အခန်း ၄၃၈

အခန်း (၄၃၈) ဒါဆို ဘာဖြစ်လဲ

ချိုးချန်ထိုက်က ​ရပ်လိုက်ပြီး ချန်ဖေးကို လှည့်ကြည့်လိုက်သည်။ သူ၏ မျက်နှာထားမှာ ချက်ချင်းပင် လေးနက်သွားသည်။ ဒွာရ (၁၀၈) ခုလုံး ချိတ်ဆက်ထားသည့် ချန်ဖေး၏ အရှိန်အဝါမှာ အလွန်ပြည့်စုံနေသည်။

ယွမ်ချန်ဓားဂိုဏ်းတွင် ဒွာရသန့်စင်ခြင်း အထွတ်အထိပ်အဆင့် သိုင်းပညာရှင် ရှိနေလိမ့်မည်ဟု ချိုးချန်ထိုက် လုံးဝ မမျှော်လင့်ထားခဲ့ပေ။ သူစုံစမ်းထားသမျှတွင် ဂိုဏ်းနှစ်ခုစလုံး၏ အစွမ်းထက်ဆုံးသူများမှာ ဒွာရသန့်စင်ခြင်း နောက်ဆုံးအဆင့်လောက်သာ ရှိကြပြီး အထူးတလည် အစွမ်းထက်သူများ မဟုတ်ဟု သိထားခဲ့ခြင်းဖြစ်သည်။ ထို့ကြောင့် သူသည် လော့စန်းဖုန်းကိုသာ ခေါ်၍ အပန်းဖြေခရီးထွက်သကဲ့သို့ ပေါ့ပေါ့ပါးပါး လာရောက်ခဲ့ခြင်း ဖြစ်သည်။

သို့သော်လည်း ယခု ပေါ်လာသူမှာ မည်သူနည်း။

"ချန်ဖေး!"

ချန်ဖေး ပေါ်လာသည်ကို မြင်သောအခါ ချွီချင်းရှန်းမှာ စိုးရိမ်တကြီး ဖြစ်သွားသော်လည်း ချန်ဖေး၏ အရှိန်အဝါကို မြင်လိုက်ရသောအခါ စိုးရိမ်မှုများ ရပ်တန့်သွားသည်။ ချန်ဖေးမှာ ဒွာရသန့်စင်ခြင်း အထွတ်အထိပ်အဆင့်သို့ ရောက်ရှိသွားပြီဖြစ်သည်။

ယွမ်ချန်ဓားကျမ်းစာကို ပြန်မရရှိသေးခင်မှာပင် သူက ဒွာရ (၁၀၈) ခုလုံး ပွင့်သွားသည့်အဆင့်သို့ မည်သို့ ရောက်ရှိသွားသနည်း။ တစ်နှစ်အတွင်း၌ပင် ဒွာရသန့်စင်ခြင်း အစောပိုင်းအဆင့်မှ အထွတ်အထိပ်အဆင့်သို့ တက်လှမ်းခြင်းမှာ အလွန်ပင် မယုံနိုင်စရာကောင်းလောက်အောင် မြန်ဆန်လွန်းလှသည်။

ချန်ဖေးက ယွမ်ချန်ဓားဂိုဏ်းမှ အကြီးအကဲများကို ခေါင်းညိတ်ပြလိုက်ပြီးနောက် ချွီချင်းရှန်း၏ ဒဏ်ရာများကို စစ်ဆေးလိုက်သည်။ ဝိညာဉ်သော့ခတ်မျှော်စင်က အင်အားအများစုကို စုပ်ယူထားသဖြင့် ကံကောင်းထောက်မစွာပင် သေလုမျောပါး ဒဏ်ရာ မရခဲ့ပေ။

"မင်းလည်း ယွမ်ချန်ဓားဂိုဏ်းကပဲလား"

