အခန်း ၃၀၇

အခန်း (၃၀၇) မေးရိုးပြုတ်ကျမတတ် အံ့ဩသွားကြခြင်း... ဒါက ဘာကြီးလဲ

ဒရုန်းများက ကောင်းကင်ယံသို့ မြင့်မားစွာ ပျံတက်သွားပြီး သစ်တော၏ မြင်ကွင်းကို အပေါ်စီးမှ ရိုက်ကူးနေသည်။ ရွှီယန်က သက်ရှိကို ရှာဖွေသည့် စနစ်ကို ရွေးချယ်ထားလိုက်သည်။

ဒရုန်း ခြောက်စင်းက အရပ်လေးမျက်နှာသို့ လူစုခွဲကာ ပျံသန်းသွားသည်ကို မြင်သောအခါ ရဲများမှာ အချင်းချင်း ကြည့်ကာ မှင်တက်သွားကြတော့သည်။

'ဒါက ဘယ်လို အခြေအနေကြီးလဲ'

ရုတ်တရက် သူတို့၏ လက်ထဲမှ ရဲခွေးများကပင် သိပ်ပြီး အသုံးမဝင်တော့သလို ခံစားလိုက်ကြရသည်။ ဤနည်းလမ်းက အနည်းငယ်တော့ လွန်လွန်းနေသည် မဟုတ်ပါလော။

ရဲတပ်ဖွဲ့၏ နည်းပညာ အဖွဲ့တွင်လည်း ဤကဲ့သို့သော ပစ္စည်းမျိုး ရှိသော်လည်း ထုတ်လုပ်မှု ကုန်ကျစရိတ်က ယွမ် တစ်သန်းကျော် ရှိသဖြင့် သူတို့အနေဖြင့် လုံးဝ အသုံးပြုနိုင်မည် မဟုတ်ချေ။

ထို့အပြင် ဤတစ်ကြိမ်က ရဲတပ်ဖွဲ့ အတော်များများ အရပ်လေးမျက်နှာမှ ဝိုင်းရံထားခြင်း ဖြစ်ရာ ဤမျှ အဆင့်မြင့်သော နည်းပညာ ပစ္စည်းများကို အသုံးပြုရန်လည်း မလိုအပ်ပေ။

လျိုမင်က ရွှီယန်၏ ဘေးတွင် ရပ်ကာ ကွန်ပျူတာ မျက်နှာပြင်ကို ကြည့်နေသော ရွှီယန်ကို မနေနိုင်ဘဲ မေးလိုက်သည်။

"ရွှီယန်... ဒါက ဘာပစ္စည်းလဲ... အရမ်း အစွမ်းထက်တာပဲ... ဒီဒရုန်းတွေက လူရှာလို့ ရတာလား"

ရွှီယန်က ပြန်ဖြေလိုက်သည်။

"ဟုတ်တယ်... စောင့်ကြည့်ရေး ဒရုန်းအုပ်စု လေ... ဒါက လယ်ယာခြံဝင်းနဲ့ သစ်တော အတွက် ပြင်ဆင်ထားတဲ့ လုံခြုံရေး ပစ္စည်းပါ... အချိန်အခါသင့်ရင် သုံးဖို့ စဉ်းစားထားတာ... လွှင့်စက်က ကျွန်တော့် ကျောပိုးအိတ်ထဲမှာ ရှိတယ်... ၂ ကီလိုမီတာ ပတ်လည် အတွင်းမှာ ဒရုန်းတွေက လွတ်လွတ်လပ်လပ် သွားလာလို့ ရတယ်လေ... ၂ ကီလိုမီတာ ဆိုတာ သိပ်မဝေးဘူး ဆိုပေမယ့် ကောင်းကင်ကနေ အပေါ်စီးက ရိုက်ကူးတဲ့ ထောင့်က အတော်လေး ကျယ်တော့ ရိုက်ကူးနိုင်တဲ့ ဧရိယာက ၂ ကီလိုမီတာ ထက် အများကြီး ပိုကျယ်ပါတယ်... ပြီးတော့ လူပုံစံကို ရှာဖွေနိုင်တဲ့ စနစ်လည်း ပါသေးတယ်... လူရှာဖို့ အတော်လေး အဆင်ပြေတယ်လေ"

