အခန်း ၇၆၈

အခန်း (၇၆၈)။

"ဟုန်ယွိ... ဧကရာဇ်ဖန် ဗဟိုကမ္ဘာကို ဖန်တီးခဲ့စဉ်တုန်းက သူ့ရဲ့ တစ်ခုတည်းသော ဆန္ဒက တစ်နေ့ကျရင် ဗဟိုကမ္ဘာ အင်အားတောင့်တင်းလာတဲ့အခါ ဒီကမ္ဘာက လူသားအားလုံးကို မဟာကမ္ဘာလောကဆီ ခေါ်ဆောင်သွားပြီး လူသားမျိုးနွယ်ရဲ့ ပြောင်းလဲမူကို ဦးဆောင်ဖို့ ပဲ။ အခုတော့ ငါဟာ အဲဒီဆန္ဒကို နောက်ဆုံးမှာ ဖြည့်ဆည်းပေးတော့မယ်။ ဒါဟာ ငါ့ဆန္ဒ တင်မကဘူး၊ ဧကရာဇ်ဖန်ရဲ့ ဆန္ဒလည်း ဖြစ်တယ်။ အခုဆို ငါ ဧကရာဇ်ဖန်ရဲ့ ယန်နတ်ဘု ရား အတွေးစ လှုပ်ခတ်လာတာကိုတောင် ခံစားနေရပြီ။ ငါသာ သူ့ရဲ့ ဒီနောက်ဆုံးဆန္ဒကို ဖြည့်ဆည်းပေးလိုက်တာနဲ့ ဒီယန်နတ်ဘုရား အတွေးစနဲ့ လုံးဝ တစ်သားတည်းဖြစ်သွားပြီး ယန်နတ်ဘုရားအဆင့်ကို အမှန်တကယ် ချိုးဖျက်နိုင်တော့မှာ။ ဟုန်ယွိ... မင်းကတော့ ယန်နတ်ဘုရားအဆင့်ကို တက်လှမ်းဖို့ မအောင်မြင်ခဲ့ဘူး။ ဒါပေမဲ့ ဒီတစ်ကြိမ်မှာတော့ ငါဟာ ဗဟိုကမ္ဘာက လူသားတွေကို မဟာကမ္ဘာလောကဆီ ခေါ်ဆောင်လာခြင်းအားဖြင့် ငါ့ရဲ့ စိတ်အာရုံတွေဟာ အမှန်တကယ် ကြည်လင်လာလိမ့်မယ်။ ငါဟာ ယန်နတ်ဘုရား အဆင့်ကို တစ်ဟုန်ထိုး တက်လှမ်း အောင်မြင်လိမ့်မယ်။ မင်းအတွက်ကတော့ သေခြင်း တရားပဲ။ သေဖို့သာ ပြင်ထားလိုက်တော့"

စွမ်းအားကြီးမားသည့် ရုပ်သေးရုပ်ကြီး 'ပျက်သုဉ်းခြင်း နတ်ဘုရားဘုရင်' ကို ဆင့်ခေါ်ပြီး နောက်၊ ရွှီယွိ၏အသံက ကောင်းကင်ဘုံဖခင်ကြီးနှင့် မြေကမ္ဘာမိခင်ကြီးတို့၏ အရှိန်အဝါ မျိုးဖြင့် ကောင်းကင်နှင့် မြေကြီးအနှံ့ ဟိန်းထွက်သွားတော့သည်။

"မျှော်လင့်ထားတဲ့အတိုင်းပဲ၊ ရွှီယွိလို ကျွမ်းကျင်သူမျိုးဆီမှာ ဝှက်ဖဲတွေ မရှိဘဲ မနေဘူး။ ဒီ 'ပျက်သုဉ်းခြင်း နတ်ဘုရားဘုရင်' က အဲဒီထဲက တစ်ခုပေါ့။ ဒါပေမဲ့ ဒါကလည်း အနာဂတ် သခင်ရဲ့ တွက်ချက်မှုထဲမှာ ရှိပြီးသားပါ။ ဒါဟာ သာမန် အပြောင်းအလဲလေးတစ်ခုပါပဲ"

'ပျက်သုဉ်းခြင်း နတ်ဘုရားဘုရင်' ၏ လက်သီးချက် သူ့ထံသို့ ဦးတည်ပျံသန်းလာသည်ကို မြင်သော်လည်း ဟုန်ယွိမှာ တုန်လှုပ်ခြင်း အလျဉ်းမရှိပေ။ အမှန်စင်စစ် သူ၏ စိတ်ခံစား ချက်မှာ အနည်းငယ်မျှပင် ဂယက်ထခြင်း မရှိခဲ့ပါ။ ဤ 'ပျက်သုဉ်းခြင်း နတ်ဘုရားဘုရင်' မှာ ရှေးဟောင်း နတ်ဘုရားဘုရင်များဖြစ်ကြသည့် 'ကော့လီနတ်ဘုရားဘုရင်မ' နှင့် 'မဟာ ဖျက်ဆီးခြင်း နတ်ဘုရားဘုရင်' တို့နှင့်ပင် ယှဉ်နိုင်လောက်အောင် အလွန်တရာ အစွမ်း ထက်လှပေသည်။ ထို့ပြင် သန့်စင်သော ခွန်အားပိုင်းတွင်မူ သူတို့ကိုပင် ကျော်လွန်ကောင်း ကျော်လွန်နိုင်ပေသေးသည်။

သို့သော် ရွှီယွိတွင် ဤ 'ပျက်သုဉ်းခြင်း နတ်ဘုရားဘုရင်' ရှိနေလိမ့်မည်ကို ဟုန်ယွိ ကြိုတင် မခန့်မှန်းနိုင်ခဲ့ခြင်း မဟုတ်ပေ။

