အခန်း (၂၃-၂၄)

အခန်း (၂၃) ကိုယ်ကျင့်တရား မရှိရင် အကျပ်ကိုင်မခံရဘူး

အသံထွက်ပေါ်လာသည်နှင့် လူအများစုက ခေါင်းလှည့်ကြည့်လိုက်ကြရာ ချန်ကောဟွားသည် ဆိုင်တံခါးဝတွင် တည်ငြိမ်သောအမူအရာဖြင့် ရပ်နေသည်ကို မြင်တွေ့လိုက်ရသည်။

သေချာသည်မှာ သူတို့၏ အဓိကအာရုံစိုက်မှုမှာ ချန်ကောဟွား မဟုတ်‌ေချ။ချန်ကောဟွား၏ ဘယ်ဘက်အခြမ်းတွင် စက်ဘီးတွန်းနေသော ဒုတိယစက်ရုံမှူးလီက သူတို့၏ အာရုံစိုက်မှုအားလုံးကို ဆွဲဆောင်သွားခြင်း ဖြစ်သည်။

ဒုတိယစက်ရုံမှူးလီက ချန်ကောဟွားကို ဘာလို့ စက်ဘီးနဲ့ လိုက်ပို့ပေးနေရတာလဲ

လူအများအပြား၏ စိတ်ထဲတွင် သံသယများ ဖြစ်ပေါ်လာကြသော်လည်း မျက်လုံးများထဲရှိ မနာလိုအားကျသည့် အရိပ်အယောင်များမှာမူ အလွန်သိသာထင်ရှားနေသည်။ မည်သို့ပင်ဆိုစေကာမူ မည်သူမဆို ဒုတိယစက်ရုံမှူးလီနှင့် အတူတူ သွားလာနိုင်မည် မဟုတ်ပေ။

……

ရီကျုံးဟိုင်သည် ချန်ကောဟွား၏ စကားကို ကြားလိုက်ရပြီးနောက် မျက်နှာမှာ ချက်ချင်းပင် မှုန်ကုပ်သွားသည်။လက်ရှိကိစ္စကို သူ၏ စိတ်ဆန္ဒအတိုင်း ဖြေရှင်း၍ မရနိုင်တော့ကြောင်းကို သူ သိရှိလိုက်သည်။

ခုလေးတင်မှ ဆုံးဖြတ်ချက်ချပြီး ချင်ကျင်းယွီကိုလည်း မနည်းဖြေရှင်းထားနိုင်ခဲ့ရာ ယခု ချန်ကောဟွားကသာ ကိစ္စရပ်၏ ဖြစ်စဉ်ကို ဝင်ရောက်နှောင့်ယှက်မည်ဆိုလျှင် ခြံဝင်းတစ်ခုလုံးအပေါ်ရှိ သူ၏ ဩဇာအာဏာမှာ များစွာ ကျဆင်းသွားရပေလိမ့်မည်။

ဘေးဘက်ရှိ လျိုဟိုင်ကျုံးမှာမူ မျက်မှောင်ကြုတ်နေသည်။ သူသည် မူလကတည်းက ချန်ကောဟွားနှင့် ရန်ငြိုးရှိခဲ့သူ ဖြစ်သည်။ထိပ်တန်းအဆင့် ဆန်များ ရရှိရုံသာမက ခေါင်းဆောင်ကပင် စက်ဘီးဖြင့် လိုက်ပို့ပေးသည်ကို မြင်လိုက်ရသဖြင့် စိတ်ထဲတွင် သေချာပေါက် အရသာမတွေ့ ဖြစ်သွားသည်။ သေချာသည်မှာ ဤအရာများသည် ချန်ကောဟွား၏ ပိုင်ဆိုင်မှုများ မဟုတ်ဟု ပို၍ ယုံကြည်ချင်နေခြင်း ဖြစ်သည်။

သို့သော် အမှန်တရားမှာ သူ၏ ရှေ့မှောက်တွင် ပေါ်လွင်နေသဖြင့် မယုံကြည်ဘဲ မနေနိုင် ဖြစ်နေရသည်။ထို့ကြောင့် သူသည် စိတ်ထဲမှသာ တွေးနေမိတော့သည်။

"ဒီကောင်လေး အခုတလော ဘာတွေများ လုပ်နေလို့ ကံတွေ ဒီလောက် ကောင်းနေရတာလဲ"

"ခေါင်းဆောင်နဲ့လည်း အတူသွားလာနေတယ်၊ ပစ္စည်းကောင်းတွေလည်း ရှိနေတယ်"

"မဖြစ်ဘူး၊ အချိန်ကျရင် ချန်ကောဟွား မိသားစုကို သေချာပေါက် စုံစမ်းကြည့်မှရမယ်"

"သူ့ဆီမှာ ကြီးမားတဲ့ ပြဿနာတစ်ခုခု သေချာပေါက် ရှိနေရမယ်"

ယန်ပုကွေ့ အနေဖြင့်မူ ပြောစရာပင် မလိုအပ်တော့ပေ။ သူသည် ကျားကျန်းရှီထံမှ အခွင့်အရေး မရနိုင်ကြောင်း သိရှိထားပြီးနောက် ချန်ကောဟွားတွင် ဤမျှများပြားသော ပစ္စည်းကောင်းများ ရှိနေသည်ကို သိလိုက်ရသည်။ ထို့ကြောင့် အာရုံအားလုံးကို သူ၏အပေါ်သို့ ချက်ချင်း ပြောင်းလဲလိုက်သည်။

လက်ရှိ သူ၏ စိတ်ထဲ၌ ရှိနေသော တစ်ခုတည်းသော အတွေးမှာကား ချန်ကောဟွားနှင့် ဆက်ဆံရေးကို သေချာပေါက် ကောင်းမွန်အောင် တည်ဆောက်ရမည်ဖြစ်ပြီး သူ့ကို လုံးဝ အလွယ်တကူ မပြစ်မှားမိစေရန် ဖြစ်သည်။ နောင်တစ်ချိန်တွင် သူ့ထံမှ အခွင့်အရေး အနည်းငယ် ရကောင်းရနိုင်ပေလိမ့်မည်။

