အခန်း ၄၃၉

အခန်း ၄၃၉

အီဗ်၏ တိုက်ခိုက်မှုမှာ အလွန် ထိရောက်လှပေ၏။ ထာဝရ ဖြတ်တောက်သူ၏ ပိုင်းဖြတ်နိုင်စွမ်းက ကျုံမော့ကျင်း၏ အချိန် ခေါက်ချိုး ကာကွယ်မှုကို အပြည့်အဝ ချေဖျက် တန်ပြန်နိုင်ခဲ့ချေပြီ။

"ငါ ဒီနေရာကနေ ထွက်သွားမှ ဖြစ်မယ်..."

သူက သူ၏ တန့်ရပ်ခြင်း နယ်ပယ် အလုပ်မလုပ်တော့ခြင်းကို ရဲချီယန်၏ လွင့်မျောကြယ် သန့်စင်သော အမှတ်အသားကြောင့်ဟု ထင်မှတ် မှားယွင်းနေခဲ့သည်။

သို့သော်လည်း ဤသည်မှာ အမှန်တကယ်တော့ မှားယွင်းသော ခန့်မှန်းချက် တစ်ခုသာ ဖြစ်၏။ လွင့်မျောကြယ် သန့်စင်သော အမှတ်အသားမှာ ကာကွယ်ရေး သက်သက်အတွက်သာ ဖြစ်ပြီး အချိန် နှေးကွေးစေမှုကို ချေဖျက်နိုင်သည့် စွမ်းရည် လုံးဝ မရှိခဲ့ဖူးချေ။

အကယ်၍ လွင့်မျောကြယ် သန့်စင်သော အမှတ်အသားတွင် ထိုစွမ်းရည် မရှိပါက ဤတန့်ရပ်ခြင်း နယ်ပယ်က ရဲချီယန်အပေါ် အဘယ့်ကြောင့် အာနိသင် မပြရသနည်း။

သူသည် လေလယ်၌ ရပ်လျက် အီဗ်၏ ဖိအားပေး တိုက်ခိုက်မှုကြောင့် ဦးတည်ချက် တစ်ခုတည်းဆီသို့ အဆက်မပြတ် ထွက်ပြေးနေရသော ကျုံမော့ကျင်းကို တည်ငြိမ်စွာ စောင့်ကြည့်နေလေ၏။

တောက်... တောက်...

နာရီလက်တံ ရွေ့လျားသံက ဤနှေးကွေးနေသော အချိန်နယ်ပယ်အတွင်း ပဲ့တင်ထပ် မြည်ဟည်းလာခဲ့သည်။

ကျုံမော့ကျင်း တုံ့ပြန် လှုပ်ရှားနိုင်ခြင်း မရှိမီမှာပင် အဆပေါင်းများစွာ အရှိန်မြှင့်တင်ပြီး ဖြစ်သော သူ၏ ခန္ဓာကိုယ်ကြီးမှာ ရုတ်တရက် သူ၏ ထိန်းချုပ်မှုအောက်မှ လွတ်ကင်းကာ ဆက်လက် အရှိန်တက်လာခဲ့၏။

သူက နံရံတစ်ခုကို ဖောက်ထွင်း ကျရောက်သွားပြီး ဖုန်မှုန့်များကြားသို့ ပြုတ်ကျသွားတော့သည်။ သူ သတိမဝင်မီမှာပင် ဖုန်မှုန့် ပြာများကြားမှ စိတ်စွမ်းအား လှိုင်းဓားသွားတစ်ခု ပိုင်းဖြတ် ဝင်ရောက်လာခဲ့လေသည်။

"ဒုက္ခပဲ"

ကျုံမော့ကျင်းက အခြေအနေ မကောင်းမှန်း ရိပ်မိသွားကာ သူ၏ ပတ်ဝန်းကျင်ရှိ အချိန်ကို ချက်ချင်း နှေးကွေးစေလိုက်၏။

သူ၏ စိတ်ထင်အတိုင်းဆိုလျှင် ဤနေရာမှာ ထိုရွှေနီရောင် အတားအဆီး၏ အကွာအဝေး ပြင်ပသို့ ရောက်ရှိနေပြီ ဖြစ်ရာ တန့်ရပ်ခြင်း နယ်ပယ်မှာ ဆက်လက်၍ အာနိသင် ပျက်ပြယ်နေတော့မည် မဟုတ်ချေ။

သို့ရာတွင်...