တစ်ခဏချင်းမှာပင် ရဲအဖွဲ့ တစ်ဖွဲ့လုံးက ဝိုင်းအုံလာကြတော့သည်။

'ဗဟုသုတတွေ တိုးသွားပြီဟေ့... ဒီလိုလည်း လူဖမ်းလို့ ရတာကိုး'

သတင်းထောက်၏ ကင်မရာကလည်း ရွှီယန်ကို အဆက်မပြတ် ရိုက်ကူးနေပြီး သူ၏ လက်များက အနည်းငယ် တုန်ယင်နေကာ မျက်နှာပေါ်တွင်လည်း စိတ်လှုပ်ရှားမှုများ အပြည့် ဖြစ်နေသည်။

သူ၏ ဤသတင်းက သေချာပေါက် ခေါင်းကြီးပိုင်း သတင်း ဖြစ်လာမည်ဟု ကြိုတင် ခန့်မှန်းထားမိသည်။ ယခုလအတွက် ဆုကြေးငွေကလည်း သေချာပေါက် နှစ်ဆ တိုးလာမည်သာ ဖြစ်၏။

နာမည်ကြီး လိုက်ဖ်လွှင့်သူ တစ်ဦးက ဒရုန်းအုပ်စုကို အသုံးပြုကာ လူသတ်သမားကို ဖမ်းဆီးရာတွင် ရဲများကို ကူညီပေးခဲ့သည်ဆိုသော ဤမျှ စိတ်ဝင်စားဖွယ် ကောင်းသည့် ဗီဒီယို အချက်အလက်များကို ရရှိရန် အလွန် ခဲယဉ်းလှပေသည်။

ရွှီယန်က အသံမထွက်ဘဲ ဒရုန်းမှ ပေးပို့လာသော အချက်အလက်များကိုသာ ကြည့်နေလိုက်သည်။ ဒရုန်းက ရှဉ့်များ၊ ဒရယ်ပြောက်များနှင့် မြင်းသမင်များ ကဲ့သို့သော သက်ရှိ အများအပြားကို ရှာဖွေတွေ့ရှိခဲ့သည်။

တိရစ္ဆာန်လေးများက ဒရုန်း၏ အသံကို ကြားသောအခါ ထိတ်လန့်တကြား ထွက်ပြေးသွားကြသည်။ ဤဒရုန်းများက အသံတိတ် မဟုတ်ဘဲ အသံ အနည်းငယ် ထွက်ပေါ်နေသဖြင့် တိရစ္ဆာန်များကို လန့်သွားစေခြင်း ဖြစ်သည်။

တစ်ပတ်ခန့် ရှာဖွေပြီးနောက် မည်သူ့ကိုမျှ မတွေ့ရချေ။ သစ်တောက အလွန် ကြီးမားလွန်းလှသည်။ ရွှီယန်က ဒရုန်း ခြောက်စင်းလုံးကို ပြန်ခေါ်ကာ သိမ်းဆည်းလိုက်ပြီးနောက် လေးလံသော ကျောပိုးအိတ်ကို လွယ်ကာ ဆက်လက် လမ်းလျှောက်သွားတော့သည်။

ဒုစခန်းမှူး ဝမ်ဝေ့ နှင့် လျိုမင် တို့က အလျင်အမြန် အနားသို့ ကပ်လာကြသည်။

"ဆရာ ရွှီယန်"

ဝမ်ဝေ့က အနည်းငယ် လေးစားစွာဖြင့် ခေါ်လိုက်သည်။

"တောင်ထဲမှာ လူသတ်သမားနဲ့များ တွေ့ရင် ဘယ်လိုလုပ်မလဲ... ကျွန်တော်တို့နဲ့ အတူတူ လိုက်ခဲ့ပါလား"

ဝမ်ဝေ့၏ စကားကို ကြားသောအခါ ရွှီယန်က ပြုံး၍ ပြန်ပြောလိုက်သည်။

"ဒုစခန်းမှူး ဝမ်... ကျွန်တော့် ဘက်ကတော့ ပြဿနာ မရှိပါဘူး... ဒါပေမဲ့ တကယ်လို့ ဖမ်းမိသွားရင် ကျွန်တော့်အတွက် ဆုကြေးငွေလေး ဘာလေး ရမလား"

ဝမ်ဝေ့က ချက်ချင်းပင် သဘောတူလိုက်သည်။

"ရှာတွေ့ဖို့သာ အဓိကပါ... ဆုကြေးငွေကို ကျွန်တော် အထက်ကို တင်ပြပေးပါ့မယ်... စံပြ ရွာသား ဆု... သူရဲကောင်း ဆု တွေလည်း အကုန် ပေးမယ်... နောက်ပိုင်း တစ်ခုခု လိုအပ်ရင်လည်း ကျွန်တော့်ကို အားမနာနဲ့နော်"

