အခန်း ၂၉၉

အခန်း (၂၉၉) ဒီလူ ရူးနေတာလား... ဝက်ဝံညိုကြီးဆီကို တိုက်ခိုက်ဖို့ ပြေးသွားတယ်ပေါ့

[ဝက်ဝံပေါက်လေးက မြောင်းထဲ ပြုတ်ကျသွားတာလား]

[သနားစရာလေးပါလား]

[သူကတော့ သနားစရာလေးပေါ့... ပြဿနာက မိခင်ဝက်ဝံမကြီးက ကြောက်စရာ ကောင်းနေတာလေ]

[ဘယ်လိုလုပ်မလဲ... ကယ်မှာလား... မကယ်ဘူးလား]

တိုက်ရိုက်ထုတ်လွှင့်မှု မျက်နှာပြင်ပေါ်တွင် အင်တာနက်သုံးစွဲသူများက ပွက်လောညံစွာ ဆွေးနွေးနေကြသည်။ တောနက်ထဲတွင် ဖြစ်ပေါ်နေသော အခြေအနေများက အားလုံး၏ ခန့်မှန်းချက်များကို လုံးဝ ကျော်လွန်သွားခဲ့ပြီ ဖြစ်သည်။

ရွှီယန်က ဘေးမှနေ၍ အကဲခတ်နေသည်။

'ဒီတာဝန်က တကယ်ကို အသက်အန္တရာယ် ရှိလောက်တယ်'

ဆုလာဘ်က ကောင်းမွန်သော်လည်း မိခင်ဝက်ဝံမကြီးက ဘေးတွင် ရှိနေသဖြင့် ကိစ္စက ဖြေရှင်းရန် တကယ် မလွယ်ကူလှပေ။

လတ်တလော အတည်ပြုနိုင်သည်မှာ မြောင်းက အတော်လေး ကျဉ်းမြောင်းသဖြင့် မိခင်ဝက်ဝံမကြီး ဆင်းမရနိုင်ခြင်းပင် ဖြစ်သည်။

မြောင်းထဲသို့သာ ခုန်ဆင်းနိုင်ပါက ဝက်ဝံပေါက်လေးကို ကယ်တင်နိုင်မည် ဖြစ်သည်။

ရွှီယန်က အမြဲတမ်း သနားကြင်နာတတ်သူ ဖြစ်ရာ တာဝန် မရှိလျှင်တောင်မှ ဤကဲ့သို့သော အခြေအနေမျိုးတွင် ကူညီနိုင်သလောက် ကူညီပေးမည်သာ ဖြစ်သည်။ မည်သို့ပင်ဆိုစေ သူသာ မကူညီပါက ဝက်ဝံပေါက်လေးမှာ အန္တရာယ်နှင့် ကြုံတွေ့ရနိုင်ခြေ အလွန် များပြားပေသည်။

သစ်တောထဲတွင် ဤကဲ့သို့သော အဖြစ်အပျက်မျိုးက အလွန် များပြားလှသည်။

အရွယ်ရောက်ပြီးသော တိရစ္ဆာန်များ ပြုလုပ်နိုင်သည့် အရာများစွာကို တိရစ္ဆာန် ပေါက်စလေးများက ပြုလုပ်ရန် အလွန် ခက်ခဲကြသည်။

ယခင်က တောဘဲမကြီး တစ်ကောင်က ဘဲပေါက်လေး တစ်အုပ်ကို ခေါ်ဆောင်ကာ မြို့တွင်း ရေမြောင်းပေါ်မှ ဖြတ်သန်းသွားစဉ် ဘဲပေါက်လေးများ အားလုံး ရေမြောင်းထဲ ပြုတ်ကျသွားခဲ့သည့် အဖြစ်အပျက်မျိုးပင် ရှိခဲ့ဖူးသည်။

စေတနာရှင်များ၏ ကူညီမှုဖြင့်သာ ဘဲပေါက်လေးများကို ပြန်လည် ကယ်တင်နိုင်ခဲ့ခြင်း ဖြစ်သည်။

ရွှီယန်က ဤမြင်ကွင်းကို ကြည့်ကာ ပြောလိုက်သည်။

"ဝက်ဝံပေါက်လေးက မြောင်းထဲ ပြုတ်ကျသွားတာ... မကယ်လို့တော့ မဖြစ်ဘူး... မဟုတ်ရင် ကောင်လေးက အသက်အန္တရာယ် ရှိနိုင်တယ်"

"တကယ်တော့ တောရိုင်း တိရစ္ဆာန် ပေါက်စလေးတွေ အများစုက အသက်ရှင်နိုင်ခြေ သိပ်မမြင့်ကြဘူး... အကြောင်းအမျိုးမျိုးကြောင့် သေဆုံးသွားနိုင်ခြေက အလွန် များတယ်လေ... ဒါကလည်း မတတ်နိုင်တဲ့ ကိစ္စ တစ်ခုပါပဲ"

"ဒါပေမဲ့..."