ချိုးချန်ထိုက်က ချန်ဖေးကို လေးနက်စွာ မေးလိုက်သည်။

ချန်ဖေးက ပြန်မဖြေခဲ့သလို ချိုးချန်ထိုက်ကို တစ်ချက်မျှပင် မကြည့်ခဲ့ပေ။ သူသည် ကျိုးကျိရွှမ်းဆီသို့သာ သွားရောက်ခဲ့သည်။ ကျိုးကျိရွှမ်း၏ ဒဏ်ရာများမှာ ပိုမိုပြင်းထန်ပြီး သူ၏သက်တမ်းမှာလည်း နီးကပ်နေသဖြင့် ဒဏ်ရာများမှာ ပိုမို ဆိုးရွားလာသည်။ ချန်ဖေးက သူ၏အင်္ကျီလက်စမှ ဆေးလုံးပုလင်းတစ်လုံးကို ထုတ်ယူကာ ကျိုးကျိရွှမ်းအား တိုက်ကျွေးလိုက်သည်။ ဤဆေးလုံးမှာ သူ ဌာနေပြန်ဓားမျှော်စင်ထံမှ ရရှိထားသော ဆေးလုံးဖြစ်ပြီး အာနိသင်မှာ အလွန်ကောင်းလှသည်။

ဖုန်းရှိုးဖူသည် ကျိုးကျိရွှမ်းဘေးတွင် ရပ်နေရင်း ချန်ဖေးကို ကြည့်၍ စိုးရိမ်စိတ်များ ရှိနေသည်။ ချန်ဖေး၏ တိုးတက်မှုကို ဂုဏ်ယူသော်လည်း ချိုးချန်ထိုက်ကို ရင်ဆိုင်နိုင်ပါ့မလားဟု စိုးရိမ်နေခြင်းဖြစ်သည်။ ချန်ဖေးက လုံးဝ တုံ့ပြန်မှု မရှိသဖြင့် ချိုးချန်ထိုက်ကို လွှတ်ပေးရန် ရည်ရွယ်ချက် မရှိကြောင်း ဖုန်းရှိုးဖူ သိလိုက်သည်။

"မင်းရဲ့ သဘောထားက နည်းနည်းလေး မယဉ်ကျေးဘူး မဟုတ်လား"

ချန်ဖေးက တုံ့ပြန်မှု မရှိသဖြင့် ချိုးချန်ထိုက်၏ အသံမှာ အေးစက်လာသည်။

"ငါတို့ နှစ်ယောက်စလုံးက ဒွာရသန့်စင်ခြင်း အထွတ်အထိပ်အဆင့်တွေ ဖြစ်ကြတာကို မင်းက မေးတာတောင် ပြန်မဖြေဘူးလား"

"မင်း ဘယ်လိုသေမလဲဆိုတာ တွေးပြီးပြီလား"

ချန်ဖေးက မတ်တတ်ရပ်လိုက်ပြီး ချိုးချန်ထိုက်ကို တစ်ချက်ကြည့်ကာ ကျီရွေ့ချင်းထံသို့ လျှောက်သွားလိုက်သည်။ ချန်ရွှေတောင်ကြားဂိုဏ်းမှ လူများက လမ်းဖယ်ပေးလိုက်ရာ ချန်ဖေးသည် ကျီရွေ့ချင်း၏ ဝမ်းနည်းဖွယ် အခြေအနေကို မြင်လိုက်ရသည်။

"မောက်မာလိုက်တာ!"

