အခန်း ၄၃၄

အခန်း ၄၃၄

ရဲချီယန်သည် လီဆက်၏ အနီးသို့ ကပ်ကာ အနံ့ခံကြည့်လိုက်ရာ ခပ်သင်းသင်း ရေချိုးဆပ်ပြာရနံ့လေးမှလွဲ၍ အခြား မည်သည့် အနံ့မျှ လုံးဝ မရှိနေချေ။

သူက အဲလစ်ဟု အမည်ရသော ဤနာမည်ကျော် စူပါစတားကို သံသယများ ပြည့်နှက်နေသည့် မျက်လုံးများဖြင့် စိုက်ကြည့်လိုက်လေ၏။

"အချိန် ဟုတ်လား၊ ရနံ့ ဟုတ်လား"

"အာ... မဟုတ်ပါဘူး၊ တကယ့် ရနံ့ကို ပြောတာ မဟုတ်ရပါဘူး။ ခံစားမှု တစ်ခုလို့ ပြောရင် ပိုမှန်လိမ့်မယ်။ ရှင့်ဘေးက မိန်းကလေးဆီမှာ အချိန်နဲ့ ပတ်သက်တဲ့ လက်နက်ကိရိယာ တစ်ခုခု ရှိနေရမယ်၊ အဲ့ဒါကြောင့်မို့လို့ ကျွန်မက..."

"အဲ့ဒီမှာတင် ရပ်လိုက်တော့ မိန်းကလေး အဲလစ်။ ခင်ဗျား တကယ် ဘာလုပ်ချင်နေတာလဲ"

လီဆက်က ရဲချီယန်၏ ဘေး၌ တိတ်ဆိတ်စွာ ရပ်နေပြီး သူမ၏ နောက်ဘက်ရှိ အချိန်စက်ယန္တရား လက်နက်ကိရိယာက အသံတိတ် ထွက်ပေါ်လာခဲ့ချေပြီ။ အရှည်မတူညီသော ဆူးချွန် သုံးချောင်းက သခင်ဖြစ်သူ၏ အမိန့်ပေးမှုနှင့်အတူ အဲလစ်ကို တိုက်ခိုက်ရန် အသင့် စောင့်ဆိုင်းနေကြ၏။

"ကျွန်... ကျွန်မ ပြောချင်တာက အဲ့ဒီနေ့က သီချင်းဆိုပွဲမှာ ကျွန်မနဲ့ ဘာရယ်လ်... အာ ကင်းခြေများတွေကို သုံးတဲ့ မိန်းမလေ... အဲ့ဒီမိန်းမနဲ့ ကျွန်မတို့ ပြောခဲ့တာတွေကို ရှင် ကြားခဲ့တယ် မဟုတ်လား"

"ခန့်မှန်းကြည့်လေ"

"ရှင်"

"ဒါပေမဲ့ ကျွန်တော် ကြားခဲ့တယ် ဆိုရင်တောင်မှ ဘာဖြစ်လဲ"

ရဲချီယန်သည် လက်ထဲမှ တစ်ဝက်တစ်ပျက် စားလက်စ ဘာဂါကို ချလိုက်ပြီး လက်ဖျောက် တစ်ချက် တီးလိုက်လေသည်။

ဖြောင်း...

【နတ်ဆိုး ကတ်ပြား · မာန】 နှင့် 【နတ်ဆိုး ကတ်ပြား · ဖြားယောင်းသွေးဆောင်ခြင်း】

နတ်ဆိုး၏ တီးတိုး စကားသံများက ဤနေရာလွတ်အတွင်း ပဲ့တင်ထပ် မြည်ဟည်းလာခဲ့၏။ 【နတ်ဆိုး ကတ်ပြား · မာန】 ၏ စွမ်းအားကြောင့် ဆိုင်ဝန်ထမ်းများမှာ အလိုအလျောက်ပင် အောက်သို့ မျက်လွှာချသွားကြလေတော့သည်။

သူ၏ နှုတ်ခမ်းထောင့်များ ခပ်ရေးရေး ကွေးတက်သွားသည်။

"အဘိုကာဒိုရဲ့ သစ္စာဖောက်၊ နာမည်ကျော် စူပါစတား မိန်းကလေး အဲလစ်"

အဲလစ်၏ မျက်နှာမှာ သေလူတစ်ယောက်ကဲ့သို့ ဖြူဆွတ်သွားချေပြီ။

"ကျွန်... ကျွန်မ..."