ရွှီယန်က မိခင်ဝက်ဝံမကြီးကို ကြည့်ကာ မျက်နှာထားက အနည်းငယ် တင်းမာသွားသည်။

"ဒါပေမဲ့ ကလေးပါတဲ့ မိခင်ဝက်ဝံမ က အန္တရာယ် အရှိဆုံးပဲ... အနားကို ကပ်သွားတာနဲ့ မိခင်ဝက်ဝံမ က ချက်ချင်း ဒေါသထွက်လာမှာ... လူတွေက သူ့ကလေးကို အန္တရာယ် ပေးမယ်လို့ ထင်သွားမှာလေ... ကျွန်တော်လည်း ဒီကောင်ကြီးကို မယှဉ်နိုင်ဘူး"

"တကယ်လို့ သွားကယ်မယ်ဆိုရင်တော့ အသက်အန္တရာယ်ကို အရင်းခံရမှာပဲ"

ရွှီယန်က ထုတ်ပြောလိုက်သည်။

တကယ်တမ်းတွင် ရွှီယန်၏ စိတ်ထဲ၌ ကယ်ဆယ်ရေး အစီအစဉ်ကို ချမှတ်ပြီးဖြစ်နေသည်။ သို့သော် ဤသို့ စကားအနည်းငယ် ပြောလိုက်ခြင်းဖြင့် မိမိကိုယ်ကို ပိုမို အထင်ကြီးစရာ ကောင်းအောင် ဖန်တီးလိုက်ခြင်း ဖြစ်၏။

စကားပြော အနုပညာ တစ်ခုပင်။

မျှော်လင့်ထားသည့်အတိုင်းပင် သူ ဤသို့ ပြောလိုက်သည်နှင့် အင်တာနက်သုံးစွဲသူများက ပို၍ပင် စိုးရိမ်လာကြတော့သည်။

[အန္တရာယ်တော့ ရှိတယ်... ဝက်ဝံမကြီး လက်သည်းနဲ့ တစ်ချက် အခြစ်ခံလိုက်ရရင် ကိစ္စပြတ်သွားနိုင်တယ်]

[ဒါကို ဘယ်သူက သွားကယ်ရဲမှာလဲ]

[သနားတတ်ပေမယ့်လည်း လုံခြုံရေးကို အရင် ဦးစားပေးရမှာပေါ့... အသက်အန္တရာယ် အရင်းခံပြီး ကယ်ဖို့က မတန်ပါဘူး]

[လောင်ရွှီ... နည်းလမ်းလေး ဘာလေး စဉ်းစားကြည့်ပါဦး... မင်းကိုပဲ အားကိုးနေရတာ]

မှတ်ချက်များက အဆက်မပြတ် ထွက်ပေါ်လာတော့သည်။

အားလုံးက ဤမြင်ကွင်းက မည်မျှ အန္တရာယ် များကြောင်းကို သိမြင်နေကြသည်။

အရွယ်ရောက်ပြီးသော ဝက်ဝံညို များသည် ခန္ဓာကိုယ် အလွန် ကြီးမားပြီး အရှေ့မြောက် ကျားများနှင့် သတ်ပုတ်ရာတွင်ပင် နောက်မတွန့်တတ်ချေ။ အလွန် ကြမ်းတမ်းလှပေသည်။

ဒေါသထွက်နေသော ဝက်ဝံညို ကို လက်ဗလာဖြင့် ဖြေရှင်းရန်အတွက် တိုင်ဆန် ငါးယောက် ပေါင်းလျှင်တောင် နိုင်မည် မဟုတ်ချေ။ ဝက်ဝံညို ၏ လက်သည်းများ အရှေ့တွင် လူသားများ၏ ကာကွယ်နိုင်စွမ်းက အလွန် အားနည်းလွန်းလှပေသည်။