ဦးလေးကြီး သုံးဦးစလုံး၏ စိတ်ထဲတွင် တွေးတောနေမှုများမှာ တစ်ယောက်နှင့်တစ်ယောက် တူညီမှု မရှိကြပေ။ သို့ရာတွင် လူတိုင်း၏ မျက်လုံးများထဲ၌ ပြင်းပြသော မနာလိုအားကျမှု အရိပ်အယောင်များ ပြည့်နှက်နေကြသည်။

ခေါင်းဆောင်ကိုယ်တိုင် အကြိုအပို့လုပ်ပေးခြင်းသည် မည်သည့်ဆန်ကို စားရသည်ထက်မဆို ပို၍ မျက်နှာပန်းလှသော ကိစ္စ ဖြစ်သည်။

ကျားကျန်းရှီ၏အကြောင်းကို ဆက်ပြောရလျှင် ချန်ကောဟွားက သူမတို့၏မိသားစုကို ရိက္ခာအနည်းငယ်မျှပင် မကူညီလိုကြောင်းကို မြင်လိုက်ရသောအခါ ချက်ချင်းပင် စိတ်ဓာတ်များ ကျကာ ဒေါသပေါက်ကွဲသွားသည်။

သို့သော် ဆန်အိတ်မှာလည်း ဆန်ကြိတ်သည့်အမျိုးသမီး၏ လုယူခြင်းကို ခံလိုက်ရပြီး ဤမျှများပြားသော လူများ ကြည့်ရှုနေသည့် အခြေအနေမျိုးတွင် ပြန်လုယူရန်မှာလည်း မဖြစ်နိုင်တော့ပေ။ထို့ကြောင့် သူမသည် ချက်ချင်းပင် လှဲချလိုက်ပြီး ဆန်ဖွဲများကြားတွင် အရှက်မရှိစွာဖြင့် သနားစရာကောင်းအောင် အော်ဟစ်ငိုယိုပြတော့သည်။

"အလိုလေး နတ်မင်းကြီးရယ် ကျားမိသားစုအပေါ်ကို ဘာလို့များ ဒီလို လုပ်ရက်ရတာလဲ"

"ငါ့ယောက်ျားကိုလည်း ယူသွားသေးတယ်၊ ငါ့သားကိုလည်း မတ်တတ်မရပ်နိုင်အောင် လုပ်လိုက်သေးတယ်"

"ငါတို့ ကျားမိသားစုမှာ အားကိုးစရာ ယောက်ျား မရှိတာကို မြင်တော့ အခု တစ်ယောက်ပြီးတစ်ယောက် ငါ့ကို အနိုင်ကျင့်နေကြပြီ"

"သေနာကောင်တွေ ငါ့ဘဝက ဘာလို့ ဒီလောက်တောင် ခါးသီးနေရတာလဲ"

"နတ်မင်းကြီးရယ် ငါ အသက်မရှင်ချင်တော့ဘူး ငါ့ကိုသာ ခေါ်သွားပါတော့"

ကျယ်လောင်စွာ ငိုကြွေးနေသော အသံအပြင် သူမ၏ ပိုလွန်းသော မျက်နှာအမူအရာများကလည်း ပေါင်းစပ် ပါဝင်နေသည်။မည်သူမဆို တစ်ချက်ကြည့်လိုက်ရုံနှင့် ကျားကျန်းရှီမှာ ဟန်ဆောင်နေခြင်းဖြစ်ကြောင်းကို သိရှိနိုင်ပေသည်။

ဤလုပ်ရပ် ပေါ်ထွက်လာသည်နှင့် ရီကျုံးဟိုင်၏ စိတ်ထဲတွင်လည်း မခံရပ်နိုင်စွာဖြင့် ကျိန်ဆဲမိသွားသည်။

ဒီကျားကျန်းရှီက ရူးများရူးနေသလား

ကိစ္စတွေက ဒီလိုဖြစ်နေတာတောင်မှ အရှက်မရှိသေးဘူးလား

ရီကျုံးဟိုင် တစ်ယောက်တည်း ဤသို့ တွေးထင်နေခြင်း မဟုတ်ဘဲ ခြံဝင်းထဲရှိ အခြားလူများကလည်း ဤသို့ပင် တွေးထင်နေကြသည်။

သူတို့၏ အမြင်တွင် ကျားကျန်းရှီသည် နံရံပေါ်သို့ သုတ်လိမ်း၍မရသော ရွှံ့ဗွက်တစ်ခုကဲ့သို့ အသုံးမကျသူ တစ်ဦးသာ ဖြစ်သည်။

စက်ရုံမှ ခေါင်းဆောင်ကလည်း ဘေးတွင် ရပ်ကြည့်နေသည်။ဤဆန်များသည် သူက ချန်ကောဟွားအား လက်ဆောင်ပေးထားခြင်း ဖြစ်ကောင်းဖြစ်နိုင်ပေသည်။ သို့သော် လူကြီး၏ ရှေ့မှောက်တွင်ပင် သူတစ်ပါး၏ ပစ္စည်းကို အတင်းအဓမ္မ လောဘတကြီး လိုချင်နေသေးသည်။ဤသည်မှာ ခေါင်းဆောင်များကို မျက်နှာမထောက်ခြင်း ဖြစ်သွားသည်။ ခြံဝင်းတစ်ခုလုံး၏ ဂုဏ်သိက္ခာကို အကုန်အစင် ဖျက်ဆီးပစ်လိုက်သည်ဟု ဆိုလျှင်ပင် လွန်မည် မဟုတ်ပေ။

ချင်ဟွိုင်ယွီသည်လည်း ဤမြင်ကွင်းကို မြင်လိုက်ရသောအခါ စိတ်ထဲတွင် သည်းမခံနိုင်တော့ပေ။ သူမသည် အလွန်တရာ ရှက်စရာ ကောင်းလှသည်ဟု ခံစားနေရသည်။

ကျားကျန်းရှီကိုယ်တိုင်ပင်လျှင် မိမိတို့အိမ်၌ အားကိုးစရာ ယောက်ျား မရှိဟု ခံစားနေရကြောင်း ပြောသွားသည်။သို့သော် မိမိက ကျားမိသားစုကို ရွေးချယ်ခဲ့မိသေးသည်။ဤသည်မှာ မိုက်မဲစွာဖြင့် မီးတွင်းထဲသို့ ခုန်ဆင်းခဲ့ခြင်း မဟုတ်ပါလော။

