အခန်း ၄၂၅

အခန်း (၄၂၅)

[ "ပြဿနာ အနည်းငယ်လောက် ကြုံခဲ့ရပေမယ့် အခုတော့ အားလုံး ဖြေရှင်းပြီးသွားပါပြီ" ]

အဆင့် ၁၁ ရှိသော ဘူတာရုံကမ္ဘာတစ်ခု၏ အတွင်း၌ တိုက်ခိုက်ရေးကိုယ်ဟန်သို့ အသွင်ပြောင်းထားသည့် ကျောက်ရှီးက ရန်သူတစ်ကောင်၏ ကျောရိုးကို လှံဖြင့် ထိုးခွဲဖြတ်တောက်လိုက်လေ၏။

ရောမစစ်တလင်းကြီးတစ်ခုနှင့် ဆင်တူသော ကျယ်ပြောလှသည့် နေရာလွတ်ကြီးထဲတွင် သူမ ရပ်နေခဲ့သည်။ ခြေထောက်အောက်၌မူ မကောင်းဆိုးဝါးတို့၏ အလောင်းကောင်များက တောင်ပို့ကြီးတစ်ခုအလား စုပုံတောင်တက်နေချေပြီ။

"ဟူး... ရှေ့ဆက်တက်ဖို့ လွင်တီးခေါင်ပြင်ဆီ ပြန်ရောက်ပြီးတဲ့နောက်မှာတော့ ငါ့ရဲ့ ကိုယ်ခံစွမ်းအားနဲ့ စိတ်စွမ်းအားတွေက အရင်ပုံမှန် အခြေအနေအတိုင်း ပြန်လည်ပြည့်ဖြိုးလာခဲ့ပြီပဲ။ အမြင့်ဆုံး အထွတ်အထိပ်ကို မရောက်သေးပေမယ့်လည်း သိပ်တော့ မလိုတော့ပါဘူးလေ"

ကျောက်ရှီးက လှံဖျားထက်ရှိ အလောင်းကောင်ကို ကျေနပ်အားရစွာဖြင့် ခါထုတ်ပစ်လိုက်ပြီး မြေပြင်ပေါ်သို့ ကျဆင်းသွားသော သရဖူတစ်ခုကို ကောက်ယူလိုက်၏။

"အမဲလိုက် ပလက်ဖောင်းက ပိုပြီး ရိုးရှင်းသားပဲ။ ဒုက္ခများတဲ့ ကိစ္စတွေကို အများကြီး စဉ်းစားနေစရာ မလိုဘူး။ ဒီတစ်ခါ ရတနာသေတ္တာ ရှာတွေ့နိုင်မလား ဆိုတာကိုပဲ မသိတာ"

ထိုသို့ တီးတိုးရေရွတ်နေစဉ်မှာပင် စနစ်၏ အချက်ပေးသံတစ်ခုက နားထဲသို့ ရုတ်တရက် ဝင်ရောက်လာခဲ့ရာ အသံလာရာဆီသို့ လှည့်ကြည့်လိုက်လေသည်။

စကားပြောမျက်နှာပြင်ထက်၌ ရဲချီယန် ပေးပို့ထားသော စာကို မြင်တွေ့လိုက်ရသည်နှင့် ခန္ဓာကိုယ် သေးသေးသွယ်သွယ်လေးရှိသော တရားသူကြီးချုပ်လေးမှာ အလောင်းကောင်တောင်ပို့ကြီးပေါ်မှ ချက်ချင်း ခုန်ဆင်းလိုက်ပြီး အာကာသနေရာလွတ်တစ်ခုထဲမှ သူမ၏ရထားကို ဆင့်ခေါ်ကာ တိုက်ခိုက်ရေးကိုယ်ဟန်မှ ထွက်ခွာလိုက်တော့၏။

"ပြဿနာ အနည်းငယ်လောက် ကြုံခဲ့ရတယ် ဟုတ်လား။ အမဲလိုက်ခြင်း လက်စွပ်ကွင်းတောင် ပေါ်လာတာကိုများ... သူ့ရဲ့ အမဲလိုက် စက်ယန္တရားနဂါးက ဘယ်လိုလုပ် ဒီလောက် မြန်မြန်ဆန်ဆန် ဆင့်ကဲပြောင်းလဲသွားရတာလဲ။ အကန့်အသတ်ကျော်လွန် မုဒ်ကို သူ ဘယ်နှကြိမ်တောင် သုံးခဲ့ပြီးပြီလဲ"