"စိတ်မပူပါနဲ့ မိန်းကလေး အဲလစ်"

"ပထမဆုံး ကျွန်တော့် မေးခွန်း အနည်းငယ်ကို အရင် ဖြေပေးပါ။ ကျန်တာတွေကို နောက်မှ ဖြည်းဖြည်းချင်း ဆွေးနွေးကြတာပေါ့"

အဲလစ်၏ မျက်လုံးများထဲမှ အလင်းရောင်တို့က တဖြည်းဖြည်း မှေးမှိန် ပျောက်ကွယ်သွား၏။ ဖြားယောင်းသွေးဆောင်ခြင်း အပေါ် သူမ၏ ခုခံနိုင်စွမ်းမှာ သာမန် ရထားမောင်းနှင်သူ အများစုထက်ပင် ပို၍ နိမ့်ကျနေချေသည်။

"ကောင်းပါပြီ..."

သူမ၏ ကိုယ်ပိုင် အသိစိတ် လွတ်ကင်းသွားသည့်အလား အသံမှာ လေးကန် နှေးကွေးနေပေသည်။

"ဟင်... ဒီလောက်တောင် ထိရောက်တာလား။ အိပ်မွေ့ချခံလိုက်ရသလိုပဲ... ထားလိုက်ပါတော့၊ အရင်ဆုံး မေးကြည့်တာပေါ့"

သူ အမှန်တကယ် သိချင်နေသောအရာမှာ တစ်ခုတည်းသာ ရှိ၏။

"အဲ့ဒီနေ့က သီချင်းဆိုပွဲမှာ ခင်ဗျားရဲ့ ပါရမီကို ပြောင်းပြန်လှန်ပစ်ခဲ့တဲ့ စွမ်းရည်က ဘာလဲ"

ပါရမီကို ပြောင်းပြန်လှန်ခြင်း။ အကယ်၍ ဤစွမ်းရည်ကိုသာ သူ လက်ဝယ် ရရှိနိုင်ခဲ့မည် ဆိုပါက...

သူ၏ အဆင့်မြင့် အသွင်ကူးပြောင်းခြင်းကို မိမိ၏ ကိုယ်ပိုင် ပစ္စည်းများအပေါ်မှာသာ သုံးစွဲရန် မလိုအပ်တော့ချေ။

"အဲ့ဒါက အဆင့် ၁၃ ပစ္စည်းတစ်ခုပါ။ ပါရမီ ပြောင်းပြန်လှန်ခြင်း လို့ ခေါ်ပြီး အဘိုကာဒိုရဲ့ ဘော့စ် ပိုင်ဆိုင်တဲ့ တစ်ခါသုံး သီးသန့် ပစ္စည်းတစ်ခု ဖြစ်ပါတယ်"

"ကျွန်မ အဘိုကာဒိုမှာ ရှိနေတုန်းက မြို့တော်တွေကို တိုက်ခိုက်ဖို့ သူတို့က ကျွန်မကို ပါရမီ ပြောင်းပြန်လှန်ခြင်းနဲ့ အသုံးချခဲ့ကြတာ။ အဲ့ဒါက ရထားမောင်းနှင်သူတွေကို ရင်ဆိုင် ဖြေရှင်းဖို့ သီးသန့် ဖန်တီးထားတဲ့ စွမ်းအားတစ်ခုပါ"

"ဒီပစ္စည်းက ခုနစ်ရက်မှာ တစ်ခါပဲ အသုံးပြုလို့ ရတယ်..."