သို့သော် ပန့်ကန့်၊ ဟွိုင်ဟွားနှင့် ရှောင်တန်း သုံးယောက် ရှိနေပြီဖြစ်သောကြောင့် သူမအနေဖြင့် စိတ်ထဲတွင်သာ တွေးနေနိုင်ပြီး အခြားမည်သည့်အရာကိုမျှ ပြုလုပ်နိုင်စွမ်း မရှိခဲ့ပေ။ဤပိတ်လှောင်နေသော စိတ်အမောများကို စိတ်ထဲတွင်သာ အတင်းအဓမ္မ မြိုသိပ်ထားရုံမှတစ်ပါး အခြားမရှိတော့ပေ။

သို့သော် စိတ်ထဲ၌ မြိုသိပ်လိုက်သည်နှင့် ရှေ့မှောက်ရှိ ရုပ်ရည်ချောမောပြီး တည်ငြိမ်သော အမူအရာရှိသည့် ချန်ကောဟွားကို မြင်လိုက်ရသည်။

တစ်ဖက်လူတွင် စားစရာများရှိရုံသာမက သုံးစရာများလည်းရှိပြီး ဘေးတွင်လည်း စက်ရုံမှ ခေါင်းဆောင်က အဖော်ပြုပေးနေသေးသည်။ ချင်ဟွိုင်ယွီသည် ချန်ကောဟွားကို မုန်းတီးနေသော်လည်း မနေနိုင်ဘဲ သက်ပြင်းချမိသွားသည်။

ဘာကြောင့် လူသားချင်း အတူတူကို ချန်မိသားစုနဲ့ ကျားမိသားစုရဲ့ ကွာဟချက်က ဒီလောက်တောင် ကြီးမားနေရတာလဲ

ကွာဟချက် ပိုကြီးမားလေလေ ချင်ဟွိုင်ယွီမှာ ဤနေရာတွင် ပို၍ မနေချင်တော့လေလေ ဖြစ်သည်။

"အမေ တခြားလူက မကူညီချင်ရင်လည်း စားစရာကို ငါတို့ တခြားနည်းလမ်း စဉ်းစားကြတာပေါ့"

ဟု ချင်ဟွိုင်ယွီက မတ်တတ်ရပ်ကာ ပြောလိုက်သည်။

"သွားချင် နင်သွား၊ ဒီဆန်တွေကို ငါ တစ်စေ့ချင်း ကောက်ထားတာ၊ ဒီအတိုင်း သူများလုသွားတာကိုတော့ အဖြစ်မခံနိုင်ဘူး"

ကျားကျန်းရှီက ချင်ဟွိုင်ယွီကို စိုက်ကြည့်ရင်း ပြောလိုက်သည်။

သူမသည် ရှေးယခင်ကတည်းက မျက်နှာပြောင်တိုက်လာခဲ့သူဖြစ်ပြီး ကိုယ်ကျင့်တရားဆိုသည်မှာလည်း လုံးဝ စွဲဆောင်မှုမရှိသော အရာဖြစ်ရာ မည်သူကပင် ဖျောင်းဖျစေကာမူ အလွယ်တကူ လက်လျှော့မည်မဟုတ်သည်မှာ သဘာဝပင် ဖြစ်သည်။

ထိုအချိန်တွင် ရီကျုံးဟိုင်က သက်ပြင်းတစ်ချက် ချလိုက်သည်။ အကြောင်းမှာ ချန်ကောဟွားသည် ရန်စရန် လွယ်ကူသူ မဟုတ်ကြောင်းကို သူ သိရှိထားပြီး စက်ရုံမှ ခေါင်းဆောင်ကလည်း ဘေးတွင် ရှိနေသဖြင့် ဤကိစ္စကို လှပစွာ ကိုင်တွယ်ဖြေရှင်းမှ ရမည်ဖြစ်သောကြောင့်ဖြစ်သည်။ထို့ကြောင့် သူသည် ချန်ကောဟွား၏ရှေ့သို့ ထပ်မံလျှောက်သွားပြီး မျက်နှာကို တည်ကြည်စွာထားကာ တိုင်ပင်ဆွေးနွေးသည့် လေသံဖြင့် ပြောလိုက်သည်။

"ကောဟွား အရင်က ငါတို့ ခြံဝင်းတစ်ခုလုံး အစည်းအဝေး လုပ်ခဲ့ဖူးတယ်၊ စက်ရုံက ချမှတ်ထားတဲ့ အချင်းချင်း ကူညီရိုင်းပင်းဖို့နဲ့ သဟဇာတဖြစ်စွာ တိုးတက်ဖို့ဆိုတဲ့ လမ်းညွှန်ချက်ကို တုံ့ပြန်တဲ့အနေနဲ့ ငါတို့ ခြံဝင်းက လူတွေအားလုံး ကျားမိသားစုကို ကူညီဖို့ နည်းလမ်းရှာခဲ့ကြတယ်၊ အခု မင်းတို့ မိသားစုပဲ မကူညီရသေးတာ၊ ဒါပေမဲ့ မင်းကလည်း မကူညီချင်ဘူးလို့ ပြောထားပြီးမှတော့ သူတို့ကို ဒီဆန်အိတ်ကို သုံးပြားနဲ့ ရောင်းပေးလိုက်ပါ ၊အခု ဒုတိယစက်ရုံမှူးလီလည်း ရှိနေတာဆိုတော့ မင်းက ဒီလို ကူညီတတ်တယ်ဆိုရင် ခေါင်းဆောင်တွေကလည်း မင်းကို အထင်ကြီးသွားမှာပေါ့"

ရီကျုံးဟိုင်ဆိုသောလူက မိမိရှေ့သို့ အပြေးလာပြီး ကိုယ်ကျင့်တရားဖြင့် အကျပ်ကိုင်နေရုံသာမက စက်ရုံမှ ခေါင်းဆောင်ကိုပါ ဆွဲသွင်းပြောဆိုနေသည်ကို ထပ်မံကြားလိုက်ရသောအခါ ချန်ကောဟွား၏ စိတ်ထဲတွင် အလွန်တရာ ရွံရှာသွားမိသည်။ ချန်ကောဟွားသည် တိုက်ရိုက်ပင် ခပ်ဖွဖွ ရယ်မောလိုက်သည်။

"ဟက်ဟက်"