ယခု အမှုက သူ ရာထူးတက်ရန်အတွက် အခွင့်အရေး တစ်ခု ဖြစ်လာနိုင်ကြောင်း ဝမ်ဒုစခန်းမှူးက သတိထားမိလိုက်သည်။ မတတ်နိုင်ချေ။ သူက အလွန် တိုးတက်ချင်နေသူ ဖြစ်သည်။ အစိုးရ အလုပ်တွင် အောင်မြင်မှု တစ်ခုခု မရှိဘဲနှင့် ရာထူးတက်ရန် တကယ်ကို မလွယ်ကူပေ။

ရွှီယန်က ပြုံးလိုက်သည်။ သူက ထိုဆုကြေးငွေများနှင့် ဆုတံဆိပ်များကို သိပ်ဂရုမစိုက်သော်လည်း ထွက်ပြေးနေသူကို အမြန်ဆုံး ရှာဖွေတွေ့ရှိရန်နှင့် အကူအညီ ပေးရန်သာ ရည်ရွယ်ထားသည်။

မည်သို့ပင်ဆိုစေ သူက ရဲစခန်းနှင့် အတော်လေး ရင်းနှီးသည် မဟုတ်ပါလော။

"ဟုတ်ပြီ... ကျွန်တော် ကူညီပါ့မယ်... ဒါပေမဲ့ ရှာတွေ့မယ်လို့တော့ အာမမခံနိုင်ဘူးနော်... တောင်နောက်ဘက်က အရမ်း ကျယ်လွန်းတယ်"

ရွှီယန်က ပြန်ဖြေလိုက်သည်။

"ရှာမတွေ့လည်း ဘာမှ မဖြစ်ပါဘူး... ကျွန်တော်တို့ အတတ်နိုင်ဆုံး ကြိုးစားရုံပေါ့... ဒီတစ်ခေါက် ရှာဖွေရေး အဖွဲ့တွေလည်း အများကြီးပဲလေ... ပတ်ဝန်းကျင် လမ်းတွေကိုလည်း ပိတ်ဆို့ထားတယ် ဆိုတော့ သူ အလွယ်တကူ ထွက်ပြေးလို့ မရပါဘူး"

ဝမ်ဝေ့က လက်ယမ်းကာ ပြောလိုက်သည်။

ထို့ကြောင့် ရွှီယန်က ရဲများနှင့် အတူ အထဲသို့ ဆက်လက် ဝင်ရောက်သွားတော့သည်။ ဤကိစ္စက ကြည့်ရသည်မှာ အနည်းငယ် ထူးဆန်းနေသည်။ ဤတောင်ပေါ်တွင် မည်သည့် ကိစ္စပဲ ဖြစ်ဖြစ် ရွှီယန်၏ အရိပ်အယောင်က အမြဲတမ်း ပါဝင်နေတတ်ပေသည်။

ဤနေရာက တကယ်ပင် သူ့ပိုင်နက်ကြီး အလား ဖြစ်နေတော့သည်။

အရှေ့သို့ ခဏမျှ ဆက်လျှောက်သွားပြီးနောက် ရွှီယန်က လက်ခံစက်ကို ဖွင့်ကာ ဒရုန်းများကို ထပ်မံ လွှတ်တင်လိုက်ပြန်သည်။

ဒရုန်းများက ကောင်းကင်သို့ မြင့်မားစွာ ပျံတက်သွားပြီး ပတ်ဝန်းကျင် ဧရိယာကို စတင် ရှာဖွေနေတော့သည်။ ဤဒရုန်းအုပ်စု၏ အစွမ်းအထက်ဆုံး အရာမှာ ကင်မရာများပင် ဖြစ်သည်။ ဒရုန်းများက ပတ်ဝန်းကျင် အခြေအနေများကို အလွန် ရှင်းလင်းစွာ ရိုက်ကူးနိုင်ပေသည်။

အဆင်မပြေဆုံး အရာကတော့ လက်ခံစက်က အတော်လေး လေးလံနေခြင်းပင် ဖြစ်သည်။ ကျောပိုးအိတ် လွယ်ထားရသဖြင့် လှုပ်ရှားသွားလာမှုကို အတော်လေး အနှောင့်အယှက် ဖြစ်စေသည်။