အကယ်၍ ရွှီယွိသည် ဗဟိုကမ္ဘာမှ လူသားများကို မဟာကမ္ဘာလောကသို့ ရွှေ့ပြောင်းနိုင် ပါက၊ ဧကရာဇ်ဖန်၏ နောက်ဆုံးဆန္ဒကို ဖြည့်ဆည်းပေးနိုင်မည် ဖြစ်ပြီး၊ ယန်နတ်ဘုရား အတွေးစနှင့် ပေါင်းစပ်ကာ ယန်နတ်ဘုရားအဆင့်သို့ အမှန်တကယ် ချိုးဖျက်နိုင်လိမ့်မည် ဟု သူပြောသည်မှာ အမှန်တရားဖြစ်ကြောင်း ဟုန်ယွိ သိရှိပါသည်။

သူ၏ ရည်မှန်းချက်များက ကြီးမားလွန်းသဖြင့် ယန်နတ်ဘုရားတစ်ပါး ဖြစ်လာရန်အတွက် အချို့သော အဟန့်အတားများ ရှိနေခဲ့ခြင်း ဖြစ်သည်။

သို့သော် အကယ်၍ ရွှီယွိသာ ဧကရာဇ်ဖန်၏ နောက်ဆုံးဆန္ဒကို အကောင်အထည်ဖော် ဖြည့်ဆည်းပေးနိုင်ခဲ့ပါက၊ သူသည် အမြင့်ဆုံးသော ယန်နတ်ဘုရားတစ်ပါး အမှန်တကယ် ဖြစ်လာနိုင်ပြီး ကမ္ဘာလောက၏ ထိပ်ဆုံးပုဂ္ဂိုလ် ဖြစ်လာပေလိမ့်မည်။ ဟုန်ယွိသည် 'ပြောင်းလဲခြင်းကျမ်း' ကို ဖန်တီးခဲ့ပြီး သူတော်စင်ယွိ ဖြစ်သော်လည်း၊ ရွှီယွိ၏ 'ယွိ' မှာမူ အတုအယောင်ဖြစ်ပြီး အတုအယောင် ကံတရားကိုသာ ပိုင်ဆိုင်ထားသည်။ သို့သော် အကယ်၍ 'ရွှီယွိ' သာ ယန်နတ်ဘုရားအဆင့်သို့ အရင်ဆုံး ချိုးဖျက်နိုင်ခဲ့ပါက၊ ထို 'အတု အယောင်ယွိ' မှ 'အစစ်မှန်ယွိ' ဖြစ်လာပေလိမ့်မည်။

ဘယ်သူက ယန်နတ်ဘုရား အဆင့်ကို အရင်ရောက်သလဲ ဆိုသည်ကသာ စစ်မှန်သော 'ယွိ' ကို ဆုံးဖြတ်ပေးမည် ဖြစ်သည်။

ဟုန်ယွိအနေဖြင့် ရွှီယွိအား ဤမဟာရွှေ့ပြောင်းခြင်းလုပ်ငန်းကို အောင်မြင်အောင် လုပ်ဆောင်ရန် လုံးဝ ခွင့်မပြုနိုင်ပေ။ မဟုတ်ပါက အခြားလူမှာ ယန်နတ်ဘုရား မဖြစ်လာ နိုင်လျှင်ပင် သူ၏ စွမ်းအားမှာ အဆမတန် တိုးပွားလာပြီး ရင်ဆိုင်ရ ခက်ခဲသော ရန်သူ ဖြစ်လာပေလိမ့်မည်။

"ဟွန့်... ဧကရာဇ်ဖန်ရဲ့ နတ်ဘုရားစိတ်ဆန္ဒကို သုံးပြီး ယန်နတ်ဘုရားတစ်ပါး ဖြစ်အောင် လုပ်တာက ဘာများ ထူးခြားသွားမှာမို့လို့လဲ။ ယန်နတ်ဘုရား အဆင့်ဆိုတာ ခင်ဗျား ထင်သလို ရိုးရှင်းမယ် ထင်နေလား။ ယန်နတ်ဘုရား အဆင့်ကို တက်လှမ်းဖို့ မကြိုးစားဖူး ဘဲနဲ့ အထွတ်အထိပ် ယန်နတ်ဘုရားရဲ့ မြင့်မြတ်မှုနဲ့ တောက်ပမှုကို ခင်ဗျား ဘယ်တော့မှ သိမှာ မဟုတ်ဘူး။ ခင်ဗျားက မိုးကြိုးကပ်ဘေး ကိုးကြိမ်အထိ ကျင့်ကြံထားနိုင်ပေမဲ့ ခင်ဗျား ဟာ ရေတွင်းထဲက ဖားတစ်ကောင် ဖြစ်နေတုန်းပါပဲ"

ဟုန်ယွိက ကျယ်လောင်စွာ ရယ်မောလိုက်ပြီး၊ သူ့ဆီထိုးနှက်လာသော 'ပျက်သုဉ်းခြင်း နတ်ဘုရားဘုရင်' ၏ လက်သီးကို ရင်ဆိုင်ရင်း သူက သာမန်ကာလျှံကာပင် လက်သီး တစ်ချက် ပြန်လည် ထိုးနှက်လိုက်ရာ 'ပျက်သုဉ်းခြင်း နတ်ဘုရားဘုရင်' နှင့် တိုက်ရိုက် ထိပ်တိုက် တွေ့ဆုံသွားခဲ့သည်။

ထိုထိပ်တိုက်တွေ့မှုကြောင့် တဖန် ဟင်းလင်းပြင် မုန်တိုင်းတစ်ခု ပြင်းထန်စွာ ဖြစ်ပေါ် လာပြန်သည်။

ဟုန်ယွိမှာ တုပ်တုပ်မျှ မလှုပ်သော်လည်း၊ ပျက်သုဉ်းခြင်း နတ်ဘုရားဘုရင်မှာမူ နောက်သို့ ခြေလှမ်းအနည်းငယ် ဆုတ်သွားခဲ့ရလေသည်။

"ကောင်းကင်သွေးမိုး"

