အခန်း ၁၅၃

အခန်း (၁၅၃) ရရှိသော အကျိုးအမြတ်၊ ဧကရာဇ်အဆင့် လက်စွပ်

【 ကံကြမ္မာ ဇာတ်လိုက် သေဆုံးသွားပါပြီ။ ကံတရား များ သင့်ခန္ဓာကိုယ်ထဲသို့ ပေါင်းစပ်သွားပါပြီ။ သင်သည် ပြီး ပြည့်စုံသော 'ဓားတာအို နိယာမ နားလည်မှု' ကို ရရှိခဲ့သည်။ ယခုချက်ချင်း ပေါင်းစည်း ခြင်း ပြုလုပ်လိုပါသလား။ 】

【 သင်သည် ကံကြမ္မာ ဇာတ်လိုက်တစ်ဦးကို သတ်ဖြတ်ပြီး သူ၏ ကံတရားကို လုယူကာ ဇာတ်ကွက် လမ်းကြောင်းကို ပြောင်းလဲပစ်နိုင်ခဲ့သည်။ သင်သည် ထိပ်တန်းအဆင့် ကံကြမ္မာထုတ်ယူခွင့်တစ်ကြိမ် ရရှိသည်။ ယခုချက်ချင်း ထုတ်ယူလိုပါသလား။ 】

【 သင်သည် ကံကြမ္မာ ဇာတ်လိုက်များနှင့် ဇာတ်ကွက်အဓိကဇာတ်လိုက် မြောက်မြားစွာကို အဆက်မပြတ် သတ်ဖြတ်ခဲ့သဖြင့် ဤကမ္ဘာ၏ 'ကောင်းကင်တာအို ' ၏ သတိပြုမိခြင်းကို ခံလိုက်ရပြီဖြစ်သည်။ နောက်နောင်တွင် သင်သည် ပိုမိုများပြားသော စိန်ခေါ်မှုများနှင့် ရင်ဆိုင်ရမည်ဖြစ်ပြီး ကောင်းကင်တာအိုက သင့်အတွက် စမ်းသပ်မှုများစွာကို စီစဉ်ပေးလာပါလိမ့်မည်။ အိမ်ရှင်အနေဖြင့် သတိထားပါ။ 】

【 ဇာတ်ကွက် ၏ အဓိကဇာတ်လိုက် သတ်ဖြတ်ခြင်းခံလိုက်ရပြီဖြစ်သည်။ 'သိုင်းပညာဖြင့် ကောင်းကင်ကို ဖျက်ဆီး ခြင်း' ဇာတ်ညွှန်းမှာ ပျောက်ကွယ်တော့မည် ဖြစ်သည်။ ဤဇာတ်ညွှန်းကို ပေါင်းစည်းလိုပါသလား။ 】

......

စနစ်၏ သတိပေးချက်များက ရှုချွမ်း၏ မျက်စိအရှေ့တွင် တစ်ကျော့ပြန် ပေါ်ထွက်လာခဲ့ပြန်သည်။

သို့သော် ယခုအခါတွင်မူ ရှုချွမ်းက ယခင်ကကဲ့သို့ အလွန်အမင်း ရင်ခုန်စိတ်လှုပ်ရှားခြင်းမျိုး မရှိတော့ပေ ။ သူက ပုံမှန်ကိစ္စတစ်ခုကဲ့သို့ပင် ခံစားနေရတော့သည်။

၎င်းကလည်း သဘာဝကျပေသည်။

မည်မျှပင် ကောင်းမွန်သောအရာ ဖြစ်ပါစေဦးတော့၊ အကြိမ်ပေါင်းများစွာ ရရှိဖူးလာသည့်အခါ သာမန်ပစ္စည်းတစ်ခုကဲ့သို့ ဖြစ်သွားတတ်သည် မဟုတ်ပါလော။

သို့သော်လည်း အသိပေးချက်ထဲတွင် ပါရှိသော 'ဓားတာအို နိယာမ နားလည်မှု' ကမူ ရှုချွမ်း၏ အာရုံကို ဆွဲဆောင်သွားခဲ့သည်။

၎င်းမှာ ကောင်းကင်တက်လှမ်းခြင်းနယ်ပယ်သိုင်းပညာရှင်တစ်ဦးအနေဖြင့် 'ကောင်းကင်ဘုရင်နယ်ပယ်' သို့ အဆင့်တက်လှမ်းနိုင်ရန်အတွက် အဓိကသော့ချက် ဖြစ်ပေသည်။