ရွှီယန်က ဤခရီးတစ်လျှောက် အတော်လေး ပင်ပန်းနေပြီး ခြေလှမ်းများကလည်း လေးလံနေပြီ ဖြစ်သည်။ ခုနက လူငယ် ရဲအရာရှိ နှစ်ယောက်က အလှည့်ကျ ကူလွယ်ပေးခဲ့သော်လည်း ခဏမျှ လွယ်ရုံဖြင့်ပင် အလွန် ပင်ပန်းသွားကြသည်။

ဒရုန်းများက အရပ်လေးမျက်နှာသို့ ချက်ချင်း ပျံသန်းသွားကြသည်။

ပတ်ဝန်းကျင်တွင် လှုပ်ရှားသွားလာနေသော တိရစ္ဆာန်များကို ကင်မရာများက ဖမ်းယူရရှိခဲ့သည်။ ဤရှာဖွေမှုက လုံးဝ အကွယ်အကွယ် မရှိချေ။

ဒရုန်းများက သတ်မှတ်ထားသော လမ်းကြောင်း အတိုင်း ပျံသန်းမည်ဖြစ်ပြီး နေရာတိုင်းကို အနည်းဆုံး နှစ်ကြိမ်ခန့် ရှာဖွေနိုင်မည် ဖြစ်သည်။

မည်သို့ပင်ဆိုစေ စနစ်၏ အထူးအဆင့် မဲဖောက်ခြင်းမှ ရရှိသော ဆုလာဘ် ဖြစ်ပြီး ကျော်ကြားမှုရမှတ် တစ်သန်းတောင် ကုန်ကျခဲ့ရာ ပစ္စည်းက တကယ်ကို အသုံးဝင်လှပေသည်။

တစ်ချိန်တည်းမှာပင် လူသတ်သမားမှာ သစ်တောထဲရှိ သဘာဝ ကျင်းတစ်ခုထဲတွင် ပုန်းအောင်းနေသည်။

ဤသည်က ယုတ္တိရှိသော အပြုအမူ ဖြစ်သည်။ သူ ထွက်ပြေးနေစဉ်အတွင်း နေရာ ပို၍ ပြောင်ရှင်းလေလေ သူ့ကို ပို၍ စိုးရိမ်ပူပန်စေလေလေ ဖြစ်ပြီး နေရာတိုင်းမှ သူ့ကို စောင့်ကြည့်နေသကဲ့သို့ ခံစားရတတ်ပေသည်။ အလုံပိတ် နေရာမျိုးကသာ သူ့ကို လုံခြုံမှု အနည်းငယ် ပေးစွမ်းနိုင်ပြီး စိတ်ထဲမှ ကြောက်ရွံ့မှုများကို ပြေလျော့စေနိုင်ပေသည်။

သို့သော် မကောင်းမှု ပြုလုပ်ပြီးနောက် ဘာမှ မဖြစ်ခဲ့သကဲ့သို့ ပုံမှန်အတိုင်း စားသောက် နေထိုင်ရဲသည့် လူကြမ်းကြီး အချို့လည်း ရှိတတ်သေးသည်။

ထိုကဲ့သို့သော သူများကို ဖြေရှင်းရန်မှာ အလွန် ခက်ခဲလှပေသည်။

ဤအချိန်တွင် လူသတ်သမား၏ စိတ်ထဲရှိ စိုးရိမ်ပူပန်မှုများက ပို၍ပို၍ ကြီးမားလာခဲ့သည်။ သူက ကြောက်ရွံ့မှုကို မထိန်းနိုင်တော့ဘဲ ကျင်းထဲမှ ခေါင်းပြူကာ အပြင်ဘက်ကို တစ်ချက် လှမ်းကြည့်လိုက်သည်။

ထိုတစ်ချက် ကြည့်လိုက်ရုံဖြင့်ပင် ဒရုန်း၏ ကင်မရာက သူ့ကို ချက်ချင်း ဖမ်းမိသွားတော့သည်။ ဒရုန်းမှ အချက်အလက်များ ပေးပို့လာသည်နှင့် စနစ်က သတိပေးသံ ချက်ချင်း မြည်လာပြီး မြင်ကွင်းကိုပါ ပြသပေးလိုက်သည်။