"ပြီးတော့ ဒီလောက် အချိန်အကြာကြီး နေမှ ပြန်စာပို့တာဆိုတော့ သူ တကယ့်ကို အန္တရာယ်ကြီးကြီးမားမားနဲ့ ကြုံတွေ့ခဲ့ရပြီထင်တယ်"

သူမ ရောက်ရှိနေသော ပလက်ဖောင်းနှင့် လွင်တီးခေါင်ပြင်တို့၏ အချိန်စီးဆင်းမှုနှုန်း ကွာခြားချက်မှာ တစ်နှင့် သုံးဆယ် ဖြစ်ပေသည်။ ကျောက်ရှီး ဤနေရာသို့ ရောက်နေခဲ့သည်မှာ လဝက်နီးပါးပင် ရှိနေပြီဖြစ်သော်လည်း ယခုမှသာ ရဲချီယန်ထံမှ ပြန်စာကို ရရှိခဲ့ခြင်းတည်း။ ရဲချီယန်သာ လွင်တီးခေါင်ပြင်၌ ရှိနေခဲ့မည်ဆိုလျှင် နေ့တစ်ဝက်ခန့်သာ ကြာမြင့်ဦးမည် ဖြစ်၏။

သို့သော် စနစ်၏ ခွင့်ပြုချက်များမှတစ်ဆင့် ရဲချီယန် ရောက်ရှိနေခဲ့သော အချိန်စီးဆင်းမှုနှုန်းမှာ လွင်တီးခေါင်ပြင်နှင့် မတူညီကြောင်းကို ကျောက်ရှီး ရှင်းရှင်းလင်းလင်း သိထားခဲ့ပြီး ယခု ပြန်စာပို့သည့် အချိန်မှသာ လွင်တီးခေါင်ပြင်၏ အချိန်စီးဆင်းမှုနှုန်း ဖြစ်နေခဲ့သည်။ အခြားတစ်နည်း ဆိုရသော် သူသည် အဆင့်မြင့် ဘူတာရုံကမ္ဘာတစ်ခုဆီသို့ ဝင်ရောက်ကာ အောင်မြင်စွာ ရှင်းလင်းပြီးနောက် လွင်တီးခေါင်ပြင်ဆီသို့ ပြန်လည်ရောက်ရှိလာခြင်းပင် ဖြစ်ချေသည်။

[ "နင် တကယ်ပဲ အဆင်ပြေရဲ့လား။ အကန့်အသတ်ကျော်လွန် ထိပ်ဖူးကို ထပ်ပြီး သုံးလိုက်ပြန်ပြီလား။ နင့်ရဲ့ စိတ်စွမ်းအားတွေ တကယ်ရော အဆင်ပြေရဲ့လား" ]

အခြားသူတစ်ဦးသာ ဆိုပါက ကျောက်ရှီး၏ စိုးရိမ်ပူပန်မှုမှာ အကြောင်းမဲ့ မဟုတ်ပေ။ အကန့်အသတ်ကျော်လွန် ထိပ်ဖူးကို အသုံးပြုလိုက်သည့် အကြိမ်တိုင်းသည် ဧရာမ ကိုယ်ခံစွမ်းအားနှင့် စိတ်စွမ်းအား ပမာဏကို လွန်ကဲစွာ စားသုံးလေ့ရှိပြီး အထူးသဖြင့် စိတ်စွမ်းအားကို ပို၍ ကုန်ခမ်းစေသည်။ ရထားမောင်းနှင်သူ တစ်ဦးအနေဖြင့် လုံးဝ ရူးသွပ်သွားခဲ့မည် ဆိုပါက ပြန်လည် ကောင်းမွန်လာခဲ့လျှင်တောင် စိတ်နှလုံးထဲ၌ အက်ကွဲကြောင်းများ ကျန်ရစ်နေခဲ့ပေလိမ့်မည်။ နောက်တစ်ကြိမ် စိတ်စွမ်းအား အန္တရာယ်ရှိသည့် အဆင့်ထိ ထပ်မံ ကျဆင်းသွားသောအခါ ခံစားရမည့် နာကျင်မှုမှာ ယခင်အကြိမ်ထက် ပို၍ပင် ပြင်းထန် ဆိုးရွားလာဦးမည် ဖြစ်၏။