ရှုချွမ်း၏ ဆရာဖြစ်သူမှာ ပြီး ပြည့်စုံသော ဓားတာအိုနိယာမ နားလည်မှု မရှိခဲ့ခြင်းကြောင့်သာ ကောင်းကင်ဘုရင်နယ်ပယ်သို့ ချိုးဖျက်မတက်လှမ်းနိုင်ဘဲ ဖြစ်နေခဲ့ရခြင်း ဖြစ်၏။

ရှုချွမ်းအနေဖြင့် ဤအရာကို ဤမျှလွယ်ကူစွာ ရရှိလိမ့်မည်ဟု မထင်မှတ်ထားခဲ့မိပေ ။

၎င်းက တကယ့်ကို မမျှော်လင့်ဘဲ ရရှိခဲ့သော ဝမ်းမြောက်ဖွယ်ရာ ဆုလာဘ်တစ်ခုပင်။

ဤဓားတာအိုနိယာမ ကို ပေါင်းစည်းလိုက်ခြင်းအားဖြင့် ရှုချွမ်းသည် ဓားတာအိုလမ်းစဉ်အတိုင်း ကောင်းကင်တက်လှမ်းခြင်းနယ်ပယ်သို့ တိုက်ရိုက် တက်လှမ်းနိုင်မည် ဖြစ်သည်။

ထို့အပြင် သူ ပေါင်းစည်းပြီးသွားပါက ဤနိယာမ နားလည်မှုမိတ္တူတစ်ခုကို သူ၏ဆရာ 'စစ်တုလင်း' ထံသို့ ပေးအပ်ကာ ဆရာဖြစ်သူ ကောင်းကင်ဘုရင်နယ်ပယ်သို့ တက်လှမ်းနိုင်ရန် ကူညီပေးနိုင်ဦးမည် ဖြစ်၏။

စစ်တုလင်းက သူ၏ကျင့်ကြံခြင်းလမ်းစဉ်တွင် အကူအညီများစွာ ပေးခဲ့ဖူးပြီး ရှုချွမ်းကလည်း သူ့ကို နှလုံးသားထဲမှ လေးစားကာ ဆရာဖြစ်သူ အဆင့်တက်လှမ်းနိုင်ရန် အလွန်ပင် ကူညီပေးချင်နေခဲ့ခြင်း ဖြစ်သည်။

ယခုအခါတွင်မူ ထိုအခွင့်အရေးက ရောက်ရှိလာခဲ့ပြီ။

ထို့အပြင် အဆင့်မြင့်ကံကြမ္မာတစ်ခုနှင့် ထိပ်တန်းအဆင့် ကံကြမ္မာဆွဲခွင့်တစ်ခု ရရှိခြင်းကမူ အလွန်ပင် ရိုးအီနေသည့် အရာများ ဖြစ်နေခဲ့ပြီ။

သို့သော် ကမ္ဘာ၏ ကောင်းကင်တာအိုက သူ့ကို သတိပြုမိသွားပြီဟူသော သတင်းစကားကမူ ရှုချွမ်းကို အနည်းငယ် အံ့အားသင့်သွားစေခဲ့သည်။ သို့သော် မကြာမီမှာပင် သူ စိတ်အေးသွားခဲ့၏။

ကံတရား အလွန်ကြီးမားသောသူများစွာ သူ၏လက်ချက်ဖြင့် သေဆုံးခဲ့ရပြီးနောက်ပိုင်း ကောင်းကင်တာအို၏ သတိပြုခြင်း ခံရသည်မှာ သဘာဝကျလှပေသည်။

နောက်ဆက်တွဲ ရောက်ရှိလာမည့် စိန်ခေါ်မှုများနှင့် စမ်းသပ်မှုများကိုမူ ရှုချွမ်းက စိုးစဉ်းမျှပင် ကြောက်ရွံ့ခြင်း မရှိပေ ။

စစ်ပွဲရောက်လာလျှင် စစ်သူကြီးက ဆီးကြိုတိုက်ခိုက်မည်၊ ရေကြီးလာလျှင် မြေကြီးဖြင့် ကာဆီးမည်သာ ဖြစ်၏။

"ထုတ်ယူမယ်..."