ပျက်သုဉ်းခြင်း နတ်ဘုရားဘုရင်မှာ ဟုန်ယွိ၏ တိုက်ကွက်ကြောင့် နောက်သို့ ဆုတ်သွားခဲ့ ရသော်လည်း၊ သူက ပို၍ပင် ရက်စက်ကြမ်းကြုတ်လာသည်။ သူသည် ကျယ်လောင်စွာ ဟစ်ကြွေးရင်း စကားလုံးသုံးလုံးကို အော်ဟစ်ကာ ထပ်မံ ထိုးနှက်လိုက်ပြန်သည်။ ဟစ်အော်သံများနှင့်အတူ နီရဲသော အလင်းတန်းများနှင့် သွေးမိုးများမှာ ပို၍ ပြင်းထန်လာ ပြီး၊ ဟုန်ယွိနှင့် သူတော်စင်ပေါင်းစုံခန်းမ တစ်ခုလုံးကို လုံးဝ လွှမ်းခြုံသွားကာ "မြွေက ဆင်ကိုမျိုခြင်း" ပုံစံမျိုး ဖြစ်ပေါ်နေသည်။

မှန်ပါသည်၊ ပျက်သုဉ်းခြင်း နတ်ဘုရားဘုရင်မှာ အစွမ်းထက်သော်လည်း၊ သူတော်စင် ပေါင်းစုံခန်းမနှင့် ဟုန်ယွိတို့၏ ရှေ့တွင်မူ ထိုကွာခြားချက်မှာ ဆင်ကိုမျိုမည့် မြွေ တစ်ကောင်ကဲ့သို့ပင် ဖြစ်နေပါသည်။ ဟုန်ယွိမှာ ဧရာမ ဆင်ပြောင်ကြီးတစ်ကောင် ဖြစ်ပြီး၊ ပျက်သုဉ်းခြင်း နတ်ဘုရားဘုရင်မှာ မြွေတစ်ကောင်သာ ဖြစ်သည်။

သို့သော် ယခုအခါ ဤမြွေမှာ ဧရာမ ဆင်ပြောင်ကြီးကို အတင်းအဓမ္မ မျိုချရန် ကြိုးပမ်း နေခြင်းပင်။

'ကိုးကိုးလုံး တစ်ခုတည်းပေါင်းစည်းခြင်း'

ဟုန်ယွိသည် သူတော်စင်ပေါင်းစုံခန်းမ ပေါ်တွင် ရပ်လျက်၊ သူ၏ လက်ချောင်းငါးချောင်းကို ရှေ့သို့ တွန်းထုတ်လိုက်ရာ၊ ဆောင်းဦးလေကြမ်းက သစ်ရွက်ခြောက်များကို လွှင့်ပစ်လိုက် သကဲ့သို့ ကောင်းကင်ယံရှိ သွေးမိုးများကို လွင့်စင်သွားစေသည်။ ထို့နောက် သူ၏ လက်ချောင်းငါးချောင်းက 'ရှေးဦးကောင်းကင်ငှက် ကိုးမျိုးအသွင်ပြောင်းခြင်း'ကို ဖော် ဆောင်လိုက်ပြီး၊ 'ကိုးကိုးလုံး တစ်ခုတည်းပေါင်းစည်းခြင်း' ပုံစံဖြင့် ပျက်သုဉ်းခြင်း နတ်ဘုရားဘုရင်အပေါ်သို့ ဖိနှိပ်ချလိုက်တော့သည်။

ဟုန်ယွိသည် သူ၏ ရုပ်ခန္ဓာခွန်အားသက်သက်ကိုသာ အပြည့်အဝ အသုံးပြုနေခြင်း ဖြစ်သည်။

လက်ရှိတွင် သူ၏ ရုပ်ခန္ဓာမှာ အင်မော်တယ်ကျောက်စာတိုင် နှစ်တိုင်နှင့် ပေါင်းစပ်ထားပြီး၊ အင်မော်တယ် နတ်ဘုရားဘုရင်၏ အသားစများကိုလည်း အမြောက်အမြား စုပ်ယူထား သည်။ သူ၏ရုပ်ခန္ဓာမှာ အထွတ်အထိပ် အဆင့်သို့ ရောက်ရှိနေပြီး သူ၏ စွမ်းအားမှာ ထပ်မံ တိုးတက်ရန် မရှိတော့လောက်အောင်ပင် ပြည့်စုံနေသည်။ ယခု သူ တိုက်ခိုက်လိုက်သော အခါ ပျက်သုဉ်းခြင်း နတ်ဘုရားဘုရင်ကဲ့သို့ အစွမ်းထက်သူပင်လျှင် ခံနိုင်ရည်မရှိတော့ပေ။

ဒုန်း

ဟုန်ယွိ၏ 'ကိုးကိုးလုံး တစ်ခုတည်းပေါင်းစည်းခြင်း' အစစ်မှန် စွမ်းအင်ဖြင့် ဖိနှိပ်ခံလိုက်ရ ပြီးနောက်၊ ကြမ်းကြုတ်လှသော ပျက်သုဉ်းခြင်း နတ်ဘုရားဘုရင်၏ ခန္ဓာကိုယ်မှာ ချက်ချင်းပင် အက်ကွဲသွားပြီး မြူခိုးများနှင့် အရိုးများ ထွက်ပေါ်လာသည်။

တိုက်ကွက် တစ်ကွက်တည်းနှင့်ပင် ပျက်သုဉ်းခြင်း နတ်ဘုရားဘုရင်ကို ပြင်းထန်စွာ ဒဏ်ရာရရှိစေခဲ့သည်။

သို့သော် ပျက်သုဉ်းခြင်း နတ်ဘုရားဘုရင်၏ ခန္ဓာကိုယ် အက်ကွဲသွားပြီးနောက်တွင် သူ၏ စွမ်းအားမှာ ပို၍ပင် တိုးလာသယောင် ရှိသည်။ သူ၏ အစွမ်းအစ အားလုံးကို ထုတ်ဖော် လိုက်ရာ သူ၏ ပြင်းထန်သော အော်ဟစ်သံမှာ ကောင်းကင်နှင့် မြေကြီးကိုပါ တုန်ခါသွား စေသည်။

"တစ္ဆေနတ်ဘုရား ငိုကြွေးသံ"

