြစ် ကြိုးစားကြည့်ချင်သေးလေသည်။

သို့သော် စတင် တိုက်ခိုက်လိုက်သည်နှင့် တစ်ပြိုင်နက် သူမ၏ မျှော်လင့်ချက်များ ချက်ချင်း ရိုက်ချိုးခံလိုက်ရလေသည်။ အနက်ရောင် အလင်းတန်း တစ်ခု ပစ်လွှတ်လာပြီး သူမ၏ ကိုယ်ပေါ်သို့ ကျရောက်သွားလေသည်။

"ခေါင်းဆောင်..."

"ခေါင်းဆောင် ဘာမှမဖြစ်ဘူး မဟုတ်လား"

"အရမ်း အစွမ်းထက်တယ် ဒါက ဧကရာဇ်အဆင့် ရဲ့ စွမ်းအားလား"

ကက်သရင်း ၏ နှုတ်ခမ်းထောင့်မှ သွေးများ ကျဆင်းလာသည်ကို မြင်သောအခါ အဖွဲ့ဝင်များမှာ ထိတ်လန့်တကြား အော်ဟစ်လိုက်ကြပြီး သူတို့၏ ရင်ထဲရှိ တစ်ခုတည်းသော မျှော်လင့်ချက်လေးမှာလည်း ပျက်စီးသွားလေတော့သည်။ အလွန် ပြင်းထန်သော ဒဏ်ရာ ရရှိသွားသည်မှာ ထင်ရှားလေသည။

"အရမ်း အစွမ်းထက်တာပဲ..."

"ငါ တကယ်ပဲ ဒီမှာ သေရတော့မှာလား"

ကက်သရင်း ၏ မျက်လုံးများ မှေးမှိန်သွားလေသည်။

သွေးရောင် သတ်ဖြတ်ခြင်း တစ္ဆေအရှင်သခင် သည် နောက်ထပ် တိုက်ခိုက်ရန် ပြင်ဆင်လိုက်စဉ် ရုတ်တရက် မျက်လုံးများ နီရဲသွားကာ လေထဲတွင် တစ်စုံတစ်ရာကို အနံ့ခံမိလိုက်သကဲ့သို့ ဖြစ်သွားပြီး ပို၍ ဒေါသတကြီး ဖြစ်လာလေသည်။ သို့သော် ၎င်းသည် ကက်သရင်း ကို ဆက်လက် တိုက်ခိုက်ခြင်း မပြုတော့ဘဲ ၎င်း၏ နောက်လိုက်များနှင့်အတူ တစ်နေရာသို့ ဦးတည်ကာ ပြေးထွက်သွားလေတော့သည်။

ကက်သရင်း “…”

အဖွဲ့ဝင်များ “...”

အဖွဲ့ဝင် ရှာဘီ “...”

အားလုံး၏ ခေါင်းပေါ်တွင် မေးခွန်းထုတ်စရာများ ပြည့်နှက်သွားပြီး ရုတ်တရက် ဖြစ်ပေါ်လာသော အပြောင်းအလဲကြောင့် အံ့အားသင့်သွားကြလေသည်။ စောစောကမှ မျှော်လင့်ချက်မဲ့နေသူများသည် ပျော်ရွှင်မှုနှင့်အတူ ကြီးမားသော သံသယများ ဖြစ်ပေါ်လာကြလေသည်။

"ငါတို့ ဒီလိုပဲ လွတ်သွားတာလား မယုံနိုင်စရာပဲ"

"သေချာပေါက် ဘုရားသခင် က ငါတို့ကို စောင့်ရှောက်နေတာပဲ အာမင်"

ရှာဘီ က ယုံကြည်ချက် အပြည့်ဖြင့် ပြောလိုက်ပြီး ဆုတောင်းသည့် ဟန်ပန်ကို ပြုလုပ်လိုက်လေသည်။

ကက်သရင်း ၏ လှပသော မျက်လုံးများ ပြူးကျယ်သွားလေသည်။ ဘုရားသခင် က ဤမျှ အားလပ်နေပြီး လူတိုင်းကို လိုက်လံ စောင့်ရှောက်နေမည်ဆိုပါက အလုပ်များလွန်းနေမည် မဟုတ်ပါလား။ သူမသည် အသိဉာဏ်ရှိသူ တစ်ယောက်ဖြစ်ပြီး ဤကဲ့သို့သော ယုံတမ်းစကားများကို မယုံကြည်ပေ။

"ကြည့်ရတာ တစ်ခုခုက သွေးရောင် သတ်ဖြတ်ခြင်း တစ္ဆေအရှင်သခင် ကို ဆွဲဆောင်သွားတာ ဖြစ်ရမယ်”