အဲလစ်၏ ခန္ဓာကိုယ်မှာ တစ်ဆက်ဆက် တုန်ရီနေလေ၏။ သူမ၏ အသံကား ပို၍ပို၍ နှေးကွေးလာခဲ့သည်။ မည်သည့်အချိန်တွင်မဆို သတိလစ် မေ့မြောသွားတော့မည့်အလားပင်။

"အဆင့် ၁၃ ပစ္စည်းတဲ့လား။ ဒီလောက်တောင် ချို့ယွင်းချက် ကြီးမားနေတာ မဆန်းတော့ပါဘူး"

"တွေးကြည့်ရသလောက်တော့ ပါရမီစွမ်းရည်တွေအပေါ် အကျိုးသက်ရောက်မှု ရှိစေနိုင်တဲ့ အရာတွေက အဆင့်နိမ့်ပုံ မပေါ်ဘူးပဲ"

ကျိုးရှန်ချင်း၏ 【ကြယ်တာရာများအလွန်】 ကို ထည့်သွင်းထားသော အန်စာတုံးလေးသည်ပင် အဆင့် ၁၂ ရှိခဲ့သည် မဟုတ်ပါလော။

"အဘိုကာဒိုရဲ့ ရည်ရွယ်ချက်က ဘာလဲ"

ဤသည်မှာ ဒုတိယမြောက် မေးခွန်း ဖြစ်၏။ အင်ပါယာအမိန့်တော် အဖွဲ့အစည်းမှာ ကတ်ပြား အစီအစဉ်များအတွက် တည်ရှိနေခြင်း ဖြစ်ပြီး ၎င်း၏ အဖွဲ့ဝင်များ အားလုံးမှာ ကတ်ပြား အစီအစဉ် ပိုင်ရှင်များသာ ဖြစ်ကြသည်။

အဘိုကာဒိုကရော ဘယ်လိုများလဲ။ နေရာအနှံ့ ပျက်စီးဆုံးရှုံးမှုတွေ လိုက်လံ ဖန်တီးဖို့ သက်သက်ပဲလား။ နာမည်အသင့်အတင့် ရှိသော အဖွဲ့အစည်းတစ်ခုအနေဖြင့် ထိုသို့ လုပ်ဆောင်ခြင်းမှာ အနည်းငယ် အဆင့်အတန်း နိမ့်ကျလွန်းနေပေသည်။

အဲလစ်မှာ ပို၍ပင် ပြင်းထန်စွာ တုန်ရီလာခဲ့၏။ ဖြားယောင်းသွေးဆောင်ခြင်း ကဲ့သို့သော စွမ်းရည်များအပေါ် သူမ၌ မွေးရာပါ ထိတ်လန့် ကြောက်ရွံ့မှုမျိုး ရှိနေပုံရသည်။ ထို့အပြင် တစ်စုံတစ်ခုက သူမကို ဖြေဆိုခွင့် မပေးဘဲ ဟန့်တားနေသကဲ့သို့လည်း ဖြစ်နေချေ၏။

သို့သော်လည်း...

ဤသည်မှာ ဖြားယောင်းသွေးဆောင်ခြင်း ဖြစ်ပြီး နတ်ဆိုး၏ စွမ်းအား ဖြစ်ပေသည်။ အဲလစ်အနေဖြင့် ဤစွမ်းအားကို မည်သို့မျှ မခုခံနိုင်ချေ။ သူမကို ဟန့်တားနေသည့် အရာကလည်း ဤအရာကို မခုခံနိုင်ခဲ့ပေ။

အဘယ့်ကြောင့်ဆိုသော် ဤသည်မှာ ရဲချီယန် သိရှိလိုသည့် အရာ ဖြစ်သောကြောင့်ပင်။

"ပါ... ပါရမီ... ပါရမီစွမ်းရည်တွေအတွက်ပါ..."