သူက ကျောကို ကုန်းကာ နဂါးတစ်ကောင်၊ ကျားတစ်ကောင်၊ မြွေတစ်ကောင် သို့မဟုတ် စပါးကြီးမြွေတစ်ကောင်ကဲ့သို့ ကောင်းကင်ယံသို့ ခုန်တက်လိုက်သည်။ ကောင်းကင်ယံ တွင် မှောင်မိုက်သော တိမ်တိုက်များ ပြည့်နှက်သွားပြီး၊ ထိုတိမ်တိုက်များထဲတွင် မရေ မတွက်နိုင်သော တစ္ဆေများနှင့် နတ်ဘုရားများ၏ မျက်နှာများကို မြင်တွေ့ရကာ ထိုသူအား လုံးမှာ အော်ဟစ်ငိုကြွေးနေကြသည်။

တစ္ဆေများနှင့် နတ်ဘုရားများ၏ မျက်နှာအားလုံးမှာ ငိုကြွေးရင်း ဟုန်ယွိထံသို့ အုပ်စုလိုက် တိုးဝင်လာကြသည်။

'ကောင်းကင်သွေးမိုး' နှင့် 'တစ္ဆေနတ်ဘုရား ငိုကြွေးသံ' ဟူသော တိုက်ကွက်နှစ်ခုမှာ ပျက်သုဉ်းခြင်း နတ်ဘုရားဘုရင်၏ ကြီးမားလှသော စွမ်းအားနှင့် သတ်ဖြတ်လိုစိတ်ကို အထင်းသား ပြသနေသည်။ ပျက်သုဉ်းခြင်း နတ်ဘုရားဘုရင်၊ သူသည် နတ်ဘုရားတို့တွင် အထူးခြားဆုံးနှင့် ဘုရင်တို့၏ ဘုရင်ဖြစ်ကြောင်း ထိုက်တန်လှပေသည်။

"သေစမ်း"

ဟုန်ယွိ၏ မျက်လုံးများက အေးစက်သွားပြီး သူ၏ လက်ဝါးကို ထပ်မံ မှောက်ချလိုက်ပြန် သည်။ သူ၏ လက်ကို တူတစ်လက်ကဲ့သို့ ပုံဖော်ကာ၊ ထိုတူ၏ အရှိန်အဟုန်ဖြင့် အောက်သို့ ထုချလိုက်သည်။ ချက်ချင်းပင် ကောင်းကင်နှင့် မြေကြီးမှာ ကွဲအက်သံများ ထွက်ပေါ်လာ ပြီး၊ မှောင်မိုက်သော တိမ်တိုက်များ၊ တစ္ဆေမျက်နှာများနှင့် ငိုကြွေးသံများ အားလုံးမှာ ကွဲအက်ကာ ပျက်စီးသွားတော့သည်။

ထို့နောက် ထိုလက်တူသည် အချိန်နှင့် ဟင်းလင်းပြင်ကို ဆွဲဖြဲကာ ပျက်သုဉ်းခြင်း နတ်ဘုရားဘုရင်၏ ရင်ဘတ်ပေါ်သို့ အားပါသော လက်သီးချက်အဖြစ် ကျရောက်သွား တော့သည်။

ဒုန်း

အစွမ်းထက်လှသော ပျက်သုဉ်းခြင်း နတ်ဘုရားဘုရင်၏ ရင်ဘတ်မှာ ချက်ချင်းပင် အပေါက်ကြီးတစ်ခု ဖြစ်သွားသည်။ လှုပ်ရှားနေသော ခရမ်းရောင် အသားစများမှာလည်း လွင့်စင်ထွက်လာပြီး လေထဲတွင် ဝဲပျံနေတော့သည်။

"မသေမျိုးဗုဒ္ဓတို့ရဲ့ ဒေါသ"

ပျက်သုဉ်းခြင်း နတ်ဘုရားဘုရင်မှာ ရင်ဘတ် ပွင့်ထွက်သွားသော်လည်း သေဆုံးခြင်း မရှိ ပေ။ ယင်းအစား သူက ပို၍ ဒေါသထွက်လာပြီး လက်သီးကို ကျစ်ကျစ်ပါအောင် ဆုပ်လျက် ရှေ့သို့ ပြေးဝင်လာကာ သူ၏ အစွမ်းထက်ဆုံး တိုက်ကွက်ဖြစ်သော 'မသေမျိုးဗုဒ္ဓတို့ အမျက်ဒေါသ' ကို ထုတ်ဖော်လိုက်တော့သည်။

ဤပျက်သုဉ်းခြင်း နတ်ဘုရားဘုရင်အား ရွှီယွိက အစွမ်းထက်သော သိုင်းပညာများစွာကို ထည့်သွင်းပေးထားပြီး၊ ထိပ်တန်း တိုက်ကွက် သုံးခုမှာ 'ကောင်းကင်သွေးမိုး'၊ 'တစ္ဆေ နတ်ဘုရား ငိုကြွေးသံ' နှင့် 'မသေမျိုးဗုဒ္ဓတို့ရဲ့ အမျက်ဒေါသ' တို့ ဖြစ်ကြသည်။

ဤတိုက်ကွက်သုံးခုမှာ သူ့ရှေ့ လမ်းကြောင်းပေါ် ရှိသမျှ အရာအားလုံးကို အစစ်မှန် ခွန်အားဖြင့် ချေမှုန်းပစ်နိုင်သည့် ကောင်းကင်ဘုံကို ဆန့်ကျင်နိုင်သော တိုက်ကွက်များ ဖြစ်ကြသည်။

"သိမ်းဆည်းစမ်း"

ပျက်သုဉ်းခြင်း နတ်ဘုရားဘုရင်၏ အပြင်းထန်ဆုံး တိုက်ခိုက်မှုကို ရင်ဆိုင်ရသော်လည်း ဟုန်ယွိမှာ မတုန်လှုပ်ဘဲ ဂရုပင်မစိုက်ပေ။ သူ၏ လက်သည်းများကို စက်လုံးပုံစံ ပြုလုပ် ကာ အောက်သို့ လွှမ်းခြုံလိုက်ရာ အဆက်မပြတ် ပြောင်းလဲနေသည်။ ပထမတွင် ‘ကမ္ဘရီ ယန် အမှောင်ကမ္ဘာ နတ်ဘုရားလက်သည်း’ ဖြစ်ပြီး၊ ထို့နောက် 'ကောင်းကင်နှင့် မြေကြီး ရှာဖွေခြင်း'၊ နောက်ဆုံးတွင် 'ဗုဒ္ဓလက်ဝါး' အဖြစ် ပြောင်းလဲသွားသည်။