ထိုအချိန်မှာပင် ရွှီယန်၏ WeChat အသံ ထွက်ပေါ်လာသဖြင့် သေချာ ကြည့်လိုက်ရာ ဝမ်ကျန်းဟိုင် ထံမှ ဖြစ်နေကြောင်း တွေ့လိုက်ရသည်။

ရွှီယန်က ဖုန်းကို ကိုင်လိုက်သည်နှင့် ဝမ်ကျန်းဟိုင်၏ အသံကို ကြားလိုက်ရသည်။

"ရွှီယန်... ငါ မင်းရဲ့ လိုက်ဖ် ကို ကြည့်နေတယ်... ဝက်ဝံပေါက်လေး မြောင်းထဲ ကျသွားတာကို တွေ့လိုက်လို့ ငါ ကယ်ဆယ်ရေး အဖွဲ့ကို ဆက်သွယ်လိုက်ပါ့မယ်"

"အချိန်ကျရင် အဖွဲ့တစ်ဖွဲ့ ဝင်သွားပြီး ဝက်ဝံညိုကြီးကို အရင် မေ့ဆေးပစ်တာ ဒါမှမဟုတ် ခြောက်လှန့် မောင်းထုတ်တာတွေ လုပ်ပြီးမှ ဝက်ဝံပေါက်လေးကို ကယ်ပေးလိမ့်မယ်"

"တာ့ရှင်းအန်းလင်း မှာလည်း သီးသန့် ကယ်ဆယ်ရေး အဖွဲ့ ရှိတယ်လေ... ဒါပေမဲ့ အချိန်တော့ နည်းနည်း ယူရလိမ့်မယ်... ပြင်ဆင်ရမယ့် အပိုင်းတွေ အများကြီး ရှိလို့ပါ"

ဝမ်ကျန်းဟိုင်၏ စကားကို ကြားသောအခါ ရွှီယန်က ပြုံး၍ ပြန်ပြောလိုက်သည်။

"ရပါတယ်... အရမ်း အလုပ်ရှုပ်တယ်ဗျာ... မေ့ဆေးတွေ ဘာတွေလည်း သုံးရဦးမယ်"

"ကျွန်တော့် ဘာသာ ကျွန်တော်ပဲ ကယ်ထုတ်လိုက်ပါ့မယ်... ဒါပဲနော်... ကျွန်တော် သွားတော့မယ်"

ရွှီယန်က ဖုန်းချလိုက်သည်။

သူက ခန္ဓာကိုယ် ပေါ်မှ ဝန်ထုပ်ဝန်ပိုးများကို လျှော့ချရန်အတွက် ကျောပိုးအိတ်ကို မြေကြီးပေါ်သို့ ချထားလိုက်သည်။ ထို့နောက် မလှမ်းမကမ်းရှိ ဝက်ဝံညိုကြီး ကို ကြည့်ကာ ပြောလိုက်သည်။

"ကျွန်တော် ဝက်ဝံပေါက်လေးကို သွားကယ်ဖို့ ပြင်လိုက်ပြီ... ကျွန်တော့်ရဲ့ အမြန်နှုန်းနဲ့ မြောင်းထဲကို ခုန်ဆင်းသွားရင် ဝက်ဝံညိုကြီးက ကျွန်တော့်ကို မိမှာ မဟုတ်ဘူး"

"ကျွန်တော် ဝက်ဝံပေါက်လေးကို ကယ်ထုတ်ပြီးရင် ဝက်ဝံညိုကြီး လည်း ထွက်သွားလောက်ပါပြီ"

"တကယ်လို့ သူက ထွက်မသွားဘူး ဆိုရင်တော့ ကယ်ဆယ်ရေး အဖွဲ့ကို ကျွန်တော့်ကို လာကယ်ခိုင်းရမှာပေါ့... အဲဒါက ပိုလွယ်တယ်လေ... အနည်းဆုံးတော့ မေ့ဆေး သုံးစရာ မလိုတော့ဘဲ ဝက်ဝံညို ကို ခြောက်လှန့် မောင်းထုတ်လိုက်ရုံပဲ"

ရွှီယန်က ကိုယ်လက်လှုပ်ရှားမှုများကို စတင် ပြုလုပ်နေလိုက်သည်။

သူက ဦးခေါင်းကို အရင် လှုပ်ရှားလိုက်ပြီးနောက် ပခုံးများကို လှုပ်ရှားကာ တင်ပါးများကို ယိမ်းခါ၍ ခြေထောက် ကြွက်သားများကို ဆွဲဆန့်နေလိုက်သည်။