ရှုချွမ်းက တည်ငြိမ်စွာ ပြော လိုက်သည်။

【 ထုတ်ယူခြင်း လုပ်ဆောင်နေပါသည်၊ ခေတ္တစောင့်ဆိုင်းပါ။ 】

【 ထုတ်ယူခြင်း ပြီးဆုံးပါပြီ။ 】

【 ဂုဏ်ယူပါသည်၊ သင်သည် ခရမ်းရောင်ကံကြမ္မာ 'ထူးကဲသောထိန်းချုပ်မှု' ကို ရရှိသည်။ 】

【 ထူးကဲသောထိန်းချုပ်မှု : မည်သည့်လက်နက်အမျိုးအစားမဆို သင့်လက်ထဲသို့ ရောက်ရှိလာပါက သင့်ခန္ဓာကိုယ်၏ အစိတ်အပိုင်းတစ်ခုကဲ့သို့ သဘာဝကျကျ အသုံးပြုနိုင်မည်ဖြစ်သည်။ ဒုတိယအဆင့် ဧကရာဇ်လက်နက်အောက်ရှိ မည်သည့်လက်နက်ကိုမဆို ထိန်းချုပ်ရန် လိုအပ်ချက်များကို အဆမတန် လျှော့ချပေးမည်ဖြစ်သည်။ 】

【 ဂုဏ်ယူပါသည်၊ သင်သည် ခရမ်းရောင်ကံကြမ္မာ 'သတ်ဖြတ်လိုစိတ် နှလုံးသား ' ကို ရရှိသည်။ 】

【 သတ်ဖြတ်လိုစိတ် နှလုံးသား : မိစ္ဆာချီများ ခန္ဓာကိုယ်အတွင်း ပျံ့နှံ့ကာ သတ်ဖြတ်ခြင်းတာအိုထဲသို့ ကျရောက်စေဦးမည်ဖြစ်သော်လည်း တာအိုနှလုံးသားမှာ ပျက်စီးခြင်းမရှိဘဲ စိတ်ဝိညာဉ်မှာ ကြည်လင်နေမည်ဖြစ်သည်။ မိစ္ဆာချီနှင့် သတ်ဖြတ်လိုစိတ်များ၏ တိုက်စားမှုအောက်တွင် မိမိ၏ စစ်မှန်သော ဖြစ်တည်မှုကို ထိန်းသိမ်းထားနိုင်မည့်အပြင် ၎င်းတို့ကို မိမိခန္ဓာကိုယ်၏ အစိတ်အပိုင်းတစ်ခုကဲ့သို့ လိုသလို အသုံးချနိုင်မည်ဖြစ်သည်။ 】

.....

ရှုချွမ်းအတွက်မူ ခရမ်းရောင်ကံကြမ္မာနှစ်ခုမှာ မရှိတာထက်စာလျှင် ပိုကောင်းသည်ဟုသာ ဆိုရပေမည်။

ယခုအခါတွင် သူက ရွှေရောင်ကံကြမ္မာမှလွဲ၍ အခြားသော ကံကြမ္မာများကို အထူးတလည် အစွမ်းထက်ခြင်း သူနှင့် အလွန်အမင်း ကိုက်ညီခြင်းမျိုး မရှိပါက မျက်စိထဲ သိပ်မထည့်တော့ပေ ။

【 ကံကြမ္မာအသစ်များကို တပ်ဆင်ပြီးပါပြီ။ စစ်ဆေးကြည့်ရှုနိုင်ပါသည်။ 】

စနစ်၏ သတိပေးချက် ပြီးဆုံးသွားသော်လည်း ရှုချွမ်းအနေဖြင့် ထူးထူးခြားခြား ခံစားရခြင်းမျိုး မရှိပေ ။

"ကဲ... နောက်တစ်ခုက ဇာတ်ညွှန်းကို ပေါင်းစပ်ကြတာပေါ့..."