ရွှီယန်က ဆောင့်ကြောင့် ထိုင်ချကာ လက်ပ်တော့ကို အသုံးပြုနေသည်။ သူက လက်ပ်တော့ပေါ်မှ မြင်ကွင်းကို လက်ညှိုးထိုးပြကာ ပြောလိုက်သည်။

"တွေ့ပြီ... ခင်ဗျားတို့ ကြည့်ကြည့်... ဟုတ်လားလို့"

ထိုစကားကို ကြားသည်နှင့် ရဲများ အားလုံး ချက်ချင်း ဝိုင်းအုံလာကြတော့သည်။ ဗီဒီယို မြင်ကွင်းကို မြင်သောအခါ အားလုံး ချက်ချင်း စိတ်လှုပ်ရှားသွားကြသည်။

"သူပဲ... ဟုတ်တယ်"

"ဘယ်မှာလဲ"

"တွေ့ပြီဟေ့... ဖမ်းဖို့ ပြင်ကြ"

ဒုစခန်းမှူး ဝမ်ဝေ့ က စကားပြောစက်ကို ချက်ချင်း ကောက်ကိုင်ကာ သတင်းပို့လိုက်သည်။

"အဖွဲ့တိုင်း သတိထားပါ... ကျွန်တော်တို့ အဖွဲ့က ပစ်မှတ်ရဲ့ တည်နေရာကို ရှာတွေ့ပါပြီ... ထပ်ပြောပါမယ်... ကျွန်တော်တို့ အဖွဲ့က ပစ်မှတ်ရဲ့ တည်နေရာကို ရှာတွေ့ပါပြီ... ဖမ်းဆီးဖို့ ပြင်ဆင်နေပါတယ်... ကျွန်တော်တို့ဆီကို အမြန်လာခဲ့ကြပါ"

ပြောပြီးသည်နှင့် သူက လူများကို ခေါ်ကာ လူသတ်သမား ရှိရာဘက်သို့ ထွက်သွားတော့သည်။

နောက်ဆက်တွဲ ကိစ္စများကို ရွှီယန်က ဝင်ရောက် စွက်ဖက်ရန် မလိုအပ်တော့ချေ။

ရွှီယန်က ဒရုန်းများကို အကုန် ပြန်သိမ်းကာ ထွက်ခွာရန် ပြင်ဆင်လိုက်သည်။ သူက ပတ်ဝန်းကျင်ရှိ တောတောင်များကို ကြည့်လိုက်သည်။ ဤနေရာကို သူ အလွန် ရင်းနှီးနေပြီး အကြိမ်ပေါင်းများစွာ သွားလာဖူးသဖြင့် သံယောဇဉ် အနည်းငယ်ပင် ရှိနေပြီ ဖြစ်သည်။

သိပ်မကြာခင်မှာပင် ရဲများက လူသတ်သမားကို ဖမ်းဆီးနိုင်ခဲ့သည်။ တစ်ဖက်လူတွင် ဓားတစ်လက်သာ ရှိပြီး ရဲခွေးများ ပါလာသော ရဲခြောက်ယောက်၊ ခုနစ်ယောက်ခန့်ကို မြင်သောအခါ ချက်ချင်းပင် လက်မြှောက်ကာ မြေကြီးပေါ်တွင် ထိုင်ချလိုက်ပြီး နည်းနည်းလေးမျှပင် ခုခံလိုစိတ် မရှိတော့ချေ။

ဒေါသဆိုသည်မှာ တကယ်ကို မကောင်းဆိုးဝါး တစ်ကောင်ပင် ဖြစ်သည်။

အချိန်အတော်များများတွင် ဒေါသအလျောက် ပြုလုပ်မိသော အမှားများက ကြီးမားသော ဆိုးကျိုးများကို ဖြစ်ပေါ်စေတတ်သည်။ ထို့ကြောင့် စိတ်ခံစားချက်ကို တည်ငြိမ်အောင် ထားနိုင်ခြင်းကသာ အကောင်းဆုံး ဖြစ်ပေသည်။

ဤအမှုက အလွန် ကြီးလေးသော အမှုကြီး တစ်ခု အဖြစ် သတ်မှတ်ခံရသည်။

ရဲတပ်ဖွဲ့က တစ်ရက်အတွင်းမှာပင် အမှုကို ဖော်ထုတ်နိုင်ပြီး တရားခံကိုပါ ဖမ်းဆီးနိုင်ခဲ့သဖြင့် ရွာရှိ ရဲစခန်းက အထူး ချီးကျူးခံခဲ့ရသည်။ သေချာသည်မှာ ရွှီယန်နှင့် သက်ဆိုင်သော ချီးကျူးဂုဏ်ပြုမှုများလည်း ထွက်ပေါ်လာခဲ့သည်။