【အချိန်စက်ယန္တရား လက်နက်ကိရိယာ】

【နာရီလက်တံ】

【အချိန် အရှိန်မြှင့်တင်ခြင်း】

တန့်ရပ်ခြင်း နယ်ပယ်၏ အချိန် နှေးကွေးမှုမှာ အရှိန်မြှင့်တင်ခြင်း၏ ချေဖျက်မှုကို ခံလိုက်ရလေပြီ။

စိတ်စွမ်းအား လှိုင်းဓားသွားက ၎င်း၏ မူလ အရှိန်အဟုန်အတိုင်း ကျုံမော့ကျင်း၏ ခန္ဓာကိုယ် အထက်ပိုင်းကို ဖြတ်သန်း ပိုင်းဖြတ်သွားတော့၏။

"အဟွတ်..."

သွေးတစ်လုတ် အန်ထွက်လာခဲ့သည်။

"ဒါက... အချိန် အရှိန်မြှင့်တင်ခြင်းလား"

နာကျင်မှုက ကျုံမော့ကျင်းကို မျှော်လင့်ချက် မမဲ့သွားစေခဲ့ချေ။ သူသည် ရာဇလှံတံကို အားပြုလျက် မတ်တပ် ရပ်နိုင်ရန် ရုန်းကန် ထရပ်လိုက်၏။

သန်မာ တောင့်တင်းသော သူ၏ လူလတ်ပိုင်း ခန္ဓာကိုယ်ကြီးမှာ တဖြည်းဖြည်း အိုမင်း ချည့်နဲ့လာခဲ့သည်။

သူက ဖုန်မှုန့်များကြားရှိ ပုံရိပ်ဆီသို့ စူးစိုက် ကြည့်လိုက်သည်။

လေညင်း တစ်ချက် တိုက်ခတ်သွားပြီး ဖုန်မှုန့်များ ငြိမ်သက်သွား၏။

ကောင်းကင်နယ်ပယ် စိတ်ကူးယဉ်လက်နက်ကို ကိုင်ဆောင်လျက် အချိန်စက်ယန္တရား လက်နက်ကိရိယာကို တပ်ဆင်ထားသော လီဆက်က အပြုံးလေးဖြင့် ထိုနေရာ၌ ရပ်နေချေသည်။

"အချိန်အမျိုးအစား စက်ယန္တရား သက်ရှိ တစ်ကောင်လား။ နတ်ဆိုး စက်ယန္တရား နဂါးလူသားပီပီ တကယ့်ကို ထူးခြားတာပဲ... ဒါကြောင့်ကိုး။ အဲ့ဒီ ရွှေနီရောင် ကာကွယ်ရေး အတားအဆီးက အစကတည်းက ကျွန်ုပ်ကို လှည့်စားဖို့ သုံးခဲ့တဲ့ ငါးမျှားစာ သက်သက်ပဲ ဖြစ်ရမယ်"

"ကျွန်ုပ် စောစောကတည်းက ရိပ်မိသင့်တာ... ဒါပေမဲ့ ကျွန်ုပ် လုံးဝ တွေးမထားခဲ့မိဘူး၊ အချိန်ရဲ့ အရှိန်အဝါကိုတောင် အာရုံမခံမိခဲ့ဘူးပေါ့လေ"

"ဒါ နတ်ဆိုး ကတ်ပြား · ဖြားယောင်းသွေးဆောင်ခြင်း ကြောင့်များလား"

ဖြောင်း... ဖြောင်း... ဖြောင်း...

ထိုအသံကား လက်ခုပ်တီးသံပင်။

"တုံ့ပြန်မှုတော့ တော်တော် မြန်သားပဲ။ ဉာဏ်ကောင်းပေမဲ့ နှမြောစရာ ကောင်းတာက နည်းနည်းတော့ မိုက်မဲနေသေးတာပဲ"

ရဲချီယန်သည် ပြတင်းပေါက်အနီး၌ ရပ်နေ၏။

သူ၏ နောက်ဘက်တွင်မူ အီဗ်နှင့် ကျီးကန်းနတ်ဆိုးတို့က ကျုံမော့ကျင်း ထွက်ပြေး လွတ်မြောက်နိုင်မည့် လမ်းကြောင်းများ အားလုံးကို ဟန့်တား ပိတ်ဆို့ထားကြသည်။