တိုက်ရိုက်ထုတ်လွှင့်မှုထဲတွင် လူအရေအတွက်က ၁ သိန်းကျော် ရှိနေပြီ ဖြစ်သည်။ အားလုံးက ရွှီယန် ယိမ်းခါနေသော တင်ပါးများကို ကြည့်ရင်း မျက်နှာပေါ်တွင် အလွန် အံ့ဩနေသည့် အမူအရာများ အပြည့်ဖြစ်နေကြသည်။

'သူ ဘာလုပ်မယ် ပြောလိုက်တာလဲ'

'ဝက်ဝံပေါက်လေးကို ကယ်ဖို့ ပြေးဝင်သွားမယ် ဟုတ်လား'

'လခွမ်း... တကယ် အသက်ကို မနှမြောတော့တာလား'

အားလုံးက သူ အလွန် မိုက်ရူးရဲဆန်ကြောင်း သိထားသော်လည်း ဤမျှလောက် မိုက်ရူးရဲဆန်လိမ့်မည်ဟုတော့ မထင်ထားခဲ့ကြချေ။

မှတ်ချက်များက ချက်ချင်းပင် စည်ကားလာတော့သည်။

[ငါက လွီပု ကိုပဲ ကမ္ဘာပေါ်မှာ ပြိုင်ဘက်ကင်းတယ် ထင်နေတာ... သူ့ထက်တောင် ပိုကြမ်းတဲ့သူ ရှိနေသေးတယ်ပဲ... ဒါ ဘယ်သူ့ရဲ့ တပည့်လဲကွ]

[ငါကတော့ ချန်ပိုင်တောင်တန်း ရဲ့ ရွှီကျစ်လုံ ပဲကွ]

[လောင်ရွှီ ရဲ့ သေမယ့် လမ်းကို ရှာတဲ့ အပြုအမူ နောက်တစ်ခု ထပ်တိုးလာပြန်ပြီ]

[ဟင်... သူက အမြဲတမ်း ဒီလိုပဲ သတ္တိကောင်းနေတာလား]

တိုက်ရိုက်ထုတ်လွှင့်မှု ကြည့်ရသည်မှာ ပျော်စရာ မြင်ကွင်းများကို ကြည့်ရခြင်းကို နှစ်သက်သောကြောင့်ပင်။ ရွှီယန်၏ တိုက်ရိုက်ထုတ်လွှင့်မှုများက ပျော်စရာ ကောင်းရုံသာမက စိတ်လှုပ်ရှားမှုများဖြင့်လည်း ပြည့်နှက်နေပေသည်။

မိခင်ဝက်ဝံမကြီးက မိမိ၏ ကလေး အန္တရာယ် ရှိနေမည်ကို စိုးရိမ်နေချိန်တွင် လူတစ်ယောက်က ပြေးဝင်သွားပါက မိခင်ဝက်ဝံမကြီး ဒေါသ မထွက်လျှင်သာ ထူးဆန်းနေမည် ဖြစ်၏။

သို့သော် ရွှီယန်က အကွာအဝေးကို တွက်ချက်ထားပြီး ဖြစ်သည်။

သူ ပြေးသွားပါက မိခင်ဝက်ဝံမကြီး အနေဖြင့် တိုက်ခိုက်ရန် အချိန်မီမည် မဟုတ်ချေ။

ပြောသည့်အတိုင်း လုပ်မည်။

ရွှီယန်က အင်တာနက်သုံးစွဲသူများကို ပြောလိုက်သည်။

"ကဲ... စထွက်ပြီနော်"

စကားဆုံးသည်နှင့် အင်တာနက်သုံးစွဲသူများ စိတ်ပိုင်းဆိုင်ရာ ပြင်ဆင်ချိန်ပင် မရလိုက်ဘဲ ရွှီယန်က အစွမ်းကုန် ပြေးလွှားသွားတော့သည်။

သူ၏ အမြန်နှုန်းက လေပြေ တစ်ခုကဲ့သို့ အလွန် မြန်ဆန်လှပေသည်။

အင်တာနက်သုံးစွဲသူများက ရွှီယန်သည် ဝက်ဝံညို ရှိရာဘက်သို့ အလျင်အမြန် ပြေးသွားသည်ကို တွေ့လိုက်ရသည်။

အားလုံးမှာ အံ့ဩလွန်း၍ ပါးစပ် အဟောင်းသား ဖြစ်သွားကြပြီး ဖုန်းရှေ့တွင် ကြောင်အမ်းအမ်း ဖြစ်သွားကြတော့သည်။