ယခုအခါ ငွေပေးရသည်က အတော်လေး ရယ်စရာ ကောင်းနေသည်။

ဒုစခန်းမှူး ဝမ်ဝေ့ က ရွှီယန်ကို ဆုကြေးငွေ ယွမ် တစ်သိန်းနှင့် သူရဲကောင်း စံပြ ရွာသား ဆုကိုပါ လျှောက်ထားပေးခဲ့သည်။ ထို့အပြင် မြို့တော်မှ အကြီးအကဲများကိုယ်စား ရွှီယန်ကို ကျေးဇူးတင်စကား ပါးခဲ့သေးသည်။

ထို့အပြင် မီဒီယာများကလည်း စတင် လှုပ်ရှားလာပြီး ဤကိစ္စက သတင်းများတွင် အလျင်အမြန် ပေါ်ထွက်လာခဲ့သည်။

သို့သော် မီဒီယာများက ရွှီယန်၏ တောင်းဆိုချက်အရ သူ့ကို မျက်နှာ ဖုံးကွယ်ပေးထားခဲ့သည်။ သတင်းတွင် 'စေတနာရှင် လယ်ယာခြံဝင်း ပိုင်ရှင် ရွှီXXX က ဒရုန်းအုပ်စုကို အသုံးပြု၍ ရဲတပ်ဖွဲ့အား တောင်နောက်ဘက်တွင် တရားခံ ဖမ်းဆီးရာ၌ ကူညီခဲ့သည်' ဟုသာ ဖော်ပြထားသည်။

ဤသတင်းက အင်တာနက်ပေါ်တွင် အလျင်အမြန် ရေပန်းစားသွားခဲ့သည်။ အင်တာနက်သုံးစွဲသူများက ဤမျှ ထူးဆန်းသော သတင်းကို မြင်သောအခါ ချက်ချင်းပင် ရွှီယန် ဖြစ်မည်ဟု ထင်မှတ်သွားကြသည်။

သတင်းထဲမှ မျက်နှာ ဖုံးကွယ်ထားသော ပုံရိပ်ကို မြင်သောအခါ ရွှီယန် ဖြစ်ကြောင်း ရာခိုင်နှုန်းပြည့် သေချာသွားကြတော့သည်။

အင်တာနက်သုံးစွဲသူများမှာ ချက်ချင်းပင် မရယ်ဘဲ မနေနိုင်အောင် ဖြစ်သွားကြတော့သည်။

'နေပါဦး... လောင်ရွှီ ရဲ့ ဒီမျက်နှာ ဖုံးကွယ်ထားတာက ဖုံးတာရော မဖုံးတာရော ဘာကွာလို့လဲ... သူ့ကို ဘယ်သူက မသိလို့လဲ'

'ဟားဟားဟား... တကယ်ပဲ မျက်နှာ ဖုံးကွယ်ဖို့ လိုလို့လား'

'လယ်ယာခြံဝင်း ပိုင်ရှင်... ရွှီXXX... ဒရုန်းအုပ်စု... တောင်နောက်ဘက်... ဘယ်သူဆိုတာ တွေးကြည့်လို့ မရဘူးလား'

'လောင်ရွှီ က တစ်နေ့တစ်နေ့ လိုက်ဖ်လွှင့်တာ မဟုတ်ရင် ဘာတွေ လုပ်နေတာလဲ... နေရာတိုင်းမှာ သူပဲနော်'

'တကယ့် ချန်ပိုင်တောင်တန်း ရဲ့ လူမိုက်ကြီးပဲ... လူသတ်သမား ကိစ္စတောင် ဝင်ပါသေးတယ်'

'လိုက်ဖ် အမြန် လွှင့်ပါတော့'

ရွှီယန်၏ နာမည်ကျော်ကြားမှုက အတော်လေး ကြီးမားလှပေသည်။

တကယ်တမ်းတွင် ဤကဲ့သို့သော သတင်းများက ပုံမှန်အားဖြင့် လူအနည်းငယ်၏ အာရုံစိုက်မှုကိုသာ ရရှိလေ့ ရှိသည်။ အဘယ်ကြောင့်ဆိုသော် ရွာအများစုတွင် ဤကဲ့သို့သော ကိစ္စမျိုး ဖြစ်လေ့ ရှိသောကြောင့်ပင်။ စိတ်ဝင်စားသူ သိပ်မရှိချေ။