ရှုချွမ်း၏ စိတ်များ တက်ကြွလာခဲ့သည်။ ဒါကမှ ဒီနေ့ရဲ့ အဓိကပွဲကြီး ဖြစ်ပေသည်။

ရှုချွမ်း၏ အမိန့်ပေးမှုအောက်တွင် ယန်ရှန်း၏ ဇာတ်ညွှန်းဖြစ်သော 'သိုင်းပညာဖြင့် ကောင်းကင်ကို ဖျက်ဆီး ခြင်း' မှာ သူ၏ ခန္ဓာကိုယ်ထဲသို့ ချက်ချင်း ပေါင်းစပ်သွားခဲ့တော့သည်။

ရှုချွမ်းက မျက်လုံးများကို မှိတ်လိုက်ပြီး ဇာတ်ညွှန်းပေါင်းစည်းမှုကြောင့် ဖြစ်ပေါ်လာသော အပြောင်းအလဲများကို ခံစားကြည့်လိုက်၏။

ယခုအခိုက်အတန့်တွင် ရှုချွမ်းက ယန်ရှန်း၏ ဘဝဇာတ်ကြောင်းကို မြင်တွေ့လိုက်ရသကဲ့သို့ ရှိတော့သည်။

မြို့တော်မှ ချမ်းသာကြွယ်ဝသော သခင်လေးတစ်ယောက်ဘဝမှ ထိုက်ယိမြင့်မြတ်နယ်‌မြေသို့ ဝင်ရောက်ခဲ့ခြင်း၊ ထို့နောက် ခရမ်းရောင်နေမင်းတောင်ထိပ်သို့ ရောက်ရှိကာ ရွှေရောင်ရှေးဟောင်းနန်းတော်၏ အမွေအနှစ်ကို ရရှိခဲ့ခြင်း၊ မျိုးဆက်သစ်သူတော်စင်လောင်းလျာဖြစ်လာပြီး အပြင်ထွက်သည့်အခါ ကံကြမ္မာအရ သတ်မှတ်ထားသော အမျိုးသမီးဇာတ်လိုက်နှင့် ဆုံတွေ့ခဲ့ခြင်း၊ ရှေးဟောင်းနန်းတော် အမွေအနှစ်နှင့် မြောက်မြားစွာသော အခွင့်အရေးများကို အခြေခံကာ ရွှမ်ထျန်း တိုက်ကြီး၏ အထွတ်အထိပ်ဖြစ်သော 'ဧကရာဇ်အရှင် နယ်ပယ်' သို့ တဖြည်းဖြည်း တက်လှမ်းသွားနိုင်ခဲ့ခြင်း၊ နောက်ဆုံးတွင် တိုက်ကြီးပေါ်ရှိ သိုင်းပညာရှင်အားလုံး၏ စိုက်ကြည့်နေမှုအောက်တွင် ကောင်းကင်တံခါးကြီးကို ဖွင့်လှစ်ကာ ဖရိုဖရဲ နယ်ပယ်ထံသို့ ခြေလှမ်းလှမ်းသွားခဲ့သည်။

အကယ်၍ ရှုချွမ်းသာ ဝင်ရောက်စွက်ဖက်ခြင်း မရှိခဲ့ပါက ၎င်းမှာ ယန်ရှန်း၏ ဒဏ္ဍာရီဆန်သော ဘဝဇာတ်ကြောင်း ဖြစ်ပေလိမ့်မည်။

သို့သော် ရှုချွမ်း ပေါ်လာပြီးနောက်တွင်မူ အရာအားလုံး ပြောင်းလဲသွားခဲ့ရပြီ။

အခွင့်အရေးများ လုယူခံခဲ့ရပြီး အမွေအနှစ်များလည်း အခိုးခံခဲ့ရကာ မနာလိုမှုနှင့် မုန်းတီးမှုများကြောင့် ယန်ရှန်းက ရှုချွမ်းကို တိုက်ရိုက်ထိပ်တိုက်တွေ့ရန် ရွေးချယ်ခဲ့သည်။

သို့သော် သူက မည်သို့လုပ် ရှုချွမ်း၏ ပြိုင်ဘက် ဖြစ်နိုင်ပါမည်နည်း။

နောက်ဆုံးတွင် သူက ပျက်စီးခြင်းသို့သာ ရောက်ရှိသွားခဲ့ရတော့သည်။

မြင်ကွင်းများ ပြီးဆုံးသွားခဲ့ပြီး ဤနေရာတွင်ပင် ယန်ရှန်းနှင့် ပတ်သက်သမျှ အရာအားလုံးမှာ လေထုထဲ၌ ကွယ်ပျောက်သွားခဲ့ရပြီ ဖြစ်သည်။