"အဘိုကာဒိုရဲ့ အဖွဲ့ဝင်တွေ အားလုံးမှာ ပါရမီစွမ်းရည်တွေ ရှိကြတယ်"

"ပြီးတော့ အဖွဲ့အစည်းရဲ့ ဘော့စ် ပိုင်ဆိုင်ထားတဲ့ ပစ္စည်းတစ်ခု ရှိတယ်၊ အဲ့ဒါကလည်း... လည်း..."

"အဆင့် ၁၃ ပါပဲ"

"သူ သတ်ဖြတ် ဖမ်းဆီးလာတဲ့ ပါရမီရှင်တွေကို... သူက... အစားအစာတွေအဖြစ် ပြောင်းလဲပစ်လိုက်တာ။ သူသာ အဲ့ဒါတွေကို စားသုံးလိုက်ရင် သူတို့ရဲ့ ပါရမီ အကျိုးသက်ရောက်မှု ဆယ်ပုံတစ်ပုံကို ရရှိနိုင်တယ်..."

ရဲချီယန် မျက်မှောင် အနည်းငယ် ကြုတ်သွား၏။

"တခြားသူတွေရဲ့ ပါရမီတွေကို ဝါးမျိုနိုင်တဲ့ ပါရမီလား"

"အင်ပါယာအမိန့်တော် အဖွဲ့အစည်း၊ ကတ်ပြား အစီအစဉ်"

"အဘိုကာဒို၊ ပါရမီစွမ်းရည်..."

"အဓိပ္ပာယ်တော့ ရှိသားပဲ"

လူသားများ ဂိုဏ်းဂဏများ ဖွဲ့စည်းကြပြီ ဆိုလျှင် ရည်ရွယ်ချက် တစ်ခုခုတော့ မလွဲမသွေ ရှိရစမြဲ ဖြစ်သည်။ ပါရမီစွမ်းရည်များ၏ တည်ရှိမှုမှာ ကတ်ပြား အစီအစဉ်များလောက် ရှားပါးလှသည် မဟုတ်သော်ငြား... အလွန် သေးငယ်သော အစိတ်အပိုင်း တစ်ခုကမူ ကတ်ပြား အစီအစဉ်များထက်ပင် ပို၍ ထိတ်လန့်ဖွယ် ကောင်းလှ၏။ သူ၏အဆင့်မြင့် အသွင်ကူးပြောင်းခြင်းပင် ဖြစ်စေ၊ ကျောက်လင်၏ ကံကောင်းခြင်း တည်မြဲမှုပင် ဖြစ်စေ ထိုအချက်ကို သက်သေပြနေပေသည်။

ဤရှုထောင့်မှ ကြည့်မည် ဆိုပါက အင်ပါယာအမိန့်တော် အဖွဲ့အစည်းက အဘိုကာဒိုထက် အားနည်းနေသလော။

သေချာပေါက် မဟုတ်ပေ။

ရဲချီယန်အနေဖြင့် အခြားသူများ၏ အခြေအနေကို မသိသော်လည်း... ကတ်ပြား အစီအစဉ် ပိုင်ဆိုင်ထားသူ တစ်ယောက်က ပါရမီစွမ်းရည်ပါ ပိုင်ဆိုင်ခွင့် မရှိဘူးလို့ ဘယ်သူက ပြောထားလို့လဲ။

ထို့အပြင် ပါရမီစွမ်းရည် ပိုင်ဆိုင်ထားရုံဖြင့် သေချာပေါက် အစွမ်းထက်လာမည်ဟုလည်း မဆိုလိုနိုင်ချေ။ ထိုစဉ်က သူ၏ ပါရမီမှာ အမည်မသိ တည်ရှိမှု တစ်ခု၏ အတင်းအဓမ္မ ကြားဝင် စွက်ဖက်ခြင်းကို ခံခဲ့ရကြောင်း မမေ့သင့်ပေ။ သေရမည်ကို ကြောက်ရွံ့၍ ရပ်တန့်ပစ်မည့်အစား သူ၏ အရာအားလုံးကို ပုံအောကာ ကိုယ်တိုင် အဆင့်မြင့် အသွင်ကူးပြောင်းခြင်းကို ရွေးချယ်ခဲ့ပြီး နောက်ဆုံး အခိုက်အတန့်၌ အောင်မြင်မှု မရရှိခဲ့လျှင်လေ...