[ "အင်း အားလုံး ဖြေရှင်းပြီးသွားပါပြီ။ သေးငယ်တဲ့ ဘေးထွက်ဆိုးကျိုးလေး နည်းနည်း ကျန်ခဲ့တာလောက်ပါပဲ ဘာမှ မဖြစ်ပါဘူး" ]

ရဲချီယန်က ပြန်လည်ပြည့်ဖြိုးမည့် အရိပ်အယောင် လုံးဝမပြသေးသော သူ၏ ကိုယ်ခံစွမ်းအားကို တစ်ချက် ကဲ့ကြည့်လိုက်ရင်း ထိုစာကြောင်းကို ပြန်လည် ပေးပို့လိုက်သည်။

[ "ဘေးထွက်ဆိုးကျိုး ဟုတ်လား။ နင် တစ်ခုခုကို ကန့်သတ်ချက်ထက် ကျော်လွန်ပြီး သုံးစွဲလိုက်တာလား။ ငါ့ကို ပြောစမ်းပါ ငါ ကူညီပေးနိုင်လောက်တယ်" ]

ကျောက်ရှီးက သူမ၏ သားရေဖိနပ်ရှည်များကို ကန်ချွတ်လိုက်ပြီး အရုပ်လေးများဖြင့် ပြည့်နှက်နေသော ကုတင်ပေါ်၌ လှဲလျောင်းရင်း အလင်းမျက်နှာပြင်ထက်ရှိ ရဲချီယန် ပေးပို့လာသည့် စာသားများကို ကြည့်ကာ မျက်မှောင်ကြုတ်လိုက်၏။

[ "ငါ့ရဲ့ ကိုယ်ခံစွမ်းအား ပြန်လည်ပြည့်ဖြိုးတဲ့နှုန်း နည်းနည်းလေး နှေးသွားရုံပါ ဘာမှမဖြစ်ပါဘူး၊ ဒါ ပထမဆုံးအကြိမ်လည်း မဟုတ်တာ" ]

[ "နည်းနည်းလေး နှေးသွားရုံ ဆိုတာ ဘာအဓိပ္ပာယ်လဲ။ နင် ကိုယ်ခံစွမ်းအားတွေကို အဆမတန် ကန့်သတ်ချက်ကျော်လွန်ပြီး သုံးပစ်လိုက်တာ မလား" ]

အထွတ်အထိပ် ရထားမောင်းနှင်သူ တစ်ဦး ပီပီ ကျောက်ရှီးက ရဲချီယန်၏ ခပ်ပေါ့ပေါ့ စကားများထဲမှ ပြဿနာကို ချက်ချင်းပင် ရိပ်မိသွားခဲ့ချေပြီ။

[ "နည်းနည်းလေးပါ" ]

နည်းနည်းလေး ဟုတ်လား။ စက္ကန့် ၂၆၀ ကာလအတွင်း သူ လှည့်စား ကစားခြင်း စွမ်းရည်ကို ဘယ်နှကြိမ်တောင် အသုံးပြုခဲ့မိမှန်း သူကိုယ်တိုင်ပင် မသိတော့ချေ။ ယခု ကိုယ်ခံစွမ်းအား ပြန်လည်ပြည့်ဖြိုးမှုနှုန်း ဤမျှအထိ လျော့ကျသွားခဲ့ရခြင်းမှာ သူ ပြောခဲ့သည့်အတိုင်း သေးငယ်သော ဘေးထွက်ဆိုးကျိုးလေး တစ်ခုမျှသာ တကယ်ကို ဖြစ်နေခဲ့ပေသည်။

[ "...အမဲလိုက် စက်ယန္တရားနဂါးကြောင့်လား" ]

[ "အင်း" ]

[ "အမဲလိုက်ခြင်း လက်စွပ်ကွင်းကြောင့် မလား" ]

[ "အင်း" ]

[ "..." ]

တိတ်ဆိတ်မှုကြီး စိုးမိုးသွား၏။ ကျောက်ရှီးတစ်ယောက် ခဏတာမျှ ဘာပြောရမှန်း မသိတော့အောင် ဖြစ်သွားခဲ့သည်။