ရှုချွမ်းသည်လည်း သူ၏ ဘဝဇာတ်ညွှန်းကို အောင်မြင်စွာ ပေါင်းစည်းနိုင်ခဲ့ပြီ ဖြစ်၏။

ယခုအချိန်တွင် ရှုချွမ်းက ဇာတ်ညွှန်းသုံးခုကို ပေါင်းစပ်ပြီးသား ဖြစ်နေခဲ့ပြီ : 'အနန္တ နိယာမ နတ်ဘုရားကျင့်စဉ် '၊ 'အနန္တဝိညာဉ် တို့၏ ဘိုးဘေး ' နှင့် 'သိုင်းပညာဖြင့် ကောင်းကင်ကို ဖျက်ဆီး ခြင်း' တို့ ဖြစ်ကြသည်။

အရှေ့ဘက်ဒေသတစ်ခုလုံးတွင် ရှုချွမ်းထက် ကံတရား ပိုမိုအားကောင်းသော ဒုတိယမြောက်လူကို ရှာဖွေနိုင်လိမ့်မည် မဟုတ်ကြောင်း ခန့်မှန်းရပေသည်။

အမျိုးမျိုးသော မြင့်မြတ်နယ်မြေများနှင့် ဂိုဏ်းကြီးများမှ ဂိုဏ်းချုပ်၊ တောင်ထိပ်သခင်များပင်လျှင် ရှုချွမ်းကို ယှဉ်နိုင်လိမ့်မည် မဟုတ်ပေ ။

သူ၏ စိတ်ခံစားချက်များကို ပြန်ချိန် ညှိ ပြီးနောက် ရှုချွမ်းက ယခင်က တိုက်ပွဲဖြစ်ပွားခဲ့သော နေရာသို့ ပြန်လည်လျှောက်လှမ်းလာခဲ့သည်။

ယခုအခိုက်အတန့်တွင် နင်ယို့ချီမှာ နေရာ၌ပင် ထိုင်၍ ဒဏ်ရာများကို ကုသနေခဲ့၏။

ရှုချွမ်း၏ အော်ရာ ကို ခံစားမိလိုက်သည်နှင့် သူမက ချက်ချင်း မျက်လုံးဖွင့်ကြည့်လိုက်သည်။

"ရှုချွမ်း..."

သူမက ရုတ်တရက် ရှုချွမ်း၏ ရင်ခွင်ထဲသို့ ဖက်လိုက်တော့သည်။

သူမ၏ မျက်လုံးများထဲမှ မျက်ရည်များ တရဟော စီးကျလာခဲ့ရ၏။

သူမက သူမ၏ဘဝတွင် မည်သူ့ထံမှ ယခုအခိုက်အတန့်ကဲ့သို့သော လုံခြုံမှုမျိုးကို မခံစားဖူးခဲ့ပေ ။

သူမ အမျှော်လင့်ဆုံး ဖြစ်နေရသည့် အချိန်တွင် ရှုချွမ်း ပေါ်လာခဲ့သည်။

သူမကို ကယ်တင်ပေးခဲ့ရုံသာမက ယန်ရှန်းနှင့် ဧကရာဇ်အရှင်တစ်ပိုင်း ဝိညာဉ်အိုကြီးကိုပါ လျင်မြန်စွာ ရှင်းလင်းပေးခဲ့သည်။

ယခုအခိုက်အတန့်တွင် သူမက ဤယောက်ျားကို ရုန်းမထွက်နိုင်လောက်အောင် ချစ်မိသွားခဲ့ရပြီဖြစ်ရာ မည်သူမျှ ၎င်းတို့ကို ခွဲနိုင်တော့မည် မဟုတ်ပေ ။

"ကဲပါ... လိမ္မာတယ်၊ မငိုနဲ့တော့နော်..."

