အခန်း ၄၂၄

အခန်း (၄၂၄)

ဂေါ်ဘလင် နတ်ဘုရားနှင့် ပတ်သက်သည့် ရုတ်တရက် ဖြစ်ရပ်ကြီးမှာ အဆုံးသတ်သွားခဲ့ချေပြီ။

ရဲချီယန်သည် ဤဘူတာရုံတွင် မပြီးပြတ်သေးသည့် တာဝန်တစ်ခု ကျန်ရှိနေသေးကြောင်းကို မမေ့လျော့ခဲ့ချေ။

သူ သတိလစ် မေ့မြောနေခဲ့သည့် ရက်အနည်းငယ်အတွင်း ဂရင်းမ်အင်ပါယာ၏ မြို့တော်ကြီး၌လည်း ကြီးမားသော အပြောင်းအလဲ ကပ်ဘေးကြီးတစ်ခု ဖြစ်ပေါ်ခဲ့လေ၏။

ထီးနန်းအာဏာ လက်ပြောင်းလက်လွှဲ ဖြစ်သွားခဲ့ကာ ထိုပလ္လင်ထက်၌ ထိုင်နေသူမှာ မြောက်ပိုင်းတပ်မတော်၏ တပ်မှူးကြီး ဒွိုင်းလ်ပင် ဖြစ်သည်။

အမှန်တကယ်တွင် ထိုသူသည် မည်သည့် ဧကရာဇ်မှ မဖြစ်ချင်ခဲ့ပေ။

ရဲချီယန် ထွက်ခွာသွားပြီးသည်နှင့် တစ်ပြိုင်နက် ပုန်ကန်ထကြွလာသော သူ၏တပ်မတော်ကို ဦးဆောင်ကာ နေ့မနား ညမနား မြို့တော်ဆီသို့ ချီတက်ခဲ့၏။

သို့သော် မြို့တော်တွင်းသို့ ဝင်ရောက်ပြီး ဇနီးနှင့် သမီးဖြစ်သူတို့ ဘေးကင်းလုံခြုံစွာ ရှိနေသည်ကို မြင်တွေ့လိုက်ရချိန်တွင် မိသားစုဝင်များ အသက်ရှင်သရွေ့ လက်နက်ချ အရှုံးပေးရန်ပင် စဉ်းစားခဲ့သေးသည်။

သို့ရာတွင် သူ့နောက်သို့ တကောက်ကောက် လိုက်ပါလာကြသည့် စစ်သည်တော်များကမူ ထိုသို့လုပ်ဆောင်ရန် လုံးဝ ခွင့်မပြုခဲ့ကြဘဲ ဒွိုင်းလ်အား နန်းတော်တွင်းဆီသို့ ဝန်းရံခေါ်ဆောင်သွားခဲ့ကြကာ တော်ဝင်မျိုးနွယ်စု တစ်ခုလုံးကို သွေးချောင်းစီး သုတ်သင် ရှင်းလင်းပစ်ခဲ့ကြလေတော့၏။

ဒွိုင်းလ်သည် လူသားတစ်ဦး ဖြစ်ပေသည်။ တကယ်လို့များ အဆင့်သတ်မှတ်ချက်သာ ရှိခဲ့မည်ဆိုလျှင် သူသည် သေချာပေါက် အဆင့် ၈ ဖြစ်နေလိမ့်မည်သာ။ သို့သော် လူသားများ၌ အဆင့်သတ်မှတ်ချက် မရှိခဲ့ချေ။ ရထားမောင်းနှင်သူများတွင်ပင် ကိုယ်ပိုင် ရထားအဆင့်သာ ရှိပြီး မကောင်းဆိုးဝါးများ သို့မဟုတ် ပစ္စည်းကိရိယာများကဲ့သို့ တစ်ကနေ ဆယ့်နှစ် သို့မဟုတ် ထိုထက်မြင့်သည့် အဆင့်များအဖြစ် ခွဲခြားသတ်မှတ်ထားခြင်း မရှိပေ။