ခဏချင်းအတွင်းမှာပင် ဟုန်ယွိသည် နက်နဲပြီး ခန့်မှန်းရခက်သော သိုင်းပညာ အပြောင်း အလဲပေါင်း ၁၂၉၆ မျိုးကို ပြောင်းလဲခဲ့သည်။ ၎င်းတို့သည် စွမ်းအားအားလုံးကို ပျော်ဝင်သွား စေပြီး 'မသေမျိုးဗုဒ္ဓတို့၏ အမျက်ဒေါသ' ကို ဘာမှမဟုတ်သော အရာအဖြစ် ပျောက်ကွယ် သွားစေသည်။

"ဟင်"

သူ၏ ဒေါသတကြီး တိုက်ခိုက်မှုမှာ ရွှံ့နွံထဲသို့ ကျရောက်သွားသကဲ့သို့ ခံစားလိုက်ရပြီး ပျက်သုဉ်းခြင်း နတ်ဘုရားဘုရင်မှာ လုံးဝ ပိတ်မိသွားတော့သည်။ တစ်ချိန်တည်းမှာပင် ဟုန်ယွိ၏ လက်သည်းများက ကောင်းကင်ယံကို ဖုံးလွှမ်းသွားပြီး လှောင်အိမ်တစ်ခုအဖြစ် ပြောင်းလဲကာ ပျက်သုဉ်းခြင်း နတ်ဘုရားဘုရင်ကို ချုပ်နှောင်လိုက်သည်။ ပျက်သုဉ်းခြင်း နတ်ဘုရားဘုရင်၏ ခန္ဓာကိုယ်မှာ သေးငယ်သွားပြီး သူ၏ စွမ်းအင်များမှာလည်း စုစည်း သွားသည်။

သို့သော် သူသည် လက်ရှိ ပိတ်မိနေသော အခြေအနေမှ လွတ်မြောက်ရန် လမ်းစမရှိတော့ ပေ။

"ဒီဟုန်ယွိက တကယ်ကို အစွမ်းထက်တာပဲ။ တိုက်ကွက် သုံးကွက်တည်းနဲ့တင် ပျက်သုဉ်း ခြင်း နတ်ဘုရားဘုရင်ကို ကိုင်တွယ်နိုင်ခဲ့ပြီ၊ သူတော်စင်ပေါင်းစုံခန်းမရဲ့ စွမ်းအားကိုတောင် မသုံးရသေးဘူး။ တကယ်လို့ ဒီပျက်သုဉ်းခြင်း နတ်ဘုရားဘုရင်ကိုပါ ဖမ်းယူသွားနိုင်မယ် ဆိုရင် သူ့အင်အားက ပိုပြီးတော့တောင် တိုးလာဦးမှာ"

မုန့်ရှန်းကျီလည်း ခုနက တိုက်ကွက် သုံးကွက်၏ အပြောင်းအလဲကို မြင်တွေ့ခဲ့ရသည်။ ဟုန်ယွိက တိုက်ကွက် သုံးကွက်တည်းနှင့် 'ကောင်းကင် သွေးမိုး'၊ 'တစ္ဆေနတ်ဘုရား ငိုကြွေးသံ' နှင့် 'မသေမျိုးဗုဒ္ဓတို့၏ အမျက်ဒေါသ' တို့ကို ချေဖျက်ပစ်လိုက်သည်ကို မြင်ရပြီး နောက်၊ တစ်ချိန်တည်းမှာပင် ပျက်သုဉ်းခြင်း နတ်ဘုရားဘုရင်ကို မလှုပ်နိုင်အောင် ချိပ်ပိတ် ထားသည်ကို တွေ့ရသဖြင့် သူသည် မအံ့ဩဘဲ မနေနိုင်တော့ပေ။

ဟုန်ယွိသည် နေ့စဉ်နှင့်အမျှ ပိုမို သန်မာလာပြီး အမြဲတစေ တိုးတက်နေကာ အချိန်မရွေး အမြင့်ဆုံးသော နယ်ပယ်သို့ တက်လှမ်းသွားနိုင်သည်ကို သူ ယခု မြင်တွေ့နေရပြီ။

ထိုအချိန်တွင် ရွှီယွိက စတင် လှုပ်ရှားလိုက်သည်။

သူ၏ခန္ဓာကိုယ်က ဟင်းလင်းပြင်ထဲတွင် ထူးဆန်းသော လွင့်မျောမှုဖြင့် ချက်ချင်း ရွေ့လျား သွားရာ၊ သူ့ပုံရိပ်က အလွန် လျင်မြန်ပုံရသော်လည်း အလွန် နှေးကွေးနေပြန်သဖြင့် မြင်ရ သူများကို သွေးအန်ချင်စိတ် ဖြစ်ပေါ်စေသည်။ လျှပ်တပြက် လှုပ်ရှားမှု အနည်းငယ်နှင့် အတူ သူသည် ဟုန်ယွိ၏ အရှေ့ဘက် အရပ်သို့ ရောက်ရှိလာပြီး လက်ညှိုးတစ်ချောင်းဖြင့် ထိုးလိုက်သည်။

ရှူး

ရေတံခွန်တစ်ခု ကျဆင်းသံကဲ့သို့ အသံတစ်ခု ဟိန်းထွက်လာသည်။ ထိုအသံနှင့်အတူ ကျယ်ပြောလှသော ခရမ်းရောင် ကောင်းကင်မြစ်ကြီးတစ်ခုမှာ ဟုန်ယွိထံသို့ ပြင်းထန်စွာ တိုးဝင်လာတော့သည်။