ရှုချွမ်းက နင်ယို့ချီ၏ ဆံနွယ်များကို ညင်သာစွာ ပွတ်သပ်ပေးရင်း အဆက်မပြတ် နှစ်သိမ့်ပေးနေခဲ့သည်။

ရှုချွမ်း၏ နှစ်သိမ့်မှုအောက်တွင် နင်ယို့ချီက နောက်ဆုံး၌ ငိုခြင်းကို ရပ်တန့်သွားခဲ့၏။

ထို့နောက် ရှုချွမ်းက ယခင်က ရရှိထားသော အစွမ်းထက် အနာကျက်ဆေးလုံးများကို ထုတ်ယူကာ သူမ၏ ဒဏ်ရာများ ကုသရန် ပေးလိုက်သည်။

ရှုချွမ်းက ဘေးမှနေ၍ သူမကို စောင့်ရှောက်ပေးရင်း တစ်ဆက်တည်းမှာပင် ယန်ရှန်း၏ သိုလှောင်လက်စွပ်ကို လှမ်းကြည့်လိုက်မိသည်။

ယခင်အကြိမ်တုန်းက ရှုချွမ်းသည် ယန်ရှန်း၏ သိုလှောင်လက်စွပ်မှာ သာမန်ပစ္စည်းမဟုတ်ကြောင်း သိရှိခဲ့သော်လည်း ထိုအထဲတွင် ဧကရာဇ်အရှင်တစ်ပိုင်း ဝိညာဉ်အကြွင်းအကျန် ရှိနေခဲ့သဖြင့် မယူရန် ရွေးချယ်ခဲ့ခြင်း ဖြစ်သည်။

ယခုအခါတွင်မူ ရွှေယိချန်းနှင့် ယန်ရှန်း နှစ်ဦးစလုံး သေဆုံးသွားခဲ့ပြီဖြစ်ရာ ဤလက်စွပ်က ရှုချွမ်း၏ လက်ထဲသို့ ရောက်ရှိလာခဲ့ပြီ ဖြစ်၏။

သူ၏ စိတ်အာရုံကို ဖြန့်ကျက်လိုက်ရာ ယန်ရှန်း ချန်ထားခဲ့သော ကန့်သတ်ချက် မှာ ရှုချွမ်း၏ လက်ချက်ဖြင့် ချက်ချင်း ပျက်စီးသွားခဲ့ရသည်။

သူ၏ စိတ်ဝိညာဉ်အမှတ်အသားကို ထိုအပေါ်တွင် ရိုက်နှိပ်လိုက်ချိန်တွင် ရှုချွမ်းမှာ ဤသိုလှောင်လက်စွပ်က အမှန်တကယ်ပင် 'ပထမအဆင့် ဧကရာဇ်လက်နက်' ဖြစ်နေကြောင်း သိလိုက်ရသဖြင့် အံ့အားသင့်သွားခဲ့ရ၏။

ယခုအခိုက်အတန့်တွင် ရှုချွမ်း ယခင်က ထုတ်ယူထားသော ကံကြမ္မာဖြစ်သည့် 'ထူးကဲသောထိန်းချုပ်မှု' က အသုံးဝင်လာခဲ့သည်။

ဤဧကရာဇ်အဆင့် လက်စွပ်ကို ရှုချွမ်းက ချက်ချင်းပင် အပြည့်အဝ ထိန်းချုပ်လိုက်နိုင်တော့သည်။

ထိုအထဲရှိ နေရာလွတ် အကျယ်အဝန်းမှာ လွန်စွာမှ ကြီးမားကျယ်ပြန့်လှပြီး ရှုချွမ်း၏ ကိုယ်ပိုင်သိုလှောင်လက်စွပ်ထက် များစွာ ကြီးမားပေသည်။

ယန်ရှန်းအနေဖြင့် ၎င်း၏ အစိတ်အပိုင်း အနည်းငယ်ကိုသာ ဖွင့်လှစ်အသုံးပြုနိုင်ခဲ့ခြင်း ဖြစ်ပြီး အများစုမှာ ပိတ်ဆို့ထားသည့် အခြေအနေတွင် ရှိနေဆဲ ဖြစ်၏။

ရွှေယိချန်းကိုယ်တိုင်ပင်လျှင် ဤလက်စွပ်၏ မူလကို မသိပေ ။

သူ 'ရွှေရောင်ရှေးဟောင်းနန်းတော်' ၏ ဖိနှိပ်ခြင်းကို ခံရပြီးနောက် ဝိညာဉ်အကြွင်းအကျန်သာ ကျန်ရှိတော့ချိန်တွင် ဤလက်စွပ်ကို ရှေးဟောင်းနန်းတော် ကမ္ဘာအတွင်း၌ တွေ့ရှိခဲ့ခြင်း ဖြစ်သည်။