ရယ်မောသံတွင် သရော်လှောင်ပြောင်သည့် အဓိပ္ပာယ်များ ပါဝင်နေသည်ကို ကြားလိုက်ရသောအခါ ရီကျုံးဟိုင်၏ မျက်နှာမှာ ချက်ချင်းပင် အရောင်အဆင်း ပျက်သွားသည်။

သို့သော် ချန်ကောဟွားက လုံးဝ ကြောက်ရွံ့ခြင်းမရှိဘဲ ဒေါသတကြီး ပြန်လည် တုံ့ပြန်လိုက်သည်။

"ငါပြောမယ် ဦးလေးကြီးရီ၊ ခင်ဗျားရဲ့ ပါးစပ်ကတော့ တကယ်ကို အပြောကောင်းတာပဲ၊ ဒါပေမဲ့ နောက်ကွယ်က လုပ်ရပ်တွေကကျတော့ ဘာလို့ အဲဒီလောက်တောင် အရုပ်ဆိုးနေရတာလဲ"

"ငါ့ရဲ့ ဒီထိပ်တန်းအဆင့် ဆန်တွေကို ပိုက်ဆံပေးပြီး ဝယ်လို့ရမယ် ထင်နေတာလား"

"ဒါက ဆန်အိတ်ငယ်လေး တစ်အိတ်ဆိုပေမဲ့ သုံးပြားပဲ တန်ဖို့ဆိုတာ မဖြစ်နိုင်ဘူး"

"သုံးပြားဆိုတာကို မပြောနဲ့ သုံးဆယ် ပေးရင်တောင် ငါမရောင်းဘူး"

"ပြီးတော့ငါက ခင်ဗျားကို သုံးပြား ပေးမယ်၊ ခင်ဗျားက ငါ့ကို ထိပ်တန်းအဆင့် ဆန် ကျင်းတစ်ဝက် သွားဝယ်ပေးမလား"

"ဒါ့အပြင် ငါက ဘာလို့ ရောင်းပေးရမှာလဲ၊ ငါက ဘာလို့ လူကောင်း လုပ်ပေးရမှာလဲ၊ ငါလုပ်တဲ့ ကောင်းမှုကုသိုလ်ကိုတောင် ခင်ဗျားအတွက် ဂုဏ်ပြုဆိုင်းဘုတ် တင်ပေးရဦးမယ်ဆိုတော့ ခင်ဗျားကိုယ်ခင်ဗျား အရှက်မရှိဘူးလို့ မထင်ဘူးလား"

"ခင်ဗျား ရီကျုံးဟိုင်က ကောင်းမှုကုသိုလ် လုပ်ချင်တယ်ဆိုရင် ငါသေချာပေါက် တားမှာ မဟုတ်ဘူး၊ မြန်မြန်သွားပြီး ကောင်းတာ သွားလုပ်လိုက်"

"ဒါပေမဲ့ ငါ့အပေါ်ကိုတော့ ကိုယ်ကျင့်တရားနဲ့ လာပြီး အကျပ်မကိုင်ဖို့ မျှော်လင့်တယ်"

"ငါတော့ ရွံဖို့ကောင်းတယ်လို့ပဲ ထင်တယ်"

"ဒါပေမဲ့ တကယ်လို့ ခင်ဗျားက ငါ့ကို ဒီဆန်အိတ်လေးကို သုံးပြားနဲ့ ကျားကျန်းရှီဆီ ရောင်းစေချင်တယ်ဆိုရင်လည်း မဖြစ်နိုင်တာတော့ မဟုတ်ပါဘူး"

"ဒါပေမဲ့ ကနဦးအနေနဲ့ ငါနဲ့ ငါ့မိန်းမက နောင်ဆို ကလေးတွေ သေချာပေါက် ယူကြဦးမှာ၊ အိမ်က နည်းနည်း သေးနေတော့ သေချာပေါက် နေရထိုင်ရ အဆင်မပြေဘူး၊ တကယ်လို့ ခင်ဗျားက ငါ့ကို ဒီကိစ္စ ကူညီပေးနိုင်မယ်ဆိုရင် ခင်ဗျားတို့အိမ်ကို သုံးပြားနဲ့ ငါ့ဆီ ရောင်းပေးလိုက်၊ အဲဒါဆိုရင် ငါနှစ်ခွန်း မပြောတော့ဘူး၊ ဒီဆန်အိတ်ကို တိုက်ရိုက် ရောင်းပေးလိုက်မယ်"

"ဒါပေမဲ့ ခင်ဗျားကိုယ်တိုင် မလုပ်နိုင်ဘူးဆိုရင်တော့ ယင်ကောင်တစ်ကောင်လို ငါ့ရှေ့မှာ လာပြီး တဝီဝီနဲ့ ပတ်မနေနဲ့"

ဤစကားများ ထွက်ပေါ်လာသည်နှင့် ရီကျုံးဟိုင်မှာ ဒေါသထွက်လွန်း၍ တစ်ကိုယ်လုံး တဆတ်ဆတ် တုန်ရီသွားသည်။

ချန်ကောဟွားက သူ့လို ဦးလေးကြီးတစ်ယောက်၏ မျက်နှာကို ဤမျှအထိ မထောက်ထားလိမ့်မည်ဟု သူ တစ်ခါမျှ မတွေးမိခဲ့ပေ။ ခေါင်းဆောင်၏ ရှေ့မှောက်တွင်ပင် သူ့အား တဝီဝီမြည်နေသော ယင်ကောင်တစ်ကောင်ဟု ပြောဆိုဝံ့သည်အထိပင်ဖြစ်သည်။ သူ၏မျက်နှာကို ဗြောင်ကျကျပင် ခြေဖဝါးအောက်၌ ဖိနင်းခံလိုက်ရခြင်း ဖြစ်သည်။

ထို့မျှမကသေး နောက်ဆုံးတွင် တန်ပြန်တိုက်ကွက်တစ်ခုပါ ထုတ်သုံးသွားပြီး သူ့ကိုပင် တိုက်ရိုက် ကိုယ်ကျင့်တရားဖြင့် အကျပ်ကိုင်သွားခဲ့သေးသည်။ ဤသည်မှာ သူ၏ မျက်နှာကို ရိုက်ချလိုက်ပြီး ကြောင်အမ်းသွားစေသည်အထိ ဖြစ်သွားစေသည်။