သူမ၏ စိတ်ထင် ရဲချီယန်သည် အလွန် ဖြေရှင်းရခက်ခဲသည့် ကိစ္စရပ်ကြီးတစ်ခုနှင့် ရင်ဆိုင်ခဲ့ရပြီး သေလုမြောပါး ဖြစ်နေချိန်တွင် အမဲလိုက် စက်ယန္တရားနဂါး၏ အကန့်အသတ်ကျော်လွန် မုဒ်ကို ဖွင့်လှစ်ခဲ့ကာ အကြောင်းတစ်ခုခုကြောင့် အမဲလိုက်ခြင်း လက်စွပ်ကွင်းပါ ထပ်မံ ပေါ်ထွက်လာခဲ့ခြင်း ဖြစ်ရပေမည်။ အသက်ရှင် လွတ်မြောက်ရန် သို့မဟုတ် တိုက်ပွဲကို အနိုင်ရရှိရန်အတွက် ကိုယ်ခံစွမ်းအားနှင့် စိတ်စွမ်းအားတို့ကို ကန့်သတ်ချက်ထက် ကျော်လွန် သုံးစွဲကာ ကြီးမားလှသော ပေးဆပ်မှုကို ပြုလုပ်ခဲ့ရသောကြောင့်သာ ယခုကဲ့သို့ အခြေအနေမျိုး ရောက်ရှိသွားခဲ့ခြင်းပေတည်း။

"သူက ကတ်ပြား အစီအစဉ်ရဲ့ ပိုင်ရှင် ဖြစ်နေတော့ အဲဒီ နတ်ဘုရားတွေနဲ့ သဘာဝအရကို ရန်သူတွေ ဖြစ်နေတာပဲ။ ဟူး... ဒါ့အပြင် အဆင့်မြင့် ဘူတာရုံကမ္ဘာတွေဆီ ဝင်ရောက်သွားတဲ့အခါ စနစ်အနေနဲ့ ဒီအဆင့်မြင့် ဘူတာရုံကမ္ဘာတွေကို ထိန်းချုပ်နိုင်စွမ်းက နှိုင်းယှဉ်ချက်အရ အများကြီး ပိုပြီး အားနည်းသွားတတ်တယ်"

"နတ်ဘုရားတွေ... နတ်ဘုရား တစ်ပါးပါးကများ သူ့ကို ကိုယ်တိုင် ကိုယ်ကျ တိုက်ခိုက်ခဲ့လို့လား"

ကျောက်ရှီး၏ မျက်လုံးများထဲတွင် အေးစက်စူးရဲသော အလင်းတန်းတစ်ခု လက်ခနဲ ဖြတ်ပြေးသွား၏။ အရပ် ၁ ဒသမ ၅ မီတာမျှသာ ရှိသည့် သူမ၏ သေးသွယ်သော ခန္ဓာကိုယ်လေး အတွင်း၌ ဤကမ္ဘာကြီး တစ်ခုလုံးကို တုန်လှုပ်ချောက်ချား သွားစေနိုင်လောက်သည့် ကြောက်မက်ဖွယ် စွမ်းအားကြီး ကိန်းအောင်း တည်ရှိနေပေသည်။

[ "ဘယ်သူလဲ" ]

[ "?" ]

[ "ဘယ်နတ်ဘုရားလဲလို့ ငါ မေးတာ" ]

[ "သူရဲဘောကြောင်တဲ့ ကောင်တစ်ကောင်ပါ ဘာမှမဖြစ်ပါဘူး၊ အနှေးနဲ့အမြန်ဖြစ်ဖြစ် ငါ့ကလဲ့စား ချေပစ်မှာပါ" ]

[ "အင်း ငါ နင့်ကို ယုံပါတယ်" ]

ကျောက်ရှီးသည် အရုပ်လေးများ ပြည့်နှက်နေသော သူမ၏ ကုတင်ကြီးပေါ်၌ လှဲလျောင်းနေရင်း လှပသော မျက်နှာလေးထက်တွင် အပြုံးတစ်ခု ထင်ဟပ်လာခဲ့သည်။ ရဲချီယန် လုပ်နိုင်လိမ့်မည်ဟု သူမ အပြည့်အဝ ယုံကြည်ထား၏။

[ "ဘာပဲဖြစ်ဖြစ် နင်က ကောင်းကင်ယံဥယျာဉ်မှာ တခမ်းတနား တောက်ပခဲ့တဲ့ နတ်ဆိုး စက်ယန္တရား နဂါးလူသားကြီးပဲဟာ... ဟွန်း" ]

[ "..." ]

ရဲချီယန်၏ မျက်လုံးထောင့်များ အကြိမ်အနည်းငယ် ဆတ်ခနဲ တွန့်ခါသွားတော့သည်။ ဤဘွဲ့အမည်ကြီးက... ဘယ်အချိန် ကြည့်ကြည့် အလွန် နားလည်ရခက်ပြီး ထူးဆန်းနေဆဲပင်။