"အရှေ့ရပ်မှ ခရမ်းရောင်စွမ်းအင်"

ရွှီယွိ ထုတ်လွှတ်လိုက်သော ခရမ်းရောင် ကောင်းကင်မြစ်ကို မြင်လိုက်ရချိန်မှာ ၎င်းမှာ အစွမ်းထက်သော တာအိုပညာရပ်တစ်ခု ဖြစ်ကြောင်း ဟုန်ယွိ သိရှိလိုက်သည်။ ထိုပညာ ရပ်မှာ ရှေးဟောင်း သူတော်စင်ဧကရာဇ် တစ်ပါး ဖန်တီးခဲ့သည့် လျှို့ဝှက်ပညာ ဖြစ်သည်။ ခရမ်းရောင် ကောင်းကင်မြစ်၊ အရှေ့ရပ်မှ ခရမ်းရောင်စွမ်းအင်တို့သည် ကောင်းကင်နှင့် မြေကြီးကို လွှမ်းခြုံကာ အရာအားလုံးကို တိုက်စားပစ်နိုင်စွမ်း ရှိပေသည်။

ဤတာအိုပညာမှာ နှစ်ပေါင်းတစ်ထောင်တိုင်တိုင် အချိန်ယူ ကျင့်ကြံရသော ပညာရပ် ဖြစ်၏။ ကောင်းကင်ဘုံကိုးခု၏ ခရမ်းရောင်စွမ်းအင်များကို စုဆောင်းကာ၊ အစစ်မှန် စွမ်းအင်အဖြစ် သန့်စင်ပြီးနောက် မိမိ၏ မူလစိတ်ဝိညာဉ်နှင့် တစ်သားတည်း ဖြစ်အောင် ပေါင်းစပ်ကျင့်ကြံရခြင်း ဖြစ်သည်။

"ရွှီယွိ... ခင်ဗျားရဲ့ ပျက်သုဉ်းခြင်း နတ်ဘုရားဘုရင်ကို ကယ်ချင်တာလား" ဤ 'အရှေ့ရပ်မှ ခရမ်းရောင်စွမ်းအင်' ကို ရင်ဆိုင်ရင်း ဟုန်ယွိက ကျယ်လောင်စွာ ဟစ်အော်လိုက်သည်။ သူ၏ ခြေလှမ်းများမှာ ဆန်းကြယ်သောပုံစံဖြင့် လှုပ်ရှားသွားပြီး၊ သူ၏ လွတ်မြောက်ခြင်း အစစ်မှန်စွမ်းအင်ကို အသုံးပြုကာ အနှောင်အဖွဲ့ကင်း ခြေလှမ်းခုနစ်လှမ်းကို အသုံးပြု၍ ဟင်းလင်းပြင်ကို လျှပ်တပြက် ဖြတ်ကျော်ကာ အရှေ့ရပ်မှ ခရမ်းရောင်စွမ်းအင် တိုက်ခိုက် မှုကို ရှောင်တိမ်းလိုက်သည်။

"ယန်နတ်ဘုရား အတွေးစ"

ရွှီယွိ၏ အရှေ့ရပ်မှ ခရမ်းရောင်စွမ်းအင်မှာ ဟုန်ယွိကို မထိမှန်ခဲ့သော်လည်း သူသည် တည်ငြိမ်နေဆဲပင်။ သူ၏လက်ကို ဝေ့ယမ်းလိုက်ရာ 'ယန်နတ်ဘုရား အတွေးစ' မှာ ကြယ်တစ်လုံးအဖြစ် ပြောင်းလဲသွားပြီး ဟုန်ယွိထံသို့ တိုက်ရိုက် ပစ်မှတ်ထားလိုက်သည်။ ကမ္ဘာ့အဆုံးအထိ ထွက်ပြေးပုန်းရှောင်လျှင်ပင် ဤတိုက်ကွက်၏ ရိုက်ခတ်မှုကို ရှောင်လွှဲ နိုင်မည် မဟုတ်ပေ။

အစစ်မှန် ယန်နတ်ဘုရား အတွေးစမှ ထွက်ပေါ်လာသော ကြီးမားလှသည့် အရှိန်အဝါကို ခံစားလိုက်ရသဖြင့် ဟုန်ယွိ၏ အောက်ရှိ သူတော်စင်ပေါင်းစုံခန်းမမှာ ထပ်မံ ကျယ်ပြန့် လာပြီး ယန်နတ်ဘုရား အတွေးစနှင့် ထိပ်တိုက် ရင်ဆိုင်လိုက်သည်။ နှစ်ခုလုံး ပြင်းထန်စွာ ရိုက်ခတ်မိကြရာ ပေါက်ကွဲသံနှင့်အတူ ယန်နတ်ဘုရား အတွေးစမှာ တိုက်ရိုက် လွင့်ထွက် သွားခဲ့ပြီး သူတော်စင်ပေါင်းစုံခန်းမမှာလည်း ရိုက်ခတ်မှုကြောင့် အနည်းငယ် တုန်ခါသွားခဲ့ သည်။

ယုတ္တိဗေဒအရဆိုလျှင် သူတော်စင်ပေါင်းစုံခန်းမ၏ စွမ်းအားမှာ ယန်နတ်ဘုရား အတွေးစ ထက် ပိုမို အစွမ်းထက်သော်လည်း၊ ယန်နတ်ဘုရား အတွေးစမှာ အလွန် ဆန်းကြယ်လှပြီး လောကနိယာမ စည်းမျဉ်းများကိုပင် ချိုးဖျက်နိုင်သော စွမ်းအားမျိုး ရှိနေသည်။ သို့သော် ဤတစ်ကြိမ်တွင်မူ သူတော်စင်ပေါင်းစုံခန်းမက အသာစီးရရှိနေဆဲဖြစ်ပြီး ယန်နတ်ဘုရား အတွေးစကို ဖိနှိပ်ထားနိုင်ခဲ့သည်။