ရီကျုံးဟိုင် တစ်ကိုယ်လုံး ဒေါသထွက်လွန်း၍ တုန်ရီနေချိန်တွင် ဘေးပတ်ဝန်းကျင်ရှိ လူအများစုမှာမူ ရွှင်လန်းဝမ်းမြောက်စွာ ရယ်မောလာခဲ့ကြသည်။

……

အခန်း (၂၄) မထွက်သွားသေးဘူးလား၊ လုံခြုံရေးဌာနကို သွားခေါ်လိုက်စမ်း။

ချန်ကောဟွားက ရီကျုံးဟိုင်ကို ပြန်လည်ချေပလိုက်ပြီးနောက်တွင် ခြံဝင်းအတွင်းရှိ ဝိုင်းအုံကြည့်ရှုနေကြသော လူအားလုံးသည် ရွှင်မြူးစွာ ရယ်မောလိုက်ကြသည်။ ခြံဝင်းအတွင်းရှိ လူများအတွက်မူ ရီကျုံးဟိုင်၏ လုပ်ရပ်များက လွန်ကဲလွန်းလှသည်ဟု ခံစားရသည်။

လက်ရှိမြင်တွေ့နေရသော အခြေအနေများအရလည်း လူတိုင်းက ရီကျုံးဟိုင်အပေါ် ကြီးမားသော အမြင်မကြည်လင်မှုများ ရှိနေကြကြောင်း အမှန်တကယ် ပေါ်လွင်နေသည်။ သို့မဟုတ်ပါက လူတိုင်း သူ့အား ဝိုင်းဝန်းလှောင်ပြောင်နေကြမည် မဟုတ်ပေ။

အမှန်တကယ်တွင် ဦးလေးကြီးရီက ကျားကျန်းရှီအား ကူညီထောက်ပံ့ပေးသည့် ကိစ္စနှင့်ပတ်သက်၍ ဝေဖန်မှုများစွာကို ဖြစ်ပေါ်စေသည်။

ကျားကျန်းရှီအား မကူညီလိုသော လူများစွာမှာလည်း ရီကျုံးဟိုင်၏ ကိုယ်ကျင့်တရားအရ အကျပ်ကိုင်မှုအောက်တွင် မလွှဲမရှောင်သာ ကူညီခဲ့ကြရလေသည်။

ကူညီထောက်ပံ့ပြီးနောက်တွင် ကျားမိသားစုအနေဖြင့် အခက်အခဲများကို ကျော်ဖြတ်ပြီးပါက မိမိတို့ အခက်အခဲကြုံတွေ့ရချိန်တွင် ကူညီကယ်တင်မည့်လက်တစ်စုံ ကမ်းလင့်လာမည်ဟု လူတိုင်းက သဘာဝကျစွာ မျှော်လင့်ခဲ့ကြသည်။

သို့သော် မည်သူက ထင်မှတ်ထားခဲ့မည်နည်း။ ကျားကျန်းရှီအား ကူညီပေးပြီးနောက် ပုံမှန်နေ့ရက်များတွင် ကျားမိသားစုထံမှ မည်သည့်အကူအညီမျှ မရရှိခဲ့သည့်အပြင် လူတိုင်းက အခြေခံအကျဆုံးသော လေးစားမှုကိုပင် မရရှိခဲ့ကြပေ။

ညသန်းခေါင်ယံအချိန်များတွင်ပင် ကျားမိသားစုအိမ်မှ ကျားကျန်းရှီ၏ ဆဲရေးတိုင်းထွာသံများကို လူတိုင်း ကြားနေခဲ့ရသေးသည်။ လူအတော်များများမှာ ဒေါသထွက်လွန်း၍ အိပ်ရေးပင် ပျက်ခဲ့ကြရသည်။

လူတို့၏ နှလုံးသားသည် အသားနှင့် တည်ဆောက်ထားခြင်းသာ ဖြစ်သည်။ ဤအရာများကို ကြုံတွေ့ပြီးနောက်တွင် ပုံမှန်လူတစ်ယောက်အနေဖြင့် မည်သူက ကျားကျန်းရှီတို့ မိသားစုကို ကူညီလိုမည်နည်း။

သို့သော် ဤကဲ့သို့သော အခြေအနေမျိုးတွင်မှ ရီကျုံးဟိုင်က အလကားနေရင်း ဘက်လိုက်ကူညီရုံသာမကဘဲ ပြဿနာများကို ဖုံးဖိဖြေရှင်းရန် အလွန်နှစ်သက်နေပြန်သည်။

ထို့ကြောင့် ယခု ချန်ကောဟွားက ရီကျုံးဟိုင်အား ဒေါသတကြီး ပြန်လည်ချေပလိုက်ခြင်းသည် ချန်ကောဟွားက တစ်ဝင်းလုံးရှိ လူများကို ကိုယ်စားပြု၍ အရှက်မရှိသော ရီကျုံးဟိုင်ကို ဆဲရေးလိုက်ခြင်းဟုဆိုလျှင် ပို၍မှန်ကန်ပေလိမ့်မည်။

လျိုဟိုင်ကျုံးသည် ချန်ကောဟွားနှင့် ရန်ငြိုးရန်စ ရှိနေခဲ့သော်လည်း ချန်ကောဟွားက ရီကျုံးဟိုင်ကို ပြန်လည်ချေပလိုက်သည်ကို ရင်ဆိုင်တွေ့ရှိရချိန်တွင် သူ၏ စိတ်ထဲ၌ အလွန် ဝမ်းသာပျော်ရွှင်သွားသည်။

သို့သော်လည်း အပေါ်ယံတွင် ရိုးသားဖြောင့်မတ်ဟန်ဆောင်နေသော ရီကျုံးဟိုင်နှင့် နှိုင်းယှဉ်လျှင် သူ့အား နာကျင်စေခဲ့ဖူးသော ချန်ကောဟွားက ပို၍ မုန်းတီးစရာကောင်းကြောင်းကိုလည်း သူ နားလည်ထားသည်။ ထို့ကြောင့် သူက ပြုံးလိုက်ရုံသာ ပြုံးလိုက်ပြီး မည်သည့်စကားမျှ ထပ်မပြောခဲ့ချေ။

ယန်ပုကွေ့ကမူ ထိုမျှလောက် များများစားစား မတွေးတောဘဲ တိုက်ရိုက်ပင် ကျယ်လောင်စွာ ရယ်မောလိုက်လေသည်။ သူသည် ပထမအချက်အနေဖြင့် အခွင့်အရေးယူတတ်ပြီး ဒုတိယအချက်အနေဖြင့် မျက်နှာပျက်ခံလေ့မရှိသူ ဖြစ်သည်။