ထို့ကြောင့် တစ်ရက်တာ ကာလအတွင်းမှာပင် ဒွိုင်းလ်တစ်ယောက် ဂရင်းမ်အင်ပါယာ၏ ဧကရာဇ်အဖြစ်သို့ နားမလည်နိုင်လောက်အောင် ရောက်ရှိသွားခဲ့ချေသည်။ မှူးမတ်ဆိုးတို့ကို သတ်ဖြတ်ကာ ဘဏ္ဍာတိုက်အတွင်းရှိ စည်းစိမ်ဥစ္စာများကို ဝေငှပေးခဲ့သော်ငြား သူ၏စိတ်နှလုံးထဲတွင်မူ ဝေခွဲမရမှုတို့ဖြင့် ပြည့်နှက်နေခဲ့၏။

ရဲချီယန်သည် အားကိုးရာ ရင်ဖွင့်ဖော် တစ်ယောက်အဖြစ် နေပေးရန် စိတ်ဝင်စားမှု မရှိသော်လည်း မူလကမူ ဒွိုင်းလ်ထံသို့ သွားရောက်ရှာဖွေရန် ရည်ရွယ်ထားခဲ့သည်။ သို့သော် ယခုအချိန်တွင်တော့ ထိုသို့ သွားရောက်ရန် မလိုအပ်တော့ပုံရပေ၏။

လက်ရှိ ထွက်ခွာမည့် အခြေအနေ၊ ထွက်ခွာရန် အသင့်ဖြစ်နေပါပြီ။

လျှို့ဝှက်တာဝန် ပြီးမြောက်မှု၊ ဝေခွဲမရ ဖြစ်နေသော ဧကရာဇ်။

တာဝန် ဆုလာဘ်၊ ဧကရာဇ်၏ အဝတ်အစားသစ်များ။

ဧကရာဇ်၏ အဝတ်အစားသစ်များ (အဆင့် ၅)။

ဝတ်ဆင်ပြီးနောက် သတ်မှတ်ထားသော အချိန်ကာလတစ်ခုအထိ ကိုယ်ပျောက် အခြေအနေသို့ ဝင်ရောက်နိုင်သည်။

"တောက် ကပ်စေးနည်းလိုက်တာ၊ ဒီလောက် ဒုက္ခများတဲ့ တာဝန်ကိုမှ အဆင့် ၅ ပစ္စည်းလေးပဲ ပေးတယ်ပေါ့။ ဒါပေမဲ့လည်း ကိစ္စမရှိပါဘူးလေ အရင် ထွက်သွားတာပဲ ကောင်းပါတယ်"

တူ... တူ... ဟူသော ဥဩဆွဲသံကြီးက ကောင်းကင်ယံတစ်ခွင် ပဲ့တင်ထပ်သွားလေသည်။ နောက်ဆုံး ကျီးကန်းနတ်ဆိုးက အသားစုတ်လေး တစ်ဖဲ့ကို နှုတ်သီးဖြင့် ကိုက်ချီလျက် နတ်ဆိုး ကတ်ပြားအတွင်းသို့ ပြန်လည် ဝင်ရောက်သွားချိန်တွင် သံလမ်းများ ရှည်ထွက်လာကာ လေဟာနယ်ကြီး ပေါ်ထွက်လာတော့၏။

ထွက်ခွာမည်။

ရွေးချယ်မှုကို ဖိနှိပ်လိုက်သည်နှင့် ရထားကြီးက ရှေ့သို့ ဂျိန်းခနဲ ခုတ်မောင်းသွားခဲ့သည်။ သာမန် ဘူတာရုံတစ်ခုသာ ဖြစ်သင့်ပေမယ့် အလွန် ကြီးမားသည့် စစ်ပွဲကြီးတစ်ခုကို အတင်းအဓမ္မ ဖြတ်သန်းစေခဲ့သည် မဟုတ်ပါလား။

တစ်ခုတည်းသော နှမြောစရာ ကောင်းသည့်အချက်မှာ ဂေါ်ဘလင် နတ်ဘုရားက အရိပ်အယောင်လေးမျှပင် ထွက်မပြရဲလောက်အောင် သတ္တိနည်းလွန်းသည့် သူရဲဘောကြောင်သူ ဖြစ်နေခြင်းပေ။ ထိုကောင်သာ လက်ချောင်းလေး တစ်ချောင်းလောက် ဆန့်ထုတ်ပြခဲ့မည် ဆိုပါက ရဲချီယန်က တရားမျှတမှု အမှတ်အသား ချန်ရစ်ခဲ့ပြီး ဖမ်းဆီးခြင်းကို ချက်ချင်း လုပ်ဆောင်ပစ်လိုက်မည်သာ။ တကယ်ကို နှမြောစရာ ကောင်းလှပေသည်ဟုသာ ဆိုရတော့မည်။