'ဒီလူ... ရူးများသွားပြီလား'

'Delivery ပို့တာတောင် ဒီလောက် အမြန် မပို့ဘူးလေ'

'ဝက်ဝံညိုကြီးဆီကို တိုက်ခိုက်ဖို့ ပြေးသွားတယ်ပေါ့... ခြေနှစ်ချောင်း သတ္တဝါတွေရဲ့ ဂုဏ်သိက္ခာအတွက်လား'

ကမ္ဘာကြီးက အလွန် ကျယ်ဝန်းလှရာ ထူးဆန်းသော အရာများက နေရာတိုင်းတွင် ရှိနေပေသည်။

ရွှီယန်က မြောင်းရှိရာဘက်သို့ တောက်လျှောက် ပြေးသွားခဲ့သည်။

သူ၏ သတ္တိကလည်း အတော်လေး ကြီးမားလှပေသည်။

တကယ်တမ်းတွင် ရွှီယန်က နောက်ဆုတ်ရန် လမ်းကြောင်းကိုလည်း စဉ်းစားထားပြီး ဖြစ်သည်။ အကယ်၍ မမျှော်လင့်ထားသော ကိစ္စများ ဖြစ်ပေါ်လာပါက နောက်သို့ ပြန်ပြေးပြီး သစ်ပင်ပေါ်တက်ကာ သစ်ကိုင်းပေါ်တွင် ခိုအောင်းနေရန် ဖြစ်သည်။ ထိုသို့ဆိုလျှင် အတော်လေး ဘေးကင်းနိုင်ပေသည်။

ထိုအချိန်တွင် မိခင်ဝက်ဝံမကြီး လည်း ရွှီယန်ကို သတိထားမိသွားသည်။

၎င်းက ကလေး ပြုတ်ကျသွားသဖြင့် စိတ်ပူနေချိန်တွင် ရုတ်တရက် ထွက်ပေါ်လာသော အသံကြောင့် လန့်ဖျပ်သွားပြီး နောက်သို့ နှစ်လှမ်းခန့် ဆုတ်သွားခဲ့သည်။

ဝက်ဝံညိုကြီးပင် ရွှီယန်၏ အရှိန်အဝါကြောင့် လန့်သွားခဲ့သည်ဆိုပါက ဤအပြုအမူက မည်မျှ ကြောက်စရာ ကောင်းကြောင်းကို ခန့်မှန်းနိုင်ပေသည်။

ထို့နောက် ဝက်ဝံညိုကြီးက ရွှီယန်သည် ဝက်ဝံပေါက်လေး အနားသို့ ချဉ်းကပ်သွားသည်ကို မြင်သောအခါ သတိထားသည့် အနေအထားနှင့် တိုက်ခိုက်မည့် အနေအထားများကို စတင် ပြင်ဆင်နေတော့သည်။

သို့သော် ကံကောင်းသည်မှာ ၎င်းက အရင်စတင် မတိုက်ခိုက်ဘဲ ရွှီယန်ဆီသို့ ပြေးမဝင်လာခဲ့ခြင်းပင်။ ဤသည်က ရွှီယန်အတွက် အခွင့်အရေး ရသွားစေခဲ့သည်။

ရွှီယန်က မြောင်းကို အရှေ့တွင် တွေ့လိုက်ရသဖြင့် ပေါ့ပေါ့ပါးပါး ခုန်ချလိုက်သည်။

မြောင်း၏ အကျယ်က ၁ မီတာခန့် ရှိသည်။

လူသားများ အနေဖြင့် အထဲတွင် သွားလာရန်မှာ ထင်သလောက် မခက်ခဲလှချေ။

သူ မြောင်းထဲသို့ ရောက်သွားသည်နှင့် ဒရုန်းက ကောင်းကင်သို့ ချက်ချင်း ပျံတက်သွားပြီး အောက်ဘက်ရှိ မြင်ကွင်းများကို ရိုက်ကူးနေတော့သည်။

အင်တာနက်သုံးစွဲသူများက ရွှီယန် တကယ်ကြီး ဆင်းသွားသည်ကို မြင်သောအခါ ပို၍ပင် အံ့ဩသွားကြတော့သည်။

[အစ်ကိုယန်... ကိုယန်... အရမ်းမိုက်တာပဲ]

[အခု ထိပ်တန်း ဖြစ်နေတာ မဆန်းပါဘူး... အသက်ကိုတောင် ရင်းပြီး လုပ်နေတာကိုး]