ချန်ဖေးက ချိုးချန်ထိုက်ကို ပြောလိုက်တဲ့စကားကို ကြားတဲ့အခါ လော့စန်းဖုန်း ဒေါသထွက်သွားသည်။ သူတို့နှစ်ယောက်စလုံးက ဒွာရ (၁၀၈) ခု ဖွင့်လှစ်ထားကြပြီး ဒွာရသန့်စင်ခြင်း အထွတ်အထိပ်အဆင့်မှာ ရှိနေကြသည့်အပြင် ကျင့်ကြံမှုအဆင့်လည်း တူညီကြသည်။ ယခုကဲ့သို့အခြေအနေမျိုးမှာ ချန်ဖေးက အဘယ်‌ကြောင့် ရဲရဲဝံ့ဝံ့ ဤသို့ စကားမျိုး ပြောသနည်း။

"မင်းက ဒွာရသန့်စင်ခြင်း အထွတ်အထိပ်အဆင့်ကို အခုမှ တက်လှမ်းလာတာ မဟုတ်လား၊ ဒီအဆင့်မှာ ကွာခြားချက်တွေ အများကြီး ရှိသေးတယ်ဆိုတာ မင်းမသိဘူးလား"

ချိုးချန်ထိုက်က ရယ်မောလိုက်သည်။

ချန်ဖေးက ချိုးချန်ထိုက်၏ မေးခွန်းကို မဖြေဘဲ လော့စန်းဖုန်းကိုသာ ကြည့်လိုက်သည်။

"သူတို့ကို နာကျင်အောင် လုပ်ခဲ့တာ မင်းပဲပေါ့!"

ချန်ဖေး၏ အသံမှာ တိုးညင်းသော်လည်း လော့စန်းဖုန်းမှာ ကြောက်မက်ဖွယ် ဖိအားတစ်ခုကို ခံစားလိုက်ရပြီး မျက်နှာထား ပျက်သွားသည်။

"ဟုတ်တယ်! ဒါဆို ဘာဖြစ်လဲ!"

လော့စန်းဖုန်းက ချန်ဖေးကို ကြည့်၍ အော်ဟစ်လိုက်သည်။ သူမဘေးတွင် ချိုးချန်ထိုက် ရှိနေသဖြင့် ချန်ဖေးကို မကြောက်ရွံ့ပေ။

"ဝန်ခံလိုက်တာပဲ!"

စကားဆုံးသည်နှင့် ချန်ဖေးက လော့စန်းဖုန်း၏ ရှေ့တွင် ပေါ်လာပြီး လည်ပင်းကို ဆုပ်ကိုင်လိုက်သည်။

"ရိုင်းစိုင်းလှချည်လား!"

ချိုးချန်ထိုက် အော်ဟစ်လိုက်ပြီး ချန်ဖေး၏ ခေါင်းဆီသို့ ဓားဖြင့် ခုတ်ပိုင်းလိုက်သည်။

လော့စန်းဖုန်းကလည်း ပြန်လည် ယုံကြည်မှု ရှိလာပြီး ချန်ဖေး၏ မျက်လုံးဆီသို့ ဓားမြှောင်ဖြင့် ထိုးစိုက်လိုက်သည်။

"ဘုန်း!"

ခန်းမတစ်ခုလုံး ပြင်းထန်စွာ တုန်ခါသွားသည်။ ချန်ဖေးက ချန်ယွမ်ဓားဖြင့် ချိုးချန်ထိုက်၏ ဓားကို အလွယ်တကူ ကာကွယ်လိုက်ပြီး နောက်တစ်ဖက်ဖြင့် လော့စန်းဖုန်း၏ ဓားမြှောင်ကို ဖမ်းဆုပ်ကာ သူမ၏ညာလက်ကို လိမ်ချိုးပစ်လိုက်သည်။

"အား!"

လော့စန်းဖုန်း၏ ဓားမြှောင်မှာ မြေပြင်ပေါ်သို့ ကျသွားပြီး သူမအော်ဟစ်လိုက်သည်။

"မင်း ဘယ်လောက်တောင် ရဲတင်းလိုက်သလဲ!"