သို့သော် ရီကျုံးဟိုင်က သူသည် ကျောင်းဆရာတစ်ဦးဖြစ်သည်ဟူသော အကြောင်းပြချက်ဖြင့် ကျားကျန်းရှီကို ဦးဆောင်ကူညီရန် တောင်းဆိုခဲ့ပြီး နောင်တစ်ချိန်တွင် ကျားကျန်းရှီက ကျေးဇူးပြန်ဆပ်မည်ဖြစ်ကြောင်းကိုလည်း ကတိပေးခဲ့သည်။

သို့သော် ရလဒ်အနေဖြင့် ကူညီပေးသည့် ကိစ္စနှင့်ပတ်သက်၍ ယန်ပုကွေ့မှာ အတော်လေး နစ်နာခဲ့ရသည်ဟု ဆိုနိုင်သည်။ နစ်နာမှုများစွာ ရှိခဲ့သော်လည်း သူက မည်သည့်စကားမျှ မဆိုသာခဲ့ပေ။ အဘယ်ကြောင့်ဆိုသော် တတိယဦးလေးဟူသော ဂုဏ်ပုဒ်က ရှိနေသောကြောင့် ညည်းညူစကားအချို့ ဆိုမိပါက လူတိုင်း၏ တံတွေးခွက်တွင် ပက်လက်မျောသွားနိုင်လေသည်။

ထို့ကြောင့် ဤအခြေအနေအောက်တွင် ချန်ကောဟွားထံ၌ ရီကျုံးဟိုင် အရှက်ကွဲသွားသည်ကို သူ မြင်တွေ့လိုက်ရသောအခါ အပျော်ရွှင်ဆုံး ရယ်မောနိုင်သူဖြစ်လာခဲ့သည်ဟု ဆိုနိုင်သည်။

ရီကျုံးဟိုင်အကြောင်းကို ဆက်ပြောရမည်ဆိုလျှင် တစ်ဝင်းလုံးရှိ လူများက သူ့ကို မကူညီကြသည့်အပြင် ဝိုင်းဝန်းလှောင်ပြောင်နေကြသည်ကို သူ တွေ့ရှိသွားလေသည်။

ထို့အပြင် ချန်ကောဟွားက အနည်းငယ်မျှပင် မျက်နှာမထောက်ထားသောကြောင့် စိတ်ထဲတွင် ဒေါသပေါက်ကွဲသွားသည့်တိုင် လက်ရှိအခြေအနေကို သူကိုယ်တိုင် ထိန်းချုပ်နိုင်စွမ်း မရှိတော့ကြောင်းကိုပါ နားလည်သွားသည်။ ထို့ကြောင့် သူ၏ အကြည့်များကို ဒုတိယစက်ရုံမှူးလီထံသို့ လှည့်လိုက်လေသည်။

စောစောက သူလုပ်ခဲ့သည်မှာ စက်ရုံ၏ လမ်းညွှန်ချက်ကို လိုက်နာဆောင်ရွက်ခဲ့ခြင်းဖြစ်သောကြောင့် ဒုတိယစက်ရုံမှူးလီက သူ့အား အသေအချာ ထောက်ခံမည်ဟု သူ ယုံကြည်ထားသည်။

ချက်ချင်းပင် သူက

"တကယ်ကို ပံ့ပိုးပေးလို့မရတဲ့ အသုံးမကျတဲ့ကောင်ပဲ၊ ငါက စေတနာနဲ့ လူတွေကြားမှာ ဘယ်လိုနေထိုင်လုပ်ကိုင်ရမယ်ဆိုတာကို သင်ပေးနေတာ၊ မင်းက အကျိုးအကြောင်းမသင့်ဘဲ ပြန်ငြင်းနေသေးတယ်၊ အခြေခံ ကိုယ်ချင်းစာတရားလေးတောင် မရှိဘူး၊ အဲဒါဆိုရင်လည်း ငါ မင်းနဲ့ စကားများများ မပြောတော့ဘူး၊ စက်ရုံမှူးလီကိုပဲ အကဲဖြတ်ခိုင်းလိုက်ကြတာပေါ့" ဟု ပြောလိုက်သည်။

ပြောပြီးနောက်တွင် ရီကျုံးဟိုင်က ဒုတိယစက်ရုံမှူးလီအား မျှော်လင့်တကြီးဖြင့် စိုက်ကြည့်နေလိုက်သည်။

အခြားသူများကလည်း ဆန်ကြိတ်စက်ရုံထဲရှိ ခေါင်းဆောင်ကို လှမ်းကြည့်လိုက်ကြပြီး ချန်ကောဟွားအား ဆက်လက်၍ ဒေါသတကြီး ဆူပူကြိမ်းမောင်းမည်ကို မျှော်လင့်နေကြကာ အဆိုးဆုံးအနေဖြင့် ကိုယ်ချင်းစာတရားမရှိသော ချန်ကောဟွားအား ပညာပေးဆုံးမလိမ့်မည်ဟု မျှော်လင့်နေကြသည်။

သို့သော် ဤလူများ မသိရှိကြသောအရာမှာ ဒုတိယစက်ရုံမှူးလီ စက်ဘီးတွန်း၍ ရောက်ရှိလာရခြင်း၏ အကြောင်းအရင်းပင် ဖြစ်သည်။

လွန်ခဲ့သောရက်အနည်းငယ်က အလုပ်သမားများထံမှ ချန်ကောဟွားနှင့် စက်ရုံမှူးဟောင်းတို့ ပတ်သက်မှုရှိကြောင်း ကြားသိခဲ့ရသောကြောင့် ယနေ့ ချန်ကောဟွားက သူ့ထံသို့ စက်ဘီးလာလဲချိန်တွင် စက်ဘီးကို ကိုယ်တိုင်ကိုယ်ကျ လာပို့ပေးရန် ဆုံးဖြတ်ချက်ချခဲ့ခြင်း ဖြစ်သည်။

မည်သို့ပင်ဆိုစေကာမူ ဒုတိယစက်ရုံမှူးလီက သူသည် စက်ရုံမှူးဟောင်းထံတွင် ကောင်းသတင်းအချို့ ပြောပေးနိုင်မည်ဟု မျှော်လင့်ထားဆဲဖြစ်ပြီး တစ်နေ့နေ့တွင် ရာထူးတိုးလာနိုင်မည်ဟုပင် တွေးထားခဲ့သည်။