[လုပ်ရကိုင်ရတာ တော်တော်လေး လွယ်ကူနေတဲ့ ပုံစံပဲ]

[အရမ်း လေးစားသွားပြီ... တကယ် အစွမ်းထက်တာပဲ]

[၆၆၆၆]

မှတ်ချက်များ အားလုံးတွင် '၆၆၆၆' နှင့် 'အမိုက်စား' ဟူသော စကားလုံးများဖြင့် ပြည့်နှက်နေတော့သည်။

အားလုံးက လုံးဝ အရှုံးပေးသွားကြပြီ ဖြစ်သည်။ ဤကဲ့သို့သော ကြမ်းတမ်းသည့် အပြုအမူမျိုးကို တကယ့် အရည်အချင်း မရှိပါက တကယ်ကို လုပ်နိုင်မည် မဟုတ်ပေ။

ရွှီယန်က မြောင်းထဲသို့ ဝင်သွားပြီး အရှေ့ဘက်ရှိ ဝက်ဝံပေါက်လေးကို မြင်သောအခါ အလျင်မလိုဘဲ ဖြည်းဖြည်းချင်း လျှောက်သွားလိုက်သည်။

ဝက်ဝံပေါက်လေး၏ သတ္တိက အလွန် နည်းပါးလှပေသည်။ ရွှီယန် ချဉ်းကပ်လာသည်ကို မြင်သောအခါ ချက်ချင်း နောက်သို့ ပြေးတော့သည်။

သို့သော် အနောက်ဘက်တွင် လမ်းပိတ်နေပြီး ထွက်ပေါက် မရှိသဖြင့် ဝက်ဝံပေါက်လေးက ရွှီယန်ကို ကျောပေးကာ အပေါ်သို့ တက်နိုင်ရန် အစွမ်းကုန် ကြိုးစားနေတော့သည်။

မိခင်ဝက်ဝံမကြီး ကတော့ မြောင်းအပေါ်တွင် ရှိနေပြီး စိုးရိမ်တကြီးဖြင့် အဆက်မပြတ် ခုန်ပေါက်နေကာ ၎င်း၏ ကြီးမားသော လက်သည်းကြီး နှစ်ဖက်ဖြင့် မြေကြီးကို ပြင်းထန်စွာ ထုနှက်နေလေသည်။

ဤအချိန်တွင် ရွှီယန်သာ အပေါ်သို့ တက်သွားပါက မိခင်ဝက်ဝံမကြီးက သူ့ကို 'ရွှီယန် အသားမွှတ်' အဖြစ် သေချာပေါက် ဆွဲဖြဲပစ်မည်မှာ အသေအချာပင်။

ရွှီယန်က ဤမြင်ကွင်းကို မမြင်ရသော်လည်း အင်တာနက်သုံးစွဲသူများကမူ ရှင်းလင်းစွာ မြင်တွေ့နေရသည်။

အားလုံး၏ ရင်ထဲတွင် စကားလုံး တစ်ခွန်းသာ ပေါ်လာတော့သည်။

'လခွမ်း'

ဒေါသထွက်နေသော ဝက်ဝံညိုကြီးက ကြည့်ရသည်မှာ အလွန် ကြောက်စရာ ကောင်းလွန်းလှသည်။ ဘီလူး ရုပ်ရှင် ကားတစ်ကားကို ကြည့်နေရသည့် အလား ခံစားနေရသည်။

ဤမြင်ကွင်းက တိုက်ရိုက်ထုတ်လွှင့်မှု မျက်နှာပြင်ပေါ်တွင် ပေါ်ထွက်လာသောအခါ တိုက်ရိုက်ထုတ်လွှင့်မှုထဲရှိ လူအရေအတွက်က ချက်ချင်း အဆမတန် တိုးပွားလာတော့သည်။

၂ သိန်း၊ ၃ သိန်း၊ ၄ သိန်း...