"အဟွတ်... အဟွတ်... ဟင်း... အင်ပါယာအမိန့်တော် အဖွဲ့အစည်းက နတ်ဆိုး တစ်ကောင်ကို မဆင်မခြင် စိန်ခေါ်ရဲတာ ကျွန်ုပ် အဘိုးအို သိပ်ကို မောက်မာလွန်းသွားတာပဲ"

"ဒါတောင် အရှင့်ကို တခြား နတ်ဆိုးတွေ ပိုပြီး ထုတ်သုံးလာအောင် ကျွန်ုပ် ဖိအားမပေးနိုင်ခဲ့ဘူးပေါ့လေ"

ကျုံမော့ကျင်းက လီဆက်၏ နောက်ဘက်ရှိ နာရီလက်တံများကို ကြည့်ကာ လက်တုံ့ပြန်မဲ့စွာ ခေါင်းယမ်းလိုက်၏။

"တရားမျှတပါတယ်။ ကျွန်ုပ် အဘိုးအိုက အချိန်ကို ကစားရာမှာ ကျွမ်းကျင်ပေမဲ့ အချိန်ကို ကစားနိုင်တဲ့ စက်ယန္တရား တစ်ခု ရှိနေလိမ့်မယ်လို့ လုံးဝ မျှော်လင့်မထားခဲ့မိဘူး၊ ပြီးတော့... ကျွန်ုပ်ထက်တောင် အများကြီး သာလွန်နေသေးတယ် မဟုတ်လား"

"ကျွန်ုပ် အဘိုးအို ရှုံးနိမ့်သွားပါပြီ... အရှုံးပေးပါတယ်"

သူသည် ကျောက်တုံးကြီး တစ်တုံးကို မှီတွယ်လိုက်ရာ အိုမင်းနေသော သူ၏ မျက်နှာထက်၌ နီးကပ်လာသော သေခြင်းတရားအတွက် မည်သည့် ထိတ်လန့် ကြောက်ရွံ့မှုမျှ မရှိချေ။

ဤလူသည် သေခြင်းတရားနှင့် ရင်ဆိုင်ရချိန်တွင် မည်မျှလောက် အသက်ရှည်ရှည် နေထိုင်ခဲ့ကြမှန်း မသိသော ထိုနတ်ဘုရားများထက်ပင် ပို၍ သဘောထား ကြီးကျယ် သဘောပေါက်နေသေးသည်။

"ခင်ဗျားကို သတ်ရမှာလား။ အဲ့ဒါက နည်းနည်းတော့ စဉ်းစား စစ်ဆေးကြည့်ဖို့ လိုသေးတယ်"

"ဘာပဲဖြစ်ဖြစ် အချိန်ကို ကစားတတ်တဲ့ ရထားမောင်းနှင်သူ တစ်ယောက် ဖြစ်နေမှတော့ ခင်ဗျား သေဆုံးသွားပြီးတဲ့နောက် ရုတ်တရက် အချိန် နောက်ပြန်ဆုတ်ခြင်း တစ်ခုခုကို ထုတ်သုံးလာမလား ဆိုတာ ဘယ်သူ သိနိုင်မှာလဲ"

"အချိန် နောက်ပြန်ဆုတ်ခြင်း ဟုတ်လား။ ဟား... အဟွတ်... ဟားဟား..."

ကျုံမော့ကျင်းက ရုတ်တရက် ရယ်မောလိုက်၏။

"ထူးဆန်းနေလို့လား"

"မဟုတ်ပါဘူး... ကျွန်ုပ် သဘောပေါက်သွားပါပြီ။ အင်ပါယာအမိန့်တော် အဖွဲ့အစည်းရဲ့ နတ်ဆိုးတွေက လွင်တီးခေါင်ပြင်အကြောင်းကို အပြည့်အဝ နားမလည်ကြသေးတာပဲ..."