"ရွှီယွိ... ကျုပ် ခင်ဗျားရဲ့ ပျက်သုဉ်းခြင်းနတ်ဘုရားဘုရင်ကို လုံးဝ သန့်စင်ပစ်နေတာကို ခင်ဗျားကို စောင့်ကြည့်ခိုင်းရမယ်။ မင်းမှာ တခြား ဘာလှည့်ကွက်တွေ ရှိသေးလဲ ကျုပ် ကြည့်ရသေးတာပေါ့"

ဟုန်ယွိသည် သူတော်စင်ပေါင်းစုံခန်းမကို အသုံးပြု၍ ယန်နတ်ဘုရား အတွေးစကို ဖယ်ရှား ပစ်လိုက်ပြီး၊ သူ၏ လက်သည်းပုံစံ လှောင်အိမ်ဖြင့် ပျက်သုဉ်းခြင်း နတ်ဘုရားဘုရင်ကို တင်းကျပ်စွာ ချုပ်နှောင်ထားလိုက်သည်။ သူသည် ပြင်းထန်သော တိုက်ပွဲကြားတွင် ပျက်သုဉ်းခြင်း နတ်ဘုရားဘုရင်၏ စိတ်ဝိညာဉ်အမှတ်သားကို အတင်းအဓမ္မ ဖျက်ဆီးပစ် ကာ သူ့ကိုယ်ပိုင် ရုပ်သေးရုပ်အဖြစ် ပြောင်းလဲပစ်ရန် ကြံစည်နေခြင်း ဖြစ်သည်။

ဤအခိုက်အတန့်တွင် ဟုန်ယွိ ထုတ်ဖော်လိုက်သော စွမ်းအားမှာ စွမ်းအားမှာ စကြဝဠာ တစ်ခုလုံးကို ဖုံးလွှမ်းသွားလောက်အောင်ပင် ကြီးမားလှသည်။

ဤထိပ်တိုက်တွေ့ဆုံမှုတွင် နှစ်ဖက်စလုံးမှာ အစွမ်းကုန် တိုက်ခိုက်ခဲ့ကြသော်လည်း ဟုန်ယွိက ရွှီယွိကို ပြန်လည် တွန်းလှန်နိုင်ကာ တွန်းလှန်နိုင်ကာ အပြတ်အသတ် အသာစီး ရရှိသွားခဲ့သည်။ ထို့ပြင် ၎င်းမှာ ခဲခဲယဉ်ယဉ် အနိုင်ရခြင်းမျိုး မဟုတ်ဘဲ တည်ငြိမ်စွာ အနိုင်ရရှိခြင်း ဖြစ်ရာ၊ ဟုန်ယွိသည် စစ်မှန်သော 'ပြောင်းလဲခြင်းတာအို' ကို ကိုယ်စားပြုသူ ဖြစ်ပြီး ဤလောကတွင် တစ်ဦးတည်းသော 'ယွိ' ဖြစ်ကြောင်းနှင့် ကံကြမ္မာကို စီမံခန့်ခွဲသူ ဖြစ်ကြောင်း သက်သေပြလိုက်ခြင်းပင် ဖြစ်သည်။

"ဧကရာဇ်ရှန်... ဧကရီယင်... မင်းတို့ အခုထိ ထွက်မလာသေးဘူးလား။ ဟုန်ယွိကို သတ်ကြစမ်း။ ကံတရားတွေကို လုယူကြ။ လောကမှာရှိတဲ့ ကံတရား အားလုံးကို သူက လုယူသွားပြီ။ တကယ်လို့ မင်းတို့ သူ့ကို သတ်လိုက်ရင် အဲဒီ ကံတရားတွေက ပြန့်ကျဲသွား မှာ ဖြစ်ပြီး ငါတို့အားလုံး ခွဲဝေယူနိုင်မယ်၊ ဒါမှ ငါတို့အားလုံး ယန်နတ်ဘုရားတွေ ဖြစ်လာ နိုင်မှာ"

ထိုအချိန်တွင် ရွှီယွိက ကောင်းကင်ယံသို့ မော့ကြည့်ကာ အကျယ်ကြီး အော်ပြောလိုက် တော့သည်။

ရှူး... ရှူး... ရှူး...

သူ ကျယ်လောင်စွာ ဟစ်အော်လိုက်သည်နှင့် အဆုံးမရှိသော ဟင်းလင်းပြင် လေဟာနယ် မုန်တိုင်းများကြားမှ နီရဲသော နေမင်းကြီး တစ်စင်းသည် ကောင်းကင်ယံမှ အမှန်တကယ် ဆင်းသက်လာတော့သည်။ ထိုနီရဲသော နေမင်းကြီးနှင့်အတူ တောက်ပသော လမင်းကြီး တစ်စင်းလည်း ပါဝင်လာ၏။

ဝုန်း

မီးတောက်များ လွှမ်းခြုံထားသော နန်းတော်ကြီးတစ်ခုသည် နီရဲသော နေမင်းကြီးအတွင်း မှ ပေါ်ထွက်လာပြီး၊ နန်းတော်၏ အနက်ရှိုင်းဆုံးနေရာတွင် တစ်ကိုယ်လုံး နီမြန်းနေသော အသက်လတ်ပိုင်းအရွယ် အမျိုးသားတစ်ဦးကို ဟုန်ယွိ မြင်တွေ့လိုက်ရသည်။ သူ၏ဘေး တွင် အမျိုးသားနှစ်ဦးနှင့် အမျိုးသမီးတစ်ဦး ရပ်နေကြပြီး၊ အမျိုးသားမှာ ဟုန်ယွိလက်တွင် ရှုံးနိမ့်ကာ ထွက်ပြေးသွားခဲ့သော ရှန်ထျန်းဟယ်ပင် ဖြစ်သည်။

တောက်ပသော လမင်းကြီးအတွင်းမှလည်း အမျိုးသမီးတစ်ဦး၏ ပုံရိပ် ပေါ်ထွက်လာ သည်။ ထိုအမျိုးသမီးသည် အေးစက်သော လက်ရှည်ဝတ်ရုံကို ဝတ်ဆင်ထားပြီး၊ သူမ၏ မျက်လုံးများမှာ လဆန်းပိုင်းကဲ့သို့ ဖြစ်နေကာ အေးစက်မှု၊ ဂရုမစိုက်မှုနှင့် အထီးကျန်မှု အားလုံးကို ထိုမျက်လုံးများထဲတွင် စုစည်းထားသကဲ့သို့ပင်။