သူသည် ရတနာသေတ္တာများ ဖွင့်လှစ်ရန် သို့မဟုတ် အဆင့်မြင့် အသွင်ကူးပြောင်းခြင်းများ ပြုလုပ်ရန် အလျင်စလို မဖြစ်နေခဲ့ချေ။ လက်ရှိ ကိုယ်ခံစွမ်းအား အခြေအနေအရ အဆင့်မြင့် အသွင်ကူးပြောင်းခြင်း ပြုလုပ်ရန် မသင့်တော်ပေ။ အနည်းဆုံးတော့ ကိုယ်ခံစွမ်းအား အပြည့်အဝ ပြန်လည် ပြည့်ဖြိုးလာပြီး အရာအားလုံး ဘေးကင်း လုံခြုံသွားသည့် အချိန်အထိ စောင့်ဆိုင်းရပေဦးမည်။

ဥဩဆွဲသံကြီး ထပ်မံ မြည်ဟည်းလာကာ လွင်တီးခေါင်ပြင်ဆီသို့ ပြန်လည် ရောက်ရှိလာပြီဖြစ်ကြောင်း အသိပေးလိုက်၏။ မကောင်းဆိုးဝါးများက စတင် လိုက်လံ ဖမ်းဆီးလာကြလေပြီ။ ရဲချီယန်က တကိုယ်လုံးကို သက်တောင့်သက်သာ ဆန့်ထုတ်လိုက်သည်။

"ဒီနေရာကမှ ပိုကောင်းသေးတယ်။ ဟူး... အရင်ဆုံး ပစ္စည်းတွေ ထုတ်ရောင်းရမယ်"

သူက မှောင်ခိုဈေးကွက်နှင့် ကုန်သွယ်ရေး ပလက်ဖောင်းကို ဖွင့်လိုက်၏။ အဆင့် ၄ အောက် ပစ္စည်းများနှင့် ကုန်ကြမ်းများ အားလုံးကို ကုန်သွယ်ရေး ပလက်ဖောင်းပေါ်သို့ ပစ်ထည့်လိုက်ပြီး ကျန်ရှိနေသည့် အရာများကိုမူ မှောင်ခိုဈေးကွက်ဆီ လွှဲပြောင်းပေးလိုက်လေသည်။

မှောင်ခိုဈေးကွက်မှ ဝန်ဆောင်မှု ကိုယ်စားလှယ် အမျိုးသမီးလေးမှာ ရဲချီယန် တစ်ခါတည်းနှင့် ပစ္စည်းအများအပြား ထုတ်ပြနိုင်ခဲ့ခြင်းအပေါ် အံ့အားသင့်သွားသော်လည်း မည်သည့် မေးခွန်းမျှ မမေးမြန်းခဲ့ချေ။ သူမက ဈေးနှုန်းများနှင့် ဈေးကွက် အခြေအနေတို့ကို ခန့်မှန်း တွက်ချက်ပေးပြီးနောက် သူကလည်း အမြင့်ဆုံးဈေး ရရန် မစောင့်ဆိုင်းတော့ဘဲ ပျမ်းမျှ ဈေးနှုန်းဖြင့်သာ ရောင်းချလိုက်တော့၏။ ခန့်မှန်းချက်အရ ဤပစ္စည်းများ အားလုံး ပေါင်းလိုက်လျှင် ရထားဒင်္ဂါး ၂၁၁၂ ပြားခန့် တန်ဖိုးရှိပေသည်။

သို့ရာတွင် ထိုမျှမကသေးပေ။

"ငါ့အတွက် ဒါလေး စစ်ပေးပါဦး၊ ဘယ်လောက် တန်မလဲ"

နံပါတ်စဉ်တပ် လက်နက် အမှတ် (၃၆) သံမဏိဖြတ် ဓားရှည်။

မှောင်ခိုဈေးကွက် ဝန်ဆောင်မှု ကိုယ်စားလှယ်မှာ ပစ္စည်း၏ အမည်ကို မြင်တွေ့လိုက်ရချိန်တွင် အံ့ဩတကြီး အာမေဍိတ်သံ ထွက်ပေါ်လာခဲ့သည်။