ရဲချီယန်က လက်ထဲရှိ နတ်ဆိုး ကတ်ပြား · ဖြားယောင်းသွေးဆောင်ခြင်း ကို လှည့်ကစားနေ၏။

သူ၏ နှုတ်ခမ်းထောင့်များ ခပ်ရေးရေး ကွေးတက်သွားသည်။

"ဒါဆိုလည်း ပြောပြစမ်းပါ၊ ခုနက ကျွန်တော် ပြောလိုက်တဲ့ စကားမှာ ဘာများ ထူးဆန်းနေလို့လဲ"

ကျုံမော့ကျင်းက ခန္ဓာကိုယ်မှ စီးကျနေသော သွေးများကို ဂရုမစိုက်ဘဲ အနည်းငယ် ပို၍ သက်တောင့်သက်သာ ရှိသော ကိုယ်ဟန်ဆီသို့ ပြင်ထိုင်လိုက်ကာ ရဲချီယန်၏ လက်ထဲရှိ ကတ်ပြား အစီအစဉ်ကို လှမ်းကြည့်လိုက်ရာ သူ၏ မျက်လုံးများထဲ၌ အားကျ မနာလိုမှုတို့ လျှပ်ခနဲ ဖြတ်ပြေးသွား၏။

"ကတ်ပြား အစီအစဉ်တွေက... သူတို့ လိုလားတဲ့ သူတွေကိုသာ ရွေးချယ်တတ်ကြတာ... နတ်ဆိုး သခင်ကြီး သတိထားပါ။ နတ်ဆိုးတွေလို အဆင့်မြင့်မားတဲ့ ကတ်ပြား အစီအစဉ်က ဘယ်အချိန်မဆို သခင်ကို ပြန်လည် သစ္စာဖောက် တိုက်ခိုက်လာနိုင်တယ်"

"ဒါပေမဲ့ အရင် နတ်ဆိုး ပိုင်ရှင်က နောက်ဆုံးမှာ ခြောက်ခုလောက်ပဲ စုဆောင်းနိုင်ခဲ့ပြီး အရှင့်မှာတော့... ခုနစ်ခုတောင် ရှိနေခဲ့ပြီပဲ"

ရဲချီယန် စကားမပြောခဲ့ချေ။

နတ်ဆိုးများ၏ ပြန်လည် သစ္စာဖောက်မှုတဲ့လား။

တကယ်ပင် ဟုတ်ပေသည်။

အစပိုင်းက လောဘတကြီး စားသောက်ခြင်း ဖြစ်စေ၊ နောက်ပိုင်း သူ အသွင်ပြောင်းခဲ့သော လွှမ်းမိုးဖိနှိပ်ခြင်း ဖြစ်စေ၊ သူ့ကို ထိန်းချုပ်လိုသော ထို 【ပျက်စီး ယိုယွင်းခြင်း】 ကတ်ပြားပင် ဖြစ်စေ...

နတ်ဆိုးများမှာ တကယ်ပင် အန္တရာယ် ကြီးမားလှပြီး တကယ်ပင် အစွမ်းထက်လှ၏။

သို့ရာတွင် ထိုအချက်ကြောင့်ပင် သူ၏ ထိန်းချုပ်မှုကို ခံရရန် တန်ဖိုးရှိနေခဲ့ခြင်း ဖြစ်ပေသည်။

"ဟီးဟီး... ခုနက ကျွန်ုပ် ဘာလို့ ရယ်မောခဲ့တာလဲ ဆိုတော့..."

"အကြောင်းရင်းက ရိုးရှင်းပါတယ်"

"လွင်တီးခေါင်ပြင်ရဲ့ အချိန်နဲ့ နေရာလွတ် ဆိုတာ ရထားစနစ် တည်ရှိနေသရွေ့၊ ရထားစနစ်က လွင်တီးခေါင်ပြင်ကို ထိန်းချုပ်ထားဆဲ ဖြစ်နေသရွေ့ ဘယ်အရာကမှ နောက်ပြန်ဆုတ်သွားမှာ မဟုတ်ဘူး"

"အချိန်မှာ သံသရာလည်ခြင်း မရှိသလို နေရာလွတ်မှာလည်း ကျုံ့ဝင်ခြင်း မရှိဘူး"

"ရထားမောင်းနှင်သူက ရှေ့ကို ချီတက်နေတာ"

"လွင်တီးခေါင်ပြင်ကလည်း ရှေ့ကို ရွေ့လျား ချီတက်နေတာပဲ"

"အထွတ်အထိပ် နတ်ဘုရားအကြောင်း အရှင် သိသလား"

"နေပါဦး၊ ကျွန်ုပ် အဘိုးအို မဆင်မခြင် ဖြစ်သွားတာပါ။ အရှင့်လို ထိပ်တန်း ကတ်ပြား အစီအစဉ် ပိုင်ရှင် တစ်ယောက်အတွက် မသိဘူး ဆိုရင်သာ ထူးဆန်းနေလိမ့်မယ်"