မိန်းမဖြစ်သူ ဒဏ်ရာရသွားသည်ကို မြင်သောအခါ ချိုးချန်ထိုက်၏ အရှိန်အဝါများ ပြင်းထန်စွာ တက်လာသည်။ သူ၏ ရေလွှမ်းမိုးခြင်း ကျင့်စဉ်မှာ ပိုမို တိကျသေသပ်လာပြီး စွမ်းအားများ တစ်စက်မကျန် ထိန်းချုပ်ထားနိုင်ခဲ့သည်။ သူသည် ချန်ဖေးကို နှစ်ပိုင်း ပိုင်းဖြတ်ပစ်ရန် ရည်ရွယ်ချက်ဖြင့် ဓားကို မြှောက်လိုက်သည်။

"ချွင်!"

ချန်ယွမ်ဓားက ချိုးချန်ထိုက်၏ ဓားကို ထပ်မံ ပိတ်ဆို့လိုက်သည်။ ချိုးချန်ထိုက်၏ တိုက်ခိုက်မှုမှာ ယခင်ကထက် ပိုအားကောင်းသော်လည်း ချန်ဖေးအပေါ် ဘာမှ မသက်ရောက်ခဲ့ပါ။

"ဖြန်း!"

လော့စန်းဖုန်း၏ ပါးပြင်ကို တစ်ချက် ရိုက်လိုက်ရာ သူမ၏ ပါးတစ်ဖက်မှာ ထုံကျဉ်သွားသည်။ နောက်ထပ် တစ်ချက် ထပ်ရိုက်လိုက်ရာ သူမ၏ ပါးနှစ်ဖက်စလုံးမှာ ထုံကျဉ်သွားပြီး သွားများ ကျိုးကြေသွားသည်ကို ခံစားလိုက်ရသည်။

"ဘုန်း!"

လော့စန်းဖုန်း မြေပြင်ပေါ်သို့ လွင့်စင်သွားသည်။ သူမ၏ ပါးပြင်တွင် ဘာမှ မခံစားရတော့ဘဲ သွားများ ကျိုးကာ အတွင်းအင်္ဂါများ ပြင်းထန်စွာ ဒဏ်ရာရသွားသည်။

"အား! မင်းကိုသတ်ပစ်မယ်!"

ချိုးချန်ထိုက်၏ မျက်လုံးများ နီရဲသွားပြီး ရေလွှမ်းမိုးခြင်း ကျင့်စဉ်၏ တားမြစ်ထားသော သိုင်းကွက်ဖြစ်သည့် ယင်ယန် လျှို့ဝှက်ချက်ကို အသုံးပြုလိုက်သည်။

"ဝေါင်း!"

ချန်ဖေး၏ ခန္ဓာကိုယ်ထဲမှ နဂါးနှင့် ဆင်ဟိန်းသံ ထွက်ပေါ်လာပြီး ချန်ယွမ်ဓားပေါ်တွင် အနက်ရောင် ယွမ်ချန်ဓားကျမ်းစာ အရှိန်အဝါများ ဖုံးလွှမ်းသွားသည်။

"ဘုန်း!"

ကြီးမားလှသော စွမ်းအားကြောင့် ခန်းမ၏ အမိုးမှာ ပေါက်ထွက်သွားသည်။ ဖုန်မှုန့်များကြားမှ ချိုးချန်ထိုက်မှာ မြေပြင်ပေါ်သို့ လွင့်စင်သွားကာ အကြိမ်ကြိမ် လူးလှိမ့်သွားသည်။

ချန်ဖေးက ဖြည်းညင်းစွာ လမ်းလျှောက်ထွက်လာပြီး ချိုးချန်ထိုက်ထံသို့ ရောက်ရှိသွားသည်။ လျှို့ဝှက်နဂါးနှင့် ဖီးနစ် အဆင့်စာရင်းတွင်ပင် မပါဝင်နိုင်သည့် ဒွာရသန့်စင်ခြင်း အထွတ်အထိပ်အဆင့် သိုင်းပညာရှင်တစ်ယောက်မှာ ချန်ဖေး၏ တိုက်ခိုက်မှု တစ်ကွက်တည်းဖြင့်ပင် ရှုံးနိမ့်သွားပါတော့သည်။