ရဲချီယန် ပေးပို့လာသော အစက်ကလေးများ တစ်တန်းကြီးကို မြင်လိုက်ရသောအခါ ကျောက်ရှီး၏ မျက်နှာထက်မှ အပြုံးလေးမှာ ပို၍ပင် တောက်ပ လန်းဆန်းလာခဲ့သည်။ သူမက ခြေထောက် သေးသေးလေးများကို လှုပ်ရမ်းကာ အမည်မသိ တေးသွားလေးတစ်ခုကို ညည်းတွားရင်း စနစ်၏ အလင်းမျက်နှာပြင်ထက်၌ စာဆက်ရိုက်နေလေ၏။

[ "အခြား အပိုအလို ကိစ္စတွေကို ငါ မပြောတော့ဘူး။ နင် အမဲလိုက်ခြင်း လက်စွပ်ကွင်းကို ရရှိသွားပြီ ဆိုမှတော့ သူ့ရဲ့ နောက်ကွယ်က မှတ်ချက်တွေကိုလည်း မြင်တွေ့ပြီးလောက်ရောပေါ့" ]

[ "အဲဒါက အမဲလိုက် စက်ယန္တရားနဂါးရဲ့ ပုံစံကြမ်းကို ဖန်တီးခဲ့တဲ့သူ သေခါနီး ချန်ရစ်ခဲ့တဲ့ သေတမ်းစာပဲ။ အမဲလိုက်ခြင်း လက်စွပ်ကွင်း ဆိုတာကလည်း မူလက ဒီနာမည် မဟုတ်သင့်ဘူး၊ တိကျတဲ့ နာမည်က လက်စွပ်ကွင်း နှစ်ကွင်း တစ်ကွင်းတည်းအဖြစ် ပေါင်းစည်းသွားတဲ့ အချိန်ကျမှသာ ပေါ်ထွက်လာလိမ့်မယ်" ]

[ "တကယ်လို့များ... တကယ်လို့လို့ ငါ ပြောတာပါ" ]

[ "နင်ပဲဖြစ်ဖြစ် ငါပဲဖြစ်ဖြစ် ဖြေရှင်းမရနိုင်တဲ့ ကိစ္စတစ်ခုခုနဲ့ ကြုံတွေ့လာခဲ့ရင်... အင်း... ငါ့အတွက်တော့ အဲဒီလို ဖြစ်လာနိုင်ချေ မရှိလောက်ဘူးလို့ ထင်ပေမယ့် တကယ်လို့ အဲဒီလို အခြေအနေမျိုး တကယ် ဖြစ်လာခဲ့ရင် တစ်ယောက်ကို တစ်ယောက် သေချာပေါက် ပြောပြရမယ် ကြားလား" ]

ဒေါင်... ဒေါင်...

စာတိုက်ပုံးဆီမှ အချက်ပေးသံတစ်ခု ထွက်ပေါ်လာခဲ့သည်။ ရဲချီယန် တစ်ချက် လှမ်းကြည့်လိုက်ရာ ကျောက်ရှီးထံမှ ပေးပို့ထားသော အီးမေးလ်တစ်စောင် ထပ်တိုး ရောက်ရှိနေသည်ကို မြင်တွေ့လိုက်ရ၏။

[ မဟာမိတ် အထိမ်းအမှတ်တံဆိပ် ]

[ ဤအထိမ်းအမှတ်တံဆိပ်ကို အားကိုးပြု၍ နှစ်ဖက်စလုံးသည် မဟာမိတ်များ ဖြစ်လာကြလိမ့်မယ်။ ဤအထိမ်းအမှတ်တံဆိပ်ကို သုံးစွဲခြင်းဖြင့် မဟာမိတ်၏ ဘူတာရုံကမ္ဘာအတွင်းသို့ တစ်နာရီကြာ ဝင်ရောက် ကူညီပေးနိုင်၏။ ]

[ မဟာမိတ် ကမ်းလှမ်းမှု - ကျောက်ရှီး ]

[ လက်ခံပါသလား ]