ရဲချီယန်သည် ယခုတိုင် စကား မပြောသေးပေ။

အဘယ့်ကြောင့်ဆိုသော် သူ တကယ်ပင် မသိသောကြောင့် ဖြစ်၏။

"အထွတ်အထိပ် နတ်ဘုရား ဆိုတဲ့ နေရာမှာ အချိန် နတ်ဘုရား တစ်ပါး ရှိခဲ့ဖူးတယ်။ အဲ့ဒီတုန်းက လွင်တီးခေါင်ပြင်ကြီးကို နတ်ဘုရားတွေက ထိန်းချုပ်ထားခဲ့တာ။ အချိန် နတ်ဘုရားနဲ့ ကံကြမ္မာ နတ်ဘုရားတို့က အချိန်နဲ့ ကံကြမ္မာကို ထင်ရာစိုင်း ကစားခဲ့ကြပြီး အဆုံးမဲ့ ကမ္ဘာတွေထဲက အရာအားလုံးကို သူတို့ရဲ့ ကစားစရာ အရုပ်တွေအဖြစ် ဖန်တီးခဲ့ကြတာ"

"နောက်ပိုင်း ဘာတွေ ဆက်ဖြစ်ခဲ့လဲ ဆိုတာကိုတော့ မသိရတော့ဘူး၊ ကျွန်ုပ်က အချိန် နတ်ဘုရားရဲ့ ကံကြမ္မာကိုပဲ သိတာ"

ကျုံမော့ကျင်းက သူ၏ ဘေးရှိ ရာဇလှံတံကို ပစ်ပေးလိုက်၏။

ကျီးကန်းနတ်ဆိုးက ၎င်းကို ဖမ်းယူလိုက်ရာ စနစ်က ဤအခိုက်အတန့်၌ အကဲဖြတ်စစ်ဆေးမှုကို ပြီးစီးသွားခဲ့သည်။

【အချိန်-ကံကြမ္မာ ရာဇလှံတံ (အဆင့် ၁၀)】

【အချိန် နတ်ဘုရား၏ နတ်ခန္ဓာ ချေမှုန်းခံရပြီးနောက် တည်းတည်းသာ ကျန်ရစ်သော လက်သန်း အစအနလေးဖြင့် ဖန်တီးထားသည့် ပစ္စည်းငယ်လေး တစ်ခု။】

【မှတ်ချက်။ ဤပစ္စည်းကို အသုံးပြု၍ အတုအယောင် နတ်ဘုရားများကို သတိပေးလိုက်စမ်း။】

"ဘာ အထွတ်အထိပ် နတ်ဘုရားလဲ၊ ဘာ အမှိုက်သရိုက်တွေလဲ... နောက်ဆုံးတော့ သူတို့ အားလုံး ရထားစနစ်ရဲ့ ချေမှုန်း ဖျက်ဆီးတာကို ခံခဲ့ကြရတာပဲ မဟုတ်လား"

"အဲ့ဒီနေ့က စပြီး လွင်တီးခေါင်ပြင်နဲ့ ၎င်းအတွင်းမှာ ရှိတဲ့ ကမ္ဘာတွေ အားလုံးဟာ အချိန်ရဲ့ ထင်သလို ကစားခြင်းကို ခံရမယ့် ကံကြမ္မာကနေ လွတ်မြောက်သွားခဲ့ကြတာ"

"ဟားဟား... ဒါတောင် လွင်တီးခေါင်ပြင်ကို ထိန်းချုပ်လိုက်နိုင်တာနဲ့ အဲ့ဒီ နတ်ဘုရားတွေက သူတို့ရဲ့ ဆန္ဒတွေကို ဖြည့်ဆည်းပေးနိုင်လိမ့်မယ်လို့ ယုံကြည်နေကြတဲ့ လူမိုက်တွေ ရှိနေကြသေးတယ်"

"ကျွန်ုပ် ဘယ်သူ့အကြောင်း ပြောနေလဲ ဆိုတာ အရှင် ကောင်းကောင်း သိသင့်ပါတယ်..."