သူ၏ ပါရမီမှာ ထိုနေရာ၌ပင် ရပ်တန့်သွားမည် ဖြစ်ပြီး ရှေ့ဆက် ချီတက်ရန် အခွင့်အရေး ရရှိခဲ့မည် မဟုတ်ချေ။

"အဘိုကာဒို ဘော့စ်ရဲ့ ပါရမီက ဘာလဲ"

အဲလစ်၏ မျက်လုံးများဆီမှ သွေးမျက်ရည် တစ်ကြောင်း စီးကျလာခဲ့၏။ သူမကို စကားမပြောနိုင်အောင် ဟန့်တားနေသည့် စွမ်းအားမှာ ကန့်သတ်ချက်၏ အစွန်းဆုံးသို့ ရောက်ရှိနေပြီ ဖြစ်ပုံရသည်။ သို့တိုင်အောင် သူမက ဆက်လက် ဖြေဆိုခဲ့လေသည်။

"ကျွန်မ... မသိပါဘူး..."

ဘုတ်...

အဲလစ်သည် စားပွဲပေါ်သို့ ခွေကျသွားကာ သတိလစ် မေ့မြောသွားလေတော့၏။

ရဲချီယန်က သူမ၏ နှာခေါင်းနားသို့ လက်ညှိုးကို ကပ်ကြည့်လိုက်သည်။ သူမ အသက်ရှူနေဆဲပင်။

"ဖြားယောင်းသွေးဆောင်ခြင်းက ဒီလို အခြေအနေမျိုး ဖြစ်သွားစေတာ ဒါ ပထမဆုံးအကြိမ်ပဲ... မဟုတ်သေးဘူး၊ ဖြားယောင်းသွေးဆောင်ခြင်းနဲ့ သိပ်ပြီး သက်ဆိုင်ပုံ မရဘူး။ သူမက... ဒီလို စွမ်းရည်မျိုးကို ခံနိုင်ရည် မရှိတာများလား"

"ထားလိုက်ပါတော့၊ ဘာပဲဖြစ်ဖြစ် ဒီက အစားအသောက်တွေက သိပ်ကောင်းတာလည်း မဟုတ်ပါဘူး"

သူက ကျီးကန်းနတ်ဆိုးကို ဆင့်ခေါ်လိုက်ပြီး အဲလစ်ကို ထမ်းခိုင်းကာ သူ၏ နောက်မှ လိုက်ပါစေလျက် ဘာဂါဆိုင်ထဲမှ တန်းခနဲ ထွက်ခွာလာခဲ့သည်။ ဘာပဲဖြစ်ဖြစ် သူမက နာမည်ကျော် စူပါစတား တစ်ယောက် ဖြစ်နေသည် မဟုတ်ပါလော။ သွေးသံတရဲရဲဖြင့် ဒီနေရာမှာ ပစ်ထားခဲ့ရန်က အနည်းငယ်တော့ လွန်လွန်းနေပေလိမ့်မည်။

ရဲချီယန်သည် သူမကို သူ၏ သီးသန့် အခန်းလေးဆီသို့သာ ခေါ်ဆောင်လာခဲ့လိုက်၏။ သူမသည် သူ၏ မေးခွန်းများ အားလုံးကို အမှန်တကယ်ပင် ဖြေဆိုပေးခဲ့ပြီ ဖြစ်သည်။