သို့သော် ဤတစ်ကြိမ်တွင် ရွှီယန်က ကူညီ ဖမ်းဆီးပေးခဲ့ခြင်း ဖြစ်သဖြင့် ချက်ချင်းပင် လူအများ၏ အာရုံစိုက်မှုကို ရရှိသွားခဲ့သည်။ ဗီဒီယိုကို ကြည့်ခြင်းဖြင့် ရွှီယန်တွင် အဆင့်မြင့် နည်းပညာ ပစ္စည်းများ အများအပြား ရှိကြောင်း သိနိုင်ပေသည်။ ကြည့်ရုံဖြင့်ပင် အစွမ်းထက်သူမှန်း သိသာလှပေသည်။

နောက်တစ်နေ့ ညဘက်တွင် ရွှီယန်က ပုံမှန်အတိုင်း လယ်ယာခြံဝင်းထဲရှိ တိရစ္ဆာန်လေးများ၏ ဗီဒီယိုကို တင်ပေးလိုက်သည်။ အဓိကအားဖြင့် နေမကောင်း ဟန်ဆောင်နေသော တောသမင်ငယ်လေးနှင့် ဟက်စကီ တို့ အတူတကွ လမ်းလျှောက်နေသည့် မြင်ကွင်းကို ရိုက်ကူးထားခြင်း ဖြစ်သည်။

အင်တာနက်သုံးစွဲသူများက မှတ်ချက်များတွင် ရေးသားကာ အမှုပေါ်သွားသည့် ကိစ္စနှင့် ပတ်သက်၍ အဆက်မပြတ် မေးမြန်းနေကြသည်။

'လောင်ရွှီ... မင်းက ဘယ်လိုလုပ်ပြီး ဒီလောက် အစွမ်းထက်နေတာလဲ... ဒီလို အမှုကြီးတွေမှာတောင် မင်း ပါဝင်နေသေးတယ်'

ရွှီယန်က မှတ်ချက်များကို မြင်သောအခါ ရိုးရှင်းစွာပင် ပြန်လည် ဖြေကြားလိုက်သည်။

"ကြုံလို့ ကူညီလိုက်တာပါ"

ဤအကြောင်းပြန်ချက်ကို မြင်သောအခါ အားလုံးက အတော်လေး ရယ်စရာ ကောင်းသည်ဟု ထင်ကာ အားရပါးရ ရယ်မောလိုက်ကြသည်။

'ဟားဟားဟား... လောင်ရွှီ... မင်းက တကယ်ကို နှိမ့်ချ မနေဘူးပဲ'

'အဲဒီလူက မင်းဆိုတာ ဝန်ခံလိုက်ပြီပေါ့'

'ဒီလောက် အဆင့်မြင့်တဲ့ ပစ္စည်းတွေ ဘယ်ကရလာတာလဲ... လိုက်ဖ်လွှင့်ပြီး ပြပါဦးလား'

'မင်းက အရမ်း ပရော်ဖက်ရှင်နယ် ဆန်လွန်းနေပြီ'

မှတ်ချက်များက ပို၍ပို၍ များပြားလာသည်။

ရွှီယန်၏ နာမည်ကျော်ကြားမှုကလည်း အဆက်မပြတ် တိုးတက်လာခဲ့သည်။

လက်ရှိတွင် သူ၏ ပရိသတ် အရေအတွက်က ၉ သန်း အထိ ရောက်ရှိနေပြီဖြစ်ပြီး မကြာခင်မှာပင် ၁၀ သန်း ပြည့်တော့မည် ဖြစ်သည်။

မသိမသာဖြင့်ပင် တောင်ပေါ်တက်ကာ လယ်ယာခြံဝင်း ဖွင့်ထားသော ဤလယ်ယာခြံဝင်း ပိုင်ရှင်လေးသည် အင်တာနက်ပေါ်တွင် သြဇာလွှမ်းမိုးမှု အလွန် ကြီးမားသူ တစ်ဦး ဖြစ်လာခဲ့ပြီ ဖြစ်သည်။ သူ့ကို နှစ်သက်သူများကလည်း အလွန် များပြားလှပေသည်။