"ကောင်းပါပြီ၊ ကောင်းပါပြီလေ... ကျွန်ုပ် အဘိုးအို သိတာ ဒါ အကုန်ပဲ... ဖြားယောင်းသွေးဆောင်ခြင်းကို ထုတ်သုံးရင်တောင်မှ ကျွန်ုပ် အဘိုးအို ပြောစရာ ဘာမှ မကျန်တော့ဘူး။ ဟင်း... ကျွန်ုပ်ကို သတ်လိုက်ပါတော့"

သူ လိမ်ညာနေခြင်း မဟုတ်ပေ။ ဖြားယောင်းသွေးဆောင်ခြင်း၏ စွမ်းအားအောက်တွင် ဤလူ လိမ်ညာရန် လုံးဝ မဖြစ်နိုင်ချေ။

ရဲချီယန်၏ မျက်လုံးများ အနည်းငယ် မှေးကျဉ်းသွား၏။ တဖြည်းဖြည်း အားနည်းလာသော အဘိုးအို၏ အရှိန်အဝါကို ကြည့်ရင်း စိတ်ဝင်စားစရာ အကြံဉာဏ်တစ်ခုကို သူ ရုတ်တရက် တွေးမိသွားခဲ့သည်။

သူက ထပ်မံ မေးမြန်းလိုက်သည်။

"အဘိုကာဒိုရဲ့ ဘော့စ် ပိုင်ဆိုင်တဲ့ ပါရမီက ဘာလဲ"

"ကျွန်ုပ် မသိဘူး။ အဘိုကာဒို အဖွဲ့အစည်းထဲက ဘယ်သူမှ ဘော့စ်ရဲ့ ပါရမီ ထုတ်သုံးတာကို မမြင်ဖူးကြဘူး။ အရှင်က အဘိုကာဒိုနဲ့ တကယ်ကြီး ရန်သူ ဖွဲ့တော့မလို့လား"

"အမှန်အတိုင်း ပြောရရင် ကျွန်ုပ်က အဖွဲ့အစည်းထဲမှာ သိပ်ပြီး အစွမ်းထက်လှတဲ့ သူ မဟုတ်ဘူး။ ဒီပစ္စည်းလေးကို အားကိုးပြီးမှ ထိပ်တန်းအဆင့်ရဲ့ အစွန်းနားလေးကို သီသီလေး ထိတွေ့နိုင်ခဲ့တာ။ ဟိုကောင်းကင်တမန်လိုမျိုး ကတ်ပြား အစီအစဉ် ဆယ်ခုကျော် စုဆောင်းနိုင်ခဲ့ရင်တော့ တစ်မျိုးပေါ့"

"မဟုတ်ရင်တော့... ခန့်မှန်းခြေ အဆင့် ၁၃ လောက် ရှိတဲ့ အဲ့ဒီ နဂါးနဲ့ အမည်မသိ နတ်ဆိုးကို ထည့်တွက်ရင်တောင်မှ အရှင်... အနိုင်ရမှာ မဟုတ်ဘူး"

"ဒါ့အပြင်..."

ကျုံမော့ကျင်းက စကားကို ခေတ္တ ရပ်တန့်လိုက်၏။

"ဒီတစ်သုတ် ထွက်ပေါ်လာတဲ့ ရထားမောင်းနှင်သူတွေကို ရွှေရောင်ခေတ် လို့ ခေါ်ဆိုကြတာ အရှင် သိသလား"

"အရှင့်ရဲ့ အချိန်တွေ ကုန်ဆုံးလာနေပြီ။ နောက်မှ လာတဲ့သူတွေက အရင် ရောက်နှင့်နေသူတွေကို ကျော်တက်သွားကြလိမ့်မယ်။ အဲ့ဒီ အဖွဲ့အစည်း ခေါင်းဆောင်တွေက သူတို့ရဲ့ ပစ္စည်းကိရိယာတွေကို ဘယ်လောက်ပဲ အဆင့်မြှင့်တင်နေပါစေ လူသား ရထားမောင်းနှင်သူတွေရဲ့ ရွှေရောင်ခေတ် ရောက်လာမှာကို တားဆီးနိုင်မှာ မဟုတ်ဘူး"

"ဒီကတ်ပြား အစီအစဉ် ခုနစ်ခုကို စုဆောင်းဖို့ အရှင့်အတွက် အချိန် နှစ်ပေါင်း၊ လပေါင်း ဘယ်လောက်တောင် ကြာမြင့်ခဲ့ရသလဲ"

"ကျန်တဲ့ ကတ်ပြားတွေအတွက်ရော အချိန် ဘယ်လောက်တောင် ထပ်ကြာဦးမှာလဲ"