"ဒါကို ရှင် ဘယ်ကနေ ရခဲ့တာလဲ... အို တောင်းပန်ပါတယ် ကျွန်မ မမေးသင့်ဘူး။ ဒါပေမဲ့ ဒီလို ပစ္စည်းမျိုးက လူသားတွေအတွက်တော့ ဘာအဓိပ္ပာယ်မှ မရှိဘူးလေ။ မျိုးနွယ်စု ပြောင်းလဲသွားရင်တောင် ဒီလက်နက်ကို သုံးလို့မရနိုင်ဘူး။ ဒါကြောင့် မှောင်ခိုဈေးကွက်ရဲ့ အကဲဖြတ်ချက်အရ ဒီပစ္စည်းရဲ့ ရောင်းဈေးက သုညပဲ"

ရဲချီယန်က အလျင်စလို မဖြစ်ဘဲ သူမ ဆက်ပြောမည့် စကားကို စိတ်ရှည်လက်ရှည် စောင့်ဆိုင်းနေလိုက်၏။ ဝန်ဆောင်မှု ကိုယ်စားလှယ်လေးက ဤမျှ စကားရှည်ရှည်ဝေးဝေး ပြောလာမှတော့ နောက်ထပ် သတင်းအချက်အလက် တစ်ခုခု ရှိနေဦးမည်မှာ သေချာသည်။

"ဒါပေမဲ့လည်း... ဒါက နံပါတ်စဉ်တပ် လက်နက် တစ်ခု ဖြစ်နေတာကြောင့် သူ့ရဲ့ ရှားပါးမှု တန်ဖိုးက အတော်လေး မြင့်မားတယ်။ စုဆောင်းသိမ်းဆည်းဖို့အတွက်တော့ ကောင်းမွန်တဲ့ ပစ္စည်းပဲ။ ဒါနဲ့... ဒီလိုဆိုရင်ကော ဘယ်လိုလဲ၊ နံပါတ်စဉ်တပ် လက်နက်တွေကို စုဆောင်းတဲ့ ဝယ်သူ တစ်ယောက်ကို ကျွန်မ သိထားတယ်။ ဒါပေမဲ့ အဲဒီလူက နည်းနည်း ထူးခြားဆန်းပြားတယ်။ တကယ်လို့ ရှင်က နံပါတ်စဉ်တပ် လက်နက်နဲ့ အရောင်းအဝယ် လုပ်ချင်တယ်ဆိုရင် သူက ဒီပစ္စည်းနဲ့ လဲလှယ်ပေးလိမ့်မယ်"

ဖန်သားပြင် ပုံရိပ်တစ်ခု ပေးပို့လာခဲ့၏။

အဆုံးမဲ့ လှုပ်ရှားမှု စုတ်တံ (အဆင့် ၁၂)။

လှုပ်ရှားနေတဲ့ ရထား ကိုယ်ထည် သခင်များသာ အသုံးပြုနိုင်သည့် သီးသန့် တပ်ဆင်ပစ္စည်း။

ဤစုတ်တံကို အသုံးပြုခြင်းဖြင့် လှုပ်ရှားနေတဲ့ ကိုယ်ထည်များ ဖန်တီးရာတွင် အောင်မြင်မှုနှုန်းကို သိသာစွာ မြင့်တက်စေနိုင်သည်။ ထို့ပြင် ရထားအတွက် ပြင်ပ လှုပ်ရှားမှု ကိုယ်ထည်များ ဖန်တီးသည့်အခါ ကိုယ်ပိုင် စိတ်ကူး စိတ်သန်းဖြင့် ရေးဆွဲ ပုံဖော်၍ သီးသန့် လှုပ်ရှားမှု မြင်ကွင်းများကို ဖန်တီးနိုင်၏။

ဒီပစ္စည်း ဟုတ်လား။ တကယ်ကို အတော်လေး ကောင်းမွန်သည့် ပစ္စည်းပင်။ အဆင့် ၁၂ တဲ့။ လူသားများကို သတ်ဖြတ်ရန် သီးသန့် ထုတ်လုပ်ထားသည့် ဤလက်နက်က ဤမျှ မြင့်မားသော တန်ဖိုးဖြင့် လဲလှယ်နိုင်လိမ့်မည်ဟု ရဲချီယန် လုံးဝ မမျှော်လင့်ထားခဲ့ချေ။