အီးမေးလ်ထဲရှိ ပစ္စည်းကို ကြည့်ရင်း ရဲချီယန်၏ မျက်လုံးများထဲတွင် အံ့ဩသင့်မှု အရိပ်အယောင်တစ်ခု ဖြတ်ပြေးသွားခဲ့သည်။ "တခြားသူရဲ့ ဘူတာရုံကမ္ဘာထဲကို တိုက်ရိုက် ဝင်ရောက်နိုင်တဲ့ ပစ္စည်းမျိုး တကယ်ကြီး ရှိနေတာလား။ နေပါဦး အံ့ဩနေစရာ မလိုပါဘူးလေ လွင်တီးခေါင်ပြင်ကြီးထဲမှာ ဘယ်လို ပစ္စည်းမျိုးမဆို ပေါ်လာနိုင်တာပဲဟာ"

သူ လက်ခံသင့်သလား။ ငြင်းပယ်ရန် မည်သည့် အကြောင်းပြချက်၊ မည်သည့် လိုအပ်ချက်မျှ ရှိမနေခဲ့ချေ။ မဟာမိတ် ဟုတ်လား... ရဲချီယန်၏ စိတ်အစဉ်ထဲတွင် လွန်ခဲ့သော အချိန်အတော်ကြာက စစ်သည်တော် လွင်ပြင်ဟု ခေါ်သည့် ပလက်ဖောင်းဆီသို့ သွားရောက်ခဲ့စဉ်က ဖြစ်ရပ်များ ပြန်လည် ပေါ်ပေါက်လာခဲ့၏။ အစစ်အမှန် ဧရာမ စစ်သည်တော် တစ်ဦး ဖြစ်လာခဲ့သည့် ထိုကောင် ဒွန်ကီဟိုတေးတစ်ယောက် အခုချိန်မှာ ဘာတွေများ ဖြစ်နေလောက်ပြီလဲဟု သူ သိချင်မိသွားသည်။

[ "စိတ်မပူပါနဲ့၊ ဒီပစ္စည်းက ရထားစနစ်ရဲ့ အဆင့်မြှင့် ရွေးချယ်စရာတွေကို ဘာမှ ထိခိုက်မှု မရှိစေပါဘူး" ]

ရဲချီယန် ချက်ချင်း ပြန်မဖြေသည်ကို မြင်သောအခါ ကျောက်ရှီးက ချက်ချင်းပင် ရှင်းပြလာတော့သည်။

[ "ဒါက သက်သက်..." ]

သူမ၏ ကျန်ရှိနေသေးသော စကားလုံးများကို မပို့ရသေးခင်မှာပင် မဟာမိတ် ကမ်းလှမ်းမှုကို လက်ခံလိုက်သည့် အသိပေးချက်က သူမထံသို့ ပြန်လည် ရောက်ရှိလာခဲ့လေ၏။

[ "ငါ ခုလေးတင် ကိစ္စတစ်ခုကို တွေးနေမိလို့ပါ။ တကယ်လို့ ငါ ဖြေရှင်းမရနိုင်တဲ့ ကိစ္စမျိုးနဲ့ တကယ် တွေ့လာခဲ့ရင် နင့်ကို သေချာပေါက် ပြောပါ့မယ်" ]

[ "ဒါနဲ့... အရင်တစ်ခေါက်က နင့်အတွက် အရုပ်လေးတွေ ရှာပေးမယ် ဆိုတာကို ငါ မမေ့သေးပါဘူး။ ဒါပေမဲ့ ကောင်းကင်ယံဥယျာဉ်က ပျက်စီးသွားခဲ့တော့ ငါ မဝယ်လိုက်ရဘူး။ နောက်တစ်ခေါက် တခြား မြို့တော် တစ်ခုခုကို ရောက်ရင်တော့ သတိထားပြီး ရှာကြည့်ပေးပါ့မယ်" ]

ကျောက်ရှီးက မျက်တောင်လေး ခတ်လိုက်ပြီး သူမ၏ လက်ချောင်းလေးများမှာ လေထုထဲ၌ ရပ်တန့် တန့်ရပ်သွားခဲ့သည်။ အတန်ကြာမှသာ သူမက ဖြည်းညင်းစွာ ပြန်လည် စာပို့လိုက်တော့၏။

[ "အင်းပါ... ဒါဆိုလည်း... ဒီလောက်နဲ့ပဲ ထားလိုက်ကြတာပေါ့။ ကောင်းကောင်း အနားယူပါ၊ နင် ဘူတာရုံကမ္ဘာတွေကို အောင်မြင်စွာ ရှင်းလင်းနိုင်ပါစေလို့ ဆုတောင်းပေးပါတယ်" ]