ရွှီယန်က လူကြည့်အများဆုံး စာရင်းတွင် အလျင်အမြန် ပထမ နေရာသို့ ရောက်ရှိသွားခဲ့သည်။

တကယ်ကို ယုံမှားသံသယဖြစ်ဖွယ် မရှိသော ထိပ်တန်း လိုက်ဖ်လွှင့်သူ တစ်ဦး ဖြစ်သွားခဲ့ပြီ ဖြစ်၏။

ရွှီယန်က ဤအရာများကို မသိရှိသေးချေ။

သူက အထဲသို့ တောက်လျှောက် ဝင်သွားပြီး ထိတ်လန့်တကြား ဖြစ်နေသော ဝက်ဝံပေါက်လေး၏ အနောက်သို့ ရောက်သောအခါ လက်နှစ်ဖက်ဖြင့် ဝက်ဝံပေါက်လေး၏ ခါးကို ချက်ချင်း ဖမ်းဆုပ်လိုက်သည်။

ဝက်ဝံပေါက်လေးက အစွမ်းကုန် ရုန်းကန်နေပြီး 'အီးယား အီးယား' ဟူသော အသံများကိုလည်း ထုတ်လွှင့်နေသေးသည်။

ထိုအသံ၏ အဓိပ္ပာယ်ကို ရွှီယန် နားလည်လိုက်သည်။

'ခင်ဗျား ဒီကို မလာနဲ့'

'ခင်ဗျား ဒီကို မလာနဲ့နော်'

ဝက်ဝံ နှစ်ကောင်စလုံးက ရွှီယန်၏ ရည်ရွယ်ချက်ကို အထင်လွဲနေကြသည်မှာ သိသာလှပေသည်။

မည်သို့ပင်ဆိုစေ တောရိုင်း တိရစ္ဆာန်များ ဖြစ်သဖြင့် မတတ်နိုင်ချေ။

ရွှီယန်က အစက ဝက်ဝံပေါက်လေးနှင့် အပြန်အလှန် ဆက်သွယ်မှုလေး ပြုလုပ်ချင်ခဲ့သော်လည်း အခြေအနေကို ကြည့်ရသည်မှာ ဆက်သွယ်၍ ရနိုင်တော့မည့် ပုံ မပေါ်တော့ချေ။

ထို့ကြောင့် ရွှီယန်က ဝက်ဝံပေါက်လေး၏ ချိုင်းအောက်မှ တိုက်ရိုက် ကိုင်မြှောက်လိုက်ပြီး အပေါ်သို့ တစ်ချက် ခုန်ကာ အားကုန်သုံး၍ အပေါ်သို့ ပစ်တင်လိုက်တော့သည်။

'သွားစမ်း... ပီကာဝက်ဝံလေး'

ဝက်ဝံပေါက်လေးသည် ရွှီယန်၏ ပစ်တင်မှုကြောင့် လေထဲတွင် တစ်ပတ်လည်သွားပြီး ခြေလေးချောင်း အပေါ်သို့ ထောင်ကာ မြောင်းအပေါ်ရှိ မြေပြင်ပေါ်သို့ ပြုတ်ကျသွားတော့သည်။

မိခင်ဝက်ဝံမကြီးမှာ အစက အနည်းငယ် ထိတ်လန့်နေခဲ့သော်လည်း မိမိ၏ သားလေး အပေါ်ရောက်လာသည်ကို မြင်သောအခါ ဝက်ဝံပေါက်လေး၏ အခြေအနေကို ကြည့်ရန် ချက်ချင်း ပြေးသွားတော့သည်။

ဝက်ဝံပေါက်လေးက တစ်ချက် လှိမ့်ကာ ထရပ်လိုက်ပြီး အခြေအနေ အားလုံး ကောင်းမွန်နေပေသည်။

မိခင်ဝက်ဝံမကြီးမှာ ဤအချိန်တွင် ထိတ်လန့်နေဆဲ အခြေအနေတွင် ရှိနေပြီး ၎င်းက ရွှီယန်ကို တစ်ချက် ဟိန်းဟောက်လိုက်ပြီးနောက် ဝက်ဝံပေါက်လေးကို ခေါ်ကာ ချက်ချင်း လှည့်ပြေးတော့သည်။

မိခင်ဝက်ဝံမကြီး စပြေးသည်နှင့် ဝက်ဝံပေါက်လေးကလည်း အတူတကွ လိုက်ပြေးလေသည်။ ဝက်ဝံ ကြီးတစ်ကောင်နှင့် ငယ်တစ်ကောင်တို့က တဖြည်းဖြည်း ဝေးကွာသွားကြပြီး သိပ်မကြာခင်မှာပင် သစ်တောထဲတွင် ပျောက်ကွယ်သွားကြတော့သည်။