"ကောင်းပြီ၊ ဘယ်တော့ အရောင်းအဝယ် လုပ်ကြမလဲ"

"တကယ်လို့ အသင်းဝင်ဖြစ်တဲ့ ရှင်က မှောင်ခိုဈေးကွက်ကို ယုံကြည်တယ် ဆိုရင်တော့ ဒီဓားကို ကျွန်မတို့ဆီမှာ ယာယီ အပ်နှံထားခဲ့ပါ။ ဝယ်သူနဲ့ ကျွန်မတို့ ဆက်သွယ်ပေးပါ့မယ်"

ရဲချီယန်က သံမဏိဖြတ် ဓားရှည်ကို မှောင်ခိုဈေးကွက်သို့ အပ်နှံလိုက်လေသည်။ မှောင်ခိုဈေးကွက်ဟု အမည်တွင်ပြီး အရောင်းအဝယ် တိုင်းအတွက် ဝန်ဆောင်ခ ၅ ရာခိုင်နှုန်း ကောက်ခံလေ့ ရှိသော်ငြား ယခုအချိန်အထိတော့ အတော်လေး ယုံကြည် စိတ်ချရဆဲ ဖြစ်၏။

"နံပါတ်စဉ်တပ် လက်နက်တဲ့... ဟူး..."

လွင်တီးခေါင်ပြင်ကြီးမှာ အဆုံးအစမရှိ ကျယ်ပြောလွန်းရာ မည်သည့်အရာ ပေါ်ထွက်လာသည်ဖြစ်စေ အံ့ဩစရာ မဟုတ်ချေ။ လူတိုင်းတွင် ကတ်ပြား အစီအစဉ် ရှိမနေခဲ့သော်လည်း ကတ်ပြား မရှိသည့် အထွတ်အထိပ် ရထားမောင်းနှင်သူများက နတ်ဘုရားတို့ကို ကြောက်ရွံ့ကြပါ့မလား။ လုံးဝ ကြောက်ရွံ့ကြမည် မဟုတ်ပေ။

လူသားတို့၏ ကြီးထွား တိုးတက်မှုတွင် မည်သည့် ကန့်သတ်ချက်မျှ မရှိချေ။ ဤသည်ကပင် လူသားမျိုးနွယ်တို့၏ အခြေခံ မော်ဂျူး ဖြစ်ကောင်း ဖြစ်ပေလိမ့်မည်။ မည်သည့် ကြီးမားသည့် စွမ်းအားမျှ မရှိသကဲ့သို့ မွေးရာပါ သွေးမျိုးဆက် စွမ်းရည်များလည်း မရှိကြသော်ငြား သူတို့ထံတွင် "သင်ယူ လေ့လာခြင်း" နှင့် "အသုံးချခြင်း" တို့ ရှိနေကြ၏။ အခြား မျိုးနွယ်စုတို့၏ စွမ်းရည်များကို လေ့လာ သင်ယူကာ မိမိတို့နှင့် ပိုမို သင့်တော်မည့် ပုံသဏ္ဌာန်များအဖြစ် ပြောင်းလဲပစ်ကြခြင်းပင် ဖြစ်သည်။

မျိုးနွယ်စု ပြောင်းလဲသွားကြသည့် လူသား အများစုတွင် ဆိုးကျိုး သက်ရောက်မှုများ ရှိသော မော်ဂျူးများကို ပိုင်ဆိုင်သွားလေ့ ရှိကြသည်။ ဥပမာအားဖြင့် သွေးစုပ်ဖုတ်ကောင် မျိုးနွယ်များဆိုလျှင် သန့်ရှင်းသော အလင်းတန်းနှင့် မြင့်မြတ်သော စွမ်းရည်စနစ်များကို ထာဝရ လက်လွှတ် ဆုံးရှုံးသွားရပေမည်။ လူသားများသာလျှင် ရှုပ်ထွေး များပြားပြီး အမျိုးအစား စုံလင်လှသော စွမ်းအား အားလုံးကို ပြည့်စုံစွာ ထိန်းချုပ် သိမ်းပိုက်နိုင်စွမ်း ရှိကြပေ၏။