ထိုအမျိုးသမီးကို ကြည့်ရသည်မှာ လမင်းကြီး၏ လူသားအသွင် ဖန်ဆင်းထားမှုကို မြင်တွေ့နေရသကဲ့သို့ ဖြစ်၏။

ဤတည်ရှိမှု နှစ်ဦးမှာ နေနှင့် လ၏ အထက်တွင် နေထိုင်ကြသော စွမ်းအားကြီး တည်ရှိမူ များ ဖြစ်ကြသည်။ သူတို့သည် အလယ်ခေတ်ကတည်းက တည်ရှိခဲ့ကြသူများဖြစ်ပြီး ကိုယ်ပိုင် ဂူဗိမာန်များကို ဖန်တီးထားကြသူများ ဖြစ်သည်။ သူတို့သည် ပြင်ပကမ္ဘာနှင့် မည်သည့်အခါမှ အဆက်အသွယ် မလုပ်ခဲ့ကြဘဲ ကျင့်ကြံနေကြသည့် 'ဧကရာဇ်ရှန်' နှင့် 'ဧကရီယင်' တို့ ဖြစ်ကြသည်။

ဧကရာဇ်ရှန်နှင့် ဧကရီယင်တို့ ဆင်းသက်လာသောအခါ၊ သူတို့က ဟုန်ယွိကို ရင်ဆိုင်လျက် လက်ဝါးများဖြင့် တိုက်ခိုက်လိုက်ကြသည်။

"နေလ ဒီရေလှိုင်းပညာရပ်"

ဟုန်ယွိ၏ ခန္ဓာကိုယ်မှာ လှုပ်ရှားသွားပြီး၊ အလွန်ပင် သိပ်သည်းထားသော နေနှင့် လ၏ ဒီရေလှိုင်းများ ထိုလက်ဝါးချက်မှ တိုးဝင်လာပြီး သူ့ကို ထပ်မံ ပတ်ပတ်လည် ဝိုင်းရံသွား သည်ကို မြင်လိုက်ရ၏။

"ဒီကျွမ်းကျင်သူ နှစ်ဦးစလုံးက 'ကိုးကြိမ်မြောက် မိုးကြိုးကပ်ဘေး' အဆင့်မှာ ရှိနေကြတာ ပဲ"

'နေလဒီရေလှိုင်း' ဟူသော ကြီးကျယ်လှသည့် တာအိုပညာကို ရင်ဆိုင်ရသော်လည်း ဟုန်ယွိ၏ ခန္ဓာကိုယ်မှာ ထပ်မံ လျှပ်တပြက် လှုပ်ရှားသွားပြီး အရိပ်ပေါင်း ထောင်ချီ ပေါ်ထွက်လာသည်။ အရိပ်တိုင်းက လက်နှစ်ဖက်လုံးကို ဆန့်ထုတ်ကာ 'နေလ ဒီရေလှိုင်း' ကို ဆွဲဖြဲပစ်လိုက်ပြီး ၎င်းကို ဆန့်ကျင်လျက် ရှေ့သို့ တိုးဝင်သွားတော့သည်။

"ဘယ်ကလာတဲ့ အရိုင်းစိုင်း လူယောင်ဆောင် ဧကရာဇ်တွေလဲ... နေနဲ့ လကို အပိုင်စီးပြီး ကိုယ့်ကိုယ်ကိုယ် အထွတ်အထိပ် ဧကရာဇ်တွေလို့ ခေါ်ရဲသေးတယ်” ဟုန်ယွိက နေလ ဒီရေလှိုင်းကို ဆန့်ကျင်ကာ ရွေ့လျားသွားစဉ်၊ ထိုအရိပ်ပေါင်း သောင်းချီမှာ ပြန်လည် စုစည်းသွားခဲ့ပြီး သူ၏ လက်နှစ်ဖက်မှာ ဧကရာဇ်ရှန်နှင့် ဧကရီယင်တို့ဆီ လှမ်းဖမ်းကာ ပြင်းထန်စွာ ရိုက်နှက်လိုက်သည်။

"သေချင်နေတာပဲ"

ဟုန်ယွိက 'နေလ ဒီရေလှိုင်း' ကို ဖြတ်ကျော်လာသည်ကို မြင်လိုက်ရစဉ် ဧကရာဇ်ရှန်က အေးစက်စွာ ပြောလိုက်ပြီး၊ သူ၏ 'နေနတ်ဘုရားနန်းတော်' မှာ ရုတ်တရက် အရှိန်မြင့် တက်လာကာ ဟုန်ယွိထံသို့ ဝင်တိုက်လိုက်တော့သည်။

"ဘယ်သူ သေမလဲဆိုတာ ကြည့်ကြသေးတာပေါ့"

ဟုန်ယွိက အသက်ကို ပြင်းပြင်းရှူထုတ်လိုက်ရာ အဝေးရှိ ကြယ်စင်စုကြီးပင် ထိုအသက်ရူ လေကြောင့် လှုပ်ခါသွားသကဲ့သို့ ဖြစ်သွားရသည်။ တစ်ချိန်တည်းမှာပင် သူ၏ လက်ဝါး အတွင်း၌ မှော်သင်္ကေတ သန်းပေါင်း ၄၈၀ ပေါ်ထွက်လာပြီး နေနတ်ဘုရား နန်းတော်ကို လက်ဝါးတစ်ချက်ဖြင့် ပြင်းထန်စွာ ရိုက်ချလိုက်လေသည်။

ဘုန်း…

နေနတ်ဘုရား နန်းတော် တစ်ခုလုံးမှာ လက်ဝါးတစ်ချက်တည်းနှင့် အမှန်တကယ်ပင် အက်ကွဲသွားပြီး စတင် ပြိုလဲပျက်စီးသွားလေတော့သည်။