ယခုလိုအခြေအနေမျိုးတွင် သူက ရီကျုံးဟိုင်ကို မည်သို့ ကူညီမည်နည်း။ ထို့ကြောင့် ရီကျုံးဟိုင်က ဘောလုံးကို သူ့ထံ ကန်ပို့လိုက်ချိန်တွင် သူက ခပ်အေးအေးပင် ပြောလိုက်သည်။

"ဒီဆန်တွေက ရဲဘော်ချန်ကောဟွားရဲ့ဟာတွေလေ၊ သူတို့မှာ စီမံခန့်ခွဲပိုင်ခွင့် အပြည့်အဝ ရှိတာပေါ့၊ ဒါပေမဲ့ ခင်ဗျားပြောတာလည်း မမှားပါဘူး၊ တစ်ပါးသူကို ကူညီရတာ နှစ်သက်တဲ့ စိတ်ဓာတ်ကို မြှင့်တင်ဖို့က ငါတို့ စက်ရုံရဲ့ ရည်ရွယ်ချက်ပဲလေ၊ ခင်ဗျားကပဲ ဦးဆောင်ပြီး အကောင်အထည်ဖော်လိုက်ရင်ရော ဘယ်လိုလဲ"

ဤစကားတစ်ခွန်းက ဒုတိယစက်ရုံမှူးလီ၏ သဘောထားကို တိုက်ရိုက်ပင် ရှင်းလင်းစွာ ဖော်ပြလိုက်ခြင်းဖြစ်သည်။

အခြားသူများကို ကူညီလိုစိတ်သည် ချီးကျူးထိုက်သော်လည်း ရီကျုံးဟိုင်အနေဖြင့် ထိုမျှလောက် ပြောဆိုနေမှတော့ အနည်းဆုံး ဦးဆောင်သူအဖြစ် လုပ်ဆောင်သင့်သည် မဟုတ်ပါလော။

သို့သော် ရီကျုံးဟိုင်က ချန်ကောဟွားကို ဆန်များ ပေးဆပ်ခိုင်းပြီး သူကိုယ်တိုင်က လူအများ၏ ကျေးဇူးတင်မှုကို ရယူရန် တွေးထားခဲ့သဖြင့် ဤတောင်းဆိုချက်ကို မည်သို့ လက်ခံနိုင်မည်နည်း။

သို့သော် ဤစကားသည် ဒုတိယစက်ရုံမှူးလီ ပြောဆိုသောစကားဖြစ်သဖြင့် သူက မည်သို့မျှ ပြန်လည်ချေပရဲခြင်း မရှိခဲ့ချေ။ ထို့ကြောင့် အရှက်ရသွားပြီးနောက်တွင် သူလည်း ဆက်လက်၍ မနေနိုင်တော့ချေ။ သူ၏ ဇနီးဖြစ်သူကို ခေါ်ဆောင်ကာ ဤအရှက်ရစရာကောင်းသော နေရာမှ ခေါင်းငိုက်စိုက်ချလျက်သာ ထွက်ခွာသွားရလေတော့သည်။

ရီကျုံးဟိုင် ထွက်သွားပြီးနောက်တွင် ကျားကျန်းရှီကလည်း သူမ၏ အကြီးမားဆုံးသော ကူညီမည့်သူ မရှိတော့ကြောင်းကို သိရှိသွားသည်။ ဤကိစ္စ မည်သို့ ဆက်လက်ဖြစ်ပေါ်မည်ကို မသိရှိရသော်လည်း သူမ၏ စိတ်ထဲတွင် ဆုတ်ခွာလိုစိတ်များ ပေါ်ပေါက်လာခဲ့လေသည်။

ချန်ကောဟွားကမူ ကျားကျန်းရှီအား အဖက်မလုပ်ခဲ့ပေ။ ထို့အစား ဆန်အိတ်ကို ကိုင်ထားသော ဆန်ကြိတ်သည့်အမျိုးသမီးအား တိုက်ရိုက်ပင် ပြောလိုက်သည်။

"ဆန်ကြိတ်တဲ့အမျိုးသမီး၊ ဒီကျန်နေတဲ့ ဆန်တွေက ပုံမှန် လေလွင့်ဆုံးရှုံးမှု ဖြစ်နေမှတော့ ဒီဆန်တွေကို ကြမ်းတမ်းတဲ့ ကောက်ပဲသီးနှံတွေနဲ့ လဲလှယ်လိုက်ပါ၊ ပြီးတော့ ထမင်းမစားရတဲ့ ကလေးတွေကို ကူညီလိုက်ပါ"

ဆန်ကြိတ်သည့်အမျိုးသမီးက ဤစကားကို ကြားသောအခါ ချက်ချင်းပင် စိတ်ထဲ၌ ပန်းပွင့်များ ဖူးပွင့်သွားသကဲ့သို့ ဝမ်းသာပျော်ရွှင်သွားသည်။

မြေပြင်ပေါ်တွင် စွန့်ပစ်ထားသော ဆန်များဖြင့် ထမင်းမစားနိုင်သော ကလေးများကို ကယ်တင်ခြင်းသည် သမဝါယမအသင်းက ချမှတ်ထားသော စည်းကမ်းတစ်ခုဖြစ်ပြီး သူမ ကူညီပေးသော ကလေးအရေအတွက် လုံလောက်စွာ များပြားပါက ခေါင်းဆောင်များက သူမအား အသေအချာ ချီးကျူးကြမည်ဖြစ်သည်။

ထို့ကြောင့် ချန်ကောဟွား၏ စကားသည် သူမအတွက် အကျိုးကျေးဇူး ရှိနေပေသည်။ ချက်ချင်းပင် သူမက ပြုံးရွှင်စွာဖြင့် သဘောတူလိုက်သည်။ထိုသို့ပြောပြီးနောက်တွင် ဆန်ကြိတ်သည့်အမျိုးသမီးက ကျားကျန်းရှီတို့ နှစ်ယောက်အား ရက်စက်ကြမ်းကြုတ်စွာဖြင့်