ရဲချီယန်သည် ဤဘူတာရုံမှ နောက်ဆုံး ရရှိလိုက်သော သီးအပွင့်များကို တွက်ချက် စစ်ဆေးကြည့်လိုက်သည်။ ကုန်ကြမ်းများနှင့် ပစ္စည်းကိရိယာများ ရောင်းချရာမှ ရရှိသည့် ရထားဒင်္ဂါး နှစ်ထောင်ကျော်၊ အဆင့် ၈ ရတနာသေတ္တာ တစ်လုံးနှင့် ကိုယ်ပျောက် ဝတ်ရုံ တစ်ထည်။ ထို့ပြင် လောဘတကြီး စားသောက်ခြင်း၏ စားသောက်ခံလိုက်ရသော အဆင့် ၁၀ ဂေါ်ဘလင် ချန်ပီယံ ဘာဘာရော့ဆာနှင့် အရေးအကြီးဆုံး ဖြစ်သည့် အမဲလိုက် စက်ယန္တရားနဂါး၏ သီးသန့် လက်နက်ဖြစ်သော အမဲလိုက်ခြင်း လက်စွပ်ကွင်းတို့ပင် ဖြစ်သည်။

"အမဲလိုက်ခြင်း လက်စွပ်ကွင်းက နှစ်ကွင်း ရှိတယ် ဆိုတော့ နောက်တစ်ကွင်းက ကျောက်ရှီးရဲ့ အမဲလိုက် စက်ယန္တရားနဂါးဆီမှာ ရှိနေတာလား။ တကယ်လို့ ခက်ခဲတဲ့ ကိစ္စတစ်ခုခုနဲ့ ကြုံလာရရင် လက်စွပ်ကွင်း နှစ်ကွင်းကို ပေါင်းစည်းရမယ်ပေါ့။ အဲဒီအခါကျရင် ဘာတွေ ဖြစ်လာမလဲ"

ဤကိစ္စနှင့် ပတ်သက်၍ ရဲချီယန် စူးစမ်း လိုစိတ် ဖြစ်ပေါ်လာခဲ့သည်။

"ငါ မေးကြည့်သင့်လား"

သူက မိတ်ဆွေ စာရင်း မျက်နှာပြင်ကို ဖွင့်ကြည့်လိုက်ရာ ကျောက်ရှီး၏ အမည်လေး တလက်လက် လက်နေသည်ကို မြင်တွေ့လိုက်ရ၏။ ဤသည်မှာ သူ မဖတ်ရသေးသည့် သတင်းစကား တစ်စုံတစ်ရာကို သူမ ပေးပို့ထားကြောင်း ဖော်ပြနေခြင်း ဖြစ်သည်။

"ပေးပို့တဲ့ အချိန်က... လွန်ခဲ့တဲ့ သုံးရက်ကတည်းကလား။ အဲဒီအချိန်က အမဲလိုက်ခြင်း လက်စွပ်ကွင်း ပေါ်လာတဲ့ အချိန်ပဲ... သူမလည်း ဒီအကြောင်းကို သိထားလောက်ပုံရတယ်။ ယုတ္တိတော့ တန်ပါတယ်လေ သူမက ဆော်လမွန် မြို့တော်ရဲ့ စစ်ကြောရေးမှူးချုပ်ကြီး ဖြစ်နေတာကိုး"

သီးသန့် စကားပြော မျက်နှာပြင်ကို နှိပ်လိုက်သည်နှင့် ကျောက်ရှီး၏ သတင်းစကားလေး ပေါ်ထွက်လာလေသည်။

"နင် အဆင်ပြေရဲ့လား"

"ဖြေရှင်းရ ခက်ခဲတဲ့ ပြဿနာ တစ်ခုခုနဲ့ ကြုံတွေ့နေရလို့လား။ ထိခိုက် ဒဏ်ရာ ရထားတာပဲ ဖြစ်ဖြစ်၊ ကျိန်စာ တစ်ခုခု သင့်နေတာပဲ ဖြစ်ဖြစ် ငါ့ကိုသာ ပြောပါ ငါ ဖယ်ရှား ပေးနိုင်ပါတယ်"

သူမက အမဲလိုက်ခြင်း လက်စွပ်ကွင်း အကြောင်းကိုတော့ လုံးဝ မထည့်ပြောခဲ့ချေ။