ဤပစ္စည်းက သူ၏ စိတ်ဝိညာဉ်ကို စောင့်ရှောက်ပေးနိုင်ကြောင်း သိရှိရသဖြင့် ရွှေယိချန်းက ၎င်းအထဲ၌ ဝံ့ဝံ့ရဲရဲပင် နှစ်ခြိုက်စွာ အိပ်စက်နေခဲ့ပြီး ယန်ရှန်းက ၎င်းကို ရရှိသွားခဲ့ခြင်း ဖြစ်သည်။

သို့သော် ယန်ရှန်းကမူ ၎င်းကို သာမန် သိုလှောင်လက်စွပ်တစ်ခုကဲ့သို့သာ အသုံးပြုခဲ့ပြီး ၎င်း၏ စစ်မှန်သော သဘာဝကို ဘယ်တုန်းကမှ မသိရှိခဲ့ပေ ။

"ဟမ့်... ဒီကံတရားကတော့ တကယ်ကို အံ့မခန်းပဲ..."

ရှုချွမ်းက စိတ်ထဲမှ မချီးကျူးဘဲ မနေနိုင်တော့ပေ ။

သူ၏ ယခုလက်ရှိ ကံတရားအရ ကောက်ရလိုက်သော သိုလှောင်လက်စွပ်တစ်ခုပင်လျှင် ပထမအဆင့် ဧကရာဇ်လက်နက် ဖြစ်နေခဲ့ပြီ။

သို့သော် နှမြောစရာကောင်းသည်မှာ ယန်ရှန်းက ရှုချွမ်း၏ လုယူခြင်းကို တစ်ကြိမ် ခံရဖူးပြီးနောက်ပိုင်း ပိုမိုပါးနပ်လာခဲ့ခြင်း ဖြစ်သည်။

သူက ရတနာတစ်ခုခုကို ရရှိတိုင်း လက်ထဲတွင် ဘယ်တော့မှ အကြာကြီး သိမ်းမထားတော့ပေ ။

သူက ၎င်းတို့ကို သူ၏ ခွန်အားကို မြှင့်တင်ရန် ရွှေယိချန်း၏ စိတ်ဝိညာဉ်ကို မွေးမြူရန်အတွက်သာ ချက်ချင်း အသုံးပြုပစ်လေ့ရှိသည်။

ထို့ကြောင့် ဤလက်စွပ်အထဲတွင် ဆေးလုံးအနည်းငယ်နှင့် နေ့စဉ်သုံးပစ္စည်း အနည်းငယ်သာ ပြန့်ကျဲလျက် ရှိနေခဲ့၏။

သို့သော်လည်း ရှုချွမ်းက ဂရုမစိုက်ပေ ။

ဤဧကရာဇ်အဆင့် လက်စွပ်ကိုယ်တိုင်ကပင် တန်ဖိုးဖြတ်မရသော ရတနာတစ်ခု ဖြစ်နေခဲ့ပြီ ဖြစ်သည်။

ရှုချွမ်းအနေဖြင့် ၎င်း၏ စစ်မှန်သော အသုံးဝင်ပုံကို အပြည့်အဝ မသိသေးလျှင်ပင် ယခုအခါ ၎င်းက သူ၏ ထိန်းချုပ်မှုအောက်သို့ ရောက်ရှိနေပြီဖြစ်ရာ သူက ၎င်း၏ လျှို့ဝှက်ချက်များကို တဖြည်းဖြည်းချင်း ဖော်ထုတ်သွားမည်သာ ဖြစ်၏။

လက်စွပ်ကို ဝတ်လိုက်ပြီးနောက် ရှုချွမ်းက သူ၏ ကိုယ်ပိုင်သိုလှောင်လက်စွပ်ထဲရှိ ပစ္စည်းအားလုံးကို ဤလက်စွပ်အသစ်ထဲသို့ ပြောင်းရွှေ့လိုက်သည်။

ဖြတ်သန်းလာခဲ့သော အပြင်စည်းတပည့်ဘဝတုန်းက ရရှိခဲ့သော သိုလှောင်လက်စွပ်လေးမှာမူ ယနေ့တွင် ဂုဏ်သိက္ခာရှိရှိဖြင့် အနားယူသွားခဲ့ရပြီ ဖြစ်ပေတော့သည်။