"နင်တို့တွေ ထွက်သွားကြစမ်း၊ ငါ့ဆီမှာ နင်တို့ကို မလိုအပ်ဘူး" ဟု အော်ဟစ်လိုက်သည်။

"ဟင့်အင်း၊ နင် ငါ့ကို ဆန် ပြန်မပေးရင် နင် ငါ့ကို ရိုက်သတ်ရင်တောင် ငါ ဒီကနေ ထွက်မသွားဘူး"

ကျားကျန်းရှီက ပန့်ကန့်အတွက် သူမ ရယူထားသော ရိက္ခာများကို ချန်ကောဟွားက ထမင်းမစားနိုင်သော အခြားကလေးများအား ကူညီရန် ယူဆောင်သွားမည်ကို ကြားလိုက်ရလေသည်။ ဤအရာက သူမ၏ စိတ်အခြေအနေကို တစ်ခဏချင်းအတွင်း ပေါက်ကွဲသွားစေရန် လုံလောက်ပေသည်။ ထို့ကြောင့် သူမက အရှက်မရှိဘဲ အော်ဟစ်ဆူပူလာပြန်သည်။

"ယောက္ခမကြီး၊ ငါတို့ သွားသင့်နေပြီ"

ချင်ဟွိုင်ယွီသည် သူမ၏အပြုအမူကို မြင်တွေ့ပြီးနောက် မျက်နှာအမူအရာမှာ အလွန်တရာ အကျည်းတန်သွားသည်။ ထို့အပြင် စက်ရုံမှ ခေါင်းဆောင်ကပင် သဘောထားကို ဖော်ပြနေပြီဖြစ်ရာ ဤအတိုင်း ဆက်လက်ဆူပူနေပါက နောင်တစ်ချိန်တွင် သူမကိုယ်တိုင် စက်ရုံသို့ အလုပ်သွားလုပ်ရန် အစားထိုးဝင်ရောက်ရာ၌ ၁၉ ယွမ်ဆို‌ေသာလစာကို မဆိုထားနှင့် ဝမ်းရေးပြည့်စုံရန်ပင် ပြဿနာကြီးတစ်ရပ် ဖြစ်လာနိုင်သည်။ထို့ကြောင့် ဤအရာများကို တွေးမိသောအခါ သူမက တစ်ခွန်းအော်ခေါ်ပြီးနောက် ခေါင်းလှည့်ကာ ထွက်သွားခဲ့ပြီး ကျားကျန်းရှီအား ဂရုမစိုက်တော့ချေ။

ချင်ဟွိုင်ယွီက အော်ဟစ်ပြီးနောက် တိုက်ရိုက်ပင် ထွက်သွားသည်ကို မြင်တွေ့လိုက်ရသောအခါ ကျားကျန်းရှီက စိတ်ထဲမှနေ၍ အသုံးမကျသော အမှိုက်ဟူ၍ တိုးတိုးလေး ဆဲရေးလိုက်သည်။ ထို့နောက် ချင်ဟွိုင်ယွီ၏ နောက်သို့လိုက်ကာ ဆန်ကြိတ်စက်ရုံထဲမှ ထွက်သွားခဲ့လေသည်။

သို့သော် သူမက ဤမျှလွယ်ကူစွာဖြင့် အဆုံးသတ်လိုက်ရန် မလိုလားခဲ့ချေ၊ ခေါင်းဆောင်တစ်ဦးရှိနေကြောင်းကိုလည်း သူမ သိရှိထားသောကြောင့် ပြဿနာကို ကြီးကျယ်အောင် လုပ်ရန်လည်း မကောင်းပေ။

ထို့ကြောင့် ဒုတိယစက်ရုံမှူးလီ ထွက်သွားမည့်အချိန်ကို စောင့်ဆိုင်းပြီးနောက်မှ ဤနေရာသို့ ပြန်လာကာ ဆက်လက်၍ ရမ်းကားရန် သူမ ရည်ရွယ်ထားလိုက်သည်။ သို့သော် ချန်ကောဟွားက ကျားကျန်းရှီကဲ့သို့သော တိရစ္ဆာန်တစ်ကောင်ကို အလိုလိုက်ထားရန် မလိုလားခဲ့ပေ။

သူက ချက်ချင်းပင် ဘေးနားရှိ ဒုတိယစက်ရုံမှူးလီအား မေးလိုက်သည်။

"စက်ရုံမှူး၊ နေခင်းကြောင်တောင်ကြီးမှာ တခြားသူရဲ့ ပစ္စည်းကို လုယူဖို့ ပြင်ဆင်နေတဲ့ လူရှိတယ်၊ ဒီလိုကိစ္စမျိုးကို လုံခြုံရေးဌာနက တာဝန်ယူဖြေရှင်းပေးသလား"

ဒုတိယစက်ရုံမှူးလီက ခေါင်းညိတ်သည်။

"ပစ္စည်းလုတဲ့ကိစ္စကို သေချာပေါက် တာဝန်ယူရမှာပေါ့၊ အချိန်ကျရင် ငါသွားပြီး အကြောင်းကြားလိုက်မယ်၊ အဲဒီအခါကျရင် ဒီလူနှစ်ယောက်လုံးကို ခေါ်သွားလိမ့်မယ်"

ဤမြင်ကွင်းကို မြင်တွေ့လိုက်ရသောအခါ ကျားကျန်းရှီနှင့် ချင်ဟွိုင်ယွီတို့မှာ တုံ့ပြန်နိုင်စွမ်း မရှိတော့ပေ။

ဟယ်ယွီကျူးက အရင်ဆုံး ငြိမ်မနေနိုင်တော့ဘဲ ဒုတိယစက်ရုံမှူးလီ၏ အရှေ့သို့ အလျင်စလို လျှောက်သွားကာ လက်ယမ်းပြပြီး ပြောလိုက်သည်။

"စက်ရုံမှူး စက်ရုံမှူး၊ ခင်ဗျားတို့ နှစ်ယောက်လည်း အဲဒီလောက်ကြီး ဒေါသမထွက်ကြပါနဲ့၊ ငါတို့အားလုံးက ခြံဝင်းတစ်ခုတည်း စက်ရုံတစ်ခုတည်းက လူတွေချည်းပါပဲ၊ ဒီလိုလုပ် ငါ့ကို တစ်မိနစ်လောက် အချိန်ပေးပါ၊ တစ်မိနစ်အတွင်း ငါဖြေရှင်းပေးပါ့မယ်"

……