ယခုမူ တန်ဖိုး ဈေးနှုန်းအကြောင်း ဆွေးနွေးရမည့် အချိန် ရောက်လာချေပြီ။ ဤကိစ္စကို သူ ဖွင့်ချ မပြောပြမိစေရန် ဤမိန်းမကို မည်သို့သော တန်ဖိုးမျိုး ပေးဆပ်ခိုင်းရမည်နည်း။

ဘာပဲဖြစ်ဖြစ် ဤနာမည်ကျော် စူပါစတားကို မေးခွန်းများသာ ဖြေခိုင်းမည်ဟု သူ ပြောခဲ့ခြင်း ဖြစ်၏။ သူမသည် အဘိုကာဒို၏ သစ္စာဖောက် ဖြစ်ကြောင်း ထုတ်ဖော် ပြောကြားမည် မဟုတ်ဟု သူ လုံးဝ ကတိမပေးခဲ့ချေ။

"ကိုယ့်ဆီကို တိုက်ရိုက် လာပြီး နွေးထွေးမှု လာပေးမယ့်သူ ရှိလိမ့်မယ်လို့ တကယ် မထင်ထားခဲ့မိဘူး။ ငါကလည်း ပိုက်ဆံ ပြတ်နေတာနဲ့ အတော်ပဲ။ အဆိုတော် တစ်ယောက် ဆိုတော့ သူမဆီမှာ တော်တော်လေး ချမ်းသာလောက်ပါတယ်လေ"

ရိုးရိုးသားသား ဆိုရလျှင်။ အဲလစ်ဟု အမည်ရသော ဤအမျိုးသမီးက သူ့ထံသို့ ကိုယ်တိုင် ကိုယ်ကျ လာရောက် ဆက်သွယ်ခြင်းသာ မရှိခဲ့လျှင်လေ... သူမသည် အဘိုကာဒို၏ သစ္စာဖောက် ဖြစ်ကြောင်းကို ဖွင့်ချရန် သူ လုံးဝ တွေးမိခဲ့မည် မဟုတ်ပေ။

အမှန်တော့ သူ ဤကိစ္စကို မေ့တောင် မေ့လုနီးပါး ဖြစ်နေခဲ့ပြီ ဖြစ်၏။ သို့သော်ငြား သူမက သူ့ဆီသို့ ကိုယ်တိုင် လာရောက် အပ်နှင်းခဲ့ချေပြီ။

"ဒါနဲ့ ခုနက အချိန်ရဲ့ ရနံ့ ဆိုတာ ဘာကြီးလဲ။ ငါ ခုနက မေးဖို့ မေ့သွားခဲ့သလိုပဲ..."

ရဲချီယန်က စကားအနည်းငယ်ကို တီးတိုး ရေရွတ်လိုက်ပြီး ကျီးကန်းနတ်ဆိုးက အရုပ်ကျိုးကျသလို ဆိုဖာပေါ်သို့ ပစ်တင်လိုက်သော အဲလစ်ကို ကြည့်ကာ နှုတ်ခမ်းကို တွန့်ကွေးလိုက်လေသည်။

"ငါသာ ဖြားယောင်းသွေးဆောင်ခြင်းကို ထပ်သုံးလိုက်ရင် သူမ သေလောက်တယ် မဟုတ်လား"

"တကယ့်ကို ပျော့ညံ့လွန်းတာပဲ..."

"ထားလိုက်ပါတော့၊ ဖြစ်လာမယ့် အတိုင်းပဲ ဖြစ်ပါစေလေ... သူမ သတိရလာတဲ့အထိ စောင့်တာပေါ့"

စစ်တလင်းအတွင်း၌မူ ထိပ်ဆုံး ၃၂ ဦး အဆင့်အတွက် သေရေးရှင်ရေး တိုက်ပွဲ ဆယ့်နှစ်ပွဲမှာ ပြီးစီးသွားခဲ့ချေပြီ။ ယခုကား ကျောက်လင်၏ အလှည့် ရောက်ရှိလာလေတော့၏။