ရွှီယန်က ဖုန်းကို ထုတ်ယူကာ ဒရုန်းမှ ရိုက်ကူးထားသော မြင်ကွင်းကို ကြည့်လိုက်သည်။ ဝက်ဝံညို နှစ်ကောင် အဝေးသို့ ရောက်သွားပြီဖြစ်ကြောင်း သေချာမှသာ ခြေနှစ်ဖက်ဖြင့် မြောင်းနံရံကို နင်းကာ ပေါ့ပေါ့ပါးပါး အပေါ်သို့ တက်လာခဲ့သည်။

နားထဲတွင် စနစ်၏ အသိပေးသံ ထွက်ပေါ်လာသည်။

[ရတနာရှာဖွေရေး တာဝန် ပြီးဆုံးပါပြီ... ဆုလာဘ် အဖြစ် လူကောင်းကတ် ၁ ကတ် ရရှိပြီး ဝက်ဝံပေါက်လေး ၏ ရင်းနှီးမှု ကိုလည်း ရရှိပါသည်]

[ဝက်ဝံပေါက်လေး ၏ ရင်းနှီးမှု - ကယ်ဆယ်ခြင်း ခံရသော ဝက်ဝံပေါက်လေးက ဇာတ်လိုက် အပေါ် ရင်းနှီးမှု ရှိမည် ဖြစ်ပြီး နောက်တစ်ကြိမ် ဇာတ်လိုက်နှင့် ပြန်တွေ့ပါကလည်း ကောင်းမွန်သော ဆက်ဆံရေးကို ဆက်လက် ထိန်းသိမ်းထားမည် ဖြစ်ကာ ထိုဆက်ဆံရေးက အမြဲတမ်း တည်တံ့နေမည် ဖြစ်ပါသည်]

အသိပေးသံကို ကြားသောအခါ ရွှီယန်လည်း ပြုံးလိုက်မိသည်။

ယခုအခါ ဝက်ဝံပေါက်လေးက အနည်းငယ် လန့်နေသော်လည်း နောင်တွင် ဤနေရာ၌ ထပ်မံ တွေ့ဆုံပါက ဝက်ဝံပေါက်လေးက သူ့ကို မှတ်မိနေမည် ဖြစ်သည်။

ဝက်ဝံပေါက်လေး ကြီးလာသည့်တိုင်အောင် ဖြစ်သည်။

ဤသို့ တွေးကြည့်လိုက်ပါက ရွှီယန်မှာ တာ့ရှင်းအန်းလင်း တွင်လည်း သူ့ကို အကာအကွယ်ပေးမည့် တပည့်လေး တစ်ကောင် ရှိနေပြီ ဖြစ်၏။

"အဆင်ပြေသွားပြီ"

ရွှီယန်က လက်ခုပ်တီးကာ တိုက်ရိုက်ထုတ်လွှင့်မှုထဲရှိ အင်တာနက်သုံးစွဲသူများကို ပြောလိုက်သည်။

မှတ်ချက်များက မိုးသည်းထန်စွာ ရွာသွန်းသကဲ့သို့ ဆက်တိုက် ဝင်ရောက်လာတော့သည်။

[အစ်ကိုယန်... အရမ်းမိုက်တယ်ကွာ]

[တကယ်ကို အစွမ်းထက်တာပဲ]

[အပြင်ထွက် လိုက်ဖ်လွှင့်တဲ့ နေရာမှာတော့ နံပါတ်တစ်ပဲ]

[ရှင်နဲ့ ကလေး ယူချင်လိုက်တာ]

[အရမ်း စိတ်လှုပ်ရှားဖို့ ကောင်းတာပဲ... ငါ လုံးဝ အရှုံးပေးသွားပြီ]

လူများက တိုက်ရိုက်ထုတ်လွှင့်မှုထဲတွင် ရူးသွပ်စွာ အော်ဟစ်နေကြသည်။

ရွှီယန်က ဖုန်းကို ထုတ်ယူကာ မှတ်ချက်များကို တစ်ချက် ကြည့်လိုက်သည်။

သူ၏ စိတ်ထားက အမြဲတမ်း တည်ငြိမ်နေသော်လည်း ဤမျှများပြားသော မှတ်ချက်များကို မြင်သောအခါ စိတ်ခံစားချက်ကလည်း ပိုမို ကောင်းမွန်လာခဲ့သည်။

"တော်တော်လေး စိတ်လှုပ်ရှားဖို့ ကောင်းသားပဲ"

သူက ချွေးတစ်စက်မျှ မထွက်ဘဲ ပေါ့ပေါ့ပါးပါး ပြုံးကာ ဤစကား တစ်ခွန်းကိုသာ ပြောလိုက်လေသည်။